رواية اللعنات العشر الفصل التاسع والعشرون 29 - بقلم وفاء هشام

مروان: الخيانة! أصعب حاجة إن الشخص اللي تحبه وتثق فيه يخذلك ويطعنك في ضهرك. الخيانة هنا ليها معاني كتير. في خيانة الزوج لزوجته أو الزوجة لزوجها. في خيانة الصديق لصديقه. في خيانة الأب لأبنائه. حاجات كتير ممكن تندرج تحت مسمى الخيانة. بس الشيء المشترك بينهم والمتفق عليه إن الخيانة أيا كانت نوعها فهي شيء صعب منافي للأخلاق، سواء كانت أخلاق دينية أو أخلاق اجتماعية.

الجميع اتفقوا على بشاعتها وعدم كفاءة أو أمانة الشخص اللي قام بيها. بالنسبالي بقى أنا مكنتش أتوقع إني ممكن في يوم أعمل كدا أو أتوصف بإني خاين. الموضوع كان صعب والأصعب إني مكنتش شايف قدامي وخسرت بسبب اللعنة دي حب إسراء وثقتها فيا. كل حاجة كانت هتنتهي بسببها والكتاب كان هيحقق اللي كان بيتمناه. *ضحك بخفة ثم تابع*

هو اللي قال لإسراء ترجعلي علشان ينتقملها مني، بس كانت الحركة دي في صالحي علشان مكنش يعرف إني عمري ما أسيبها تاني وطالما أنا واعي عمري ما هنطقها تاني. *نظر لها بابتسامة ثم تابع* إسراء الحاجة الحلوة اللي في حياتي ومن وجهة نظري هي الدوا لكل داء حصلي، مستحيل أخسرها بعد كل دا بسبب لعنة سخيفة من كتاب أسخف. ضحكوا جميعًا على ردة فعله وتعابير وجهه الساخطة على هذا الكتاب. سيف: اهدى طيب لحسن يصحالك.

مروان: مبقاش يهمني خلاص، المهم عندي دلوقتي إني مخسرش حد بحبه. ابتسموا جميعًا فقد مروا بأمور صعبة فعلًا. آسيا: لو خلصت ممكن أتكلم. نظر مروان إلى الرقم الذي على الأرض فوجده تحول إلى أربعة، ابتسم ثم قال لآسيا: كدا رضى، اتفضلي. آسيا: كل واحد فينا عنده ماضي صعب إنه ينساه أو يتخطاه بسهولة، مهما حاول هيفضل ملازمه طول العمر. لعنتي مكنتش جديدة عليا بالعكس أنا مريت بيها من قبل، بس الاختلاف إني مكنتش عارفة أتحكم فيها زي زمان.

قبل كدا لما كنت مصاصة دماء بسبب لعنة بردو أصابتني بسبب شخص في اليابان، وبعد ما قتلته زالت عني وعن كل اللي نقلهم لعنته. ودلوقتي رجعت تاني بسبب لعنة من كتاب عمري ما كنت أتخيل إنه يكون موجود. الفكرة إنه عامل زي الشيطان اللي بيفكرنا بذنوبنا لما نحاول نتوب، ويقعد يوسوس لنا إن ربنا عمره ما هيقبلنا: هيقبلك إزاي وأنت عامل كذا وكذا وكذا.

بس بعد كل اللي مريت بيه عرفت قد إيه إن ربنا كريم وبيغفر لنا ذنوبنا إذا تراجعنا وتبنا إليه. ربنا مش بيقفل بابه في وش حد طالما لسه الساعة مجتش، يبقى ارجع، هيقبلك مهما عملت، ارجع وحاول تكفر عنها، تصدق، صلي وصوم. اعمل حج أو عمرة، اعمل طاعات كتير فإن الحسنات يذهبن السيئات زي ما ربنا سبحانه وتعالى قال.

