#رواية_أبي_والغزلان_الجزءالثاني
#للكاتبة___REEM___ريام_هادي
#البارت_السادس_والثلاثون
شسولف والعمر ما جاي سد بـ سد
دنيا وطشرتني بين جزر ومد
نذرت شكد
دعيت شكد
چم طارش أدز لـ الله
واتاني وما يجيني الرد !
فيصل : هاي صديقة تره
غزل : وحتى لو مو صديقة او حبيبة حتى لو زوجتك متهمني
فيصل : هاااا هيج
غزل : اي من رخصتك اخذ راحتك أخرناك يله نوران نطلع
نوران : يله غزوله
فيصل : اوكفي خلي ارجع وياكم
غزل : ميحتاج كمل سهرتك اني ابقى شويه وياهم وارجع
حسن : يله بنات امشو ولا يصيرلك جاره
غزل : طلعنا نتمشى حطيت ايدي بلقمصله وامشي وساكته وهمه ساكتين لحد مطكت نوران متحملت
نوران : غزل شو ساكته
غزل : شأحجي
نوران : احجي تعاركي عيطي
غزل : وبعدين
حسن : شنو وبعدين
غزل : قصدي حجيت تعاركت وصيحت وبعدين شنو الي راح يتغير
مراح يتغير شى لان انتم اثنينكم تدرون بصديقكم حتى اكثر مني راح يفشلني ويسمعني كلام سم وتاليها هو يصير ابو الراهي عليه وصاحب حق لهذا احترم نفسي واسكت
حسن : انتي دوم هيج
غزل : شلون يعني هيج
حسن : هادئه ومتغثين نفسج
غزل : ماكو واحد مينغث بس كلمن وطريقته بلتعبير عندي خواتي الله يذكرهن بلخير رشا وريم لو صاير هذا الموقف كدامهم جان المطعم تفلش على راس فيصل وصديقته
نوران : اي والله هاي النسوان الحوك مو انتي الفاهيه
غزل : ههههه على كوله ريم ام نص لسان
حسن : بلعكس هدوئج ينرفع القبعه اله احتراماً
غزل : نرجع للبيت
نوران : قصدج للشقه
غزل : متعلمه بحلكي البيت
رجعنا نتمشى ورجعت التزمت الصمت وهمه يسولفون لحد موصلنا
حسن : محتاجه شى
غزل : شكراً على الطلعه
نوران : اااخ يابرودج
غزل : شبيج نوران
نوران : اني كلت اليوم فيصل يجينا مفشخ وبيدي اضمده واضحك عليه
غزل : افشخي انتي وضمدي
نوران : متريدين تعرفين هاي منو
غزل : حبيبتة
نوران : لا ياربي تعرفين
غزل : تره مبينه احد كال الج طفله وماافهم
نوران : وعادي هيج ريلاكس
غزل : تصبحون على خير
نوران : تعالي يمعوده خلي افهم
غزل : تعبانه والله غيره مره من رخصتكم فتحت باب الشقه ودخلت نزعت القمصله والبوت وشمرت نفسي على القنفه ورافعه عيوني للسكف اكول شنو الي جابرني على هاي العيشه رجال ميحبني ويحب غيري بس شسوي اطلك والناس شلون وبابا وعمو محسن اخاف تخرب علاقتهم رغم ماكو اي حب بيني وبين فيصل بس حييل تأذيت من شفته يعني كل هذا الوكت الي يگضي بره وياها يمي لا يضحك ولا يسولف ولا يهتم وهناك حاضنها وتبوس بيه وضحك ليش نار بصدري وكوه اتنفس كمت ذبيت ملابسي وسبحت ونشفت شعري وكاعده بلغرفه اباوع بلمرايه على رگبتي اذا تعالجت شلون تصير وجان تنفتح باب الغرفه حتى بدون ميدكها
فيصل : انتي شعندج تفترين بليالي بلمطاعم
غزل : لزمت شعري وبديت اضفره واحجي برود اعتقد انت سامح الي اطلع ويه نوران وحسن وصار اكثر من شهر مطالعه واتصلت بيك قبل لا اطلع ومجاوبت ورديت دزيت الك رساله شنو الاسوي بعد
فيصل : ماطول مجاوبت مطلعين
غزل : صار
كمت ادور على قراصه اشد طرف الكصيبه
فيصل : تره الجانت ويايه صديقه مثل نوران ًحسن
غزل : باوعت عليه وكتله صديقه اخت حبيبة ميهمني
فيصل : هااااا اول مره اشوف وحده تكول لرجلها بعد مشافته ويه وحده ميهمني
غزل : لان فعلاً هذا الشى انت كلك متهمني
فيصل : احترمي نفسج واحجي عدل
غزل : اني متجاوزت ولا قللت احترام كتلك الواقع هسه اني اهمك لا مااهمك لو اموت هسه كدامك كأنسانياً احتمال تتعاطف ويايه بس مو روحياً ولا محبه ولا كزوجه يعني بلمحصله اني مااهمك
فيصل : انتي شبيج بارده ثلاجه احسج ميته وتمشين
غزل :سكتت ومجاوبت
فيصل : احجي لتسكتين
غزل :شوف فيصل من الاول انت مرايدني واتزوجتني ارضاء لاهلك يعني هسه لو اشعل العشره شمع مراح ترضى ولا راح يعجبك هاي اول شى والشى الثاني انت اصلاً معايش ويايه كلها ٩ ايام بدايه الزواج وهسه ٤ اشهر خلصتها بره تجي بس تتريك وبليل ترجع تنام كعدت مره سولفت كعدت سألتني افتهمت شى عني عايفني بين ٤ حياطين بلد غريب وحدي وحطيتني بيد ناس غربه والله اصدقائي ذوله يااصدقاء وانت رجلي متعرف شئ عني لتكول ثلاجه وانت اصلاً سبب هذا البرود احجي بعد لو اسكت
فيصل : لا اسكتي
