رواية بسمة مدفونة في خيالي الفصل السابع والأربعون 47 - بقلم ضاقت أنفاسي

بعد العصر اجتمعوا عند ابو جواد ...جواد ناظر جراح بهدوء وما نطق !
زياد بهدوء ناظر عمه: وش قلت يا عمي!
ابو جواد ناظر جراح وبعدها جواد ...ونطق بهدوء: السالفة طالت وما هي حلوة قدام الناس هذا الوضع !
الحين جواد يعطي رونق خبر وتتجهز وتنزل لزوجها
قاطعه جواد بجمود: انا قلت لك من قبل يبه رونق وجراح مستحيل يرجعون لبعض ...ما لك نصيب عندنا يا جراح واتمنى بدون شوشرة ترسل ورقة الطلاق وما له داعي نرجع للمحاكم مرة ثانية!
جراح رفع حاجب وبداخله قهر من جواد وبنبرة حادة نطق:اتوقع هذا الامر يخصني انا ورونق
قاطعه جواد بانفعال: رونق ما لها كلمة بعد كلمتي!
ابو جواد ناظر ولده بغضب من عناده ...وبقوة نطق يبغى يضع حد لهذه المهزلة: جواد لهنا وكافي!
سكتت لك بالمرة الأولى وكانت نهاية المطاف خسرنا عبدالله ومريم !
لو ما انتقلت هناك كان الحين موجودين معنا والسبب رونق ...وللحين متمسك فيها!
زياد نطق بانتقاد: ما يصير كلامك هذا يا عمي !
مريم وعبدالله انتهى اجلهم وكل هذه أسباب وربنا ذكر بالقران إذا جاء أجل الانسان ما يتأخر ساعةولا يستقدم
قاطعه ابو جواد بندم : استغفر الله!،
والله يا ولدي فيني حره هنا ما انطفت!
جواد اختنق لفقدان عياله ..عبدالله الي كان ينتظر الساعة الي يزفه ويزوجه ويفرح فيه ..كيف كذا فجأة يختفي وما له أثر !
راكان تكلم بهدوء: ربي يرحمهم ويجعل الجنة مثوى جميع المسلمين...ما نبغى نظل على اعتاب الماضي ونقول لو ويا ليت !
كم تمنيت يرجع الزمن ونصحح اغلاطنا ..انا خسرت مريم بسبب عنادي ....لا تكرر نفس الغلط يا جواد ...وارجع رونق لزوجها ..لا تنسى بينهم ولد !
جراح ناظر راكان مب مصدق انه تكلم كذا ..التفت على جواد يشوف رد فعله جواد تكلم برفض: انت ومريم شيء وجراح ورونق شيء !
زواجهم من الاصل غلط!
ليه نستمر بالغلط؟!
رونق عاشت حياة مختلفة عن حياتنا وليه اظلمها حتى تتأقلم وتعيش حياتكم ؟!
انا ابوها واراعيها انت مب مجبور تتحملها ولا تنسى الأحداث الي صارت بالاخير ما رح تنساها انت واهلك وهي ما رح تنسى
قاطعه جراح :هذا
تابع كلامه جواد وهو يقطع عليه:انا رونق رح اطلقها منك
ابو جواد صرخ بغضب: خلاااص كافي!
وانحنى بتعب وهو يتكلم: انت تبغى تجلطني بكلامك يا جواد ...وش قاعد تهبب ؟!!
جواد بحزم : رونق ما رح ترجع لجراح
ابو جواد تفشل من جراح انتخاه حتى يرجع رونق ويصير كذا ..بنبرة حاده نطق: رح ترجع
جواد لما شاف اصرار ابوه ..عرف انه ما رح يقدر على كلمة ابوه نطق بتعجيز: ترجع بس بشقه بروحها مع اهلك ما تسكن"
راكان باعتراض: كيف وبيته
جواد بإصرار: رونق ما تسكن إلا بروحها في بيت مستقل وغير كذا ما عندي !
جراح عقد حواجبه: وليه اهلي وش فيهم ؟!!
زياد بانتقاد: احمد ربك إنه رضينا تسكن معنا بعد سوالفها
قاطعه جواد بقوة: وليه ما ترضى ان شاء الله يا حضرة الدكتور؟
سحرتوا ولدكم ولبستوا التهمة لرونق حتى تتخلصوا منها...بصراحة انا ما اضمن امك واخواتك يكيدون لها مرة ثانية
قاطعه جراح وعقله يرفض هذا الاتهام لأمه وبقوة نطق: حدك امي ما اسمح لك بكلمة وحده عليها!

دام وصلت فيكم تتهمون أمي بكل جراءة ابنتك ما ابغاها خللها عندك والله من باكر الا اتزوج الي تسواها وتسوى عشرة مثلها!

جواد بانفعال: بقلعتك من زينك !
من باكر ترسل ورقتها والله لازوجها لواحد يسواك ألف مرة !

جراح بعناد: وما رح اطلقها وخليها معلقة طول حياتها واشوف وش يطلع بيدك!

رمى اخر كلامه وطلع وهو مفور من العصبية هو الي المفروض يزعل وهي تتأسف له !
وفوق هذا يتشرطون عليه!
ضرب قلبه بقوة اخخخخ من هالقلب الي ما حب الا هالرونق!

**
**
**
**
**
واقفه قريب من المجلس تسمع كلامهم بعد ما خبرتها الجازي انه جراح يبغى يرجعها!
تحس الصدمة اعتلت ملامحها من كلام جراح. ....
ناظرت جدتها الي واقفه تسمع معها !
بعد خروج جراح ابتعدت بخطوات ميتة وجلست على الكنبة جسد بدون روح!
اقتربت ام جواد منها وبضيق: اذا كنت تبغين زوجك ليه تعملوا كذا من الأساس...صدقيني جواد ما رح يجيبها على البر ولدي واعرفه!
رونق ناظرتها باختناق: ترى أبوي ما طلب شيء بس شقة مستقلة ولا تنسين هذا شرط زواجنا من قبل يعني ما جاب شيء جديد!
ام جواد زفرت بضيق: كلام ابوك ثقيل يعني يتهم امه انها الي سحرته
قاطعتها بمرارة: ما قبل هالكلام على اهله لكن انا صدق فيني على طول !
انا عشت معه سنوات ما هو يوم ويومين لذي الدرجة ما يعرفني ويصدق هالكلام!
رفض هالكلام عن اهله وعصب أما أنا
ام جواد قاطعتها بمواساة : صدقيني رح ييجي يوم وتطلع براءتك ما عليك الا بالدعاء!
**
**
**
دخل ابو جواد ومعصب من جواد: انا بحياتي ما شفت مثلك يا جواد!
