رواية بئر كندراش الفصل السادس عشر 16 - بقلم نورهان اسلام

حين تتحدث تأكد بثقتك بمن حولك، فالغدر لا يأتي إلا بمن وثقت بهم. كان الملك قاعد على كرسي العرش وبيتكلم مع الوزير بأمر: مع اقتراب عيد الأماني، ينشغل الجميع باكتساب قدرات سحرية ليتمكنوا من المشاركة في تحقيق الأماني... إذا أصدر أمر ملكي بأن للمشاركة في العيد يجب أن تمتلك ثلاثون قدرة سحرية على الأقل. الوزير كان مصدوم من قرار الملك لكن ميقدرش يخالف أوامره. تكلم بطاعة وقال: تحت أمرك مولاي، ولكن أليس كثيراً؟

وقف الملك وقال بأمر: لا تجادلني، أريد أن أسمع اليوم الخبر في جميع أرجاء الأرض. الوزير خفض رأسه احتراماً للملك ومشي من جناح الملك. *** كانت نجمة في كوخ آدم بتساعده في بعض الأخشاب اللي بيعملها بالسحر بتاعها. سمعوا صوت منادي بيتكلم وبيقول لهم بلغة أراسي: لقد رفع الملك عدد سحر خدمات تحقيق أماني البشر إلى ثلاثين خدمة سحرية.

خرج آدم ولبست نجمة القناع وخرجت. كان الجميع واقف مصدوم من كلام المنادي ومنهم اللي اعترض، ولكن المنادي كان بيكمل طريقه وهو بينادي بنفس الكلام. دخلت نجمة وآدم الكوخ. تكلمت نجمة وقالت: يعني إيه؟ أنا مش فاهمة حاجة! اتكلم آدم وهو بيقول: الناس في الأرض عندها من السحر من عشرة إلى خمسة عشر من خدمات السحر اللي قدرت تكسبها طول حياتها، وأغنياء الأرض عندهم من عشرين لخمسين قدرة سحرية. كان أغلب الشعب يقدر يشارك. دلوقتي...

نجمة باستغراب: يعني أول مرة يعمل كدا؟ طب إيه فايدة إنهم يشتركوا في عيد الأماني؟ آدم: كل اللي بيقدر يحقق أمنية لبشري، بيقدر يكسب خمس خدمات سحرية بسهولة. نجمة: انت كدا مش هتقدر تشارك. هز آدم رأسه بيأس وقال: للأسف أنا لحد دلوقتي معنديش غير عشرين خدمة سحرية بس. رفع إيده واللي بيكون فيها عداد فيه رقم السحر اللي قدر يكسبه. رفعت نجمة إيدها وكان عدد السحر اللي تمتلكه خمسة عشر خدمة سحرية. نجمة كانت بتتكلم بثقة وقالت:

فاضل قد إيه على عيد الأماني؟ آدم: أقل من أسبوع! هزت نجمة رأسها وخرجت من كوخ آدم. قعدت في مكان جنب الكوخ وهي بتقرا الكتاب اللي في عقلها: "في تحدٍ تستطيع أو لا تستطيع، قد تفوز إرادتها، عزيمتها لا يستطيع أحد إيقافها.. لا تحاول أن تفوز لإن الخسارة حتمًا لك." وكان تحت إمضاء الساحر. اخدت نجمة نفس عميق وفتحت عيونها وهي بتتحدى نفسها إنها تشترك في أول عيد أماني ليها على الأرض. *** "يا لك من صغير لا تدرك المستقبل."

كانت هتكمل وهي بتتكلم مع ابنها "راميان" لكن قاطعها دخول الملك على جناح راميان اللي هي قاعدة فيه. كان نايم لما دخل الملك وهو بيبص في وش راميان وقال: لقد أخذ كل شيء منكِ، حتى ملامح وجهك البريء.. ولكن أليس من الغريب أن تمتلكِ ملامح بريئة وعقلاً خبيث؟ وقفت قمر وهي بتبتسم بسخرية وقالت: الأغرب أن تمتلك عرش البلاد، وخوف الشعب في قلبك.. كنت أظن أن لك عقلاً تحكم به البلاد.

خرجت قمر من غرفة راميان. الملك كان واقف والغضب باين على وشه تجاه قمر. عينه فضلت على الباب اللي خرجت منه قمر. اتنهد بغضب وخرج وراها. كانت وصلت لآخر ممر في القصر. حرك إيده وهو بيرفع قمر وقيد إيديها وهي في الهوا علشان متقدرش تتحكم في سحرها. قرب الملك منها ببطء وكانت هي بتحاول تفك نفسها. وصل الملك لآخر الممر وكان واقف قدامها. نظرها كان مثبت على الملك وهي بتتكلم بغضب: اتركني، لا أريد أن أستخدم قوتي.. أنت تعلم ذلك!

