رواية في سبيل صهيب الفصل التاسع عشر 19 - بقلم لبنى دراز

مرسى علم

صهيب بعد ما خلص تجهيز المكان زي ما كان بيحلم بيه، دخل الشاليه خد شاور وغير هدومه وطلع وقف قدام المراية، قلبه بيخبط في صدره بعنف كأنه عايز يهرب من بين ضلوعه، ملامح وشه كلها قلق، وعيونه فيها لمعة فرحة غريبة ومش مفهومة، سرح شعره وهذب دقنه ورش برفانه، وهو بيبص لنفسه بيحاول يهدي ضربات قلبه وكل شوية يبص في ساعته، حاسس إن الوقت واقف والدقايق بطيئة قوي بتمشي بالعافية، وخرج من الشاليه وقف قدام البحر، عينيه على المية بس عقله وقلبه مشغولين بحكاية تانية خالص، فضل يعد الثواني والدقايق كأنهم عمر، وقف يكلم نفسه

بنبرة توتر بيحاول يخبيه: في إيه مالك، اللي يشوفك وانت متوتر كدا يقول إنك أول مرة تشوفها. قلبه رد عليه بتوتر واضح: اتأخرت أوي كدا ليه؟ عقله بتهكم: ما تهدى شوية يا عم النحنوح، دلوقتي تلاقيها جاية، بس اتقل حبة. قلبه بنفاذ صبر: اتقل إيه بس، أنا ما بقاش عندي ذرة صبر، تفتكر أتصل بجدي أعرف منه هي وصلت فين؟

فضل الحوار داير بين قلبه وعقله وهو واقف في مكانه، حاسس إن كل حاجة حواليه ساكنة إلا جواه، وفجأة سمع صوت الطيارة، رفع راسه بسرعة، عينيه اتعلقت في السما، شافها جاية بتقرب، وكل ما بتقرب قلبه بيدق أكتر، كأنها أول مرة يقابلها في حياته، ضربات قلبه بقت عنيفة، نفسه مش منتظم، حاول يهدى، يلم شتات روحه، لكن فشل، لأن اللي جاي مش مجرد لحظة عادية، دي لحظة بعمره كله. عند سبيل بعد ما وصلت الطيارة وقبل ما

تهبط جات لها رسالة أخيرة: بصي من الشباك. سبيل نفذت الأمر وهي مستسلمة تمامًا، وبمجرد ما بصت من الشباك شافت اللي رد لها روحها، كلمة بحبك مكتوبة كبيرة وبالخط العريض ومتحاوطة بشموع إلكترونية، بعدها الطيارة بعدت شوية عن المكان عشان تنزل في المكان المخصص لهبوطها، سبيل ابتدت تربط الأحداث ببعض وقبل ما تلحق تفهم حاجة، رن تليفونها بمكالمة فيديو فتحتها بلهفة وشافت جدها وهو بيضحك لدرجة إن عينه دمعت من كتر الضحك،

بصت له بغيظ: بقى تيجي منك انت! تعمل كدا فيا! ماشي يا جدو!! عمران من بين ضحكه: وأنا مالي ياختي، هو اللي عايز يفاجئك عشان يصالحك. سبيل بصت له برفعة حاجب: جدووو، مبروم على مبروم ما يروّش. عمران قهقه وبنظرة مليانة سخرية: ما انتي اللي غبية، أعملك إيه؟ توقعت إنك هتفهمي، ههههههههههه. سبيل بغيظ: أفهم إيه بس، وانت بتقولي صهيب وصهيل في خطر.

عمران بنبرة حنونة: انسي يا حبيبتي، وانزلي قضي ليلة سعيدة على البحر مع حبيبك، اتصافوا وافتحوا صفحة جديدة.. وبص لها بمشاكسة: وإياكي تسمحيله يقرب منك أو حتى يلمسك، فاهمة؟ سبيل ضيقت عينيها وبنبرة مندهشة: يعني إيه بقى؟ مش فاهمة. عمران ابتسم بمكر: اسمعي يا بت اللي بقوله وانتِ ساكتة، وخدي بالك، هعرف وأنا قاعد مكاني كل اللي بيحصل بينكم. سبيل برفعة حاجب: يا سلام يا سي جدو، هتعرف إزاي بقى؟

عمران زادت ضحكته: هو انتي بس اللي عندك عفاريت؟ أنا كمان عندي عفاريت ومطلوبين وراكم بيقولولي كل أخباركم، يلا يا حبيبتي، الطيارة هبطت، قومي اجري على جوزك، عيشوا حياتكم وانبسطوا سوا.

قفلت سبيل المكالمة مع جدها ونزلت جري من الطيارة وشافت ممر طويل من عند السلم مفروش بسجادة حمرا وعلى الجانبين شموع إلكترونية منورة، مشيت في الممر وكل خطوة بتاخدها قلبها بيدق بقوة، بس المرة دي دقاته مختلفة، مش دقات خوف أو قلق، لأ، دقات فرحة وسعادة، أخيرًا بعد سنين عذاب، قلبها هيرتاح ويفرح، أخيرًا حلم حياتها هيتحقق وتبدأ تعيش حياتها مع اللي اتمناه قلبها، فضلت ماشية لحد ما وصلت عند آخر حرف من كلمة بحبك، ولمحته وهو بيقرب منها، خطف عيونها بطلته الساحرة وابتسامته اللي زلزلت كيانها.

أما صهيب كان واقف عند أول حرف في الكلمة، وبمجرد ما هبطت الطيارة وهو هيتجنن نفسه يجري عليها وياخدها في حضنه ويخبيها بين ضلوعه، بس كان لازم يصبر شوية، أول ما شافها بتقرب ومشيت وسط حروف الكلمة المكتوبة، سرقت قلبه بابتسامتها وجمالها اللي خطف أنفاسه، بدأ يتحرك هو كمان وحاسس إن قلبه بيرفرف جوه صدره، لحد ما اتقابلوا في نصها بالظبط، قرب منها وعيونه بتلمع لمعة غريبة وفجأة، كل اللي كان راسمه في خياله طار، وقف شوية ساكت، عيونهم اتقابلت في نظرة طويلة، كل الأصوات اللي حواليهم اختفت ومافيش غير صوت أنفاسهم ودقات قلوبهم وبس، قرب منها خطوة كمان وطلع علبة صغيرة من جيب البدلة، فتحها ومد إيده بيها قدامها،

وبنبرة صوت مبحوح: تقبلي تكوني حبيبتي ومراتي أم ولادي وتمشي معايا المشوار الطويل لنهاية العمر؟ تقبليني شريك لحياتك ورفيق دربك يا سبيل؟ تقبليني أكون ونيسك في طريقك؟ تقبلي أكون سندك وأمانك وحمايتك، يا سندي وأماني وحمايتي؟ تسمحي لي بمكان في دنيتك، يا كل دنيتي؟

سبيل شافته بيقدم لها هديته، وبيعرض عليها تشاركه حياته، دموعها زادت غصب عنها وهي مش مصدقة ولا مستوعبة اللي بتسمعه، جسمها كله ارتعش، وضربات قلبها زادت لدرجة إن هو شايفها، حطت إيدها على قلبها تحاول تهديه، وهزت راسها بالموافقة وهي بتبتسم من بين دموعها من غير ما تنطق بكلمة. صهيب مسك إيد سبيل الشمال ولبسها الدبلة والخاتم اللي في العلبة، وبعدها باس إيدها

وجبينها وهمس بصوت عاشق: بحبك يا أجمل حاجة حصلت لي في حياتي، بحبك يا عمري اللي فات وعمري اللي جاي، بحبك يا أول وآخر وأجمل حب عشته وبعيشه وهعيش فيه اللي باقي من عمري. سبيل أخيرًا اتكلمت صوتها خرج مهزوز من بين دموعها: طب واللي فات؟ صهيب قرب منها أكتر مسك وشها بين كفوفه، بيمسح لها دموعها بصوابعه، وعيونه متعلقة بعيونها وبنبرة صوت مليانة بصدق مشاعره: اللي فات؟ كان سراب، وهم، إنما انتي الحقيقة الوحيدة في حياتي يا سبيلي.

سبيل غمضت عينيها بتحاول تهدي ضربات قلبها، وفتحتهم ببطء وهي بتهمس بالكلمة اللي خبتها جواها سنين، لأول مرة وبصوت مبحوح: بحبك. صهيب عينيه لمعت بسعادة وبنبرة شقية: قولتي إيه؟ ما سمعتش؟ قولي تاني كدا؟ سبيل ابتسمت بخجل وعيونها اتعلقت بعيونه وهمست: بحبك يا حلم عشت عمري أستناه، بحبك يا أجمل دعوة في صلاتي، بحبك يا أملي وظني ويقيني في الحياة. صهيب اتجنن فجأة وصرخ مرة واحدة، وبغيظ مصطنع: طب أعمل إيه أنا دلوقتي؟

بعد الكلام الحلو ده؟ أه منك يا جدي كان لازم يعني تكتفني بشرطك الصعب ده؟ سبيل بمجرد ما شافته بالحالة دي، انفجرت ضحكتها من جوه قلبها، ضحكة طالعة عالية وصافية، كأنها كانت محبوسة سنين وأخيرًا لقت طريقها للنور، ضحكت لدرجة إن دموعها لمعت في عينيها. صهيب شرد في ضحكتها اللي نورت وشها وزادتها جمال فوق جمالها، وفجأة اتجنن وبنبرة مجنونة: لااااا، أعملي معروف، أنا مش حمل الضحكة دي، أنا مستحمل بالعافية.

سبيل مازالت بتضحك، وبنبرة خجولة لكنها فيها شوية سخرية: أهدى يا حبيبي عفاريت جدو حوالينا، يروحوا يبلغوه، نلاقيه واقف فوق دماغنا قبل ما نتحرك من مكاننا. صهيب بص لها برفعة حاجب وابتسامة شقية: طب بذمتك انتي؟ ينفع أهدى وأمسك نفسي بعد الكلام الحلو ده؟ ولا الضحكة اللي نورت الدنيا في عز الليل دي؟ أيعقل؟ سبيل بخجل وبصوت واطي أقرب للهمس: هو إحنا هنفضل واقفين هنا؟

صهيب مسك إيدها، شبك صوابعه في صوابعها، ورجع بيها من نفس الطريق فوق حروف الكلمة لحد ما وصل عند ترابيزة على البحر عليها أكتر أكلات هي بتحبها وبمجرد ما قعدوا، اشتغلت حواليهم الشموع الشر*ارية، وأكتر أغنية بتحبها سبيل. غمض عينيك وإحلم معايا وهات إيديك وإحضن هوايا غمض عينيك وإحلم معايا وهات إيديك وإحضن هوايا وبمجرد ما اشتغلت الأغنية، سبيل دموعها نزلت وهي عيونها متعلقة بعيونه، وحاطة إيديها على

الترابيزة وبتغني معاها: إحضن هوايا لأبعد حد وألمس معايا خدود الورد لا نجوم وليل ولا سما ولا أرض ده إحنا في دنيا لوحدنا. دوقني شوق دوق الغرام غمض عينيك وفي حضني نام قول فالهوا من غير كلام ده إحنا اتخلقنا لبعضنا. صهيب مسك إيدها، وبالإيد التانية بيمسح لها دموعها وبيغني هو كمان مع الأغنية: ليلة غرام نحلم ندوب من غير كلام تحكي القلوب خدني لهواك ده إحنا يا دوب باب الهوى مفتوح لنا. غمض عينيك وإحلم معايا

وهات إيديك وإحضن هوايا غمض عينيك، عينيك وإحلم معايا، وهات إيديك وإحضن هوايا. قام فجأة وشدها لحضنه بكل قوته كأنه عايز يخبيها بين ضلوعه وبصوت مبحوح: ليه الدموع دي يا حبيبتي؟ سبيل اتنهدت تنهيدة طويلة ودموعها نازلة وبنبرة مش مصدقة: طول عمري كنت بحلم باليوم ده، كنت بتمنى إنك تخفيني بنفس الطريقة دي، ونكون سوا في مكان زي ده، ونسمع نفس الأغنية دي، أنا بجد مش مصدقة، انت إزاي عرفت اللي عشت عمري كله أفكر فيه؟

وقدرت أزاي تنفذه بالسرعة دي؟ ابتسم صهيب وافتكر جده لما خطط معاه كل حاجة، واتنهد براحة: تفتكري هيكون أزاي يعني؟ الاتنين نطقوها في نفس الوقت وهما بيضحكوا: أكيد جدو، مفيش غيره. كملوا الأغنية ورقصوا سوا على نغماتها بعد ما طلبوا يسمعوها مرة تانية، وفضلوا على الحالة دي وقت كبير، نسوا الدنيا حواليهم، وكل ما تخلص الأغنية يشغلوها تاني ويرقصوا عليها. *** في القاهرة قصر عمران الشهاوي

في نفس الوقت، سامية كانت قاعدة وهي شايلة صهيل ومعاها فاطمة والبنات، كلهم قلقانين على سهيل وصهيب اللي اتأخروا، وموبايلاتهم مقفولة، ومش عارفين يتصرفوا. خرج عمران من المكتب وهو مبسوط بعد ما اطمن على سهيل وصهيب، وبص لهم باستغراب، ونبرته كلها قلق: مالكم قاعدين كدا ليه؟ وفين الباقيين؟ فاطمة بملامح كلها خوف وقلق: كلهم فوق من بعد الغدا، بس صهيب وسبيل لحد دلوقتي لسه ما رجعوش، وتليفوناتهم مقفولة.