جواد من خلفه: يظن بنات الناس لعبة!
بقلعته!
اقترب من رونق وبغضب: وربي يا رونق لو اسمع انك كلمتيه والا التقيت فيه ما يحصل خير تفهمييييين!
ابو جواد بغضب:انت وبعدين معك !
ام جواد بضيق: لا حول ولا قوة الا بالله !
ابو جواد بغضب والشرار يطلع من عيونه: يبغى تصير سيرتنا على كل لسان !
طلق مريم من قبل والحين الدور على رونق !
وبنبرة تهديد وهو يرفع يده : اسمعيني يا جواد وقسم بالله اذا تدخل المحكمة وترفع قضية على جواد لساني ما يناطق لسانك وغضبي عليك طول حياتي!
جواد باعتراض: بس
قاطعه بنبرة اقوى: انكتم!
هذه اخرتها توصل بيني وبين عيال اخوي المحاكم ..اخخخ لو ابوي عايش ويشوف هالحال!
تشتكي على عيال عمك يا جواد!
اااه لو اخوي عايش الا يموت من قهره وهو يشوف عيالنا حالهم كذا!
اسمعني زين يوم طلاق رونق هو يوم انقطاع العلاقة بيني وبينك !
ما تبغى ترجعها بكيفك خليها منطقه عندك لكن الطلاق مستحيل تفهم !
أعطاه نظره قوية وتوجه لغرفته!
**
**
**
**
جواد إلي يختنق من تدخلات ابوه ...ناظر أمه بقهر: يمه لمتى
قاطعته بوجع : طلبت تنتقل من هنا وتركناك على راحتك وشوف النهاية طلقت مريم وبعدها فقدتها للأبد مع عبدالله
رد بوجع: يمه خلاااااص كافي ....ترى للحين جرح فقدهم ينزف ...مب قادر اعيش بشكل طبيعي ....احس نفسي بحلم بأي لحظة رح أصحى منه وألقى مريم تتشاجر مع بناتها وعبدالله طالع مستعجل لشغله!-
ارحمووووووني ما هو كل ساعة تذكروني بفقدانهم وترشون ملح على الجرح!
ناظر امه ودموعه على وشك النزول ...انسحب من المكان وهو يحس بالاختناق !
***
**
**
*
تنهدت رونق وناظرت جدتها الي تبكي بصمت!
مسحت ام جواد دموعها ونطقت : كلما اشوف بنات مريم احس شيء يخنقني هنا!
رونق اكتفت بالصمت وعيونها تلمع بالدموع ...وقفت وتكلمت بخفوت: الله يرحمها!
**
**
**
**
في اليوم الثاني
ام راكان مطت شفتها بقهر: والله ويطلع لها تدلل وتتشرط !
والله لو عنده احساس الا يروح ويدفن نفسه على هالبنت الي مفتخر فيها!
وش يعرفنا يمكن ساحرة أبوها كمان وإلا جواد يعمل كذا؟!
تخيلي يمه عندها دوام مسائي وتنام برا البيت والوضع عنده عادي !
انت متخيله جواد يسكت ويوقف معها!
صفية ناظرت جراح الي جالس معهم والجوال بيده والسماعات بإذنه : يعني وش نهاية السالفة اما يطلقها ولدك او يرجعها !
سعاد بقهر من نايف الي كذب وقال انه مسافر ولما سمع بابنته سرعان ما كان موجود ...تركها وما سأل عنها ولا عن عيالها !
نطقت بقهر: ليتها ماتت بدل مريم!
رفع رأسها وناظرها بغضب من كلامها .قلبه ما يستوعب فكرة فقدان رونق للأبد وبغضب نطق: انت وش علاقتك فيها ؟!
وش تبغين منها ؟!
أبغى أفهم ليه كارهيتها هالكثر؟!"
سارقه حلالك ؟
ام راكان ناظرته بانتقاد : على اساس حاط بإذنك سماعات !!
انت ما تحترم اختك إلي اكبر منك !
يكفي حياتها تدمرت بسببك
مط شفته بقرف: على اساس نايف مجنون فيها...ترى جاءته على طبق من ذهب!
شوفيه طلق وهرب حتى ما احد يجبره يرجع ابنتك!
سعاد بغضب: سمعتيه يمه!
طنش ورجع السماعات لاذنه وأسند رأسه على الكنبة وبداخله تشتت وضياع..غمض عيونه ونفسيته تعبانه من بعده عنها !
**
ام راكان كشت عليه: مالت عليك دمر حياته وهو ينتظر بلقيس!
وطول سنوات الزواج ما معه الا ولد واحد!
اااااه حسرته هنا بقلبي!

سعاد عابسه ملامحها حملت نفسها وغادرت وهي تفكر بعمق!

صفية بهدوء : ربك يعينك!
سكتت وهي تشوف جوال ام راكان يرن ...
ردت ام راكان على الجوال..بعد دقائق قفلت الخط ...ووضعته مكانه وناظرت امها الي تسألها عن هوية المتصل!
ام راكان: هذه ام فياض اتفقت معها نزور ام ناصر مع بعض ..بس تعتذر اليوم لأنها رايحه لاختها ام سالم تبارك لها عندهم خطوبة!
صفية هزت : اخبر عيالها متزوجين والا حفيدها
ام راكان : لا لا تقصدين فارس!
المخطوبة حفيدتها!
صفية باستغراب: وغريبة للحين ما زوجوا ولدهم !
ام راكان تنهدت بحسرة: كل العيال مثل بعض يحرقون قلب اهلهم علشان بنت الله اعلم من وين تكون!
تخيلي كمل دراسة وتوظف وابوه يحاول فيه يخطب وهو معند ما يبغى ..يقول في بنت في باله متى جاءت الفرصة رح يخطبها مباشرة ...بس يبغى وقت حتى تتحسن الظروف
صفية: ومين هذه البنت؟!
ام راكان هزت رأسها بالرفض:ام فياض ما تعرفها لكن تقول انه نجوى وسالم ومريم وحتى الجازي يعرفونها ولكن الكل متكتم على السالفة!
بس الي عرفته إنها كانت تدرس معه ويحبها من ايام الجامعة !
صفية مطت شفتها بجعرفه: ماشاء الله والله هالجيل ينخاف منه!
وليه ماخطبها؟!
ام راكان بتوضيح بدون ما تعرف إنه هالكلام رح تزيد  النار المشتعلة بداخل جراح : هو ايام الجامعة خبر البنت انه يحبها  ويبغى يخطبها بس اهله رفضوا والحين لما شافوا انه مصمم عليها وافقوا اهله عليها ..والله اني احس بمعاناة اهله يوم يخطبون بنت ما يبغونها!

