رواية اقدار لا ترحم الفصل الرابع 4 - بقلم سيليا البحيري

الصالة منورة بنور خافت. سيلين لابسة روب حرير غامق، شعرها مرفوع بعناية، واقفة قدام الشباك اللي بيطل على المدينة. في إيدها كوباية شاي... بس ما شربتش منها حاجة. الدادة أمينة قاعدة على الكنبة، مسبحتها في إيديها، وبتهمس بأذكارها، عنيها مليانة حنان وقلق. أمينة نامت الأميرة الصغيرة؟ سيلين أول ما دخلت الأوضة قالتلي: "زي أوضة سندريلا! وبعدين حضنتني وقالت: "أنا مبسوطة يا ماما." (تحاول تسيطر على دموعها)

أول مرة تنام وهي حاسّة بالأمان… وأنا أول مرة أنام وهي جنبي. أمينة يا رب تدوم لمّتكم يا بنتي… ويبعد عنكم ولاد الحرام. سيلين يا أمينة… اللي حصلي مش كان صدفة… كان متخطط له، بأوراق مزوّرة وضمير ميت. أمينة يا سيلين… إوعي الانتقام يعمي قلبك… خلاص رجعتي، وبنتك في حضنك، سيبي اللي فات ورا ضهرك. سيلين اللي فات خلّاني جسد من غير روح… خمس سنين يا أمينة، اتكسرت كرامتي، واتاخدت بنتي، واللي كنت فاكراه بيحبني… باعني. أمينة

والله ما كان بإيدي… كل اللي كنت بعمله إني بدعيلك… ودموعي ما نشفتش يوم. سيلين عارفة يا أحن قلب… إنتي أمي قبل أي حد، وشهادتك عندي بالدنيا وما فيها. أمينة طب قوليلي… خرجتي إزاي؟ مين وقف في ضهرك؟ سيلين اسمه… سيف البحيري. أمينة سيف البحيري؟ الراجل بتاع البيزنس المعروف؟! بس… ساعدك ليه؟ سيلين لأنه ليه مصلحة… الصفقة كانت واضحة: يطلعني من السجن، وأنا أشتغل معاه في مشروع كبير، هيعلنوا عنه قريب…

محتاج شركتي القديمة، وعلاقاتي… واسمي. أمينة بس يا بنتي… إوعي تكوني لعبة في إيده. سيلين لأ يا أمينة… أنا مش لعبة… أنا شريكة. وأنا اللي طلبت كمان نفتح ملف محامي حسام… القذر اللي لفّقلي قضية قتل ياسر. أمينة المحامي؟! سيلين أول واحد في القايمة… هو اللي زوّر، وهو اللي خبّى الأدلة، وباع ضميره بورقة شيك. أمينة سيلين… إوعي الحقد يملأ قلبك… ربنا كبير. سيلين وأنا مؤمنة… بس ربنا إداني عقل… وفرصة… واللي ظلمني لازم يدفع التمن.

أمينة والبنت اللي شفتيها في المطعم؟ اسمها إيه؟ ليل؟ سيلين غامضة… بس مفهومة… عنيها فيها نفس الكسرة اللي في عنيا… ونفس النار اللي جوا قلبي. ما قالتش السبب… بس أنا فهمت. ليل واحدة من ضحايا حسام… وأنا وهي هنتعاون… وضربتنا الأولى قرّبت. أمينة يا رب يستر عليكي يا بنتي… قلبي مش مطمّن. سيلين لازم أبقى قوية… عشان بنتي… وعشان سيلين اللي ماتت… وأنا رجّعتها من الرماد.

سيلين قاعدة على الكنبة، عنيها مولعة نار، جنبها أمينة بتدعيلها بهمس... وفي الخلفية… صوت ست ناعم بيهمس: "الانتقام… بقى أقرب من أي وقت فات." *** في شقة قديمة بحي شعبي –بالليل –أوضة مها (أم ليل) الأوضة ضيقة، الحيطان باهتة، وبرغم وجود دفاية صغيرة، البرد لسه بيتسلل من كل ناحية. مها نايمة على السرير، مابتتحركش، عينيها بتتحرك ببطء، لا قادرة تتكلم ولا تتحرك، بس دموعها بتنزل كل شوية من غير إذن ولا صوت.

