رواية فطنة القلب الفصل الأول 1 - بقلم سلمى خالد

الحاج محمد العطار: أب لبنتين، مراته متوفية، عنده أجناس عربيات ومرتاح مادياً. بيحب الحياة العادية وعايش في بيت ديكوره هادي. قطوف محمد العطار: عندها 24 سنة، بتحب الميكانيكا أوي. خريجة آداب علم نفس، مش بتشتغل بمهنتها. من صغرها بتحب العربيات وبتحب تصلح فيها. بترد على طول ومش بتصبر أي حد يضايقها.

ياسمين محمد العطار: عندها 22 سنة، خريجة تجارة جديد. بتحب أي حاجة فيها أرقام. كانت عادية جداً لحد وفاة مامتها واتحولت وبقت تخاف من كل حاجة. مرفت العطار: أخت محمد، بتحب المظاهر ومش بتحب أخوها. مازن العطار: ابن مرفت، عنده 26 سنة. عايش حياته، خريج كلية حقوق. بيحب خاله أوي. مريم: صديقة قطوف وأخصائية نفسية. «قطوف الياسمين» الفصل الأول (سأبقى خاصمك)

توقفت أنفاسه بلحظة، وتوقف عقله عن التفكير. يريد الرد ولكن انعقد لسانه عن الحديث. في حين رفعت نور حاجبها في تعجب متمتمة: _مالك يا مازن؟ ساكت كده ليه؟ حرك رأسه في نفي، يبتسم بتوتر استطاع إخفاؤه قبل أن تلاحظه: _مفيش، بس اتفاجأت بيكِ هنا.. بتعملي إيه هنا؟ عوجت فمها في ضيق، تردف في حنق: _أخويا كان تالتة ثانوي والمفروض أقدم له في الكلية وجيت معاه عشان ماما مش قادرة تروح معاه. بس مقولتليش بتعمل إيه هنا؟

ابتسم في مكر، يجيبها بنبرة هادئة وهو يقفز من أعلى السيارة: _مفيش، ليا صاحب هنا وبزوره. عقدت حاجبيها في دهشة، متسائلة: _إزاي! أنتِ متخرجة من يجي 4 سنين؟ ضحك مازن في خفة، ثم أجاب مشيراً لداخل السيارة كي تدلف لها: _لا ماهو عنده أخ ولد وهيدخل الجيش وعشان يهرب فـ بيعيد السنة عشان ميدخلش الجيش. حركت نور رأسها في إيجابية، ثم علت البسمة ثغرها تردف في سعادة: _هتوديني فين؟ استدار كي يدلف للسيارة يستعد للقيادة، يجيبها

وهو يشغل محرك السيارة: _شاوري ونروح. بقيت دقيقتين تفكر، ثم اندفعت عنها الكلمات قائلة: _أخويا لسه جوا الجامعة، خلينا نروح أي كافيه قريب ولما يخلص هيرن عليا وأجيله. حرك مازن رأسه وانطلق معاها، يهمس في سره: _سامحيني يا ياسمين. نطقت نور تتطلع له في اهتمام قائلة بنبرة فضولية: _بس قولي يا مازن، يعني إحنا نعرف بعض مدة كبيرة وأنت تعرف عني كل حاجة وأنا لأ.. فين باباك؟

مش بسمعك بتجيب سيرته خالص ولا حتى والدتك، يمكن خالك هو بس اللي بتحكي عنه. زفر مازن في ضيق من أسئلتها، ثم أجابها باقتضاب: _والدي مسافر من وأنا صغير ومشوفتهوش، وأمي.. أنا عايش معاها وخالي بروح له كل يوم وبقعد معاه. في أي أسئلة تانية. تعجبت نور من نبرات صوته المتضايقة، لتردف في حيرة: _هو أنا عملت إيه ضايقك! أوقف مازن السيارة فجأة، ونظر لها في حدة يغمغم بصوت مختنق:

