رواية اشتغاله الفصل السادس عشر 16 - بقلم ليل أدم

أشار زين إلى ياسمين بترك ريهام حتى ينتهي من الاجتماع. ريهام: وكأن ما بنا حاجة. عينه لسه بتلمع عليا، لسه عينه متابعة كل تصرفاتي زي ما كان بيعمل. لما كنت أشرب كان يقف جنبي معاه منديل، لو أكلت حاجة إيده تسبق إيدي. وقتها بس عرفت إني كنت غبية أوي لما صدقت أي كلمة سمعتها عن زين. مش معقول، لو كدب في كل حاجة، يكدب في نظرة عينه. في جانب آخر. جودة: (مال على زين) بقولك إيه يا وجهه، لم الاجتماع ده عشان مفيش بجنيه كاريزما.

زين: هو أنا مفضوح أوي كده؟ جودة: مفضوح إيه يا عم، دا أنت عينك قلبت شبه عيون القطط. أقوم أجيبلك باقي عليه الصبغة الحمرا تشغل الشغل؟ زين: حد قالك إني عبيط زيك؟ جودة: طب هتنهي الاجتماع ولا أنهي أنا بشياكة؟ زين: منا بعد كلمة شياكة دي خوفت منك أكتر. جودة: أتعلم. زين: ودي. جودة: طب يا جماعة معلش، مستر زين عنده مشكلة صحية مش قادر يكمل الاجتماع. زين: نعم؟ جودة: معلش، شدة وتزول. بعد إذنك. زين: هيا دي الشياكة يا ابن الجزمة؟

جودة: يا عم ما أنت قاعد مش عارف تتكلم، عمال تتلفت عليها. قوم روح شوف في إيه، الله معك. أقوم ألحق أسماء أنا. زين: روح. وخرج زين من غرفة الاجتماعات إلى مكتبه الفاصل ما بينهم حائط زجاج فقط. ريهام: شكلي كده أجلت الاجتماع. زين: تقريباً. ريهام: مش مهم. وقامت تدور في المكتب. زين: بتدوري على إيه؟ ريهام: عايزة زين. زين: في العربية. ريهام: طب بعد إذنك هاتيه. زين: ريهام، عايزة إيه؟ ريهام: أنا آسفة، أنا مش هقدر أعيش من غيرك.

زين: وأنا آسف، محتاج وقت عشان أقدر أصفى من ناحيتك. ريهام: موفقة، خد وقتك بس وانت جنبي. زين: لا يا ريهام، محتاج أكون لوحدي. ريهام: منا وانت واحد، يعني اعتبر نفسك لوحدك. زين: (أشار إلى ريهام بإصبعين) ريهام: يعني إيه؟ زين: يعني اتنين. ريهام: دا آخر كلام عندك يا زين؟ زين: بالظبط. ريهام: تمام يا زين، أنا مش هضغط عليك، بس من فضلك انزل معايا العربية حالا، عايزة زين. زين: والله؟ ريهام: آه والله. زين: تمام، اتفضلي.

ريهام: ماشي، اتفضل امشي قصادي. زين: تمام. وخرج قصاد ريهام. ريهام: يخربيت شياكته. زين: دمك يلطش. ريهام: هو أنا كلمتك؟ انت بتفتح كلام وخلاص. زين: لا، عندك حق. أنا هسكت. بعد النزول إلى العربية، لفت ريهام ركبت عربية زين. زين: اتفضلي، عروستك أهي. ريهام: وحشتني أوي يا بابتي. وضمت العروسة في حضنها. زين: انزلي بقى عشان أقفل العربية. ريهام: اركب بدل ما أصوت في الشارع وأقول خطفني. زين: (بيضحك) الشارع كله بتاعي، صوتي.

ريهام: يعني كده. زين: خلي العربية معاكي. ريهام: خلاص بقى يا زين، رايح فين؟ أنا جاية مواصلات، روحني طيب. زين: عربيتك هناك أهي، والسوق بتاعك وقف مستنيكي. ريهام: بعتها خلاص، مش عربيتي. زين: عايزة إيه من الآخر يا ريهام؟ ريهام: عايزة أروح الملاهي. زين: آه، لا انسي. أنا هرجعك البيت، وهو ده آخري. ريهام: موفقة، اركب. زين: حاضر، بس بشرط. ريهام: موفقة. زين: مش تعرفي إيه هو الأول؟

ريهام: ياعم مهما كان شرطك مش هيكون أسود من بعدك عني. اركب، اركب. زين: (بيضحك وركب العربية) بوقك ميتفتحش لحد ما نوصل. ريهام: موفقة. زين: ما أنتي بتتكلمي أهو، مش رايح. ريهام: (قفشت إيد زين) ياعم خلاص، مش هتكلم. زين: أما نشوف. في جانب آخر. جودة: يابت فكي وشك بقى، وربنا ما كان قصدي. أسماء: لا يا جودة، انت كل شوية تقعد تهزر مع ياسمين وأنا مش بحب كده.

