أنتِ زعلانة مني ومن اللي قولته أول ما وصلنا صح؟
عادي يعني هو أنت قلت حاجة غلط ولا كذب؟ ما أنت قلت الحقيقة.
أنا آسف.
عادي يا حسين يعني كلمتك أنت اللي هتقف مثلاً! أستأذنك أنا هدخل أنام.
ما تقعدي تأكلي.
شكراً.
دخلت نمت، حلمت بإن في حاجة بتحرقني في إيدي، صحيت وأنا بتألم من أثر الحرق. أول ما فتحت عيني واتعدلت بخضة وفتحت النور بتاع الأباجورة اللي جنبي لقيت أثر الحرق فعلاً في إيدي وواجعني.
صحيت حسين اللي كان في سابع نومة وأنا خائفة:
حسين قوم أنا خايفة.
نامي يا أحلام وبكرا الصبح أبقى نشوف خايفة ليه.
قالها وهو نايم ومش واعي هو بيقول إيه أصلاً.
شديت الغطاء عليا ونمت فعلاً وصحيت على حلم مرعب تاني.
يعني أنا عمال أصحي فيكي وأنتِ ولا هنا ودلوقتي صاحية مخضوضة؟
كان واقف بيلبس.
هو أنت رايح فين؟
ماشي على الشغل، هكون رايح فين يعني!
أنت بتشتغل؟
لأ طبعاً بلعب، بروح أنزل ألعب.. ما أكيد بشتغل يا أحلام أومال عايش عالة على المجتمع يعني!
سيبت كلامه وبصيت على إيدي وتنحت.
مالك سكتي ليه؟
الحق أثر الحرق ووجعه راحوا!
حرق؟!
أيوا ما أنا صحيتك بالليل علشان كدا.
وهو أنتِ صحيتيني؟
أنت بتهزر يا حسين أنا حاولت اصحيك كتير علشان كنت خايفة.
طيب أنا نازل دلوقتي.
معرفش هو بيشتغل إيه ودي أكتر حاجة متخلفة ممكن حد يعيشها، ولا شخصيته ولا طباعه.
قومت روقت الدنيا حواليا وأنا عمالة أغيب وأرجع أبص على إيدي وأشوف وأحاول أفهم إزاي علامة الحرق فجأة اختفت!
رجاء رنت فرديت عليها وكانت زي اللي بتسأل وتتطقس مش تطمن بس؛ وكنت مستغربة.
عاملة إيه يا أحلام؟
الحمد لله على كل حال يا رجاء، وأنتِ وكل اللي عندك؟
كويسين هنعمل إيه، أنتِ في حاجة بتحصل معاكي؟
حاجة زي إيه؟
ولا حاجة سلام عشان في حد بينادي عليا.
قفلت وبدأت ألف في الشقة وأستكشفها.
بعدها دخلت المطبخ أشوف هجهز إيه علشان مش قادرة من كتر التفكير اللي ناقص يخلي عقلي ينفجر.
أول ما قربت من المطبخ وفتحت ضلفة المطبخ صوتت.
في حاجات غريبة ومرعبة خارجة منها، حشرات شكلها يخوف ولونها أسود. مش عارفة أحدد شكلها بس هي كأنها نمل كبير أسود وعقارب..
طلعت من المطبخ وأنا بجري، قعدت في الصالة وأنا بترعش، مش عارفة أستوعب اللي بدأ يحصل لي في خلال كام ساعة بس.
سمعت صوت أذان العصر فدخلت اتوضى، حاسة إن المشي علشان أتوضى تقيل على قلبي، تقيل عليا أمشيه، قاومت وفضلت أستعيذ من الشيطان لحد ما قاومت و قمت أصلي.
فتحت الورقة اللي فيها الأذكار اللي معايا وبدأت أقولهم، كأن في حبل بيلف على رقبتي ويتشد ويترخي، أنا مش فاهمة إيه دا بس بحاول أقاوومه.. أو فاهمة وبقول يارب لاء.
بعد حوالي ساعتين وأنا قاعدة مكاني دخل حسين.
مالك وشك مزرق كدا ليه؟
مش عارفة يا حسين بس أنا بقيت بحس بحاجات غريبة وبشوف حاجات أغرب، أنا شوفت حشرات شكلها يخوف لما فتحت ضلفة المطبخ وكنت رايحة أجهز أكل، حسين أنا خايفة قوي.
شدهني، قمت وكنت ماشية وراه، دخل المطبخ وفتح الضلفة ومكانش في حاجة!
والله العظيم يا حسين ما بكذب، والله أنا شوفتهم فعلاً، مش عارفة هما إزاي اختفوا بس هما كان شكلهم يخوف، حتى في الليل لما حلمت بالحرق وصحيت شوفته والصبح اختفى بس دا بيحصل فعلاً..
خدني في حضنه وفضل يطبطب عليا ويقرأ قرآن.
تاني يوم صحيت من أول أذان الفجر، قومت صليت الفجر وصحيته علشان أشوف هيصلي ولا لاء بس إيه دا طلع بيصلي الفجر حاضر أصلاً!
مستغربة لأني مكنتش بشوف حد من بيتنا بيركعها..