اللعنة دي فكرتني بذنبي بس خرجت منها أقوى وقربت من ربنا أكتر والحمد لله أنا في رضى تام عن حالي دلوقتي ومبسوطة أكتر من أي وقت فات. بس.. اللي كان نفسي يكون موجود معايا دلوقتي هو أحمد أخويا الصغير، وحشني أوي، كان فراقه من أصعب الحاجات اللي مريت بيها. الله يرحمه. نزلت دموعها باختناق وصمتت، فأخذها رعد في حضنه ليخفف عنها. تغير الرقم على الأرض إلى خمسة وتغير معه اللون إلى الأسود. مروان بحزن: الكتاب حس بيكي يا آسيا.

الله يرحمه. سليم: دوري. الأول حابب أعرفكم شخصيتي القديمة، كانت شخصية أنانية مغرورة اتعودت إن كل حاجة أعوزها لازم ألاقيها. حتى في الكلية كنت بدايق إسراء وأذيّت مروان. بس في يوم حسيت بحاجة غريبة. بصيت لنفسي في المراية وأنا كاره الشخص اللي أنا شايفه وشريط حياتي بيمر قدامي وصوت جوايا بيقول: هتقابل ربنا إزاي؟ وبيقولي إن الطريق اللي أنت ماشي فيه غلط وإن بإيدك تكون شخص أحسن. لما إسراء اتخطفت

ومروان شك فيا قلت لنفسي: يااه هو أنا وحش كدا! لاقيت نفس الصوت بيقولي: أنت مش وحش وممكن تثبتله إنك عكس ظنه، ساعده يلاقيها. وفعلاً عملت كدا وبقينا أصحاب وأكتر كمان. الإدمان شيء صعب ومدمر للشخص اللي بيدخل سكته. أنا عمري ما شربت سيجارة وكنت مستغرب إزاي حصل معايا كدا. عشت تفاصيل المدمن وهو فايق، وهو بيتعذب، وهو بيستمتع بالجرعة اللي بياخدها لحد ما فكرت إني بقيت مدمن بجد. بس الأصعب إن صاحبي هو اللي كان بيديني الجرعة دي.

فهمت بعدها إنه الكتاب غيره زي ما غيرنا كلنا. سكّة الإدمان صعبة ومميتة علشان كدا لازم ناخد خطوة، لازم نساعد الشباب إنهم يبعدوا عن السكة دي مهما كانت الظروف اللي انحطوا فيها. لازم نوجه اهتمامنا للمشاكل اللي ممكن تخليهم يتجهوا للإدمان، نبقى سابقينهم بخطوة علشان نلحقهم. وآخر حاجة إن الإدمان حرام وربنا حرمه لإنه بيأذي مش بيفوق. ممكن في الأول تحس بمتعة بس بعدها هتندم لما توصل لطريق مسدود آخره المقابر.

إحنا كلنا آخرنا هناك بس الاختلاف إنك بتعجل في موتك بالسم اللي بتدخله جسمك بالبطئ. ربنا يتوب علينا ويرحم شبابنا من السموم دي. الجميع: آمين. مروان: شكراً يا سليم وحابب أقولك إن اللي كان بيكلمك قبل كدا كان الكتاب. سليم بصدمة: هو اللي كان... مروان: أيوة، علشان كدا هو كتاب الخير، كتاب حاول يصلح مش يفرق، حاول يسيب بصمة حلوة في حياتنا. عرفت ليه أنا مكنتش مصدق إنه ممكن يأذينا. صمت الجميع لبرهة حتى قاطعت

دعاء هذا الصمت قائلة: الوسواس القهري. انتبه الجميع لها فأكملت: واحد من الأمراض النفسية اللي ممكن تكون شائعة، أنا معرفش كتير عن المرض ده بس قريت عنه علشان أقدر أتاقلم. لقيت إن المرض ده له أشكال كتير وقريت إن "الاضطراب الوسواسي القهري بيصيب حوالي 2.3% من الناس في مرحلة معينة من حياتهم، ويكون معدل الإصابة في سن محدد حوالي 1.2%، وهو اضطراب منتشر في كافة أنحاء العالم". أنا مش عارفة أقول إيه بس اللي كنت بحس بيه كان صعب.