_كونك بتحكي كل حاجة دا مش ذنبي، إنما أنك تسألي في حاجة متخصكيش يبقى بتخنقيني يا نور. تشكل الذهول على ملامحها، تشعر بالدهشة من تعبيرات وجهه الغاضبة. لم يحدثها أحد هكذا من قبل، لتنطلق منها كلمات غاضبة: _أنت إزاي بتكلمني كده؟ أنت شايف نفسك على إيه؟ ابتسم في سخرية، ثم تمتم ساخطاً:

_والله أنتِ اللي جيتي تتكلمي معايا وتدلقي الكلام، يبقى من حقي أشوف نفسي. ثم أعتقد أن مفيش بنت تسمح لنفسها تسمع من ولد شاب أعزب يقول لها أنتِ موزة ويعاكس فيها وهي تفرح ويبقى كرامتها وجعها من طريقة كلامي.. صح ولا إيه؟ صُدمت نور من حديثه وألتمعت الدموع بحدقتيها، في حين رأى مازن ملامحها الباهتة من أثر حديثه القاسي الذي كان بمثابة سوط يجلدها دون رحمة. زفر مازن في ضيق من نفسه، فهي ليست المخطئة الوحيدة بهذه العلاقة.

تمتم بنبرة هادئة: _بصي يا نور.. لو هنتكلم بصراحة، علاقتي بيكِ غلط كلها من أولها لآخرها... ومش نافعة. ودا مش معناه إنك وحشة، أنتِ في ألف حد يتمناكِ.. بس الفكرة أنا اتربيت على أن البنت مينفعش تصاحب ولد والعكس صحيح.. وعشان كده الكلام طلع مني كده... أقولك على حاجة، البنت اللي صعبة المنال هي اللي الرجل يعمل كل المستحيل عشان يتجوزها ويملك حاجة مش في إيد غيره...

بيحس إنه مسك كنز ويوم ما الكنز دا هيضيع هيخاف ويترعب من أنه يضيع، لأن وقتها هيفتكر هو تعب إزاي عشان ياخدها... ففكرة البنت تصاحب ولاد عادي وتنفتح أكتر وأكتر دا بيأذيها مش بيديها كل اللي نفسها فيه... جربتي تسألي سؤال لنفسك، هل أنا شايفك إزاي؟ طب هل الناس لو شفتك معايا هيقولوا إيه؟

طب لو جه خطيبك أو شخص بتحبيه أوي وسألك في يوم كنتِ مرتبطة قبل كده أو ليكِ صحاب ولاد قبل كده وبتهزري معاهم عادي وفي هزار بالايد عادي.. هتجاوبي تقولي إيه؟ عملتي حساب اللحظة دي... ليه نخسر شخص بتحبيه في مقابل وقت هيعدي وصحبك أو الشخص اللي ارتبطتي بيه دا ممكن في لحظة يبعد ومش هيفتكرك.. أنتِ فاهمني يا نور؟ دموعٌ تنحفر بوجهها، وجنتيها تمتلأ بالحُمرة، نظراتها لا يوجد بها سوى خذلان. مدت يدها تزيل تلك الدموع ثم هتفت بصوتٍ

مبحوح: _أنا فهمت قصدك.. وأنت المفروض متربي على كده، بتعمله ليه من الأول؟ صمت مازن ولم يستطع الحديث، في حين مدت نور يدها لتفتح باب السيارة تتطلع نحوه للمرة الأخيرة تتحدث في ألم: _أنت اتكلمت وسمعتك.. وأنا هقولك جملة واحدة يا مازن.. اللي أنت بتعمله أكبر بكتير من غلطي، على الأقل مش بنصح وأنا في قلب الغلط أو سبب فيه.. لكن أنت عارف الصح إيه وبتعمل عكسه.. ابقى بص في المراية وشوف مين فينا اللي ممكن يخسر اللي بيحبه بجد.

غادرت نور السيارة في حين بقى مازن يستمع لحديثها في صمت. كلماتها تتردد بأذنه. هل بالفعل سيأتي اليوم ويفقد من يحب؟ هو تربى على أنه ولد.. شاب يفعل ما يحلو له فلن يكن ذنبه مثلما الفتاة تفعل!

