عندما رفعت أسيل رأسها لتنظر إلى الطريق أمامها، كانت المفاجأة عندما رأت جاسر أمام السيارة. حاولت تتفادى الاصطدام بجاسر لكن دون جدوى. كانت أسيل متجمدة مكانها، لم تتحرك كأن الزهول والصدمة أصابتها بشلل تام.
ما كسر الجمود الذي أصاب أسيل هو صوت صراخ بعض الناس وهم يركضون اتجاه جاسر. ركضت أسيل إليه، وجدته قد أغمي عليه والدماء تسيل من رأسه. هنا قال سعيد، الذي كان أول من وصل إلى جاسر:
سعيد
حد يطلب الإسعاف بسرعة.
أسيل
(بصراخ)
أنا هاخده في عربيتي للمستشفى أسرع.
(وهنا نظر سعيد إلى أسيل وقال)
سعيد
حرام عليكي ليه عملتي كدا؟ تموتي الراجل عشان خدش عربيتك.
أسيل
(بتوتر)
انت تقصد إيه؟ أنا ماكنتش أقصد.
(هنا قال واحد من الناس)
واحد من الناس
مش وقته الكلام ده، الراجل دمه هيتصفى.
أسيل
هاتوه بسرعة على العربية.
☆☆☆☆☆☆☆☆☆☆☆☆☆☆☆
في المستشفى
أسيل تصرخ في الجميع وتقول أن معها مصاب في حادث.
بعد مرور بعض ساعات وجاسر في غرفة العمليات، خرج الدكتور. ركضت أسيل إلى الدكتور قالت:
أسيل
(بخوف)
هو هيعيش يا دكتور؟
الدكتور
آه ماتخافيش، هو مافيش خطورة على حياته.
(وضعت يديها على قلبها وقالت)
أسيل
الحمد لله.
الدكتور
بس المشكلة في الإصابات اللي في رجله.
أسيل
مش مهم. المهم إنه هيعيش.
(وهنا وصل حاتم ومعه بعض أصدقاء جاسر)
حاتم
هو فين جاسر؟
أسيل
لسه ما طلعش من العمليات.
حاتم
وإيه اللي حصل؟
أسيل
(بتوتر)
أنا كنت طالعة بالعربية ما شفتهوش.
حاتم
يعني اللي سمعته في النادي صح؟ انتي ضربتي جاسر بالعربية عشان تنتقمي منه؟
أسيل
انت بتخرف بتقول إيه؟ انت اتجننت؟ قولتلك أنا ما شفتهوش.
حاتم
وأنا مش مصدقك.
أسيل
براحتك عندك ما صدقتني، انت مش فارقة معايا أصلًا.
(هنا جاء البوليس)
الظابط
انتي اللي خبطتي كابتن جاسر بالعربية؟
أسيل
أيوه أنا بس...
قبل أن تكمل عبارتها
الظابط
اتفضلي معانا.
أسيل
على فين؟
الظابط
على قسم الشرطة.
أسيل
ليه إن شاء الله؟ دي حادثة. يعني قضاء وقدر.
الظابط
اتفضلي يا آنسة، احنا هنكمل تحقيق في القسم.
(ثم نظر إلى أحد الظباط أقل رتبة منه وقال)
الظابط
ابقى هاتلي التقرير الطبي للمصاب.
الظابط ٢
حاضر يا فندم.
(وهنا جاء أيضًا أصدقاء أسيل)
هاجر
إيه اللي حصل يا أسيل؟
أسيل
مش عارفة، أنا فجأة لقيته قدامي معرفش طلع لي منين.
إيه
الناس بتقول في النادي إنك قصدتي.
نوران
إيه انتي بتقولي إيه؟ هو وقته الكلام ده.
أسيل
المهم أنا رايحة على قسم دلوقتي، اتصلوا على جدي لأني مش معايا تليفونه.
هاجر
حاضر.
