رواية احببت ابن عمي الفصل الرابع عشر 14 - بقلم ملك احمد

بعد أسبوع خرجنا من الامتحان أنا وميادة ولقينا سيف. سيف: ها، عملتوا إيه؟ أميرة: السيد كولة. ميادة: سااااقط. أميرة: ومحمد أُولة. ميادة: سااااقط. سيف: أنا مش بهزر، عملتوا إيه؟ ميادة: لااااه، حلينا صح. سيف بفرحة: بجد؟ أميرة: ابسط ياعم، الزفت اللي كنت بتشرحه جاب نتيجة. سيف: أميرة! أميرة: خلاص خلاص، إيه ده؟ خلي خلقك استريتش، متخليهوش كنز كده. سيف بضحك: طب ماشي، يلا يا ختي انتي وهي. *** في البيت.

منى بقلق: هاااا، عملتوا إيه يا ولاد الموكوسة؟ أميرة: لأ الحمد لله كويس. منى ونهى بفرحة: بجد؟ لولولولولوللولى! محمد: يا ولية اسكتي. نهى: يلا يا عيال، الأكل جاهز. ميادة: آه ونبي يا طنط، ده أكلك وحشني أوي. ماما حدفتها بالشبشب. منى: أكلها هي بس اللي واحشك يا ختشي. ميادة: لأ طبعاً، انتي قطعتيني. أنا بقول أكلك وأكلها واحشيني. أميرة: طب يلا يا ختشي. قعدنا على السفرة. أنا وسيف قعدنا قصاد بعض ومكناش بناكل، كنا بنبص لبعض.

محمد: احم احم، مش بتاكل ليه يا سيف؟ سيف: ها، لا أنا باكل اهو يا عمي. محمد: ماشي يا خويا، كل. سيف: احم، ماشي اهو باكل. قعدت أضحك بس بخباثة. سيف بصلي بغل، راح خبطني في رجلي. أميرة بوجع: اااه. سيف باستهبال: مالك يا حبيبتي؟ في حاجة؟ محمد: حبك برص ياشيخ. وبعدين كمل. محمد: مالك يا حبيبتي؟ في حاجة؟ أميرة: لأ يا بابا، في جاموسة طور داس على رجلي. محمد باستغراب: جاموسة وطور داسوا على رجلك؟

أميرة: اه يا بابا، بتحصل. حتى اسأل الطور، قصدي سيف. سيف بصلي بشر وتوعد. سيف: احم، عمي، احنا مش هانجهز الفرح بقى ولا إيه؟ أنا هابيض وأتجوز. محمد: لأ مش دلوقتي. سيف: امال إمتى؟ محمد: على حسب مزاجي. سيف: طب مينفعش تستعجل مزاجك شوية؟ محمد: انت بتهزر؟ أحمد: وفيها إيه يا محمد؟ خلينا نستعجل في الفرح. عايزين نفرح بالولد. سلوى: آه ونبي يا عمي، استعجل الفرح. منى: يلا يا محمد، مستني إيه؟ عايزين نفرح.

محمد: أمري لله، ماشي. الفرح بعد شهر. سيف: إيه شهر بس ده؟ بسرعة أوي، ولسة في حاجات كتير هانعملها. محمد: هو ده اللي عندي، يا إما مافيش جوازة. سيف: لالالا، خلاص ونبي، دانا مصدقت. محمد: ماشي. *** نجري الأحداث شوية. مكنش فاضل على الفرح غير أسبوعين. قعدت أنا وميادة ونعمة نجهز شنطتي وحاجتي. أميرة: أنا زعلانة أوي أوي. نعمة: ليه؟ أميرة: عشان هاسيبكوا وهامشي وهابعد عنكوا، هاتوحشوني أوي. نعمة بشهقة: نعم ياحبيبتي؟

هاتسيبينا وهاتبعدي عننا؟ ده هو دور اللي فرق بينا وبينك؟ ده انتي فوقينا على طول، وكمان قصاد حبايبك، حماتك وحماكي. أميرة: خلاص خلاص، يخربيت فصلانك. كان نفسي أسكن قصادك. نعمة: مانتي عارفة إن عادل ساكن فيها. عايزة تطفيشي الواد يا ولية. ميادة: سيبكوا انتوا. أحلى حاجة إني هاحضر فرح أخيراً. أنا كنت حاسة إن الناس بطلت تتجوز. أميرة: اه يا واطية، يعني انتي فرحانة بالفرح أكتر مني؟ ميادة: لأ، فرحانة بيكي. بس بالفرح أكتر.

خدت مخدة وحدفتها عليها. ميادة: اااه، إنها الحرب. نعمة: هيا بنا. ومسكنا إحنا التلاتة مخدات وحدفنا بعض بيها. وبعدين نعمة شغلت أغنية (يابتاع النعناع يا منعنع) وقعدنا نرقص. وفجأة ماما دخلت. منى: الله الله، بترقصوا وتغنوا؟ نعمة: آسفين يا ماما. ماما طلعت صاجات ورقصت. منى: بترقصوا من غيري يا ولاد الكلب؟ ميادة: أيوة بقى يا منمن. نعمة: الله، يلا يا عسلية. أميرة: لولولولولوللولى!