رواية الزوجة الثالثة الفصل الأول 1 - بقلم هويدا زغلول

في بداية الحكاية، وافقة بنت في منتهى الجمال في البلكونة بتنشر. بيدخل راجل كبير في السن، جوز أمها، برعي. برعي: بت يا أسماء تعالي أقولك. أسماء: نعم يا عمي، خير؟ برعي: خير، بس ده الخير والسعد كله. الأم: مالك يا راجل؟ برعي: المعلم إبراهيم عايز يتجوز بنتك. أسماء: نعم، ومين قال إن عايزة أتجوّز؟ برعي: أمال عايزة إيه؟ أسماء: معلم يعني راجل كبير. الأم: استني بس، هو قالك عايز يتجوز أسماء؟

برعي: لا، لما بعتي ليا الأكل امبارح، أنا كنت قاصد، لأن عرفت إنه عايز يتجوز، علشان كده قولتك. الأم: المهم، هيدفع كام؟ أسماء: أمي، انتي بتقولي إيه؟ معقول موافقة؟ الأم: انتي عارفة هو بيدي عمك كام. أسماء: وأنا مالي، أنا مش عايزة أتجوّز. برعي: يبقى تمشي من هنا، آه، أنا مش حمل مصاريف. أسماء: أمشي منين؟ دي شقة أبويا. الأم: أبوكي مين يا حبيبتي، انتي ناسيه إن الشقة باسمي؟ أسماء: أرجوكي، أوعي تعملي فيا كده.

الأم: يابنتي، ده راجل غني أوي، وأكيد هيخليكي مبسوطة. أسماء: قلت لا، لا، ودخلت الأوضة. برعي: اسمعي يا ولية، لو بنتك مش اتجوزت المعلم إبراهيم، انتي كمان هتكوني طالق. الأم: ينهار أسود! لا، كلامك يمشي، أنا أقدر أقول حاجة؟ وتاني يوم، كانت عزيزة، صديقة أسماء، عندها. عزيزة: اهدي بس يا حبيبتي. أسماء: أنا خايفة أوي يا عزيزة. عزيزة: اسمعي الكلام واخلصي بقي من البيت ده. أسماء: بيقولوا معلم، أكيد أكبر مني بكتير.

عزيزة: يعني عجبك اللي انتي فيه ده؟ أسماء: يعني مكتوب عليا أخرج من عذاب لعذاب. عزيزة: اهدي بس، وكل حاجة هتحلى. الأم: اتفضل يا معلم إبراهيم. أسماء: ينهار أسود! ده جه. عزيزة: اهدي بس. وخرجت ودخلت. أسماء: إيه؟ في إيه؟ مالك؟ عزيزة: شكله بعت ابنه. أسماء: مش فاهمة. عزيزة: مهو لو ده المعلم إبراهيم، يبقى يبختك. أسماء: قصدك إيه؟ عزيزة: ده شاب صغير، مش كبير. أسماء: أمال إيه معلم دي؟ عزيزة: يمكن علشان عنده محلات وكده.

الأم: قومي يابنتي، ربنا يهديكي، انتي عايزاني أطلق؟ أسماء: هو ده إبراهيم؟ الأم: آه، هو. شوفتي بقي ربنا بيحبك إزاي. والغريبة إنها خرجت، وفعلاً أعجبت بيه، أو يمكن كانت عايزة تهرب. وحمدت ربها إن شكله مش كبير. كانت فرحانة فترة الخطوبة، اللي مش طولت شهرين بس، وكانت حاسة إن هي أسعد واحدة في العالم، علشان هترتاح من جوز أمها. ويوم الفرح. إبراهيم: ادخلي برجلك اليمين. أسماء: بسم الله ما شاء الله، الشقة حلوة أوي.

إبراهيم: تتهني بيها يا رب. منيرة: قصدك نتهنى كلنا بيها. إبراهيم: انتي لسه صاحية؟ منيرة: مش بحضر العشا للعرايس. أسماء: مين دي؟ إبراهيم: منيرة. منيرة: مراته يا عنيا. هو مقلش ليكي؟ أسماء: مراتك؟ يعني إيه مراتك؟ إبراهيم: هو برعي مقلش ليكي؟