رواية اشتغاله الفصل الأول 1 - بقلم ليل أدم

(الأم تدخل وهي تصرخ) يالهووووي قوم يا مدهول. كتك البلا في خلفتك. (زين مذعوراً) إيه يا أمي؟ فيه حد يصحّي حد كده؟ (الأم) خالك محروس مات. قوم روح شغلك، هتتأخر. (زين ينظر إليها بتساؤل، يحاول أن يفهم هل تريد منه الذهاب للشغل أم للعزاء) (الأم) قوم يابن الموكوسة، خليني ألحق الخشبة. (زين) خشبة إيه يا أمي؟ هو مسرح؟ (الأم) خشبة خالك محروس يا ابن الجزمة. (زين) لحظة بس، مين خالي محروس اللي ظهر فجأة ده؟ هو انتي مش وحيدة؟

معندكيش أخوات؟ (الأم) ياض، خالك محروس أبو منال اللي على أول الشارع. (زين) عليه النعمة، الرهاب الاجتماعي يخاف منك. وسعي، وقعتي قلبي يا شيخة. (الأم) والله ما انت نافع. ابقى تف على وشي. (زين) يا ست الكل، روحي الحقي الخشبة. ملكيش دعوة بيا بقى. بعدين، الساعة كام؟ (الأم) عشرة وربع. (زين) ينهار أسود! هو أنا مش قولت ميعادي في الشغل تسعة؟ (الأم) أعملك إيه؟ عمك محروس بيفرفر من الساعة سبعة ونص. (زين)

وعهد الله ما حد هيفرفر غيري. وسعي خليني أقلع. (الأم) مكسوف مني يا لوح؟ ياض دا أنا... (زين يقطع كلام الأم) عارف عارف. كنتي بتحميني وكنت بعملها على رجلك، وياما كنتي بتديني البتاعة. خلاص بقى. (الأم) بتاعة؟ مكسوف تقول اللبوسة يا ابن المنكوبة؟ (زين) طب إيه؟ الخشبة مش هتلحقي كده. تصوتي لحد ما تشبعي. ياله بقى. (الأم) يالهوي! صحيح. سلام، أشوفك بليل يا ابن الهبلة. يالهووووووووووووي! (زين)

عليها حنجرة بسم الله ما شاء الله. يعني لو مت مش هشيل هم حاجة. هتصوت عليا صوت هطلع ترند والله. (ونزل زين على شغله) (زين) صباح الفل يا أبو جودة يا حلو. (جودة) يا عم، مكنتش جيت. دا البريك فاضل عليه نص ساعة. (زين) يا عم، يخربيتك. قفلت اليوم اللي يشوفك وانت بتقولي مكنتش جيت، يقول إنها شركة أبوك، مش مجرد كلب ذليل عويل في الشركة. (جودة) الله يسامحك يا عم. مش هرد عليك عشان صايم. (زين)

لا طالما صايم يبقى حقك عليا. راسك أبوسها. (جودة) حبيبي. خلاص والله مسامحك. (زين) أكيد؟ (جودة) أكيد. (عم محمد بتاع البوفيه) النسكافيه بتاعك يا أستاذ جودة. (زين) انت صايم لحد الضهر ولا بتخترع دين جديد؟ (أسماء) سيبك منه يا زين. هو كل يوم يقولك أنا صايم، وعلى الضهر يفطر. (زين) آه والله عندك حق يا سمسومة. إلا صحيح، الورق اللي أديتهولك امبارح فنشتيه مش كده؟ (أسماء)

خد أهو. بس بالله عليك بقى، بلاش تعملها تاني. أنا سهرت للصبح شغالة عليه. (زين) أشوفك أكبر محاسبة في المكتب. (عم محمد) زين، مدام كاميليا كانت عايزاك في مكتبها. (زين) في مكتبها كده؟ يبقى هتمسح بيا الأرض. بعد إذنكم. (في جانب آخر) (كاميليا) ادخل. (زين) صباح الورد. (كاميليا) لسه جاي صح؟ (زين) أنا لا طبعاً. أنا هنا من النجمة. (كاميليا) خف كدب يا زين. جودة كان هنا وقالي إنك لسه موصلتش. أنا عايزة أفهم، هتلتزم امتى؟

أنا صاحبة الشركة، بكون على مكتبي الساعة تسعة. انت بتوصل من عشرة للمالا نهاية. اعمل معاك إيه؟ خصم وكده كده كل آخر شهر مبيكونش ليك مرتب. اعمل فيك إيه تاني؟ (زين) أنا مكنتش عايز أتكلم، بس طالما جودة قال إني لسه موصلتش وطلع قليل الأصل، فـ وربنا لأقول كل حاجة. (كاميليا) قول. (زين) جودة معموله عمل وطلب مني أروح لشيخ كبير عندنا مشهور يشوف الموضوع ده. (كاميليا) إيه ده؟ الكلام ده إيه علاقته إنك تيجي متأخر؟ (زين)

