رواية بين الحقيقة و السراب الفصل التاسع عشر 19 - بقلم فاطيما يوسف

في أحد المطاعم الشهيرة يجلس الدكتور إيهاب مع أخر شخص توقع مجيئه إلي مصر. جاءت فيروز، الأنثى الراقية، إلي الأراضي المصرية والتي تزورها لأول مرة في حياتها لأجل أن ترى إيهاب الذي استوحشته كثيراً. جلست مقابله تنظر إليه بحب جارف ووحشة شديدة ورددت بهيام: _وحشتني كتييير جدا يا إيهاب. ابتسم بهدوء وأجابها: _ياه، لسه منستيش اللهجة المصرية يافيروز وبتتكلميها بطلاقة. اعتدلت في جلستها وهتفت بحب:

_لأني بحبها جداً، وبحب أتكلم بيها وعلشان حبايبي إللي قريبين من قلبي يفهموني بيها. تحمحم كي ينظف حنجرته وتحدث بملامح جادة ارتسمت رغماً عنه: _بلاش نتكلم مع بعض بالطريقة اللي توجع قلوبنا وترهقها يافيروز، إحنا بقينا دلوقتي أصدقاء وبس. انزعجت بشده من كلامه وأردفت بنبرة حزينة: _ليه يا إيهاب بتعمل فينا كده!

انت طلقتني وانت عارف إني هتعذب في بعدك، وأنت إللي خرجتني من دوامة الحزن إللي كنت عايشة فيها وفجأة سبتني علشانها، وفي الآخر هي مرجعتلكش. ولا منك طولتها ولا مننا استمرينا، وانت بتتعذب وأنا انقهرت في بعدك عني. أخذ نفساً عميقاً ثم زفره بهدوء وتحدث بإيضاح: _من البداية قلت لك إني مسيري في يوم من الأيام هفارق، وإني احتمال مقدرش أكمل، يعني أنا مخدعتكيش يافيروز. ابتلعت غصتها بمرارة مثل مرارة الصبار وتركت لسانها يتفوه:

_أنا كنت بالنسبة لك إيه يا إيهاب، ممكن أعرف؟ هل كنت مجرد نزوة بتفضي فيها رغباتك واحتياجاتك وقت ماكنت لوحدك؟ بنبرة يملؤها الشجن أجابها: _كنتي زي طيف جميل عشت معاه خمس سنين في هدوء وراحة وفجأه اختفي. بنبرة صوت محتقنة هتفت بأمل: _طيب ليه بتسميها اختفت؟ أنا وانت دلوقتي مفيش حد في حياتنا، وأنا بحبك وانت عارف كدة كويس. تعالي نرجع دبي ونكمل حياتنا هناك أرجوك. ضيق نظرة عينيه ثم رمقها بنبرة هادئة:

_مينفعش يافيروز، مقدرش أكسرها مرة تانية، دي مش بس أم ولادي وعشرة عمري، دي كل عمري وأيامه الحلوة. ضيقت عيناها بحزن وأوردفت بعتاب: _إنت قاسي أوووي يا إيهاب عليا. طيب والخمس سنين إللي عشناهم مع بعض في سعادة وراحة وحب دول كانوا وهم مثلاً؟ طيب كلمة "بحبك يا روزا" إللي كنت بتقولها لي كانت هباء من ورا قلبك!

حضني إللي كنت بتنام فيه وتقولي ببقي في قمة الراحة والاسترخاء وأنا بين أحضانك ياحياتي كان مجرد كلام من سحر اللحظه وبعد كدة كأن شيئا لم يكن. رفع منكبيه باستكانة وبنبرة تقطر ندماً تحدث شارحاً: _منكرش اني كنت برتاح في حضنك، بس عمري ماخدعتك ولا قلت لك إني مبحبش مراتي، لا يافيروز، كل كلامي معاكي اني بعشقها وإنها بالنسبة لي كل حاجة. _طيب وأنا يا إيهاب بالنسبة لك إيه؟ .. جملة استفهامية نطقتها بعين تلمع بالدموع.

