رواية اوقعتني في حبها الفصل الثامن 8 - بقلم اسراء محمود

الفصل 8 وقفنا الفصل إللى فات لما مراد راح لعشق المستشفى علشان السلسلة. عشق خدت السلسلة وهى فرحانة ولبستها. عشق: أنا مش عارفة أشكرك إزاي يا مراد على إللي بتعمله معايا، أنا بجد كنت هموت لو ملقتهاش. مراد: متشكرنيش يا عشق، أنا بفرح لما بشوف ضحكتك دي. عشق بصتله بكسوف وضحكت. في الوقت ده دخل آدم وشافهم كده. آدم: مراد، إنت هنا؟ مراد: آدم، إزيك؟ مراد قام بسرعة من جنب عشق. عشق اتكسفت جداً من شكلهم وبصت الناحية التانية.

آدم بذهول: الحمد لله يا مراد، بس إنت إيه إللي جابك عند عشق ومجتش عندي؟ مراد برتباك: أصل عشق كانت نسيت السلسلة بتاعتها في العربية بتاعتي وقولت أجبهالها. آدم بغيرة: ونسيتها ليه وإزاي أصلاً في عربيتك؟ عشق في الوقت ده كانت بتتمنى إن الأرض تنشق وتبلعها. عشق: كتر خيره مراد أنقذني من الموت امبارح. آدم: إيه ده؟ إيه إللي حصل؟ مراد: أنا هحكيلك. آدم بقلق واضح على عشق: إنتي كويسة؟ طيب بقيتي تمام؟

عشق بكسوف: آه أنا كويسة الحمد لله. مراد كان واقف بيغلي، هو برضه مش قابل يشوف نظرة القلق في عين حد تاني غيرهم. مراد: هي كويسة يا آدم وزي الفل أهي، ملهوش لزوم الكلام ده. عشق بإحراج: أنا كويسة يا آدم، شكراً يا حضرة الظابط. مراد حس إن عشق اتضايقت بسبب غباءه وغيرته عليها. مراد: مش يلا يا آدم نكلم أنا وانت في المكتب شوية. آدم: يلا يا مراد. عند جامعة القاهرة. كانت منه ورنا قاعدين في الكافتريا بتاعت الجامعة.

منه: شوفتي الواد إللي اسمه محمد؟ رنا: محمد مين؟ في مليون محمد في الدفعة. منه: بقولك إيه ركزي، الواد إللملزق إللي بيكراش عليا. رنا: آه الواد إللي ذوقه معفن في اللبس، لأ وكمان ذوقه معفن لما اختار. منه: اتلمي يا بت، والله ما يهمني جامعة ولا بتاع، أقوم أضربك في وسط الجامعة. رنا: لأ خلاص هسكت. منه: المهم ماشي مع البت الملزقة إللي اسمها حنان. رنا: آه البت دي أنا مش بحبها خالص.

منه: ولا أنا، بس الصراحة بخاف لما الاتنين بيتلموا مع بعض. رنا: متخافيش، أنا معاكي وبمية راجل. منه: لما نشوف المية راجل دول. حنان كانت واقفة بعيد وكانت بتكلم مع محمد. محمد: إنتي هتروحي وتعملي نفسك مش شايفة وتخبطي فيها تمام؟ حنان: أنا مش عارفة إنت بتحبها على إيه. محمد: مليكيش دعوة، إنتي. حنان: خلاص أنا هروح. مشيت حنان في اتجاه منه ورنا وعملت نفسها اتقبلت في رجل منه. منه: أوبا، مش تاخدي بالك.

حنان: أنا برضه يا حمارة، إنتي إللي حاطة رجليكي عشان تخبطيني. منه: إنا. حنان: أيوه إنتي عشان متغاظة مني عشان محمد ماشي معايا ومش معبرني. رنا: لأ دا إنتي اتجننتي خالص. حنان: لأ مين دي إللي اتجننت؟ لأ حاسبي على كلامك يا ماما. منه كانت بدأت تدمع في عنيها، وكمان لما لقت الجامعة كلها اتلمت عليها. منه بغضب: إنتي واحدة حيوانة ورخيصة وكدابة، إنتي واللي بعتك. وقربت منه عليها وضربتها بالقلم.