عمران ابتسم بمكر: عارف، سيبوهم في حالهم، الله يعينهم على اللي هما فيه. سامية بصت له باستغراب ونبرة قلق: قصدك إيه يا بابا؟ هما جرالهم حاجة؟ عمران كتم ضحكته ورسم على ملامحه الجدية: لأ لسه، بس أكيد هيجرالهم.. وبهمس لنفسه سمعته شاهندة: ده لو ما كانش صهيب اتشل فيها. قربت منه شاهندة وهمست جنب ودنه: اقفش، عملت فيهم إيه يا عسل انت يشلهم؟ عمران رد عليها، وهو بيضحك: أبدا قولتلهم ما يقربـ....

وفجأة بص لها بغيظ مصطنع: وانتي مالك يا بت انتي، امشي اقعدي جنب أختك وانتي ساكتة، يللا. شاهندة غمزت له بعينها وهي رايحة تقعد جنب يمنى: ماشي يا جدو، مسيري هعرف. عمران بص لـ سامية اللي توترها باين على حفيدها اللي مش مبطل عياط: صهيل ماله يا سامية؟ سامية بقلق: مش عارفة يا بابا، بقاله ساعة مش ساكت، امه اتأخرت أوي وأنا قلقانة عليها هي وصهيب.

عمران بهدوء: قولتلك ما تقلقيش عليهم، وعموماً عشان ترتاحوا كلكم، هما مش راجعين دلوقتي خالص، لسه معاهم شهر على ما يرجعوا. سامية بدهشة: شهر!! طب وصهيل؟ ده على صرخة واحدة بقاله شوية ومش فاصل. عمران بحكمة: الولد على صرخة واحدة لأنه حس بقلقك وتوترك، وأكيد كلكم نفس الحكاية، عشان كدا مش ساكت، لكن لو هديتوا واطمنتوا، هو كمان هيهدى ويسكت. فاطمة بصت له برفعة حاجب وفهمت هو عمل إيه،

وبنبرة عتاب: من أمتى بتعمل حاجة من غير ما تقولي يا عمران؟ ابتسم لها بعيونه وبنبرة فيها أسف وندم: سامحيني يا غالية اضطريت... ورجع بص لـ سامية بجدية: اطمني يا سامية، ابنك ومراته بخير، انسيهم خالص وراعي حفيدك لحد ما يرجعوا. سامية بتردد: بس يا بابا الولد... عمران قاطعها بهدوء: ما بسش يا سامية، إيه؟ مش هتعرفي انتي والبنات تخلي بالكم منه كام يوم لحد ما امه وابوه يرجعوا؟

سامية بنبرة استسلام: حاضر يا بابا، اللي حضرتك تؤمر بيه. عمران بص لـ شاهندة ويمنى بهدوء: اطلعوا يا بنات، كل واحدة تنده ابوها وأخوها وانزلوا كلكم، بسرعة يللا. الاتنين بسعادة في نفس الوقت: حاضر يا جدو. وفعلا طلعوا السلالم جري، وبعد شوية نزلوا تاني، ووراهم عادل وعلي ونادر وشهاب. قرب عادل من عمران بنبرة بقلق: خير يا بابا؟ في حاجة؟ عمران اتنهد بغيظ: هو أنا عشان عايز أقعد مع ولادي، لازم يبقى في حاجة.

عادل بنبرة اعتذار: العفو يا بابا، ما قصدتش، بس حضرتك دايماً في الوقت ده، يا في المكتب بتقرأ، يا في جناحك بترتاح. عمران بص له بهدوء: ماشي يا سي عادل، أنا فعلاً طالع أرتاح شوية.. وبص لهم كلهم بمكر: بس قبل ما أطلع، أحب أقولكم، بكرة عندنا حفلة كبيرة ومعزومين فيها، ولازم كلكم تكونوا موجودين. علي باستغراب وبنبرة مندهشة: حفلة إيه دي يا بابا؟ عمران بنرفزة مزيفة: وانت مالك يا علي!

انتوا تسمعوا اللي بقوله وبس، قولت في حفلة والكل لازم يحضرها!! يعني تقولوا حاضر من غير نقاش. علي بنبرة كلها أسف: حاضر يا بابا، وأسف إني سألت حضرتك. عادل بنبرة قلق وتوتر: فين الحفلة دي يا حاج؟ عمران بنبرة هادية: هتكون في أوتيل (... الساعة 9، ياريت تجهزوا نفسكم من دلوقتي وترتبوا أموركم... بص لـ

سامية وبنبرة أمر: انزلي الصبح هاتي أشيك بدلة لـ صهيل باشا الشهاوي، عشان يحضر بيها الحفلة، وهسيبلك مبلغ محترم مع فاطمة، تديه لـ محاسن وهدية عشان ينزلوا هما وكل الشغالين وقت الاستراحة بتاعتهم يشتروا هدوم جديدة، عشان هيحضروا معانا الحفلة. سامية ردت بنبرة اندهاش: حاضر يا بابا. نادر قرب من شهاب، همس له وهو مش مستوعب اللي بيسمعه: انت فاهم حاجة؟ شهاب عينه على عمران، هز راسه، بنفس

الهمس وبنبرة كلها حيرة: بحاول أفهم ومش عارف أوصل، بس هقول إيه؟ هو ده عمران الشهاوي، ماحدش بيعرف يفهمه. عمران بص لـ شهاب بمكر: ما تشغلش دماغك كتير، عشان لو قعدت 100 سنة مش هتعرف تفهم دماغي يا ابن عادل. نادر بذهول: اوبااااا!! هو سمعنا؟ طب إزاي؟ ده أنا ما كنتش سامع نفسي؟ عمران مشي لحد السلم، ولف بجسمه لـ نادر بهدوء: بكرة تكبر وتتجوز وتبقى أب، وساعتها هتعرف أنا سمعتكم إزاي. وبص لـ شهاب بنظرة حنونة

كلها حب وبنبرة سعيدة: حضّر نفسك، آخر الأسبوع كتب كتابك على كريمة، وفرحكم الشهر الجاي. شهاب جري على جده من فرحته وهو مش مصدق اللي بيسمعه: حضرتك قلت إيه دلوقتي؟ بالله عليك يا جدي، قول اللي قولته ده تاني!! عمران سابه وكمل طريقه على السلم وهو بيبتسم ابتسامة صافية، وبنبرة متهكمة وهو ضهره لـ شهاب: عليه العوض ومنه العوض في أحفادي، شهااااب، لو هتفضل متنح كدا كتير، انسى، اعتبرني ما قولتش حاجة، ههههههههههه. شهاب صرخ بجنان

وجري ورا جده على السلم: لااااا، انسى إيه؟ ده أنا ما صدقت، ابوسك منين بس؟ قول لي!! عمران ضحك بمكر: ما أعتقدش إنك تحب تبوس جدك الخنشور، وفرهم لناس تانية بس بعد الفرح يا فالح مش قبله، هههههه.

سابه وكمل طريقه طالع جناحه، وجواه راحة غريبة، إحساس عمره ما حسه من سنين، قلبه بيرتاح لأول مرة من هم تقيل كان شايله لوحده، ابتسامته البسيطة اللي فضل شايلها لحد ما وصل جناحه، ما كانتش بس فرحة، كانت امتنان جواه إنه شاف اليوم اللي ولاده وأحفاده واقفين فيه جنب بعض، على قلب رجل واحد، من غير مشاحنات ولا حسد، ومن غير خوف من بكرة، دخل جناحه وقفل الباب وراه بهدوء، لف بعينيه في كل ركن في الأوضة، بيودّع القلق اللي كان ساكنها،

قعد على كرسيه اللي دايمًا بيقعد فيه، سند ضهره وغمض عينيه، مر في باله حكمة فاطمة وعيونها اللي دايمًا بتفهمه من نظرة، فرحة صهيب واعترافه بحب سبيل، دموع سبيل وهي شايفة حلمها بيتحقق أخيراً بعد سنين عذاب، صوت شهاب وهو بيجري عليه من الفرحة، ضحكة نادر، لهفة علي، وقلق عادل اللي دايمًا شايل المسؤولية، حب سامية الخالص من أي أحقاد للعيلة، يمنى وشاهندة وهما بيجروا عليه دايمًا ويشاكسوه، صهيل أصغر حفيد وأجمل فرحة وامتداد لاسمه،

اللحظة اللي كان مستنيها طول عمره، وعاش حياته كلها عشانها،

همس لنفسه بصوت واطي: دلوقتي بس أقدر أقول إن عمران الشهاوي لسه بخير، ولسه ليه سند، سكت وساب قلبه يعيش اللحظة، لحظة الانتصار الحقيقي، اللي ما جاش بمال ولا سلطة، لكن بإيدين مترابطين، وعيلة اتجمعت تاني زي زمان ويمكن أحسن كمان. *** في مرسى علم

بعد ما صهيب وسبيل خلصوا رقص وقعدوا اتعشوا سوا على ضوء الشموع، قاموا اتمشوا على البحر شوية لحد ما وصلوا لمكان، صهيب كان مجهزه بقلب كبير مرسوم بالشموع، قعدوا جواه، خدها في حضنه وناموا على الرمل وعيونهم اتعلقت بالسما. صهيب اتنهد تنهيدة طويلة، ولف وشه لـ سبيل بابتسامة هادية وهو بيلعب لها في خصلات شعرها: معقول أنا كنت أعمى للدرجة دي؟ إزاي ما كنتش شايفك قبل كدا؟ ابتسمت سبيل وبصت له بنظرة

كلها شوق وبنبرة عاشقة: عشان كنت شايف البنت الصغيرة اللي اتربت في حضن باباك ومامتك، وعاملتها زي شاهندة. صهيب عيونه اتعلقت بعيونها وبهمس: لو كنت أعرف إن البنت الصغيرة أم ضفاير، هتكبر وتبقى أجمل ست في الدنيا، وتحبني الحب ده كله، ما كنتش ضيعت لحظة واحدة من عمري بعيد عنها. سبيل رجعت بصت

بعينيها للسما وبتنهيدة: من يوم ما قلبي دق بحبك وأنا بتمني أصرخ بالكلمة اللي جوايا، بس كنت أرجع وأقول لنفسي، اهدي واستني لما تحسيها منه، ويوم بعد يوم، وسنة ورا سنة كنت بكبر وبيكبر حبك جوايا، وما حستش منك اللي يخليني أصرح لك بحبي، كتمته بكل قوتي واكتفيت منك بنظرة الأخ الكبير... لفّت وشها تاني وبصت له بحزن: بس قلبي وجعني أوي منك لما قلت لـ جدو مستحيل أتجوزها... صهيب قاطعها ببوسة

