رواية احببني دبدوب الفصل الأول 1 - بقلم لولي احمد

لقيت الباب بيخبط فروحت افتح أشوف مين. لقيت دبدوب شكله كيوت أوي. بصيت بس ملقتش حد. قولت آخده أحطه في أوضتي عشان ماما مبتحبش الحاجات دي. ونزلت الدرس. رجعت من الدرس وكنت ناسيه خالص حكاية الدبدوب ده. قولت أغير هدومي وأشوف يمكن بتاع حد وأنا خدته بالغلط. صليت وفتحت العلبة اللي كانت معاه. لاقيت فيها ورقة بتقول:

"أنا عارف إنه كان نفسك في حد يسليكي وتتكلمي معاه. اتكلمي مع الدبدوب ده وهو صاحبك مش هيطلع أسرارك لحد. اتفقنا يا قطتي." قطتي! مين ده ويعرف منين؟ أنا بجد مش ناقصة ألغاز في حياتي. نمت وركنته على جنب. مهو أنا مش عبيطة عشان أعمل كده بجد! العادة بتاعتي إنه أنا بظبط المنبه عشان صلاة الفجر وعشان المذاكرة كمان. بس الغريبة إنه ده مش صوت منبه، ده صوت مسج من واتس. أده مين ده اللي بيكلمني في وقت زي ده وأنا أصلاً مليش صحاب!

فتحت المسج وكانت من رقم غريب وبتقول: "صباح الفل يا قطتي. أنا قولت أصحيكي عشان الفجر أذن وإنتي كل ده مصحيتيش." لأ بقي كده كتير خالص بجد. مين ده ويعرف منين إني لسه مصحيتش؟ أده لحظة المنبه مرنش لي بجد. أكون نسيت أشغله؟ طيب هو عرف منين؟ أوووف بقي! ذاكرت وخلصت من كل مادة شوية على قد ما بقدر. وخلاص الساعة بقت 10 الصبح. يدوب أنام وأصحى للدرس. قمت وخلاص راحة على السرير. لقيت الدبدوب. هو يبقى فيها حاجة لو اتكلمت معاه؟

أنا مش مجنونة بس محتاجة حد يسمعني فعلاً. أنا هتكلم معاه وخلاص بقي. خدته وحطيته قدامي على السرير. احمم... أقول إيه؟ مش عارفة أبدأ منين بس هتكلم معاك. أنا حابة أعرفك بنفسي. أنا اسمي وتين. اسم غريب شوية بس بحبه عشان حاجة جديدة ومتفردة كده زي شخصيتي. حياتي عادية جداً زي أي بنت بتعيش حياتها. بس الطبيعي إنه أكتر اتنين في حياة أي بنت بيحبوها ويشجعوها ويحفزوها هما باباها ومامتها. اللي هو المجتمع بيسميهم أهل.

بس أنا عمر ما حد شجعني. ديما بيحبطوني. حتى أصحابي معنديش. مش بقولك وحيدة. أنا السنة دي في تالتة ثانوي. ونفسي أبقى دكتورة علاج طبيعي. بس اللي بسمعه إنه مش هقدر ومهما عملت إنه مش هجيبها. بس أنا واثقة فيا وفي ربنا أولاً وعارفة إنه هيكرمني. أده أنا كل ده بتكلم معاك. ملحقتش أنام. هيا الساعة كام؟ بشوف الساعة في الموبايل لقيتها 11. عيني برقت. يالهوي اتاخرت على الدرس والمستر ده رخـم مش هيرحمني. هرجع ليك تاني يا دبدوبي. باي.

نزلت وروحت الدرس وجيت. نمت وأكلت وصحيت. صليت الفجر وكالعادة. في عصفور بيجي الصبح على البلكونة اللي في أوضتي. بحط ليه أكل كل يوم. بس لقيت حاجة غريبة. ورقة مكتوب فيها ........