رواية بسمة مدفونة في خيالي الفصل الرابع والأربعون 44 - بقلم ضاقت أنفاسي

**
جالس مع فياض وبحيره نطق: أنا ما عدت اميز الصح من الغلط...ما ادري ليه يشوفونها بهذا السوء و إنت معهم ؟!!!
فياض تنهد وهو يناظره: البنت عاشت حياة تختلف عن حياتنا ولما جاءت صار تصادم بينها وبين الموجودين!
هي تشوف نفسها ما عملت غلط وإنها مظلومة وحنا الظالمين!
إنت ما تشوف عيوبها لأنك مضطر تكمل معها فتغض نظرك عن تصرفاتها حتى تستمر حياتك معها !
رفع حاجب : وش تقصد؟!
فياض نطق : اقصد الشيء الي مخفيه عن الناس كلها
جراح احتدت ملامحه: وإنت كيف عرفت
قاطعه بتبرير: ترى هذه ما هي سالفتنا كيف عرفت ...
قاطعه بتوجس: احد يعرف
فياض بنصيحة: بالاول ظنيت تغاضيك عن تصرفاتها الحب معمي عيونك.الحين لما عرفت السبب تعجبت منك كيف امر مثل
قاطعه : صدقني إنت فاهم غلط!
أنا ما أشوف اغلاطها يعني احس انكم تزودونها عليها ...ما اتصور الحياة بدونها !
فياض رفع حاجب: ما تشوفها أنانية منك تربطها معك وإنت عقيم!!!!
وازنت الامور لقيتها فرصة تلقى وحده صغيرة ودكتورة وحلوة وتعيش معك ..معها بنت تكفيكم عن الانجاب وتربيها وكأنها ابنتك !!
فتح فمه للحظات بتعجب .ارتاح ظن انه فياض عنده علم بالسالفة لكن الظاهر ما معه خبر..بعدها نطق بتسلية: واكيد الحين رح تقول لها إني عقيم؟!
فياض وهو يناظره : ما هو من حقك تعمل فيها كذا ؟!
صدق إنك
قاطعه جراح بروقان: طيب واذا هي موافقه تعيش معي وراضيه انت وش إلي مضايقك !،
فياض بقهر من جراح: انا الي أقنعتها فيك ....كانت رافضة رفض قاطع ....اوهمتها انه أهلها اول ما تنتقل لهم رح يزوجونها بالغصب لأي واحد من عيال عمها ويجبرونها تترك دراستها ...هولت لها الموضوع وجعلتك البطل المنقذ لها !
انا كذا دمرتها كيف ازوجها من شخص عقيم ؟!
جراح ببرود : جالس تفكر فيها على الاقل عندها بنت !
وانا ؟!
كم صار لي متزوج وما سمعت كلمة بابا!
ما فكرت بشعوري!
فياض وقف بنرفزه: ما هو بالطريقة هذه !
ما توقعتك اناني كذا
ضحك جراح على انفعال فياض : انتظر لحظة ابو وسييييم!
طنشه فياض وغادر المكان بدون ما يلتفت عليه !

**
**
**
صفية عقدت حواجبها باستنكار: مستحيل !
انت متأكدة ؟!
ام فياض : ايه متاكدة سمعت فياض يتكلم بالجوال قبل شوي !
وانا اقول علامه ساكت على بلاوي هالبنت مضطر صعب يلاقي !
صفية بضيق من هالخبر: ما خلصت الدنيا يتعالج!
ام فياض : والله تضايقت لما سمعت هالخبر مسكين جراح إنسان طيب ومحترم وان شاء الله ربنا يرزقه!
صفية تنهي المكالمة: امين ...الحين اشوف ام راكان سلام!
ام فياض وهي تقفل الخط : مع السلامة !
وضعت الجوال امامها وناظرت الجازي الي جلست امامها وبضيق نطقت: صحيح هالكلام؟!
ام فياض هزت راسها: انا شفت فياض رجع متكدر والضيق باين عليه سألته وما جاوبني ...بعدها بوقت طلعت للحديقة كان يتكلم بالجوال ومنفعل ويقول « قلتلك يا جراح لا تتصل فيني ...للحين مب قادر اتصور انك خدعت رونق وتزوجتها وانت عقيم»
الجازي بتأثر مع جراح لأنها ضاقت معاناة العقم : مسكين جراح!
اكيد له علاج ..ليه ما يتعالج
رونق عندها علم ؟!
ام فياض بتفكير: اكيد عندها علم علشان كذا راحت لبيت ام مرعي زعلانه !
الجازي بضيق وقفت ما في شيء تقوله او تقدمه لرونق حبل الوصال بينهم انقطع وما عندها نية ترجعه حتى ما ترجع المشاكل من جديد ...اختارت حياتها الله يوفقها !
**
**
**
**
ام راكان بقهر: وانا اقول ليه ولدي ساكت لها !!!
ايه غصب عنه يرمي لها رأسه !
اخخخخ يالقهر!
أم لؤي ناظرت امها بتوجس: تكلمت مع جراح!
هزت راسها بالرفض : ما ابغى اتكلم معه يمكن يتضايق !
خليها الحين بس ما رح اسكت رح يتعالج وما اخليه تحت رحمة ذيك
سعاد باستغراب: جدتي صفية تقول رونق ما عندها علم !
ام لؤي : ا لا قالت جدتي صفية رونق عندها علم !
سعاد كشت عليها : اففف من عنادك !
ام راكان عقدت حواجبها بتذكر: بس هي من قبل قال جراح انها حملت واجهضت!
سعاد وقفت بتفكير: صحيح كيف صارت هذه!!
ام راكان : يمكن حتى يغطي على سالفة تأخر الحمل يمكن ما يبغى احد يعرف انه عقيم
ام لؤي بتحليل: معنى كذا رونق تعرف انه عقيم !
ام راكان : خليه يرجع البيت وانا افهم منه السالفة !
او لؤي عفست ملامحها واللقافة ذبحتها: بس جراح طلع خارج المنطقة
قاطعتها سعاد بإحباط: متأكدة؟
هزت رأسها بتأكيد: زياد قال
قاطعتهم ابنة سعاد: رونق رجعت
وقفت ام راكان على حيلها: شفتيها؟! مين رجعها؟!
هزت كتوفها بعدم معرفه: ما اعرف بس شفتها دخلت البيت وقدر راحت لها !
أم راكان تحركت وبنفسها «الحين بدأ التحقيق»
**
**
**
بدلت ملابسها وناظرت قدر الي جالسه تعاتبها : ليه ما أخذتيني معك ؟!!!
رونق تنهدت بتعب والمغص يزيد عليها وما لها خلق لثرثرة قدر: قدر خلااااص!
قدر مدت بوزها: انا زعلانه منك ... لانك نسيتيني وما عدت تفكرين فيني !
رونق ضغطت على بطنها بشويش لعله يخف المغص : جدك ابو جواد ما رضي يقول ممنوع انا وش دخلني!
ردت بقهر: الحين صرت تسمعين كلمة جدي !