غزل : جيد عفته وكمت طلعت للمطبخ وحضرت عصير وشربت حتى مكتله تريد او لا وهو طب بلغرفه الثانيه وركع الباب
رجعت للغرفه وسديت الباب وكعدت اگلب جنت مسويه فيس نوران علمتني عليه سامعه بهذا البرنامج بس مااعرفه تالي كعدت وسوتلي جديد وعلمتني عليه كمت ادخل كروبات واتصفح اخلص وكت كلت من اخابر خواتي اخليهن هنه هم يسوون
مر اسبوع على الصار واخاف قبل جان يحجي كلمة هسه اخرس فد مره بس السلام عليكم وعليكم السلام
اجت نوران وتريد تعزمني على سهره وياهم
غزل : مااكدر
نوران : ليش والله تتونسين
غزل : خليني هنا مااريد مشاكل ويه فيصل
نوران : لعد هو حلال يفتر ويه كاتيا ومتونس وانتي حابسه نفسج هنا
غزل : مرتاحه هيج مااريد اطلع
نوران : متضوجين تكعدين وحدج ومتحجين ويه احد
غزل : تعلمت وحتى لو اضوج مراح يتغير شى
نوران : انتي حلج الوحيد تستعجلين بسالفه العمليه هواي راح تغير من نفسيتج
غزل : اتمنى على كلاً اخذي راحتج راح تتأخرين طلعت نوران ورجعت للوحده مالتي مكابله لو التلفزيون لو الموبايل
نهر : كعدت على صلاه الفجر والجو بارد كلش شهر ١٢ كعد اتوضى كلت اقرالي شويه قران بين ميأذن توضيت ورحت للمطبخ اشرب مي وسمعت صوت خفيف كلش مال بجي ياستار هاي منو دورت الصوت تالي انتبهت باب المطبخ القفل مفتوح وخرت البرده واشوف وحده كاعده بلحديقه على الحافه منطيه ظهرها ركزت شفتها ريم رافعه راسها للسما وتبجي فتحت الباب مسحت دموعها
هااا يمه شسوين هنا كاعده بهلبرد
ريم : هااا عمه ماكو شى هيج شويه كلت اشم هوا
نهر : شو بله اشوفج ودرت وجهه عليه والعيون دم شبيج يمه كعدت بصفها
ريم : ماكو شى ليضل بالج مخنوكه وبس
نهر : سحبت راسها وحطيتها على صدري وامسد بشعرها شبيج احبيبة احجيلي شنو الي خانكج ومطلعج بهلبرد بره تبجين
ريم : اشتاقيت لبنتي ولسامر حيييل وشهكت
نهر : سوده عليه اعرف يمه نارج بعدها وجرحج ماطاب بس شنسوي امر الله هذا ولا اعتراض على حكمه
ريم : تعبانه عمه حيييل تعبانه احس نار بروحي تاكل بيها
نهر : ادري بيج غير تربات ايديه تعلميني بسوالفج حتى من تسولفين وتردين تريحين اختج انتي ما مرتاحه
ريم : شسوي والله مرات اعتب على رب العالمين ليش مااخذني وياهم
نهر : حرام يمه هذا اعتراض على حكمه كولي ياالله وهذا ابنج شنو ذنبه شفتي لان رجع لحضنج شلون تفح وطاير بيج خطيه يتيم شنو ذنبه تعيشين بهذا العذاب وتعيشي وياج
ريم : اااااااه ياروحي شكد معذبتني اتمنى هيج اسافر اهج اروح لمكان مااعرف احد بيه
نهر : هاي اختج مو سافرت شحصلت مخلصتها بين الحياطين
ريم : ابتعدت حيل عنها وحتى مااتصل بيها والتهيت ويه رشا والله مشتاقه لام نص لسان
نهر : ولا وحده بيجن مرتاحه خرب بلحظ الاكشر
ريم : اكو شى عمه شو وضعج مو طبيعي وخرت من حضنها ورتبت شعري بيدي رجعته ليوره ومسحت عيووني احجي عمه شصار
نهر :اليوم الصبح ردت مسواك ومابيه اطلع رگبي اسم الله عليج يوجعني من الصعده والنزله وانتن نايمات كلت اخاف حسين بلكت من يسوك الصبح لاهله يجيب الي وصدك الولد ماكذب خبر بس كتله وره ساعه المسواك يمي
ريم : اي كملي
نهر : كعدنا نسولف ونتريك سوه وانتن نايمات وشفته مو على بعضه وسألته عن البيت واحوالهم وخاصه شغلتجن مال جنات كلت اخاف فجأه تنفتح ومالنا خلك للطلايب واني ماكلت لطه ولا سليل كالت لسجاد طمطمناها وخفت لا علي يفتحها وتكب الهوسه
ريم : واذا كبت طبهم مرض
نهر : اسمعي يمه الصار
ريم : كملي
نهر : واني اسأله وجان يصدمني ياحبيبة خلاني ابلع لساني وكوه حجيت تدرين جنات رجعت لشعلان رجعها على ذمته واخذها وياه للكوت يكول رجعت للبيت لكيتها تلم بملابسها وشعلان واكف بلبابيكول متحملت وكتله ياوسفه عليك متوقعتك هيج كلت راح تكون كدها وترجع ام بنتك وتصلح الصار وهو يكول اله مترجع رشا لو ابوس رجلها يوميه وهاي هم محد الها ومااريدها تتبهذل وتخدم عن الناس تبقى مرتي وماارضى الها الذل بحيث حسين يكول بس كتله احسن شى سوته رشا اطلكت منك انت مو كفو الها وعافه ودخل وذاك اخذ جنات وابنها ورجعو للكوت
هااا يمه شو سكتي
ريم : جنت متوقعه عمه ترجع
نهر : شلون يعني
ريم : من كال حسين خابرت على شعلان من هي بلمستشفى عرفت راح تستغل هذا الموقف الي مثل جنات وهند مستحيل تفوتهن هاي الفوته وهذا الطلي السارحات بيه يودن ويجيبن اكيد راح يفرن دماغه ويرجعها