وعقبت بقلب يحترق: _ده أنا جت لك مخصوص من هناك علشان نرجع، وفي الآخر تقول لي مش هتقدر تكسرها! ماهي أصرت علي الطلاق واطلقتوا ومصممة بردوا علي عدم الرجوع، وإنت واقف في النص ولا طايلها ولا راضي نرجع، يرضي مين ده! يشبه حاله كتائه في صحراء في يوم شديد الحرارة، ولكنه لايجيد الرجوع ولا قدميه قادرة على أن تسعفه، ولكنه احتمى في مظلته التي تعطيه قسطاً طفيفاً من الاحتماء. وردد بتصميم:

_ولو عشت العمر كله من غيرها مش هجرحها تاني، ولا هرجع ولا هعرف غيرك ولا غيرها. واسترسل بروح منهكة: _هي مش بالنسبة لي أم ولادي ولا عشرة عمري، لااا، دي أكبر من أي إحساس وأقوي من أي شعور. غضبت بشدة من وصفه وأردفت برفض: _بس انت كدة ظالم ومش عادل يا إيهاب. وبتكسر قلبي وبتقطع فيه وانت عارف يعني إيه وجع القلب ومجرب. تنهد بتعب وهتف بنبرة حزينة:

_ما باليد حيلة، وما على القلب سلطان يافيروز، أنا اتسرعت في جوازي عليها وبدفع التمن دلوقتي. بس مكنتش متوقع إنه هيبقي غالي كدة. بيت اتدمر وأولاد اتهدموا وانسانة محطمة وبقت حياة بائسة للجميع. أشارت على حالها باستغراب من كلامه وتحدثت باستنكار: _طيب وأنا فين من كل ده! ده أنا احتويتك وقت ضعفك. كنت ليك وطن في عز الغربة. كنت ليك نهر ترتوي منه وقت ماتحب في أصعب لحظات ضعفك. كل ده ومليش حتى في قلبك حبة حب ولا حبة حزن!

مش بقولك إنت قاسي أوووي. تألم كثيراً لحزنها وأشفق على حالتها المعذبة وأردف بأسف: _حقك عليا يا فيروز لأني خذلتك أوووي. أرجوكي متشيلنيش ذنبك أكتر من إللي أنا شايله وحامله على أكتافي وشيال الحمول قرب يتهز ويقع. ابتلعت أنفاسها بصعوبة ورددت بتألم: _طول عمرك بتستغل طيبة قلبي وحبي يا إيهاب. وطول عمرك بتعرف تلعب على وتري الحساس إللي هو حبي ليك. واسترسلت بحزن بالغ: _طيب هي ليها ولادها عايشين معاها وأهلها حواليها ومش سايبينها.

أنا مكنش ليا إلا أنت، تعالي أداوي لك جروح قلبك ونعيش مع بعض في هدوء. قطب جبينه وتحدث باعتراض: _طيب سيبك منها، ولادي أعمل فيهم إيه! عايزاني أكسرهم من تاني وأدمر قلوبهم مرة تانية! مش هيحصل يافيروز، ولو هعيش عمري كله وحيد شريد مش هقدر. واستطرد بإيضاح: _هتتعبي معايا أوووي وهتتظلمي، وأنا مرضلكيش الظلم لأنك متستاهلوهوش، كفايه تجربتك الأولي اللي فوقتي منها بأعجوبة. قلبت عينيها بحزن عميق ودمع يلمع داخلهما واردفت:

_بس أنت المرة دي هتبقي القشة اللي قطمت ظهر البعير يابشمهندس. واسترسلت وهي ترتدي نظارتها الشمسية وعلي فجأه أمسكت يداه تتلمسهما بحنين بالغ مرددة بحب قبل أن تنتصب واقفة: _هتوحشني أوووي يا إيهاب، ولازم تعرف إني بحبك وهعيش الباقي من عمري محبش غيرك.

في نفس المكان وفي نفس اللحظة دلفت راندا مع صديقتها المقربة لها، والتي ما إن رأت صديقتها حالتها وحزنها الشديد أصرت أن تخرجها من حالة الضيق وقامت بعزيمتها على الغداء في أحد المطاعم. وبعد أن دخلتا واستقرتا في المكان إذا بها تنصدم من ما رأته. وشهقت عالياً بصدمة لفتت نظر الجميع إليها. فراندا من الشخصيات التي تندفع بشدة لموقف أغضبها وليس عندها ولو بضعاً قليلاً من التحكم بحالها.

وفي التو والحال التقت أعينها المصدومة من رؤيتها لهم وهي تتحسس يداه مع أعينها الدامعة ونظرتها المنكسرة. فتحطم كلياً وهو جالس مكانه وليس قادراً على التحرك محدثاً نفسه وهي متناسياً وجود تلك الفيروز قائلاً وهو ينظر لمقلتيها بدقات قلب تكاد تقفز من بين ضلوعه: _مهلاً حبيبتي لا تتعجلي في الحكم علينا، فأنا كنت أقاوم منذ لحظة في محراب حبك، وأنا لم أأمل لضمتك لا، بل فقط لأن لا أجرحك ثانية. أجابته عيونها بحسرة وألم:

_خائن وخادع ومتجبر يا ذلك القاسي الذي دمرني. كيف لك أن تفعل بي هكذا! كيف لك بتلك الجبروت الذي جعلك تأتي بها إلي هنا وتمسك يداك وتتلمسها بتلك الحميمية؟ رد حيرتها برأس تتحرك نفياً وكأنه وعى مايدور في خلدها وعيناه تنطق: _لا تظلميني فأنا دافعت عن وجودك داخلي بكل قوايا وأذنبت في حقها لأجلك. أذنبت في جرحها لخاطرك. أذنبت في هدمها لعشقك اللعين المستوطن داخلي كلياً. اهدئي حبيبتي اهدئي رفيقة الروح والنفس والفؤاد.

