رواية بسمة موجوعة الفصل الأول 1 - بقلم زينب مجدي

إنتي مش جوزك مات، ما تغوري في داهية بقي وروحي اقعدي عند بيت أبوك. ولا مستنية لما توقعي واحد من رجالة البيت وتتجوزيه. سلفتي قالتلي الكلمتين دول وطلعت لشقتها، وأنا وقفت مكاني متجمدة من الكلام اللي سمعته ودموعي نزلت على خدي، مش قادرة أوقفها. أنا عمري ما كنت ضعيفة، أنا ليه مردتش عليها؟ أنا إزاي أسيبها تكلمني كده؟ أنا بسمة، جوزي مات بقاله 5 شهور بس، ومن ساعة ما مات وأنا حاسة إن شخصيتي بقت ضعيفة أوي.

عندي 3 سلايف، كنا أكتر من الأخوات والله، كنت بعاملهم أحسن من أخواتي. بس من ساعة جوزي ما مات وهما التلاتة معاملتهم اختلفت معايا. كل واحدة فاكرة إني هخطف جوزها منها. قلبي واجعني أوي على موت جوزي ومحدش حاسس بيا. وكمان معاملتهم اتغيرت معايا، بقي محدش في البيت بيطقني. أنا بجد حزينة على نفسي أوي.

أنا نفسي أروح أقعد في بيت والدي، بس والدي حالته المادية على قده خالص. أنا عندي أربع عيال 3 بنات وولد، مين هيصرف عليهم لو قعدت عند بيت والدي؟ بس أنا نفسيتي تعبت جداً وقررت إني هروح أقعد عند بيت والدي أسبوع كده، ونزلت علشان أبلغ حمايا بقراري ده. واتفاجأت من اللي سمعته. حمايا: اعملوا حسابكم إنتو التلاتة إن واحد منكم يتجوز أرملة أخوه. مينفعش تقعد كده في البيت والبيت فيه أربع رجالة.

رد عليه محسن الكبير: يابا.. إحنا كل واحد ممشي بيته بالعافية. مين هيعرف يفتح بيت تاني؟ محمود الوسطاني: فعلاً محسن عنده حق يابا، إحنا مش عارفين نصرف على عيالنا. محمد الصغير: أنا ممكن اتجوزها. بس طبعاً لو ده حصل مراتي مش هتعرف. هيبقي الموضوع من غير ما ولا ست في البيت تعرف. اتصدمت صدمة عمري. أنا بيحصل فيا كده؟ أنا كل واحد بيرميني للتاني. أنا وصل بيا الحال لكده.. واحد عايز يتكرم ويتعطف عليا ويتجوزني في السر؟

أنا حمايا بيجبرهم علشان حد فيهم يتجوزني؟ أنا كنت قولت لحد إني عايزة اتجوز أصلاً. من الصدمة اغمي عليا ووقعت من على السلم، محسيتش بنفسي غير وهما بيفوقوني. ولقيت سلفتي اللي طلعت شتمتني في شقتي بتقول: هي أمورة السهوكه بدأت أهي. هنمثل بقي وهنعمل نفسنا بنغمي علينا كمان. لقيت نفسي بقولها: حسبي الله ونعم الوكيل فيك. حسبي الله ونعم الوكيل فيكي. وجيت أقف على رجلي مقدرتش من الألم اللي فيها ووقعت على الأرض.

لقيتها بتقولي: أيوه كملي تمثيل كملي. بس المرة دي حمايا اللي رد عليها: كل واحدة تحترم نفسها ومتغلطش في التانية. إيه يا ست علا محدش مالي عينك عمالة تغلطي واحنا واقفين. وقف توك توك. يا محسن خليني أروح أوديها عند الدكتور. وإنتي يا أميرة اللي تعالي معاها.

خدني حمايا للدكتور وطلعت رجلي مكسورة جبسهالي وروحت البيت. اتصلت على أمي وأبويا وعرفتهم، وأمي أصرت إنها تاخدني عندها البيت علشان تعرف ترعاني وتخلي بالها من عيالي. وحمايا وافق على طول زي ما يكون هو كان عايز كده.