إن دايما في حد بيتكلم في دماغي بيقولي اعملي ده واعملي ده واتأكدي من ده، طب إنتي عملتي كذا، طب إنتي واثقة في ده، طب ووووو... حاجات كتير أوي عقلي مقدرش يستوعبها لدرجة إني كنت هدخل السكينة في دماغي علشان الأصوات تقف. أنا تعبت من اللعنة دي واللعنة الأكبر إن بابا موافقش على طلب سليم. رفع سليم رأسه ونظر إليها ثم قال ضاحكاً: مش هسيبك وهتجوزك غصب عن عين أبوكي.

ضحك الجميع على ما قاله وخجلت هي، ف تغير الرقم إلى سبعة وتلقى سليم صفعة على مؤخرة رأسه فانتفض من مكانه. مروان بضحك: بيقولك اتأدب. "الوسواس القهري هو نوع من الاضطرابات النفسية المرتبطة بالقلق، تتميز بأفكار ومخاوف غير منطقية (وسواسية) تؤدي إلى تكرار بعض التصرفات إجباريًا (قهريًا) ، مما يعوق الحياة اليومية.

أحيانًا يكون الأشخاص المصابون باضطراب الوسواس القهري واعين لحقيقة أن تصرفاتهم الوسواسية غير منطقية ويحاولون تجاهلها أو تغييرها، لكن هذه المحاولات تزيد الشعور بالضيق والقلق، لذلك تعتبر هذه التصرفات بالنسبة إليهم إلزامية للتخفيف من الشعور بالضيق." مروان: يلا شباب مين هيكمل؟ أدهم: هتكلم أنا. بعترف إن لعنتي كانت خفيفة عن الباقيين ومحصليش أذى نفسي أو جسدي، بس شعور إن الناس تبصلك وتشاور وتقول: ده حرامي.

شيء صعب، شيء بيهين اسمك وسمعتك وبيوقف مستقبلك. أنا بتكلم لما الموضوع يكون مرضي، إنما لو واحد بيسرق فعلاً ومش حالة مرضية ده اللي لازم يتعاقب وياخد جزاءه. بس ياريت الناس تفهم إن ده مش زي ده ومفيش وجه مقارنة ما بينهم علشان المريض بيعمل كدا غصب عنه في لحظة ضعف منه، إنما التاني بيرتب ويخطط ويعمل، فيه فرق كبير.

"يعرف هوس السرقة بأنه عجز متكرر عن مقاومة الرغبات في سرقة الأشياء التي عادة ما لا يحتاج إليها السارق، وعادة ما تكون ضئيلة القيمة. هوس السرقة اضطراب صحة عقلية نادر، ولكنه خطير، ويمكن أن يسبب الكثير من الألم العاطفي لمرتكبه ولأحبائه إذا لم يتم علاجه." مروان: كل اللعنات صعبة يا أدهم، وكلنا اتأذينا منها، محدش خسرش حاجة في اللعنة بتاعته. ودلوقتي إحنا قربنا ننهي كل ده، فاضل خطوتين. سيف: الجفاء.

زي ما أدهم قال هي لعنة آه بس خفيفة، الوحيدة اللي اتأثرت بيها هي حسناء. علشان كدا حابب أتأسفلها قبل أي حاجة. الجفاء بيجي في الأصل نتيجة العزلة وعدم الاختلاط بالناس ومعناه هو الغلظة وعدم اللين في القول والفعل. وديننا نهانا عن الفعل ده فالجفاء ليس من خلق الإسلام. أنا عمري ما كنت كدا وكنت اجتماعي جدا وبحب أختلط وأصاحب الناس وأساعدهم، علشان كدا لما اللعنة دي جت كانت حمل ووجع كبير على قلبي.

