رواية اخترق حياتي الفصل الثامن 8 - بقلم ندى احمد

دانيا: أنا هدخل أغسل وشي. وخرجت من الحمام لقيت نوح بيتكلم في الموبايل وموطي صوته. نوح: أيوه يا حبيب بابا، وأنت كمان اديني ماما أكلمها أطمن عليها... أيوه يا قمر. دانيا: 😳😳 ودانيا من الصدمة كسرت صينية الشاي اللي كانت جايباها. نوح انتبه وراح على دانيا. نوح: أنتي كويسة؟ دوختي ولا إيه؟ دانيا بصتله بأنه إزاي بيتعامل عادي كده وهو مخبي عليها إنه له ابن ومتجوز وله حياة تانية هي متعرفش عنها أي حاجة. نوح: دانيا أنتي كويسة؟

دانيا هزت راسها: أنا عايزة أروح أقعد مع والدتك تاني. نوح: نعم؟ ده ليه إن شاء الله؟ دانيا: لأن جوازنا ده مؤقت يا نوح وأنا مش هقدر أكمل فيه. نوح: ده من إمتى الكلام ده؟ دانيا: من دلوقتي. نوح: مش علشان عاملتك حلو تسوقي فيها. دانيا: كتر خيرك، أنا عايزة أروح دلوقتي. نوح: دانيا في إيه؟ دانيا: مفيش حاجة. نوح: أنتي مش طبيعية، أنتي كنتي كويسة قبل ما تروحي الحمام. دانيا: معرفش إيه اللي حصل، ممكن أنت تعرف.

نوح: متلفيش وتدوري، في إيه؟ دانيا: شوف مين فينا اللي بيلف ويدور على التاني. نوح مسح على وشه بغضب: أنتي في إيه مالك؟ دانيا: أنت كنت بتكلم حد في الموبايل. نوح: لأ وأنتي مالك أصلاً. دانيا: تمام، طالما أنا مالي يبقى أنا مش عايزة أقعد هنا دقيقة واحدة. نوح: يا بنتي هو أنا جيت جنبك ضايقتك طيب؟ وبعدين لما الناس تشوفك ماشية من البيت يوم الصباحية يقولوا إيه عليكي يا هانم؟ دانيا سابته ودخلت أوضتها تعيط.

دانيا في الأوضة بتعيط إن نوح حب طفولتها متجوز وكمان مخلف، طب إزاي وإمتى وليه مخبي؟ كل الأسئلة دي كانت بتدور في دماغ دانيا لحد ما غلبها النوم. ونوح بره قاعد مش عارف يقول إيه لدانيا ولا يشرحلها إزاي. وهو قاعد كده قرر يدخل تاني يشوف موبايل دانيا من وراها ويقلب فيه تاني علشان يتأكد إن محمد مرجعش يضايقها، اتصدم بآخر رسالة بينهم كانت الصبح ومن وقت قريب واللي

كانت دانيا بتقول لمحمد: أنا فهمته زي ما قولتلي بس أنا خايفة يعمل فيك حاجة يا قلبي. وهنا نوح الغضب تملكه ودخل أوضة دانيا. نوح:..