حرام عليك سيبني في حالي.
بصلها كمال وقرب منها اووي وقال:
أهدي متخفيش انا هديكي الفلوس اللي عايزاها.
خافت شهد جدا وجريت من قدامه وقالت:
مش عايزه فلوس ولا عايزه اي حاجه بس سيبني امشي ابوس ايدك انا والله بنت ناس وجايه هنا غصب عني.
كمال بخبث:
هيبقي برضاكي دلوقتي بس اهدي انتي.
قفل باب المطبخ عليهم وكانت شهد مرعوبه من نظراته.
وبعد شويه كانت شهد قاعده في شقتها وبتعيط ومنهاره، ودخلت حماتها ولما شافتها قالتلها بخوف:
يالهوي ايه اللي عمل فيكي كده يا بت انتي؟
ردت عليها شهد وهي بتبكي وقالت:
الراجل اللي كنت بشتغل عنده بعد ما مشي هو ومراته علي الشغل رجع تاني وقفل عليا باب المطبخ وزي مانتي شايفه بهدلني بس قدرت اهرب بجلدي منه قبل ما يعملي حاجه، انا قولتلك يا حماتي متخلنيش اروح هناك انتي مصدقتنيش.
ام محمد:
يعني مقربش منك الحمد لله انها جات علي قد كده.
شهد:
شوفتي اللي حصلي يا حماتي من خدمتي في البيوت حرام عليكي انا عمري ما اتهنت كده، الا عندك هنا من يوم صبحيتي وانا بشتغل في البيوت وشوقت اوحش ايام في حياتي.
ام محمد:
روحي يا بت غيري هدومك قبل ما جوزك ما يطلع وطلما محصلش ليكي حاجه عامله تندبي ليه مانتي طلعتي بميت راجل اي نعم هدومك اتقطعت بس انتي صاخ سليم.
شهد ببكاء:
بس انا مش هشتغل عند حد تاني، والا كل واحد يروح لحاله.
اتنهدت ام محمد وقالت:
يوووه مخلاص بقي يا بت انتي عملاها مناحه ليه كده محدش هيخليكي تروحي تاني، ادخلي بس غيري هدومك دي.
دخلت شهد اوضتها عشان تغير هدومها، وبصتلها ام محمد بعصبيه وقالت بينها وبين نفسها:
قال مش عايزه تشتغل تاني قال، اومال اكلك منين يا عين امك.
بعد كام يوم كلمت الست سيده ام محمد في التليفون وقالتلها:
السلام عليكم يا ام محمد، عامله ايه؟
ام محمد بضيق:
وعليكم السلام ورحمة الله وبركاته يا حبيبتي خير.
الست سيده:
مالك بس يا ام محمد انتي لسه زعلانه مني ولا ايه؟
ام محمد:
ايوه لسه زعلانه ومن حقي ازعل كمان هو اللي حصل في مرات ابني شويه، ده كويس وجوزها معرفش باللي حصل كان قلب الدنيا.
الست سيده وردت عليها وقالت:
انتي هتقوليلي، لا واحنا الصراحه بنخاف علي زعل حبيب امه الاستاذ سعيد.
ام محمد بضيق:
خلاصة الكلام انتي متصله ليه دلوقتي هتديني حساب البنت.
الست سيده بسخريه:
حساب ايه يا ام محمد هي البنت اشتغلت حاجه ده هو يوم وتاني يوم حصل اللي حصل.
ام محمد بخبث:
طيب حتي اديني حساب اللي حصل ولا ده ببلاش كمان.
الست سيده:
بصي يا ام محمد عشان منجرحش يا ختي في بعض كتير انا جيبالك شغل تاني لـ البنت وبمرتب قد بتاع الشغلانه الاولانيه مرتين.
فرحت ام محمد وردت عليها:
طيب يا ختي ايدي علي كتفك احسن العيشه بقيت صعبه خالص اليومين دول.
الست سيده بهدوء:
عارفه يا حبيبتي وعشان كده لما لقيت الشغلانه دي في وشي قولت والله مهتبقي لحد غير للبنت شهد مرات ابنك بس يعني.
ام محمد بقلق:
بس ايه هتقعديها تاني ليه بس؟
ردت عليها سيده بسرعه وقالت:
لا يا حبيبتي لا بعقدها ولا حاجه الموضوع بس ان الشقه اللي هتنضفها دي هتروحها يومين في الاسبوع بس.