على نفس نظراتها المنكسرة الضعيفة تحركت شفتاه دون أن تدري ولكن بصوت عالٍ بعض الشيء: _آااااااااااااااااااه آااااااااااااااااااه. وعلى لسان حالها لا تنطق غير الآهات فقد توجعت كثيراً من ذاك المشهد الذي آلم روحها. نعم هي رفضته لكنها تعشقه. صممت على موقفها لكنها تحترق بشدة أكثر منه. والموقف الآن مابين ثلاث قلوب تنكوي ألماً وثلاث عيون نظراتهم ترسل نيراناً من شدة الغيرة والألم.

قلوب معذبة محطمة يكمل عليها القدر بمشاهده التي أدمت قلوبهم ودمرت أرواحهم. انسحبت فيروز من بينهم بدموع تهبط من أسفل نظارتها كالشلالات، فهي رأت العشق الذي بلا حدود في عينيه للمرة الثانية في وجودها. ورأت في عينيها العشق الممنوع له والذي حرمته عليهما، وانطلقت مسرعة من أمامهما وداخلها يتضرع ألماً بشدة بالغة. وقررت أن تعود إلى بلادها مكسورة القلب والوجدان. أما هو، فاق سريعاً واستوعب الموقف ووجد ساقاه تقوده نحوها بلا هوادة.

وقف أمامها يتمتم بحروف خرجت من لسانه بتلعثم: _أحلف لك بإيه إني رفضت بشدة إني أخونك تاني حتى لو انتي مش معايا دلوقتي. صدقيني ياحبيبتي أنا رفضتها بكل قوتي. رفضتها وأنا في عز ضعفي واحتياجي ليكي. أرجوكي دموعك بتقتلني. علت شهقاتها وارتفعت رغماً عنها وظهر ضعفها إجباراً عليها، وكأنه أعلن راية العصيان عليها، فهي تعشقه حد النخاع رغم استكبارها وتفوّهت بقسوة كي تداري خلفها ضعفها:

_إنت ايه ياأخي عايش حياتك براحتك وأنا مسحولة مع ولادك ومقهورة وسط مشاكلهم وانت عايش الغرام والهيام مع البرنسيسة! يابجاحتك يا أخي يابجاحتك. انصدم من تحولها تبكي غيرة وتنطق عناداً. يقف متحيراً متألماً لا يعرف كيف يجيبها على اهترائها. ولكن نطق بتحذير: _الزمي حدودك في الكلام معايا ياراندا إحنا في مكان عام وحوالينا ناس وأنا عامل اعتبار لكل حاجة بينا. اهتز فكها بسخرية وأردفت:

_إحنا اللي بينا اتقلب من دهب لتراب واتردم. كل إللي بيني وبينك دلوقتي الأولاد وانسي إني أرجع لك. تنهد بثقل وألم نفسي انتابه جراء كلماتها اللاذعة وردد بهدوء: _وأنا مش هقابل عصيانك وكلامك الجارح ليا وقت غضبك بإهانة ليكي ومش هعمل زيك. بعد إذنكم. أنهى كلماته الراقية بأسلوب مهذب وغادر المكان بقلب يحترق لأجلها، فهي غارت بشدة وما انفعالها ذاك إلا لعشق تود أن توأده في طي النسيان ولن تستطيع. أما هي، وقفت

تنظر لأثره بدموع وهي تردد: _خاين غشاش مخادع خاين خاين. إن أهم ما يكون في شريك عمرك لا أن يحبك أو يغدق عليك بكلمات الحب التي لا تنتهي. بل الأهم أن تأمنه ساعات الخصام. الناس يتشابهون في الحب ويتوافقون في الجميل. لكن معادن الناس تظهر في الحزن والخصام. كيف يتجاوز الناس أحزانهم وكيف يمرون بما يكدر صفوهم ويعكسونه على ذويهم.

