رواية المحلل الفصل العاشر 10 - بقلم ثقتي بربي تكفي

طيب انا هكلم علاء دلوقتي علشان نخلص من الموضوع ده. حنان: لأ استني شوية يا وائل بلاش تسرع. وائل: لأ انا هكلمه دلوقتي. وطلعت الموبايل واتصلت بعلاء وقولتله: انا عاوز اقابلك النهارده. علاء: انت رجعت من السفر؟ وائل: ايوه. علاء: طيب اجيب المأذون واجيلك بالليل؟ وائل: لأ، هنتقابل الاول نتكلم مع بعض. علاء: هنتكلم في ايه؟ ما الموضوع خلصان. وائل: لما نتقابل نتكلم احسن. ونزلت وروحت قعدت

مع علاء علي القهوة وسألني: انت هتطلق حنان امتي؟ قولتله: مش هطلقها. علاء: نعم!!! انت اكيد بتهزر. وائل: لأ مش بهزر انا بتكلم جد. علاء: وهو ده كان اتفاقنا؟ وائل: اذا كانت هي مش عاوزة ترجعلك يبقي هطلقها ليه؟ علاء: ومين قالك انها مش عاوزة ترجعلي؟ وائل: هي نفسها. علاء: انت خالفت اتفاقنا يا وائل ودخلت عليها؟ وائل: شئ ميخصكش يا علاء، هي مجرد طليقتك انما دلوقتي هي مراتي. علاء: تبقي خالفت اتفاقنا يا ابن .......

وقومنا مسكنا في بعض وضربنا بعض واتلم علينا الناس وسلكونا من بعض وهو بيتوعدني انه مش هيسيبني ولا هيسيبها!! رجعت البيت ورنيت الجرس كتير لكن حنان مش فتحت الباب. حاولت اتصل بيها كان تليفونها مقفول. روحت عند بيت ابوها وامها وسألت عليها كانت مش موجودة هناك. سألوني ايه اللي حصل؟ قولتلهم ان انا وحنان اتفقنا اننا مش هنطلق وهنكمل مع بعض. ابو حنان قال ان علاء مش هيسكت وأنه اكيد هيفكر يأذيها ويأذيني.

مامت حنان بكيت وقال انها خايفة يكون علاء عمل فيها حاجة او أذاها. ابو حنان اتصل علي اخواتها واحدة واحدة واخيرا عرفنا انها راحت عند وفاء اختها. نزلت انا وابوها وامها وروحنا عند وفاء. اول ما دخلنا هناك سألت حنان: انتي مشيتي ليه من البيت وقافلة الموبايل؟ حنان: قولي الاول انت كلمت علاء؟ وائل: ايوه. حنان: وعمل ايه؟ وائل: زعل واتخانق معايا بس ميهمكيش منه مش هيقدر يعمل حاجة اكتر من كده. هو عمل كده من الصدمة.

حنان: بيتهيألك، ما انا قفلت الموبايل ومشيت من الشقة علشان عارفة ان ده هيحصل. وائل: انتي خايفة ليه كده؟ هو انتي مش متجوزة راجل؟ حنان: يا وائل انت راجل وسيد الرجالة بس مش بلطجي وكمان انا عاوزة اعيش في هدوء و مش عاوزة مشاكل. وائل: وتفتكري ان ده الحل انك تسيبي الشقة وتيجي هنا؟ حنان: يعني ينفع يا وائل اننا نعيش في شقته بعد اللي حصل؟

وائل: لأ طبعا عندك حق. انا كنت ناسي انها شقته، طيب انتي هتقعدي عند مامتك و انا هشوف شقة في خلال يومين تلاته نعيش فيها. حنان: مش هينفع اروح عند ماما لأنه اكيد هيروح هناك. انما مش هيقدر ييجي هنا عند وفاء. وائل: طيب اللي تشوفيه يا حنان، وانا اول ما الاقي شقة هقولك علشان ننقل ونعيش فيها. حنان: والعيال يا وائل هنعمل فيهم ايه؟ انا مكنتش عاوزاك تتسرع كده وتكلمه الا لما تفكر كويس الاول.