نهر : يمه شكول الج من سمعت غير فرفحت روحي يبوو الله لايراويج حتى حسين كال عمه تره صعد ضغطج اني الخبلني شلون الها نفس ترجع اله وتروح تعيش بيت رشا تعرفين شنو السوته هجمت بيت بت عمها وشردتها هي وبتها وتالي اخذت البيت والرجال مشايفه هيج صلافه وعرامه شكد عاشرت نسوان كويات امي امج سندس عمتي ام سامي ماسون سوايت جنات
ريم : مو هذا الجيل الجديد يتطور وياخذ صفات النذاله النقيه فيصير نذل نقي بأمتياز
نهر : وهسه شنكول لرشا اذا عرفت راح اطك وتموت
ريم : على شنو اطك وتموت رجلها ناقص ومرحله بحياتها وانتهت
نهر : ليش هي بلسان يايمه
ريم : شنسوي ياعمه متكوليلي حتى كتل وكتلناها وحده متقصده تقهر رشا وتاخذ كلشي منها ومع الاسف شعلان طلع قمه بلسقوط والانحطاط من رجعها تدرين رشا رغم الصار متوقعه يرجع يتوسل بيها يراضيها يدز ناس عليها يستقتل عسى ولعل ترجع
نهر : بس هي مترجع
ريم : اعرف مترجع بس جانت متأمله اختي واعرفها اكيد تكول داخل گلبها هسه يتوسل ويذبح روحه ويجيب ناس يوكعون علينا حتى بس يرجعها يعني يحارب حتى ترجعله اقلها تحس الها قيمه بحياته بغض النظر اذا ترجع او مترجع بس ماشاء الله شعلان ميفوت فرصه رد الضربه الها بأقوى وجنات هم عرفت شلون تكسر رشا كسره مالها علاج
يعني من اصفن على تصرفاتهم اكول هم اكو هيج بشر الخباثه والسم يمشي بدمهم مكفاها هدمت ودمرت كلشي هلمره كعدت على تل الي دمرته حسبي الله عليها وعلى ذاك الحقير الماغزر بيه حبها وعشرتها وتعلقها بيه
نهر : شنسوي هسه شلون نكول الها
ريم : عادي نكعدها ونسولف الها
نهر : بهاي السهوله
ريم : عمه اكو امور ما تتجمل ولا تتركع مثل هسه نكول شعلان رجع جنات على ذمته وانتهى
نهر : وراح تتحمل
ريم : غصب عنها تتحمل تبجي يوم يومين وتسكت
نهر : وراح تنسى الصار
ريم : جان نسيتي انتي وصار بحدود ٢٠ سنه
ماكو شى ينسي عمه وخاصه الغدر والخذلان بس بنفس الوقت الواحد يعيش مابيده شى ويطلب من الله الصبر وبأن يعوضه خير
نهر : واني الله عوضني بيجن خير
ريم : لا والله احنا الي محظوظات بيج وعوضنا الله اعلم شنو جان حالنا بدونج
جان يأذن
نهر : الله اكبر الله اكبر كومي يمه توضي وصلي وانت هم عسى رب العالمين بجاه هذا اذان الفجر يبرد نار گلبج
ريم : امين بستها من راسها وكمنا توضيت وصعدت وصلت قريب غرفه رشا سمعتها تشهك وتبجي دفعت الباب ولكيتها على السجاده عفتها تكمل
ومن كملت قبل الله
رشا : تقبل الله منج صالح الاعمال
ريم : شبيج تشهكين
رشا : مثل متشهكين انتي كل يوميه عبالج ماادري بيج من اتنزلين بلحديقه وتبقين للفجر
ريم : اني من ابجي واشهك علمود ناس تستاهل مو علمود ناس متسوه النعال مال الحمام
رشا : والله مكعد ابجي عليهم ابجي من سوايتهم
ريم : رشا تره شعلان رجع جنات على ذمته جان تطفر من الكاع وضربت على صدرها رجعها
اششش وجريتها وطلعتها من الغرفه هسه بتج تخترع
رشا : لج شلون رجعها لزمتها من ايدها ودخلت بلغرفه الانام بيها وشلت تيومي وحطيته يم فروحه ورجعت اركض عليها
رشا : شلون رجعها ريم شلوون
ريم : مثل الناس المتخاف الله ومتستحي راح الها ورجعها
جان تختنك وازركت تريد تجر النفس ماكو ركضت نزعتها ايزار الصلاه و فتحت الشباك وطلعت راسها منه ونزلت اركض جبت بطل مي وصعدت هااااج شربتها وغسلت وجهه تشهك بس ميطلع صوتها وتإشر على صدرها فرگي گلبي كعد افرك بگلبها وادعي كون هذا التفرفح بيج ياجنات الگلبه افرك ولج رشا دخيل الله ليصير بيج شى والنبي احركهم وهمه عايشين رشا بداعت فرح تنفسي
ركضت على بابا وعمه جانت تصلي جوه
دكيت الباب على بابا وفتحته ادري بيه يصلي
حجي طه : هاا بنتي
ريم : الحك فدووه بابا هاي رشا زركت ومكعد تتنفس
كام حافي ويركض كوه خطيه والسبحه بيده وعمه كملت الصلاه وراه ركضت دخل لزمها ويضرب على وجهه بابا رشاوي اتنفسي بابا تأشر بعيونها هوا
سحبها وحط ايدها على رگبته ومشاها ميكدر يشيلها واني من الجهه الثانيه وفتح باب السطح لان اقرب شى النا وطلعها بلسطح
نهر : شصار
ريم : كله من ورايه كتلها على شعلان الناقص
حجي طه : شبيهه
نهر : الله لايوفقه دنيا واخره رجع جنات لذمته