ام محمد:
طيب كويس اووي فين المشكله برضو مفهمتش؟
ردت عليها الست سيده وقالت:
يعني هي شقة راجل اعزب مطلق وعايش لوحده.
ام محمد بحده:
يالهوي يا ست سيده تاني ياختي، ده الاول كان راجل ومراته وحصلها كده اومال لما تروح لراجل عزابي هيحصل ايه؟
الست سيده بهدوء:
ولا هتحصل اي حاجه، ده دكتور محترم وكل اللي اشتغله عنده بيشكرو فيه وفي اخلاقه.
ام محمد بسخريه:
اومال يا ختي ما هو كده مش لاقياله شغاله لي ان شاء الله.
ردت عليها الست سيده وقالت:
لا انتي فاهمه غلط دي كانت شغاله عنده اشطر بنت عندي في المكتب بس خلاص هتتجوز وجوزها مش هيخليها تشتغل وهو طالب مني وحده تكون محترمه وامينه وبنت ناس وانا ملقتش احسن من شهد للشغل ده.
ام محمد بهدوء:
طيب وهي هتبدأ شغل من امتي عشان اقولها تظبط حالها.
الست سيده بهدوء:
من بكره لو حبت، المهم يكون لبسها حلو ونضيفه دي شقه في عماره راقيه ومكان نضيف اووي اووي.
ام محمد بسخريه:
لا من الناحيه دي متقلقيش انا مرات ابني دي بالذات موراهش غير اللبس وتحط الاحمر والاخضر.
الست سيده:
طيب خلاص هستناكم بكره.
قفلت ام محمد مع الست سيده ونزلت راحت لشهد اللي كانت قاعده بتتفرج علي التلفزيون مع سعيد جوزها، فتحت ام محمد الباب ودخلت وزعقت فيهم:
والله عال وانا اقول الكهربا جات الشهر ده قد كده ليه، اتاريك انت ومراتك يا سي سعيد مش هاممكم المصيبه اللي احنا فيها دي.
قام سعيد بسرعه وقفل التلفزيون ورد علي مامته بخوف وقال:
لا والله يا ماما ده احنا لسه مشغلينه صح يا شهد.
اتنهدت شهد بضيق وردت عليه:
ايوه.
ام محمد بحده:
بلا لسه مشغلينه بلا زفت، من الاخر كده انا مش معايا فلوس ليكم الشهر ده لا كهربا ولا اي حاجه.
وقفت شهد وسألتها:
ازاي بس يا حماتي ده سعيد لسه اللي مديكي المرتب كله من يومين لحقتي صرفتيه.
زعقت فيها ام محمد وقالت:
جرا ايه يا بت انتي هو انتي هتحاسبيني علي فلوس ابني، وبعدين انا دفعتهم في الجمعيه اللي هنحوش فيها عشان نتدفع للزفت اخويا تمن البيت قبل ما يبيع.
شهد بقلق:
طيب والعمل يا حماتي هنصرف منين باقي الشهر.
ردت عليها ام محمد وقالت:
في حل واحد انك تنزلي تشتغلي تاني.
اتعصبت شهد وقالت:
مستحيل انزل اشتغل تاني بعد اللي حصلي يا حماتي.
سعيد:
هو ايه اللي حصلك.
قربت منها حماتها وقالت بصوت واطي:
قوليلو كده اللي حصل وانا وحياة امك اخليه يطلقك وقتي ويرميكي في الشارع ده غير الجرسه اللي هعملهالك.
خافت شهدو وقالتلها:
انتي ليه بتعملي فيا كده؟
زعق سعيد وقال:
جرا ايه ما حد يفهمني ايه اللي بيحصل.
ردت عليه ام محمد بحده وقالتله:
متكتم يا واد انت وادخل اقعد في اوضتك هتكلم مع مراتك شويه في حاجات ستات.
رد عليها وهو مدايق وقال:
حاضر يا ماما اللي تشوفيه.