بابا نايف يقول انك رفضت اروح
قاطعتها رونق بعصبية: لا تخليني اقول الله يأخذ هالبابا !
من زينه!
قدر عبست ملامحها: لا تتكلمين على بابا كذا
قاطعتها وهي عافسه ملامحها : جيبي لي موية !
قدر ناظرتها : تعبانه؟!
زفرت رونق بتعب: قدر وش فيك صايرة كذا ؟!
خرجت بانصياع حتى تحضر الموية....
رن جوالها ...ردت بهدوء : هلا جراح ....ايه وصلت..ما ابغى اغلبك....تعب بسيط يمكن من الطريق ....جدتي اعطتني عشبه اشربها تقول تريح من الوحام وتعب الحمل ...ليه ؟ ....طيب مثل ما تبغى ما رح اشرب منها ...التفتت للخلف لما حست بوجود احد ...تفاجأت من وجود ام راكان واقفه ...تكلمت بهدوء: طيب الحين اقفل. بعدين اكلمك!
انهت المكالمةووقفت وهي عافسه ملامحها وبنفسها«هذه وش جايبها وداخله لا احم ولا دستور»
ام راكان عقدت حواجبها : حامل؟!
زفرت رونق بتعب ما لها خلقها : انا
قاطعتها بهجوم : كذبة جديدة ؟!!!
انت وش الي تحسي فيه لما تكذبين بذي السوالف؟!
رونق غمضت عيونها تمسك نفسها ووجع بطنها يزيد عليها: خالتي انا ما ابغى مشاكل
تحركت من جنبها تطلع من الغرفة وهي تحس بسكاكين تنغرز ببطنها ..وقفتها ام راكان وهي تمسكها من يدها ودفتها للخلف : وين رايحه خلينا نتفاهم !
مسكت نفسها لا تسقط لاخر لحظة ...جلست على السرير بتعب ....مسكت الجوال ...ضغطت على اسمه واتصلت واول ما فتح خط تكلمت : يبه تقدر تمرني الحين....انا في البيت ...لا لا ما في شيء...
قفلت الخط وتكورت على نفسها من الالم ....رفعت راسها وملامحها منتفخة من الوجع ...اخذت العباية ولبستها وهي تصدر آنات من الالم الي يباغتها ..لفت الشالة بعشوائية ورجعت جلست على السرير وهي تحضن نفسها من التعب ..
ام راكان باستنكار من حالها: انت وش فيك ؟!
ما لقت منها إجابة ...تقدمت وهي تضع يدها على كتفها: رونق وش فيك!
رجعت خطوة للخلف برعب لما دخلت رونق بموجة بكاء عالية ...
التفتت للخلف لما دخل جواد وعيونه تسأل وش صاير !
ام راكان بحيرة: والله ما ادري وش فيها !!
تقدم جواد منها وهو يرفع راسها: وش فيك ؟!
روتق بصوت متقطع من الالم والبكاء: وديني للمستشفى!
**
**
**
ام راكان بغم من هالمصيبة: لا احد يكلم جراح !
عز الله الا تصيبه جلطه!
حامل وهو عقيم !،
استغفر الله استغفر الله!
راكان وجهه اسود من هالفضيحة: يمكن تعالج !
زياد بهدوء: ترى السالفة مو هينة انا اقول تكتموا على الخبر حتى نتأكد ترى النتائج رح تكون وخيمة!
ام راكان بهمس: استغفر الله استغفر الله !
ابو جواد اقترب منهم بعد ما سمع السالفة من سعاد ...وجهه ما يتفسر ...مب قادر ينطق حرف واحد!
راكان ناظر جواد بضيق : و
قاطعه ابو جواد : تأكدت من فياض؟!
راكان هز راسه : فياض يقول جراح ما انكر انه عقيم!
ابو جواد بحرص:: ما ابغى جواد يعرف بالسالفة حتى نسمع من جراح !
تركهم وتوجه لغرفة رونق ....استغربت دخوله عليها بملامح ما تتفسر ...وسألها بدون مقدمات: جراح يعرف بهذا الحمل ؟!!!
عقدت جواجبها باستغراب من هالسؤال ...وبتوجس ردت: ليه؟!
رد بقهر: لانه يا محترمة جراح عقيم !
تعرفي وش يعني عقيم ؟!
واهله كلهم يعرفون إنه عقيم والحين
قاطعته باستنكار لكلامه: انتم تطعنون بشرفي
قاطعها بغضب: انا ما اقذفك بس زوجك خبر فياض قبل كم يوم انه عقيم!
رونق شدت على أسنانها بغيض: فياض الله يلع
قاطعها بضيق: لا تلعنين ما تعرفين يقولون انه لعن المسلم مثل قتله!
والحين ريحي قلبي جراح يعرف بسالفة الحمل
ردت بملامح غاضبة: ايه يعرف
سكتت لما دخل وملامحه ما تتفسر نطق : رونق!
قاطعته بغضب: انت ولا كلمةوش الكلام الي خبرته فيه فياض!
انت بعقلك والا مجنون ؟!
تبغى الناس تطعن بعرضي انت
قاطعها بضيق وأسف: واقسم بالله ما قلت له كذا...هو فهم السالفة غلط انا
قاطعته ودموعها بأي لحظة تنزل من القهر : لا تكلمني
قاطعها ابو جواد بحزم: وبعدين معك ؟!
صار سوء تفاهم كلمي زوجك مثل العالم والناس احسن ما اعدل ملامحك !
ردت بقهر من جدها: ما ذبحتنا الا عاد
سكتت لما دخل جواد بعد ما وصله الكلام وملامحه ما تتفسر ...ناظر جراح وماسك نفسه ما يصفقه وبنبرة غاضبة: وقسم بالله لو
ابو جواد قاطعه: خلاص انتهت السالفة سوء تفاهم!
اعطى جواد جراح نظرات نارية ...تقدم من رونق ونطق وللحين الضيق ملازمه: كيفك الحين ؟!
هزت رأسها والضيق يكسو وجهها : الحمد لله!
تنهد جراح وهو يشوف ملامحها يكسوها التعب والضيق والكدر!
ابو جواد وهو يتحرك للخارج: ان شاء الله ربنا يعوضكم!
جواد مقهور من الكل وبلوم لرونق:أكيد اجهضت من طريق هالقرية... وانت يا حضرة الدكتور مثل الخروف وين ما بغت تسحبك خلفها!
انا قلت لك من قبل لا ترسلها لذيك القرية
قاطعه جراح بقهر من تدخله: وأنا قلت لك لو تبغى اسفرها على المريخ ما رح أقول لها لا!
جواد بغضب: جراح ترى والله ماسك نفسي عنك وعن الزفت فياض بصعوبة فاختصر افضل لك!
رونق بقهر من تدخلهم بحياتها: ما احد يقدر يمنعني عن جدتي ام مرعي
قاطعها بغضب: انكتمي.... اعوذ بالله من لسانك!
سحب نفسه وغادر المكان!
جراح بضيق :يا لطيف ما ينطاق بتدخلاته ....اشغلوني بسوالفهم ونسيت اطمئن عليك.كيفك الحين؟!
