رواية جرح الأيهم الفصل العاشر 10 - بقلم أيلان

مُلاذ : كافي تتلاعبين بهذا الصخام، راح تنعمي عيونج. ملاك : مُلاذ صايرة مثل أمي. مُلاذ : شبيها أمي؟ شني ما عاجبتج؟ سكتت، ما حجيت. حكيت كصتي ورجعت لورا. سندت ظهري على الجرباية. مُلاذ : البارحة سألت مدرساتج عليج. يكولون زينة، ظلي هيج مو تميلين بعدين. زين؟ ملاك : صدك؟ ما شفتج من جيتي؟ مُلاذ : كل فترة أجى لمدرستج وأسأل عنج. ملاك : والله؟ ليش ما تگولين لي؟ مُلاذ : أجى فجأة، مرات تكونين بالدرس، لو بالساحة، أخلي وأروح.

هزت راسها ساكتة. رجعت حجت ورا ثواني. ملاك : مُلاذ. مُلاذ : اممم؟ ملاك : بابا. بلعت ريكي بهدوء. وهي كملت بتردد. ملاك : بابا شلون جان؟ مُلاذ : ليش سألتي؟ ملاك : ما أعرف بس أريد أعرف تصرفاته وشنو جان يسوي، شلون جان يعاملج؟ فركت وجهي ساكتة. ملاك تخاف تحجي بموضوع أبوها. إيلان دوم تشوف ردة فعلي تجاهه مواضيعه.

لمن جنت صغيرة وعمي يلوم أبوي لأن جان يطلع ويتظاهر ويسوي أشياء تخالف الرؤساء بذاك الوقت، أنفعل، أتعارك، أدافع عن أبوي. ملاك جانت تشوفني وتشوف ردة فعلي. لذلك ما تجيب طاري أبوي كدامي إلا بالقليل. ملاك : خلص عوفي الموضوع. قامت تريد تطلع من الغرفة. دحگت لإيدي، غرست أظافري بأصبعي. بلعت ريكي. وصلت ملاك قريب الباب. همست مُلاذ : جان حنين. التفتت تدحگين. نزلت راسي، نظري لإيدي وكملت.

مُلاذ : بمرة من المرات، وبأيام القصف جنتِ صغيرة كلش. تبجين هواي لأن تبردين وتجوعين. جنا نكعد بالسرداب لمن يصير القصف. وأمي وقتها حتى لو ترضع، بسبب سوء نفسيتها حليبها يقل ويخلص. تنهدت وكملت: أبوي بمرة من المرات، وبنص الهوسة والناس، راح يدور على حليب الج ورضاعة، وأجا وجابهن ويا، وجايب غطوة الج. سألج هو الحليب وشربج. لفج بالغطوة وضمچ لصدره. طول الليل ما نام وانتظرج تنامين. رفعت عيني، دحگتلها. عيونها مدمعة، شفايفها ترجف.

إجت يمي، كعدت بالكاع. حطت راسها على رجلي تبجي. ظليت ساكتة. رفعت إيدي أداعب شعرها بأصابعي. ظلت كم دقيقة تبجي. ما أريد أسكتها وتنفر من عندي. يصير الها ندم بدال ما أحتويه. لذلك سكتت أستمع لصوت بچيه. بجت هواي ولـ وقت طويل. فرغت كل الي بداخلها وهي على رجلي نايمة. ورا ماهدأت وسكتت وغسلت وجهها، خليتها تنام على جربايتي وغفت بسرعة. كعدت أدحگلها. همست : نيالج تكدرين تبجين. نزلت بالكاع. سندت راسي على الجرباية.

ذكرى، ذكرى تمر ببالي. "نص الليل كاعد بس أنا وروحي. بنص الليل چانن غافيات، وگعدن جروحي." أخذت الصندوك حطيته بالكاع كدامي. حضنت إيد بإيد وحطيتهن بحجري. أدحك للصندوك ساكتة. قدمت إيدية وهي ترجف. فتحت الصندوك. دحگت للنستله والتشيرت والرصاصة. وهي الرصاصة الثانية يلي لگيتها قبل كم يوم بغراض أمي. بعد ما اخترقت صدر أبوي. ولمن طلعوها أمي ماخذتها. ناشغت من دون دموع. بلعت ريكي. الرصاصة بأيدي. نزلت راسي على الكاع.