رشا : حسيت الهوا انكطع وگلبي لحظة يدك سريع ولحظة تروح دكاته جنت بس اريد اشتم ولو نسمه ترن بأذني رجعت جنات لذمته ومن اغمض اريد اتنفس صير شكلها كدامي نايمه ويااه على فراشي هسه حاضنته هسه بدون خوف بدون قلق اخذته ونامت بيتي مجنت متأذيه لان احبه واريده متأذيه على كمية السفاله الي صارت علني وبدون خجل
حسيت بابا يغسل وجهي ويقرا ايه الكرسي وينفخ بوجهي شبهه فقدت بس الشى الوحيد الي اشوفه جنات شلون نايمه مصلخه بحضن شعلان
لحد ماحسيت بهوا البارد يدخل صدري واني نايمه بحضن بابا ويذبون المي على وجهي وصوت بابا من يقرا قران يتسلل لروحي
واسمع الايات ودموعي تنزل وبدا يقرا ايات قصيره وينفخ بوجهي ويسمي ويسبح وادعيه لحد محسيت گلبي بدت نبضاته تهدأ الي هدأ گلبي مو بس ايات القران الي هدأ گلبي صوت بابا من يقرا والعبره حاصرها خفت عليه اكثر من نفسي خفت ليصير بيه شى ويتأذه بسببي كافي الي صار وانجلط ذيج الايام
مااعرف شكد بقيت فاقده التركيز بس من صحيت حضنت بابا وابجي حيييل مثل الطفله وهو يمسد على شعري ومستمر بلقرائه
نهر :تعالو ادخلو جوه الجو ثلاجه راح تتمرضون
حجي طه : اخذي ريم وانزلي نهر شويه ونجيكم
ريم : اخاف يصير شى بابا
حجي طه : ميصير بنيتي انزلو بارده عليكم
رشا : بقيت بحضنه وهو كاعد بلبرد بلكاع وماهمه الجو والبروده وهو مريض كااال بصوت حنين
حجي طه : بنتي رشاوي مامرجيه منج هاي تردين تأذيني وتأذين بنتج
رشا : والله مو بيدي كل مااحاول استوعب الصار تجيني ضربه اقوى وتوكعني من سابع سما حاولت اتعامل بوضع طبيعي وما أذي نفسي واكول تجربه وعدت بس همه متقصدين يموتوني
حجي طه : سمعيني بابا يوم ماكتلت سلام شفت حياتي اسودت وخسرت كلشي واهم شى خسرته شوفتجن جنت انام واكعد اكول هم يجي يوم واشوف بناتي شلون يدخلن المدرسه وشلون يكبرن وازوجهن بيدهن واشوف احفادي ومن اركز اني وين وشلون محصور بسجن مترين في متر اضحك على روحي اكول والله احلامي تعجيزيه بس هم مافقدت الامل بالله وبرحمته جنت من ارفع ايدي اكول رحمتك يارب متعرفين رحمته شكد عظيمه وجبيره وشكد تفتح الج ابواب متتوقعين بيوم تنفتح
بنتي شكد متظلم الدنيا بعينج وشكد الناس تأذيج وتغدرج اتذكري رب العالمين ميرضى بلظلم ويجي يوم ينصرج على الكل الصار اختبار من سبحانه وتعالى ولازم نرضى ونحمده على كلشي ماكو واحد ماعنده مصايب ومشاكل اني جبتها قهر وكسران من اني وصغير لحد هاي اللحظه من دخلت ريم ترجف وتكول الحك رشا وكل مصيبه او قهره اوكع بيها اكول سلمتها الك ياارب انت رحيم بيه برد گلبي مثل مابردت النار على نبيك ابراهيم عليه السلام
رشا : كل خبر يجي منهم يكسرني
حجي طه : اكو مثل يكول من توگع على علته تبين ملته وذوله بينو ملتهم شنو والله خلصج من هيج ناس متخاف الله اني اريده يقويج هو الخسر بنتي هو الخسر لتتوقعين رجال يكسر مره حبته وراعت الله بيه ميتندم مستحيل يتندم ويعض اصابيعه هم بس كبريائه يمنعه من الاعتراف هو رجعها صحيح بس مستحيل يرتاح وياها الي يعيش بلحيله يموت بلفكر ومع الاسف بت اخويه ولو حرامات هاي بت جعفر الطيب الجان نسمه بحياتنا جانت العيبه متطلع منه تطلع هاي بته ولو عايش والله هو بيده يذبحها لتتوقعين تتهنى وتتوفق وحتى اذا شفتي الوضع هسه طبيعي يجي يوم وتضوك المر اذا مو مثلج فأقوى منج وبلشئ الي تحبه اريدج قويه بنتي مااريد احد يتشمت بيج من طبيتي وكفتي كدام السيد بكل هيبه وقوه وناقشتي وطلبتي حقج والله رغم كسرتج افتخرت بيج وكلت اذا اموت مااخاف عليهن يعرفن ياخذن حقهن
رشا : حضنته حيييل اسم الله عليك من عمري على عمرك كون
حجي طه : عمرج طويل احبيبتي كومي ياغاليه وذبي حمولج على اللي ماينام على الرحيم على المنتقم الجبار هو الي ياخذلج حقج صليتي
حجي طه : اي صليت
حجي طه : عفيه بأم فروحه اريدج قويه ومتركين فرض وعينج على بنتج واشمري الصار وراج لتخليهم بيوم يضحكون ويكولون حييل كسرناها تستاهل وخليناها تمشي مدنجه انتن الطلعت بيجن من الدنيا واكول ذني حزام ظهري من اكبر ذني راح يعوضني عن اخوهن الراح وما سأل عني انتن عكازي بكبرتي وبيجن اطب الجنه لاتخيبين ظني بنتي
رشا : بست ايده وكتله ادعيلي فدووه بابا
حجي طه : الله يشهد عليه لساني ميبطل دعاء الجن اربعتجن ونهر خامستجن كومي حبيبتي ملابسج صارن مي لان ذبينا على وجهج لتتمرضين الجو بارد
