رواية الملاك و القاسي الفصل الثامن 8 - بقلم جنات

سارة راحت لفرح عند بيتها ولما منزلتش طلعتلها وقابلت جمالات. "ازيك ياقمر؟ "انتي طالعة لفرح مش هنا ياحبيبت عيني." "اومال فين؟ جمالات حكتلها على اللي حصل امبارح وانها شافت زياد شايلها وكان مغمى عليها. "ياحبيبتي يافرح، أنا هروح لهم المستشفى ياخالتي." "روحي يابنتي وخليكي معاها."

سارة ركبت تاكسي وراحت على المستشفى وسألت في الاستقبال وعرفت أوضة فرح وراحت بسرعة فتحت الباب ودخلت واتصدمت لما شافتها وزياد قاعد جنبها وماسك إيدها. "فرح! "تعالى ياسارة." "مالها يازياد؟ زياد حكلها على كلام الدكتورة. "ياحبيبتي يافرح." "انتي روحتي الشركة ياسارة؟ "لا." "طب خليكي مع فرح وأنا لازم أروح الشركة عشان أسلم الفلاشة اللي عليها كل الشغل لفارس وهرجع تاني." سارة شافت تعب زياد واضح.

"طب خليك انت معاها وأنا هروح أسلمه وأخد إجازة لينا احنا تلاتة وأرجعلك تاني." "كتر خيرك ياسارة. اتفضلي الفلاشة أهي." سارة أخدته خرجت وراحت على الشركة وراحت لسهام. "مستر فارس جوا؟ "جوا، وكل شوية يسأل على فرح. هي فين؟ "طب أنا عايزة أدخل ليه معلش." سهام دخلت لفارس وبعد شويا خرجت وقالت لسارة تدخل. "صباح الخير يا مستر فارس." "إزيك يا آنسة سارة." "كويسة. أنا جيت أسلم حضرتك الفلاشة دي عليها كل شغل زياد." "وزياد فين؟

"فرح تعبانة جداً وفي المستشفى وهو معاها. أنا جيت أسلمها لحضرتك وآخد إذن بإجازة ليا وفرح وزياد ممكن؟ "فرح في المستشفى ليه؟ "تعبانة شوية." "في أنهو مستشفى؟ "في... "طب روحي. أنا موافق على الإجازة." "شكراً لحضرتك."

سارة خرجت وفارس كلم صاحبه دكتور في المستشفى اللي فيها فرح وطلب منه يعرف حالة فرح ويقوله. وقفل معاه وبعد شويا كلمه تاني وقاله على كلام الدكتورة كله وفارس شكره وقفل معاه واتعصب جداً واخد تليفونه ومفاتيحه وخرج من الشركة وراح على المستشفى ووصل عرف أوضتها وطلع خبط وزياد فتح الباب واتفاجأ بفارس. "إزيك يازياد." "إزي حضرتك يابشمهندس. معلش لحظة." زياد راح غطى شعر فرح ورجع تاني لفارس. "اتفضل."

فارس دخل واتصدم لما شاف وش فرح وحالتها بس حاول يبان عادي. "سلامتها ألف سلامة. لما سارة قالتلي قولت أجي أطمن عليها." "شكراً يا فندم." "إحنا بره الشركة يازياد. قولولي يا فارس بس." "شكراً يا فارس بجد على تعبك." فجأة الباب اتفتح ودخل سيد وسعاد. "جايين ليه؟ "جايين نطمن على السنيورة." "انتو ليكو عين تيجوا بعد اللي عملتوه فيها." "بنتي وغلطت وبربيها." "وإيه الغلط اللي عملته عشان تعمل فيها كل ده؟ "مش عايزة تتجوز المعلم جعفر."

"وبردو نفس الحوار تاني." "تاني وتالت وعاشر. بكرة كتب كتابهم. الراجل هيحبس أبوك لو ما اتجوزتش الهانم." "يلا، شالها خلينا نروح." فارس اتعصب جداً من طريقتهم وعينه جت على فرح اللي بدأت تفوق. "ز... زياد." "حمدلله على سلامتك يافرحتي. انتي كويسة؟ "ماهي زي القرده أهي. يلا عشان نرجع البيت." "مش هترجع غير لما تتحسن." "مشيني يازياد من هنا." "انتي لسه تعبانة يافرح." "عشان خاطري."