دخل سعيد اوضته وقربت ام محمد من شهد وخلتها تقعد جنبها علي الكنبه وقالت بهدوء:
انا المره دي هضمنلك الشغل انه كويس، يا بنتي لو ضاع مننا مش هنلاقي ناكل وانا معتمده عليكي بعد ربنا عشان تصرفي علي الاكل والشرب والا مش هنلاقي.
مسحت شهد دموعها وردت علي حماتها وقالت:
حاضر يا حماتي اللي تشوفيه انا هعمله.
تاني يوم لبست شهد بنطلون طويل وواسع وعليه بلوزه واسعه برضو وحطت حجابها وكانت طالعه حلوه اووي، واخدت عبايه بيتي شكلها حلو وراحت للست سيده اللي اخدتها وراحو الشقه اللي هتشتغل فيها شهد، واول ما خبطو علي الباب فتحلهم شاب تقريبا عمره 35 سنه وكان شكله حلو اووي شبه الممثلين والناس اللي بتظهر علي التلفزيون، واول ما شافهم ابتسم وقال:
اهلا وسهلا يا مدام سيده اتفضلو.
دخلت سيده ومعاها شهد اللي كانت ماسكه شنطتها وخايفه، وردت سيده علي الدكتور وقالت:
ربنا يزيد فضلك يا دكتور ادهم، دي بقي شهد اللي كلمت حضرتك عليها.
ادهم:
تمام يا مدام سيده دقيقه هجيبلك الحساب بتاعك من جوه.
دخل ادهم اوضته، وفضلت شهد تبص علي الشقه باعجاب، اول مره في حياتها تدخل بيت حلو زي كده، وبعد شويه جه ادهم وادي سيده الفلوس وهي اخدتهم ومشيت.
ادهم:
انتي واقفه كده ليه يا شهد.
ردت عليه شهد وهي خايفه وقالتله:
نعم حضرتك عايز حاجه.
ادهم:
انتي اول مره تشتغلي يا شهد؟
شهد:
لا اشتغلت قبل كده بس يوم واحد.
ضحك ادهم وقال:
لا واضح ان عندك خبره في الشغل ومش هتتعبيني، ع العموم انتي عندك الشقه اهو انا نازل وهرجع الساعه اربعه تكوني خلصتي.
شهد:
اروق البيت بس صح؟
ادهم بهدوء:
يعني لو هتقل عليكي تروقي البيت وفي فلوس قدام التلفزيون هتنزلي تجيبي الحاجات بتاعت الاكل وتعمليلي غدا لو فيها تعب يعني.
شهد:
طيب حضرتك عايز تتغدا ايه؟
ادهم:
اي حاجه بس ارجوكي ابعدي عن السمك عندي حساسيه منه، يلا همشي انا بقي ولو احتاجتي تعرفي حاجه مش عارفاها هنا رقمي اديتهولك مدام سيده صح؟
شهد:
ايوه لو احتاجت حاجه هكلمك.
بصلها وابتسم وقال:
شاطره يا شهد.
مشي ادهم علي شغله، وفضلت شهد تروق البيت واخدت الفلوس ونزلت جابتله حاجات للبيت وجهزت الغدا، ورجع ادهم من شغله ولقي البيت متنضف كويس وشهد في المطبخ ومشغله اغاني، فقرب من المطبخ وخبط علي الباب من بره قبل حتي ما يبص فقالتله شهد بسرعه وهي بتقفل الاغاني:
انا اسفه والله يا دكتور ادهم بس كنت زهقانه وقولت اشغل اغاني.
رد عليها ادهم بهدوء وقال:
يا بنتي عادي وفيها ايه، مانا بسمع اغاني برضو وعادي.
سكتت شهد ومردتش عليه وهو راح بص علي الاكل وبعدين بصلها وقال:
منظر الاكل فتح نفسي، بسرعه بقي جهزيلي الغدا.
شهد:
حاضر من عينيا.
ادهم وهو بيطلع موبيله:
تسلم عينيكي يا شهد.
بصتله شهد بسرعه وقالت لنفسها هو لسه في ناس محترمه وطيبه زي ادهم كده، وبعدين سمعته وهو بيتكلم في التليفون وبيقول:
يعني ايه يا سمر ازاي هتسيبي الشغل دلوقتي طيب مين هيمسك شغل العياده عندي ويظبط الكشوفات، هو انا لسه هدور علي حد اقفلي يا سمر انا هتصرف.