فوق جبينها وبنبرة ندم: كنت غبي، وجاهل، ما كنتش شايف الحقيقة اللي كل الناس شايفينها. سبيل بصت له وهي بتضحك وبنبرة سخرية: أيوه، على رأي شهاب، غبي وحمار كمان. صهيب اتعدل وقعد وبص لها بحاجب مرفوع: اممممم، بقى أنا حمار!! مااااشي. سبيل قعدت بصت له وضحكت بعلو صوتها ومن بين ضحكها: أحلى حمار في حياتي يا ناس، ههههههههههه. صهيب بص لها وهو بيضحك: يا بنتي أرحمي أمي، بطلي تضحكي وتبصي لي كدا، صدقيني هروح فيها!! سبيل ما زالت

بتضحك وصوت ضحكتها مجلجل: سلامتك يا حبيبي. صهيب بغيظ: يا بت بقولك بطلي ضحك، أنا هموت وندخل سوا جوة الشاليه. سبيل من بين ضحكها اللي هيجننه: وأنا مالي يا أخويا، عايز تدخل، ادخل لوحدك، جدو قالي اوعي جوزك يتحرش بيكي، وأنا بحب اسمع الكلام، ههههههههههه صهيب بص لها برفعة حاجب وابتسامة غيظ: آه يا أختي، اسمعي كلامه انتي، واتشل أنا. سبيل غمزت له وبنبرة كلها دلع: بعد الشر عليك يا هيبو يا حبيبي. صهيب

قرب منها وشدها لحضنه بغيظ: وبعدين معاكي يعني، انتي ناوية تجننيني مش كدا؟ بقى أنا بقولك اتلمي، وانتي تشليني بزيادة، مش كفاية جدك واللي عامله فيا. سبيل ابتسمت واستسلمت لحضنه، غمضت عينيها وبتاخد نفس قوي من ريحته، فتحت عينها ببطء وبصت له بحب وبنبرة كلها رجاء: أنا بحبك أوي يا صهيب، ممكن ما توجعنيش تاني؟ صهيب اتنهد تنهيدة تقيلة وبص

لها بنظرة حنونة ونبرة ندم: سامحيني يا أغلى من روحي، حقك ع قلبي، عارفة، أنا كنت هتجنن لما مشيتي وما كنتش عارف عنك حاجة، قلبت الدنيا عليكي عشان الاقيكي، كنت بقولهم إني بدور عليكي عشان أطلقك وأسلمك بإيدي لحبيبك، بس كنت بستغرب نفسي، إزاي بقول كدا، وجوايا مش عايز أعمل ده، عايزك تفضلي مراتي، ماكنتش فاهم ليه، ودلوقتي بس فهمت، بس اللي هيجنني، انتي إزاي كنتي في مارسيليا وأنا سألت عليكي في المطار وقالولي ما خرجتيش من مصر.

سبيل ابتسمت ابتسامة هادية: عشان ببساطة أنا ماخرجتش من مطار القاهرة. صهيب باستغراب: إزاي؟ سبيل بهدوء: يا حبيبي أنا لما رجعت من باريس نزلت ع مطار شرم الشيخ وطبيعي لأن التذكرة ذهاب وعودة، ارجع مع نفس الشركة، من شرم. صهيب قام وقف وشدها وقفها يتمشوا شوية: طيب، ده بالنسبة لسفرك، بعيدا بقى عن كل الشقلبة اللي عملتيها عشان تكشفي نرمين وسها... سبيل قاطعته بغيظ: اسمها سلعوة، وما تجيبش سيرتها تاني، عشان أنا بغير، ماشي؟

صهيب اتنهد بابتسامة: حاضر يا عيون وقلب حبيك، بس بجد عايز أعرف إزاي قدرتي تاخدي شاهندة ويمنى وتخلينا نلف حوالين نفسنا بالشكل ده. سبيل بابتسامة هادية: لما عرفت بتخطيط هاني، حبيت أسبقه بخطوة وقولت لـ جدو، اللي فكرت فيه، وساعتها كلمت شهاب وحكيت له كل حاجة وعرفته بالناس اللي هتساعده، وهو قال لـ شاهندة ويمنى، وخروجهم من القصر يوم مواجهتك بالسلعوة كان بالاتفاق معاه وكنا كلنا ع الفون مع بعض لحد ما اتأكدت إنهم فـ أمان.

صهيب بابتسامة شقية: يا خراشي، متجوز زعيمة عصابة، يا ناس. سبيل برفعة حاجب، ونبرة تحدي: زعيمة عصابة؟ ماشي، ماشي، أنا هوريك زعيمة العصابة دي هتعمل فيك إيه!! صهيب اتنهد تنهيدة خفيفة ووقف قرب منها مسك ايديها الاتنين ورفعهم لشفايفه باسهم ببطء وعيونه متعلقة بعيونها: أنا أكيد عملت حاجة حلوة في حياتي، عشان ربنا يكافئني بيكي، بحبك يا سبيلي... قرب منها وهمس

بنبرة دافية جنب ودنها: أحببتك يا امرأة أعطتني بلا ثمن، خطفتني من نفسي ومن زمني، أهدتني قلبها وطن، وهمست لروحي بحنان ما عرفته أبدا، فصار نبضي لا ينبض إلا لك علنا. أقسم… لو عاد بي العمر من أوله، لاخترتك عشقاً وسكناً ومأمناً. ابتسمت سبيل بخجل، وهي حاسة بكلمات صهيب بتلمس قلبها، رفعت عينيها لـ عينيه فـ نظرة

طويلة مليانة حب مالوش وصف: أنت من جعلني أرى العالم بألوان جديدة، أنت من علمني أن الحب ليس مجرد كلمات تقال، بل هو روح تتنفس فينا، لقد سرقتني من كل شيء، وتركـتني في عالم لا أريد الخروج منه، عالم مليء بك وحدك، أنت ليس فقط ما تمنيته، بل أكثر مما حلم به قلبي، وأرقى مما يليق بأحلامي. أقسم لك، لا وجود لي خارج حدودك، ولا حياة لي إن لم تكن أنت سكني، ووطني، ومأمني.

لست بحاجة لأن يعود الزمان لتختارني، فكل لحظة معك هي ميلاد جديد لعشق لا ينتهي.

بعد وقت طويل رجعوا قعدوا جوة القلب المرسوم، غلبهم التعب خدها فـ حضنه وناموا ع الرمل مرة تانية بس المرة دي راحوا فـ نوم عميق كأنهم اول مرة يدوقوا الراحة بعد سنين تعب وانتظار، مر الوقت بسرعة، ولما صحيوا دخلوا الشاليه، أخدوا شاور وفطروا وخرجوا بسرعة ع المطار ركبوا اول طيارة راجعة القاهرة وزى ما قال عمران طلعوا من المطار ع الأوتيل أكدوا الحجز واستلموا مفاتيح الأوض، وبمجرد ما وصلوا قدام اوضهم. صهيب باس سبيل فـ

جبينها وبنظرة عاشق: مضطر أنفذ باقي الشرط واتحرم منك، لحين إشعار أخر من عمران باشا، هتوحشيني وتوحشي عيني وقلبي وعقلي، الشوية اللي هتغيبيهم عني. سبيل غمضت عينيها تحبس صورته جواها، وبنبرة اشتياق: وانت كمان هتوحشني يا حبيبي. صهيب بجنان: أنا بقول بلاها شرط، بلاها جدو، وندخل الاوضة سوا، عشان كدا كتير بصراحة. سبيل بضحك وهي بتزقه ناحية اوضته: أمشي يا مجنون أدخل اوضتك قبل ما نلاقي جدو ع دماغنا.

صهيب اتنهد بحاجب مرفوع وهو بيمسح ع وشه، بنبرة غيظ مصطنع مليانة دلع: مضطر أصبر وامري لله... بص لها بعيون كلها شوق، وبنبرة دافية تحضن القلب: ادخلي ارتاحي، وخلي بالك من نفسك. سبيل اكتفت بهزة خفيفة من راسها وسعادة مرسومة ع وشها، من غير ولا كلمة، ويا دوب كانت بتفتح باب أوضتها... صهيب نده عليها فجأة بصوت كله لهفة: سبيل!! سبيل وقفت مكانها، ولفـت راسها ناحيته بنعومة: امممممم، نعم صهيب غمز لها وطبع ع ايده بوسة وطيرهالها فـ

الهوا وهمس بصوت حاني: بحبك، بعيش فيكي وليكي وبيكي. سبيل ضحكت بدلع وهي داخلة الاوضة وبصت له بشقاوة: مجنون. صهيب رد عليها بضحكة ناعمة: بيكي يا قلبي.

كل واحد فيهم دخل اوضته وقلبه مليان راحة وسعادة، كأنهم أخيرا وصلوا لنهاية السباق منتصرين، صهيب اول ما دخل قعد ع الكرسي وهو حاسس ان قلبه بيخبط فـ صدره بقوة، ابتسم وغمض عينه وذاكرته خدته لـ الليلة اللى فاتت، افتكر صورتها وهي ماشية ناحيته بالفستان الأخضر، اللي خـلى لون عينيها يلمع كأنهم زمرد، وشعرها اللى خصلاته كانت بتطير وقلبه بيطير معاهم، اتنهد تنهيدة طويلة، وبص فـ ساعته بيعد الدقايق والثواني، مستني بس إشارة من جده،

أما سبيل دخلت أوضتها حدفت نفسها ع السرير بتنطيط، قلبها بيدق بفرحة ما لهاش وصف، كل تعبها وحزنها، كأنه اتبخر، كل حاجة اتبدلت، الدنيا فـ عينيها اتغيرت، الأرض الصحرا بقت خضرا، والورد فتح، والفراشات بترقص حواليها، كل حاجة بقت زاهية، قعدت تتنطط بسعادة زى طفلة صغيرة فرحانة بلبس العيد، لحد ما غلبها النوم، نامت بعمق، وجواها راحة واطمئنان عمرها ما عرفتهم قبل النهاردة، كأن قلبها أخيرًا لقى المرسى بعد سنين من التوهان، ما كانش

مجرد نوم، دي كانت سكينة نادرة، سلام داخلي طبطب ع جرح الأيام، والليلة اللى فاتت زارتها فـ أحلامها بكل تفاصيلها، كأنها بتعيشها من تاني.

صهيب قاعد فـ اوضته، وفكره مشغول بيها، مد إيده للموبايل من غير ما يحس، وكان ع وشك يطلع يروح يشوفها، بس فجأة، شاشة الموبايل نورت برسالة من جده، كأن عمران شايفه وقرأ أفكاره: خليك عاقل وافتكر الشرط، لو فكرت تقل عقلك وتدخل اوضتها قبل الوقت المحدد، هعرف، وهتلاقيني فوق راسك باخدها منك ومش هخليك تشوفها تاني... قرأ الرسالة، وعينيه وسعت من الصدمة، حس إن جده بيراقبه من ورا الحيطان، اتنهد واتنفس بعمق وهمس بغيظ: ده مش بشر...

رجع يقعد مكانه، ووشه فيه مزيج بين الضحك والغلب، وعقله بيترجى قلبه: استحمل، فاضل شوية وبعدها هتبقى ليك، للأبد... الوقت بيمر عليه تقيل جدا والساعات بطيئة لدرجة مملة، كل ما يتهور ويفكر يروح لها، يفتكر الرسالة، يهدى ويستنى، وبعد نص النهار اتفاجئ بخبطة ع باب الاوضة ولما فتح، لقى كوافير رجالي داخل الأوضة، وبنبرة كلها هدوء: أنا هنا بأمر من حد مهم، هافضل مع حضرتك لنهاية اليوم.

