رواية انتقام من نوع خاص الفصل الثالث عشر 13 - بقلم امل صالح

جريت على باب الشقة وقفلته ورايا بسرعة وأنا سامعة صوته المتعصب وهو بينادي عليا: -شـــــرووق. قابلت سعد حمايا على السلم وأنا نازلة، شديته في جنب: -اسمع يا حمايا العفيف، أنا عرفت بحوارك أنت وصافية، هتطلع معايا دلوقتي وتقول اللي هقولهولك بالنص، سامعني؟ ملحقش يستوعب كلامي اللي قولته بسرعة، زعقت وأنا بقرب منه: -أنت سامعني..!! ومعايا دليل وربنا لو ما طلعت دلوقتي لوريهم الفيديو.

أيوة كنت بكذب، بس مفيش طريقة غير الكذب دلوقتي..! شديته بسرعة لمنطقة فاضية عشان حسام، اخدت نفسي وبعدين بصيتله وأنا بمسح عيني: -أنت شوفت مراتك وهي بتشوح السكينة على الأرض صح.! -سكينة إي..! زعقت: -يووووووه ما تقاطعنيش، وشوفتني وأنا بوطي أشوف هي شوحتها لي صح.! بلع ريقه ومردش وأنا كملت: -وشوفت إنها كان قصدها تورطني في دا صح..! صح يا سعد يا جوز صافية..!

زعقت في آخر جملة وهو هز راسه بسرعة بـ"آه"، شاورت على الطريق قدامي وبعدين بصيتله عشان يمشي قدامي، اتحرك ومشى وأنا وراه قولت بتريقة: -هه سعدود خايف. لف بسرعة وقال بكلام مقطع وتوتر: -أنا .. أنا مش... رفعت إيدي: -شششش كمل مشي وسمعني سكوتك. مشينا شوية وبعدها لقيته لف تاني فـ زعقت: -يوووه عايز اي.! -أنا مكنتش موجود أصلاً وقتها..! -لأ أنت كنت موجود يا سعد، صح يا سعد.!

كنت موجود بس خوفت تدخل عشان حسيت إن مراتك ملبوسة، صح يا سعد.! حسيته حس إني مجنونة فـ بتوتر: -صح. وصلنا البيت وهو فتح بالمفتاح اللي معاه، دخلنا وكان المكان هادي بس لقيت حماتي طالعة من الأوضة على صوت المفتاح. قربت منها: -إبنك فين..! بصيت على الأرض: -وفين التليفون.! بصت لجوزها وجرت عليه: -شوفت مرات إبنك كانت عايزة تعمل اي يا سعد.! بصلي ورجع بصلها وزعق: -هي اللي عملت..! أنا عارف كل حاجة يا ناهد.

بلعت ريقها وهي بترجع لورا: -كل حاجة..!! -خلاص أنت وهي، حسام فيـ... مكملتش كلامي ولقيته داخل، ساب الباب مفتوح وقرب مني بخطوات أشبه للجري وهو بيشتم بأفضع الألفاظ، مسكني من شعري: -مش سايبك النهاردة يا كلبة. -حسام سيبها، أمك اللي عملت كدا قصدًا. -أنت متعرفش حاجة يا بابا. -أنا شوفت أمك بتهددها إنها هتعمل كدا. لفله: -تعمل اي.! -هددتها إنها هتقول إنها رفعت سكينة عليها وبطريقتها. -سعد أنت بتقول اي.!

اتفاجئت إنه قال كلام غير اللي اتفقنا عليه، بس ما همنيش طالما في صالحي، شوفت حد بيدخل من الباب اللي سابه حسام مفتوح. وفجأة لقيت حسام بيتشد والشخص دا بيزعق فيه: -إيدك من عليها يابن الـ***...