ولكن نسى أن هناك حساب لن يفصل بينه وبين الفتاة سيصبح الاثنان في تساويٍ. خلق الله لك قلب وخلق للفتاة قلب، خُلق آدم من طين وخُلقت حواء من طين، وخلقت حواء من ضلع آدم وأصبح آدم لا يستطيع ترك حواء، فكيف لك يا بني آدم ألا تصبح صفحة بيضاء كما تريد أن تصبح الفتاة هي الأخرى صفحة بيضاء لا بل ناصعة البياض؟! *** رفع المنديل كي يمسح قطرات العرق التي تغرق جبينه، يحاول إظهار الثبات ولكن فشل في ذلك.

ضرب محمد على المكتب في عنف، يتطلع نحو المرتعب أمامه في شرسة لم يراها من قبل، يزمجره في عنف: _قسمًا بالله يا نادر لولا كان في عيش وملح بينا كنت سجنتك.. العيش والملح مهانوش عليا عشان أنا ابن حلال، إنما ابن الحرام هو اللي بتُهان عليه... من النهاردة مشوفش وشك هنا تاني.. وإلا لو لمحت ظِلك معدي مش هيكون ليك عندي دية... فــــــــــــاهم. حرك نادر رأسه في إيجابية سريعًا، وفي حين هدر محمد في غضب: _بـــــــــرة.

هروال نادر سريعًا للخارج، في حين انهارت قوة محمد وجلس على المقعد في تعب بات ظاهرًا عليه، يحاول أن يستمد طاقته ولكن باتت المحاولة فاشلة. دلف محمود له كي يخبره ببعض المهام ولكن وجد ملامحه باهتة، نظراته مرهقة للغاية، ركض نحوه في سرعة يردف بنبرة ملتاعة: _حاج محمد أنت كويس؟

أشار محمد نحو جهاز قياس السكر، وسرعان ما فهم محمود سر إرهاقه، ليسرع بجلب الجهاز وإعداده كي يقيس مستوى السكر، وبعد دقيقتين أظهر الجهاز أن مستوى السكر عالي بالدم، ليسرع بجلب الإنسولين وإعطائه له. مر وقت كان محمود يقوم بكامل الأمور حتى يسترد الحاج محمد جزءًا من عافيته، فقد ساعده على الاستلقاء على الأريكة، وبالفعل بدأ محمد بالحديث في تعبٍ لاتزال نبراته تحمل شوائب منها: _معلش يا محمود تعبتك معايا.

ابتسم محمود في هدوء يجيب: _تعبك راحة يا حاج... ثم أضاف في قلق: _بس حضرتك كده مينفعش تبقى لوحدك في الشغل كده، ممكن حد يستغل تعبك ويوقع كل شغلك! ملأ الحزن حدقتيه، يعتدل في جلسته في إرهاق، ثم أجابه وهو يضع وجهه بين راحتي يده: _أعمل إيه طيب.. أنا مش هقدر أوقف بناتي في الأجناس.. الأولى بتاخد قرارها من دماغها وممكن تهد المعبد على اللي فيه... والتانية لو حد نفخ جنبها ممكن تنهار...

ومفيش غير ابن اختي هو الوحيد اللي هيقدر يشيل الشغل ويحمي بناتي. شعر محمود بشفقة عليه وذهب نحوه يربت على كتفه في تعاطف مرددًا في حيرة: _طب ما تكلمه يقف معاك! ابتسم في سخرية متمتمًا: _وفكرك متكلمتش معاه... اتكلمت وهو مش عايز يشيل مسؤولية المكان. حرك محمود رأسه يردف في هدوء: _حاول معاه تاني... تعبك والشغل اللي عملته يستحق إنك تشتغل عشانه وتختار حد موثوق فيه تحطه مكانك.