روحت بيت والدي وعدى يوم والتاني والتالت لحد ما عدى أسبوع. ولقيت حمايا جاي يعرض على أبويا الكلام اللي أنا سمعته. محمد سلفي يكتب عليا من غير علم زوجته فترة كده لحد ما يمهد ليها الموضوع علشان أبقى على ذمة راجل بدل قعدتي كده. والمصيبة إن بابا موافق والحل ده عجبه جداً.

ولقيت أمي داخلة تقولي: الحمد لله يارب محمد سلفك عايز يتجوزك، دا أنا كنت شايلة همك وعمالة أقول مين هيرضى يتجوزها بأربع عيال. بس الحمد لله جت من عند ربنا. وأهو عيالهم وهما أولي بتربيتهم. بسمة: إنتي بتقولي إيه؟ إنتي مستوعبة الكلام اللي بتقوليه؟ إنتي راضيانة بالوضع المهين ده؟ عايزة بنتك تتجوز في السر زي اللي سارقة سرقة وخايفة صاحبها يعرف؟ شايفة إني خطافة رجالة علشان آخد واحد من مراته؟

والدتها: ولا خطافة رجالة ولا حاجة. أي واحدة جوزها بيموت سلفتها بيتجوزها. هما أولي يربوا لحمهم. وبعدين إنتي عندك 28 سنة واللي من سنك لسه متجوزش هتقعدي كده من غير راجل وتدفني شبابك. وكمان في رقبتك أربع عيال وملكيش حما علشان تسيبلها العيال وتتجوزي. حماتك ماتت. ومحدش هيرضي يتجوزك بأربع عيال. بسمة بانهيار: إنتو ليه محدش محترم حزني على جوزي؟ ليه مش مقدرين مشاعري؟ الدنيا كلها اتقفلت في وشي مرة واحدة ليه كده؟

في منزل حما بسمة. اجتمع النساء الثلاثة. علا: أنا جمعتكم علشان نعرف هنعمل إيه مع العقربة اللي عايزة تخطف حد من رجالتنا دي. آمال زوجة محسن: إنتي خايفة من إيه يا علا على الأقل محمد جوزك بيخاف منك وبيعملك ألف حساب. الدور والباقي على رجالتنا. علا: لأ برضه البت دي بتغير مني وممكن تعمل أي حاجة علشان تخطف جوزي مني. آمال: الخوف كله من محسن جوزي، هو أطيب واحد فيهم وممكن أبوه يأثر عليه ويخليه يوافق.

علا: يبقي البت دي لازم نقطع رجلها من البيت. ونحاول نخرجها منه بأي طريقة. حتى لو هنعمل إيه. مالك يا أميرة مبتفكريش معانا ليه؟ أميرة: أنا شايفه إننا نسيبها في حالها. كفاية عليها موت جوزها وبلاش نأذيها. علا: إنتي مش خايفة لتخطف جوزك منك؟ أميرة: لأ مش خايفة علشان واثقة في جوزي وواثقة من حبه ليا.

علا: مع إنك إنتي المفروض أكتر واحدة تخاف. علشان إنتي مبتخلفيش وممكن جوزك يتجوزها أهي جوازة ببلاش وكمان يجيب العيل اللي نفسه فيه. بدل ما هو صارف فلوسه أول بأول على الدكاترة كده ومفيش نتيجة في الآخر. في منزل والد بسمة. والد بسمة: إيه رأيك يا بسمة يا بنتي في الجوازة دي؟ أنا شايف إن ربنا حلها من عنده علشان أنا كنت شايل همك. بسمة: أنا مش موافقة يا بابا. والد بسمة: ليه إن شاء الله مش موافقة؟

إنتي فاكرة إن حد ممكن يبصلك وإنتي معاكي أربع عيال؟ بسمة: أنا مش عايزة اتجوز أصلاً. والد بسمة: بصي بقي علشان إنتي دايماً وجعة قلبي كده. الجوازة دي لو ما تمتش اعتبري نفسك ملكيش بيت. بيتي مش هيتفتح لك لا إنتي ولا عيالك.