رواية إيجار زواج الفصل الثاني عشر 12 - بقلم رحمه محمد

عادل : دينا انتي سامعة نفسك بتقولي إيه؟ دينا : عادل أنا تعبانة ومحتاجة أروح أرتاح، فبليز روحني. عادل : ماشي اتفضلي. *** هنا : خلاص يا عم انت نزلني، اتفضحت والحمد لله ومش بعيد بكرة ألقى شهادة رفدي منورة. أدهم : يلا أحسن، أنا مش عايزك تشتغلي أصلاً. بعدها نزلها وركبوا العربية. هنا : هو أنا نفسي أفهم، انت بتكلمني وبتعاملني على إننا هنكمل وجوازنا عادي وطبيعي؟ انت حد ضربك على دماغك يا عم انت؟

ده أنا مأجراك، عارف يعني إيجار؟ أدهم وقف بالعربية مرة واحدة لدرجة إنها اتخبطت في الطبلون. هنا : إيه الجنان ده؟ أدهم لف لها ومسكها من دراعها بقوة: لآخر مرة بقولها لك يا هنا، انتي مراتي وبجد وقدام ربنا وكل الناس، وده اللي عندي. حكاية إنك مأجراني، قولت لك إن كله كان تحت إشرافي ولعبة دخلتك فيها بمزاجي، فكلمة زيادة في الموضوع ده مش هسمح بيها. هنا : وأنا المفروض أعمل إيه بكلامك ده؟ عايزني أصدقك ليه؟

من حبك فيا يعني ولا من جمالي اللي سحرك قوي؟ أدهم : انتي ليه شايفة نفسك قليلة أوي كده؟ هنا : عشان "رحم الله امرئ عرف قدر نفسه". وأنا حاطة نفسي في مكان أنا عارفاه ومن زمان، مش محتاجة حد يجي ويقولي عكسه. أدهم : غلط ومليون ألف غلط كمان. انتي جميلة وجداً، إيه يعني سمرا؟ مهو السمار نص الجمال. وبعدين مفكيش عيب ما شاء الله عليكي.

مناخيرك صغيرة وبوقك كمان، وشك ملامحه جميلة وأوي من غير كل الألوان اللي بتحطيها دي. انتي جميلة وأوي، كفاية إنك من صنع الرحمان. ربنا قال في كتابه: "بسم الله الرحمن الرحيم (يأيها الإنسان ما غرك بربك الكريم الذي خلقك فسواك فعدلك في أي صورة ما شاء ركبك) صدق الله العظيم". ربنا خلقنا في أحسن صورة يا هنا، وكل اللي علينا نعمله إننا نتعلم نقول الحمد لله، فاهمة؟ هنا : بحبك. أدهم : بس أنا لأ.