ربما بضع كلمات صغيرة قالها لم يشعر بأنها ذات أهمية لمن يسمع، ولكن كانت بمثابة هذا السهم الذي انغرس بصدر اليأس كي يقضي عليه ويعود الأمل من جديد، حرك محمد رأسه في إيجابية، يقرر مقابلة مازن بالغد كي يجعله نائبًا لأعماله، نهض من مكانه يقرر العودة فقد تأخر الوقت وهو يريد أن يقضي مشواره الذي بات يقوم به بكل أسبوع دون ملل أو كلل. ***** أمام الجامعة..

سارت ببعض التوتر للداخل، ولكنها توقفت فجأة ما أن تذكرت أنها نسيت بطاقتها الشخصية مع مازن. نفخت في ضيق من عدم انتباهها لشيء مهم مثل هذا، وقررت العودة سريعًا كي تحضرها، وبالفعل وصلت للخارج ولكنها رأت سيارة مازن تسير مبتعدة عن الجامعة. تعجبت قليلًا ولكنها أسرعت في إخراج هاتفها كي تتصل به يعود. بقت عدة دقائق يعطيها خارج نطاق التغطية، حاولت الوصول له بكل الطرق ولكنها لم تستطع. نفخت في ضيق وتوتر:

_ليه يا مازن سبتني.. دا الموضوع مش هياخد أكتر من نص ساعة. أدمعت حدقتيها وقررت أن تنتظره لتتحرك تجلس بالقرب من النافورة الموجودة أمام الجامعة، ولكن مرت ساعة ولم يأت حتى الآن. نهضت من مكانها تنهمر الدموع بغزارة على وجنتيها، وتحركت تركب سيارة أجرة (تاكسي) كي تعود للمنزل، تهمس بداخلها في ألم:

_أنا كله ليه بيبعد عني.. ماما ماتت وأنا صغيرة.. قطوف مكنتش قادرة تخلي بالها مني أغلب الوقت.. بابا مسافر طول الوقت ومش بيقعد معايا.. حتى أنت يا مازن بدأت تبعد عني واحدة واحدة.

وضعت وجهها بين راحتي يدها تبكي على ما هي فيه، تشعر بالوحدة موحشة، تكاد تفترسها بشرسةٍ دون رحمة. وصلت للمنزل بعد وقتٍ قضته في البكاء والتلوي من الألم، ثم انطلقت للحديقة تجلس بجوار زهرتين صغيرتين واحدة تحمل لونًا بنفسجي والأخرى تحمل لونًا أبيض، ظلت تتأملهما في شرود لا يشغل تفكيرها سوى سؤال واحد: لِمَ يبتعد عنها الجميع بهذه الطريقة المؤلمة منذ طفولتها؟! ***

أمسك بهاتفه ليرى الساعة فقد بقى لوقتٍ بسيارة ولم يعد يعلم كم بقى بها؟

، زفر في ضيقٍ من انتهاء بطارية الهاتف ثم أمسك بالشاحن الخاص بها وإيصاله بالسيارة كي يشعله. وما أن فتحه حتى رن هاتفه برسالة تعلن عن محاولة ياسمين عشرات المرات بالرن عليه ولم تجده. جحظت عيناه في صدمة، ثم أسرع باشعال محرك السيارة وبالفعل ما أن وصل لم يجدها. حاول الاتصال بها ولكن لم ترد، كرر المحاولة ولكن وجدها أغلقت هاتفها، علم أنها غاضبة منه وسيحتاج لطريقةٍ كي يصالحها. حرك رأسه في يأس يضرب جبينه في غيظ قائلًا:

_غبي كان لازم تنسى يعني.. الله يسامحك يا نور. غادر من المكان يعود للمنزل، يشعر بالضيق من نفسه، فهي تحتمي به وهو خذلها بهذه المرة، فبات يشعر باختناق يزداد من كونه قام بـ خذلانها، لا يريد خذلانها كما فعل به والده ووالدته. مسح وجهه في اختناق يحاول بقدر المستطاع السيطرة على ضيقه، فهذا أكثر شيئًا يمكن أن يخرجه عن شعور ويحول حياته. *** داخل عيادة نفسية... طرقت قطوف على الباب في هدوء، ثم أدخلت نص جذعها تنظر

