رواية جمرية الصقر الفصل الرابع والثلاثون 34 - بقلم سلوى عوض

نجع الصياد محمود: غزالة، خدي البنت وروحي البلد، هاتي الشوب. غزالة: حاضر. نجمة: أنا عاوزة أجيب شواري من مصر. محاسن: إيه مصر وإيه، هنا خلصي ولمي دورك. وبعدين اللي متلاقيهوش هنا اطلبيه بالتليفون يوصلك على طول. نجمة: موافقة يا أبوي؟ محمود: موافق طبعًا. (يدخل زيدان وعمار) زيدان: عاوزين ناخد البنت وننزل البلد نجيب الشبكة.

محمود: روحوا، بس متعوجوش. خلاص يا غزالة، النهارده يجيبوا الشبكة، وبكرة إن شاء الله تبقوا تجهزوا الشوار. عمار: وليه بكرة؟ متخلوها النهاردة بالمرة. نجمة: يا سلام! عاوزنا نجهز كل حاجة قدامكم؟ ده انت ولد بارد جوي. محمود: وبعدين معاكي يا نجمة؟ زيدان: سيبها يا عمي، بعد الجواز هجصلها لسانها اللي فرحانة بيه ده. نجمة: نعم؟ هتقص لسان مين؟ انت؟ محاسن: خلاص بقى خلونا نخلص. محمود: فين صقر؟

زيدان: الكبير راح للمهندس عشان يطمن على أحوال البيت. محمود: خلاص، روحوا انتوا عشان ترجعوا قبل الليل. نجمة: حمامة يا أبوي. محمود: غزالة، أي حاجة يعوزوها هاتيها على طول. محاسن: هي جمرية مش هتيجي معانا؟ جمرية: لا، طبعًا جاية معاكم، مقدرش أهملكم لحالكم. نجمة: انتِ إيه؟ أول ما نجيب سيرتك تطلعي زي العفريت. جمرية: أنا عفريتة؟ ماشي يا نجمة. (تخرج لها نجمة لسانها)

نجمة: إحنا هنروح نجيب الشوار ومعانا العرسان. وانتِ يا عيني، صقر أخوي هيسيبك تروحي لوحدك؟ محاسن: يا بت بطلي، انتِ إيه؟ شعلة نار. نجمة: أنا غلبانة، هو أنا عملت حاجة؟ جمرية: (بتمثل الزعل) صقر هيهملني لوحدي؟ كيف العزول؟ (يدخل صقر) صقر: سمعتك يا جمرية. مين اللي هيهملك؟ مش أنا كلمتك في التليفون وقلتلك أفوت آخدك؟ قلتي لي: لا، هروح أنا وعروسة يوسف وأمها، عشان أمها تيجي تقعد مع أمي، أحسن متقعد لحالها.

(تضحك جمرية وتخرج لسانها لنجمة) جمرية: حبيبي اللي هياخدلي حقي. غزالة: أمال فين مرت أخوكي وأمها؟ جمرية: يا مري، واقفين برا، أصل أمها مكسوفة شوية. غزالة: أنا هطلع أجيبهم. نجمة: بقولك إيه يا أبوي، متخلي أمي تقعد هنا معاكم، وإحنا نروح شباب مع بعضينا، وصقر أخوي معانا أهو. محمود: روحوا، هو أنا هخلص معاكي؟ (تدخل غزالة ومعها صابرين) غزالة: تعالي يا غالية، بيتك ومطرحك. صابرين: السلام عليكم.

الكل: وعليكم السلام ورحمة الله وبركاته. (يتصل طارق بصقر) طارق: صقر، افتح التليفزيون على القناة الأولى. صقر: خير يا طارق؟ طارق: افتح بس. (يفتح صقر التليفزيون، ليشاهد مؤتمرًا صحفيًا للوزير) (تُعرض على الشاشة عبارة: "مؤتمر اعتذار وتكريم الدكتورة هيام الصائغ") (يعلن الوزير خلال المؤتمر إطلاق اسم الدكتورة هيام الصائغ على إحدى المستشفيات الحكومية، وأيضًا تسمية قسم النساء والتوليد باسمها تكريمًا لها.)