بتمنى تسامحوني لو صدر مني أي تصرف أزعجكم. مروان وهو يربت على ظهره: مسامحينك يا صاحبي. "عن أبي هريرة رضي الله عنه، عن النبي صلى الله عليه وسلم قال: ((الحياء من الإيمان، والإيمان في الجنة، والبذاء من الجفاء، والجفاء في النار) ففي هذا الحديث بين المصطفى صلى الله عليه وسلم أن الإيمان والحياء مترابطان متلازمان، وهما معًا يقودان صاحبهما إلى الجنة، وفي المقابل فإن البذاء -وهو فُحْش القول، والسَّيِّئ منه

–متلازم مع الجفاء، فهو صِنْوَه الذي لا يفارقه، وهما يسوقان صاحبهما إلى النار." مروان وهو ينظر إلى إسراء: حبيبتي فاضل إنتي. فاضل لعنة واحدة علشان نكمل. نظرت إليه قليلاً ثم أخذت نفساً عميقاً وقالت: الغرور. عندما قالتها ازداد الرقم إضاءة والذي كان تسعة. تنهدت وقالت: الغرور صفة سيئة جداً واللي بيحمل الصفة دي مش بيشوف غير نفسه، بينسى اللي حواليه وبيتعالى عليهم، بيفكر في مصلحته وبس ومش بيهمه أي حد تاني مهما كان.

بس لو الناس دي عرفت أهمية اللي حواليهم هيندموا ندم كبير على كل اللي عملوه معاهم من تكبر وقلة اهتمام بيهم وتجاهلهم وسوء معاملتهم. ياريت نهتم بالموضوع ونحاول نهذب أخلاقنا وتصرفاتنا. والإسلام حثنا على التواضع وعدم الكبر والغرور علشان دول من صفات أهل النار. مروان أنا آسفة أذيتك بلعنتي دي، حقك عليا. مروان بحب: ولا يهمك يا قمر، كله يهون علشانك يا قمر. سليم: يا عم إحنا قاعدين.

ضحك الجميع وازداد ضوء الرقم المجتمعين حوله حيث تبدل إلى رقم عشرة. انتبهوا جميعاً إلى ما سيحدث، فظهرت أمامهم صورة ثلاثية الأبعاد للكتاب وظهر صوته قائلاً: سأدلكم على مكاني وآمل أن تصلوا إلي بسرعة. ولكن هناك شرط واحد، عندما تجدوني لا يمكنكم لمسي. من يمكنه هو شخص لم تصبه لعنات الشر وتضعون ثقتكم به، شخص أمين. مروان: في هنا تلت أصدقاء لينا مصابتهمش أي لعنة، ممكن تختار ما بينهم. تقدم كل من حسناء وأسماء وتبعهم زياد.

انتظروا قليلاً ثم صدر ضوء من الكتاب تجاه حسناء. وقال: أنتِ ستكونين حاملتي، لا تدعي أي مكروه يصيبني. حسناء بابتسامة: أوعدك هاخد حذري. قال: اتبعوا هذه الخريطة وستجدونني حيث علامة إكس، لا تتأخروا. اختفت صورة الكتاب وظهرت ورقة ملفوفة فوق الرقم عشرة المرسوم على الأرض. التقطها مروان وهو يرى ما بها ثم قال: قدامنا مغامرة جديدة لازم نستعد ليها. سيف: على فين يا صاحبي؟ أنزل مروان الخريطة وقال: جبل إيفرست.

"جبل إيفرست أعلى جبل على وجه الأرض، حيث يرتفع إلى حوالي 9 كم عن سطح البحر. وهو أحد الجبال التي تتكون منها سلاسل جبال الهيمالايا، على حدود الصين ونيبال وشمالي الهند. اكتشفه الأوروبيون لأول مرة في 1847 وبعد بضع سنوات من الملاحظات والحسابات، قدر ارتفاعه بـ 8848 متر وعرف كأعلى قمة في العالم." جمعوا المعدات وارتدوا الثياب الثقيلة وتجمعوا. سليم: هنروح إزاي؟ مروان وهو يمسك الخريطة: الكتاب هيودينا.