منه: ده عشان يعلمك متلعبيش تاني معايا يا حلوة. ومشت منه ورنا وراها. منه وهي ماشية شافت محمد. منه بصت عليه باستحقار: جبان. ومشت منه ورنا عند عشق في المستشفى. عشق كانت هتموت من إللي قالوا مراد، وكانت رايحة جاية في المكتب بتاعها وبتغلي. عشق: أنا إللي زي الفل وكويسة ومش مهم كل ده والله، عايز تضرب يا مراد. عند مراد في المكتب كان قاعد هو وادم. آدم بغيرة: إنت على طول بتيجي هنا لعشق؟ مراد: لأ.

آدم: أنا مستغرب ليه مش بتيجي عندي أنا الأول وبتروح لعشق؟ مراد: ما أنا شرحتلك يا آدم، عايزني أقول إيه تاني؟ آدم: ماهو أنا مش فاهمك يا مراد. مراد: آدم، إللي عايزك تعرفه إن أنا هاجي هنا على طول عشان أشوف شغلي وفلوسي وأتابع معاك. آدم: من امتى يا مراد الكلام ده؟ مراد: من دلوقتي يا آدم، فاهم؟ من دلوقتي. آدم: براحتك يا مراد، اعمل إللي تعمله. مراد: أكيد براحتي، أنا ماشي يا آدم، سلام يا أخويا. آدم: سلام يا مراد.

مراد خرج من عند آدم وقال يروح يشوف عشق. مراد كان واقف ورا باب مكتب عشق وشايفها وهي غضبانه. عشق: كده يا مراد تقول عليا كده؟ ياريتني كنت ضربتك بأي حاجة جمبي، بس هقول إيه. مراد: وكنت هتهوني عليا إنك تضربيني؟ عشق من الصدمة كانت هتقع، بس مراد لحقها قبل ما تقع. وهنا كان عشق ومراد غايبين في عيون بعض، وكانت لغة العيون هي إللي بتتكلم. مراد: هو إنت إزاي عيونك بتسحرني كده؟ عشق: إنت إزاي مفيش فيك غلطة؟ إنت مش زي أي راجل.

مراد: إنتي وقعتي مراد في شباكك يا عشق، مش عارف أعمل فيكي إيه. عشق: متعملش حاجة، زي ما أنا مش هعمل حاجة، همشي ورا احساسي وبسم. مراد فاق وبعد. مراد: أنا آسف على إللي قولته يا عشق، بس آدم كان هو إللي داخل وهو قلقان وخايف ومرعوب، وكان لازم أقول كده. عشق وهي بتعمل شفايفها لقدام زي الأطفال: برضه إنت متقولش عليا كده. مراد قرب من ودنها: بلاش تعملي الحركة دي عشان بضعف. عشق بكسوف: يعني هتعمل إيه؟

مراد: بلاش تعرفي، لحسن تقولي عليا قليل الأدب. عشق: طب اِطلع بره عشان إنت دماغك شمال. مراد: إنتي لسه شوفتي شمال؟ أنا طالع أحسن. مراد طلع وكان بيضحك على كسوفها. عند عشق كانت فرحانة. مراد راح ركب عربيته ومشي راح بيته. وعشق خدت حاجتها وروحت البيت. عشق دخلت البيت لقته هادي، استغربت. عشق: إيه يا سوسو، أحمد ومنه فينه؟

سهام: منه جت من الجامعة مش عارفة فيها إيه، دخلت وقفلت الباب على نفسها وقالت محدش يصحيني، وأحمد مع صحابه برا. عشق: طب أنا هدخل أشوف منه. عشق: مجنونتي، ماله؟ منه وهي بتمسح دموعها: مفيش. عشق: مالك يا قلبي؟ بتعيطي ليه؟ منه بدموع أكتر: هحكيلك. عشق: ما إنتي خدتي حقك يا منه، بتعيطي ليه بقا؟ منه: بس هما ليه بيعملوا معايا كده؟ عشق: هتشوفي أكتر من كده يا منه، فاللازم تستحملي وتكوني قوية. منه: حاضر.

عشق: يلا بقا امسحي دموعك ويلا اِخرجي ناكل أنا وانتي. منه: آه يلا عشان أنا جعانة أوي. عشق: وكنتي عاملة فيها زعلانة، قومي يلا. منه حضنتها: أنا بحبك أوي يا عشق يا أحلى أخت في الدنيا. عشق: وأنا كمان بحبك، يلا ناكل. خلص اليوم والكل دخل ينام.