بعد ما خلصت صلاة قومت جهزت له اللبس اللي هينزل بيه.
جبت لنا فطار مرضيتش أفطر مع صحابي وأسيبك.
أنت عندك صحاب؟
أنا عندي حياة يا أحلام والله، ليه بتتعاملي معايا إني حد معندوش حياة وبتتفاجئي؟ يعني إيه دا أنت بتشتغل! إيه دا أنت بتصلي! إيه دا أنت عندك صحاب؟!
مش قصدي والله بس حقيقي معرفش عنك حاجة ولا عن حياتك، دا غير إنك أصلاً مكنتش بتنزل البلد غير مرة اتنين كدا في السنة فأنا يعتبر معرفكش.
تعالي اعملي لنا كوبايتين شاي بس وأنا هحكي لك كل حاجة.
دخلت المطبخ بخوف، هو كان داخل ورايا.
بصيت عليه فقال:
عارف والله إنك خايفة علشان كدا دخلت.
جهزت الشاي وطلعنا نأكل.
أنا يا ستي حسين ابن عمتك.
بجد مكنتش أعرف!
هتستخفي هسكت.
طيب ما أنت بادئ الكلام شوف إزاي!
بدأ يتكلم وهو بيأكل:
ما علينا هطنش كل اللي فات وأحكي لك قصة كفاحي.
قصة كفاح مصطفى كامل هي أصلك!!
طنش كلامي فعلاً وكمل:
أنا خريج سياحة وفنادق وبعد مرمطة كتير قوي حالياً مرشد سياحي في شركة من أكبر شركات السياحة في مصر ودي حاجة محدش في عيلتنا يعرفها علشان لو عرفوا هتلاقي في حتة عمل راشق في حياتي.
إزاي يعني مش باين عليك! مش قصدي والله بس قصدي محدش في العيلة يعرف إزاي!؟
لأ ما أنا سافرت بعد ثانوية عامة زي باقي شباب العيلة والتنسيق جاب لي سياحة وفنادق وكنت في القاهرة ودلوقتي أهو في الأقصر دلوقتي البلد اللي فيها تلت آثار العالم.
سكت ثواني وبعدين قال:
أنا أكتر واحد في اللي حواليا كنت بتعرض للانتقاد على أي حاجة كنت بعملها ويمكن انتِ أكتر حد شبهي في العيلة في النقطة دي. كل حاجة هتحاولي تغيريها علشان هي غلط هيحسسوني إن هما الصح وأنتِ الغلط والعيب فيكي وهما الكُمّل، طبعاً الكمال لله وحده بس هما عالم دماغهم تعبانة ملناش دعوة بيهم.
سألته وأنا جوايا خايف:
أنت بالنسبة لك عادي تمد إيد على مراتك زيهم يا حسين؟ عادي تضرب أولادك الضرب المُبرح دا؟ ممكن في يوم يكون تفكيرك زيهم؟
كفاية خوف يا أحلام، أنا لو زيهم كان زماني شغال مع العيلة في التجارة وشغلهم اللي معروفين بيه، وبعدين يعني ربنا إدى الواحد منا القوة علشان يستقوى على اللي أضعف منه؟ وبعدين أنا عشت في جفا علشان مينفعش أبين ضعيف فأكيد مش هعمل كدا في عيالي في المستقبل.
اللي عاش حياته خايف يا حسين طبيعي يخاف حتى لو كل الأجواء حواليه مطمئنة، حتى لو كل اللي حواليه ساكن وهادي بس جواه لا هو ساكت ولا هو هادي.
آه من اعتاد القلق يعني.
كنت بلم مكان ما كلنا وهو وقف يساعدني ويلم معايا.
سيب اللي في إيدك وروح إلبس حدانا مفيش واحد هيساعد مرته ولا يرفع قشاية حتى.
رجعتي للهجة البلد يعني! بس عندي أنا وفي تفكيري عادي سيبك من البلد اللي منها لله ويلا علشان واخدك معايا.
كنت بغسل آخر طبق وبسأله باستفهام:
واخدني معاك فين؟
يلا بس متسأليش كتير.
غسلت إيدي وروحت وراه.
إيه رأيك لو تلبسي الطقم دا.
أنت إزاي بجد؟ دا أكتر طقم ستايله عجبني وكلهم قالوا لي إن ذوقي و.حش.
كانت بلوزة واسعة سادة لونها بني وجيبة مشجرة بني والطرحة لونها بيج.
أنت عارف إن دا إستايل اللبس اللي بحبه واللي محدش منهم مقتنع بيه وبيقولوا عليا مبفهمش!
إلبسي وهقيم وأشوف مين ذوقه أحلى.
بحماس طفلة بتركن خوفها على جنب وبتتمنى تعيش الحياة.
دخلت لبست ونسقت الطقم لأول مرة زي ما بحب من غير ما أضطر ألتزم بعادات وتقاليد تخنق.
خلصت وخرجت له الصالة.
هآه إيه رأيك؟
بالله إزاي مكانش عاجبهم؟ بس حقهم شكلك فعلاً حلو فتلاقيهم غيرانين.
نزلنا.
وقف قدام عربية وفتحها.
أنت إزاي معاك عربية وبتيجي البلد قطر عادي ومواصلات؟