ليل لابسة عباية سودا طويلة، شعرها مربوط بسرعة وبعشوائية، قاعدة على كرسي قديم جنب سرير أمها، بتمسح جبينها بقطنة مبلولة. الساعة عدّت واحدة بعد نص الليل، والشارع ساكت، مافيش صوت غير مواء قطة جعانة بره. ليل النهاردة… قابلتها. (تبص في عيون أمها اللي بترمش ببطء) مراته… سيلين. اللي سجنها، وظلمها، وبهدلها… زي ما عمل فينا بالظبط. (مها عينيها تدمع، بس ما بتتكلمش…) ليل يا ماما… أنا ما نسيتش. ومش هنسى.

ما نسيتش بابا… وهو بيموت قدامي، ولا دمعتك اللي مانشفتش من ساعتها. (تسكت شوية، تتنهد، وتكمل بصوت واطي) تعرفي عرفت حكايتها إزاي؟ (تضحك ضحكة فيها غصة) من واحد كان شغال عنده… في الشركة اللي أسسها من سرقة الناس. اسمه نزيه… كان عامل بسيط، بس قلبه أنضف من وشوشهم. قالّي: "حسام بيعتبرنا عبيد، بيشتمنا، يهينّا، وساعات يمد إيده علينا… بس ياما ظلم ناس غيرنا."

وقاللي كمان: "لو عايزة تنتقمي منه، روحي لسيلين… هي الوحيدة اللي كرهته أكتر منّا كلنا." (تبص على مها) وفعلاً… رحت، وشفتها… وشفت الكسر في عنيها… نفس الكسر اللي فيّا. (تسكت لحظة، تقوم وتتمشى في الأوضة بهدوء) إحنا بقينا سلاح لبعض… أنا وسيلين… إحنا وشين لوجع واحد… هي اتسرق منها حُضن بنتها… وأنا اتسرقت مني عيلتي كلها. (ترجع تقرب من مها، تمسك إيدها اللي بتتهز بخفة، وتدمع) هتفتحي عينيكي يوم… وتشوفي حسام تحت رجلي.

هرجّعلك كرامتك يا أمي… وتشوفيني… وتشوفي فيّا بنت تفرحي بيها. (تنزل جنبها وتهمس عند صدرها) أقسمت… من يوم ما شفت بابا وهو بيتدفن، وإنتِ بتصرخي ومحدش سمعك… أقسمت… إني مش هرحم اللي كان السبب. (تسكت، وبهدوء… تحط راسها على صدر أمها المشلولة) ليل تعيط في صمت… ولا صوت غير دقة الساعة… ودموعها اللي بتنزل على جبين أمها. *** فيلا حسام –جناح النوم –نص الليل.

الفيلا فخمة بشكل مبالغ فيه، أثاث دهبي تقيل، نجف عملاق، ولوحات زيت غالية معلّقة على الحيطان. بس رغم الرفاهية… الجو خانق، كأن الحيطان شايلة ذنوب الناس اللي اتبنت على آلامهم. جوه أوضة النوم الكبيرة، نوال قاعدة قدّام المراية، بتشيل مكياجها بالراحة، وحسام ممدد على السرير، لابس بيجامة حرير، وبيقلّب في موبايله وهو ساكت. بره، الخدام بيطفوا النور، ووليد نايم في أوضته القريبة. نوال شُفتها النهاردة... حسام مين؟ نوال سيلين.

