رواية غصون الفصل الأول 1 - بقلم يارا عبد العزيز

صحيت من النوم بعد ما حسيت في تقل في جسمها كله ودماغها. فتحت عينيها بتعب شديد. انصدمت بشده وجسمها كله بقى بيترعش بعد ما شافت الوضع اللي هي فيه. كانت لابسه قميص نوم قصير جدا ومتغطيه باللحاف خفيف. لطمت على وشها بدموع وخوف. = يلهوي! يلهوي يلهوي. ايه اللي انا فيه دا. هم عملوا فيا ايه! بدأت تفتكر كل اللي حصلها وهي خارجه من المدرسة ومستنية العربية اللي بتيجي تاخدها.

لحد أما لاقت عربية تانية بتقف قدامها وبيطلع واحد منها وبيمسك ايديها وياخدها غصبن عنها ويدخلها العربية. وبعدها محستش بأي حاجة تانية. قامت بسرعة من مكانها وهي حاسة بارهاق شديد في كل جسمها وعلامات زرقة على ايديها ورقبتها. خدت هدومها الواقعه على الأرض بعشوائية ولبستها وهي مش حاسة بأي حاجة حواليها. مرعوبة من خوفها ودماغها فيها مليون سناريو وكلهم أسوأ من بعض.

خرجت الصالة وهي بتدور في الشقة على أي حد بس كانت فاضية مفيهاش أي شخص. نزلت بسرعة وخدت تاكسي واتكلمت بصوت مرتعش ودموع. = قصر البيسوني لو سمحت. السواق بصلها باستغراب من الحالة اللي كانت فيها. اتكلم بهدوء. = نروح المستشفى يبنتي! اتكلمت بدموع وصوت مرتعش مليئ بالخوف. = لا انا كويسة! لو سمحت اطلع على قصر البسيوني بس اقف قبله بشوية مش قدامه. السواق بخوف. = هو انتي شغالة هناك! هزت راسها بالنفي واتكلمت بدموع. = لا.

انا حفيدة كامل البسيوني. بنت ابنه. السواق باحترام. = وايه اللي عمل فيكي كدا يبنتي بس! اتكلمت ببعض الحدة وصوت مهزوز. = لو سمحت اطلع من غير ما تتكلم. بصت في المرايا اللي معاها في الشنطة. لاقت شكلها مبهدل. الكحل اللي ساح من تحت عينيها وطرحتها وهدومها اللي مش متظبطين بسبب انها لبستهم على عَجل. بدأت تظبط في هدومها وتمسح دموعها والكحل اللي في عينيها. قلبها كان بينبض بقوة.

مش عارفة ايه اللي ممكن يكون حصلها او ممكن يكونوا عملوا فيها ايه. بس الهيئة اللي صحيت لاقيت نفسها عليها مش بتقول غير حاجة واحدة بس. مجرد الشك في حاجة زي كدا ارعبتها بقوة. مقدرتش تمنع نفسها من البكاء الشديد. السواق كان بيبصلها باستغراب وخايف يتكلم. وقف قدام قصر فخم. اكبر قصر في سوهاج كلها. نزلت غصون منه وهي بتترعش. دخلت القصر وهي بتقدم رجل وبتأخر رجل. شكلها مبهدل والخوف والدموع في عينيها.

كانت لسه هتطلع أوضتها بس وقفت بخوف وجسمها كله بقى بيترعش لما سمعت صوت جدها الغاضب. = غصون! استني عندك. وقفت وجسمها كله بيترعش بخوف شديد. امها كانت لسه هتجري عليها بس قاطعها كامل وهو بيتكلم بغضب. = اقفي عندك. اياكي تروحي عندها. راح عند غصون ووقف قدامها. طلع الصور من جيبه واتكلم بغضب مفرط. = ايه دا! فهمينا! غصون خدت منه الصور وايديها بتترعش بخوف شديد. بصتلها بصدمة واتكلمت بدموع وصوت مرتعش.