ناظرته بقهر وصدت عنه بزعل : لا تكلمني !
ضحك بخفه: يا حلاة الزعلانين ..خلاص رونق فكي الكشرة ما تدرين لما وصلني الخبر جيت مثل المجنون ....ما تتصورين خفت افقدك !
ما ابغى عيال اذا رح افقدك بسببهم !
ردت ودموعها تنزل : ما توقعت افقد الجنين
قاطعها بملامح حزينة:لا تقولين كذا ...ربنا خلقنا وهو اعلم بالخير ... ما احب اشوف عيونك كذا ذابلة وحزينة!
ردت وهي تمسح دموعها :وش سالفة فياض؟!
اعتدل بجلسته بابتسامه باهته : الحين اقولك السالفة

**
**
**
**
بالصالة مجتمعه ام راكان مع عيالها وبقهر ناظرت سعاد بقهر: انت لسانك متبري منك !
ما تعرفين تتكلمين؟!
قلت لكم ما ابغى جراح يعرف ومع ذلك عاندتي و اتصلت ووصلت الكلام وما اكتفيت بكذا نشرت السالفة في بيت ابو جواد
قاطعتها بقهر:ابغى افهم وش
راكان بحدة: خلاص انكتمي!
صفية تنهدت: الله يسامحه فياض ما يتأكد قبل ما يتكلم
زياد: والله اللوم على السيد جراح كيف يسمح له يغادر قبل ما يبين له السالفة هذه السوالف ما ينمزح فيها
سعاد غادرت وهي مولعه من الداخل وكره رونق كل يوم يزيد ...واكثر شيء قهرها وهي تشوف جراح يعتذر لها ويراضي فيها وحضرتها ما هي معبريته وهو مثل الخروف يرتجي فيها ...اخخخ يالقهر ليه حظ رونق كذا ليييييه ؟لو تموت ما عبرها نايف او اهتم لها او اعتذر حتى لو غلطان !
وش تختلف رونق عنها ؟!
وش هالحظ الي لها !
لكن مستحيل تسمح لها تتهنى وهي جالسه تشوف اخوها ذليل تحت رجولها !
حتى امها رضيت بأرض الواقع بعد هالسالفة ....اخخخخ يالقهر!
**
**
**
مرت الايام
واليوم غير عن كل الايام تحس نفسها مثل الفراشة تتطاير من زهره لزهرة ...والنظرات عليها ...بعد تعب سنوات تخرجت من الجامعة وأقام لها جراح حفلة كبيرة بهذه المناسبة ....توزع نظرها بين الحضور حضنت يدينها لصدرها وبداخلها مشاعر حزينة وهي تبحث عن شخص واحد فرحان لها من قلبه ....تشعر بالاسف كل الحضور ما تعني لهم شيء ولايفرحون لفرحها مجرد تأدية واجب ...غير بيت حماها الي متحملينها فوق الجوزه وما هم قادرين يبلعوها .......الجازي في هذا الوقت مسافرة وما هي موجوده ...يا ترى لو كانت ما هي مسافرة رح تحضر اكبر فرحة بحياتها؟!!!!!!
تنهدت بخذلان استخسرت فيها مكالمة او رسالة تبارك لها!
عمر المحبة ما كانت شعارات نرفعها .... الحب شيء نابع من الدخل يدفع بنا نبذل كل وسعنا حتى يبقى الشخص الي احببناه بسعادة ..نبتسم لابتسامته نزعل على زعله نفرح بنجاحه وكأنه حنا الي حصلنا على الشهادة .... ننكسر من الداخل اذا انكسر وما نكتفي بالنظر والشعور بالوجع .. نجبر هالكسر بيدينا وما نرتاح حتى ترجع البسمة لثغر المحبوب!
امالت رأسها بأسف لحالها مع امها!
تمنت تكون روعة معها لكنها اليوم خطوبتها ..فرحت لها من كل قلبها تتمنى لها السعادة والتوفيق!
كانت لها الأخت الي ما انجبتها امها!
ابتسمت وملامح ابوها بمخيلتها ...مشتتة بين فرحته بتخرجها وبين وظيفتها الي رافضها ما يبغاها دكتورة!
رفعت نظرها لام جواد الي تكلم بعض الحريم وتؤشر عليها بفخر بالرغم من علاقتهم السطحية !
رجعت توزع نظرها بالقاعة وتبتسم وكلام ابو جواد يتردد باذنها بعد ما رفض يحضر حفل التخرج وما بارك لها وهو يردد «ما قدرتم لها قبل ما تصير دكتورة عيل الحين مين يقدر لها بعد ما صارت دكتورة »
ما يهمها كلامه خلاص ما بقى شيء ورح تسافر هي وجراح وقدر ورح يستقلون بحياتهم بدون منغصات!
**
**
*
واقف عند النافذة في صالة اهله الدور الثاني ويناظرهم بالحديقة يتمشون ويضحكون ويمسك بيدها وكأنه خايف تهرب منه ....الي يشوفوهم يظنهم عرسان ولا كأنهم مر على زواجهم سنوات!
وش سر تعلق جراح فيها؟!
مط شفته من بعد سالفة الحمل رفعت أمه راية الاستسلام وأصبحت الاوضاع شبه طبيعية ....والحياة تمر بسلام ما في مشاكل وان كانت لا تخلو من النغزات !
ما رح تمر الحياة بسلام بعد ما انجبت مريم البنت رقم 6
....راكان ما رح يرسيها على بر حاول فيه الا انه معند ورأسه يابس!
**
**
*
بعد مرور وقت على تخرجها
بعد المغرب جالسه في بيت جواد وتناظر مريم الباكية وهي تتكلم بمرارة
جواد بقهر: ما هو على كيفه يتزوج
رونق رفعت حاجب بتعجب حلال عليه وحرام على غيره : يعني حرام ؟!
قاطعها جواد بعصبيه: انت بالذات انكتمي!
مريم بصوت مبحوح من كثر البكاء: اكيد جايه تتشمت فيني!
رونق عفست ملامحها بضجر: ترى اذا موجوده بالكون ما ادري عنك !
جواد بقهر: انا بناتي ما اسمح لاحد يزعلهم وخاصة مريم !
يتزوج من هنا ورقة الطلاق تكون واصلة هنا
رونق: مو هذا الزوج الي بعتيني علشانه!
مو هذا الزوج الي حاربتيني علشانه وقلت مب مستعدة اخسره علشانك!
اشوفك الحين
قاطعها جواد بقهرمن فلسفتها: انت ما تعرفين تنكتمين!
وبعدين يكون بعلمك وقسم بالله اذا ما طلع راكان فكرة الزواج من راسه الا اسحبك من عند جراح ونايف يطلق سعاد
قاطعته ببرود: انا لا تدخلوني بحساباتكم!
لاني ما افرط بجراح
ضربها بالخدادية بغضب: انا ما اعرف هالجراح عامل لك حجاب!!!
ردت بابتسامة عريضه: ربي يسعده وين ما توجه !
