رواية فعلتها لأجل أبي الفصل الحادي عشر 11 - بقلم هدير عبدالعليم

ماما: يا دنيا نفسي أفرح بيكِ. دنيا: تفرحي فيا؟ ماما: لا بجد نفسي أفرح بيكِ. بابا بحكمة: مشكلتنا إننا بنشوف فرحة البنت بالجواز بس، بالرغم إننا ممكن نفرح بيها كل يوم عادي، نفرح إنها بتقابل صعوبات وتعديها، نفرح كل مرة صانت فيها نفسها من فتن الدنيا، عن كل حلم وصلت له ونجاح حققته، كل دي إنجازات المفروض نفرح إنها بتعملها وإنها بنتنا الجميلة اللي عملت كله ده لوحدها. دنيا بحضن: أجمل أب في الدنيا كلها.

ماما بحزن: يعني برضو مش هتتجوزي؟ دنيا: زي ما بابا قال، أنا لسه فعلاً طالعة من تجربة محتاجة أتعلم منها. بابا بفخر: يعني هتكملي تعليم؟ دنيا بسعادة: أيوه إن شاء الله. ماما باستسلام: مقدرش أتكلم، كفاية المرة اللي فاتت أنا كنت السبب، ربنا يكتب لك الخير يا بنتي ويعوضك خير. آلاء: النتيجة هتبان بكرة، متعرفيش أي حاجة عنها، خايفة أوي بجد، نتيجة تالتة إعدادي دي مرعبة بجد. دنيا: لسه والله، مش عارفة أي حاجة. ماما: مين اللي بيخبط؟

مالك: دا خالو محمد. ماما: إزيك يا أبو حنين، عامل إيه؟ خالو: أنا جاي أشرب الشربات؟ دنيا بحماس وفضول: النتيجة ظهرت؟ خالو: أه. آلاء بتشد منه الدرجات بسرعة عشان تشوف عملت إيه: بابا أنا نجحت وناقصة درجة ونص، بجد مش مصدقة. خالو: أه ما شاء الله. دنيا بتنط من الفرحة وبتحضني: بجد ألف مبروووووك. معاذ: يبقى كده هنخرج مرتين الأسبوع ده صح؟ دنيا بضحك: إن شاء الله، هي عزومة واحدة.

ماما: ألف مبروك، يلا بسرعة بقى هاتوا البيبسي لخالكم. خالو بضحك: كفاية ليمون نعناع. مالك بضحك: فعلاً، تعرف أنا بفضل أدور كتير عشان أشوف حاجة مش مقاطعة، وكأن كل المنتجات ليهم. خالو بابتسامة: بتدور كتير أوي صح؟ مالك: أنا بكون هطق بجد. خالو: اخص عليك يا مالك. مالك بسرعة: بكون مضايق عشان إخواتنا هناك، المواقف صعبة أوي والناس مش عارفة تنام بجد، لكن مش فارق معايا أشرب أي حاجة، بكون مقهور عليهم.

خالو: يا عمري تسلم الأم اللي ربتكم. ماما: ويسلم الأب اللي علم الدين والمبادئ. خالو: أكيد طبعاً. بعد شهر ماما: قدمتي ورقك في ثانوي. آلاء: أه. ماما: كأن نفسي تدخلي تمريض عشان المصاريف. آلاء: مش عايزها. بابا جاي من جوا: هو أنا شكيت من المصاريف؟ أنا شغال ليل نهار عشانهم، أهم حاجة يعملوا اللي عليهم، كل حاجة بتيجي برزقها، قولوا يارب وبس. ماما: ملناش غير ربنا بس، الدنيا صعبة فعلاً و...

بابا بعصبية: ما هو مش طبيعي تكون هي عايزة تدخل مكان بتحبه وأنا أقولها لأ، حتى لو هاجي على نفسي في أي حاجة، المهم عندي يكونوا هما مبسوطين. آلاء: يا بابا ربنا يديم وجودك اللطيف في حياتنا. بابا: أهم حاجة تعملي اللي عليكِ، أنا واثق إنك هتكوني حاجة كبيرة أوي. آلاء: إن شاء الله. بعد شهر آلاء: خالتك بره وجوزها. دنيا: خالتك مين؟ آلاء: خالتك رباب. دنيا: أه.

آلاء: الغريب إن جوز خالتك ده مش بييجي هنا من زمان، ده من قبل جواز عمر مجاش هنا. دنيا: تصدقي فعلاً، جاي لي، مش بطيقه بجد، كأن سبب كل الخراب اللي حصل في حياتي. آلاء: كل تجربة صعبة في حياتنا بتخلينا أنضج وأقوى، بتعلمنا إزاي نتعايش ونعيش، بتعرفنا إن الدنيا مش هتقف على موقف صعب مر علينا، وأكيد أنتِ اتعلمتي وده المهم، والموضوع اتقفل.

دنيا: بس كل ما أفتكر اللي حصل، أفتكر أصعب فترة مرت عليا، فترة كنت فاقدة فيها الثقة في نفسي والناس وكل حاجة. آلاء: وأهي عدت واتعلمتي، أنتِ ليه بتتكلمي وكأنك لسه عايشة في نفس الفترة؟ دنيا: المواقف الصعبة بتعدي وبتخلينا أنضج، بس بتفضل محفورة في الذاكرة، مش بنقدر ننسى. ما هو أنتِ هتنسي إيه؟ فترة كانت أيامك فيها شبه بعض، ولا خوفك إنك تقابلي حد ويسألك عاملة إيه وتقولي الحمد لله كذب!

ما هي الفترات الصعبة هتعدي وبتعدي، بس مش هتتنسي. كل كلمة سمعتها في الفترة الصعبة دي فاكراها وفاكرة كانت فين ومن مين، وبعد كله ده عايزني أنسى اللي كان السبب في كله ده أو أتعامل معه عادي؟ ما هو مش طبيعي أتعامل معه عادي، ده مستحيل، إحنا بشر يا آلاء. آلاء وعينيها الدموع: حقيقي ربنا يعوضك خير. دنيا بابتسامة: لا أنا تمام، متقلقيش يا أختاه، يارب يعوضنا كلنا خير يا عمري. بابا بيخبط: ممكن أدخل؟

دنيا بابتسامة: أكيد طبعاً، اتفضل. بابا: عرفتي جوز خالتك جاي ليه؟ دنيا: بصراحة لأ، وحقيقي مش عايزة أعرف. بابا بابتسامة: لازم تعرفي لأن الموضوع يخصك. دنيا: جاي لي؟ بابا: عايزك تتجوزي عمر. دنيا بدهشة: ياااها، لأ والله. بابا بسعادة: أه والله. دنيا: ورأي حضرتك إيه؟ بابا: رأيك أنتِ إيه؟ دنيا: ممكن أقول رأيي ليهم بره بعد إذنك طبعاً. بابا: طب عايزة أعرف أنا الأول. دنيا: ...