هقولك، منا جاي في الكلام معاكي أهو. (كاميليا) قول. (زين) وصلنا لفين؟ (كاميليا) الشيخ الكبير اللي عندك. (زين) الله يفتح عليكي يا فندم. المهم، الشيخ ده بيكون متواجد الساعة تسعة ونص الصبح. أنا روحت قعدت معاه، اتكلمت عن جودة. طلع الواد يعيني مأذي جداً جداً. (كاميليا) والله؟ (زين) تخيلي! المتخلف بيرمي مياه سخنة في الحمام. (كاميليا) بتتكلم بجد؟ (زين) هيا دي فيها هزار. ابعتي هاتي جودة قصادي، لو راجل ينكر كلامي. (كاميليا)

لالالا، بخاف أنا من الحاجات دي. (زين) منا عارف. اتفضلي ورق المناقصة اللي طلبتيه مني امبارح. (كاميليا) إيه ده؟ خلصته امتى؟ برافو عليك والله. (زين) سهران عليه لحد الصبح. شغل موت حقيقي. يابختكم بيا. (كاميليا) برافو عليك. لجل الورق ده مفيش خصومات النهارده. أي خدمة؟ (زين) ربنا يعمر بيتكم والله. بعد إذن حضرتك. (كاميليا) اتفضل. (زين بعد الخروج من مكتب كاميليا، هاتفه رن) (زين) ست الكل اللي دفنت نص المنطقة، عاملة إيه؟ (الأم)

والله ليلة زي العسل. النعش كان طاير. تقولش مات في البقيع. (زين) ياما، دا المنطقة كلها بتقول إنه مات بيشرب. (الأم) يخربيتك، قلبك جاحد. الراجل مات، ياللي أشوفك متسلسل. (زين) هو أنا قرد يا ماما؟ إيه متسلسل دي؟ (الأم) عندي ليك خبر حلو. (زين) إنتي يا ماما عندك خبر حلو؟ ليه؟ كفا الله الشر. القيامة هتقوم بكرة ولا إيه؟ (الأم) مش بقولك محدش عرف يربيك. (زين) قولي يا ماما الخبر الحلو. (الأم)

أبوك راجع من السعودية وجاب ليك هدية حلوة أوي. (زين) يبقى آيفون أكيد. أيوه بقى. هيا دي الأخبار ولا بلاش. (الأم) ربنا يخليه لينا والله. لو مجابش حاجة، كفاية جه بخير. (زين) طبعاً يا ست الكل. طبعاً. (كامل بيه) زين، تعالي أقولك. (زين) معلش يا ست الكل، سلام الوقتي. (الأم) ماشي. بس وانت جاي، هات معاك فينو وهات كابوتشة. (زين) إيه البكوتشة؟ (الأم) بكوتشة إيه يا ابن الهبلة؟ بقولك كبوتشة. الخساية المدورة دي اللي شبه دماغك.

(زين) آه عرفتها. شكلك مروقة علينا النهارده. (الأم) هبسطك ياض. (زين) طب سلام عشان الراجل عايزني. (الأم) سلام. (كامل بيه) ادخل. (زين) مساء الورد يا مدير. (كامل بيه) من الصبح عمال أسأل عليك. هو انت مينفعش تيجي بدري؟ (زين) يا كامل بيه، أنا مقدرش أبيع جودة. (كامل بيه) ياريتك نص جودة. بقاله سبع سنين معانا، مفيش يوم عنده تأخير دقيقة واحدة. (زين)

يابيه، بقولك مأذي جامد. علشان كده مش عارف يعيش في بيته. والنهاردة كنت عند الشيخ بحل معاه. (كامل بيه) والله؟ (زين) وروح هات المصحف زي ما بقولك كده. والحمد لله، أيام بسيطة ويبقى زي الفل. (كامل بيه) ماشي يا أخويا. خد بقا الورق ده. روح عند الدكتورة فاطمة عشان تراجع معاها إيداعات السنة اللي فاتت. (زين) ما بلاش دكتورة فاطمة والنبي يا كامل بيه. دي مجنونة. بتطلع عيني. (كامل) ياله يا حبيبي، مش هنختار الشغل. (زين)

لا طبعاً يا مدير. الشغل شغل. بعد إذنك. (كامل) اتفضل. (بعد خروج زين من مكتب كامل بيه، راح مكتب المحاسبة) (زين) جودة حبيبي، انت لازم تشوف حل عشان الشركة كلها بتتكلم عنك. (جودة) ليه؟ أنا عملت إيه بس؟ (زين) كاميليا هانم وكامل بيه سألوني إن كان جودة اتجنن ولا إيه. (جودة بقلق) ليه؟ هو أنا عملت حاجة؟ (زين) علشان كل يوم تصوم لحد الضهر. بس أنا قولتلهم إن الشيخ نصحك تعمل كده عشان انت مش مرتاح. (جودة) يعني إيه مش مرتاح يا زين؟

