رواية غلطة ولكن الفصل الثاني 2 - بقلم حبيبة ممدوح

بلعت ريقي بصعوبة وقولت: _دي إيه دي؟ _مراية.. مراية يا آخرة صبري. _طيب واللي فيها دي مين؟ _إنتِ يا حبيبتي. _أنا!!! _اغم عليا، محسيتش بالدنيا. _يالهوييي البت مالها يا عبد الجواد؟ _إيدك معايا، نشيلها نحطها ع سريرها. وأنا هجري أجيب الدكتور محمد من العمارة اللي جنبنا. بسرعة. فوقت لقيت بيكشف عليا. استغربت لما دققت فيه. بصتله ونطيت بسرعة من ع السرير وقولت: _يونس.. الحقني أبوس إيدك.. إنتَ صاحبي وعشرة عمري وعارفني أكيد.

_علامات الاستفهام بدأت تظهر على وشه، فكملت وقولت: _اعتقني من الناس المجانين دول أبوس إيدك.. دول مقتنعين إني بنتهم المتخ..فة دي، لاء وكمان عندهم مراية فيديو، أه والله. _سكت فجأة لما لقيتهم كلهم بيبصوا لي باستغراب، فقولت بهدوء: _مراية فيديو إزاي!؟ _بصيت لقيت سراحة قدام. جريت وقولتلهم: _بصوا هثبتلكم إني راجل وتعالوا شوفوا.

_ببص ف المراية والغريبة إن لقيت نفس البنت اللي شوفتها برة. قعدت المس وشي وأحاول أقنع نفسي إني بتخيل. غمضت عيني وفتحتها كذا مرة، ومع كل مرة بفتح فيها عيني بلاقي نفس البنت واقفة. ضحكت ضحكة حسرة وقولت: _يعني دي أنا؟ محمد حجازي بقى ليلى.. في يوم وليلة؟ طيب إزاي.. صدقوني أنا محمد.. صوتي رفع كده لي.. أناا محمددد واللهه يونس قول لي بقى إن ده هزار من هزارك البايخ ده وأنا مش هزعل يا سيدي.. بس أرجوك مشيني من هناا أرجوك.

_بصيت لهم وكلهم واقفين في ذهول وساكتين. قربت من يونس وهزيت جامد وقولت: _إنتَ مش بترد عليا لي!؟ مترد يا أخي وقول لهم إني محمددددد.. عايزني أديك إمارة طيب! _تدخل ساعتها عبد الجواد وقال: _بتت اخرسي بقا كفايا، واضح إن دلعتك زيادة عن اللزوم، كل يوم بتطلع لنا بحكاية جديدة لحد ما قرفتينى يا شيخة.. هتجلطينى بقاا ارحميني. _سابني وطلعوا. لقيت ماما قالت: _تعبناك معانا يا يونس.. يونس إنتَ سمعني؟ _هااا بتقولي حاجة يا ماما؟

_بقولك تعبتك معانا يا حبيبي، إحنا آسفين، أهي البت زي القردة أهي. _بصيت له وقولت: _إنتَ هتمشي وتسيبني؟ _بتت ما تتلمى بقاا، هو ف إيه… يالة يا دكتور، معلش عطلانك. _طلعوا وسابوني في الأوضة مش عارف أعمل إيه. قعدت ع السرير شوية وبعدين قمت بسرعة. بصيت من الشباك لقيت يونس ماشي بعيد.

طلعت بسرعة في الصالة لقيت الست دي في المطبخ والراجل مش قاعد. اتسحبت وفتحت الباب ونزلت جري ورا يونس. بما إني عارف بيته فالطريق ميتوهش. وصلت للبيت وخبطت الباب. فتح وقال: _ليلى. _يادي النيلة ليلى مين بقاا، ارحمني يا خي وسع كدا دخلني. _أدخلك فين انتِ اتجننتي! انتِ عارفة لو حد شافك هنا إيه اللي هيحصل؟ _ولالا أنا مبخافش من حد، وسع بقا. _زقيته ودخلت. _إنتِ بجد شكلك اتهم..بلتي على الآخر. _يبني افهم أنا محمد حجازي والله..

_محمد حجازي؟ إنتِ عرفتي محمد منين أصلاً؟ _أنا محمد. _يارب ارحمني. _طيب بإمارة وحمة الفراولة اللي في قفاك. _يا شيخة ع الأساس إن ده سر محدش يعرفه؟ _طيب بإمارة إنك بتحب الأفوكادو بس مبتشربهوش. _عادي بردو، كل الناس عارفة المعلومة دي. _طيب خد التقيلة بقى، إنتَ مبتحبش الجبنة. _يا شيخة عرفتيها لوحدك ولا حد ساعدك فيها.. ما أم محمد عارفة الحوار ده. _خد التقيلة بقى. _اسمع بس مني. _اممممم.

_بإمارة البت ليلى اللي إنتَ بتحبها جارتك. _إيه ليلى!؟ _آه.. إنتَ قولت اسمها إيه!!؟ _بصينا بعض وقولت: _ليلى اللي هو أنا دلوقتي!؟!!!!