خطر فـ بال صهيب، جده مافيش غيره ممكن يعمل الحركة دي، هز راسه للراجل بابتسامة هادية: تمام، اتفضل... وبالفعل امتثل لأمر جده وسلم نفسه للكوافير وهو بيحاول يفهم اللي بيدور فـ دماغ عمران. أما سبيل، فـ فضلت نايمة وقت طويل، خايفة تكون بتحلم، خايفة تصحى ع واقع مالوش طعم، صحيت فجأة ع خبطة خفيفة ع الباب، فتحت، لقت نفس البنت الميكب آرتست وأختها، بابتسامتهم المريحة. سألتهم بدهشة: إزاي عرفتوا مكاني؟

ضحكت البنت بهدوء: في حد طلب مننا نيجي نجهزك! فهمت سبيل ان الحد ده جدها، اتنهدت بفرحة واستغراب فـ نفس الوقت: هو مافيش غيره... وبدأت استعدادات اليوم الغريب تتم...

صهيب واقف قدام المراية، بيحاول يظبط كل تفصيلة فيه، وهو لسه مش فاهم هو بيجهز لإيه بالظبط، بس قلبه بيقوله إن اللحظة دي مش عادية، وإن اللي جاي هيفضل محفور جواه طول العمر، وفـ الجهة التانية، سبيل بتتحضر وملامحها بين الشوق والرهبة، جسمها بيرتعش ودمعة فرحة خفيفة لمعت فـ عينيها، مش مصدقة إن الحلم اللي كانت بتدفنه فـ قلبها بقاله سنين، بقى حقيقة بتتنسج بخيوط من فضة حواليها، قبل ما يوصل عمران بساعة، وصلت لـ صهيب بدلة سودة أنيقة جدًا، خامتها فخمة وتفصيلتها ع مقاسه كأنها مصنوعة مخصوص ليه، ومعاها علبة مخملية صغيرة، جواها زراير قميص من الفضة، ودبوس كرافتة مرصع بفصوص ماس ناعمة بتلمع تحت النور، كأنها بتشهد ع لحظة فارقة فـ حياته.

وفـ نفس اللحظة، دخل عند سبيل فستان زفاف أبيض... مش مجرد فستان، دا إعلان بداية جديدة، ناصعة زي لونه، مليانة أمل ودفا. بكامل أكسسواراته، طرحة طويلة بتتهدى ع الأرض، وتاج صغير بيرقص فوق المخدة جنبها. وكل تفصيلة فيه بتحكي عن بنت استحقت السعادة بعد سنين حزن ووجع. صهيب وسبيل، كل واحد فيهم واقف لوحده، بس قلوبهم قربت خلاص تلتقي. فـ يوم شكله عادي، لكن معناه كبير بشكل غير عادي.

مرت الساعة ووصل عمران بكل هيبته المعهودة، شامخ زي عوايده. دخل اوضة صهيب وعينيه بتلمع بدموع مش قادر يخبيها. وقف قدامه لحظة، كأنه بيشوف الحلم اللي بقاله سنين بيزرعه بيكبر قدامه بملامح الرجولة والجاذبية. قرب منه بحنان، مسك وشه بين إيديه وباس جبينه بنبرة دافية: "النهاردة بس قلبي هيرتاح، وأقدر انام وانا مطمن، سايب ورايا راجل هيتحمل الأمانة ويكمل مسيرتي من بعدي." صهيب ساب دموعه تنزل من غير ما يمنعها. ميّل راسه وباس

إيد عمران باحترام وحب: "حضرتك الخير والبركة يا جدي، ربنا ما يحرمناش منك أبدا." ابتسامة هادية ظهرت ع ملامح عمران، وبنبرة فيها شقاوة خفيفة كتم بيها مشاعره: "طب يا اخويا، يللا انزل استناني تحت لحد ما انزل لك، امشي." صهيب بص له بنظرة رجاء ونبرة طفولية فـ نفس الوقت: "طب والنبي يا جدي، أشوف سبيل قبل ما انزل، لحظة واحدة بس." عمران بص له برفعة حاجب وكتم ضحكته بصعوبة: "انزل ياض وانت ساكت، ولا أرجع فـ كلامي؟

صهيب صرخ بغيظ طفولي: "لاااااااا، أبوس ايدك، ترجع فـ كلامك ايه!! حااااضر هنزل وانا ساكت، أمري لله." نزل فعلًا، وهو بيحاول يتخيل شكل سبيل، يتخيل لمعة عينيها لما تشوفه، يتخيل صوتها وهي بتنده باسمه. لكن فجأة، وهو خارج، لقى راجل من المسؤولين عن القاعة مستنيه. ابتسم له بلطف، وقرب منه خده لـ مكان متداري، بعيد عن العيون، وفضل واقف هناك، مستني. وحس قلبه بيرقص، بيقول له إن اللي جاي مش عادي.

أما عمران، بعد ما نزل صهيب، قلبه سبق خطواته وراح عند سبيل، بنت عمره، وضي عيونه، اللي خفت روحه من أول صرخة ليها فـ الدنيا. خبط ع الباب ودخل بهدوء. ولما عينه وقعت عليها، انبهر بجمالها. شافها بدر ليلة تمامه، ملكة جمال بفستانها الأبيض كأنها حورية نازلة من السما. وجمالها زاد أضعاف لما التاج زيّن راسها. قرب منها وفتح لها دراعه، دخلها بين أحضانه. ضمها بحنية وباس جبينها بدموع عينيه، وهمس صوت مبحوح:

"مبروك يا قلبي، من النهاردة في حضن تاني هيشاركني فيكي، وياخدك مني يا بنت قلبي." سبيل دخلت فـ حضنه كأنها طفلة بتستخبى من بكرة. ابتسمت والدموع لمعت فـ عينيها، بنظرة كلها إصرار: "مستحيل حد يقدر ياخدني منك يا جدو... سكتت لحظة، قبل ما تطلع بشقاوتها المعهودة، وترفع حاجبها، بنبرة فيها هزار: "يا عمارة انت الأساس والباقي شنط وكياس." ضحك عمران بعلو صوته، الضحكة اللي دايمًا بتطلع من قلبه لما تكون هي قدامه، وبنبرة فيها مكر لطيف:

"اه لو سمعك! يا شقية." سبيل ضيقت عينها برفعة حاجب وبصت له بتحدي ساخر: "هيقول ايه يعنى؟ وانا معايا غول الشهاوية، ولا يعرف يعمل حاجة! عمران ضيق عينيه بخبث واضح: "خلاص نبعتله نقوله، ونشوف هيعمل ايه؟ سبيل رمشت ببراءة مصطنعة، ونبرة طفلة بتحاول تنقذ نفسها: "خلاص خلاص يا جدو قلبك ابيض، خليه قاعد مكانه، بدل ما يقلب هولاكو، ويعورنا كلنا."

ضحكوا سوا، زي ما متعودين، وطلعت ضحكتهم مجلجلة من قلبهم فيها صدق وفرحة ماتستخباش. بعدها عمران مد إيده لـ سبيل، بإشارة هادية عشان تتعلق فـ دراعه وينزل بيها يسلمها لـ صهيب. اتحركوا سوا وخرجوا من الباب، وكل خطوة بتخطيها سبيل كان قلبها بيدق أسرع، والتوتر جواها بيزيد. بس وسط ده كله، كانت حاسة بفرحة مختلفة، عميقة. مشاعرها متلخبطة بين التوتر والحماس، بين الشوق والخجل.

ومع كل خطوة، كانت ترفع عينيها لـ جدها، تسرق منه نظرة أمان، وتستمد منه قوة، كأنه هو السند الحقيقي ليها في اللحظة دي، لحد ما وصلوا عند باب القاعة. جوة القاعة صهيب كان واقف فـ مكان متداري، قلبه بيخبط، مش قادر يظبط أنفاسه. وفجأة، الحاجز اللي كان مخبيه اترفع، ولقى نفسه فـ نص القاعة، محاصر بنظرات كل الناس. لمح فـ نظرة سريعة العيلة كلها موجودة...

عادل وسامية أخواته شهاب وشاهندة، عمه وولاده، حتى شريف ومراته، فريد وباسيلي، رسلان، كريمة وأهلها، وكمان ناس كتير من رجال الأعمال والناس الكبيرة في البلد. وفـ لحظة فاجئت الكل حتى صهيب نفسه اتفاجئ، اتفتح باب القاعة ودخل عمران ماسك إيد سبيل بطلتها الملائكية، المبهرة. ماشية بخطوات هادية بس واثقة، وهما بيقربوا، خطوة ورا خطوة، ناحية صهيب. اللي اتسمر مكانه، عينه اتعلقت بيها، ماقدرش يرمش حتى.

كأن الزمن وقف، وأنفاسه خرجت بصعوبة، حس إن قلبه هيخرج من مكانه ويروح لها. عمران قرب من صهيب وحط إيد سبيل فـ إيده، وبصوت مبحوح مليان شوق وحنية: "سلمتك بنت قلبي وضى عيني، مش هوصيك عليها." صهيب بص له بنظرة كلها احترام وحب، وبنبرة مليانة حزم وصدق: "هحطها فـ قلبي يا جدي وأقفل عليها، وصيتك وأمانتك بعمري أفديها، وبروحي أحميها، وعد مني عمري ما هزعلها، ولا أخلي دمعة توصل لـ عينيها." عمران ابتسم بهدوء، ودمعة صغيرة لمعت فـ

طرف عينه: "هو ده ظني فيك يا ابن قلبي وتربية دراعي، دايما راجل وقد المسؤولية." بعدها باس جبين الاتنين وسابهم بإيدين بترتعش من الفرحة. رجع قعد جنب فاطمة ومسك إيدها بحب، رفعها لشفايفه وباسها: "قولتلك أحفادنا هيرجعوا وايديهم متشبكين فـ بعض، أهو جه اليوم اللى اتمنيناه يا فاطمة." فاطمة بصت له بنظرة عتاب بسيطة وسعادة كبيرة: "رغم اني زعلت منك يا ابن عمي، بس عمري ما شكيت فـ حكمتك ولا قراراتك...

لفت عينها ناحية أحفادها، شافت صهيب بيبوس جبين سبيل، وبيخطوا اول خطواتهم لطريق سعادتهم اللى هيكملوه سوا. طلعوا ع الاستيدج، اشتغلت المزيكا، وأبتدت لحظاتهم الجميلة، ع أغنية أجمل، وهما بيرقصوا سوا، بيغنوا معاها من قلبهم: حكايتنا كملت وكان في وعد نفذته وشلتك في عينيا اسمك واسمي جنب بعض ولآخر عمري شريك فيا أدي كل صحابنا ومعارفنا جم يتبسطوا معانا الليلة ديا قلبي من الفرحة عمال يضم حضنك يا حبيبي بحنية

ده كإني في حلم وبقول: "يا سلام، معقول يا قلبي بقينا ليه! وهادينا يا دنيتنا بأحلى أيام الفرح ده إحنا أولى بيه أنا هفضل جنبك وأعيش سنيني معاك يا حبيبي كلها وهطمن قلبك وأملي عيني بأحلى دنيا أنا شفتها. أنا في عينيك الحلوين سرحت من إمتى ونفسي تكون ليا أول ما شفتك أنا أتصالحت مع نفسي وأيامي الجاية أول مقابلة لو عدى عمر أنا هفضل فاكر تأثيرها مهما السنين تفوت تمر، صورة مفيش حد يبدلها

ده كإني في حلم وبقول: "يا سلام، معقول يا قلبي بقينا ليه! وهادينا يا دنيتنا بأحلى أيام الفرح ده إحنا أولى بيه أنا هفضل جنبك وأعيش سنيني معاك يا حبيبي كلها وهطمن قلبك وأملي عيني بأحلى دنيا أنا شفتها. بعد ما خلصت الأغنية، ولسة الكل فـ حالة انبهار، قام عمران من مكانه، وقرب ناحيتهم. فاجئهم وفاجئ كل الحضور مرة تانية. كان متفق مع مسؤول القاعة من بدري.

وجهّز ترابيزة صغيرة عليها 3 كراسي ومايك. وقف نده ع علي وصهيب يقربوا من الترابيزة. كان وصل المأذون وقعد ع الكرسي اللى فـ النص. قعد علي ع شمال المأذون وصهيب ع يمينه، وبص نحية علي، ونبرة صوته كانت مليانة فخر وهيبة. طلب ايد سبيل منه قدام الناس كلها: "ممكن يا عمي تجوزني بنتك؟ عايزها تكون شريكة لحياتي، تكون السكن لـ روحي، تكون الرحمة والمودة لـ قلبي، تكون تاج راسي ونور أيامي، ورفيقة دربي." علي ماقدرش يرد ع طول.