(تبص له من المراية) (حسام يتجمد ثانية، بس يخبي توتره، ويضحك بسخرية) تقصدي المرحومة سيلين؟ يا نوال اهدي، الست دي خلصنا منها من زمان. نوال لأ يا حسام… ما خلصناش. كانت واقفة قدامي… لابسة كويس، واقفة قوية… ماسكة بنتها في إيدها… وفي عنيها نار. حسام وهي عرفت إنك إنتي وسِهر خبيتوا بنتها؟ قالتلك حاجة؟ نوال ما قالتش… بس عنيها كانت بتتكلم. كأنها بتقول: "دوركوا جاي"... وأنا… والله خوفت يا حسام. حسام خوفتِ؟ إحنا اللي دمرناها!

إحنا اللي خليناها تبوس الأرض قدام المحكمة! نسيتي كانت عاملة إزاي وهي بتلبس البدلة الحمرا؟ خلاص! راحت، وطلعت بعفو ولا واسطة… ومين قال إنها ناوية تنتقم أصلاً؟ نوال وانت ليه صوتك عالي كده؟ (تسكت لحظة وبعدين تقول بسخرية) ولا يمكن… ضميرك فاق فجأة؟ حسام ما عنديش ضمير يفوق أصلاً. (يبص في السواد اللي بره) بس لو رجعت… هنتعامل معاها… زي ما عملنا المرة اللي فاتت. نوال المرة دي مختلفة… سيلين ما كانتش مكسورة… كانت غضبانة.

ساكتة، بس مخيفة… والمصيبة… إنها ما كانتش لوحدها. حسام تقصدي مين؟ نوال معرفش… بس البنت اللي معاها –تاليا –كانت ماسكة إيدها كأنها مش ناوية تسيبها أبداً. وكأنها اتعلمت منها… إزاي تبقى قوية. حسام البنت… كبرت؟! نوال كبرت… وبقت قمر. شبهها. وبتعرفك يا حسام… وبتعرفني كمان. (لحظة سكوت تقيلة… وفجأة صوت إزاز بيتكسر بره –يمكن من الهوا –بس هما الاتنين بينطّوا من الخضة.) نوال حسام… لو سيلين بدأت… مش هتوقف. وإحنا بقينا في قايمتها.

حسام اللي يبتدي حرب… لازم يكون جاهز يدفع تمنها. (بس في صوته… الرعب بيبان رغم كل التمثيل. لإنه عارف… سيلين اللي كان يعرفها… ماتت. واللي رجع دلوقتي هو… "ظل الانتقام.") *** بعد لحظة سكوت تقيلة. الجو مشحون… نوال رجعت السرير بس لسه وشها باين عليه القلق والتوتر… حسام واقف قدام الشباك، عينيه فيها لمعة غريبة… فكرة بدأت تتشكل في دماغه… فكرة شيطانية. حسام لو فعلاً رجعت سيلين… مافيش حاجة هتكسرها زي ما كسرناها قبل كده. نوال

تقصد إيه؟ حسام تاليا. نوال تاليا؟! حسام هاطلبها رسمي… الحضانة. أنا أبوها، وسيلين… عندها سوابق. المحكمة ممكن تدهالي بسهولة. نوال إنت بتتكلم جد؟! حسام طبعًا بتكلم جد. شوفيها من ناحية القانون: أم كانت محبوسة، ماعندهاش شغل، ولا وضع اجتماعي… وأنا؟ راجل متجوز، عندي بيت، ومستقر… المحكمة حتديني البنت وأنا مغمض. نوال لأ. حسام يعني إيه لأ؟! نوال تاخدها من سيلين؟ آه، تمام. نكسر قلبها؟ نغلي دمها؟ حلو! بس البنت تعيش عندي؟

أربيها أنا؟ تصحى وشها قدامي كل يوم؟ لأ يا حسام. حسام نربيها جنب وليد، تبقى أخته! نوال وليد ما عندوش أخت اسمها تاليا! دي بنت عدوتي، بنت الست اللي كانت الناس كلها بتحبها وتقارنّي بيها! أنا تعبت أطلع من تحت ظلها… علشان أربي بنتها؟! لا وألف لأ. حسام ماشي… نخليها وسيلة ضغط. سلاح… كل مرة سيلين تفكر تفتح بقها، تفتكر إن بنتها مش في حضنها. نوال كده… ممكن. تاخدها، تدخلها مدرسة داخلية، مربية تهتم بيها… أي حاجة، بس تبعدها عني.