رشا : كمت من حضنه وهو كاعد راد يكوم مديتله ايدي اكومه لزمهن وابتسم
حجي طه : مو كتلج انتن عكازتي من اكبر هاااج راح الحيل الاولي ومن اكعد كوه اكوم اريد مثل ماهسه كومتي ابوج تكومين على حيلج وشغلج وبنتج وعوفي كلشي جوه رجلج
رشا : صاار بابا ان شاء الله اسمع كلامك
حجي طه : عفيه بأم فروحه يله روحي نامي واخذي بنتج بحضنج
رشا : ان شاء الله
نزلنا اني وبابا واشوف ريم وعمه كاعدات باب الغرفه كامو اول مشافونا نزلنا
ريم : هااا شلون صرتي
نهر : هااا يمه نوديج مستشفى
رشا : لا ميحتاج عمه صرت احسن ادخل انام
ريم : روحي نامي هسه اجي اشيل تيم من يمج
رشا : عوفي اني اصلاً راح اجي انام يمج
نهر : روحي يمه نامي يم اختج واني نايمه يم الجهال لايضل بالجن
ريم : خلي بس اصلي والله حتى نسيت الصلاه من وره الهبطه خلي ارجع اتوضى حتى ماادري توضيت لا نسيت كلشي
كملت الصلاه وشفت رشا تمددت بلجربايه
ريم : شنو رأيج انجر الدوشك مال هاي الجربايه والجربايه الثانيه ونفرشهن بلكاع وانام سوه مثل من جنا جهال
رشا : اي
ريم : جريتهم وفرشت وهي نامت بصفي مديت ايدي العب بشعرها هي تحب هاي الحركه
رشا : لتعوفيني وحدي ريمو
ريم : وين اولي مكابلتج وكاعده لا شغل ولا عمل
رشا : لو ما انتي جان متت
ريم : عار متموتين ضاله على گلبي
رشا : هههههه اني عاار ولج
ريم : اضحكي فدووه والله خوفتيني عليج راح يصير بيه سكر من وراج وره الهبطات
رشا : كون غزل هنا جان كالت اهووو اشتغلت اللواكه اكيد تحضرن لمصيبه
ريم : اوف شكد مشتاقه الها
رشا : لهسه متعرف الصار بيه
ريم : عمه متقبل تكول الها
رشا : ليش
ريم : تكول تنقهر وتهم خلي تستقر هناك وضعها يتحسن يله
رشا :هاي فقيره واخاف تنداس بلرجلين
ريم : شلون بله نحجز للسويد هناك ونكعد يمها ونعارك ياهو اليحجي وياها
رشا : لا ولج قصدي لازم نخابرها دوم ونسإل عنها ونفهم شيصير وياها
ريم : تعرفين بيها متحجي من قبل هاي غزل ساكته اله لمن اطك عدها حيل تحجي كم كلمة وتسكت
رشا : كون فيصل بيه حظ وزين ويسعدها شنريد منها
ريم : يله نامي شكد تلغين باجر عمه تكعدنا بلجفجير لان انام لل١٢
رشا : تتوقعين هسه نايمه بحضنه
ريم : اهوووو رجعنا بابا ذوله حشرات لتضلين تاكلين بروحج بيج زود ارجعي لدوامج صار شكد تقدمين اجازات راح يروح منج يمعزايه هو وينه التعيين العالم تتحسر عليه الزمي وضيفتج وكافي كال مشعول وكالت الحيه
رشا : هذا لقب هند لتاخذي وتنطي لجنات
ريم : هااا لعد نسميها جنات السعلوه لو ام اربع واربعين لو العكرب بكيفج كل الالقاب تناسبها
رشا : يله نامي مااريد افكر بيهم
ريم : غمضت ونامت بس اعرف بيها حتى تحلم بيهم ماعدنا غير نهون عليها وعلى مصيبتها شفت شلون بابا وعمه منتهين عليها وقبلها عليه ذوله الاثنين والله دمرناهم من الهبطات
غزل : مرت الايام وبعد يومين راس السنه والكل طاير بلشوارع اغاني ورقص وحفلات
وحتى فيصل للصبح مرات يبقى وبيوم نايمه سمعت طكطكه وضحك كمت مفزوعه فتحت باب الغرفه وشفت فيصل سكران وياه نفس البنيه صديقته لابسه قصير وكيمونه حيل مشلح وهم مبينه سكرانه وناس تبوس بناس وتحضن تخبلت يعني للصبر حدود وللهدوء هم حدود اني مطلبت شى منه بس الاحترام مو مال جايبها هنا للشقه واني بيها طلعت عصبيه واول مره اتعصب هيج بحياتي لان الموقف مقزز وهم ابقى مره واغار مهما كانت طبيعة علاقتي بفيصل
هااا شدسوي هنا مستحيت على نفسك جايبها وجاي واني هنا
فيصل : هلووو هاي منو شجابج هنا
غزل : مبين الشرب مطير عقلك امشي اطلع بره انتي وياها
فيصل : امشي لج شنو اطرديني من شقتي
غزل : مستحيت من جايب وحده من الشارع ومرتك بلشقه شنو هذا الانحطاط الي انت بيه جان يجي سريع ويلزم ايدي ويلويها
فيصل : اسمعي لج هاي شقتي وهاي حبيبتي وجانت هنا تنام بحضني ومن وراج كمت مااشوفها الله ياخذج خربطتي حياتي كلها شجابج عليه
غزل : جريت ايدي حيل منه وكتله اني الي اجيت اني مضربتك على ايدك دفعته من صدره حيل اخذها واطلع بره اني دفعته هو سكران حيل وكع بلكاع اجت ذيج ماادري شحجت وياه بلسويدي وهذا كاام ومن شعري ودك ضرب كمت اعيط اريد احد يخلصني من ايده وايده حييل قويه ويضرب بلا وعي