وما إن انتهى حتى تغير المكان من حولهم ليجدوا أنفسهم في منطقة جليدية. تنفسوا بصعوبة من الدهشة وبرودة الجو حتى انتظمت أنفاسهم. التفوا ليجدوا الجبل خلفهم. مروان: ده أقصى قدر ليه دلوقتي، لازم نتسلق. سيف: هنطلع كلنا؟ مروان: أيوة لازم. كل اتنين هيربطوا نفسهم ببعض علشان يساعدوا بعض على التسلق. أدهم: هو في أعلى الجبل؟ مروان وهو ينظر إلى الخريطة: لا، موجود في كهف في نص الجبل. آدم: كهف في جبل إيفرست؟

مروان: متستغربش، ممكن يكون هو اللي عامله مخصوص، كل شيء جائز مع الكتابين دول. قاموا بربط الحبال وبدأوا بالتسلق بحيث يكون الرجل في الأعلى والمرأة تتبعه. " مروان مع إسراء، رعد مع آسيا، سيف مع حسناء، سليم مع دعاء، آدم وأدهم معًا". كان الموضوع شاقاً عليهم لعدم مقدرة أي منهم على التسلق وبالرغم من ذلك فقد فعلوها، ساعدهم الكتاب بالفعل. وصلوا إلى منتصف الجبل حيث وجدوا الكهف المطلوب. دخلوا فيه ولم يتحرروا من الحبال.

تقدموا في ثنائيات والطريق ينحدر بهم إلى أسفل. مروان: خلوا بالكم الطريق بيميل وهيبقى أكثر انزلاقًا. ما أنهى كلمته حتى انزلقت إسراء فسقطت وسحبته معها وهما يكملان الطريق إلى أسفل انزلاقاً. سليم بضحك: خلي بالك أنت بس. وصلا إلى أرض منبسطة في نهاية هذا الطريق. نهض مروان وهو ينفض ملابسه وأمسك يد إسراء التي اعتذرت كثيراً على ما حدث. فوجئ مروان وهو ينظر حوله، كانا في غرفة واسعة مجمدة ويتدلى من سقفها أعمدة جليدية شفافة.

تقدم هو وإسراء ليكتشفا ما بها. كان ضوء الشمس يدخل من مكان مجهول ويعطي للجليد بريقاً خاصاً وألواناً جذابة. وصل الآخرون ونظروا بإعجاب إلى تلك الغرفة. مروان: الخريطة بتنتهي هنا والغرفة مغلقة، مفيش مكان تاني نروح. آدم: يبقى أكيد فيه مفتاح خفي. وقف مروان عند نهاية الطريق الذي دخلوا منه وبدأ يتقدم إلى الأمام وهو يعد خطواته. واحد.. اثنان.. ثلاثة... حتى أكمل عشر خطوات. توقف وهو ينظر أسفله، تراجع ونزل ليضع أذنه على الأرض.

رفع رأسه ثم طرق على الأرضية عشر طرقات. انتهى ونهض مرة أخرى ليهتز المكان وقد بدأت فتحة في الجدار تظهر أمامهم. تقدموا ليقفوا جميعاً أمامها، كان الكتاب هناك، لقد وجدوه حقاً. كاد مروان أن يمد يده ليأخذه فأمسكه سيف قائلاً: هو مش حذرنا محدش يلمسه. تذكر مروان هذا وانسحب بحزن. تقدمت حسناء وتنهدت بخوف ثم أمسكت بالكتاب واستدارت لتقف في المنتصف وهم حولها. فتحت الكتاب ببطء

لتقرأ ما يظهر على أوراقه: أهلاً مجدداً بالأصدقاء ولكن يجب أن أقولها. ابتسم مروان ليظهر صوت الكتاب: الشخص الذي يمسك بالكتاب الملعون لابد أن يقع في لعنة الأساطير. ضحك مروان وقال: مكنتش لعنة يا صاحبي. قال: الموافقة تعني الخلاص... والرفض يعني الهلاك. الجميع في صوت واحد: موافقون. اهتز المكان حولهم بقوة وأغمض مروان عينيه وعلى شفتيه ابتسامة واسعة ليذهب في نوم عميق هو وكل من معه. يتبع.