رواية بنات الملجأ الفصل الأول 1 - بقلم مادونا عماد

في ملجأ كبير فيه بنات كتير بتلعب مع بعض، وهما أكتر من صحاب. الأربع بنات غزل وأسيل وتالا وكيلا شافوا بنت جديدة قاعدة لوحدها. بصوا لبعض وابتسموا، ثم راحولها. غزل: ازيك؟ جنة ببكاء: أنا خايفة. غزل: من إيه؟ جنة: عشان أول مرة أجي مكان زي ده. كيلا: احكيلنا جيتي هنا إزاي. جنة ببكاء: أنا بابا وماما ماتوا، وعمي هو اللي جابني هنا. تالا: طيب متخافيش، إحنا معاكي. أسيل: أيوه، إحنا ممكن نكون صحاب. جنة: أكيد. كيلا: اسمك إيه؟

جنة: اسمي جنة. غزل بمرح: أول حاجة في قواعد شيلتنا، مفيش دموع ولا نكد، كله ضحك وهزار. وأنا غزل، ودي أسيل أختي، ودي كيلا، ودي تالا. أشطا؟ جنة وهي بتمسح دموعها: أشطا. عطيات صاحبة الملجأ: يلا وقت الأكل يا بنااات. جنة: هناكل دلوقتي. غزل وهي بتقلد عطيات: أيوه، ولازم تصحي الساعة 7 عشان تفطري، والغدا الساعة 12، والعشاء الساعة 6، غير كده مفيش أكل. أسيل: بس في عقاب. جنة: زي إيه؟ كيلا: يعني مثلاً مفيش أكل لمدة يوم كامل.

تالا: أو تقعدي في غرفة ضلمة. أسيل: أو تنضربي بعصاية. غزل: أو... جنة: كفااااية! يلا نروح بسرعة. وطلعت تجري وهما بيضحكوا وبيجروا وراها. *** عند سيف. صحى من نومه، أخد شاور، ولَبِس بدلته للتوجه إلى الشغل. بسرح شعره أمام المرآة، وفي نفس الوقت تفوق ريم زوجته. ريم: صباح الخير يا حبيبي. سيف: صباح النور يا كسلانة. ريم بدلع: فكرت في الموضوع اللي قولتلك عليه. سيف بضيق: إنتي عارفة رأيي كويس، مش موافق. ريم: لية بس يا حبيبي؟

سيف: إنتي بتقولي إيه يا ريم؟ إزاي عايزاني أتجوز واحدة تانية عشان أجيب منها طفل وأرميها؟ ريم: يا حبيبي، إنت عارف إن مش هقدر أخلف، لأن عندي مشكلة في القلب، وهي هتاخد فلوس وهتوافق. سيف: بس دي أنانية. ريم: لأ مش أنانية، أنا نفسي في طفل، والبنت هتكون موافقة، يبقى فين المشكلة؟ سيف: أنا مستحيل أوافق على الكلام ده. وسابها ومشي. ريم: يارب خليه يوافق، أنا عايزة سعادته. دخلت مني أم سيف. مني: مالك يا حبيبتي؟

ريم بحزن: سيف مش موافق إنه يتجوز، يا ماما. مني: عشان بيحبك، وصعب عليه إنه يعمل اللي إنتي بتطلبيه منه يا بنتي. ريم: يا ماما، عارفة، ودا اللي قتلني من جوايا. أنا بعمل كدا عشان أيامي معدودة، وعايزة أضمن إنه متجوز ومعاه طفل قبل ما أموت. مني حضنتها: بعد الشر عنك يا حبيبتي، ربنا يخليكم لبعض.