وقفت وهي تنادي قدر: قدر قدر
التفتت على ابوها قبل ما تطلع : أرجع واكرر انا وجراح ما تدخلوني بحساباتكم!
وبعدين الرجال يبغى ولد!
هذا المتعلم الفهمان !
قولي زوجك شايف له شوفه ويتحجج
قاطعتها مريم بقهر: انكتمي الله
قاطعتها الجازي وهي تمسك يدها: خلاص يا مريم !
جواد اشر لرونق: روحي عند هالجراح نشوف اخرتها مع عيال عمي!
غادرت رونق وبداخله نار تشتعل وهو يشوف مريم دوبها وردة مفتحه وبرقبتها 6 بنات ويتزوج عليها ...ابد ما يرضاها!
بلع قهره وطيف الجازي يمر بمخيلته وشعورها لما خدعها وتزوج عليها بدون علمها ...على الاقل راكان ما اخفى السالفة!
ومن القهر مب قادر يتحكم باعصابه مسك كوب الموية وضربه بالارض بكل قوته!
**
**
**
**
**
**
**
**
جراح بتنبيه: رونق خففي زيارتك لجواد ...والله اخاف يلعب بعقلك او يرفض يرجعك عندي
قاطعته بابتسامة وهي تجلس على احد المقاعد بالحديقة: لا تخاف ما احد يقدر يفرقنا!
انا وإنت
سكتت وهي تسمع صوت ام راكان تنادي على جراح !
هزت راسها : تعال ندخل نشوف خالتي!
هزراسه ودخل ....ناظر قدر جالسه وعيونها بالجوال!
ام راكان بضيق: وينكم ترى زمان جاءت قدر!
جراح وهو يجلس: كنا برا!
ام راكان وهي تناظر رونق تجلس بهدوء: ما صار شيء!
رونق وعلاقتها بأم راكان سطحية ردت بهدوء: ما صار شيء!
ام راكان بضيق: والله مريم حبوبة وما تستاهل كذا !
وش الي غير راكان كذا!
اخبره يحبها ويعزها يقول لو يلف الدنيا ما يلقى مثلها ادب وأخلاق وسنع !
رفعت نظرها رونق حست انها تنغز عليها !
جراح هز كتوفه بقلة حيلة: الله يهديهم!
ام راكان بتوتر وخوف: والله اخاف تكبر السالفة ويطلق نايف سعاد
قاطعها جراح بقوة: ترى من الحين انا ورونق حياتنا ما لها علاقة بهذه الخلافات!
ام راكان مطت شفتها: هذا الي يهمك!
وبنفسها يا ليتها كانت رونق الي زعلانه ما هي مريم !
**
**
**
بمكتب راكان
جواد بغضب من راكان: انا الغبي الي اعطيتك ابنتي!
اعطيتك مريم النسمة الرقيقة الي ما تجرح ...ليه تجرحها يا راكان !
كذا هانت عليك مريم بهذه السهولة؟!
راكان بهدوء: انت تعرف معزة مريم عندي وما ابدلها بكل حريم العالم!
جواد قاطعه بقهر: لو تعزها ما قهرتها!
لو تشوفها ما تعرفها من الحزن والقهر!
راكان يعقد صفقه: اقدر اتنازل عن سالفة الزواج بشرط واحد !
جواد ارتخت ملامحه مستعد ينفذ طلبه مهما كان مقابل مريم ما تنقهر: وانا موافق على الشرط مهما كان !
راكان بشبح ابتسامه خبيثة: شرطي هو طلاق رونق!
عقد حواجبه باستنكار:وش تقول؟!!!!
راكان وهو يحرك القلم ببرود وبداخله كره لرونق مستحيل يقبل انها تنتصر عليهم وتأخذ جراح منهم ...لزوم يتحرك قبل ما يسافر جراح : اذا طلق جراح رونق انا مستعدالغي الفكرة للأبد
قاطعه بقهر: ترى إذا ناسي هذه ابنتي وهذه ابنتي!
راكان بخبث: بس ما في بينهم مقارنة !
مريم الي الكل يمدح بأخلاقها مريم الي دوم تسمع كلامك ودوم تتفقدك وما تقدر تبعد عنك الا لما تتطمئن عليك برت فيك بصغرها وبشبابها !
عكس رونق الي الكل يذمها ...رونق الي وقفتك بالمركز رونق الي تزوجت بدون علمك ...رونق الي ترد لك الكلمة الف...رونق اذا انت موجود على الكرة الأرضية ما تدري عنك !
ما في وجه مقارنه بينهم أبدا !
جواد غلفه السكوت للحظات وهو مقر فعلا ما في وجه مقارنة بينهم!
راكان يتابع كلامه: ومع ذلك رونق ما معها اطفال يعني لو طلقها جراح ما في مشكلة دكتورة وتلقى ابن الحلال اما مريم معها 6 بنات مين يقبل فيها ؟!
انت باصرارك تدمر مريم !
جواد بخفوت: على وش ناوي!
راكان باصرار لزوم يطلقهم قبل ما يسافروا ما رح يقبل ينحرق قلب امه على فراقه ...بالبداية سكت اما انها توصل للسفر !!!
تمادت رونق كثير وهو الي رح يوقفها عند حدها
ما رح يسمح بهذا الشيء أبدا!
**
**
**
بعد يومين
رونق ابتسمت وهي تضع الأغراض : كذا كل شيء جاهز !
جراح ناظر امه بابتسامة: توكلنا على الله!
ام راكان خاطرها متكدر على مريم ...قرروا يطلعوا لبيت صفية يغيروا جو!
رونق جلست جنب قدر بابتسامة: مبسوطه؟!
قدر هزت رأسها وهي تناظر من الشباك بعد ما حرك جراح: مبسوطه!
رونق تنهدت براحة ما بقى شيء وتترك هالمكان وتسافر بدون رجعة ما رح ترجع لهذا المكان أبدا ...حياة جديدة مع جراح وقدر بدون منغصات ....حمدت ربها بعد ما وعدها نايف إنه رح يترك قدر معها !
رفعت نظرها لام راكان وهي تتكلم مع جراح: كيف يقبل يدمر بيته !!
جراح : لا تشغلي بالك يا يمه !
ام راكان ناظرته: وانت لمتى جالس كذا بدون عيال!
ابتسم ما يبغى يخبر احد بحملها حتى يثبت الحمل : يا يمه ملحقين على العيال خلينا نعيش حياتنا!
بعد وقت وقف جراح امام بيت صفية ...تنهدت رونق وهي ما لها خاطر بهذه الزيارة بس علشان جراح اضطرت تروح معهم!
وقفت بتردد وهي تشوف وسيم واقف برا مع واحد من العيال ...تأكدت انها الجازي هنا!
ما لها قلب تلتقي فيها بعد هذا الانقطاع بينهم ...دخلت على مضض وقدر متمسكه بذراعها: ماما وسيم هنا ...يعني ماما الجازي هنا! ياااااهووووو
مطت شفتها رونق: انتبهي لا يطق لك عرق!
قدر ضحكت: أحبها!