جودة: يابت والله أبداً، دا أنا الفترة دي بمر بأيام أوحش من صورتي في البطاقة. أسماء: (بتضحك) جودة: أيوه بقى، فكي الجبس اللي لفة وشك ده. أسماء: الوقتي بقا وشي جبس، إنما ست ياسمين وشها اللي عليه مكياج الدنيا ده مش جبس. جودة: يا عم ورب الكعبة بحبك، فكي بقى وتعالي نشرب قصب بره. أسماء: قصب؟ جودة: خلاص، بلاش. تعالي نشرب كوكونات. أسماء: إيه كوكونات ده كمان؟ جودة: تعالي نعرف مع بعض. أسماء: لسه معايا شغل.

جودة: وعهد الله زين نفسه ما مهتم. اديك حماسك ده قلقني أنا وزين. أسماء: يا جودة يا جودة، افهم. ربنا بعتلنا كلنا فرصة. حتى لو زين مش مهتم، لازم إحنا نهتم. لازم نحافظ على كل جنيه. اديك شايف زين عامل معانا إيه، فاتح حنفية فلوس مش بتتقفل. مفيش حد منا ناقصه حاجة. بعد ما كنا بنام شايلين هم بكره، الحمد لله ربنا كرمنا، بقينا ننام والحمد لله ضامنين الوسيلة. جودة: هيا مش الفلوس وسيلة؟ أسماء: آه.

جودة: بس مش أصيلة. أنا كلامك ده غيرني مليون درجة، عشان كده أنا مش هاخدك معايا تجربي الكوكونات، شوفي شغلك. أما أنا هروح أجرب الكوكونات. في جانب آخر. طارق: الو. مشيرة: انت عارف بسبب حتة تصرف غبي منك، ريهام فين الوقتي؟ طارق: فين؟ مشيرة: مع زين. لا ومش كده وبس، زين طلع ضاحك عليك وعقد الشركة اللي معاك مضروب. يعني انت خسرتني تلاتين مليون جنيه، والآخر زين رجع ل ريهام وانت طلعت حتة حمار. أنا هخرب بيتك.

طارق: أستاذة مشيرة، أنا معملتش حاجة. أنا عملت كل اللي اتفقنا عليه. مشيرة: عملت إيه؟ روحت ضحكت على نيفين في تلاتة مليون جنيه، راحت قالت كل حاجة ل ريهام. هو ده اللي عملته يا نبيه؟ طارق: أنا عملت كده عشان متأكد إن ريهام عمرها ما هتقدر تجمع ٦٠ مليون جنيه حق الشركة، ف قولت نيفين بقت كارت محروق. مشيرة: انت عارف لو زين كمل مع ريهام، أنا اللي هخليك كرت محروق. انت فاهم يا طارق؟

طارق: يا أستاذة مشيرة، المصلحة واحدة. أنا عايز ريهام، وانتي عايزة زين. مشيرة: لا، المصلحة مش واحد. أنا فتحت ليك شلال فلوس لجل ما تبعد زين عن طريق ريهام خالص. وخلي بالك يا طارق، آخر فرصة ليك تتصرف وتبعدهم بأي شكل. غير كده، وديني وأيماني ل أخليك تفتح محل سجاير، وانت عارف مشيرة عزيز تقدر تعمل فيك إيه. وقفل الخط في وش طارق. في جانب آخر. زين: اتفضلي انزلي. ريهام: صافي يا لبن. زين: حليب يا قشطة، شاربة قشطة إنتي. (وبيضحك)

ريهام: بحبك. زين: منا أتحب. ريهام: طبعاً تتحب. زين: ريهام، عايز أقولك حاجة. ريهام: قول. زين: مشيرة ظهرت مرة واحدة، وأنا أصلاً مش بثق في مشيرة عزيز، وعلى طول كنت بحس إنها عايزة تكون على علاقة بيا. احذري منها كل الحذر، شغل المصلحة الاجتماعية مش واكل معايا. ريهام: حرام عليك يا زين، دي حنينة معايا أوي. زين: كانت فين وانتي في المستشفى وتعبانة؟ ريهام: بتقولي كانت مسافرة.

زين: مشيرة عزيز مخرجتش من مصر من أيام الحرب العالمية الثانية. خلي بالك منها يا ريهام. ريهام: نفسي بس انت دماغك دي تقف عن التفكير شوية. مفيش حاجة أعملها وتعجبك. أنا نازلة. زين: ماشي، ياله سلام. ريهام: هات العروسة بتاعتي ورن عليا لما توصل البيت. ولا أقولك، أنا جاية أروحك البيت. زين: (قفل السنتر من جوه عشان ريهام متعرفش تركب) سلام. في جانب آخر. جودة: بعد إذنك، واحد كوكونات ساقع.

العامل: مفيش كوكونات ساقع للأسف يا فندم، ومفيش كوكونات أصلاً. جودة: يعني إيه مفيش كوكونات ساقع؟ يعني إيه مفيش كوكونات خالص؟ يعني إيه كوكونات أصلاً؟