دموعه نزلت غصب عنه. قلبه بيرتعش جواه. إحساس كان ميت فيه ورجع يتنفس من جديد. لحظة عمران وصهيب رجعوا له فيها اللي اتسرق منه من سنين. قام من مكانه وشد صهيب لحضنه بحب وألم وفرح فـ نفس الوقت. وبصوت بيترعش: موافق أجوزها لك. بس بشرط. تكون لها العوض عن مر الأيام. تكون لها الضحكة اللي تمحي أي حزن. تكون أمانها. وسندها. وحضنها اللي تطمن فيه. تحافظ ع القلب اللى عاش سنين بيتمناك والنهاردة بقى بين إيديك.

خرج صهيب من حضن علي باس ع راسه وايده ووعده من قلبه انه هيحافظ ع سبيل. رجعوا قعدوا. والمأذون أشهر الجواز من جديد. بس المرة دي كانت مختلفة. المرة دي الوكيل كان علي هو اللى حط إيده فـ إيد صهيب. وسلمه سبيل. ولما خلص الإشهار. صهيب قام بسرعة. وبلهفة قلب عاش مستني اللحظة دي. خد سبيل فـ حضنه. لف بيها كتير وسط القاعة. وكل اللى حواليهم كانوا بيصقفوا. بس هما مش حاسين ولا سامعين غير دقات قلوبهم. وبهدوء مفاجئ. سكت المكان كله.

وصوته هو اللى ملأ القاعة. غنى لها من غير موسيقى. من غير ترتيب. من غير خوف. غنى بصوته المرتجف من الحب. غنى من قلبه. ليها هي وبس. وعينه فـ عينها. وصوته. بكل دقة من دقات قلبه. بينطق: حبيبي يا كل الحياة اوعدني إنك تفضل معايا ما تغيبش عني. خد قلبي مني. خليك حاضني لحد النهاية. ده عيونه دار. جنة ونار. ضحكة نهار أجمل رموش. شدوني ليه وأنا دوبت فيه وإزاي وليه ليه ما تسألوش. الله عليك وأنت واقف بين إيديا.

ضحكة عينيك بيها بنسى الدنيا ديا. الله. الله عليك وأنت واقف بين إيديا. ضحكة عينيك بيها بنسى الدنيا ديا. لو يوم يغيب يلقى حبيب يحلم معاه آه ويحس بيه. هفضل أنا أحلم هنا يجمعنا يوم وأحضن عينيك. الله عليك وأنت واقف بين إيديا. ضحكة عينيك بيها بنسى الدنيا ديا. الله. الله عليك وأنت واقف بين إيديا. ضحكة عينيك بيها بنسى الدنيا ديا.

سبيل بصت له بدموع بتلمع فـ عيونها. قلبها بيدق بسرعة مرعبة. مش مصدقة إن اللحظة دي بقت حقيقة. حبيبها واقف قدامها بيغني لها لوحدها. والقاعة كلها ساكتة. مستنية رد فعلها. حاسة بعيون الكل متسلطة عليها.

وبتبلع ريقها بصعوبة. من كتر الخجل اللى لونه صب فـ خدودها ورد. واللي خلى نظرتها تهرب لثواني. قبل ما ترجع تترفع تاني ع عينيه. حاسة كل حاجة حواليها اختفت. وفضل هو. وصوته. ونظرة عينيه اللى حضنتها قبل ما حضنه يلمها. مدت إيديها بخجل. ولفّتها حوالين رقبته. وهمست بصوت مبحوح: بحبك. بحبك من قبل حتى ما أعرف يعني إيه حب. اتنهد صهيب بسعادة وبقى هيتجنن ونفسه ياخدها ويجري بيها بعيد عن عيون الكل.

قرب منهم عادل والفرحة باينة فـ ملامحه بارك لهم وباس جبينهم وبنبرة حب: ربنا يسعدكم ويكمل فرحتكم ع خير. سامية بصت لهم بدموع الفرحة وهى شايلة صهيل وقربت منهم: أخيرا جه اليوم اللى عشت عمري بتمناه. أحضر فرحكم.... وبصت لـ ابنهم اللى بين إيديها بضحك: وأشيل اولادكم. شهاب من وراها وهو بيضحك: واديكي شوفتي اليوم كومبو يا سمسمة اتنين فـ واحد. وبص لـ صهيب غمز له بمكر: الله يسهل له يابا. ناس ليها فسح وسهر وناس تقعد تتحسر.

فضلوا يضحكوا ويهزروا وكل الشباب والبنات اتجمعوا حواليهم يغنوا ويرقصوا. وكان فرح اسطوري ولا فـ الخيال. وقت استراحة البوفيه قرب رسلان من صهيب بتوتر واضح فـ ملامحه ونبرة صوته: بشمهندس صهيب. انا چاى طالب الجرب منك. وعايز أخطب انسة شاهندة. صهيب ضيق عينيه وبص له باستغراب. وبنبرة مليانة دهشة: قولت عايز ايه! تفتكر الوقت مناسب يا متر! رسلان بص فـ الارض

بخجل ونبرة صوته مهزوزة: عارف ان الوجت مش مناسب. انا بجالى فترة متردد أكلمك. لأسباب انت عارفها كويس. بس اللى حوصل فـ مكتبك من يومين خلاني اتشچع واتجدم اطلب يد انسة شاهندة. وجبل ما تجول حاجة. انا من وجت ما شوفتها اول مرة وهي شغلت بالي وسكنت جلبي ولولا كانت مخطوبة وجتها كنت اتجدمت ع طول. لكن هجول ايه عاد!! النصيب بجى. جولت ايه!

صهيب سكت وبص له بنظرة طويلة فاحصة. وهو بيحرك لسانه جوة بقه. وقبل ما يرد عليه. اشتغلت الموسيقى وابتدى الجزء التاني من الفرح ومسؤول القاعة نده عليه. وأضطر يستأذن ويرجع يكمل ليلته. وساب وراه قلب بيحترق. رسلان فضل واقف مكانه. نظراته تايهة. وقلبه بيدق دقات متقطعة من القلق. والتوتر اللي عمال يعصره من جواه. كان محتاج بس كلمة. إشارة. حتى نظرة تطمنه. لكن صهيب مشي. وسابه يغلي فـ نار الحيرة.

فضل واقف كأن الزمن وقف عنده. القاعة كلها حواليه بتتحول لمشهد تاني. ضحك. وصور. وناس بتسلم ع بعض. وأطفال بتجري. وهو جوه عقله. صوت واحد بيصرخ: هيوافق! ولا لأ! شرد فـ دوامة أفكاره وماحسش بالوقت فجأة أكتشف ان الوقت بيمر بسرعة. والفرح اللى كان درب من الخيال خلاص بيخلص. الكل كانوا مبسوطين. واتجمعوا كلهم عشان يتصوروا مع سبيل وصهيب قبل ما يمشوا. واجمل صورة خدوها كانت صورة عمران وهو شايل صهيل.

واقف فـ النص. عن يمينه صهيب. وعن شماله سبيل. وحواليهم كل العيلة. عادل وسامية. شهاب وشاهندة. وكريمة. شريف ومراته. فريد وباسيلي. وحتى علي اللى عيونه كانت بتضحك وهو بيحضن سبيل من بعيد بعينيه وجنبه يمنى ونادر. كلهم بيبصوا لبعض بحب. بحب صادق. مالى الصورة دفء… خلى كل الناس تقول: دي مش مجرد عيلة… دي قصة حب!

"بعدها ودعوا سبيل وصهيب. اللى خرجوا من الأوتيل ع المطار ع طول. عشان يبدوا رحلة شهر العسل. وأول لحظة فـ حياتهم الجديدة. وعيونهم مليانة شوق. وقلوبهم مليانة حب وسند لبعض. ومع أول خطوة خدوها سوا فـ طريقهم الجديد. انتهت كل الأوجاع. وخفت كل الجراح. وابتدت احلام وآمال بحياة جديدة مليانة حب وسكينة. لـ قلوب أخيرا لقت بعض بعد معاناة. فـ جنينة القصر.

بعد الغدا كان الجو حلو وعمران طلب انه يشرب قهوته فـ الجنينة و الكل شجع فكرته وطلعوا قعدوا برة. الرجالة والشباب أخدوا جنب يتكلموا فيه فـ امور المجموعة. والستات والبنات أخدوا جنب تاني وسبيل كانت قاعدة وسط البنات بتضحك وتهزر معاهم. وكل شوية عينيها تروح ع صهيب تغيظه. وهى بتلاعب صهيل من غير ما حد ياخد باله. سامية انتبهت بعد شوية وقت. لـ تصرفات سبيل ولاحظت صوت ضحكها العالي وملامح صهيب المتضايقة. مسكتها من ودانها

بحنية وبنبرة تعنيف ساخر: وبعدين معاكي يا بت انتى! مش هتبطلي عمايلك دي! سبيل حطت إيدها ع ايد سامية وبضحك: أى. أى. ودني يا ماما. هو انا عملت ايه يعنى! سامية سابت ودنها وبصت لها بحدة خفيفة وبرفعة حاجب: عيني فـ عينك كدا! بقى بذمتك انتى ما عملتيش حاجة! سبيل ضحكت بمكر وعينها ع صهيب اللى هيفرقع من الغيظ. وبهدوء: لأ بقى. طالما ذممتيني. يبقى عملت. سامية بغيظ مصطنع: يبقى أكيد صريخك فوق ده. كان مقلب من مقالبك. صح!

سبيل قامت وهى بتحط صهيل بين ايدين سامية. بصوت مليان دلع ومرح وهى بترقص لها حواجبها: أبنك عايز يتربى يا سمسمة. وشكلك كدا انشغلتي مع دولا ونسيتي تربيه. قولت أربيهولك انا. سامية بضحك وهى بتهز راسها: والله ما في حد محتاج يتربى غيرك يا بنت علي. سبيل وهى داخلة جوة القصر حدفت لها بوسة فـ الهوا وبدلع: وماله ياقمر. هو انا اطول! أهو أتربى من جديد ع ايدك يا سمسمتي. فـ الجنب التاني.

فـ نفس الوقت. شهاب كان قاعد ملاحظ نرفزة صهيب وبص له باستغراب. ابتسم. ونبرة صوته فيها قلق: مالك يا هيبو مدخن ليه كدا! نادر بص لـ شهاب بسرعة وهو بيضحك بسخرية: اما فاتتك حتة حفلة يا شهبوب. توووحفة. شهاب عيونه وسعت من الفضول: حفلة ايه دي ياض! أحكيلي حصل ايه! نادر بيشاور ع صهيب وبيضحك: سبيل دلعت أخوك أخر دلع. هو انت مش شايف شكله ولا ايه! شهاب انفجر ضحك وهو بيبص لـ

صهيب بنظرة مستفزة: واضح يا نادورة ان اختك ظبطته ع الآخررررر. صهيب قاعد متغاظ من حركات سبيل. كل ضحكة منها كانت بتولع نار جواه. حاسس انه عايز يقوم يكسر دماغها. قام فجأة وصرخ فيهم بغيظ: احترموا نفسكوا انتوا الاتنين. بدل ما اخلص عليكوا وعليها فـ ساعة واحدة وارتاح منكم. عمران كاتم ضحكه بالعافية. لكنه عقد حواجبه وكشر. وصرخ فيه بحدة مصطنعة: من امتى صوتك بيعلى وانا قاعد يا صهيب! اترزع واقعد مكانك وانت ساكت. صهيب بص لـ عمران

بعصبية وعينيه بتطق شرار: يا جدي انت مش شايف يعني! ولا تكون صدقت اللي هي قالته ده. عمران بنبرة هادية بس حازمة: عارف إنك ما عملتش حاجة، بس انت بغشوميتك مسكتها عليك واحدة. وزي ما سمعت كلام المتخلف أخوك ومثلت عليها، هي كمان مثلت عليك ولبستك في حيط. يبقى العقل بيقول إيه؟ صهيب انفجر، مش قادر يسيطر على غضبه. صرخ وهو بيطوح إيده في الهوا: يووووه بقى! يخربيت العقل وكلامه!