فيصل : بت الكلب اني ادفعيني وكدام حبيبتي
غزل :عوفني الله يشيلك انت وياها عووووفني
جان يوكعني بلكاع وبقى يضرب بكل مكان توصل ايده اله اني بحياتي ممضروبه لان دوم هادئه وساكته وماعندي مشاكل بقى يضرب واعيط لحد مندكت الباب حييل تريد تتكسر زحفت من الكاع اريد اكوم جان برجله بكل قوته ضربني اجت الضربه بفخذي شاغت روحي ورغم الالم دفعته وزحفت وفتحت الباب واشهك وابجي
جان اطب نوران وحسن شمرت روحي بحضن نوران وهي تعيط عليه وحسن يدفعه
حسن : لك تخبلت شلون تضربها
فيصل : هااي بت الگلب تطردني من شقتي
حسن : حقها اذا جاي سكران مطينها وفوكاها كاتيا وياك ومدري شكال لكاتيا اخذت جنطتها وباوعت عليه وطلعت
فيصل : وين رايحه كاتيا
حسن : اصحى غبي
جره يريد يغسله هم دفعه ويعيط هاي ابويه جبرني عليها لك كله من وره ابويه يكلي لو تتزوجها لو متصيرلي ابن شفت هاي تاليها اتزوج وحده محروكه حتى ارضى ابويه اكله مااريدها مااحبها مااطيقها يگلي هاي مرتك هاي شرفك هاي احسن منك بله هاي المشوهه احسن مني بشنو لك يابه شسويت بيه لك حسن مااطيقها حجاره وكاعده بلبيت هنا ويأشر على ركبته هنا واكفه بلعومي ماابلعها خلصوني منها يابه شدعيلك كله من وراك من انعل ابويه يابو ابوها البت الگلب
غزل : حطيت ايدي على اذني وابجي وبصوت عالي اكله فدووه لتخلي يغلط على ابويه لتخلي يسبه جان يحط ايده على حلك فيصل حييل ودفعه
نوران : كوومي ويايه لهناك هسه بسبب صوتك يامستهتر راح يجي البوليس اكيد سكان العماره سمعوك
حسن : اخذي غزل لشقتنا واني هسه اصحي واجيبه
غزل : انتبهت اني لابسه دشداشه خفيفه وبدون حجاب لان جنت نايمه من اجه فيصل كمت من الكاع ركض شكد متأذيه واحس رجلي مكسوره بس لان جسمي طالع استحرمت لان اصلي واخاف الله شلون رجال غريب يشوفني هيج
نوران : وين رايحه يمعوده
غزل : طبيت للغرفه سحبت دشداشه عندي ثخينه شتائيه لبستها وحطيت الشال على راسي وضميت شعري الي تكطع بيد فيصل تنكسر ايده كون وطلعت اعرج
نوران : امشي هناك
غزل : وينهم
نوران : اخذه حسن للحمام يصحي
غزل : مااريد ارجع للشقه عفيه هسه يذبحني
نوران : لتخافين شنو اول مره تشوفين واحد سكران
غزل : بابا يصلي وعمو سجاد هم يصلي وزوج رشا كذلك ماعدنا احد يشرب حتى اشوفه شيسوي وشلون يضرب
نوران : هذا مصاحي هسه بس يصحى يحس بلي سواه لتضوجين
بله اشوف رجلج ليش تعرجين
غزل : رفعت الدشداشه
نوران : اووف منك يافيصل دوم ارعن ومتهور والله ولا متراهمين انتي وياه انتي قمه بلهدوء والنزاكه وهو قمه بالاعصاب والاستهتار خلي اجيب ثلج بلكت يخف الالم
غزل : بقت تحاول تهدأ الالم واعطتني مسكن الالام لان راسي من ضرب ايده كاام يوجعني
دخل حسن وكااال
نام فيصل وباجر يكعد ويعتذر الج
غزل : مااريد يعتذر بس ليشوفني وجهه
حسن : مترهم انتم متزوجين ولازم تتصالحون
غزل : اريد ارجع للعراق مااريد ابقى وياه
نوران : بله قرارات متسرعه انتي هسه عصبيه وتعبانه والموقف كله أذاج وهمزين مكبرت الشغله وسكان العماره اشتكو عليه
حسن : ياريت تهدين اول مره اشوفج عصبيه وتحجين
غزل : لان تعبني وهاني كلشي اله حد بس هو فاق الحدود كلها
كلشي تحملت منه بس مو مال يجيبها لهنا للشقه وسكرانين ومنظرهم مقرف واني اصلي واخاف الله هاي اسمها زنه وحتى حرام عليه ابقى ويااه
نوران : اهدي هسه وارتاحي وانت حسن روح نام يمه والصبح نحجي
حسن : سلامتج غزل
غزل : دنكت مستحيه وكتله الله يسلمك
نوران : تعالي نامي وارتاحي اكيد فزيتي من صار الموقف
غزل : كلش تمددت على القنفه بلصاله رغم توسلت بيه ادخل انام بفراش حسن بس استثقلتها يبقى رجال غريب شلون انام بفراشه وريحتي تبقى بيه
صار الصبح وكعدت متوجعه كلش
نوران : صباح العسل غزوله
غزل : صباح النور
نوران : كومي تريكي
غزل : مجوعانه اريد تلفوني
نوران : شسوين بيه
غزل : اريد اخابر عمو محسن يعلمني شلون ارجع للعراق
نوران : وليش متسألينا احنا
غزل : اكيد مراح تنطون بصاحبكم لخاطري
نوران : اكيد فيصل صديقنا لكن هذا ميمنع انتي هم صديقتنا وجمعتنا معاج كثير من المواقف الطيبه و جداً حبيناج واني بلذات ماعندي اخت واتمنى تقبلين اعتبرج اخت الي ومتنزعجين مني