**
**
**
وقف على حيله وهو يسمع كلام امه والنار تشتعل بداخله هالفارس ما رح يعديهاعلى خير  وتوجه للخارج وهو يفكر كيف يرجع رونق !
صفية رفعت حاجب بدون ما تنتبه لخروج جراح: وليه اهله ما وافقوا عليها؟!"
دوبك تقولين ام فياض ما تعرفها ؟! وحتى أهله امام ام فياض ينكرون معرفتها ؟وهي شاكه انه يعرفونها ؟!!دامهم رفضوا البنت اكيد يعرفونها ؟!
احس السالفة ما هي متراكبه!
ما ادري احسها ما دخلت عقلي!
ام راكان بتوضيح لأمها: تقول هم رفضوا البنت بدون ما يعرفونها ما يبغون يخطبون له بنت من الجامعة !
هزت صفية رأسها بعدم اقتناع : اها

**
**
**
**
**
واقفه تساعد الجازي بهدوء بتحضير العشاء ....الجازي بدون نفس كلمتها :، شوفي بهذه الخزانة!
ناظرتها رونق للحظات وبعدها توجهت للخزانة وهي ما هو عاجبها طريقة كلامها معها !
تنهدت وتابعت تجهيز العشاء ...التفت على ابوها الي دخل المطبخ وسحب له كرسي وجلس بعد ما رد السلام ...ناظرته رونق وابتسمت له وهي ترد عليه السلام مع الجازي!
انمسحت الابتسامة وهي تشوف هالكشرة والعبوس على ملامحه من بعد موت اخوانها ما فكها !
الجازي تكلمت: نادي البنات
هزت رأسها رونق وخرجت ...بعد وقت قصير اجتمعوا على سفرة العشاء ....كتمت وجع ظهرها وانشغلت مع بنت مريم الصغيرة ...
ووضعتها مكانها على الكرسي وهي تسمع صوت ولدها يبكي : قدر انتبهي للبنت
قاطعها جواد بجمود وهو يشوف البنت بدأت تبكي: كملي لها اكل وبعدها روحي لولدك ما رح يصير عليه شيء لو بكى!
ناظرته للحظات وبعدها جلست وعقلها عند ولدها ...لبثت شوي وبعدها غادرت بدون ما تعطي فرصة لأحد يعترض !
ناظرت ولدها ووجهه احمر من كثر البكاء ...حملته وهي تهز فيه : خلاص يا قلبي !
بعد وقت نام ....تحركت للمطبخ كان الاغلب كمل اكل ...وقفت الجازي وتكلمت بجمود: نظفي المطبخ
قبل ما تعترض تكلم جواد:وش فيك تناظري كذا!
ردت بهدوء: ما في شيء خلي لين وقدر يساعدوني لأني تعبانه
الجازي بانفعال:وش جبت شيء جديد،؟
دوووووم تعبانة وانا الشغالة هنا !!
وبعدين لين وقدر صغيرات وما يعجبني شغلهم
خلاص روحي وانا انظف المكان
جواد ينهي السالفة وهو يهم بالخروج: نظفي المكان وبدون حجج يا رونق!
ناظرت زوله وهو خارج وخلفه الجازي وبداخلها تردد «» بدون حجج »
...ناظرت المكان بعجز .... سحبت كرسي لها وجلست بتعب ...تعودت ما تشكي اوجاعها والامها لاحد ...ما خبرت احد بمرضها ووجعها لانه بكل بساطة ما احد سأل عنها ايام الحادث ربنا يسر لها حنين ووليد !-
تنهدت ووقفت وبدأت التنظيف بصمت خارجي وبداخلها ضجيج وتشتت ما احد يعلم فيه غير ربنا!
كملت تنظيف وجهزت الشاهي لابوها ..طلعت من المطبخ وتوجهت لهم ...جلست بعد ما وزعت الشاهي ....مر الوقت والصمت يخيم على المكان ....جواد منشغل بالجوال والجازي نفس الشيء ...والبنات يلعبون بالغرفة ...
حست بالملل غادرت تتفقد ولدها ....ناظرته نائم بسلام ..قررت ترجع تجلس معهم ....قبل ما تطلع وقفت وهي تسمعهم يتكلمون باندماج ..
رجعت ادراجها وهي تحس نفسها لا تنتمي لهذا المكان !
قفلت اضواء الغرفة وتوجهت للشباك تناظر الشارع ...أسندت رأسها على الشباك وتركت لدموعها حرية النزول بصمت .....
نصحتها ام روعة تترك جراح من البداية ..لكن عقلها صور لها انه الحب يصنع المعجزات !!!
ما تدري كيف صدق فيها الكلام ...وأهله عصب وما سمح بالكلام عليهم !
غبية ظنت إنه مستحيل بيوم من الايام يفرقهم شيء ....

**
**
*
في اليوم الثاني مجتمعين في الصالة ....قاطعه ابوه بقهر: انت وش فيك مجنون! اقولك خلاص رجعها
عاجبك صرنا علكة بحلق الناس
قاطعه بضيق من هالموضوع: رح اطلقها مثل ما مريم تطلقت رح تتطلق
بدر بغضب: انت وبعدين معك ؟ !
تبغى تطلقها وتبعدها عن زوجها مثل مريم.....مريم الي ماتت بحسرتها وقهرها!
ما كانت تبغى الطلاق بس ما قدرت توقف بوجهك وتقول لك ابغى راكان !
ومع ذلك عنادك وتغطرسك اعمى عيونك وطلقتها وسحبتها غصب عنها لمكان بعيد ما يبغونه وهذه كانت نتائج عنادك فقدتهم بلمح البصر!
لا تكرر نفس الغلط مع رونق والكل يعرف كيف رونق وجراح متعلقين ببعضهم .... شوف جراح بالرغم من كل الأدلة أمامه على سالفة السحر ومع ذلك رفض يتخلى عنها ومتمسك فيها غصب عن الكل ...ورمى كلام اهله خلف ظهره ...جواد رجاء اتركهم بحالهم ...بينهم ولد حرام يعيش مشتت ....وبعدين الناس بدأت تتكلم يقولون كل يوم طالعه من بيت ابوها الظاهر زوجها مطلقها!-
الناس وضعت الف علامة استفهام على بناتك ليه ازواجهم يطلقوهم...لا تنسى عندك بنت وبنات مريم لا تشوه سمعتنا خلاص والله صرنا علكة بحلق الناس!-
ابو جواد بضيق ناظر جواد وهو يجلس ...وبنبره فيها حرقة: من يوم ما شفنا هالبنت ما شفنا الخير ..المشاكل تتحاذف علينا من كل صوب ....ليتها الي ماتت مكان مريم وخلصنا من همها !-
مريم المؤدبة المطيعة راحت بسببها ما كانت تبغى تروح معكم بس انت اجبرتها حتى ترضى رونق !