من تهون عليه الأيام. ومن تشعر معه في خضم الألم بالأمن. وتحس إلى جواره بمعنى الاطمئنان حتى في أشد ساعات اختلافكم وأكثر أوقات انفعالكم. وهكذا كان إيهاب الرجل الخلوق الذي لم ولن يتجاوز بلسانه جرحاً بمشاعرها بلفظ قط. في منزل باهر الجمال حيث يجلس الثلاثي على طاولة الطعام، فإذا بجرس الباب يعلن عن وصول أحدهم.

قام زاهر بتأفف وهو يذهب ناحية الباب وقام بفتحه، وإذا به ينظر باستغراب حينما رأى رجلاً بزي رسمي ممسكاً بدفتر في يده متسائلاً برسمية: _هو. ده منزل زاهر محمد الجمال؟ اندهش زاهر وأجاب: _أيوة إنت مين؟ مد له ورقة مدوناً فيها شيئاً ما قائلاً: _دي دعوة مقدمها السيدة ريم المالكي بتتهمكم فيه إنكم مانعين عنها الحق الشرعي في ميراث أولادها. اتفضل امضي.

صعق الجميع مما استمعوا إليه، فهو لم يكن بمخيلتهم أن تفعل ريم تلك الفعلة الشنعاء من وجهة نظرهم. استلم زاهر الدعوة وغادر المحضر ودخل وهو يستشيط غضباً مردداً: _والله عال الست هانم بتتحداني ورافعة دعوه علينا إننا واكلين ميراثها. دي الدنيا انقلب حالها على الأخر والنسوان إللي ملهمش لازمة هيفضحونا على آخر الزمن. اغتاظت تلك الشمطاء ورددت بغضب اعتادت عليه كلما جاءت سيرة ريم:

_ده البت دي طلعت قادرة أوي والواحد مكنش واخد باله من وش الملايكة السهون إللي كانت راسماه علينا. رفعت هند حاجبيها ونظرت إليهم وتحدثت بسخرية: _مانا ياما قلت لك كده زمان بدل المرة ألف ومصدقتنيش وكنتي بتقولي إنتي غيرانة منها. ياما قلت لك احذري منها دي سهونة وخديها تحت جناحك وطبعيها على كيفك وإنتي كنتي تتريقي عليا وتقولي دي محترمة وفي حالها، أهي المحترمة بنت الأصول دوقتك ياحماتي كاس المر والفضايح. لوت

فمها وتحدثت بنبرة ساخطة: _ماهو كله منك يا وش المصايب مانتي إللي وقفتي شهدتي على شرفها في المحكمة وكدبتيني، كان زمانها دلوقتي طوعي وتحت رجلي ياللي عايزة الحرق بجاز وسخ. رفعت حاجبيها واسترسلت باستنكار: _لا كنت أسيبك تجوزيها جوزي وتقعد على قلبي هنا تقهرني وتموتني ناقصة عمر. ضغطت على منكبيها بشدة وهتفت بوعيد:

_الله الوكيل ياهند لو كسبت القضية دي لاتكوني مطلقة ومجوزاه بدل الواحدة تلاتة، واحدة للمزاج وواحدة تربي له البنات وواحدة تجيب له الواد وهحرق قلبك زي ماحرقتي قلبي. انتفضت بحدة من مكانها وهدرت بهم بصياح فقد طفح الكيل وهلكت روحها من المعيشة معهم وهي مثلها كمثل الكرسي لا فائدة لها. وفتحت هاتفها وبحثت فيه بعنف إلى أن أخرجت فيديو وعرضته عليهم أمام أعينهم وهي تردد بحسرة:

_طيب شوفي بقي إنتي وابنك اللي واقف ده اللي معيشني في جحيم ولا كلمة حلوة ولا ضحكة تبل الريق ومعيشني في نكد. لو فكرتوا تغدروا بيا في أي وقت لاتغدي بيكم قبل ماتتعشوا بيا. واسترسلت وعيدها وهي تحرك شاشة الهاتف أمام أعينهم: _الفيديو ده هبعته لكل معارفنا وهعملكم ليلة زي إللي كنتوا عايزين تعملوها في الغلبانة وهتبقي عاركة بقي.

اجتمعت جيوش الغضب في مقلتي زاهر وقفز إلى مكانها بسرعة وأمسكها من خصلات شعرها يلفها حول يديه بعنف ويداه تلوي ذراعيها خلف ظهرها بحدة أوجعتها وجعلتها تتألم كثيراً وهو يردد بفحيح: _الظاهر إني سكت لك كتيير يابت إنتي لحد ماتفرعنتي وبقيتي تطولي لسانك على حماتك وجوزك. واستطرد بنفس حدته: _إزاي تصوري الفيديو ده بازبالة ياللي مينفعش تعيشي في بيوت محترمة يالمامة.