= والله العظيم يجدي انا اتخطفت. صحيت لاقيت نفسي...... قاطعها جدها وهو بيضربها بقوة بالقلم على وشها. لدرجة انها نزفت من فمها. اتكلمت منى ببكاء. = طب استنى يعمي نفهم منها اللي حصل. ارجوك يعمي انا واثقة في بنتي غصون مستحيل تعمل حاجة زي كدا. انا واثقة ان فيه حاجة غلط. كامل بغضب مفرط. = نفهمنا ايه! انتي مش شايفة الصور. بنتك خلاص جابتلنا العار... ودي اخره دلعك ليها الزيادة. البت دي مينفعش تعيش اكتر من كدا.

غصون ومنى بصوله بصدمة كبيرة وخوف شديد. اتكلمت منى ببكاء وهي بتروح عند غصون بسرعة وبتقف قدامها. = ابو. س ايديك يابا الحاج. انت عارف تربية غصون. البلد كلها بتحكي باخلاقها. نبيلة بحده. = ودلوقتي البلد كلها هتتكلم عنها وهتبوظ سمعتنا اللي ابويا بقاله سنين بيعملها. بنتك لازم تموت.... عشان متهدمش كل اللي عاملينه وتجيب سمعتنا الأرض. منى بغضب ودموع. = حرام عليكي ينبيلة. دي بنت اخوكي يعني من لحمكوا ودمكوا.

ليه عايزة تنهي حياتها وهي لسه صغيرة ومعشتش شبابها. كامل بغضب. = نبيلة معاها حق. قال كلامه وطلع مسدسه من جيبه وبعد منى من قدام غصون بغضب وحطه في راس غصون واتكلم بفحيح. = انتي اللي كتبتي على نفسك الموت... لازم يكون مصيرك هو نفس مصير أي واحدة بتعمل عملتك. غصون بقيت بتترعش جامد. غمضت عينيها بخوف وهي بتتلقى مصيرها المحتوم واللي ملهاش أي ذنب تكون دي نهايتها. اتكلمت بدموع وصوت مرتعش. = والله يا جدي ما عملت حاجة!

والله يا جدي اتخطفت ومعرفش أي حاجة. تجاهل كامل كلامها. بصتله منى بخوف شديد وهي بتبرق عينيها ونبيلة كانت بتبص بشماتة وحقد. اتكلم حامد بخبث وهو بيبص لنبيلة. = استنى يابا الحاج مش في القصر هنا مش عايزين شوشرة واللي رايح واللي جاي يتكلم علينا. احنا ناخدها في مكان تاني غير القصر ونخلص عليها احسن ونخلي يونس هو اللي يغسل عارنا.... بأيدينا. ابعتله يجي من البندر ويخلص هو. نواره بغضب وهي بتهز راسها بالنفي. = لا.

ليه ابني اللي يعمل كدا. ما تخلي أي واحد من رجالتك. ليه تودي ابني في داهية! بسببها. كامل بصلها بحدة اخرستها. حط المسدس في جيبه واتكلم بحدة. = يا عواد انت يا زفت... دخل عواد وهو بيجري واتكلم باحترام ممزوج بخوفه. = تحت أمرك يا كبير. كامل بحده. = خدها المخزن لحد أما يونس يرجع. نبيلة بصيت لحامد وابتسمت بشر. خد عواد غصون تحت توسلتها هي ومنى لكامل. بس كامل مكنش شايف أي حاجة قدامه غير الصور وغضبه كان عامياه.

اتكلمت منى ببكاء وتعب. = بنتي! والله يابا الحاج أكيد فيه حاجة غلط. حرام عليك. كامل بغضب مفرط. = ومش حرام عليها اللي هي عاملته! منى انتي تقفلي خشمك واصل لو كنتي عايزة تحافظي على بنتك التانية وتعيشي انتي وهي بسلام. بصت منى لبنتها هنا بخوف شديد ووقفت جنبها ومسكت ايديها بخوف. اتكلمت هنا بابتسامة مقدرتش تخفيها. = مش هي دي بنتك اللي مبتغلطش. قولتلك يا ماما يا أما تحت الساهي دواهي واهي ظهرت على حقيقتها الست غصون.