(يُذاع المؤتمر على كل القنوات الفضائية، ومحمود يبكي من الفرح) محمود: الله يرحمك يا بتي... نجاة: هاتلي عيال بتي يا صقر، هاتلي عيال الغالية دلوك. صقر: حاضر يا أمي. (يتصل صقر بطارق) صقر: طارق، هات العيلة ورضوى وتعالوا الصعيد، العيلة كلها يا طارق. طارق: ما إحنا متفقين هنيجي على الفرح. صقر: أمي عاوزاكم. طارق: حاضر، هنجهز حالنا ونيجي. صقر: اعملوا حسابكم تقعدوا لحد بعد الفرح إن شاء الله.

غزالة: جيتك فيها الخير كله يا حجة صابرين. نجاة: صح والله. صابرين: كتر خيركم. محمود: يلا، روحوا انتوا هاتوا حاجتكم. صقر: حاضر يا أبوي. (يدخل يوسف المنزل) يوسف: أنا بقالي ساعة مستني في العربية، اخلصوا بقى. محمود: طيب السلام عليكم. يوسف: معلش يا عمي، عليكم السلام ورحمة الله وبركاته. نجمة: اعذره يا أبوي، عريس ومستعجل. زيدان: يعني كلنا ساكتين وإنتي اللي سحبوكي من لسانك؟ نجمة: شاهد يا أبوي. محمود: ليش صالح أنا بيكم؟

صقر: ما هو انتِ لو تسكتي. محاسن: ديه تسكت كيف يعني؟ نجمة: (بتمثل الزعل) وأنا قلت هياخدوا لي حقي منهم. محمود: انتِ حرة انتِ وعريسك، وبعد كده تسمعي كلامه، فاهمة؟ نجمة: حاضر، وأنا أقدر مسمعش كلام بعلي؟ زيدان: حبيبتي انتِ يا أم صقر. نجمة: أحلى أبو صقر ده ولا إيه؟ محاسن: لأ، أنا اللي هسمي صقر. نجاة: متتخانقوش انتوا الاتنين، سموا عيالكم صقر. صقر: ده على كده العيلة كلها هتبقى صقور.

جمرية: لأ، هو صقر واحد بس، أبو محمود وهيام. يوسف: يلا يا حلوة، منك ليها. (فعلاً يروحوا يجيبوا الشوار ويرجعوا بالليل، وبيكون طارق وصل البلد مع رضوى والأولاد) نجاة: تعالوا في حضني يا أولاد الغالية. حجك عليا يا طارق، انت ورضوى. طارق: حق إيه بس يا أمي؟ *** (يصل زياد) زياد: أنا جيت، الفرح أمتى بقى؟ صقر: خلاص، البيت بيتفرش، الفرح بعد يومين.

زياد: بعد إذنك يا أبوي، أنا في بنت بحبها في شرم. بنت ناس ومحترمة، ممكن أعزمها على الفرح؟ محمود: أخيراً ربنا هداك! وماله يا ولدي، اعزمها، وبعد الفرح خد أخوك وروح اخطبها. زياد: ما هما كلهم جايين من شرم الشيخ. نجمة: ليه؟ كلنا هنروح نخطبلك؟ زيدان: لا يا جدري، هنقضي شهر العسل. أصل زياد حجز لنا كلنا هناك في الفندق. اسكتي شوية، ما فيش غيرك دايماً يناكف في الكلام. زياد: لأ، بقولك إيه؟

نجمة ديه أختي وحبيبتي، تعمل اللي هي عايزاه. نجمة: شالله يخليك ليا يا زيزو، انت بس اللي واقف في صفي، كلهم جايين عليا! محاسن: وهو حد يقدر عليكِ؟ زيدان: محاسن هملي مرتي لحالها واوعاكي تزعليها. محاسن: لسه ما بقتش مراتك. صقر: شكلي كده هغير رأيي ونتجوز كلنا ونأجل جواز العصافير. زيدان ونجمة؟ نجمة: واهون عليك يا أبو محمود؟ صقر: عشان خاطر محمود الصغير، خلاص. زياد (ببلاهة) : هو انت خلفت محمود؟