فرح كل ده مش شايفة فارس واللي حاول يبعد عن نظرها عشان متشوفوش. زياد شال فرح وخرجوا من المستشفى وفارس راح على شقته محدش يعرف عنها حاجة غير عامر لما بيكون مضايق أو مخنوق بيروحها وكلم عامر يجيله. في بيت فرح وصلوا وزياد نيمها على سريرها. "انتي كويسة ياحبيبتي؟ فرح هزت رأسها. "جهزي نفسك بكرة كتب كتابك ياعروسة." "مفيش حاجة من دي هتحصل." "هتكسري كلام أبوك يازياد؟ "الراجل ده هيحبسك ليه؟

"أبوك ماضي على وصولات أمانة بالفلوس اللي أخدها منه." "هو أنا كنت قصرت معاكو في حاجة عشان تروح تاخد فلوس منه؟ "أهو اللي حصل واختك لازم تتجوزه. مانا مش هتحبس." "وأنا قولت مش هيحصل." "ماشي يازياد. لما نشوف كلام مين اللي هيمشي." سيد خرج من الأوضة وسعاد وراه وزياد قعد جنب فرح اللي بتعيط في صمت. "ماتخفيش يافرحتي. أنا معاكي ياقلب أخوكي ومش هسيبك أبداً." "ربنا يخليك ليا يازياد. أنا ماليش غيرك."

"يلا نامي شوية ومتفكريش في أي حاجة." "حاضر." في شقة فارس قاعد وكل تفكيره في فرح وفي أهلها. الباب خبط وفارس قام يفتح كان عامر. "مالك يابني جايبني هنا ليه؟ "هكون جايبك ليه يعني." "تحب فيا مثلاً؟ "عااااامر. أنا مش ناقصك." "مالك يابني؟ فارس حكاله على فرح وعلى أهلها وإنهم عايزين يجوزوها. "وانت متعصب ليه؟ هو الموضوع يفرق معاك؟ "هتتجوز إزاي وهي متجوزة؟ "يعني معترف إنها مراتك؟ "آه مراتى طبعاً يا عامر."

"خلاص يبقى تجيب مراتك تعيش معاك ومتسبهاش في وسط أهلها يبهدلوها." "لا." عامر قام وقف. "انت حر يافارس. أنا ماشي." عامر مشي وفارس فضل يفكر شويا ونزل عشان يرجع القصر. تاني يوم سارة وملك اتفقوا هيروحوا لفرح عشان يطمنوا عليها. وصلوا عند البيت وسعاد فتحتلهم وبصت لملك أوي. "إزيك يا سوسو." "إزيك يا أختي. مش هتعرفيني؟ "ملك صاحبة فرح وجايين نطمن عليها." "متلقحة جوا أهي. ادخلوا." سعاد دخلت المطبخ وملك بصت لسارة. "دي أمها؟

"لا مرات أبوها. تعالي ندخل." البنات دخلوا لفرح اللي فرحت لما شافتهم. "فروحة، انتي كويسة؟ "كويسة ياحبيبتي. شكراً إنك جيتي." "ومفيش شكرا ليا ولا إيه؟ "انتي حبيبتي ياسارة." "لما سارة قالتلي إن أبوكي اللي عمل فيكي كدا مصدقتش، بس لما شوفت مرات أبوكي صدقت بصراحة." "الحمد لله." زياد دخل الأوضة وماكنش يعرف إن البنات موجودين. "أنا آسف معرفش إنكم هنا. إزيك ياسارة." "كويسة يزيزو." "إزيك يا آنسة ملك. البيت منور."

"بخير يازياد. البيت منور بيكم." "عاملة إيه يافرحتي دلوقتي؟ "أنا بخير طول مانتو جنبي." "طب هسيبكم تقعدوا سوا." "لا. إحنا لازم نمشي عشان منتأخرش على الشركة." "آه. يلا." البنات وزياد نزلوا وراحوا على الشركة سوا. وسعاد دخلت لفرح. "السنيورة، عاملة إيه؟ "الحمد لله." "جهزي نفسك. كتب كتابك بليل. البسي حاجة عدلة وداري وشك ده بميكب."

فرح فضلت تعيط ومش عارفة تعمل إيه. فكرت تكلم فارس تعرفه وكانت خايفة منه بس ماعندهاش غير الحل ده. فرح رنت عليه وفارس مردش عليها. فرح فضلت تعيط. عند فارس كان نايم وصحى على صوت الفون بيرن كان عامر. "عايز إيه؟ "انت ناسي الاجتماع يافارس." "راح عن بالي خالص. بس احضره انت وعمي." "وانت مش هتيجي؟ "شويه كده هاجي. بس خلصوا انتوا الاجتماع." "تمام."