حسام تمام… سيبيلي الموضوع ده. ورقة الحضانة… هتبقى سلاحنا الجاي. نوال بس خليك فاكر، يا حسام… تاليا مش سيلين. ولو فيها نقطة واحدة من أمها… ممكن تعمل حاجة عمرنا ما نتخيلها. حسام أنا اللي بكتب النهايات، يا نوال… والمرة دي، هخليها تنتهي تحت رجلي… تاني. (نوال تبص له بقلق واضح، وهو ياخد صورة قديمة له مع سيلين وتاليا… ويبص فيها لحظة، وبعدين يمزقها ببطء وهو بيهمس) "حتى بنتك… هتبقى ورقة في إيدي." *** بعد لحظات من كلام الحضانة.

حسام لسه قاعد يتباهي بالخطة، ماسك موبايله بيفكر يبعت رسالة لمحاميه، ونوال واقفة قدام التسريحة، بتمشط شعرها وبتهمس لنفسها: نوال يا رب تاليا تطلع كابوس في حياتها، زي ما سيلين كانت كابوس في حياتي. وفجـــأة… 📱 موبايل نوال بيرن. رقم مش معروف… بس نغمته غريبة كده، موترة. نوال ألو؟ وصوت أنثوي، بارد… عميق… يخترق الغرفة: سيلين مساء المؤامرات، يا عرايس الظلم. نوال سيلين!! حسام حطيها على السبيكر! نوال تضغط…

وصوت سيلين يملأ الغرفة: سيلين خطط حلوة بصراحة… حضانة، استغلال، مدارس داخلية… باين عليكم مخكم شغال. بس عندكم مشكلة صغننة… (نبرة سخرية) نسيتوا تشوفوا الكاميرا اللي فوق الدولاب… وورا الساعة… وتحت الإضاءة. حسام أنتي… بتراقبينا؟! سيلين لأ، أنا راقبت نفسي… وإنتو فتحتوا المايك… شكرًا أوي. على فكرة، صوتكم طالع زي الفل، حتى رعشة نوال لما قلت "تاليا" سمعاها الدنيا. نوال أنتي… أنتي ما عندكيش حق! ده اسمه تجسس و —سيلين

ولما لفقتهولي قضية قتل وسرقة شركة وسجنتوني ظلم… ده كان حق؟ ولا القانون بيشتغل بالمزاج في عالمكم الوسخ؟ حسام ما تفتكريش إنك أقوى، يا سيلين! أنا معايا كل حاجة! سيلين معاك كل حاجة؟ (تضحك ببرود) إنت سرقت شركتي… وأنا بنيت إمبراطورية على رمادها. ثروتي دلوقتي؟ خمس أضعاف اللي سرقته. مش بس أغنى منك… أنا فوقك، بخطوتين… دايمًا. نوال مستحيل… إنتي كنتِ في السجن! سيلين في السجن… اتعلمت أخلق وحوش. واتعامل معاهم. حسام عايزة إيه؟!

سيلين أنتو الاتنين… على لستة الحساب. وتاليا؟ بنتي. مش لعبة في إيد أي حد تاني. وليد؟ بريء… بس أكبر نقطة ضعف فيكم دلوقتي. (صمت… ثقيل) سيلين ناموا… لو عرفتوا. 📞 المكالمة بتتقفل. نوال واقفة مصدومة، وشها شاحب، ودموعها على طرف عينها. حسام ياخد الموبايل، يحدفه في الأرض بكل غضبه، ويصرخ: حسام من يوم ما خرجت من السجن، حياتي بقت كابوس!!! (الضوء يخف… وصوت ضحكة سيلين بيملأ الخلفية… ضحكة تقطع النفس.)