رواية بنت غير شرعية الفصل الخامس والعشرون 25 - بقلم سمسومة

قلعنا في طريقنا ساكتين شوية. طفى الغنا. قالي: "مالا حاطة راسك براسي؟ قتلو: "لي حلال ليك حلال عليا من اليوم. متحاسبني منحاسبك." قالي: "علاه تقدري تحاسبيني؟ قتلو: "علاه حتى نحاسبك؟ بصح كيما تعيش نتا نعيش أنا." قالي: "المقصود مفهمتكش." قتلو: "من اليوم ما يهمكش فيا معامن هدرت، ولا معامن خرجت، ولا حتى وين خرجت." ضحك. قالي: "شوف يا سيدي مليح." قتلو: "ايه." "ولا شفت روحك بدراهمك حاب تستعبدني؟ آه." "غلطت. دراهم باباك."

راح يضحك بهستيريا. قالي: "شكون قالك دراهم بابا؟ قتلو: "باينة. كون جيت تاعب عليهم والله متلعب بيهم هكا." قالي: "راكي غالطة. هذو دراهمي وتعبي. موش يوسف لي يتنعم بدراهم غيرو كيما قلتيها نتي. الله يسلم يديا لي جابولي وراني نحرر فيهم مش نلعب بيهم. غدوة نموت نموت شابع. منخليهمش من ورايا يتنعمو بيهم الناس." قتلو:

"كثر خيرك كي راك مخليني نتنعم أنا وأهلي بمالك. بصح حتى أنا منطمعش. بقالي هذا العام نكملو ونشد خدمة ونرجعلك دراهمك بالدينار." تبسم. زدت قتلو: "ولي حاب يحرر دراهمو يدير الخير وينساه ويروح يحج. يدير الفايدة. ميخسرهمش على الشراب والنسا." قالي: "يظهرلي غرتي." قتلو: "على واش نغير؟ بصح قتلك ونعاود. حتى أنا نعيش حياتي ونشوف واحد يحبني ونحبو." مجيت نكمل كلامي لقيتو غير قارا. جيفني وبقى يعيط: "مالا حابة ديري الواحد؟

أقسم بربي غير نذبحك من الوريد للوريد." ضاقت فيا النفس. عينيا خرجو. وجهي زراق. بالسيف باه طلقني. بقيت غير نسعل حتى قريب مت. زرب مدلي الماء. شربت. قالي: "الهدرة هذي متعاوديهاش ولا نقتلك." سكت. عاود قلع. كملناها سكات. ومدورة وجهي عليه. دخلنا لافيل قارا باش نتغداو. هو نزل وأنا لالا. شوية جا عندي. قالي: "هيا." قتلو: "مش جيعانة. تغدى غير نتا." قالي: "انزلي بركاي." قتلو: "مش نازلة."

عاود ركب وقلع ديراكت للدار. دخلنا لقيناهم كامل. تم سلمنا عليهم وقعدنا معاهم شوية. هوما يسقسو وهو يجاوب. أنا حرف منطقشتوش. قاتلي عجوزتي: "واش بيك؟ وقيلا زعفتي كي رجعتو؟ قالها: "انعم يما. كانت عندي لاشارج مخرجتهاش كامل. على هذا زعفانة." قاتلي: "معليش بنيتي. المرة الجاية تخلفوها ان شاء الله." قالي: "هيا نطلعو. علابالي تاعبة." نضت. طلعنا حنا فالدروج. حتى عيطتلو يماه. قالتلو: "ارواح معايا نحتاجك." قالي: "اطلعي ضوك نجي."

كملت لشومبرتي. كي دخلت حسيتها مبدلة. ولا منعرف. معلباليش علاش. حسيت كاين حاجة فيها مش نورمال.