مش كل شوية حد يزن على ودني بيه. أنا ما بقاش عندي عقل أصلًا بسبب تصرفاتها المجنونة دي. وشكلي كده هقوم أفلق دماغها نصين. علي كان قاعد ساكت. فجأة بص له بغيظ، وبنبرة عصبية: ابعد عن بنتي يا صهيب، وإياك تمد إيدك عليها. أنا بقولك أهو!! ماحدش هيقف لك غيري. صهيب بص له بحدة، وبحاجب مرفوع وبنبرة فيها سخرية: والنبي يا عمي اقعد على جنب. انت أصلًا ما تعرفش عنها حاجة، فما تجيش دلوقتي وتقول بنتي. علي

بص له بحزن وبصوت مكسور: عندك حق يا صهيب. أنا فعلًا ما ربيتهاش ومعرفش عنها حاجة، بس ده ما ينفيش حقيقة إنها بنتي. صهيب قرب من علي باس على راسه بندم: حقك عليا يا عمي. أنا ما قصدتش أزعلك، بس انت شايف تصرفات بنتك وعمايلها...

قطع كلامه لما لمح سبيل قامت وسابت صهيل مع سامية، عشان تدخل القصر بهدوء، كأنها ما عملتش حاجة. حس الدم بيغلي في عروقه. اتحرك وراها بخطوات سريعة. جواه نار وحلف ما يسيبها تعدي بالساهل. لازم يرد لها اللي عملته فيه وبطريقته. جوة القصر.

دخلت سبيل المطبخ بخطوات هادية، تجهز الرضعة لصهيل بنفسها، لأنها كانت عارفة إن الوقت ده استراحة الشغالين. كانت حاسة بضربات قلبها بتزيد كأنه هيخرج من مكانه. وقفت على الحوض تغسل الببرونة وتغلي الماية. تشتت نفسها عن القلق اللي بيزيد جواها كل ثانية. كانت حاسة بيه بيقرب من قبل حتى ما يوصل. وفعلاً، لحظات وأنفسه الدافية كانت بتخبط في رقبتها. اتوترت وضربات قلبها زادت كأنها طبول بتخبط جواها. حاولت تتماسك وتغني ببرود مصطنع، بس كان واضح من

كلمات الأغنية إنها مقصودة: خليه يدور عليا كل شوية ما يلاقينيش. خليه يتعب شوية ويحلم بيا وما يشوفنيش. مش هجري تاني وراه عشان غلبت معاه. وعن نفسي هعود نفسي من دلوقتي ما يوحشنيش... كانت بتحاول إن صوتها يبقى قوي، بس في آخر كل جملة، كان بيطلع مهزوز. حسّت بيه وراها قريب، أوي. وهي لسه بتغني: كتر خيري إني قابلته واستحملته يا قلبي زمان.

يجي عليا واعديها ويسوء فيها معايا كمان. من كتر عمايله بقوله كفاية أنا وانت بقينا خلاص. للناس سيرة على كل لسان. هيجيني عشان يراضيني هقول على عيني ما نستغناش. وهسبيه يجرب مرة عشان تاني مرة ما يعملهاش. وبناقص عند بعند وبعد ببعد ونجي على بعض خلاص. يا رجعنا يا مرجعناش. صهيب قرب منها أكتر وقف وراها بهدوء، وسند بإيديه على الرخامة من الناحيتين. حاصرها بين دراعاته وهمس جنب ودنها بصوت دافي ونبرة كلها عشق خارج من قلبه: بحبك.

الكلمة نزلت عليها زلزلتها. جسمها ارتعش وحست بسخونة في وشها. ورجليها مش شايلاها. بسبب قربه منها وهمسه ليها بالطريقة دي. بلعت ريقها بصعوبة، وصوتها طلع مهزوز: ابعد يا صهيب أحسن لك. صهيب ضحك بخبث وهو شايف رعشة جسمها. قرب أكتر، ونفسه لمس خدها. وهمس تاني بصوت أهدى، ومليان اشتياق: تؤتؤ. مش هبعد. وهموت وأعرف. ناويالي على إيه؟

سبيل توترها زاد وحست إن انفاسها انقطعت. بقت مش شايفة حاجة قدامها. مش عارفة تتحكم في أعصابها بسبب قربه منها. فجأة، داست على رجله بكل قوتها وحاولت تعضه في دراعه، عشان تعصبه وتخليه يبعد عنها. ولما ما تحركش، رفعت له وشها وبنبرة منفجرة: ابعد عني يا باااااااارد! وسع خليني أمشي. صهيب ما اتهزش. كان واقف بثبات. عينه فيها شغف وعناد. وبضحكة خفيفة على شفايفه. قرب أكتر. وباسها في رقبتها ببطء. وهمس بنفس

النبرة اللي زلزلت كيانها: بطلي تستفزيني. عشان أنا صبري قليل. وصدقيني لو جنونتي طلعت. انتي أكتر واحدة فاهمة وعارفة إني مش هيهمني حد. ماشي يا قمر. وبكل هدوء، سابها وخرج. خطواته كانت سايبة وراها إعصار. وهو طالع الجنينة كأنه ما فيش حاجة حصلت. بس قلبه كان بيرقص من جوه. حاسس إنه أخد حقه منها. وفـ نفس الوقت حاسس إنها ممكن تلين وترضى تسامحه.

أما سبيل، فوقفت مكانها متجمدة. حطت إيدها على وشها. حسته بيطلع نار بجد. مدت إيدها وفتحت الماية بسرعة. اخدت نفسها بصعوبة وغسلت وشها. كأنها بتحاول تطفي اللي جواها. إيدها راحت تلقائي على صدرها. تحاول تهدي نبض قلبها اللي كان بيدق بسرعة زي الحصان اللي بيجري في سبق. خدت لحظة تجمع نفسها. وبعدين خرجت ورجعت الجنينة. عينيها وهي خارجة كانت بتدور على الكل. بس كانت حاسة بعينه هو بالذات ملاحقاها. وصهيب أول ما شافها ظهرت. ومجرد ما عينيه وقعت على ملامحها المتوترة. ابتسم بخبث. بص لها في نظرة طويلة. وغمز. وحدف لها بوسة في الهوا. كأنه بيقولها "لسه اللي جاي أكتر".

رجع بعدها بهدوء يسمع الكلام اللي داير بين جده وأبوه وعمه. كأنه ما عملش حاجة هو كمان. شهاب كان بيراقب الموقف بعينيه. قرب منه وهمس بمكر: هو إيه النظام؟ شوفتك دخلت جوة بحال وطالع بحال تاني خالص. إيه العبارة يا باشا. صهيب ضحك وهو لسه عينه عليها: هي اتحدتني واعلنت الحرب. وأنا قبلت التحدي. وناوي أخليها ترفع الراية البيضا. نادر قرب منه وبنبرة كلها سخرية: يا خوفي لا نقرا عليك الفاتحة يا ابن عمي.

صهيب رد من غير ما يبعد نظره عنها. ونبرة صوته فيها يقين مريب: وغلاوتها في قلبي، يا نادر. لا أخليك تشوف بعينك أختك وهي بتسلم. شهاب بص لـ صهيب برفعة حاجب ونبرة كلها تحذير: أنصحك يا حبيب أخوك بلاش الثقة الزايدة. عشان دي مجنونة وما تتوقعهاش. خصوصًا بعد ما ننفذ اللي اتفقنا عليه. صهيب اتنهد ولف وشه ناحية شهاب: ربنا يستر.

رجع بعدها بكل هدوء يشارك في الكلام عن الشغل والمجموعة. بس عينيه كانت فيها لمعة شوق قايدة. ولهفة بطعم النصر. كأنه لمس طرف حلمه بإيده. أما هي، فكانت كل خطوة بتاخدها وهي راجعة ناحيتهم. كانت حاسة إن رجليها تقيلة. كأنها ماشية فوق صفيح ساخن. ونظراته ليها كانت بتزود اللهيب جواها. وتشعلل قلبها أكتر. الجنينة حواليهم كانت هادية. بس هدوء خادع. مخبّي تحته صوت قلوب بتخبط. وصراع مش باين على الوش بين الاتنين. لكن شغال جواهم على أعلى مستوى.

سبيل حاسّة بقلبها مش على بعضه. كل حاجة حواليها بتتحرك. وهي بس اللي واقفة. محبوسة بين قلبها وعقلها. وهو مشاعره كانت عاملة زي الهوا. بيطوف حواليها. بيلمسها من غير ما يبان. وكل مرة تحاول تبعده عنها. بيرجع أقرب وأقوى. رجعت قعدت وسطهم. لكن جواها صوت عقلها بيصرخ بيقولها ما تضعفيش. وبرغم صريخ صوت العقل. قلبها بدأ يخونها ويرق له ويضعف قدامه.

فجأة عين صهيب لمحتها. قامت مرة واحدة بعد ما قعدت ودخلت جري جوة القصر والبنات وراها على طول. عينيه وسعت بقلق وشاور لـ شهاب يقوم يحصلها وهمس بنبرة مستعجلة ولهفة: قوم بسرعة حصلها وقولها اللي اتفقنا عليه. شهاب بص له باستغراب وحاجب مرفوع: وده ليه بقى إن شاء الله؟ مش قولنا هكلمها فون. صهيب ابتسم ابتسامة مكر. وكله رغبة واضحة في إنه عايز

يستمتع باستفزازها وتوترها: ليا مزاج أشوف رد فعلها وانت بتكلمها. عايز أشوف تعبيرات وشها هتتقبل الخبر إزاي. شهاب ضحك بسخرية خفيفة وبنبرة فيها قلق مصطنع: ما بلاش يا ابني! انت راجل عندك عيل عايز تربيه. وأنا صغير وع وش جواز ما لحقتش أفرح. صهيب بنظرة كلها جدية وبنبرة حادة: قوم وانت ساكت. يللا. شهاب رفع إيده باستسلام: ماشي يا عم. أديني قايم. وأمري لله.

وفعلاً قاموا الاتنين ومعاهم نادر بعد ما استأذنوا من اللي قاعدين. واتحركوا بخطوات سريعة ناحيتها. عشان يدخلوا ورا البنات. وكل واحد فيهم عينه بتلمع بالفضول وعقله غرقان في دوامة أفكاره. شهاب قلبه بيخبط وخايف من رد فعلها بسبب اللي ناوي يقوله. وصهيب هيتجنن ويعرف سبيل هتعمل إيه لما تعرف إنه ممكن يضعف ويميل لـ سمر. وقف استخبى هو ونادر بعيد عنهم وسابوا شهاب في وش المدفع. جوة القصر. شهاب قرب منها بسرعة ونده

عليها بنبرة صوت قلقانة: سبيل! سبيل غمضت عينها بتحاول تهدى وتلملم شتاتها وبنبرة كلها عصبية: عايز إيه يا شهاب؟ شهاب بندم حقيقي: مش ناوية تسامحي بقى يا سبيل؟ اول مرة نفضل متخاصمين المدة دي كلها! سبيل جزت ع أسنانها بغيظ: ما تتكلمش فـ الموضوع ده تاني يا شهاب، عشان انا مش طايقاك، فـ خليني ساكتة أحسن، لاني لو اتكلمت هنخسر بعض. شهاب بقلق وعينيه بتلف فـ

صالة القصر يدور ع صهيب: ماشي يا سبيل، براحتك، انتى فـ النهاية اختي وكاتمة اسراري ومسير الماية ترجع لمجاريها ونتصالح، بس نصيحة من أخوكي اللى خايف عليكي، صهيب مش هيستحمل دلعك ده كتير، وقولتلك قبل كدا أكتر من مرة، ان سمر سكرتيرته عينها منه، وهو بالطريقة بتاعتك دي ممكن يضعف قدام اغراءاتها، ياريت ترمي أى حاجة ورا ضهرك وتحافظي ع جوزك، المرة دى لو راح منك مش هتعرفي ترجعيه تانى.