للداخل قائلة ببسمة مريحة: _ادخل ولا ألف وأرجع؟ ضحكت القابعة على المكتب، ثم نهضت سريعًا كي تستقبل صديقتها في حبور، تردف بنبرة فرحة: _وحشتني أوي يا قطوف. ضمتها قطوف في اشتياق، تردف بصوتٍ مرح: _إمتى هتتخطبي يابت بدل ما أنتِ قاعدة كده على المكتب فاضل تاكة وهتفقسي. ضربتها على كتفها في غيظ، ثم اردفت وهي تهندم ملابسها قائلة بغنج: _الدكتور مريم مش هتتجوز أي حد يا ماما.. لازم يبقى عارف تاريخي العظيم في المجال.

قالتها قطوف في سخط: _أنتِ هتحوري يا مريم.. تاريخ إيه اللي عايزاه يعرفه.. هو حد يعرفك غيري أصلاً والكم طفل اللي بيجولك عشان ينطقوا صح. قالتها قطوف في سخط، في حين منحتها مريم نظرات متضايقة قائلة في غيظ: _إيه اللي حدفك عليا! تحركت من أمامها لتجلس على الأريكة بارتياح، ثم تمتمت بصوتٍ يحمل غيظًا مكتوم: _هو في غيره قارفني في حياتي. زفرت مريم في يأس، تتقدم منها في خطواتٍ هادئة قائلة: _مازن.

ابتسمت بسخط، ثم اردفت بنبرة مغتاظ وقد تلون وجهها بحُمرة العضب: _آه لو أطول أباطحه بحاجة في دماغه وأعمله عاهة مستديمة.. ياما نفسي أخلص عليه بس ماسكة نفسي بسبب بابا. رفعت مريم حاجبها، ثم صفقت بيدها تدفع لها كلماتها الساخرة: _برفو قاعدة ما قاتلة قتلة. أمسكت قطوف بالوسادة التي بجانبها وألقتها عليها تصيح بها في غيظ: _بت أنتِ متنرفزنيش. صكت مريم على أسنانها في غضب من تهورها الدائم، ويدها التي تسبق عقلها، لتردف في انتقام:

_طب اتصديقي بقى أنك هتتجوزي مازن! شهقت قطوف في استنكار، ثم هدرت بعصبية مفرطة: _أنا استحالة اتجوز البني آدم دا.. دا لو آخر إنسان على وجه الأرض عمري في حياتي ما هوافق عليه أنتِ فاهمة.. ومتكرريش الجملة دي تاني عشان متغباش عليكي. لوت مريم فمها في سخرية، في حين نهضت قطوف من مكانها تستعد للذهاب قائلة: _هروح بقى. تبدلت ملامح مريم سريعًا لذهول، ثم اسرعت في الحديث: _أنتِ زعلتي من... قاطعتها قطوف ببسمة تعلو ثغرها متمتمة:

_عارفة أنك بتغيظيني وإن دا كلام عادي يا مريم.. أكيد مش هروح آخد بعضي وأهرب عشان كلمتين هزار.. ثم أنتِ عارفة كويس إن لو حد ضايقني بالكلام برد عليه بدل الطاق عشرة.. ثم غمزت لها قائلة: _ثم أنتِ يا باشا الوحيدة اللي لو زعلت هروح أقولها عشان نتصالح علطول ونفضل سوا. ابتسمت لها مريم في حبور، في حين أكملت قطوف وهي تتقدم نحو الباب:

_أنا همشي عشان بابا قالي هعدي عليكي خمسية في العيادة وأروح بس كده.. بس متقلقيش في زيارة والمرة دي عند طنط. ابتسمت لها مريم، في حين غادرت قطوف للعودة سريعًا. *** وصلت قطوف للمنزل وعلى شفتيها ابتسامة تتمنى ألا يعكر صفوها أحد، ولكن سرعان ما اختفت ما أن رأت ياسمين تجلس جوار الزهور وصوت بكاؤها يعلو. ركضت نحوها سريعًا لتجلس قائلة في قلق: _مالك يا ياسمين.. حصل إيه؟ مازن ضايقك؟ نظرت لها بأعين حمراء من كثرة البكاء،