ردت وفاء اختها: روح يا وائل دور علي شقة بس تكون جنبنا هنا علشان انا عندي فكرة هتعجبكم ما دام انتوا الاتنين متمسكين ببعض بالشكل ده. حنان: فكرة ايه يا وفاء؟ وفاء: هبقي اقولك عليها بعدين. نزلت من عند وفاء وروحت لسمسار شقق وفعلا تاني يوم كنت أستأجرت شقة علشان نعيش فيها. ولما روحت لحنان عند اختها وفاء علشان اعرفها اني اخدت شقة جديدة. حنان قالتلي ان علاء راح لأبوها وقاله علي اللي حصل.

وبعد ما اتكلم مع بابا اكتر من ساعتين قاله انه ممكن يسكت ومش هيتعرض لنا في حالة واحدة لو ان حنان قالتله بنفسها انها مش عاوزة ترجعله تاني. قولتلها: خلاص اتصلي بيه وقوليله دلوقتي خلينا نخلص. حنان قالتلي: لأ ده عاوزني اقوله كده في وشه. قولتلها: وانتي عندك مشكلة في كده؟ حنان: ايوه خايفة. وائل: متخافيش انا هبقي جنبك. حنان: ما انا هخاف عليك بردو. وائل: كلنا هنكون جنبك.

وفعلا اتقابلنا كلنا في شقة وفاء وكان ابوها وامها واخواتها كلهم موجودين. ولما وصل علاء وقفت حنان ورايا خايفة منه. علاء: حقيقي يا حنان انتي مش عاوزة ترجعيلي تاني؟ حنان: انت اللي طلقتني بدل المرة الواحدة ٣ مرات. علاء: وانا حسيت بغلطتي و جوزتك لده علشان عاوز اصلحها. حنان: بعد ايه؟ وبعد كل اللي عملناه ده لو رجعتلك تاني هتطلقني تاني، دي حاجة انا متأكدة منها.

علاء: لأ مش هيحصل دي كانت غلطة عمري وندمت عليها ومش ممكن اكررها تاني ابدا. حنان: الكلام ده مش حقيقي ومش هيحصل. موضوعنا انتهي. علاء: طيب خليها اخر فرصة. حنان: اديلك فرصة ازاي؟!! انت عارف اللي سقطتك من نظري اكتر انك كنت عارف اللي هيحصل مع وائل وقبلت!!! علاء: لأ انا كنت متفق معاه انه مش هيلمسك لكن هو اللي غدر و ..

حنان: متكملش علشان انت كداب، انت عارف ان مستحيل راجل طبيعي هيكون معاه ست جميلة وفي شقة لوحدهم و مراته ويقعد معاها بدون ما يلمسها!!! بس انت كنت بتتفق معاه علشان تجمل موقفك قدامنا وقدام نفسك مش اكتر. علاء: طيب لو مش علشاني يا حنان ارجعي علشان ولادنا. حنان: عيالي انا هعرف اربيهم كويس. علاء: طيب خلاص، بس الولاد هيفضلوا معايا مادام رضيتي براجل تاني. حنان: عيالي انا مش هسيبهم ابدا.

علاء: ولا انا عمري ما هسيبهم يتربوا مع جوز امهم. هنا

دخلت وفاء في الكلام وقالت: ولادكم هيعيشوا معايا انا، انتو عارفين انا وجوزي ربنا رزقنا بحاجات تانية حلوة كتير لكن مش رزقنا بالعيال. يا ريت تدونا الفرصة نساعدكم في تربيتهم ويعيشوا معانا وانا هبقي فاضية اذاكرلهم واهتم بيهم. ولما علاء يحب يشوفهم ييجي في اي وقت يشوف اولاده وكمان حنان شقتها الجديدة جنبي هنا في نفس الشارع لو عاوزة تشوفهم في اي وقت هيبقي سهل عليها سواء تجيلهم او يرحولها. علاء رفض في الاول لكن بعد كده وافق.

وفعلا كانت فكرة وفاء انها تربي ولاد حنان عندها وان شقتنا تكون قريبة منها علشان حنان تشوف عيالها في اي وقت و مش تحس انهم بعدوا عنها كانت فكرة جميلة جدا وافقنا عليها كلنا. وانتقلت انا وحنان لشقتنا الجديدة علشان نكمل شهر العسل.