دخلت عند الحريم بعد ما قال لها جراح تدخل .....قلبها يدق بقوة بعد ما لمحت الجازي موجوده ...تقدمت من صفية وسلمت عليها وبعدها على زوجة ابنها ...مدت يدها لام فياض الي جالسةوما كلفت نفسها توقف بوجهها بس اكتفت تمد يدها ببرود تسلم وكأنها مجبره.... رونق طنشت حركة أم فياض ....كتمت بداخلها الضيق وهي تشوف الجازي تطلع من المكان بحجة إنها تتكلم بالجوال .....تحس بالفشيلة من موقفها وخاصة قدام اخوات جراح ومنار!
جلست بهدوء ولا كأنه صار شيء !
بعد وقت دخلت الجازي جلست في الجهة المقابلة لرونق!
حز بخاطرها تصرف الجازي ..لذي الدرجة كارهيتها ...السلام لله.....نزلت رأسها بتفكير حتى تقوم تسلم عليها ...لكنها كنسلت السالفة خافت تفشلها قدام الموجودين ..ويمكن للحين مانعها فياض عنها
..قررت تقوم من هالمكان تشوف قدر ما دخلت معها!
وهي مو منتبه للنظرات التي تتبع حركاتها بدقة !
خرجت وهي تبحث عن قدر ....انفزعت لما خبرها واحد من العيال انها راحت للبقالة !
تحركت للخارج بعد ما سالت عن مكان البقالة ...تخاف تضيع او يصير لها شيء!
قبل ما تدخل البقالة لفت انتباهها الحرمة الي مرت من جنبها وسرعان ما سقطت على الأرض!
اقتربت منها بفزع : وش فيك!
ردت بصوت متقطع متعب: اسنديني يا ابنتي مب قادرة اسند طولي!
ساعدتهارونق برفق: لحظة اشتري لك علبة موية
قاطعتها : لا يا ابنتي هذا بيتي بس ساعديني ادخل وربي يجزاك كل خير!
ترددت بداخلها ...لكن سرعان ما تقدمت لما رجعت واشرت على بيتها ما يبعد الا كم خطوة عنهم !
تحركت معها لداخل البيت .....كان بيتها بسيط لكن ما تدري اول ما دخلت شيء غم على صدرها ....دخلت اول غرفة ....جلست الحرمة بتعب وهي تتنفس بصعوبة: اذا ما في غلبة ابغى مويه من المطبخ وعلبة الدواء على الطاولة!
رونق شيء كاتم على صدرها تبغى تخرج من هنا ما هي مرتاحة وضعت حقيبتها وتوجهت للمطبخ مكان ما اشرت لها !
رجعت لها ناولتها الموية والدواء ..تحركت تغادر المكان! **
**
**

جالسة بابتسامة مزيفة وهي ترد : والله
مريم بشماته: عاد تكسرين الخاطر ما ذبحك إلا جراح الي طول وقتك تتغني فيه بس كيف وصلت فيك تسحريه لذي الدرجة الحب معمي عيونك !
رونق ضحكت من وراء قلبها: غبية إذا ظنيت جراح يتخلى عني!
جراح ما يقدر يبعد عني
قاطعتها بسخرية: نشوف!
رونق بسخرية: ايه نشوف على الاقل انا مو مثلك عندك 6 بنات ورماك وراح يطق فوق راسك ضره!
انت الي تكسرين الخاطر!
مريم ردت بأمل يتصلح الوضع: رح يرجع لي راكان ورح تشوفين ...لا تنسين كل اهله معي وخالتي زعلانه منه بعكسك انت خالتي كل يوم تنتظر خبر طلاقك وهي ناذره الا تزغرد وتعمل حفله بهذه المناسبة .....
رونق كلامها ضربها على الجرح !
نفسها تعرف مين الي خطط لذي السالفة !
كيف تبرئ نفسها ودليل الادانة بحقيبها !
طنشت مريم وانشغلت بالجوال وعقلها يفكر بجراح مر اسبوع وما عبرها!
معقول صدق فيها!
كيف ما يصدق ودليل الادانة مسكه بيده!
رفعت نظرها للحظات على دخول جواد ....ورجعت تنشغل بالجوال!
جواد يناظر بناته بضيق وهو يشوف حياتهم تدمرت .....ما هو مصدق كيف رونق تعمل كذا ؟!
يعني ما اكتفت بتدمير حياتها ..دمرت حياة مريم الي راكان يبحث عن عروس للحين !
يقدر ينقذ حياة مريم إذا طلق جراح رونق ...المشكلة جراح من بعد ذيك السالفة ما احد شافه وجواله مغلق ومقدم اجازة بالشغل!
ناظر رونق بحقد عمرها ما رح تصير بني آدمه .....مسك نفسه بصعوبة ما يكسرها لأنها حامل يخاف تجهض ويحمل ذنب نفس بريئة ...لكن رح يربيها من اول وجديد بس خليه بالاول يحل مشكلة مريم وبعدها يتفضى لها !
مريم ناظرت ابوها: اجيب لك يبه
قاطعها وهو يجلس : ما ابغى شيء!
جلست الجازي جنبه : اليوم خالتي راحت للمستشفى!
جواد هز راسه بضيق: ايه عندي علم .
رونق رفعت نظرها بهدوء وهي تسمعه يتكلم مع الجازي باندماج عن وضع ام جواد الصحي .... تغلف نفسها من الخارج بهدوء ظاهري حتى تثبت لهم ما في شيء يكسرها ويا جبل ما يهزك ريح!
وبداخلها خذلان من كل الي حولها ....الكل صدق سالفة السحر لأنه صاحب الفكرة طبقها بكل اتقان بدون اي غلطة وهي مثل الغبية وقعت بالفخ بكل سهولة !
جواد من يومها مقاطعها ولسانه ما يناطق لسانها بعد ما سمعها كلام يسم البدن ......امالت شفتها بسخرية وهي تتذكر موقف الجازي البطولي ...تنهدت بضيق وهي تطرد هالذكريات المؤلمة!
ابتسمت على دخول قدر الوحيدة الي للحين ما تغيرت عليها صغيرة وبعدها ما تفهم شيء: ماما في اسئلة بالواجب مب قادر افهمها
هزت رأسها بابتسامة وهي تتحرك للغرفه: تعالي!
بعد مغادرتها تكلمت مريم بقهر وهي تبكي: الحين بعد سالفتها أكيد رح يصمم راكان على زواجه .....انا وش ذنبي؟!
قاطعها بمواساة : انت يا مريم رمز البراءة والطهارة وراكان يعرف هالشيء ما رح يأخذك بذنب رونق ....لا تنسين هو قرر الزواج قبل هالسالفة!
وبعدين ليه راميه نفسك عليه كذا ؟!
هذا انت جالسه في بيت اهلك معززة ومكرمة وبناتك ما رح ينقصهم شيء!
خليه رح ييجي يوم ويرتجي حتى يرجعك
قاطعته مريم ببكاء: وقسم بالله لو يعملها صدق ويتزوج علي ما اجلس على ذمته دقيقة!
الجازي تنهدت: بس هو رافض يطلقك !
