رواية ضرة بدون علمي الفصل الثالث 3 - بقلم اية الموافي

نظرت ميرنا لهم وقالت بتردد: -هو إيه فايدة اللي إنتوا بتعملوه دا؟ نظروا لها بملل وقالت أحلام ببرود: -اللي إحنا بنعمله دا أصلاً المفروض إنتِ كنتي تعمليه من زمان، أي نعم كلنا متفقين إن مصطفى حقير، بس إيه المنظر اللي إنتِ بتظهري بيه قدامه دا؟ بصت ميرنا على نفسها بعبوس، بعدين بصتلهم وقالت بحزن: -أعمل إيه يعني؟ مهو مش اشتكى. ضحكت هايدي بعدم تصديق وقالت: -هو لازم يشتكي علشان تهتمي بمظهرك قدامه؟

شعرك المقصف دا إزاي سايباه كدا من غير ما يتقص؟ وضوافرك المكسرة دي إزاي سايباها كدا، وبشرتك البهتانة دي إزاي مش مهتمية بيها. حست ميرنا بالإحراج، فقالت أحلام: -إنتِ هتبقي الطرف الأساسي فينا علشان إنتِ ليكي دور مهم أوي في الخطة دي. اتنهدت ميرنا وقالت بغيظ: -واشمعنا أنا؟ نفخت هايدي بضجر وقالت:

-علشان إنتِ أكتر واحدة هو بيعد معاها، المطلوب منك إنك تهتمي بمظهرك وتشيل البوز الفقر اللي على وشك دا، فرفشي كدا وعلقي بيكي علشان يقضي معاكي أكتر وقت ممكن، وبعدها بقى إنتِ عارفة هتعملي إيه. اتنهدت ميرنا بملل وقالت: -شوفوا إنتوا هتعملوا إيه، خلصوني. بصت هايدي وأحلام لبعضهم بحماس، وأول حاجة عملوها إنهم ودوها الكوافير علشان تقص شعرها وتعمل جلسة نضارة لوشها. ميرنا بحيرة لأحلام وهي عاطية إيدها للبنت علشان تُبردها:

-إنتِ بتعملي إيه؟ مبصتش أحلام عليها وقالت وهي بتبص على موبايلها بتركيز: -بطلب هدوم شيك أونلاين. ضمت ميرنا بين حواجبها بإستغراب وقالت: -وتطلبي هدوم ليه؟ أنا عندي كتير. ضحكت أحلام بسخرية وقالت: -وهو اللي عندك دي هدوم؟ رفعت ميرنا حاجبها وقالت بإستنكار: -أومال إيه يعني؟ رفعت أحلام حاجبها وقالت: -حبيبتي إنتِ كل الهدوم اللي عندك نفس الاستايل، الفرق بس إن الألوان مختلفة. كملت كلامها وهي بتقول بعدم تصديق:

-وبعدين إيه اللون الأخضر الفاقع اللي إنتِ لبساه دا؟ هو في حد لسه بيلبس اللون دا في العبايات. بصت هايدي على ساعتها وقالت بإستعجال: -خلصوا يلا بسرعة علشان كلها ساعة والـ بيه يوصل البيت. بصت ميرنا على ساعتها وقالت بتأكيد: -فعلاً عندك حق. بصتلهم أحلام وقالت: -كلها نص ساعة والهدوم توصل. وقفت هايدي قدامها وقالت بتأكيد: -زي ماقولتلك قبل كدا، أول ما يوصل البيت ابتسمي بدلع واتكلمي برقة وقوليله: وحشتني يا حبيبي.

بصتلهم ميرنا بتوتر وقالت: -بس هو كدا مش هيشك لما يلاقيني بتدلع مرة واحدة؟ بصتلها أحلام وقالت: -قوليله إنك عايزة تعيدي تجربة شهر العسل عادي، أو قوليله إنك زهقتي من مسؤوليات البيت وعايزة ترفهي على نفسك وعليه. اقتنعت ميرنا وقالت: -فكرة برضو. *** بعد ساعة وصل مصطفى البيت، بس استغرب لما شم ريحة برفان حلو. دور على مصدر الريحة، بس اتصدم ووسعت عيونه بصدمة، والحاجة اللي كانت في إيده وقعت. ابتسمت ميرنا برقة وقالت:

-وحشتني يا حبيبي. قفل عينه ودعكها جامد وفتحها مرة تانية وهو مش مصدق نفسه. اتكلم أخيراً وقال: -إنتِ ميرنا؟ ضحكت بدلع وقربت منه وهي بتقول: -إنت شايف إيه؟ بص عليها بتركيز وقال: -أنا شايف واحدة مزة قدامي. كانت هتتعصب عليه وتنفعل، بس لحقت نفسها وقالت بعبوس طفولي: -هو إيه اللي شايف قدامك واحدة مزة؟ قصدك يعني إني مكنتش مزة؟ ضحك وهو بيلمس شعرها: -إنتِ طول عمرك مزة، بس اتغيرتي خالص. ابتسمت وقالت: -اتغيرت إزاي يعني؟

بص عليها بإعجاب وقال: -شعرك بقى مترتب أكتر، ولابسة بيجامة جميلة وحاطة برفان حلو، في اختلاف كبير أوي. حست بالذنب علشان مكنتش مهتمية بيه ولا بنفسها قبل كدا، بس نفضت الإحساس دا وقالت بحزن في عقلها الباطن: -أوعي يصعب عليكي في اللي هتعمليه دا، واحد ناصب عليكي في الفلوس اللي حيلتك واتجوز عليكي واحدة، وبرضو ناصب عليها، دا غير التالتة اللي كان مصيرها هيبقى نفس مصيرنا لولا إننا لحقناها. بعدت عنه وطلعت العصير من التلاجة وقالت

وهي بتصبه في الكاسات: -غير هدومك وتعالى علشان نقعد مع بعض شوية. ابتسم بحماس وقال: -ثواني وجايلك. أول ما مشي اتأكدت إنه مش شايفها وطلعت حبوب الهلوسة من جيبها وقالت بضحك خبيث: -استاهل بقى من اللي هيجرالك.