فارس قفل وماسك تليفونه لاقى مكالمة من فرح واستغرب لأنها أول مرة ترن عليه. فارس اتصل عليها وفرح ردت وكانت بتعيط. "فرح." "نعم." "كنت نايم لما رنيتي عليا. في حاجة؟ انتي عاملة إيه دلوقتي؟ "أنا آسفة إني رنيت عليك، بس مش عارفة أعمل إيه." "في إيه يافرح؟ انتي بتعيطي ليه؟ "بابا عايز يجوزني لراجل كبير وكتب الكتاب بليل. مش عارفة أتصرف." "مش مشكلتي. اتصرفي." وقفل في وشها. فرح فضلت تعيط وكانت خايفة مش عارفة تعمل إيه.

بليل فرح قاعدة في الأوضة خايفة وجسمها كله بيوجع. زياد دخل عليها. "فرحتي، عاملة إيه؟ "تعبانة أوي." "انتي ماخدتيش المسكن؟ "لا. أخدته." "طيب ياحبيبتي." فرح مرضيتش تقوله إن سعاد أخدت منها كل العلاج من الصبح وعشان ترجعه للصيدلية وتاخد فلوس. "فرح، مالك؟ انتي مخبية عني حاجة؟ فرح لسه هترد سمع جرس الباب. "ده المعلم جعفر مش كده؟ "اهدى ياحبيبتي. أنا معاكي." زياد خرج يشوف مين اللي جاي واتفاجأ بفارس ومعاه رجلين ورعد دراعه اليمين.

"خير يافارس. في إيه؟ "مش ده الراجل اللي كان معاكوا في المستشفى امبارح؟ زياد بص لأبوه. "آه." "هو راجل من اللي مع فارس؟ "أنا محمد. محامي فارس باشا." "أيوا. يعني جايين ليه؟ "أنا المقدم ياسر. وجاي مع فارس باشا عشان ياخد مراته." "مراته إيه اللي هيجيبها عندنا؟ "فرح السيد. زوجة فارس الألفي." "يالهوووووي. مراته؟ "انت بتقول إيه؟ إزاي يعني؟ "اتفضل القسيمة أهي عشان تتأكد."

زياد شاف القسيمة وشاف التاريخ كان نفس يوم اللي فرح اختفت فيه. "ممكن تنادي عليها وتسالها بنفسك." "ادخل هات اختك. لو الكلام ده بجد هموتها بإيدي." زياد دخل لفرح كانت قاعدة على السرير وباين على وشها التعب. "فرح. البسي إسدال وتعالي معايا." "ليه؟ هو المعلم جعفر جه؟ "تعالي ياحبيبتي. متخافيش." زياد سند فرح لأنها تعبانة. لبست إسدال وخرجت مع زياد اتفاجأت بفارس ومعاه رجلين. سيد لسه هيقرب من فرح خافت منه واستخبت في زياد.

"انطقي يابت. انتي جوزك؟ الكلام ده بجد؟ فرح بصت لفارس ومتكلمتش. "ماتنطقي يابنت 🐶. انتي هتفضلي ساكتة كده؟ فرح جسمها كله بيترعش وبتعيط. "حبيبتي، اتكلمي. متخافيش. أنا معاكي ومحدش هيقدر يقربلك وأنا موجود." "هو جوزك بجد؟ "أنا آسفة والله." "آسفة يعني إيه؟ يعني اتجوزتي في السر يامقصوفة الرقبة." سيد لسه هيهاجم على فرح. فارس مسك إيده. "مش مرات فارس الألفي اللي حد يمد إيده عليها. حتى لو أبوها."

"ياريت تحط لسانك جوه بقك وتقف ساكت. يا إما هتشرف معانا في الحبس." سيد خاف ومتكلمش. فارس قرب من فرح ومسك إيدها. "يلا عشان نمشي يافرح." فرح بصت على زياد. "زياد." "روحي مع جوزك يافرح." "طب اسمعني." "امشي يافرح." فرح مشت مع فارس وكانت تعبانة جداً. رعد فتحلها باب العربية وركبت وفارس جنبها ورعد ساق العربية ومشوا.