اصلا كل رحيلكم بسببها ....
فقدت احفادي بسببها!
وين ما نروح الكل يشتكي منها سودت وجههنا وفوق هذا للحين واقف معها يا جواد !!
نسيت لما نزلت وجهنا للأرض لما تزوجت بدون علمنا وطلعت معه وحنا يا غافلين لكم الله !
مو هذا جراح الي كسرتنا قدام وليد علشانه!
خليها تنقلع له !
خليها تقلع شوكها بيدها ...صدقني هذه البنت ما هي لنا !
انانية جالسة هنا لأنه مصلحتها هنا!
ما احد خلص من شرها حتى أمها ما تركتها بحالها !
وأكيد هي الي لعبت برأس نايف حتى يطلق سعاد ...شوف الحين كيف عيال اخوك مشتتين ؟!!!
وبنات مريم !
شوف حالهم بعد موت امهم!
مريم قبل ما ترجعون بالليل جاءت لي تبكي وترتجي حتى اتدخل وما ترجع معكم وهي تشتكي من رونق ومعاملتها الزفت معهم وانت معمي على عيونك وما معك خبر...ماتت بحسرتها وقهرها هي وعبدالله!
مات من الدنيا وهو ما يطيقها الكل يكرها وينبذها الا انت ما ادري وش فيك ما تشوف بعيونك؟!
جواد يحس كلام أبوه شحنه بمشاعر كره لرونق ..لحظة كيف نسي لما طلعت وهي تقول حسبي الله ونعم الوكيل وكان قصدها عن مريم !
ويمكن تدعي على عياله وهو غافل ما معه خبر ....الاغلب يرجع سبب فقدانه لعياله بسبب رونق لو ما انتقل كان ما صار الي صار ...الجازي للحين تبكي على عبدالله
قاطع أفكاره السوداء لما تكلم ابوه يحثه على الكلام:وش فيك ساكت تكلم !
زفر بضيق وقبل ما ينطق تكلم أبوه يشحن كره رونق بداخله : كان عبدالله متلهف للخطوبة والاستقرار ...لكن حسبي الله على الي كان السبب!
نطق جواد وبداخله غمامة كره سوداء افترشت داخل قلبه اتجاه رونق...لينطق بحقد :رجوع لجراح ما رح ترجع لو على جثتي !
هذا الي تبغاه رونق انت ما تعرف كيف متعلقه بجراح ...مثل ما مريم انحرمت من راكان وماتت بقهرها وعبدالله راح قبل ما يفرح ... رح احرمها من جراح وخليها تبقى بحسرتها .....
قاطعه بدربحسافة: الظاهر إنه عقلك ضارب
وانسحب من المكان بقهر من تفكير اخوه!
ابو جواد كلام جواد كان غافل عنه ليه يرجعها خليها حسرة بقلبها مثل ما قهرتهم بتصرفاتها ! ...لكن كلام الناس ذابحه: انا مو ذابحني الا كلام الناس ...جواد اتصل بجراح وقول له حتى يأخذ زوجته !!
جواد بتصميم :مستحيل على جثتي
**
**
**
ام راكان بغضب وقفت: والله على جثتي ما تدخل هالبيت !
وش يضمن لنا ما ترجع تسحرنا !
وانت عقلك ضارب كيف تضمن ترجعها ؟!!!
راكان ناظره:وانا مع امي وش تبغى فيها
ناظره وهو رافع حاجب وبنغزه نطق: ما كان كلامك كذا لما كنا عندهم
راكان مط شفته بمكر: لأني متأكد انه جواد ما رح يرجعها لك !
زياد بهدوء نطق: نصحناك من الأول ومع ذلك عاندت وتزوجتها و للحين تمشي بنفس اغلاطك ....اعطيني ضمان واحد ما ترجع تسحرك!
ام راكان برجاء: إذا لي خاطر عندك يمة اتركها
وقف بهدوء: انا اعطيتهم كلمه والعصر رح اروح أخذها ومثل ما تبغين ما رح تدخل هالبيت
قاطعته: وانت
قاطعها بهدوء: ترى الأذكار ما أتركها ما احد يقدر يؤذيني والا كلامي غلط!
هز زياد رأسه بتأكيد اذا حصنت نفسك كل يوم بالاذكار ما احد يقدر يؤذيك !
ام راكان بقهر بعد خروجه: متى اخلص من هالبلوى!!!!
**
**
**
ناظرت جدها بهدوء: بس انا ما ابغى ارجع
قاطعها بصراخ كسر قلبها: لا تجنيني أقولك زوجك العصر رح
قاطعته وهي ماسكه نفسها بصعوبه: وإنت ليه تصرخ علي كذا؟!!
زفر بضيق وبعدها نطق: لأنك تبغين تفشلينا !
خلاص لمتى هالحال الناس أكلت وجههنا !
تكلمت والغصة بحلقها: كيف ارجع وهم اتهموني
قاطعها بخلق ضايق: احمدي ربك انه رجعك وهو الأدلة بين يدينه ..خلاص يا رونق جهزي نفسك
قاطعته باعتراض: وين أبوي مستحيل ارجع بدون وجوده
تكلم بغضب رح يرجعها قبل رجوع جواد: مثل ما تبغين خليك هنا ...بس احب اقولك ترى ولدك مع أبوه تحت رح ينتظر 5 دقائق ما
قاطعته بتكذيب: مستحيل ولدي نائم
وبسرعه تحركت لغرفتها تتفقده ...جحظت عيونها بصدمه وحست نفسها ضاق وهي تشوف مكانه فاضي ! متى أخذه ما تعرف ...وما تركت لعقلها يفكر بالاسئلة وبسرعة لبست العباءة ولفت الشال بعشوائية وهي تركض مثل المجنونة وتردد: حسبي الله عليكم !
جالس بالسيارة ينتظرها والهدوء يغلفه .... رح يرجعها وهي ما كلفت نفسها تعتذر عن فعلتها !
وفوق هذا تبغى الطلاق ..تتلاعب بقلبه وكأنه لعبه بيدها ....ما رح يسامحها على فعلتها ...زفر بضيق لما شافها طلعت تركض مثل المجنونة !
كم تمنى يعيش معها بسلام وسعادة لكن هي الي دمرت كل شيء جميل !
فتحت الباب من جهته وملامحها مثل اللبوة بأي لحظة تنقض عليه وبغضب نطقت : اعطيني الولد!
رفع حاجب بقهر منها للحين رافضه ترجع له وكأنه هو الغلطان ...وبحدة نطق : تبغين ولدك اطلعي معي !