حاولت أن تنتزع يداها التي أوجعتها بشدة وكادت ضلوعها أن تنكسر بين يديه ولكن كان ممسكاً لها بقبضة من حديد وهدرت به: _سيب إيدي وشعري يازاهر حرام عليك دراعي هينكسر أه أه سيبني حرام عليك ياشيخ. هزها بعنف شديد قائلاً لها بغضب: _مش قبل ماتمسحي الفيديو إللي معاكي ده ياهانم يامحترمة ياللي متعرفيش عن الاحترام شيء والله. أردفت اعتماد بنبرة صوت تحذيرية مغلفة بالقسوة:

_والله عال بقي ياللي تنشكي ملقتيش إلا اعتماد وتعملي معاها الدنيئة! ده إنتي سنتك سودة ومش معدية. وعلى فجأة سحبت الهاتف من يدها وضربته في الحائط بشدة وبغل ساحق جعله نزل أرضاً مهشماً إلى قطع لا يعرف عددها. وأكملت بضحكة شيطانية: _وادي الفيديو اللي كنت بتحتمي بيه كسرت لك التليفون خالص 100 حتة علشان ما يبقاش ليكي لازمة هنا. ونظرت إلى ابنها وأمرته:

_ارمي عليها يمين الطلاق البت دي مش هتبات فيها النهارده ولا ليها قعاد في البيت ده تاني طالما طلعت خاينه وعملت اللي عملته ده. فك يدها من قبضتيه ورماها بعيداً عنه كمان يلقي رثاً في سلة المهملات وكاد أن يتفوه بكلمة الطلاق إلا أنه استمع إليها تقول بوعيد.. في منزل جميل المالكي حيث يجتمع جميل بأبنائه في جلسة عائلية في منتهى الرقي الذي فقد في معظم بيوتنا. فأثناء حديثهم وابتسامتهم تحدث رحيم وهو يمسك يد والدته برجاء:

_ها قلتي إيه يا ماما هنروح امتى نطلب إيد مريم مش كفاية بقى الانتظار ده كله. لوت شفتيها بامتعاض وأردفت بنبرة حادة: _هو أنا من امتى قلت لك ان انا موافقة؟ نفخ بضيق شديد ثم حاول أن يكون هادئاً وهتف بنفاذ صبر: _مش إحنا اتكلمنا في الموضوع برده يا ماما وقلت لك أنا مش هتجوز غيرها ولا هفكر في غيرها ولا عايز من الدنيا غيرها. واستطرد حديثه وهو ينظر إلى والده كي يعاونه: _ما تقول كلمة يا بابا ولا سايبني لوحدي أواجه مصيري؟

ابتسم جميل ثم ربت على قدميه مردفاً بحنو: _ما تقلقش يا حبيبي مفيش أطيب من قلب ماما هي هتعوز إيه من الدنيا غير سعادتكم وبس. ثم نظر إلى فريدة مكملاً حديثه: _ولا إيه ياحبيبتي. مش اتفقنا إنك هتفكري؟ كانت تنظر إليهم جميعاً وعلى وجهها علامات السخط لتلك المحكمة التي نصبوها لها كما يجري في خاطرها. وأخيراً استمعت إلى صوت ريم تردد برقة تشبهها:

_من فضلك يا ماما إنتي طول عمرك مديانا الحرية الشخصية في اختياراتنا وعمرك ما وقفتي قصاد حد فينا في أي حاجة ودايماً بتدعمي رأينا ولو إحنا غلطانين تقولي لنا هسيبكم تكتشفوا ده بنفسكم. واسترسلت باستفسار: _اشمعنا رحيم بقي اللي بتعملي معاه كده؟ أنهت كلماتها بكل هدوء يشبهها وبدون أي انفعال. أصغت إليهم جميعاً، ثم رددت بانفعال: _الله ده انتم متفقين عليا بقي ونصبتو لي المحكمة وكل واحد منكم شايف إن أنا الشريرة في الرواية.

تحمحم رحيم سريعاً وأردف بنفي: _لا ياماما خالص والله ده إنتي أعظم وأطيب أم في الدنيا كلها. وتابع استعطافه لها مردداً بهدوء استدعاه رغماً عنه: _أنا مش عايز أعمل حاجة من غير رضاكي. ولا أخطي خطوة واحدة إلا بموافقتك ياست الكل. أشاحت بيدها دليلاً على انزعاجها وهتف جميل وهو يربت على يديها: _أنا إللي عايز أفهمه البنت ناقصها إيه عن كل البنات يا أم رحيم؟ اتسع بؤبؤ عينيها باستنكار وأردفت: _والله! انت مش عارف؟ وأكملت