(زين) يعني البيت عندك مش كويس يا حبيبي. (جودة) آه، جدع. ماشي. (زين) لو حد سألك بقى، انت مالك يا جودة؟ هتقول إيه؟ (جودة) هقول مش مرتاح. (زين) جدع. أوى تقول صايم. (جودة) لا يا عم، هو أنا مجنون؟ (زين) جدع. سلام أنا بقى. (جودة) رايح فين؟ (زين) مفيش يا سيدي. كامل بيه مصر إنه أخد النهارده إجازة أريح فيها أعصابي. (أسماء) اشمعنى إحنا إن شاء الله؟ (زين) هتربطي حمارتك جمب حماره ابن العمده. (أسماء) يعني هيا كده. (زين)

إنتي زعلتي خلاص. والله لو عايزة تاخديها مكاني معنديش مانع. بس تعدي على الجيزة في سكتك تدي الورق ده لبوب العمارة اللي هقولك عليها. وروحي بقى كملي اليوم في البيت. (أسماء) بجد يا زين؟ (زين) طبعاً يا ست البنات. دا انتي أختي يا عبيطة. (أسماء) وانت أجدع وأحن أخ. (زين) ياله بقى على كامل بيه. قوليله الكلام اللي هقولك عليه بالحرف. أوعي تزودي حاجة. (أسماء) لا طبعاً. هو أنا هبله؟ (زين) لا منا عارف. (أسماء) أقوله إيه؟ (زين)

قوليله بعد إذنك يا مستر كامل، أنا خدت الورق من زين عشان أنا عندي شغل في الجيزة كده كده. (أسماء) خلاص ماشي. بس استنى، ممكن يسألني عند مين في الجيزة؟ (زين) ياستي، قولي أي اسم. (أسماء) لالا، مينفعش. لازم نجيب اسم عميل من الجيزة. دا مش بيسكت، إنت عارفه. (زين) أيوه افتكرت. قوليله عندي شغل في الجيزة عند الدكتورة فاطمة. (أسماء) هيا الدكتورة فاطمة في الجيزة؟ (زين) آه. منا افتكرت عشان روحت هناك قبل كده. (أسماء)

بس المشكلة إني عندي شغل كتير أوي. (زين) وأخوكي زين راح فين؟ روحي يا قلب أخوكي. أنا هعمل كل حاجة. إنتي انبسطي. اعتبري نفسك في الصيف. صايد. (أسماء) هعيط وربنا. (زين) لا مش وقته بقى. عيطي لما تروحي البيت بالسلامة. (أسماء) أول ما أوصل الجيزة هتصل بيك. آخد العنوان. (زين) لا، وريني كده الملف اللي معاكي. (أسماء) أهو. (زين حط إيده في مكتبه وكأنه بيطلع حاجة، ومهما وحطها جوه الملف)

الورقة دي فيها اسم الدكتورة فاطمة والعنوان وكل حاجة. أي خدمة. (أسماء) بجد؟ وكتاب الله أنت إنسان. (زين) وإنتي بنت حلال. في رعاية الله. (أسماء) سلام. (جودة) بقى حد ياخد إجازة ويسيبها؟ دا انت غبي. (زين) كل ده عشان حنين. أبقا عبيط. يارب اجعلني عبيط على طول في عيون الناس. (جودة) يا عم خلاص، متزعلش. حقك عليا. (زين)

ياض أنا مش زعلان. أنا أصلي المفروض النهارده كانت رايحة عند الدكتور. ربك يسترها. شكلي عندي مشكلة كبيرة. علشان كده كنت هاخد الإجازة. (جودة) ينهار أبيض يا زين! يعني بدل ما تروح للدكتور، تقوم تدي الإجازة لأسماء؟ (زين) أعمل إيه يا جودة؟ قلبي بيوجعني عليكم، كأنكم أخواتي. (جودة) ربنا يخلينا لبعض يارب يا حبيبي. (زين عمل نفسه بيقع وساند على المكتب) (جودة) زين، انت كويس؟ (زين)

لولا الشغل اللي خدته من أسماء، كنت مشيت والله يا جودة يا أخويا. (جودة) يا عم والله معنديش حاجة أعملها. هات الشغل عنك يا حبيبي. (زين) لالالا، أنا كده تقلت عليك أوي يا حبيب أخوك. إنت برضوه أكيد عندك ارتباطات. (جودة) طب وعهد الله ما حد عامل الشغل ده غيري. عيب عليك يا زين. (زين) ياااااااااه. بتحلف ليه بس يا جودة. حرام عليك يا أخي. أمسك ياعم جودة. زعلتني جدا جدا. (جودة) يا عم والله انت أخويا. (زين)

بجد. مش عارف أقولك إيه. الساعة معاك كام؟ (جودة) ١٢ وربع. (زين) ياه! ميعاد الدكتور. (جودة) روح يا باشا. وأي حد هيسأل عنك، هعمله أي حوار. (زين) بجد يا جودة؟ (جودة) طبعاً بجد. (زين) ربنا يخليك ليا يا أخويا. مش عارف أقولك إيه. في رعاية الله. (جودة) طمني عليك يا زين. بالله عليك. (زين) حاضر يا حبيبي. مع السلامة. (جودة) سلام. (زين بعد ما نزل من الشركة)

الهي تولع بيكم. شوية نصابين. محدش فيكم يعرف ربنا. أروح أجيب الفينو وألحق أرجع أدلع الكرش.