رواية فتون الفصل الثاني 2 - بقلم مآهي أحمد

فتون: هو انت 😳😳 الشاب بصلها ولا اهتم واداها ضهره ومشي. فتون: خد هنا انت رايح علي فين بقولك.. اه انت باين عليك هتسلمني للشرطة. ومشت وراه وبقت رافعة المكواة وبتكلمه وهو مابيردش عليها. فتون: طيب استني.. انت أكيد رايح تتصل بالشرطة صح.. طيب هتتصل بيهم ولا هتروح تجيب البوليس وتيجي. (برضو مابيردش عليها) فتون استغربت. فتون: هو انت اخرس ولا إيه 😏 ماترد. (رجع اداها وشه وبقى عصبي والدنيا ماليا وشه)

فتون خافت منه وقالتله: أنا.. أنا ما قصدتش والله بس أصل.. أصل.. أنت مابتردش عليا. فتون: طيب أنت مش فاكرني؟ أنا اللي أنت اديتها الجاكيت بتاعك من شوية، حتى بص أنا لابساه أهو. أنا بقي عرفت أنت ساكن فين وجيت عشان أدهولك. وقتها أمير ضحك ضحكة سخرية كده وقالها: أمير: أول ما الناس اللي بيجروا وراكي دول يمشوا من الشارع بره، امشي أنت كمان من هنا، فهماني. وبص على اليونيفورم بتاعها لقي مكتوب اسمها عليه. أمير: فهماني يا فتون.

فتون: أيوه طبعًا فاهماك. بس هو أنت مش هتسألني هما بيجروا وراك ليه؟ وإيه اللي دخلك هنا؟ وتعرف وتبقي فضولي. رجعالها تاني وقالها: أمير: اسمعي، أنا مابحبش الدوشة ولا الرغي الكتير، يعني الساعة اللي هتقعديها هنا مش عايز أسمع فيها صوتك، أنا داخل أنام. فتون: (بقت تبرطم وتقول) إيه ده يا أختي ده؟ هو فيه كده؟ متنك على إيه ده؟ أمير من بعيد: سامعك على فكرة، وطي صوتك وأنتِ بتبرطمي بعد كده.

فتون حطت إيدها على بوقها وبقت مستغربة جدًا إنه سمعها. دي اتكلمت بهمس وبقت تقول في عقلها: إزاي سمعني؟ ده أنا مطلعتش صوت. فتون بقت كل شوية تبص من ورا الشباك عشان تشوفهم مشيوا ولا لأ، بس عصام بيه كان سايب بودي جارد في الشارع عشان كان متأكد إنها موجودة في الشارع ده. فتون: وبعدين ياربي، أعمل إيه أنا دلوقتي.. ماينفعش البني آدم اللي جوه ده يصحى يلاقي ي هنا. يارب الزفت اللي بره ده يمشي كده ولا كده، خليني أخرج.

فتون وقتها حست بالجوع، دخلت على المطبخ وهي بتتحرك على طراطيف صوابعها عشان أمير ما يسمعش، وفتحت التلاجة بالراحة أوي وبقت تطلع الأكل على طاولة المطبخ وقعدت تاكل. أصلها طول اليوم مكانتش أكلت أي حاجة. ومرة واحدة وهي بتشيل الأكل.. الطبق وقع منها اتكسر. فتون: يانهار أسوووووود.

جت تلم الطبق بسرعة عشان ترميه قبل ما أمير يصحى، رجعت لورا اتكعبلت، الطاولة اللي عليها الأكل كلها وقعت، وبقي المطبخ كله متلخبط على بعضه وكل حاجة في الأرض. أمير طبعًا سمع صوت التكسير في المطبخ، صحي من النوم وجري، لقي فتون واقعة في المطبخ والطبقة كلها مرمية عليها والمطبخ كله متكسر. أمير: (بغضب شديد) أنتِ عملتي إيه 😡.

فتون وهي خايفة: أنا.. أنا.. اسمع بس هقولك.. أصل أنا كنت جعانة أوي والله، وبعدين من غير ما أقصد راحت الطبقة كلها وقعت مني. أمير: اتنهد والتنهيدة كانت طالعة من قلبه، وحط إيده على وشه وقالها: أمير: اطلعي بره. فتون: ثواني، أنا.. أنا هلملك كل حاجة. وجت عشان تلم الطبقة، إيديها اتعورت وبقت ماسكة إيديها وكلها بقت دم، راحت ماسحة الدم في المفرش. أمير بص للمفرش اللي بقى مليان دم واتعصب أكتر وقالها: أمير: ماتعمليش حاجة.

فتون برضو بتشيل في الطبقة المكسورة ومش بتسمع كلامه. راح أمير زعق وقالها: أمير: قولتلك ماتعمليش حاجة، أنتِ فاهمة 😡. ومسكها من إيديها وحطها تحت الحنفية وقالها: اشطفي إيدك من الدم، لا توسخي حاجة تاني. فتون: (بتوتر) حاضر.. حاضر. فتون غسلت إيدها، وأمير قالها: اطلعي بره المطبخ. فتون: أيوه بس مين اللي هيشيل الحاجة دي. أمير: مش شغلك. أمير بقي يبص للمطبخ المتبهدل ده وبقي مش عارف يعمل إيه. مرة واحدة فتون تليفونها بقى يرن.