منى بصتلها بصدمة شديدة. هي عارفة ان هنا بتغير من غصون بس مكنتش متوقعة انها ممكن توصل بيها انها تتمنالها الموت. رمى عواد غصون بقوة في المخزن لتصرخ من شدة ألمها. انكمشت على نفسها بخوف شديد وهي بتستعد لتلقي مصيرها واللي هيكون على يد ابن عمها. فضلت تبكي بقوة وخوف. في المساء. وصل يونس القصر بعد ما جده طلبه من غير ما يعرفه. بمجرد ما دخل القصر لاقى مكالمات كتير من أمه.

لاقى الكل متجمع ومرات عمه بتبكي بقوة وامه قاعدة بتترعش بخوف. اتكلم يونس باستغراب. = طلبتني يا جدي! كامل بحدة وهو بيبص لحامد. = روح هاتها من المخزن. هز حامد راسه بشر وراح جاب غصون من المخزن. تحت نظرات يونس اللي مكنش فاهم أي من اللي بتحصل. خرج كامل الصور من جيبه وأداها ليونس. كور يونس الصور في ايديه بغضب مفرط وبص لغصون اللي كانت بتترعش بخوف شديد وبتبصله بتوسل. اتكلم كامل بغضب. = بنت عمك جابتلنا العار...

وأنا جيتك هنا عشان انت كبير العيلة من بعدي وانت اللي هتغسل عارنا.... يونس بصله بصدمة كبيرة. رجع بص للصور بغضب وكان موزع نظراته ما بين الصور وغصون. منى كانت بتبصله وبتتمنى انه يرفض ويقنع جده. لأن كامل مش بيسمع من أي حد غير يونس. لكن خالف كل توقعاتها لما اتكلم بحدة وهو بيمسك ايد غصون بكل قوته. = تحت أمرك يجدي. غصون ومنى بصوله بصدمة كبيرة أما الباقي فكانوا بيبصوا بشماتة. اتكلم كامل بحدة. = خلص... وادفنها...

على طول. أنا مش عايز حتى أشوف جثتها... منى هزت راسها بالنفي واتكلمت بخوف شديد وبكاء. = لا بنتي. حرام عليكوا يا ظالمة. غصون كانت لسه هتروح عندها بس مسكتها نبيلة ومنعتها. اتكلمت منى ببكاء. = سبيني حرام عليكي سبيني دي بنـ.... قاطعها كامل وهو بيتكلم بحدة وغضب مفرط. = منى!!!! افتكري كويس أوي اللي قولتهولك يا مرات ابني. بصت منى لهنا بخوف شديد.

خد يونس غصون تحت نظرات الاعتراض من منى ونوارة وكل واحدة فيهم كانت خايفة على اللي تخصها. منى خايفة على بنتها اللي خلاص هتروح منها ونوارة خايفة على ابنها من الشرطة لو عرفت. خد يونس غصون في عربيته ورفض أي حد من الغفر يجي معاه. وقف قدام جبل عالي جدا. خرجها من العربية بغضبه ووقفها على الجبل وطلع مسدسه وتكلم بصوت عالي. = لييييه! غصون ببكاء. = والله العظيم ما عملت حاجة. والله العظيم أنا مظلومة يا أبيه.

والله العظيم ما عملت حاجة. قالت كلامها قعدت تحت رجله وهي بتبكي بانهيار وجسمها كله بيترعش بقوة. في عربية كانت واقفة بعيدة عنهم ومتابعهم. اتكلم شخص بكل هدوء. = أيوا قسم شرطة سوهاج. فيه جريمة قتل بتحصل دلوقتي في........... قال كلامه وقفل وهو بيبتسم بشر. ومتابعهم بكل برود وتسلي. = على ما الشرطة توصل يكون هو خلـ.ص عليها ويمسكوه وهو متلبس وأبقى خلصت منهم هم الاتنين.

يونس بصلها بحدة وغضب وبدون أي رحمة نزل لمستواها ووقفها على حافة الجبل و.