سبيل ابتسمت ابتسامة حزينة، وبصت له بنظرة عين مكسورة، ومسحت دمعة شاردة نزلت غصب عنها قبل ما حد ياخد باله، وبنبرة كلها قهر ومرارة: يعمل اللى هو عايزه، ما بقتش تفرق، اصلا اتعودت خلاص ع وجعه.

سابته فجأة وطلعت السلالم جري عشان تدخل تستخبى فـ اوضتها وتسمح لدموعها تنزل بحرية، صهيب حس بوجع قلبها وطلع من المكان اللي مستخبي فيه يجري عشان يلحقها، ويحاول يصالحها، شاف شاهندة ويمنى طلعوا جرى وراها، بص لـ شهاب بيأس وطلع جرى هو كمان، راح عند باب اوضتها ولسة هيخبط صوتها خلى ايده اتجمدت فـ الهوا، طلع وراه شهاب ونادر لمحوه واقف مكانه قدام الباب، لا قادر يخبط ولا عايز يمشي وسمعوا صوتها من ورا الباب وهى منهارة. جوة الاوضة

اول ما دخلت سبيل اوضتها حدفت نفسها ع سريرها، دفنت وشها فـ المخدة، تحاول تكتم صوت شهقاتها اللى طالع من قلبها، دخلوا وراها البنات بسرعة وهما قلقانين عليها وشايلين همها، وكل واحدة فيهم بتحاول تخرجها من الحزن اللى غرقت فيه. شاهندة قربت منها وشدتها غمرتها بحضن دافي، وبنبرة كلها حزن: لما انتى بتحبيه اوى كدا؟ ليه تتنازلي عنه بالبساطة دي؟ ليه قولتي الكلام ده لـ شهاب؟

سبيل حست بروحها بتنسحب منها شوية شوية، كانت بتتنفس بصعوبة، وبمرارة واضحة فـ كلامها: عايزاني أعمل ايييييه؟ وهو بيقول ان اخوه هيروح لـ سمر، طب ازاااااى؟ ازاى كان لسة بيديني أمل وفـ نفس الوقت ياخده مني تاني؟ ازاى كان لسة بيقول انه بيحبني، وفجأة يبعت شهاب عشان يقولي صهيب هيروح لـ السكرتيرة؟ يمنى اتكلمت

بنبرة هادية فيها رجاء: شهاب كان بينصحك يا ابلة، وانا من رأيه بصراحة، لازم تصالحي ابيه صهيب وتحافظي ع اللى بينكم، لو مش عشانكم، يبقى عشان خاطر صهيل يتربي وسط عيلة كلها حب ودفى. شاهندة هزت راسها وهي بتأييد كلامها: عندك حق يا بت يا يويو، اول مرة تقولي حاجة عدلة... وبعدين بصت لـ سبيل بحنية وهي لسة حضناها: بيلا يا حبيبتى، بلاش تتنازلي عن حبك بسهولة كدا، وما تنسيش ان هو كمان مر بظروف صعبة، كفيلة انها تهد جبل.

سبيل فجأة انفجرت بصوت مبحوح من العياط، صرخت وهي بتبعد نفسها عن حضن شاهندة: ماحدش مر باللى انا مريت بييييه، ان كان أخوكي اتوجع مرة بسبب واحدة ما صانتش أسمه، انا اتوجعت ألف مرة بسببه، تعب؟ ودخل المستشفى؟ يومين؟ تلاتة؟ اسبوووع؟ ما كانش لوحده، بابا وماما كانوا حواليه، انا رحت للموت 3 شهور، صح؟ جدو وخالو كانوا جنبي، بس ما كانش عندي أم تقعد ع باب العناية تعيط وتدعيلي، ولا أبويا كان فاضيلي اصلا..

قلبها كان بيتوجع مع كل كلمة بتقولها، نفسها كان بيتقطع وهي بتكمل: هووو غاب يومين عن الدنيا، ما استحملتش وجيت جرى عليه، واكتشفت انها تمثيلية عشان يرجعني، انا غيبت 3 شهوووور، ما فكرش شهاب يبعتله حتى بالكدب.... سكتت لحظة تاخد نفسها تحاول تهدى وبنبرة مكسورة: اقولكوا سر؟ انتوا عارفين؟

كان نفسي شهاب يخلف وعده معايا، كان نفسي يقول لـ صهيب كل حاجة، كان نفسي يقوله مكاني فين، كنت بتمنى ألاقيه واقف قدامي فجأة فـ مارسيليا، ويقولي انا ماقدرتش ع بعدك، صدقوني كانت هتفرق معايا كتييير اوي، كنت محتاجة أحس ان في حد بيحارب عشاني، عشان أكون مبسوطة، ع الاقل ما كنتش هحس اني لوحدي... اتنهدت

بوجع وبنبرة كلها خيبة أمل: لكن للأسف ما فرقتش مع حد، حتى اللى حاربت الدنيا عشانه ولسة عندى استعداد احارب أكتر وأكتر عشان بس اشوف بسمة ع وشه، ما عندوش استعداد يتحمل شوية دلع، زى ما قال شهاب، وهيجري ع اول واحدة تشاورله. فجأة يمنى وقفت مرة واحدة وبنبرة مرحة، بتحاول تخفف الجو وهي بتخبط بكف ايدها ع رجلها: طب بذمتي، ابيه صهيب عايز نضارة نظر قعر كوباية، بقى فى حد عاقل، يسيب الجوهرة القمر دي؟

ويروح يبص لسلعوة زى سها ولا المقشفة اللى اسمها سمر؟ ده أكيد محتاج كونسلتو عيون عشان يسنفروله عينه، ويشوف كويس. شاهندة بصت لها بدهشة وابتسمت ابتسامة ساخرة: اوباااا!!! اه يويو لو سمعك وانتي بتقولي عليه كدا!!! ولا وانتي بتقولي ع سمر مقشفة، يا ختااااااي، ع اللى هيعمله فيكي، وبعدين يا بت انتى ازاى بتقولي ع أختك سلعوة؟ يمنى

رفعت حواجبها وبنبرة جدية: ع فكرة يا شاهي، انا ماليش أخوات غير ابلة سبيل وبس، انما السلعوة دى، مش اختى، لا اسمها زى اسمي ولا طبعها من طبعي، الله يسامحها ماما بقى ويرحمها، ع البلوة دى. سبيل ابتدت تهدى وبصت لـ شاهندة بغيظ ظريف: هيعمل ايه يعني بسلامته؟ وأه، زفتة الطين سكرتيرته مقشفة وملزقة وكلها بوية.. وبعدها ضحكت بوجع،

وبنبرة ساخرة: اقطع دراع أخوكي، ان ما كانت شبه عم عبده البواب وبتلخبط وشها بجردلين بوية كل يوم من عند بتاع البويات اللى فاتح تحت بيتها عشان تبان انها واحدة ست... وبصت لها برفعة حاجب وغيظ أكتر: وأياكي تجيبي سيرة السلعوة اللى كان متجوزها تاني مرة، وتقولي لـ يويو دي أختك، وعشان ما احطكيش فـ قايمة اغتيالاتي، واحرم عادل وسامية من ذريتهم كلها، فاهمة ولا لأ؟

شاهندة بتهليل: الله أكبر، ايوا بقى، هو ده، احبك وانتي شرسة، وغيرة الانثى باينة فـ عيونك، إديني كمان قمر. سبيل بغيظ: اتلمي يا شاهي انا مش فايقالك دلوقتي، وامشي اطلعي برة روحي لـ اخواتك حفظيهم الشهادة واحفظيها معاهم، غوري يللا. شاهندة بضحك وهى بتغمز لها: مش غايرة، قاعدة ع قلبك، زى هيبو حبيبى ما هو قاعد جوة ومربع كدا. برة الاوضة

واقف صهيب بيسمعها وقلبه وجعه من كلامها، كل كلمة قالتها، وكل جملة كانت خنجر فـ ضلوعه، بتحسسه بالندم أكتر، قرر ساعتها ما يسمعش كلام شهاب، وهيفضل يتحمل عنادها ومكابرتها حتى لو هيفضلوا يجروا ورا بعض العمر كله زى القط والفار، مش هيجرحها تاني، وهيصبر عليها، اما شهاب ونادر كتموا ضحكهم وهما سامعين يمنى وهي بتتريق ع صهيب وبصوله بتهكم والاتنين بيشاوروا بايديهم بعلامة النضارة، اتعصب عليهم وهمس لهم بغضب يمشوا من قدام الباب وهو

دخل اوضته ورزع بابها فـ وشهم، وقعد ع اقرب كرسي وضربات قلبه بتزيد، كانت بتخبط جوة صدره، كل ما يسمعها، يكتشف انه كان أعمى فعلا، وكل حاجة حواليه كانت مشوشة، دلوقتي بس عرف إنه كان غفلان عن حب كبير، نسي وجع خيانة سها، ونسي كل اللى مر بيه، لإن سبيل بقت هي الحقيقة الوحيدة اللي قلبه عايز يعيش بيها وفيها، أما سبيل، بعد شوية، شاهندة ويمنى قدروا يطلعوها من الحالة اللي كانت فيها، وبعدها كل واحدة رجعت أوضتها، وسبيل خدت نفس عميق،

ومسحت دموعها، وقررت تسمع كلامهم، وترمي كل حاجة ورا ضهرها، فـ سبيل إنها تحافظ ع حبها لـ صهيب، اللي مستعدة تحارب عشانه لآخر نفس فيها.

فـ مجموعة شركات الشهاوي مكتب صهيب تاني يوم دخل صهيب الشركة بكل هيبة ووقار، ببدلته السودة الكلاسيك، وشعره المتسرح بعناية ودقنه المهذبة مدياله جاذبية تخطف الأنظار، ماشي بين الموظفين بخطوات ثابتة ونظراته الصارمة بتخترق القلوب قبل العيون، وكأن الهيبة متفصلة ع مقاسه، الكل قام من مكانه باحترام وهو بيعدي، وصل مكتب السكرتارية ومن غير ما يبص ع سمر،

بنبرة حادة وملامح متجهمة: ابعتيلي قهوتي، وبعد نص ساعة ابقى دخلي لي البوسطة والاوراق اللى محتاجة تتراجع عشان الاجتماع الشهري. سمر وقفت تتمايل بدلع، وبصوت ضعيف كله إغراء: تحت أمرك يا مستر. صهيب لف وشه ناحيتها، عينه كلها شرار غضب، وبنبرة صوت حادة خوفتها: سمررررر، حذرتك قبل كدا، ما تتخطيش حدودك، احسنلك. سمر اترعبت من صوته وعدلت وقفتها ونبرة صوتها خرجت مهزوزة: حاضر.

سابها ودخل مكتبه، وقبل ما يقعد، طلع الموبايل من جيبه وبص لـ صورة سبيل اللى كانت متخزنة عنده، عينيه لمعت بوجع ممزوج بندم، وهمس بصوت واطي

وهو بيكتم تنهيدة تقيلة: عارف اني وجعتك وجرحتك كتير، بس من النهاردة هاعيش بس عشان أمحي اى وجع لمس قلبك واشفي جراحك اللى انا السبب فيها، وبعدها ساب الفون من ايده وقعد ورا المكتب وابتدا يتابع شغله بحماس وجواه نفسه اليوم يجري بسرعة عشان يرجع القصر ويشاكس سبيل زى كل يوم، قطع تفكيره خبطة خفيفة ع الباب ودخول عامل البوفيه بالقهوة، حطها بهدوء وخرج، مسك الفنجان رفعه ع بقه وهو بيشرب باستمتاع، اترسمت قدام عينيه صورة سبيل وهى بتنكش شعرها وتصوت عشان يخرج، قهقه بصوت

عالي وهو بيهمس بتنهيدة: شكلي هتعب معاكي اوي يا مغلباني...