أوعى تكون زي أبوك متجوز من غير محد يعرف. غزالة: كتر خيرك يا ولدي. نجاة: ما تاخدوش عليه ده مهبل، هما قصدوا بعد ما يتجوزوا يا حمار. زياد: معلش يا خالتي كنت بهزر، خلاص يبقى أنا كمان أبو نجاة. نجاة: لا يا ولدي، اسمي قديم، ويمكن عروستك ما ترضاش. جمرية (بتضحك) : على أساس إن اسمها ماهوتاب! دي اسمها؟ زياد: اخرسي انتي خالص! صقر: انت اللي تخرس، بتتكلم مع مرات أخوك الكبير. جمرية: والله هقول اسمها، الحجة جيجي.

محمود: قولي ومتخافيش. جمرية: وعخاف من مين؟ (تضحك) اسمها جسمت. زياد: قسمت يا جاهلة، اسم أميرة تركية. محاسن: جسمت ونصيب. زياد: إيه، ما تخفوا العسل يا حلوين. وفجأة يُسمع صوت تجمع خارج البيت. محمود: يا ساتر يا رب، فيه إيه؟ اخرج يا صقر، خد زيدان وشوفوا. (يخرج صقر وزيدان ليجدوا رجال البلد متجمعين) رجال البلد: حجك علينا يا كبير، سامحنا يا كبير، انت كبيرنا وملناش كبير غيرك. صقر: اهدوا طيب. زيدان: دلوك عرفتوا الكبير؟

صقر: خلاص يا زيدان، المسامح كريم، روحوا كلكم، ومين على أفراحنا، أفراح بيت الصايغ. الرجال: ألف مبروك يا كبير. (يطلق الرجال الأعيرة النارية، ويخرج يوسف وجهه مصفر) صقر: مالك؟ فيك إيه؟ يوسف: بكرة هيعدموا أمي، ومش عارف أقول إيه لجمرية. صقر: مين خبرك؟ يوسف: المحامي، لسه مكلمني، وأمي طالبة تشوفنا الصبح قبل تنفيذ الحكم. صقر: لازم تروحوا، وجمرية لازم تعرف. يوسف: مش هقدر. صقر: أنا هقولها. (يصرف صقر الناس، ويدخل إلى جمرية)

صقر: تعالي، عاوزك. (يخبرها بطلب أمها وميعاد تنفيذ الحكم) جمرية (تبكي) : أمي هتتعدم؟ كان عندي أمل يحاكموها. صقر: أمك قتلت واعترفت. جمرية: هنروح، ميتة. صقر: كمان شوية، تنفيذ الحكم بعد الفجر. *** (يمر الليل ويذهب يوسف، صقر، وجمرية إلى السجن، حيث كان المحامي مأخذ لهم إذن زيارة. تدخل جمرية على أمها) جمرية: ليه يا أمي عملتي كده؟

حرمتيني منك طول العمر. هتجوز من غير ما تكوني معايا، كل البنات هيفرحوا وأمهاتهم معاهم، وأنا لأ. الله يسامحك يا أمي. زبيدة: خلاص يا بتي، ما عادش له لزوم الحديث. تعالي في حضني، أحضنك قبل ما أفارق الدنيا. ادعيلي يا بتي ربنا يسامحني، وانتوا كمان سامحوني. يوسف: مسامحينك يا أمي، وربنا يسامحنا كلنا. (تسقط جمرية مغشيًا عليها، يحملها يوسف وصقر، يفيقوها ويغادرون قبل تنفيذ الحكم. في الطريق يتلقى يوسف وصقر خبر تنفيذ الإعدام) يوسف

(يصرخ) : خلاص! جمرية (تفيق) : إيه يا يوسف؟ خلاص؟ يوسف: خلاص يا خيتي. صقر: استهدوا بالله يا جماعة، أمر الله نُفذ لا محالة.