الظابط
خلاص كدا، يلا يا آنسة.
☆☆☆☆☆☆☆☆☆☆☆☆☆☆☆
في اليوم التالي
قسم الشرطة
في غرفة الاستجواب
الظابط
أسيل انتي لسه مصممة على أقوالك؟
أسيل
(بتعب)
قولتلك أنا ما شفتهوش، أنا فجأة لقيته ظهر قدامي.
المحامي
أظن أقوال موكلتي واضحة، الموضوع مجرد حادثة غير مدبرة أو مقصودة.
الظابط
هنشوف… آنسة أسيل حصل إنك اتخانقتي مع كابتن جاسر قبل الحادثة بيوم.
أسيل
أيوه حصل.
الظابط
وحصل كمان إنك قمتي بتهديده أمام الجميع، وقولتي إنك هتخليه يدفع التمن.
المحامي
الكلام ده غير مقصود وكان ساعة غضب.
الظابط
لو سمحت يا أستاذ ممكن تخليها هي اللي ترد.
أسيل
قولت بس مش بالظبط كده.
(قطع الظابط كلام أسيل)
الظابط
طيب إيه رأيك في الناس اللي شافوكي وانتي بتهددي كابتن جاسر وقولتي إنك هتخليه يدفع التمن؟ خدش عربيتك غالي.
أسيل
أنا كنت متعصبة وبقول أي كلام.
المحامي
آنسة أسيل كانت متعصبة، حضرتك عارف إن أي إنسان وهو متعصب ممكن يقول أي كلام وقت الغضب. وموضوع كله مجرد صدفة إن يحصل شجار بين موكلتي والمصاب وبعدها يحصل الحادث. وأكبر دليل على كلامي إن الآنسة أسيل هي اللي جابت الكابتن جاسر بنفسها على المستشفى، ده بيثبت حسن نوايا موكلتي.
الظابط
حتى لو افترضنا جدلًا إن الموضوع كله مجرد صدفة، بس دي مش أول حادثة تعملها الآنسة أسيل.
المحامي
حضرتك الحادثتين اللي قبل كده تم التنازل عنهم من الأشخاص اللي وقع عليهم الضرر.
الظابط
ده بعد ما دفعتم مبلغ محترم لكل واحد فيهم، بس حظكم المردي المصاب شخصية عامة.
أسيل
(بعصبية)
أنا مش فاهم حضرتك عايز توصل لأيه بالظبط.
الظابط
قصدك إيه يا آنسة؟
أسيل
قصدي إني حاسة إن حضرتك عايز تشيلني قضية والسلام.
الظابط
حسبي على كلامك يا آنسة.
المحامي
آنسة أسيل اهدى شوية وماينفعش الكلام اللي انتي بتقوليه ده.
أسيل
يعني ينفع إن سيادة الرائد عايز يخليني أما واحدة قاتلة أو أما واحدة مهملة ومستهترة؟
المحامي
ممكن تسكتي يا أسيل دلوقتي.
الظابط
أنا لحد دلوقتي مراعي حالتك، مش عايز آخد معاكي أي إجراء قانوني على الكلام اللي بتقوليه ده.
المحامي
أنا آسف يا فندم نيابة عن موكلتي…. حضرتك عارف إن التحقيق شغال من امبارح، وأكيد أعصابها متوترة، وحضرتك شايف حالتها بنفسك عاملة إزاي، وكمان الكابتن جاسر لسه في غيبوبة… عشان كدا أنا بطالب بالأفراج عن موكلتي بضمان محل إقامتها. إلى حين استيقاظ كابتن جاسر من الغيبوبة وناخد إفادته.
الظابط
أمرنا نحن الرائد……. الإفراج عن أسيل فريد فؤاد…… على ذمة القضية ما لا تكون مطلوبة في قضية أخرى. كما أمرنا نحن على السيدة أسيل فريد فؤاد المرشدي بدفع غرامة قيمتها ١٠٠٠٠ جنيه.