ضحك الملك بسخرية وقال: قوتك! قمر! قلت لكِ لا تستغلي محبتي لكِ.. أنتِ لا تعلمين ماذا أفعل من أجلك. كانت بتنهج من الجهد اللي عملته وهي بتحاول تفك نفسها. حرك إيده وهو بيزيل السحر اللي ربطها في الهوا بهدوء علشان تنزل على الأرض. مسكت إيدها بألم وهي بتتكلم مع الملك وقالت: لن أغفر لك هذا. مشيت من قدام عيونه وهو فضل مركز معاها لحد ما غابت عن عيونه. ***

عدى يومين وكان عيد الأماني اتأجل أسبوع بسبب ثورة الشعب على زيادة الخدمات السحرية. استغلت نجمة الحدث وكانت بتحاول تكسب قدرات سحرية على قد ما تقدر. كانت أصعب قدرة بتحاول تكسبها هي إنها تقدر تتحكم في المعادن اللي حواليها. مسكت مغناطيس في إيديها وكان فيه معادن صغيرة على الأرض. كانت نجمة بتطير والمعادن تمسك في المغناطيس. كانت بتتكرر العملية دي كل يوم حوالي 3 مرات ولمدة 5 أيام. آخر مرة إيدها وهي بتعمل المحاولة أصدرت ضوء كدليل على اكتسابها قدرة سحرية جديدة. بصت في العداد اللي بيظهر عدد السحر عندها اللي قدرت تكسبه. كان عدد السحر 28 قدرة سحرية قدرت تكسبهم خلال فترة قصيرة جداً.

فاضل علشان تقدر تشارك في عيد الأماني يكون عندها قدرتين زيادة. *** "حقيقي شكراً ليك جداً تعبتك معايا." كانت هنا بعتت رسالة لـ أسر على الواتساب. فضلت مستنية منه رد لكن كان قافل الواتساب بتاعه حالياً. رميت الموبايل بتاعها على السرير وهي بتقوم علشان تدخل المطبخ تساعد والدتها. *** كان حسن قاعد في أوضته وماسك الموبايل بيلعب بيه. الباب خبط فقام يفتح وكان واقف أسر وماسك في إيده علبة شيكولاتة. رحب بيها حسن وهو بيقول:

أستاذ أسر.. اتفضل.. حضرتك منور. دخل أسر وقعد وهو بيسأله عن صحته. خرجت والدة هنا وهي بتقول: مين يا حسن؟ شافت أسر قاعد. دخلت وهي بتسلم عليه وبتقول: أهلاً يا بني عامل إيه.. تسلم زيارتك يا حبيبي. أسر بابتسامة: كنت عايز أطمن على البطل ده، عامل إيه؟ ابتسم حسن وقال: بخير، الحمد لله.. شكراً على اللي عملته معانا امبارح.

كانت هنا سامعة من المطبخ إنه موجود. دخلت الأوضة بتاعتها وغيرت هدومها. دخلت المطبخ تاني وهي بتجيب طبق وبتحط فيه قطعة جاتوه. ابتسم لما شافها خرجت وقعدت معاهم. بدأوا يتكلموا شوية وكان أغلب الحديث بين هنا وأسر عن نجمة وعن مواقف كتير بينهم. طلع أسر صورة من محفظته لما اتكلمت هنا عن نجمة. كانت صورة ليه هو ونجمة وقمر من وهما صغيرين. مسكت هنا الصورة وقالت: نجمة كلمتني عن أختها التوأم كتير، لكن متوقعتش إنهم شبه بعض أوي كدا.

هز آدم رأسه وقال: هما فعلاً كانوا نسخة من بعض بشكل كبير. *** بعد 3 أيام. كان ميعاد عيد الأماني. الناس كلها بدأت تجهز للاحتفال. من قواعد الاحتفال إن أول عملة معدنية بتنزل.. الملكة هي اللي بتقرا الأمنية والملك بينفذها للشخص ده. ***

خرج الملك وكانت معاه قمر. أول الأرض بتبدأ من عند البئر. بدأ الشعب يرحب بالملك والملكة وكانت قمر بتبص ليهم وتبتسم. فضل الملك ماسك إيد قمر لحد ما دخلوا على المكان اللي أي حد بينزل فيه البئر بيكون فيه. المايه اللي موجودة فوق عكس الجاذبية دليل على إن الأرض لسه بخير وده اللي طمن الملك. دخل الملك المكان والشعب كان واقف تحت وكان آدم ونجمة وماندريانا وآبيل صديق آدم واقفين مع بعض. مسك الملك الورقة تحت تحية الشعب والسعادة اللي كانوا فيها وهو بيديها لقمر اللي بدأت

تقراها عليهم بلغة الأرض: "لقد استحوذ هذا البئر على ثلاثة أشخاص لي، كانوا بالنسبة لي كل شيء، لا أؤمن بأن هذا البئر له القدرة على شيء ولكن يوجد أمل لدي برجوعهم، خصوصاً تلك النجمة التي قضيت معها طفولتي." كان تحت إمضاء أسر عبد الرحمن. فضلت قمر واقفة وملامح الصدمة باينة على وشها. أسر أخوها عايش. نجمة كانت قالت لها إنه مات. لاحظ الملك شرود قمر وسكوتها المفاجئ.

في اللحظة دي كانت ماندريانا وآدم واقفين ونجمة واقفة وسطهم. بعد ما قمر خلصت كلامها سحبت ماندريانا القناع من على وش نجمة اللي كانت علامات الصدمة باينة على وشها من الكلام اللي سمعته. كدا فهمت إن أخوها أسر عايش. *** أسر رجع البيت ونام على السرير وهو بيفتكر الكلام اللي كتبه.