مريم بقهر: جدتي ام جواد تقول هذه حوبة الجازي ظلمتها وهذا حنا طحنا بحلقك!
جواد زفر بضجر من هالسالفة وهو يتجرع كأس العلقم وهو يشوف بناته بهذه الحالة وما هو قادر يساعدهم !!
وقف وهو يراجع حسابته ....ما ينكر انه ظلم الجازي وما حاول يتفهمها وهي بنفس الوقت كانت تصرفاتها تنرفز....ومع ذلك ظلمها بحرمانها من مريم وحرق قلبها والحين قلبه محروق ومشتعل على بناته ..حتى اعز صديق له جفاه وقسى عليه !
زفر بضيق وهو يردد بنفسه لزوم يعمل هالشيء لعل وعسى حال مريم يتعدل!
*•
**
**

الجازي بقهر من رونق وكيف سولت لها نفسها تعمل كذا: .والله يمه وقتها حسيت نفسي بحجم النملة من الاحراج قدام الموجودين رونق تعمل كذا!
دانا بضحكة: عاد انت بحجم النملة بدون احراج
قاطعتها الجازي بضيق: دانا والله مب رايق لسخافتك!،
حنين بهدوء: غريبة للحين ما طلقها !
الجازي تنهدت: ما ادري ...بس اهله قالبين الدنيا عليها ...كيف تسحر ولدهم!
سمية بانتقاد: بس انت كيف تضربينها قدام الكل!
مهما ابنتي غلطت ما اهينها او اضربها قدام الناس بيني وبينها اتفاهم
قاطعتها الجازي: لو كنت بمكاني ابنتك
قاطعتها حنين بانتقاد: ما ربتيها او اعتنيت فيها حتى تنقهرين ...تراها ابنتك بالاسم فقط و ما لك حق تتدخلين بتصرفاتها لا انت ولا جواد !
وبعدين على طول صدقت السالفة !
يمكن احد مدبر لها هالفخ لا تنسين ما احد يبغاها
الجازي ترفض هالفكرة : مستحيل ...صدقيني ما توصل لذي الدرجة انا كنت موجوده ما شفت كيف الصدمةوالقهر ظهر عليهم من تصرفها ... ام راكان شبه فقدت الوعي من هول الصدمة !
تدرين زياد هجم حتى يضربها لولا فياض تدخل اخذها وغادر فيها المكان!
دانا باندماج:طيب جراح ما تكلم؟!
وش رد فعله؟!
الجازي هزت راسها بأسف: مسكين لو تشوفينه وكأنه صنم ....بدون حركة وكأنه ما هو مستوعب الي صار!
حنين مطت شفتها: ما ادري احس السالفة مو راكبه فيها شيء ما هو مقنع !
الجازي ناظرتها باستفهام: كيف يعني!!!
حنين هزت كتوفها: ما ادري بس السالفة كلها ما دخلت راسي!
يعني رونق وش عرفها بام خلف ؟!!
صدقيني في جزء من النص مفقود في حلقة ناقصه!
الجازي زفرت بضجر: والله احيانا احس يصيبني صداع من كثر التفكير في السالفة!
سمية: طيب فياض وش يقول!
الجازي : وش رح يقول يعني!!...لما ارجعها يقول ما نطقت حرف واحد والسكون متلبسها يعني لو تفكرين لو واحد مكان فياض ما ناظرها ولا اهتم لامرها ...ما شفتيها كيف دفت يده بقرف وقتها قدام الكل وهي تصرخ بوجهه وكأنه بزر... ومع ذلك كان الوحيد الي حماها وابعدها عن المكان !
سمية هزت رأسها باسف: وش استفادت من هالشيء...تظنين جواد رح يرحمها ؟!
ليه ما اخذها فياض
قاطعتها الجازي بوجع: عمي ابو فياض حلف يمين ما تدخل بيتنا يقول وش يضمن انها ما تسحرنا !
الي يقهرني ما قدرت ادافع عنها او ابرر لها والدليل قدام الكل ...الله يسامحك يا رونق ما تقدر تعيش بدون مشاكل !
**
**
**
**
جالسة تصلي سلمت من الصلاة ...غمضت عيونها وهي ماسكه نفسها بصعوبه من كلامه: تصلين !
ما شاء الله! اول مرة اعرف انه السحرة يصلون !
استغفر الله انت ما تعرفين وش اثم الي يروحون لهذه الاماكن استغفر الله!
عاد والله اخاف تعملين لي سحر
قاطعته بقوة: تعرف تنكتم وتنقلع برا!
تراك مب صغير وهذا كلامك !
رفع حاجب وهو يتقدم منها وناوي الشر: والله!
وانا على بالي بعدني صغير!
وبحده حط وجه امام وجهها لما وقفت : رونق ترى قلبي مليان عليك ...بس انتظر اللون الاخضر حتى اطلع القديم والجديد ...وخشومك ذول الي رافعيتهم على غير سنع وعد مني الا اكسرهم بس انتظري!
دفته عنها بقرف وبنبرة ساخرة: ايدك وما تطول!
سرعان ما رجعت للخلف لما رفع يده يضربها ...تنهدت لما نزل يده بعد صرخة جواد: عبدالله !
تقدم بملامح متجهمة: انا كم مرة قلت لك اختك لا تقرب صوبها
عبدالله بقهر من ابوه: يبه عاجبك هالموقف الي حنا فيه!
قاطعه جواد بصرامه: خلاص انتهينا!
اعطاها نظرات متوعده وغادر المكان....تنهد جواد بعد ما غادر عبدالله ...وبنبرة عتاب: انا وش قصرت معك حتى تجازيني كذا ؟!!
تكلمت بخذلان يغزو روحهامن الكل: وش قصرت ؟!
قول وش قدمت لي ؟!!!
ضيعتوني وانا بالمهد ما لكم حق تلوموني بشيء....
قاطعها بغضب من النقطه الي واقفه دوم عندها:انكتمي يا ليتك كنت البنت الي دفنتها ...وش رجعك بعد هالسنوات ....ما شفت منك الا وجع الرأس ...الله يآخذك وارتاح منك ومن بلاويك لأني خلاص ماعدت اقدر اتحمل منك شيء ثاني اكتفيت..... ارحمي شيباتي واعقلي يا رونق!
طاحت دمعه من عيونها بعد ما غادر ......ما احد مصدقها!!! في هذه المرحلة ما له داعي تقضي وقتها بالتبرير ما يهمها يصدقوها او لا !
الاهم إنها واثقه من نفسها ...رح ييجي يوم ويندموا لكن وقتها يكون فات الأوان وما يعود لاعتذارهم طعم !
**
**
**

ام راكان سورة البقرة 24 ساعة مشغلة ....تنهدت بتعب وهي تدعي على رونق: حسبي الله عليها بسببها ما ادري وين جراح !
ام لؤي بضيق: ما الومه يمه !
اكيد للحين مصدوم من البنت الي حبها من كل قلبه !
البنت الي باع اهله علشانها!
تعمل كذا ؟!!