بصراحة مزعجة للجميع: _أقول لك أنا علشان ملهاش أصل، معندهاش عيلة، من الآخر بنت ملاجئ وأنا ابني لازم يتجوز واحدة مأصلة وبنت ناس. انتفض رحيم من مكانه فقد فاضت روحه ألما من حديث والدته اللاذع وقام من مكانه بغضب وتحرك باتجاه الدرج وهو يردد بتصميم: _أوعدك إني مش هكلمك في الموضوع تاني من النهارده يا أمي، وأوعدك كمان إني مش هتجوز غيرها. واسترسل حديثه الغاضب وهو يدير وجهه إليهم ويتمسك بقضبان الدرج:

_وطالما كدة هطلع أبلغها حالا توافق علي ابن الأغنيا اللي منملكش نص مالهم اللي كان متقدم لها وانها تنساني علشان مطلعتش راجل قدامها. أنهي حديثه وصعد الدرج بسرعة غاضبة وقبل أن يصل إلي منتهاه استمع إلي نداء والده يردد بإقرار: _استني عندك بطل تسرع.

اطلع بلغها إن في نهاية الأسبوع تستنانا هنجي لها لحد عندها نطلبها منها وعرفها كمان إن أنا هبقي في منزلة باباها وإن أنا هبقي معاها هي واني هتشرط عليك علشان متفكرهاش سهلة وتضحك عليها يا ولد. أدار وجهه ودمع الفرح في عينيه وكأنه لم يصدق حاله وهتف باندهاش: _بجد يابابا أعمل كدة؟ واسترسل بحزن: _طيب وماما؟ نظر جميل إلي فريدة وهو يمسك يدها التي حاولت أن تنتزعها منه لشدة غضبها، إلا أنه تمسك بها بشدة وهو يشير

لها بعينيه أن تهدأ مجيبا: _اعتبر ماما موافقة وأنا إللي اديتك الإشارة. اطلع يالا بلغها وافرحو مع بعض ياحبيبي. تحدثت فريدة بغضب: _يعني أنا بقي مليش لازمة وبتحطني قدام الأمر الواقع ولا ايه؟ انتصب جميل واقفا وردد وهو ينظر إلي ريم مبتسما: _أنا هاخد ماما ياريما وهنقعد في الجنينة برة اعملي لنا كوبايتين قهوة علي مهلك خالص ياحبيبتي. أشارت إليه برأسها بطاعة مردفة بابتسامة: _حاضر يابابا من عيوني.

ابتسم لها ممتنا لطاعتها وفهمها عليه. وسحب فريدة برقة إلي الخارج كي يتحدثان بهدوء وحدهما وهو مصر على إقناعها. جلسا علي الكراسي الموضوعة في الحديقة وبدأ بالحديث قائلا: _ليه معترضة كلنا ولاد تسعة ومخلوقين من تراب وراجعين بردو للتراب؟ فريدة بتشبس: _ونعم بالله بس ده ابني وأنا عايزة له عروسة تليق بيه ايه مش من حقي؟ أجابها بعقلانية:

_من حقك طبعا. لكن الولد مش بس حبها ده عشقها وباين عليه جدا والقلب معلهوش سلطان وده إللي ربنا قسمه له. رفعت حاجبيها وهتفت باستنكار: _علشان بتشاغله دايما ومش سايباه في حاله. لو بعدت عنه هينساها خالص. جميل بغضب: _متعودتش منك علي أنك تجيبي سيرة الولايا بالغلط والعيب يا أم رحيم. وتابع حديثه بتأكيد:

_البنت رفضت إنها تبقي دكتورة جامعية ومشيت من هنا وبعدت عنه خالص مش شكل مانتي بتقولي. وابنك هو إللي بيجي لها وبيكلمها يبقي اعتراضك باطل ولازم تسحبيه. هزت رأسها بعنف وأردفت بثقة: _تمام عندك حق في دي. طب إنها بنت ملاجئ وملهاش أهل دي نعمل فيها ايه؟ ابتسم بحنو وأجابها: _لو كنتي في عهد النبي والناس كانت بتكذبه علشان يتيم وحكموا عليه نفس حكمك علي بنت طلعت غصب عنها يتيمة كان هيبقي نفس موقفك ساعتها. اعترضت بشدة

علي تشبيهه وهتفت باستنكار: _إنت بتشبه سيدنا النبي عليه السلام بمريم والله إنت ظالم! أخذ نفسا عميقا ثم زفره بهدوء وأجابها: _أنا مشبهتهاش بسيدنا النبي عليه الصلاة والسلام أنا شبهتها بالموقف ده أولا. ثانيا سيدنا النبي عليه السلام بشر زينا مش ملاك وربنا كان واضع المواقف إللي في حياته كلها لأسباب كتير ومن ضمن الأسباب إننا نقتدي بالمواقف اللي حصلت له ونتعلم. وتابع بتحذير: _كدة إنتي دخلتي في مرحلة الجدال وده غلط.