تجيبها بنبرة متألمة: _مازن أصلًا ملقتهوش قدام الجامعة... نسيت البطاقة بتاعتي معاه وجيت خرجت عشان آخدها لقيتـه بيتحرك بالعربية رنيت عليه تليفونه فاصل شحن وفضلت مستنية يرجع ملقتهوش وروحت. عادت تبكي من جديد، تتمتم بصوتٍ تجرع الآلام: _هو ليه كل بيبعد عني؟ هو أنا وحشة ولا عشان مشوفتش أمي وشبعت منها فـ كله بيبعد عني؟ ضمتها قطوف سريعًا لها وكأنها ابنتها تتمتم بصوتٍ حنون للغاية: _بس يا هبلة بيبعد عنك إيه؟

دا أكيد حصل حاجة معاه عشان كده مقدرش يكون معاكي؟ دا ممكن أمه تكون جتلها جلطة وخلصتنا منها وهو راح يلحقها. ضحكت ياسمين على حديثها، فهي تعلم عمتها جيدًا ولا تحبذ الجلوس معها، وأيضًا مرفت تخشى قطوف بسبب شخصيتها المندفعة وأنها بلحظة يمكن أن تخسر حياتها ومظهرها بسببها لذا تأخذ الحذر منها. ابتسمت قطوف في حب، تمد يدها تمسح دموعها قائلة بنبرة حانية:

_أيوه كده خلي الشمس تنور.. أنتِ أهم حد لي حياتنا يا ياسو واوعي تخلي التفكير العبيط دا تاني يتمكن منك... كلنا بنحبك ووجودك في حياتنا هو سعادتنا... بس أحياناً الظروف بتتجمع في وقت واحد وعشان كده فهمتي الكل غلط بس. حركت ياسمين رأسها في إيجابية، لتنهض قطوف تساعدها على النهوض كي تصعد لغرفتها، كي تغفو كما تفعل بكل مرة تبكي بها وتغفو بعدها مباشرة، وبالفعل غفت ياسمين سريعًا. ***

وصل للمنزل وصف سيارته، ثم صعد للشقة وما أن دلف حتى استمع لصوت والدته تتمتم: _أخيرًا شرفت. تنهد مازن بضيق، فهو لم يعد يحتمل حديث والدته المسمم، أردف في اختناق: _خير يا أمي؟ انتفضت من مكانها، تصيح به في غضب: _إيه خير دي! احترم نفسك وأنت بتكلمني أنت فاهم.. حاول التماسك أمامها، ثم أردف بهدوء: _حاضر. أكملت مرفت بصوت هادئ: _من بكرة تروح لخالك وتقوله عايز أشتغل معاك. قالها في ذهول ممزوج باستنكار: _نعم.. دا اللي هو إزاي؟

في حين تهجمت ملامح مرفت سريعًا تردد بهجوم: _زي الناس يا نن عين أمك... هتروح تشتغل معه ولو سمعتك بتعترض على حرف يبقى اعتبرني موت بنسبة ليكِ وجوازك من بنت خالك أنا مش راضية عنها.. ثم أضافت بخبث: _وتاريخك يا قلب أمك مع البنات هحكيه كله لياسمين.. وشوف البسكوتة اللي فاكرة إنك بتحميها وبتحافظ عليها هيجرى لها إيه لو عرفت حاجة عن تاريخك الأسود واللي الكل مخبيه عنها عشان ضعفها.

صُدم مازن من طريقتها، ولكن سرعان ما علت بسمة ساخرة على شفتيه، فماذا سيقول؟ فمن يخذل مرة يخذل مليون مرة. حرك رأسه في إيجابية يردد باقتضاب: _حاضر بكرة هروح لخالي وأقوله عايز أشتغل معاك، أي أوامر تانية؟ لوت فمها بسخط ثم أشاحت بيدها قائلة: _لاء.