شوية وافتكر شكلها وهى متوترة لما قرب منها فى المطبخ. ابتسم ابتسامة صافية وحس بطاقة إيجابية غريبة ما حسهاش قبل كده. وفى لحظة، بقى يقارن بين إحساسه مع سها وإحساسه دلوقتى. لقى فرق شاسع. كل لحظة بيعيشها مع سبيل شعور جديد بالنسبة له أول مرة يحس بيه. حتى إحساس الأبوة. أول ما شاف صهيل وشاله بين إيديه، قلبه دق بين ضلوعه لأول مرة بالعنف ده. الإحساس اللى كان مفتقده لما شال ياسين.

اتنهد باستغراب وهو بيردد: "ما كان لك سيأتيك رغم أنفَك، وستفرح به كما لم تفرح يومًا، وما ليس لك سيبتعد عنك ولو تشبثت به بكل قوتك." بعد مرور كام ساعة، خبطت سمر ودخلت بعد ما سمعت الإذن. وبهدوء: "أستاذ رسلان المحامي عايز يقابل حضرتك." بجدية ومن غير ما يرفع عينه عن الملفات اللي فى إيده: "خليه يتفضل وشوفيه يشرب إيه! خرجت سمر بعد ما هزت راسها بالموافقة وبصت لـ رسلان: "اتفضل مستر صهيب فـ انتظارك."

دخل رسلان المكتب بخطوات بطيئة وتقيلة، كأن جواه هموم الدنيا. ورغم ثبات ملامحه، لكن جواه بركان من قلق وتوتر بيغلي، بيحاول يداريه بكل قوته، وهو بيسلم بنبرة جادة: "السلام عليكم ورحمة الله." صهيب استقبله بابتسامة هادية، وعينيه كلها ترقب: "وعليكم السلام ورحمة الله وبركاته. اتفضل يا متر. يا ترى فيه جديد؟ رسلان رد بهدوء مهني، وهو بيقعد ويحط شنطته ع التربيزة: "أكيد طبعًا يا بشمهندس. أومال أنا چاى ليه؟!

صهيب بنبرة جادة: "خير يا متر؟ رسلان فتح الشنطة وطلع منها ملف حطه ع المكتب، وبنبرة عملية: "كل أوراق إعلام الوراثة اللي تخص عمك وولاده خلصت. وكدا علي بيه لازم يروح البنك ويفتح الخزنة عشان يستلم نصيبه من الماس ونصيب نادر ويمنى هيقدر تمنه ويتحط فـ المجلس الحسبي لحين بلوغهم السن القانوني. وطبعًا الوصاية كانت من نصيب عمران بيه زي ما قال عمك." صهيب اتنهد تنهيدة تقيلة، لكنه اتكلم بثبات: "حسبت نصيب مدام سها؟

رسلان بص له باستغراب، بيحاول يستوعب اللي سمعه، وبنبرة مليانة ذهول ماقدرش يخفيها: "نعم!! انت بتجول إيه؟ كيف يعني نحسب لها نصيب؟ صهيب بنبرة حاسمة وهو بيراقب ردة فعله: "هي مش نرمين تبقى والدتها؟ يبقى شرعًا ليها نصيب فـ الفلوس والشقة والالماظ." رسلان نبرته زادت اندهاش: "بس الأوراق الرسمية بتجول يا بشمهندس إن نرمين مالهاش ورثة غير نادر ويمنى ووالدهم."

صهيب رد بهدوء: "دي الأوراق الرسمية يا رسلان. إنما الحقيقة اللي هنتسأل عليها قدام ربنا، إن هنادي بنت نوال وتورث فيها شرعًا. وإحنا الاتنين عارفين ومتأكدين إن سها ونرمين هما نفسهم هنادي ونوال. وبالتالي لازم تاخد نصيبها من الورث. ده حقها." رسلان عينيه وسعت من الصدمة، وصوته خرج مش مستوعب: "أنا مستغربك. كيف يعني حقها؟

إن كان هما نفسهم اتنازلوا عن الحق ده لما اتخلوا عن هويتهم الحقيقية وعملوا شهادات وفاة، وعاشوا بأسامي تانية. تجوم انت تجول نديها ورثها من أمها؟! صهيب عينه فضلت ثابتة ع رسلان، صوته كله إيمان باللي بيقوله: "انت راجل قانون وعارف، إن ده شرع، ما ينفعش نغفل عنه. وإن كانوا هما اخترقوا القانون ولعبوا بالأوراق، ده ما ينفيش الحقيقة اللي كلنا عارفينها." رسلان سكت لحظة وبعدين كمل باستفسار: "بس ده هيطلع إزاي؟

كل حاجة متسجلة فـ ورق رسمي يا بشمهندس! صهيب بهدوء حاسم: "اعمل حسبتك انت بس وما تقلقش. كل حاجة معمول حسابها. لأن ده مش قراري لوحدي. ده قرار العيلة كلها. المهم، بس تتابع الموضوع فـ سرية تامة. عايزه ينتهي من غير شوشرة." رسلان هز راسه باحترام: "ما تقلقش. كل حاجة هتخلص كيف ما جال عمران بيه. بس عندي سؤال محيرني." صهيب بص له باستغراب: "سؤال إيه؟ رسلان بحيرة ودهشة: "كيف جدك قدر يمحي أثر كل اللي حصل وظهر الموضوع ع إنه حادثة؟

صهيب اتنهد تنهيدة وجع، وبنبرة هادية: "جدى له علاقات كتيرة جدًا بناس كبيرة، والكل بيحترمه ويتمنوا يخدموه. وعشان يحمي سمعة العيلة وسمعة والدك، الراجل اللي مالوش ذنب غير إنه اتجوز نوال، كان لازم يعمل كدا." رسلان شرد فـ كلام صهيب، وصوت داخلي بيهمس له بأمل، كأن الكلام فتح جواه باب جديد ممكن يوصله لـ حلمه. وفكر لو طلب إيد شاهندة دلوقتي، ممكن يوافق؟

صهيب لاحظ شرود رسلان وقبل ما يسأله عن السبب، خبط الباب بهدوء ودخلت سمر وهي شايلة صينية فيها واجب الضيافة لـ رسلان. وقفت جنب المكتب، منتظرة تعليمات صهيب. لكن فجأة كل حاجة انقلبت رأسا على عقب... دخلت سبيل المكتب زي الطوفان وعينها مش شايفة غير سمر اللي كانت واقفة بتتكلم مع صهيب. وبصوت عالي ونبرة حادة: "آنسة سمررررر! بتعملي إيه عندك وسايبة مكتبك؟ سمر بصت لها بدهشة: "نعم!! مش فاهمة حضرتك تقصدي إيه يعني؟

صهيب أول ما شافها داخلة المكتب بالطريقة دي، وبهمس سمعه رسلان، وهو بيحاول يكتم ضحكته: "ربنا يستر من طوفانك يا بنت علي. الله يخربيتك يا شهاب... وقام وقف بهدوء، فـ محاولة لاحتواء الموقف: "خير يا روحي. مالك داخلة زي القطر كدا ليه؟ قربت من المكتب وخبطت عليه بإيديها الاتنين، وبحاجب مرفوع ونبرة تحدي: "أنا قطر؟ ماااااشي يا بشمهندس. أنا هوريك القطر ده هيعمل إيه؟ عدلت وقفتها ولفّت وشها لـ

سمر بغضب: "امشي أخرجي برة. وسلّمي كل شغل المكتب لـ مجدي واطلعي برة الشركة خاااالص. يللا! سمر ردت باعتراض: "آسفة. أنا باخد أوامري من مستر صهيب. مش من سيادتك." سبيل بصت لـ صهيب برفعة حاجب: "غلطت؟! وأنا أموت فـ اللي بيغلط... وبسرعة رجعت تاني تبص لـ سمر، من غير ما تدي فرصة لـ صهيب يفتح بقه،

وبنبرة مليانة غضب: "بصي بقى يا حلوة. أنا كنت ناوية اسيبك يومين تظبطي أمورك وتسلّمي الشغل لـ مجدي ع رواق. لكن عشان قلة أدبك دي، عندك ساعة واحدة بس. تسلميه كل حاجة وتغوري ع الفرع التاني. استلمي شغلك فـ الاستعلامات." سمر بصت لـ صهيب بنبرة مضطربة: "قول حاجة يا مستر صهيب." سبيل قاطعتها بعصبية: "أنا اللي بتكلم مش هو. اتفضلي نفذي وانتي ساكتة." صهيب خد نفس طويل خرجه بهدوء، وجواه فرحة غريبة،

وبنبرة هادية: "ممكن تهدي شوية يا سبيل؟ وتفهميني ليه قراراتك المفاجأة دي؟ ومين مجدي ده؟ سبيل بصت له بغيظ: "ده مش قرار يا بشمهندس... وبصت لـ سمر، بنظرة قاطعة: "ده وعد! وعد سبيل الشهاوي اللي وعدتك بيه من شهور. فاكراه؟ بس عشان أنا ما بحبش قطع الأرزاق، اكتفيت بنقلك للفرع التاني... ورجعت تبص لـ صهيب من تاني بحاجب مرفوع: "مجدي مدير مكتبك الجديد. عندك اعتراض؟ صهيب بص لها وهز راسه بهدوء: "لأ. ماعنديش اعتراض."

سمر اتفاجئت من موقفه، وبنبرة مندهشة: "حضرتك موافق ع كلامها يا مستر صهيب؟! صهيب بتنهيدة راحة: "مدام سبيل صاحبة الشركة. وكلامها يمشي ع الكل. اتفضلي نفذي." سبيل بصت لـ سمر بحدة: "اتفضلي نفذي الأمر. وأنا فـ مكتبي. عيني عليكي. ساعة بالظبط. 60 دقيقة من وقت خروجك من هنا. وهرجعلك تاني. لو لاقيتك لسة موجودة يبقى ما تلوميش غير نفسك... ولفّت وشها لـ صهيب من تاني وبغيرة واضحة ع ملامحها وفـ

نبرة صوتها: "واعمل حسابك. لو عرفت انك اتعاملت مع أي كائن آخره ته مربوطة، هتشرف فـ المشرحة. في سرير فاضي هناك محتاج جـ*ـسد... خلصت كلامها وخرجت من المكتب بخطوات مليانة غضب ونرفزة. بعد ما خرجت سمر، راحت مكتبها وهي بتغلي من جوة، وبتكلم نفسها: "يا أنا يا انت يا ابن سامية. أديني مشيتهالك خالص. وريني بقى هتعمل إيه؟ أما صهيب الفرحة كانت مالية قلبه، لدرجة إنه نسي أصلًا وجود رسلان. وفضل

يضحك بهيستيريا ويكلم نفسه: "يخرب عقلك يا مجنونة. ما توقعتكيش تعملي كدا أبدًا. بركاتك يا شيخ شهاب." رسلان حمحم بحرج: "أنا آسف لتدخلي. بس هي اللي كانت بتزعق هنا دي! صاحبة الشركة فعلاً؟ صهيب بابتسامة صافية: "دي سبيل بنت عمي ومراتي. كانت فـ مارسيليا ولسة راجعة."

رسلان اكتفى بابتسامة هادية، وكأنه أخيرًا فهم سر عصبيتها. ومن لمعة عين صهيب، عرف السبب الحقيقي لـ شروده فـ كل مرة كان بيشوفه فيها قبل رجوعها. من غير ما يكمّل كلامه أو حتى يطلب اللي جه عشانه، استأذن ومشي فـ صمت. أما صهيب، فـ اتنهد بسعادة وجواه: "أدركت متأخرًا يا سبيلي. أنك لم تكوني عابرة. بل وطنًا سكنني بصمت. فعدتُ إليك، لا لأطلب الصفح. بل لأقول: أنا لك... ما حييت."

وخرج جري من مكتبه ومن الشركة كلها، متجاهل سمر ومجدي وكل حاجة حواليه. وما فيش فـ باله غير حاجة واحدة بس: إزاي يفاجئ سبيل؟ ويفتح معاها صفحة جديدة؟ إزاي يقول لها إنه فهم رسالتها؟ وإنه مستعد يحارب الدنيا عشانها. زي ما هي أخيرًا قررت تسمع كلام شهاب والبنات، وتتمسك بيه، وتحافظ عليه لآخر نفس فيها.