رواية احببت مجنونة الفصل الثالث 3 - بقلم نجمة براقه

بعد أسبوع. "تعالي متخافيش." "لا ونبي يا هشام أنا بخاف من المرتفعات." "طول ما انتي معايا متخافيش أبداً، يلا قوام علشان نشوف الدنيا من فوق بالمنطاد." "تمام ماشي بس خلي بالك لا أقع." "أيوه كده جاهزة؟ "ياماماااا، لاااا انزل تاني بسرعة، أنت بتعمل إيه يا حم" "أنا حم" طيب أهو أنا غلطان إني بحضنك علشان متخافيش." "لاااااا لو زقيتني هموت ونبي ونبي." "هوباااا يلا في داهية."

"لااااااء يامامااا، اوف أعوذ بالله، إيه الحلم ده. أعاااا كان هيموتني. أنا لازم أبعد عنه أنا أحلامي دايماً بتتحقق واكيد دي إشارة." "مالك بتزعقي ليه على الصبح؟ "يا مامااا أنا مش عاوزة أتجوّز." "نعم ياختي هو إيه اللي مش عاوزة تتجوزي." "هو كده أنا متشائمة ده أكيد هيموتني زي ما عمل في الحلم." "عمل إيه في الحلم ما تنطقي." "رُماني من المنطاد الحيوان روحي اتصلي بيهم وقوليلهم منشوفش وشهم تاني."

"أنتي هتجننيني في يوم بقا هنرفضه عشان حلم، تكونيش رابعة العدوية يختي." "يا ماما انتي مش فاكرة لما حلمت إنك عضيتيني وعضتك علمت زي الكلب المسعور ساعتها صحيت على سنانك هي وبتقرقض فيه مش صح ولا لا." "أنا كلب مسعور يا ياسمين نهار اللي خلفوكي أسود." "ماماااا خلاص والله مش قصدي ونبي." "استني بقولك. طيب إيه رأيك إنك هتجوزيه غصب عنك. قال ترفضه عشان حلم قال. بقا انتي تستاهلي واحد زيه يتصل مخصوص عشان يفسحك يا بت الغبية."

"مين يفسح مين؟! "هشام يختي اتصل وطلب إنه ياخدك النهارده يفسحك والله ما تستاهليه." "شوفتي إن عندي حق، يا ماما ونبي أنا بنتك حبيبتك يرضيكي أموت في حادثة منطاد." "يااااريت مش أحسن ما تموتي على إيدي. اخلصي جهزي نفسك زمانه على وصول، ومتنسيش تكلمي مي صحبتك تروح معاكي." "يا مامااا" "ولا كلمة امشي يلا." في مكان آخر. "أنت قلقان من إيه بس؟ "مش قلقان بس أنا عارف ذوقك في البنات ولو البنت دي طلعت سودة واوزعة هتبقي مصيبة."

"لا بالعكس دي قمورة خالص وبعدين هو انت هتجوزها، دا انت هتقدم خدمة إنسانية." "ماشي ياعم أما نشوف." "تمام وصلنا انت هتستنى هنا وأنا هروح أجيب ياسمين وأجيلك." في منزل ياسمين. "الو انتي فين؟ "في البيت مالك." "يلا علشان خارجين اجهزي وتعاليلي." "مع اسمه إيه ده بردو." "أيوه مع سي زفت." "مالك في إيه." "مي بالله عليكي ما تسيبيني لحظة معاه، أنا قلبي مقبوض ومش مطمنة." "ليه يابت حصل إيه." "شفته في الحلم بيرميني من المنطاد."

"يالهوي دا انتي أحلامك بتتحقق واكيد ده كمان هيتحقق." "اسكتي انتي بتأكديلي كمان." "اكذب عليكي يعني. افرضي على غفلة مني. حدفك لتحت. أبص عليكي ألاقيكي أشلاء متطايرة في الهوا بتأكل من لحمك النسور. أرجع إزاي لوحدي أنا ما انتي عارفة إني حافظة شارعنا بالعافية." "انتي بتقولي إيه." "انتي لو قدامي كنت أكلتك." "غلطانة إني بوعيكي." "غوووووري هاشوف الباب بيخبط يا بومة." "أيوه مين، هشام إيه جابك."

"صباح الورد يا سمسمة، اجهزي النهارده عملت لك مفاجأة حلوة قوي." "منطاد صح." "اوبا بقا عرفتي إزاي يخرب عقلك. إيه ده مالك استني هتخبطي في الترابيزة." "ونبي أنا آسفة أنا عارفة إني وحشة وبغلط، بس ابعد عني يابن الناس أنا لسه صغيرة." "انتي هبلة يابت في إيه اللي حصل." "أبداً يا خويا، أصلها شافتِك في الحلم بترميها من المنطاد." "والله وارد." "شفتي أنا خايفة بجد ونبي امشي مش عاوزة أفسح." "طنط ممكن كوباية ليمون." "حاضر يابني."

"تعالي متخافيش." "لا هخاف، أنا حلمت بمنطاد واديك هتفسحني في منطاد واكيد الباقي هيتحقق." "طيب خلاص بلاش منطاد اختاري انتي اللي عاوزاه." "اممم بجد يعني مفيش منطاد." "أيوه مفيش." "ماشي." "ههههه، والله حاسس إني بتعامل مع طفلة. الا قوليلي هو أنا رميتك ليه من المنطاد." "اممم اصل اصل." "اصل إيه." "من غير تريقة." "مفيش تريقة خالص قولي."