غزل : وليش انزعج بلعكس لو ما انتي وحسن البارحه الله اعلم شجان سوه بيه
نوران : ميكدر يسوي شى اصلاً البارحه لو مشتكيه عليه وداعتج يطحون حظه هنا المرأه الها كامل الحقوق وبتجاوزه عليج البارحه تكدرين تحبسي
غزل : لا احبسه ولا اريده بس اريد ارجع للعراق
جان تكعد بصفي
اسمعي غزل اني ماشفت منج غير كل خير رغم المده البسيطه الي جمعتنا وكنت دوم اكول ليش فيصل ميشوف الجانب الجميل بشخصيه غزل ومركز بس على الحرق
غزل : لان انسان سطحي وهمه المظاهر وبس وعنده صديقته حلوة وشكره خلي يشبع بيها
نوران : مااشي وياج بهذا الشى لكن هسه لو رجعتي للعراق راح يروح اهم حلم كنتي تحلمي ومتأكده من انتي وصغيره تحلمي
غزل : اي حلم
نوران : تعالجين الحرق مالتج صدقيني هاي فرصه واجتك لا بلحظ استعجال وعصبيه تضيعيها اني مطالبه منج تبقين مع فيصل لكن على الاقل عالجي هذا الحرق وتشافي اقلها تتغير نفسيتج وحياتج واحتمال بذاك الوكت يحبج ويتقبلج
غزل : اخر همي يتقبلني او لا الي يحب يتقبل عيوب حبيبة قبل حسناته اصلاً ميشوف بلحبيب عيب حتى لو كل الناس شايفته
نوران : عين العقل كلامك لكن راح ادمرين حلمج اسمعي كلامي وعالجي الحرق وراها وين مترحين محد يوكفج ومستعده بعدها بيدي اخذج للمطار اذا متوفقتي ويااه
غزل : صفنت على كلامها اني اذا رجعت شلون هناك اعالجه واخاف يسكطوني اني تعبت وتأذيت بهاي الزواجه على الاقل اطلع بشى يسوه هذا التعب والخراب بعدني افكر طب فيصل ومبين خجلان من سوايته درت وجهي عنه كامت نوران من يمي وهو كعد بمكانها
نوران : تعال حسن نحضر الريوك عوفهم وحدهم
عافونا ودخلو للمطبخ
فيصل : احمم اني اعتذر لان البارحه تجاوزت عليج جنت سكران مو بوعي وحجيت اشكال ولو اغلب الحجيته مااتذكر وهسه حسن كاله الي تقرب مني راح يبوس راسي وخرت راسي منه ومحجيت بقيت ساكته
فيصل : ادري ضايجه مني وحقج بس هسه اجيت اعتذر وان شاء الله متتكرر
حتى ماادري شلون اجيت للشقه المفروض مااجي بس يجوز لان ثكلت بلشرب ضاع عقلي مني اني مااضرب مره واكره الي يضرب بس سكران ومنتبهت على تصرفاتي ليش ساكته هم راح تسكتين
غزل : باوعت عليه وحجيت بصوت هادئ شتريد اكول شنو شعوري من شفت زوجي طاب سكران وياه حبيبته يطوطحون لو شعوري من تضربني وهي تضحك لو شعوري من تسبني وتغلط وتوصفني بأبشع الاوصاف فيصل الي سويته الف اعتذار ميمحي لهذا لتعب روحك وتعتذر وتتعب مامقبول اعتذارك وياريت منا وهيج كل واحد يعرف حده وميتجاوزه واذا تريد ترجع لشقتك انت وصديقتك ياريت تشوفلي مكان نظيف اكعد بيه واني ادفع ايجاره
فيصل : هذه شقتج واني اطلع اذا حابه
غزل : تطلع متطلع شى راجعلك والتشوفه صح سوي اذا تريد يبقى على الاقل الاحترام بينا بما ان انت ندمان على زواجك ولعبانه نفسك مني ومطايقني اعتبرني خطارك فتره وتخلص مني
فيصل : شنو فتره وين ترحين
غزل : سكتت مااريد اكول اله على العمليه اخاف يخربلي كلشي
فيصل : احجي وين ترحين
غزل : اشوفلي مكان اذا حيل هلكد غاثك وجودي
فيصل : كتلج الشقه شقتج والصار ميتكرر ولتوصلين الي صار لابويه مااريد مشاكل وياه
غزل : باوعت عليه وكتله تره مو طفله كدامك واركض اتشكى ولو اريد اوصل جان من اول مشفتك ويه صديقتك ابلغه لعمو بس اني هذا مو طبعي واذا انت متخاف على ابوك اني صحته عندي وعلاقته بأبويه هي الي خلتني هسه هنا يمك
فيصل : المطلوب مني شنو
غزل : الاحترام كلشي مااريد منك الاحترام وبس
فيصل : صار
غزل : كمت من يمه وكتله مفتاح الباب
فيصل : تفضلي
غزل : اخذته من ايده وطلعت من شقت نوران هي مقابيل شقتي وفتحت الباب وطبيت باوعت زين مصايره هوسه دخلت بدلت وغسلت وجهي ومشطت واندكت الباب
نوران : يله نتريك
غزل : مجوعانه والله مو كتلج
نوران : بغلاتي يله ورحت وياها وكعدنا اربعتنا على الميز ونتريك وكلنا ساكتين احس بيه يباوع عليه بس مرفعت راسي ابد اني اول وحده كملت وكمت وترخصت منهم ورجعت للشقه
ومر اليوم مرجع ولا اتصل بس متصل بنوران وكايل الها عينكم عليها واليوم راس السنه والناس بلشوارع محد باقي واني المفروض فرحانه لان بدوله اوربيه وهمه ارقى الاحتفالات عدهم بس اباوع من الشباك على الناس شلون محتفله اندكت الباب كلت اكيد نوران
كمت خليت الشال على راسي فتحته شفته حسن
حسن : شلونج غزل