تكلمت والنار مشتعلة بداخلها من تصرفهم: اعطيني الولد وإلا قسم بالله
قاطعها بغضب: وقسم بالله اذا ما
قاطعه ابو جواد وهو يتقدم منهم وأعطاه حقيبتها : فضحتونا .وإنت خلصيني
قاطعته وما بقى شيء على انفجارها: وش دخلك بحياتي
قاطعها ابو جواد وهو تستقر يده على خدها: انكتمي وبدون فضائح خذي نقابك
ناظر جراح بعد ما قفل بابه: ثلاث ثواني ما ركبت تحرك وجعلها بالحريقة!
ماسكه نفسها بقوة ما تضرب جدها ...قهرها يتحكم بحياتها على كيفها ....صرخت بقهر لما حست السيارة رح تتحرك: وقف!
توجهت وركبت والنار تشتعل بداخلها ...قفلت الباب بقوة ....وناظرته ولدها بحضنه : اعطيني
حرك وهو يقاطعها بغضب وهو يشوف ربيع واقف يناظرهم وأمه معه :غطي وجهك طالعه كاشفة
قاطعته بقهر وصوت مرتفع: ما يخصك
هز رأسه بتوعد : يصير خير!
سحبت النقاب ولبسته ومن الداخل تغلي غليان ...تكره هالجد ولا رح تحبه بيوم من الايام لأنه أذاه بلغ أقصاه! ..بحثت بحقيبتها عن الجوال
قاطع بحثها وهو يمد لها الولد : خذي
أخذته وهو يتابع كلامه ببرود: جوالك معي
واكتفى بالصمت !
رونق خلاص انفجرت منه .. ناظرت من حولها وبغضب نطقت :وين رايح فينا!
رجعني بسرعة تفهم
قاطعها بحدة وعيونه على الطريق: انكتمي !
ردت بقهر وهي تحس بالعجز : انت مجنون ؟!،
أقولك أعطيني جوالي ما تسمع
هزت طفلها الي بدأ يتململ من اصواتهم!
ما رد عليها وعيونه على الطريق !
بعد وقت وقف امام مبنى ...غمضت عيونها وهي تحاول تمسك أعصابها ..
نزل من السيارة وفتح لها الباب وبجمود نطق: انزلي!
ناظرته للحظات والدنيا بدت تظلم نطقت بغضب: ما أبغى أنزل ...رجعني الحين ما رح اجلس هنا دقيقة تفهم!
سحبهابقوة خارج السيارة ...اخذ منها الطفل بقوة ..وبنبرةحازمة نطق ؛ امشي قدامي !
انقهرت من تصرفاته وأسلوبه ...ما هي مصدقة هذا جراااااح والا استبدلوه ؟؟؟
دخلت الشقة وهي تحس نفسها بحلم....وين عينها من أبوها ؟!
راجعه بدون علمه!
نطقت والعبرة خانقيتها: أعطيني جوالي!
رد بعد ما وضع الطفل على الكنبة ببرود: لا تخافين أرسلت له من جوالك انك رجعت لي
قاطعته بغضب وعيونها تطلق شرار ....كيف يتصرف كذا على كيفه : انت كيف تسمح لنفسك تعمل كذا!
وبتهديد نطقت : قسم بالله رح تندم
قاطعها بتحذير: وقسم بالله إذا تكلمتي بهذه الطريقة الا
قاطعته بملامح مقهورة ...وبنبرةمخذوله نطقت: تغيرت يا جراح ...تغيرت كثير ما كنت كذا !
سرعان ما احتدت ملامحها وهي تتذكر ابنتها : قدر
قاطعها بجفاء : قدر ما هي صغيرة
ناظرته بحده ... والتفتت على ولدها الي بدأ يبكي !
جلست على الكنبة وبدأت تهز فيه !
تكلم بهدوء وهو يهم بالمغادرة: انا طالع اجيب بعض الاغراض وراجع !
ما ردت عليه وصدت عنه !
تحس بداخلها قهر وين عينها من أبوها ترجع بدون موافقته وهي زعلانه عنده!
مسحت على شعر صغيرها الي يرضع بهدوء ..ضربت جبهتها بخفه ...نسيت صلاة المغرب !
استغفرت بسرها...وضعت الطفل بشويش وتوجهت تتجهز للصلاة...
كملت ورجعت جلست على الكنبة وهي تلعب بشعره وهو نائم ..بداخلها حزن كبير ...تتمنى حياتها طبيعية مع جراح مثل زمان بدون حواجز ومشاكل ...مسحت دمعة يتيمة نزلت على خدها ..حست بحركته لما دخل ....ما التفتت وهي معطيته ظهرها...
وضع الاغراض وتكلم بتجهم:تعالي نتعشى
قاطعته بهدوءبدون ما تلتفت: ما ابغى شيء!
اقترب منها وجلس مقابل لها على الكنبة والصغير بينهم ..ما ناظرته ولا كأنه موجود ..وقع نظره على يدها إلي تلعب فيها بشعر الطفل...رفع حاجب بحدة: وين الذبلة؟!
رفعت رأسها وناظرته باستغراب من حدته: بالبيت
قاطعها وهو يشد على يدها بقوة:والا الاخت ناوية على الطلاق وما له داعي لها ..ما احد يدري يمكن احد
قاطعته وهي تسحب يدها بقوة: انت وش تبغى مني ؟!
مو تقول انت واهلك إني سحرتك ؟!!!
وش تبغى بوحده مثلي ؟!
روح خلي امك تشوفلك وحدة 24 ساعة بالمسجد شيخة
قاطعها بغضب: فوق غلطك وعينك قوية!
بدل ما تبررين موقفك او تعتذرين
قاطعته بقوة وبصوت مرتفع : والحين إنت ساحبني هنا حتى اعتذر؟!-
قاطعها بحدة وهو يشوف الولد بدأ يبكي من صوتها المرتفع ...مد يده يحمله سرعان ما سحبته منه واحتضنته بقوة:: هذا ولدي وإنت ما لك حق فيه ؟!
فتح عيونه باستنكار: انت مجنونه! تراه ولدي
قاطعته بحنق وقهر : ناسي كلامك بالمستشفى !
تنهد وتكلم وهو يناظر ولده الي رجع ينام: جلبت معي أغراض له إذا تبغين تبدلين له!
ما ردت وهي تناظر جهة النافذة !
تكلم بهدوء:اسمعيني زين ....انا قررت نرجع لكن في أشياء كثيرة رح تتغير
قاطعته بسخرية ظاهرية ومن داخلها تتجرع الالم وهي تشوف جراح وكأنه شخص اخر: ومين قال اني ابغى ارجع لك ؟!!!
قاطعها بقوة: غصب عنك ترجعين!