صارا يتحدثان مايقرب من ساعه وفي نهاية حديثه كي يقنعها: _ما تحكميش على اي علاقه انها هتنجح او هتفشل لمجرد الظروف اللي حواليها الأشخاص بتختلف والعقول بتتفاوت والزمن ذات نفسه بيغير المشكلة كلها على حسبه. واستطرد حديثه بعقلانية:

_عندك مثلا ريم بنتنا كانت حياتها هي وجوزها ماشيه زي الألف وجوازتهم كانت متوافقه جدا لكن ربنا سبحانه وتعالى ما أرادش انهم يكملوا مع بعض ومات وراح للي خلقه ولا أنا وإنتي قدرنا نعاند القدر وحكم ربنا ونخليه موجود. ضمت عيناها بعبث وأردفت باستنكار: _لاااا دي نقرة ودي نقرة إن الإنسان حياته تنتهي ده بأمر الله وملهوش علاقة بأي حد. أشار برأسه بموافقة علي اعتراضها وأردف باستجواد وهو علي نفس الثبات النفسي:

_طيب وراندا وإيهاب بردوا نفس اعتراضك يا أم رحيم! قدرتي تمنعي قدرهم بالفراق؟ قدرتي تخليها تحافظ علي البيت ومتهدمهوش بالرغم من إننا كلنا نصحناها وكلنا يعني العيلة إللي إنتي بتستشهدي بيها علي الغلبانة اليتيمة. إلى هنا صمتت ولم تدري ماذا تجيب علي محاصرته لها فقد سن سيوف عقله واحتج بقوانين الإنسانية أمامها ولم تستطيع أن تتفوه ولا أن تجيبه ففضلت السكوت.

أما هو هدأ قليلا ولم يتحدث وترك لداخلها النزاع معها وأمسك كوب القهوة يرتشفه باستمتاع وهو علي يقين أنها لن تستطيع الإفلات منه ومن نظرة الهدوء النابعة من عينيها استشف موافقتها.

فهي من النوع الذي يصمت إذا لم تجد ردا راجحا لاعتراضها وبعد قليل سألها عن ماوصل إليه تفكيرها وأشارت بالموافقة الذي جعلته يربت على ظهرها بحنو وأشاد إليها بأنها فعلت الصواب. وابلغ رحيم الذي هلل فرحا بموافقتها أخيرا وأنهم سيذهبوا إليها في عطلة الأسبوع أي بعد أيام قليلة. استقرت ريم في مكتبها ومنذ قدومها إلي تلك المؤسسة وهي تشعر بالارتياح الشديد وكأنها في مكانها التي تستحقه.

وخاصة أن مالك كان يتعامل معها مباشرة طيلة الأسبوع التي مكثته في العمل ولم يجعل بينهما أي وسيط وحقا رأت فيه الشهامة والأخلاق التي لم تعد موجودة في تلك الأيام. وأثناء انشغالها في التصميم الذي أمامها جاءها اتصال علي هاتف المكتب. رفعت سماعة الهاتف علي أذنيها وردت بعملية: _السلام عليكم ورحمه الله. ابتسم ذاك المالك علي أخلاقها وردها الهادي وتحدث:

_وعليكم السلام ورحمه الله. بعد اذنك يامدام ريم ممكن تيجي لي مكتبي حالا في حاجة مهمة ومينفعش غيرك يعملها. ردت عليه بالموافقة وبعد عشر دقائق أدخلتها مديرة مكتبه وكالعادة دخلت ريم وتركت الباب مفتوح فهي لم ولن تخالف تعاليم دينها مهما حدث. جلست في المقابل وألقت السلام وتابعت: _اتفضل يامستر مالك أنا سامعة حضرتك. منذ أن خطت قدماها من أول مرة إلي ذاك المكتب وسحر عيناها جذبه إليها.

كل حرف تتفوه به بالنسبة له شيء مختلف عن أي أنثي عرفها. فهي أمامه كالجوهرة الثمينة التي لاينالها إلا من يستحقها. حجابها ملفوف بحرفية وإحكام ولم تخرج خصلة واحدة من خصلاتها ويهبط علي صدرها. ملابسها غاية الشياكة والعصرية ولكنها قمة الاحتشام. فريم في المجمل أمامه تخطف أنظاره كل مرة يراها دون أن يشعر أو هي تدري. تحمحم بهدوء وتحدث: _أولا تسلم ايدك علي التصميم الأخير بجد حاجة تشرف أوووي وده طبعا إللي متعودين عليه منك.