☆☆☆☆☆☆☆☆☆☆☆☆☆☆☆☆
اليوم التالي
في فيلا المرشدي
محسن
(بعصبية)
قرأت الأخبار.
جدو
(بحزن)
أهم.
محسن
يعني شفت الفضيحة اللي حفيدك عملتها لينا.
أسيل
فضيحة إيه اللي أنا عملتها؟ هو أنا أول واحدة تعمل حادثة بعربيتها وتخبط واحد؟
(هنا مسك محسن التليفون وقرأه الخبر من على الفيس بوك. نص الخبر بيقول)
محسن
حفيدة عائلة المرشدي تحاول تدهس لاعب الإسكواش وبطل مصر كابتن جاسر المطيري بسيارتها لأسباب شخصية بينهم.
أسيل
إيه الكلام ده.. جدو الكلام ده كله كذب.
محسن
ده بس العنوان، تحبي أقرألك الخبر كله؟
جدو
ما كفاية بقى يابني، انت مش شايف حالتها.
محسن
حالتها حضرتك السبب فيها، ياما قولتلك بلاش الدلع الزيادة وأدي النتيجة.
أسيل
انت شمتان فيا؟
محسن
للأسف مش قادر أشمت فيكي، لأنك لحمي واللي يأذيكي بيأذيني.
المحامي
يا جماعة ماينفعش اللي بيحصل هنا، ده لازم نهدى عشان نعرف نفكر ونشوف حل.
محسن
عندك حق، لازم نسيطر على الموضوع ده عشان نحافظ مركزنا الاجتماعي، اسمنا وسمعتنا قدام الناس. وده كمان غير أسهم الشركة تراجعت في اليومين.. لحد دلوقتي الشركة خسرانة عشرة مليون.
أسيل
يعني انت كل اللي فارق معاك اسمك وشكلك قدام الناس والأسهم والفلوس دول أهم مني؟
محسن
أيوه كده يا أم لسان طويل، ولولا مركزنا الاجتماعي والفلوس كنتي زمانك في السجن دلوقتي.
جدو
محسن ولا كلمة تاني، انت فاهم.
محسن
حاضر يا بابا. ممكن حضرتك تقولي إزاي هتطلع من الورطة دي؟
جدو
مكرم انت محامي العائلة وأنا بثق فيك، قولي الموضوع ده بيتحل إزاي وبصراحة.
المحامي
للأسف الموضوع صعب مش مبشر بخير.
محسن
تقصد إيه؟
المحامي
يعني لو اعتبروا الحادثة مقصودة هيتعملها قضية شروع في قتل، فيها سجن على الأقل عشر سنين.
(كانت الصدمة واضحة على الجميع)
المحامي
لو اعتبروها مجرد الحادثة في طريق بردوا فيها سجن من ست شهور إلى ثلاث سنين، ده حسب تقدير القاضي. كمان مش عايزين ننسى إن دي مش أول حادثة تعملها أسيل. كمان الشاب اللي ضربته بالعربية بيكون مين؟ ده شخصية عامة، بطل رياضي، أكيد الحادثة هتأثر عليه. غير إنه ممكن يطلب تعويض مادي كبير أوي.
(صرخت أسيل عندما سمعت كلام المحامي)
جدو
(بألم)
اهدئ يا أسيل، أنا مش هسمح لأي حاجة ممكن تأذيكي.
أسيل
(بتعب)
أنا عايزة أخلص من الكابوس ده يا جدو، أنا تعبت.
محسن
طيب مافيش حل تاني؟
المحامي
إن الشاب اللي ضربته بالعربية هو اللي يتنازل أو يقول إنه هو اللي كان غلطان.
جدو
أنا هروح بكرة المستشفى وأتفاهم مع أهله.