انا سكتت لك اشوف نهايتها معك لكن الظاهر انت وأبوك ما رح ترسوها على البر ..
ردت بقوة: أبوي لا تجيب سيرته على لسانك
هز رأسه بقهر من ردها : يصير خير !
ردت بلامبالاة: يصير خيرين!
ناظرته لما دخل احد الغرف وقفل الباب خلفه بالمفتاح ...مطت شفتها بسخرية يقال زعلان!
توجهت للغرفة الثانية عقدت حواجبها فاضيه ما فيهاالا قطعتين كنب !
حتى خزانة ما فيها !!!.
وضعت الطفل على الكنبة بتعب وجلست وهي تتحسس مكان الألم وبدأت بقراءة الفاتحة حتى يخمد الألم !

**
**
**
**
**
في اليوم الثاني بالرغم انه أبو جواد خبره إنه جواد رضي على رجوع رونق لكنه ما يثق فيه ....لزوم يبعد عن المكان كله ..خلاص مل من المشاكل والقيل والقال يبغى يستقر بحياته ويعيش بسعادة مع رونق وابنه !
طول الطريق كل واحد ملتزم الصمت ..التفت لها لما تكلمت: رجعني لبيت أبوي
قاطعها بقهر من عقلها إلي معلق على هذه الجملة : انت وبعدين معك ؟!
خلاص طق قلبي من كلامك !
أنا احاول ارجع المياه لمجاريها وانت بعنادك تقطعينها
ردت بانفعال : اقطعها!
والا انت الي قطعتها وصدقت فيني على طول !
رد بضيق يرافقه من كل شيء حوله: ترى انا بشر !
مو معصوم ...لما اشوفك طالعه من بيت الساحرة وبحقيبتك السحر ...وش تبغيني
قاطعته بخيبة : وين الثقة ؟!!
رد ويحس نفسه قرب ينفجر منها : أنا بالرغم من كل الادلة ضدك ما تركتك ورفضت اطلقك ورميت كلام كل الي حولي خلفي ..بس انت وش عملتي علشاني؟!!،
ولا شيء حملت نفسك وزعلت ورفعت قضية طلاق وما حاولت تبرري او تعتذرين !
وكأنك تبغين الفكة مني!
هذه جزاتي
قاطعته بعد ما تنهدت تبغى ترجع لابوها وترجع من بيته لبيت جراح برضاه ...تبغى ترجع والكل يعرف إنها بريئة...وبنبره هادئة نطقت : الحين رجعني لابوي حتى
قاطعها بغضب: انكتمي ما ابغى أسمع صوتك !
ناظرته بقهر من عصبيته ...وقررت تسكت لوقت وصولهم وبعدها يصير خير!
وقف السيارة باب بيتهم ...تكلم بجمود: مارح أتأخر رح اجيب شيء وراجع
وقبل ما تعترض نزل وقفل السيارة ..زفرت بضجر وهي تحس بالاحراج من ابوها لو تشوفه الحين وش موقفها رح يكون زعلانه عنده المفروض ما ترجع الا بعلمه وما هو بهذه الطريقة !
دخل البيت بهدوء وهو ناوي يأخذ بعض الاوراق المهمة وينتقل مع رونق لمكان ما يعكر صفو حياتهم احد ... وقبل ما يفتح الباب حس يده تشنجت وهو يسمع صراخ امه!
ام راكان بغضب: حسبي الله عليك من بنت!
كيف سولت لك نفسك تسحرين اخوك !-
هذا أخوك
سعاد بمقاطعة وهي تبكي: والله ماعملت سحر حقيقي بس اتفقت معها تعمل شيء مثل السحر بس ما هو حقيقي
قاطعها راكان بغضب وهو يشد شعرها بقوة : من متى حنا نعرف السحر يا زفته!
كيف وصلت لهذا الانحطاط ؟!
انا بنفسي أخذته لشيخ وفك السحر!
سعاد تحاول تفلت من يده:ما لقيت الا ذي الطريقة حتى يطلقها جراح
راكان بغضب دفها بقوة: حقيرة!
انا اكره رونق وانتظر اللحظة الي تنفصل فيها عن جراح لكن مستحيل انزل نفسي لهذا المستوى ...انت تعرفين حكم الي يروح لذول المشعوذين !
وفوق هذا تتهمين البنت ظلم !
بصق عليها وهو ينطق بقهر: الحين كيف مظهرنا امام بيت عمي ابو جواد!
زياد مقهور من تصرف اخته: سبحان الله الظلم ظلمات شوفي كيف انت الي تطلقتي ونايف سحب منك عيالك وجلست بدون زوج وعيال ...وشوفي كيف رونق متمسك
قاطعته ام راكان وجهها اسود من هالمصيبة: والله مالي وجه اناظر ام جواد!
حتى رونق وين عيني منها وانا ظلمتها
زياد قاطع امه وهو يكلم سعاد باشمئزاز: وش رح تقولين لجراح!
قبل ما ترد سعاد ...دخل جراح بروح خاوية وهو يحس بقوة الطعنة من اهله ...كيف ظلم روح بريئة وقسى عليها بالكلام .... ما توقع تطلع اخته تعمل كذا ؟! نطق بكره: ما له داعي تقول شيء!
ما أعطى فرصه لأحد يكلمه وتوجه لغرفته بهدوء!
بعد وقت قصير طلع من الغرفة وملامحه ما تتفسر ...ناظر امه الي نطقت بتوجس: جراح
ناظر أمه وإخوانه والعبرة خنقته ما قصر بحق احد حتى يلقى هذه المعاملة ....طول عمره يتمنى الخير للجميع ليه يدمرون حياته!!... من لما ارتبط اسمه بإسم رونق وانقلبت حياته لجحيم ...استخسروا يفرحوا معه ...طول الوقت يعكروا مزاجه ....وهذه نهايتها ؟!..وبخيبة نطق : ليتني اموت وارتاح منكم كلكم ....استخسرتوا فيني اعيش سعيد ....اكرهكم كلكم كلكم!
تركهم وطلع وهو يحس بالاختناق بحياته ما توقع هالشيء!
وش اصعب من شعور لما يطعنك أعز الناس بظهرك !
فتح باب السيارة وملامحه ما تتفسر.... ناظر رونق الي تتكلم بغضب : افتح الباب
ناظرها وهو يحس خنجر مغروس بوسط حلقه !
حتى رونق نفسهم هو يركض خلفها وهي معطيته طاف وتتلاعب بمشاعره !
ناظر جواد الي توجه لهم وملامحه ما تبشر بخير ..تكلم جواد بأمر بعد ما وصله تصرفات سعاد: رونق انزلي!