تركه مازن ودلف لغرفته، تنبرز عروقه بشدة، يتطلع أمامه في غضبٍ جامح، ثم بكامل قوته ضرب الحائط بقوة شديدة، حتى جُرحت بشدة وبدأت تنزف بغزارة، جلس على الفراش في تعب يحاول السيطرة على انفعالاته. أصبح لا يطيق الجلوس بالمنزل ولا مقابلة أحد ولكن أخبره خاله بمرةٍ (لو هربت من المسؤولية مرة، مش هتعرف تهرب في المرة التانية، وأنت اتخلقت في الدنيا يعني مفهاش راحة.. اتخنق شوية بس ترجع تاني لمكانك)

أغمض حدقتيه في إرهاق شديد، ثم نظر ليده التي لا تزال تنزف الدماء ونهض من مكانه يحضر بعض الأدوات الطبية كي يعالج يده، فليس هناك من يمده بالرعاية، وبالفعل بدأ بعلاج يده حتى قام بضمادتها، أمسك هذا الجهاز الصغير ثم قام بالضغط عليه لتنغرس به هذه الشوكة، أعاد كل شيء مكانه ثم رفع نفسه على الفراش و أمسك بهاتفه باليد اليمنى المعافاة، وحاول الاتصال بـ ياسمين مرة أخرى... ***

رأت قطوف رقم مازن على هاتف ياسمين، حاولت التجاهل ولكنها لم تستطع لتمسك الهاتف في سرعة ترد بنبرة باردة: _خير عايز إيه؟ نظر مازن للهاتف يتأكد من أنه رقم ياسمين، ثم عاد مجددًا ليهتف في دهشة: _هي ياسمين فين؟ _والله! لسه فاكر أن في ياسمين أصلاً.. ولا بقولك إيه أما أنت مش قد الأمانة وعامل فيها ديك البراري وواخدها عشان توصلها للجامعة وسبتها تروح لوحدها بتاخدها ليه من الأول يا سبع البرمبة هاه!

قالتها قطوف في غيظ شديد، في حين صك مازن على أسنانه في غيظ قائلًا من بين أسنانه: _والله أسباب تخصني ملكيش دخل فيها. رفعت قطوف حاجبها في غيظ، ثم قالت بنبرة مستفزة: _والله والاسباب دي بقى تخص تاريخك القذر ولا الحاجة الوالدة جلاها جلطة من أعمالها السودا وروحت تلحقها. احمرت عينا مازن بغضبٍ شديد، يقبض على يده المصابة حتى عادت تنزف من جديد يهدر في عصبية:

_بت أنتِ أنا ساكت وعامل احترام لوحدة زيك.. إنما هتسوقي فيها هعرفك مقامك.. لمي لسانك اللي هيعدي عليه قطر يفرمه ويخلصنا منه. _تعرف مقام مين يا دلعتي دا أنا ألقبك زي الصرصار كده لما بياكل بالشبشب على دماغه... نطقت بها في اندفاع شديد، ثم استرسلت بصوتٍ غاضب يحمل الاختناق بين طياته: _بص ياض أنت أنت فورت دمي وضغطي عالي بسببك.. غور من وشي وأخر مرة ترن على أختي وأقطع علاقتك بينا وخلصني...

أغلقت المكالمة وهي تتنفس في غيظ، تهمهم بكلماتٍ تحمل ضيق، في حين تطلع مازن للهاتف في ذهول ثم صك على أسنانه في غضب جامح يتمتم بصوتٍ يحمل تحدي: _أنا كنت هخلع من موضوع الشغل دا بس وربي يا قطوف لـ أنا راشق في الشغل دا مخصوص عشان أكفر سيئاتك. ألقى الهاتف بعيدًا، ثم بقى يفكر كيف سينتقم منها فهو لن يتوقف عند هذا الحد، وبالفعل لاحت على شفتيه بسمة صغيرة يتمتم بصوتٍ يحمل نوايا الانتقام: _أنا هعرف إزاي أقهر قلبك كويس!