فتون حطت إيدها في جيبها وطلعت الفون. فتون: أيوه يا أميرة. أميرة: أنتِ.. أنتِ فين يا فتون. فتون: أنا في شاليه من الشاليهات، بس قوليلي أنتِ اللي فين؟ أنا لازم أمشي من هنا ضروري. أميرة: أنا على البحر على شاطئ بارادايس، تعاليلي على هناك. فتون بتبص من الشباك لاقت البودي جارد مشي، قالتلها: فتون: أنا جايا لك حالا على شاطئ بارادايس، ماتتحركيش يا أميرة.

فتون راحت لأمير وإيدها بتنزل نقط دم على السجادة، ودي حاجة مضايقة أمير جدًا. راح لسه هتتكلم، راح أمير بسرعة جاب مناديل ومسك إيدها ولف المناديل على إيدها. فتون: ابتسمتله وقالتله: متشكره ليك أوي. أمير: ده عشان الدم بتاعك ماينزلش على السجادة. فتون بصيتله بصة غيظ وقالتله: فتون: أنا عارفة.. أنا أقصد، متشكره إنك مش طلعتني من بيتك رغم كل الدوشة اللي عملتهالك دي. أمير: لا عادي، مفيش حاجة.

فتون: أنا ماشية، وإه، اتفضل الجاكيت بتاعك. جت تقلعه عشان تدهوله، قالها: أمير: لا، خليه. فتون: لا، متخافش، أنا مش سقعانة، أنا كويسة، اتفضل خده 😊. أمير: بقولك خليه عشان ماينفعش أخده بعد ما دمك بقى عليه. فتون: اتضايقت أكتر وقالتله: بقي كده؟ وأنا بقي مش هاخده. وقلعت الجاكيت ورمته على الأرض وسابته ومشيت. أمير شاف الجاكيت على الأرض وبرق 😳. فتون: أه، سوري، نسيت، بهدلت الأرض ومش هنضفها. وفتحت الباب ورزعته وراها ومشيت.

أمير: طلعتلي منين دي. ودخل على المطبخ ينضف اللي فتون عملته، أصل أمير ده نضيف جدًا وبيكره الكركبة ودايمًا بيته مترتب. فتون بقت تبص شمال ويمين في الشارع وهي ماشية، مالقتش حد وبقت تجري تروح لصاحبتها على شاطئ بارادايس. وقتها أمير وهو بيشيل الجاكيت، بيبص لقي فيه محفظة فيها كل حاجة تخص فتون، كارنيه الجامعة وفلوسها وبطاقتها وكل حاجة تخصها حرفيًا.

فتون أول ما راحت، كانت أميرة مستنياها. بتبص لاقت أميرة وشها كله دم وكدمات وشعرها منكوش وهدومها متقطعة. أميرة (بعياط) : أنا آسفة يا فتون، حقك عليا. فتون: أميرة، مين اللي عمل فيكي كده. عصام ظهرالها وقالها: عصام: شوفتي عرفت أجيبك إزاي ☺️. راح شدها من شعرها ناحيته وقالها: عصام: أنا عصام بيه اللي الدنيا كلها تحت رجله، حتة بت زيك ماتسواش تلاته أبيض تعمل فيا أنا كده. ولسه هيضربها بالقلم على وشها ورفع إيده.

أمير وقتها مسك إيده وقاله: أمير: مش عيب لما ترفع إيدك على بنت. وزقه برجله في بطنه وقعه في الأرض. فتون وقتها جريت على أمير واتخبّت فيه. عصام: أمير 😳. عصام: أنت بتعمل إيه هنا؟ وإزاي تضربني كده؟ أمير: مش من الذوق إنك تضرب بنات الناس كده يا عصام، وخصوصًا لو حد يخصني زي فتون. عصام: ومن إمتى فتون تخصك بقي يا أمير. أمير: من اللحظة دي يا عصام، فتون تخصني، ولو قربتلها أكنك بتقرب مني أنا شخصيًا، وأنا زعلي وحش وهتزعل مني.

عصام: ده كان زمان يا أمير، قبل الحادثة، مش دلوقتي خالص، وقت نفوذك، وقت ما كنت قوي برجالة أبوك وبأبوك شخصيًا، لكن دلوقتي، تؤ تؤ، ما بقيتش تخوف خلاص. أمير: بص لفتون اللي متخبية ورا ضهره وشاف نظرة الرعب في عنيها هي وصاحبتها، أداها المفتاح بتاع العربية وقالها: أمير: خودي صاحبتك واستنيني في العربية. فتون خدت المفتاح ولسه جايه تمشي، عصام قام وقال للبودي جاردات اللي معاه: عصام: البت دي لو اتحركت من هنا فيها موتكم.

البودي جاردات ابتدت تتحرك ناحية فتون، وفتون رجعت تاني تتحامي في أمير وبقت ماسكة فيه مش عايزة تسيبه. أمير رجعها ورا ضهره وفك الحزام بتاعه من البنطلون، وبقي كل اللي يقرب منه يضربه بالحزام، ومسك البودي جارد موته من الضرب هو والتاني لحد ما وقعوا في الأرض. وعصام وقتها اتضايق جدًا، ومرة واحدة بعد ما خلاص أمير خلص عليهم تقريبًا، ظهر أربعة بودي جاردات تاني جايين على أمير من بعيد. أمير مسك فتون من إيدها وطلع يجري على العربية.

فتون: استني، أميرة مش هينفع نسيبها. أمير شال أميرة وحطها على كتفه وركب العربية بسرعة، وبعدها لسه هيركب لقي...