ناس ما عندها ذمة ولا ضمير
جراح ما هو متحمل كلمة وحده نطق بغضب: احترم نفسك
جواد اقترب منه والشر يسري بدمه: واذا ما احترمت نفسي وش رح تعمل ؟!-
امك الي دافعت
قاطعه جراح بشراسة: سيرة امي لا تطريها على لسانك
تفهم
ناظرتهم رونق بصدمة لحظات كلمة من جراح وكلمة من جواد حتى اشتبكوا مع بعض بالأيدي....فرق الموجودين بينهم بصعوبة!
جواد بغضب وما هو متصور كيف جراح يمد يده ويضربه وبتوعد نطق: والله لو تموت ما شفت ظفر منها !
وخلها حسرة بقلبك!
جراح يحس نفسه خسر كل شيء من حوله ...ليه يلتصق في ناس ما يبغونه ؟؟
ليه يرمي نفسه عليها؟!
ضحى علشانها كثير ..لكن وصل لحد اكتفى من الجميع !
تحرك لجهة رونق إلي واقفه تناظرهم بذهول وما هي قادرة تنطق حرف واحد ....ما تبغى تخسر ابوها وبنفس الوقت ما تقدر تعيش بدون جراح ..... سحبها بقوة لجهته وهزها ...بصوت مخنوق نطق:- أكيد سمعتي كلام أبوك ورح تختارين الحين أبوك .... روحي له واشبعي من اهلك وأنا بستين داهية ...عمرك مافكرت فيني ...انا دائما بآخر الرفوف عندك .... اصلا مب موجود بحياتك ...أنا اراكض خلفك وإنت متمسكه بأهلك..انت أنانية مثلهم وما يهمكم الا مصلحتكم !
زفر بوجع ونطق بصعوبه :روحي يا رونق انت طالق !
يحس نفسه مخنوق استنزف كثير من طاقته ..مخذول من كل الي حوله ...خذلوه بأبشع صورة !
توجه للسيارة وتحرك بسرعة من المكان!
رونق واقفه وهي تحس نفسها سمعت غلط ...او حلم بأي لحظة تصحى منه !
***
**
**
بالصالة
ابو جواد بغضب ناظر جواد : ارتحت الحين بعد ما فضحتنا بين الجيران!
حسبي الله فضحتنا هذا وإنت الكبير تعمل كذا ؟؟؟؟
جواد بغضب: عاجبك يوم سحروا ولدهم ودبسوا رونق
قاطعه بغضب اكبر: الي يسمعك يقول كثير تهمك رونق ..الظاهر انك كذبت الكذبة وصدقتها !
الحين تعمل بجراح الطيب كذا علشان ابنتك القروية ....ترى ملينا منها ومن مشاكلها !
ليتنا ما عرفناها ولا شفناها !
ما في مصيبة الا ورونق هي السبب !
اسمعني شوف لك بيت يضفك إنت وصاحبة المصائب دام انك طلقتها
قاطعه بضيق :ان شاء الله ....بدون ما تقول انا نويت اطلع لانه البيت يا دوب واسعنا
ابو جواد بحزم: تسكن بنفس المنطقة تفهم وقسم بالله اذا طلعت من المنطقة إلا
قاطعه جواد بملامح عابسه: ان شاءالله !
ام جواد جالسه تناظرهم وتبكي بصمت من الحال إلي وصلوا له!
***
**
**
جالسه على السرير وللحين تحت الصدمة ..تحس إنها بحلم ورح تصحى منه بأي لحظة ...تتمنى كل حياتها حلم ...وتستيقظ وتجد نفسها عند ام مرعي وتصرخ عليها حتى تطلع تبيع على البسطة!
كل الي صار معها فوق طاقتها ما تقدر تتحمل اكثر ...ناظرت بشرود قدر الي تكلمها بضيق ظهر على ملامحها: ماما هم ليه يكرهونك
عقدت حواجبها : مين ؟!
قدر جلست على الأرض أمامها : جدي ابو راكان وجدي جواد
رونق قلبها ما يتحمل اي كلام نطقت: كيف ؟ مين قال
قاطعتها قدر بضيق: أنا ما احب جدي ابو جواد لأنه يتكلم عليك
قاطعتها: وش يتكلم
قدر بملامح عابسه: كان مع جدي جواد ومع عمي بدر ويتكلمون عليك ...يقول جدي انك سبب موت خالتي مريم وعبود ...إنت سبب كل المصائب ...ليه يقولون عنك كذا ؟!
وما يبغى جراح يطلقك!
حست بخنجر انغرس بصدرها ...نطقت بخفوت وكأنها ما تبغى تسمع الإجابة قلبها ما يتحمل : وابوي وش قال؟!
قدر عفست ملامحها : اقولك ما يحبونك يقول مثل ما خالتي مريم انحرمت من راكان وماتت بحسرتها ...وخالي عبدالله مات وما فرح رح يحرمك الرجوع لجراح وتبقى حسرتك بقلبك وم
قاطعتها رونق وهي تحس إنها تتنفس من خرم إبرة بسبب الكلام زاد ضيقها: خلاص قدر..... انت فهمت السالفة غلط ....إنت روحي تفقدي بنات خالتك وما تقولين لأحد !
ناظرتها بتردد وهي تحس وجه أمها تغير: بس
قاطعتها وهي تحثها على الخروج :تحركي!
غمضت عيونها ...والنفس ضاق عليها ..عقلها يرفض خيبات جديدة .مب قادرة تصدق إنه أبوها قال كذا...ابوها وقف معها بالرغم كل الادلة ضدها مستحيل يقول كذا...أكيد قدر ما فهمت السالفة ....استلقت على السرير بروح خائرة وعقلها رافض يستوعب هالصدمات....
**
**
***
**
مرت السنوات وبداخلها ذبول من فراق روحها ....لكن تكمل الحياة بابتسامة لأنها بكل بساطة ما عمرها وقفت الدنيا على انسان!
ما رح تجلس على اطياف جراح ... وما سمحت لكلام الي حولها يؤثر عليها ....واثبت للجميع إنها ناجحة بحياتها .... وما اثر الطلاق على تفوقها بحياتها العملية ..دفنت اوجاعها وكل خيباتها بقلبها ... بدأت صفحة جديدة مع كل من حولها لكن وضعت حدود بينها وبينهم حتى ماتكون ضحية الخذلان والخيبة....مصطلح الثقة انمسح من قاموس حياتها !
تنهدت وابتسمت وهي تناظر روعة محتفلة داخل مكتبها :وش هالمناسبة ؟!!!
روعة وضعت يدها على كتفها بابتسامة جميلة: بمناسبة إنها احلى دكتورة دخلت الثلاثين !
وقريبا رح تصير ام العروس!
دفتها رونق بضحكة : سخيفة !