اكيد تلقينه الحين يبغى يستفرد بنفسه ويراجع حساباته ومن اول ما يرجع رح يطلقها!
ام راكان : يقولون حامل!
ما نبغى منها ذرية وش رح يطلعون يا حسرتي!
نصحناه لكنه ركب رأسه بالعناد وش استفاد الحين ؟!
دخل زياد وملامحه ما تتفسر ....وقفت ام راكان بفزع: وش صار؟!
زياد جلس ومسح وجهه بهدوء: لا تخافي جراح بخير ....لقيناه!
ام لؤي: اجل وينه؟
رد بضيق: جراح الي ما تعرفوه كان مرتب اموره حتى يسافر لبرا مع رونق وكان المفترض البارحة يسافرون ...
ام راكان : وش تقول؟! لا تقول إنه
رد بأسف: جراح سافر البارحة ...واليوم ارسلي رسالة يخبرني هو بخير
ام راكان نطقت بصدمه: حسبي الله ونعم الوكيل برونق!
كيف يتركني ؟!
نطق : يقول اذا تبغين تشوفينه تقدرين تسافرين له ...ما يبغى يرجع هنا رح يستقر برا!
ام راكان بضيق من الحال الي وصلوا له : اخخخخخ انا رح تصيبني جلطه من اخوانك!
الحين هذا هو الحل يروح يهد المكان علشان ست الحسن والدلال !!
واخوك للحين يبغى يتزوج وجواد وابوه يرعدوا من هنا!
ونايف يهدد اذا تزوج راكان الا يطلق سعاد !
مط شفته زياد بجعرفه: عاد من زينه !
ا م راكان بقهر: انت متخيل تتطلق سعاد للمرة الثانية؟
الناس رح تأكل وجوهنا!
لا تنسى اخوك معه ست بنات افرض رمتهم عليه !
وبعدين زوجته صغيرة يعني العمر قدامهم !
ارحموني خلاص ما عدت اتحمل اكثر من كذا !
وبعدين اخوك هج وترك العلة خلفه على ذمته وحامل؟!!!!
زياد رأسه مصدع من السالفة: اتصلي فيه اذا فتح جواله
وتفاهمي معه !
***
**
**
جواد بغضب : ما في طلوع من باب البيت تفهمين والا لا ؟!
لا وظيفة ولا بطيخ !
بعد سواد وجهك لك عين تطلبين
قاطعته بقهر: انت تسمي نفسك اب ؟!
ما رح اسامحك طول حياتي انت وامي !،
ما تتصور الخيبة الي اتجرعها منكم ....وتلومني في حبي لجدتي ام مرعي!
لو جدتي هنا كان قفلت حلق كل واحد يتكلم علي وما سمحت لاحد يوجه لي هذا الكلام!
انا ما اعرف مين الي أنتج هالفيلم وللاسف. نجح بكل سهولة لأني كنت غبية وعبيطه لما ظنيت انه الناس بعدها بخير !
انا بعمري ما غلطت بشيء وما تهمني نظرتكم لي ...لاني بكل بساطه واثقه من نفسي ...لكن يحز بخاطري الخذلان الي تجرعته منكم !
وظيفه ورح اتوظف ما تعبت كل هالسنين علشان بكل بساطه تقولي انطقي بالبيت !
انا مب صغيرة حتى تتحكموا بحياتي ....للحين اتكلم معكم باحترام وساكته لكن يكون بعلمك سكوتي ما رح يطول !
ما رح يطول ...اعطته نظره تحدي وتوجهت للغرفة !
**
**
**
**
ابو جواد بغضب : مجنون انت كيف تطلق ابنة عمك وليه تدخل نفسك بالسالفة:!
نايف والفرصة جاءته على طبق من ذهب: هذا اقل شيء اقدمه لرد اعتبار لبنات اخوي!
ام جواد معصبة رأسها من الصداع : لا حول ولا قوة الا بالله!
ترى راكان للحين ما خطب تقوم تطلق أخته؟!
اذا جراح بعد سواد وجه رونق ما طلقها تقوم انت تحشر نفسك وتطلق زوجتك ؟!
ما فكرت بعيالك ؟!
نايف بروقان : العيال عند امهم !
بدر مط شفته بضجر: والله ما ادري وش الحل مع هالمشاكل...الي يذبحك مريم الي معها 6 بزران!
ابو جواد بقهر: لو يرجع جراح ويطلق رونق يمكن راكان يكنسل فكرة الخطوبة !
نايف : انا سمعت انه ما سافر كذب على اهله يبغى يبعد عنهم ويريح اعصابه!
المهم طالع الحين عندي بعض المشاغل
ابو جواد بقهر من تصرفاته: انقلع رجع زوجتك ولا تعقد الامور!
نايف ببرود : يصير خير!
ابو جواد بقهر: اخخ يالقهر اصعب شيء لما تكون مربوط من يدينك وما تقدر تعمل شيء ...نفسي اكسر رأس هالرونق بس الي يذبحك حامل!
**
**
**
**
قفلت الجوال بقهر جواله للحين مغلق ....كيف تقدر توصل له ....لزوم يسمع منها
حست بالإحباط كيف تقنعه صعب صعب !
مهما كان اختيار جراح ما رح تزعل منه وتلومه لانه شاف بعيونه وصعب يكذب عيونه!
لكن شيء بداخلها يردد «كيف يتركها بهذا الموقف و كيف صدق فيها وهو يعرفها عاشت معه ما هو يوم ويومين عاشت سنوات لذي الدرجه ما يثق فيها ؟؟؟»
بس بداخلها امل ما رح يتخلى عنها جراح هالشيء متأكده منه !
مجرد فترة يحتاجها جراح وبعدها رح يرجع لها!
طلعت من الغرفة وناظرت مريم جالسه واضعه يدها تحت خدها بحزن وهي تناظر بزرانها ....ما تنكر بالرغم من علاقتهم السيئة الا انه يحز بخاطرها حالها ..مريم شالت راكان على كفوف الراحة ...تنفذ كل طلباته حتى ما يزعل او يتضايق ...حبته من كل قلبها بالرغم من فرق العمر بينهم ....كذا يجازيها؟!
صدق الرجال ما لهم امان!
جلست مقابل لها والازعاج وصراخ البنات يعج بالمكان ...بكل اسف المكان مزدحم كثير ....غير الازعاج !
ناظرت بنات مريم مايشبهون بعض بالرغم انه أول ابنتين توأم والثالثة والرابعة برضو توأم ومع ذلك ما في تشابه بينهم!
مع انها شق توام لكن ما عمرها حملت بتوام لكن هذا الحمل ما راجعت ولا لها نية تراجع !
مريم عبست ملامحها لما شافت رونق ...نطقت رونق بروقان: اعصابك يا حلوة!
تدرين انه نايف طلق سعاد؟!!!
يعني صار الحين حاجز جديد لرجوعك للفارس المقنع!
مريم بضيق: رونق رجاء في حلقك كلام ابلعيه احسن لك !
او روحي ابحثي عن فارسك الي هج من المنطقة بسببك!
رونق سكتت للحظات وهي تفكر بجراح الي تركها كذا ؟!