جهزت شهد الغدا وجه ادهم وبدأ ياكل وبعدين بصلها وقال بهدوء:
تسلم ايدك يا شهد الاكل حلو اوي.
شهد:
شكرا، ممكن سؤال يا دكتور ادهم.
ادهم:
طبعا اتفضلي اسألي ياشهد.
شهد:
انا سمعت حضرتك وانت بتتكلم في الفون من شويه، واسفه اني سمعت من غير مقصد.
ادهم:
اتكلمي علي طول يا شهد في ايه؟
شهد:
انا بصراحه كنت بدور علي شغل احسن من هنا، انا معايا دبلوم تجاره وممكن امسك لحضرتك الشغل في العياده ده لو معندكش مانع بس اسيب الشغل في البيوت انا مش حابه الشغل ده.
ادهم:
طيب ليه اشتغلتيه مدام مش بتحبيه اووي كده؟
شهد بدموع:
حماتي هي اللي خلتني اشتغل فيه.
ادهم:
نعم انتي متجوزه، يا بنتي انتي صغيره اووي علي الجواز والشغل هنا والشغل عندي كمان.
مسحت شهد دموعها وردت عليه:
نصيبي كده بقي يا دكتور.
ادهم:
بصي انا مستعد اشغلك معايا بس بشرط.
شهد بحماس:
خير؟
ادهم:
تقعدي تتغدي معايا وتحكيلي كل حاجه عن حياتك ممكن.
شهد:
انا هحكي لحضرتك كل حاجه بس مش هقدر اكل.
ادهم بخبث:
يبقي خلاص مفيش شغل.
قعدت شهد بسرعه وقالتله:
انا اصلا جعانه جداً.
ضحك ادهم وقالها:
هههههه سامعك يا شهد اتكلمي.
حكتله شهد كل حاجه حصلت معاها من يوم ما خلصت المدرسه لحد ما اتجوزت سعيد من شهر واللي عملته فيها حماتها وكمان اللي حصلها في الشغل الاولاني.
ادهم:
عايزه رأيي؟
شهد بحزن:
ياريت.
ادهم:
اطلقي منه.
شهد:
واروح فين بس، اهلي مش هيقدرو يشيلو همي هقعد في الشارع.
ادهم:
بلاش تخلي خوفك يبوظلك باقي حياتك كفايه اللي خسرتيه، انا مطلق علي فكره وعندي بنت عايشه مع مامتها في امريكا، انا طلقتها لما بس لقيت نفسي هعيش باقي حياتي في نكد اشتريت راحتي.
شهد:
انا مش زيك.
ادهم:
لا زيي انتي هتشتغلي عندي وانا هديكي دفعه مقدمه واشتري شقه صغيره علي قدك ايجار حتي وعيشي حياتك لوحدك بعيد عن اهلك وبعيد عن العيل ابن امه اللي اسمه جوزك ده وحماتك الحربايه.
مشيت شهد وكلام ادهم مش طالع من بالها مع انها مش واثقه فيه لسه، بس قررت انها تعمل زيه تريح نفسها ومتهينش كرامتها تاني عشان اي حاجه.
دخلت شهد البيت واول ما شافت سعيد راحت وقالتله بعصبيه:
طلقني.
سعيد:
هي القطه طلعلها ضوافر وبقيت بتخربش.
شهد بحده:
القطه دي تبقي انت يا دلوع ماما، بقولك طلقني مش انت مكنتش عايز تتجوزني ريح نفسك بقي وطلقني.
سعيد:
امي تقولي اطلقك هطلقك وياريت تقول كده عشان اخلص.
شهد:
بس كده من عينيا.
راحت شهد كلمت حماتها وقالتلها تطلعلهم، وطلعت حماتها وقالت:
خير يا بت انتي جيباني علي ملي وشي كده ليه؟
شهد:
انا مش هنزل شغل تاني ويا اقعد في بيتي متستته اكل واشرب واخد مصروف لبيتي ومحدش يبقي ليه كلمه عليا غير جوزي يا اطلق.
ام محمد بحده:
والله وطلعلك صوت يا رباية الجوع انتي، ارمي عليها اليمين يا واد يا سعيد البنات علي قفا من يشيل مش واقفين عليها يعني.
تفتكرو هيحصل ايه؟