ترى ما دخلت 30 بس إنت تبغين تكبريني
روعة وهي تأكل من الكيكة ..غمزت لها: تعالي ذوقي طعمها خرافي!
رونق بدأت تأكل بابتسامة: بسرعة الايام تمشي مين يصدق قدر صارت عروس!
روعة بضحكة بعد ما شربت من العصير: و للحين ما عقلت !
هزت رأسها بأسف :العقل بجهة وهي بجهة
روعة جلست وهي تستفسر: من وين العريس
رونق وهي تأكل من الكيكة : عن طريق ليث ولد عمي !
روعة هزت رأسها: ايه ..طيب وش مواصفاته؟!
رونق مستمرة بالأكل: هذا الله يسلمك ليث يعرفه عندهم بالشغل ...هو ضابط عمره 23 وعايش هنا بنفس منطقتنا ومدحه كثير ...عاد لو تشوفيه لما شافها يقول لنايف الحين خلينا نملك !
مسكين مايدري إنه عقلها فاضي!
روعة بضحكة ساخرة: وكبرنا وصرنا ام العروس!
كشفت قدام العريس؟!
رونق ضحكت بخفه وهي تتذكر الموقف: بالاول فكرني العروسه !،
قال له نايف :،ترى العروس هنا هذه أمها !
تحسينه طاح وجهه من الاحراج !
روعة غمزت لها : عاد ما عنده اخ او ولد عم يخطبك ونفرح فيك ...يا بخته الي رح يتزوجك دكتورة قد الدنيا!
وضعت الكيكة حست نفسها سدت ...وتكلمت تغير الموضوع : اقول خذي معك هالاشياء يأكلونها بزرانك .وانا خليني اروح ازور امي
قاطعتها روعة بضحكة : انا الغبية الي جاية احتفل فيك !
بس انت اسمعي كلامي وتزوجي وقسم بالله الا ارقص بعرسك
ضحكت رونق على ملامح روعة : وقسم بالله مافيك عقل !
انا طااااالعة ..سلاااااام يا حلوة! **
**
**
**
بقسم النسائية
دخلت غرفة امها وهي تجر قدر من اذنها ...دفتها داخل الغرفه بعدم صبر: صدق ما عندك عقل !
الجازي باستغراب: وش صاير؟!
رونق عافسه ملامحها من تصرف قدر: تخيلي لأي مدى وصلت قلة الادب عندها ....مدرعمة على وحده من الغرفة
قدر قاطعتها بتبرير: زيارة المريض فيها اجر
رونق بعصبية: وقسم بالله أجرك من شعرك يمكن تصحين على نفسك ... تدشين غرفة ما تدري مين داخلها ؟!
تخيلي يكون فيها رجاجيل وش موقفك ؟!
صدق قلة أدب
قاطعتها الجازي وهي تتذكر أيام مراهقتها تحس رونق جالسة تشتم فيها: هييييه احترمي نفسك وعن الغلط!
ما احد قليل أدب غيرك
رونق رفعت حاجب باستغراب لانفعال الجازي: وليه منفعله كذا؟
الجازي توهقت ..وبترقيع: يعني البنت تدور الأجر والثواب وانت جايه تزفيها ؟!!
خلاص البنت كبرت وصارت عروس!
قدر بابتسامة عريضة: صادقة يا جدتي!
والله ما تحترمني وطول الوقت تزفني!
مطت شفتها رونق بتعجب: والله وصار لك لسان يا قدر يرحم أيام زمان !
المهم ما علينا حسابك بالبيت!
وناظرت أمها بجدية:يمه يعني ما لقيتم الا هذا المستشفى جايه له ؟!
الجازي عقدت حواجبها: ليه؟
رونق مطت شفتها وهي تجلس تريح ظهرها : يعني والله انحرج قدام زميلاتي امي مجهضة
قاطعتها الجازي بغضب وهي تضربها بالوسادة الي خلفها: صدق انك قليلة حياء ...تنحرجين مني!
رونق بانفعال: يمه تراك بالخمسين مو صغيرة ما تعرفين لو تم الحمل احتمال كبير تنجبي طفل ما هو سليم
قاطعتها الجازي وهي تسحب منها الوسادة وتعيدها خلف ظهرها: هذا انت انجبتك وانا بالعشرين وطلعت عقلك ضارب ما هو شرط
رونق فتحت عيونها باستنكار: يعني أنا
قاطعتها الجازي بهجوم: ايه ...وإلا وحده عاقله توقف حياتها على ذكرى هالجراح !
دامه تزوج وبنى حياته من جديد وليه انت جالسه على ذكراه؟!
رونق بهدوء : لأنه افتقدت الثقة بالرجال ...وليه اعيش تجربة فاشلة واخسر قلبي من كثر الطعنات !!
لا كذا قفلت قلبي وما رح اسمح لاحد يطعني من جديد !
قدر : مو كل اصابع يدك واحد
رونق ناظرتها بروح ميته: صدق !!
نصيحة لا تتأمل كثير من خطيبك ..خلي في مسافة تقدري من خلالها الانسحاب بدون أضرار
قدر ما عجبها الكلام: أحس نفسي داخل حرب
رونق مطت شفتها بإحباط: شوفي جدك جواد ...طلق امي بقلب ميت والسنين الي عاشتها معه ما شفعت لها .....
شوفي راكان كم جلس بعد موت مريم ؟!
راح تزوج وعاش مبسوط بحياته مع إنه لو راكان الي مات مستحيل تتزوج مريم من بعده !-
بس الرجال غييييير
قدر تكلمت : حتى إنت طلقك جراح بالشارع وكأنك
قاطعتها رونق بعصبية: اقول انكتمي!
وقلدت صوتها بسخرية«حتى انت طلقك جراح»
الجازي تنهدت: وهي صادقة !-
اسمعي مني وتزوجي على الأقل تكسبين عيال
قاطعتها رونق: عندي بنت وولد نعمة ...الحمد لله
الجازي بإقناع: صدقيني أنا كنت مثلك كذا ربنا
يسر لي ابوي وغصبني على الزواج ....وسبحان الله ربي رزقني بوسيم
قاطعتها رونق بجعرفه: واااااع !
اجلس طول حياتي بدون عيال ولا يكون عندي ولد مثل وسيم وقسم بالله تحوووووم كبدي منه
قاطعتها الجازي بغضب : انكتمي!
إذا وسيم ما هو عاجبك صدق إنه عقلك ضارب !
رونق وقفت وهي عابسه: القرد بعين أمه غزال !
الجازي وهي تناظرها بتقييم: على وش شايفه روحك!
ابتسمت رونق وغمزت لها: احلى دكتورة
**

انتهى البارت ...انتظروني يوم الاحد بإذن الله ..وكل عام وأنتم بخير