ما تعرف وش يفكر فيه يوم انه يختفي عن الانظار بهذه الطريقة!
مريم نطقت بكل صراحة: تدرين ولا عمري كرهت انسان مثلك !
رونق مطت شفتها بملل: عاد تدرين شعور متبادل!!
بس غريبه يعني دوم يقولون التوأم بينهم تواصل بالمشاعر ويشعرون ببعض
مريم بسخريه: تدرين زمان كنت حاقدة على امي لانها بسببها فقدت شق التوأم وكنت اتمنى تكون للحين عايشة اتبادل معها الكلام بكل شيء ...لكن سبحان الله لما شفتك سامحت أمي إنها ضيعتك وريحتني منك السنين الماضية ....الله يسامح الي رجعك لينا!
كنت عايشةومرتاحه ومبسوطه!
رونق وقفت وتحركت باتجاه الشباك بروح ميته ...وقفت وهي تناظر للخارج: عايشه مرتاحه ومبسوطه!
ما احد فكر فيني وبحياتي إلي عشتها !
وما احد سأل عن طفولتي كيف مرت ؟!
فرق بيني وبينك انت عشت وبيدك ملعقة من ذهب ...اما أنا على النقيض تماما عشت طفولة محرومة يتيمه اراكض من بسطه لبسطه حتى احصل لقمة عيش...بحررةالشمس انت جالسة تحت المكيف بالبراد وانا تحت اشعةالشمس حتى نعيش ...تمنيت اشياء كثيرة بطفولتي وما قدرت احصلها...اعيش اليتم وامي وابوي عايشين ....تدرين الصدفة جمعتني مع امي وابوي بنفس اليوم !
كنت صغيرة وقتها بالمستشفى وصار موقف للحين عالق بذاكرتي ما نسيته ....وقتها اصطدمت بابوي وقتها شتمني بس ما كنت اعرف انه أبوي ....خبرني فياض مرة إنه ذاك الرجال ابوي...شوفي كيف الدنيا صغيرة جمعتني فيهم بدون ما يدري عن الثاني!
اي مشاعر رح تحملها طفله محرومة ...حياة قاسية بالقرية ...كنت اتمنى اشوف البسمة على ثغر مروان الي انطفت من الحرمان الي ذقناه .....ومع ذلك كنت راضية بالحياة على امل القادم اجمل .....وضعت هدف لزوم احققه الي هو اعيش بالمدينة ...هدفي بس اطلع من القرية واعيش حياتي مثل ما ابغى انا ! ويا ليتني ما منيت اطلع من القرية!
لكن لما وصلت بعمر 13.5 تقريبا يعني ما دخلت عمر 14 زوجوني لنايف الرجل المنقذ حتى يطلعنا من الفقر....شفت الفرق بيني وبينك ...انا تزوجت بهذا العمر بينما إنت بهذا العمر كنت تراكضين وتلعبين مثل الأطفال وما زلت تعيشين براءة الاطفال!
تزوجت بعدها وجدت نفسي بالمركز بقضية مشبوهة لانه بكل بساطه عمك سكني بمكان مشبوه....تعرفي هالشعور لما تكوني بهذا الموقف والضابط يناظرني بانحطاط وكأني شيء قذر ...انتظرنا ولد العم حتى جاء واثبت إني فعلا زوجته!
يوم ثقيل على قلبي ما رح تحسين وتشعرين فيه يا توأمي!
ما اكتفى نايف قرر يرجعني لاهلي تخيلي موقفي زوجك يرجعك لاهلك من ثاني ايام الزواج!
رجعت لأهلي طفلة محطمة وبعدها تنكسر شوكتي لما عرفت بالحمل !
انا حملت بقدر وانا ما دخلت 14 وانت عايشه حياتك بسعادة ومبسوطه!
حملت هم طفلة وانا بعدني طفلة !
كبرت قدر قدام عيوني وانا معلقة كذا ....لوقت قررت ارفع قضية واحصل على حريتي ....اشتغلت بعرق جبيني ....ايه اشتغلت عند راكان الي يناظر الي اقل منه مستوى انهم حثالة ...ومع ذلك صبرت على الشغل حتى اقدر اصرف على جدتي وقدر!
ما قدرت أوكل محامي لقضيتي ما عندي فلوس ومسكت قضيتي بنفسي وبعد اشهر من المرار وقتها كرهت الدنيا لما ربح نايف القضية!
نار تأججت بداخلي من طعم الظلم ....حصلت على الطلاق وخبرت المحامي عن البنت ابغى اضمن حق ابنتي...فكانت الصدمة لما انكر نايف البنت !
انت متخيله النفسية الي كنت فيها !
وكانت ختام السالفة لما اكتشفت انه نايف هو عمي !
انا تجرعت المر بدون ذنب وفوق هذا تبغون اكون الشماعة الي تعلقون عليها اغلاطكم....
انا بقلبي كره وحقد لكل الي حولي كل يوم يزيد عن اليوم الي قبله ... .. لكن خلاص اكتفيت منكم ولهذا الحد رح اضع نقطة .
مريم جالسة تناظرها وهي معطيتها ظهرها وتناظر من الشباك ....استغربت انها تكلمها عن حياتها ....تحس بنبرتها حزن عميق !
نزلت رأسها وهي تفكر بحياة رونق لو عاشتها كيف رح تكون نفسيتها!
اذا هي لأنه راكان يبغى يتزوج عليها نفسيتها حضيض وحالتها حالة طول الوقت تبكي ومتكدرة ...كيف بإنسانه عاشت كل هذا!
رفعت نظرها على جواد الي تقدم بعد ما سمع الكلام وهو ينطق : وش تقصدين بالنقطة!
رونق التفتت على كلام جواد ....وما ردت على كلامه!
اقترب منها وهو يشوف الدموع تلمع بعيونها ....ونسمات الهواء تحرك شعرها بعشوائية : رونق
ردت بابتسامة ألم : خلاص يبه انا مليت من حياتكم
قاطعها بغضب من فكرة إنها تؤذي نفسها: اعرفك مجنونة على وش ناوية؟!-
قاطعته وهي ترجع خطوة للخلف: وش يهمك ؟!
مب انت الي تمنيت موتي
قاطعها وهو يمسك يدها وبحنية: رونق......ترى و الله كله كلام من وراء قلبي .....ما أنكر كلامي ثقيل بس بغيت
ردت بمقاطعة: إلي انكسر ما يتعدل .. انا اكتفيت منكم ومن نظراتكم....انا واثقه من نفسي ....ومن باكر عندي دوام بالمستشفى ورح اداوم لا تحاول توقف بوجهي وتذكر الناس رح تأكل وجهكم إذا منعتني من الوظيفة ورح تجيبون لكم الكلام !
قاطعها وهو رافع حاجب: اي مستشفى دوامك؟!
ردت بدون اهتمام لرد فعله: مستشفى القرية نايف رح يوصلني ورح اسكن عند جدتي ونهاية الأسبوع رح اكون عندكم...

انتهى البارت .....انتظروني قريبا بإذن الله دمتم بخير