غزل : الْحٍمَدٍ للـّہ
حسن : اجيت اخذج نغير جو يمكن بس انتي هسه بستوكهولم الوحيده الكاعده بلبيت
غزل : شكراً ميحتاج مرتاحه هنا نوران وين
حسن : ويه صديقاتها اكيد
غزل : انت هم روح تونس ويه اصدقائك وسنه سعيده عليك
حسن : ممكن سؤال
غزل : تفضل
حسن : انتي تحبي لفيصل
غزل : استغربت سؤاله وكتله ليش تسأل
حسن : ماكو وحده تتقبل الي انتي متقبلته اذا متحب رجلها
غزل : لا اكو بس يجوز مو هنا بلعراق اكو هواي مثلي وضرفهم هم اصعب مني وباقيات ويه ازواجهم
حسن : بس انتي بلسويد كل الحريه الج
غزل : شلون يعني الحريه
حسن : يعني اكو هوايه بنات اجوي حتى الحجاب نزعو وغيرو ملابسهم وتصرفاتهم وحتى اكو بيهن اطلگن وعاشن بحريتهن
انت ليش باقيه على نفس وضعج هادئه صوتج ميطلع ملتزمه بلبسج مطلعين اله تبلغي وفوكاها متحمله سوالف فيصل
غزل :هاي حريه شخصيه كل وحده شسوي براحتها بابا دوم يردد مثل النا من ندخل بغيرنا ويكول كل لشه تتعلگ من كراعها مالكم دخل بابا حيرو بنفسكم
وهسه نفس الشى اكوله الك وكلمن وطبعه واني مالي حق احاسب احد ولا انتقد احد و عندي حجابي والتزامي اهم شى الله موجود بكل مكان وزمان مو بس بلعراق ومااحب اغير طبعي واعتقد ممضايقه احد اني ولا مدخله بخصوصيه احد واذا على فيصل احترامه واجب مو اكثر وهذا الشى تعلمته من اهلي وتصرفاته هو مو صغير ويعرف مصلحته زين
حسن : اول مره احسد فيصل على شى
غزل : توترت من كلامه وكتله شكراً على دعوتك ومن رخصتك اريد انام جنا نسولف بلباب
حسن : على الاقل اخذج ليم نوران
غزل : خليها ويه صديقاتها براحتها
حسن : براحتج
سديت الباب ورجعت كعدت لمكاني جان هذا الحجي ساعه ٨ بليل تعشيت وكعدت وحدي جان المفروض فيصل يجي ياخذني ونقضي اول مره راس السنه سوه بس هو اكيد يفضل حبيبتة عليه
غزل : بقيت اگلب بلتلفون اتصلت بماما نهر سلمت عليها جان فرق توقيت ساعه بينا احنا بال ٨ همه بال٩
نهر : هااا حبيبتي غزوله شلونج متونسه
غزل : كاعده بلبيت
نهر : ليش يمه ماطلعتي ويه رجلج
غزل : مااحب هوسه واريد انام من وكت بعدها رشا يمكم
نهر : اي يمنا
غزل : ليش هلكد طولت صاير شى
نهر : لا بنتي مو كتلج شعلان عنده شغل بلبصره وجابها يمنا
غزل : بس هي عدها دوام وهاي راح يصير شهر حاسه اكو شى مو طبيعي
نهر : يمه لا توهوسين وخابري رجلج واطلعي تونسي
غزل : اخابر البنات احسن
نهر : بكيفج يمه ديري بالج على نفسج غزوله
غزل :مااشي ماما باي وسديته منها دكيت على رشا جاوبت فروحه عمر فرح اربع سنوات ونص ولسان
هلو خاله
غزل : حبيبة خالتج شلونج فروحه
زينه
غزل : ماما وينها
تحجي ويه خاله ريم
غزل : ودي التلفون الها حبابه
اي
واجت تركض لامها
رشا : شجابج على التلفون منو هاي
خاله لوله
رشا : هلوو لوله
غزل : ههههه هاي شنو لقبي الجديد
رشا : غير فرح تسمعنا نكول غزوله اختصرتها بلوله
غزل : حلوو والله
رشا : هااا ولج اني كلت هسه عالكتها الكاج بلشارع تعيطين هبي نيو يير
غزل : لا كاعده وساكته ريمو وينها
ريم : هياتني ام نص لسان مفتوحه الحاكيه واسمعج
غزل : اشتاقيتلكم ودمعت عيني
ريم : شبيج غزل ليش حاصرتج البجيه
غزل : مابيه بس مشتاقه الكم
ريم : متأكده
غزل : اي
ريم : اذا كذبتي ازعل منج
غزل : ماكو شى بس مشتاقه الكم ولمتكم وسوالفكم
رشا : اخذينا صور ودزيها
غزل : لازم انزل جوه واني اخاف
ريم : صيري سباعيه وتعلمي حتى لغه تعلمي لتبقين تحت رحمه فيصل
غزل : بگلبي اكول عاد هو شلون مكابلني وكاعد
رشا : الووو وين رحتي
غزل : ماكو شى هسه انزل واخذلكم كم صوره واصعد
رشا : ننتظرج
غزل : بدلت على السريع واخذت تلفوني ونزلت تمشيت مسافه واخذ لصوره الزينه مال الميلاد والشوارع والناس تركص ومندمجه لوين يله حسيت روحي بعدت وين اني عزه تيهت اباوع منين طبيت منين طلعت مااندل رجعت مدري وين فتت وطلعت وكل شويه اكول من هذا المكان لحد متاهه الشارع عندي خفت حيل ودمعت مباشره نزلت لزمت التلفون ادك على فيصل ميجاوب ادك مره مرتين وخمس مرات ماكو خفت اكثر رجعت دكيت على نوران هم متجاوب هنا بعد سلمتها كلت هاي هيه ضعتي ياغزل شنزلني صخام بوجهي مو منجبه وكاعده بمكاني ياربي شسوي
يتبع ...
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!