المحامي
ما تتعبش نفسك، أنا روحت لأهل الشاب، طلعوا ناس صعيدة ودماغهم ناشفة وشكلهم ناس مرتاحة ماديًا، رافضوا أي كلام عن أي تعويض مادي.
جدو
برضه أنا هاروح وهاخد معايا أسيل وانت كمان هتيجي معايا، واللي فيه الخير يقدمه ربنا.
☆☆☆☆☆☆☆☆☆☆☆☆☆☆☆
اليوم التالي
في المستشفى
(كان يجتمع كل من أبو جاسر الحاج عمران المطيري من أعيان الصعيد.. وأم جاسر الحاجة سميرة.. وحامد وصالح ولاد عم جاسر أصدقاء جاسر.. ونرمين خطيبة جاسر.. وطاهر أبو نرمين وأمها)
وهنا جاء الدكتور وقال
الدكتور
كابتن جاسر فاق من الغيبوبة.
عمران
(بلهجة الصعيدي)
ولدي عامل كيف دلوك؟
الدكتور
مافيش خوف من الإصابة اللي في رأسه.
سميرة
الحمد لله، أحمدك وأشكر فضلك يا رب.
الدكتور
بس للأسف رجله متضررة جامد، ممكن تحتاج لتغيير مفصل ركبة يمين، ده غير الكسور اللي في رجله الشمال.
(وهنا قال طاهر أبو نرمين)
طاهر
يعني هيقدر يمشي تاني على رجله يا دكتور؟
الدكتور
لسه بدري على الكلام ده… احنا لسه هنقوم بإجراء عملية على ركبته اليمين بعد شهر، بعدها هنحدد أنه هيكون في عملية تاني أو لأ، ده غير الكسر اللي في رجله الشمال، يعني الموضوع محتاج وقت.
سميرة
(ببكاء شديد)
لا إن شاء الله ابني هيمشي تاني على رجله وهيكون أحسن من الأول.
نرمين
يارب يا طنط.. طيب يا دكتور هو ممكن يرجع يلعب إسكواش تاني؟
الدكتور
طبيًا ما أظنش، بس مفيش حاجة بعيدة على ربنا، ده بيرجع لإرادة المريض نفسه.
سميرة
طيب أنا عايزة أشوف ابني.
الدكتور
هو دلوقتي هيتنقل على غرفة تانية، تقدروا تشوفوا براحتكم.
(وهنا ظهرت أسيل مع جدها والمحامي)
جدو
أسيل مهما يحصل مش عايزك تفتحي بوقك، فاهمة؟
أسيل
خلاص هخرس خالص.
المحامي
سلامو عليكم.
عمران
عليكم السلام ورحمة الله وبركاته.. في إيه تاني يا أستاذ؟
المحامي
معايا فؤاد بيه المرشدي وحفيدته الآنسة أسيل جايين يطمنوا على الكابتن جاسر.
سميرة
صحيح، يقتلوا القاتل ويمشوا في جنازته.
جدو
يا مدام اللي حصل ده قضاء ربنا، والحمد لله إن الكابتن بخير.. وأنا هتکفل بجميع مصاريف علاجه الكابتن، واللي انتو تأمروا بيه أنا تحت أمركم.
سميرة
إحنا ما بنقبلش العوض، فر فلوسك للمحروسة لما تشرف في السجن.
نرمين
أيوه لازم تدفع تمن عملتها وتروح في ستين داهية.
(كانت أسيل تراقب الكلام من بعيد بصمت بطلب من جدها، لكنها لم تستطع الاحتمال أكثر من ذلك فقالت)
أسيل
ما تهدوا على نفسكم شوية، وبعدين انتي بتقولي هتودي مين في ستين داهية؟
نرمين
أنا مش فاهمة، انتي ليكي عين تتكلمي؟ إيه البجاحة دي؟
ما سيكون رد أسيل على نرمين؟
ما سيكون رد فعل جاسر بعد ما فاق من الغيبوبة؟
ما سيكون موقف أهل جاسر من أسيل؟