"أنا كنت خايفة أركب فانت كنت بتمدلي إيدك وكده ولما دخلت وارتفعنا حسيت بالخوف جداً، تقوم انت بقا تستغل الموقف. وقال إيه جاي تحضنيني. حضنتك عقربة سامة في صحاري سيناء يا بعيد." "هههههههههههههه، آه وبعدين كملي، انتي عملتي إيه خلاني أعمل كده." "قولتك. يا حمار فحدفتك." "هههههههههههههه، يخرب بيتك، بس انتي عارفة ههههه." "عارفة إيه. بطل ضحك. مبقولكش نكت، لعلمك أنا لما بحلم بحاجة بتتحقق."

"انتي عارفة إنك لما بتفكري في الحاجة كتير بتحلمي بيها." "آه بس أنا مفكرتش في المنطاد خالص." "أنا أقصد الحضن، كنتي بتفكري تحضنيني أنا عارف." "ناعم حضن. تك حية سامة امممم." "بس بس أمك هتطلعلي بنشابة اسكوتي. ااااي." "في مرة هقطعلك صباع من صوابعك لو اتكررت تاني." "ماشي يا ياسمين، مردودالك." "مشيت عليك بطنك." "في الشارع." "مين ده وواقف كده ليه، اممم أكيد بيراقب بيت ياسمين وناوي على حاجة." "انت واقف هنا ليه ها." "أفندم."

"بقولك واقف هنا ليه انطق لحسن أبلغ صحاب البيت وأقولهم خطتك الدنيئة." "انتي هبلة خطة إيه ودنيئة مين." "أنا حافظاكم يا خطافين البنات وربنا ما هسيبك." "عارفة لو ممشيتيش دلوقتي، هروش عليكي بيرسول." "ياسمين وهشام نازلين وشافوا الخناقة." "اوبااا إيه ده خناقة البت مي بتتخانق." "ااامسك الشنطة دي." "انتي هتعملي إيه." "هشلفط وشه. انت يااااض وربنا ما تخطفها وتبيعها أعضاء لا أقطعك."

"الحقي يابت لقيته بيتربص بشقتكم، وشكله كده متفق مع العصابة." "هشام إيه المكان المعفن اللي جايبني فيه، بنات دول ولا بلطجية." "يا بت شكله بيلعب في عداد عمره." "الخطة 101." "استنوا استنوا، ده مراد صاحبي مش حرامي ولا حاجة." "بس نظرات عينيه مش مريحاني." "وانتي لحقتي تشوفي عينيا يا شبر ونص انتي." "هشام." "سكته أحسنه." "ولو مسكتش هتعملي إيه." "هنشلفطك. امسكي معايا يابت."

"باااااس ولا كلمة انتو إيه، مش انتي كنتي عاوزة عريس سلف لصاحبتك، أهو هو ده العريس." "يادي النيلة، استنى أنا والله رقيقة بطبعي بس انت اللي شكلك ما يطمنش مش كده يا ياسمين." "نعم. هشام انت جايبني أتهزق يلا بينا يا عم، دي مش تتخطب، دي تتخبط فوق دماغها." "استهدوا بالله يا جماعة، تعالوا بس هنروح نشرب حاجة ساقعة وبعدين نتكلم." "ماشي، خلاص يابت مطيرهوش إحنا محتاجينه بردو أحسن من قلة." "شوف شوف."

"خلاص بقا يا مراد هي متقصدش، يلا اركبوا." في كافيه. "تشربو إيه؟! ".... اتخرستوا تشربو إيه؟ "مش عاوز حاجة." "ولا أنا." "هاتيلي جيلاتي." "جيلاتي؟! "أيوه جيلاتي في حاجة." "اسمه Ice cream." "انت لسه هتعدلي. ياسمين من فضلك ده معجبنيش يا ستي خلي هشام ياخدني أنا هختار بنفسي." "اسكتي اهو كويس وخلاص يقضي غرض." "هههههههههههههه مراد اهدي دي بتهزر." "شفتي عينيه احمرت إزاي، إيه هطلع نار من بوقك ولا إيه." "هشام أنا ماشي."

"يابت اسكتي. خلاص ياسمك إيه هي مش هتتكلم مش كده يابت." "هو أنا قولت إيه هو اللي مش طايقني من الصبح، بس خلاص هسكت اهو." "شفت اهي سكتت اقعد بقا." "ماشي." "ياسمين إيه رأيك بعد ما نخلص هنا نروح نركب خيل." "الله أنا بحب الخيل، أنا موافقة. وافقي يا ياسمين." "خيل إيه ده على أساس بتعرفي فيه اسكتي عاوزين نروح سالمين." "متخافيش ده سهل جداً وبعدين ياستي لو معرفتيش تركبي اتفرجي." "لا ونبي."

"بطلي جدال مراد عنده اسطبل خيول وهيعزمنا، مش كده." "تحت أمرك يا اتش." "بت شكلنا ظلمناه شوفي قال إزاي تحت أمرك بأدب أنا كنت فكراه مش مؤدب." "اخرسي بيبص لنا." "حاسس إنهم بيشكروا فيك يا مارو." "هشام أنا بجد مش طايق الحرباية دي ومتاكدة إنها بتشتم، بس وربنا لا أطلعه عليها في الاسطبل." "هتعمل إيه." "مش عارف لسه بفكر." "من غير أذية يا مراد." "متقلقش أنا هربيها على خفيف."