واستطرد حديثه بإبانة: _ثانيا عايز حاجة تخرج من تحت ايدك برة إطار الدريسات. ضيقت عيناها وأردفت باستفسار: _متشكرة جدا. بس حضرتك تقصد ايه مش فاهمه؟ ابتسم بهدوء وأجابها: _أنا عايز منك كذا تصميم لكوليكشن لبس مدارس إعدادي وثانوي. حاجة كدة مختلفة عن إللي إحنا بنشوفة. وطبعا الفكرة جديدة هتخرج الطلبة برة إطار المريلة المعروفة بتطورتها. ها ايه رأيك هتقدري؟ تحمست بشدة للفكرة وأجابته بموافقة دون تفكير:

_الله دي فكرة جميلة أوي وبجد هبقي مستمتعة وأنا بنفذها. واسترسلت وهي تنظر لعيناه بتلقائية لأول مرة:

_عايزة أقولك يامستر اني صممت لنفسي لبس الثانوي وماما أول ما شافت التصميمات أخدتني عند إللي بتفصل عندها وعملتهم لي وكل إللي شافوني بيه سألوني عاملاه فين ووديتهم عند الست دي واتفقت معايا إن كل طالبة هجيبها لها هتديني عمولة عليها وأنا ساعتها كنت رافضة جدا. لكن بابا ساعتها شجعني وقال لي ده تعبك وخدي عليه أجر وخاصة إني غيرت لها كذا تصميم.

كان ينظر إليها ومثبتا عيناه داخل نظرة عينيها بعمق ويستمع لها باهتمام ولأول مرة دقات قلبه تتمرد عليه ولا يعرف مالسبب لتلك الدقات. وجد لسانه يتفوه تلقائيا: _علشان إنتي جميلة أوي لازم كل حاجة تطلع من تحت ايدك أجمل وأرق. انقلب وجهها بعلامات الطيف من نظرته التي تحولت لأخري لا تفهمها ومن حديثه الذي فاجأها به وأخفضت بصرها خجلا وهي تردد بخفوت: _ربنا يخليك يامستر ومرسي علي المجاملة دي.

عندما رأي الخجل علي وجهها زادها جمالا علي جمالها اندهش لحاله من تركيزه معها بتلك الشدة. تحمحم بهدوء وسألها: _مسألتنيش الفكرة دي جت لي منين؟ رفعت رأسها ولكنها لم تنظر إليه وسألته: _أكيد حضرتك صاحب المؤسسة الكبيرة دي فلازم أفكارك تكون مختلفة. أعجب بردها بشدة وتحدث بإبانة: _شوفي يا ستي احنا لينا صفحة كبيرة على الانستجرام الصفحة دي طبعا موثقة. تقريباً عليها ما يقرب من 5 مليون متابعه فلقينا الطلب على زي المدرسة شديد جدا.

وعلي عرض عليا الموضوع ان هو يجيب مصمم خاص بالفكرة دي لكن إنتي أول حد جه في بالي علشان عندي ثقة عمياء في ان اي حاجة هتطلع من تحت ايدك هتبقى رقيقة وكمان انتي بنت زيك زيهم هتقدري توصلي لعقول البنات دي وهتعاصري موجة الموضة اللي ماشيه. انتبهت لكل ماقاله وهتفت برجاء: _طيب ممكن أشوف بعض من ال دي علشان أقدر أفهم دماغهم أكتر. هز رأسه بموافقة وأجابها وهو يتناول هاتفه:

_طبعا مفيش مانع. أنا هبعتلك لينك الانستجرام الخاص بيا لأن أكتر شغلي بنزله هناك. واسترسل حديثه وهو يناولها الهاتف: _اتفضلي ياستي أدي ال علي البوست إللي عرضت فيه الفكرة. مدت يدها تأخذ منه الهاتف وإذا به يعلن عن اتصال أحدهم فتركته هي وهو في أن واحد وكاد أن يسقط الهاتف علي شاشته إلا أن يداهما الاثنين سحبته تلقائيا كي لا يقع واحتضن كف يده كف يداها الناعمة في لحظة دون قصد من أي منهما.

هو في تلك اللحظة التي احتضنت يده ليدها سرت قشعريرة في بدنه لأول مرة رغم أنه تزوج مرتان إلا أن لمستها المفاجأة جعلته ينتفض داخليا بشعور لا إرادي منه. أما هي انتبهت علي الفور وسحبت يداها وقامت من مكانها مستأذنة بخجل: _عن إذنك هروح مكتبي أحاول أشتغل علي الفكرة. ولم تنتظر رده وهرولت من أمامه وهي في قمة نهرها لنفسها داخليا عما حدث.