ضميت الرصاصة لصدري. وظليت هيج متمددة بالكاع بوسط الغرفة. فيروز: فزيت من نومي. مثل كل يوم أفز بهذا الوقت. دحگت للساعة ٦:١٥ الصبح. كمت بسرعة أكعد البنات. دحگت لـ جرباية ملاك فارغة. عكدت حواجبي مستغربة. على حطتها لا مخربطة ولا مال أحد نايم عليها. طلعت من الغرفة. دورت على ملاك ما لكيته. رحت على غرفة مُلاذ فتحت الباب. دحگت مستغربة. مُلاذ نايمة بالكاع وسط الغرفة. ظهرها للباب. شعرها مفروش على الكاع. مكرفصة نفسها مثل الجنين.

رفعت عيني دحگت لـ ملاك. نايمة على فراش مُلاذ. سديت الباب وتقربت على مُلاذ بهدوء. كعدت يمها. دحگت للغراض المتطشرة بالكاع. فتحت عيوني بوسع. لمن شفت رصاصة. دحگت للظرف يلي يمها مستغربة. أخذته بسرعة دورت بداخله، لكيت اكو ورقة. سحبتها وفتحتها. تشكلت العقدة بين حواجبي. واحتلت وجهي تعابير الاستغراب. بنفس اللحظة تعابير الخوف. مكتوب: "أهلك الثمن ولو بعد حين. شوف الكاسيت مشاهدة ممتعة." رفعت عيني أدحك لـ مُلاذ. كعدتها بسرعة.

فزت. مُلاذ : شكـ... سكتت لمن شافت الظرف والرصاصة بإيدي. فركت وجهها. قدمت إيدها تريد تاخذهن. بعدتهن بسرعة. عيوني تتجول على تعابيرها الما تطمن أبداً. نترت بيها: شنوووو هاي؟ عكدت حواجبها خازرتني. مُلاذ : لا تصيحين أولاً. ثانياً ذني وين لگيتيهن؟ ليش تدورين بغراضي؟ عطت بصوت عالي. فزت ملاك على صوتي. مُلاذ : ملاك! احجي شنو هاي؟ خمشتهن من إيدي بسرعة. وحطتهن بصندوكها. ردت أسحبه. صاحت بغضب. مُلاذ : عووفي.

شالتهن حطتهن بالكومدي وقفلت الكومدي. فيروز : انتِ شنووو تصيحين عليّ؟ شايلتني أختج الصغيرة؟ شنووو هاي الرصاصة؟ شنووو هذا المكتوب بالورقة؟ ياااا كاسييت؟ احجي مُلاذ!! كزت على أسنانها وكالت بتأكيد. مُلاذ : ماكو شي. قامت طلعت من الغرفة لحگتها. وأنا أصيح وراها. فيروز : مُلاذ والله أكسر الميز وأشوف ذني شنووو. احجي بسرعة. مُلاذ : ماكو شي گلت. ملاك: دحگت لأمي ومُلاذ صارن أعصاب. وأمي تجننت. مادري شافت عد مُلاذ.

جرت مُلاذ حيل من إيدها. صرخت بوجهها بأصرار. فيروز : هسه راااح تحجين. مُلاذ : ماكو شي! فيروز : اكو شي. وهسه انتِ رح تحجين. مُلاذ : رح أتأخر على دوامي. إرادت تعبر أمي. وأمي رجعت جرتها. أمي : مالج طلعة منا قبل لا تحجين. منينن هذاااا التهديددد! والرصاصة هاي شنوووو!! مُلاذ : ما أحجي. مارح أحجي. رفعت أصبعها أمي محذرة مُلاذ. أمي : أضربج على حلگج إذا صيحتي بعد. مُلاذ : جاي أگلج ماكو شي. أمي : اكو. احجي شجاي تسوين من وراي؟

مُلاذ : ماكو. أمي تكول اكو. مُلاذ تكول ماكو. واستمرن وحدة تلح على الثانية. اشتد الكلام بينهن تدريجياً. لحد ما صرخت مُلاذ بعصبية. مُلاذ : ماكوووووو. جايي أگلج ماكو شيي. شهگت بصدمة. بعد ما أمي رفعت إيدها. ضربت مُلاذ حيل على حلگها. حطيت إيدية على حلگي مصدومة. تلمست مُلاذ شفايفها مصدومة من أمي. وجهها صار أحمر انسحن سحگ. أمي تدحگلها بخزرة. دحگت مُلاذ لإيدها كلها دمشفتها انشگت. رفعت إيدها تأشر على خدها.

صاحت مُلاذ : اضربي بعد. ظلت أمي ساكتة تدحگلها. أخذت مُلاذ إيدين أمي. تهز بيهن وتقربهن لوجهها. مُلاذ : اضرببببيه. دت ايدين أمي. حجت والنار تتطاير من عيونها. مُلاذ : لو مو تضربيني لو تجنزيني هناما رح أحجي. فيروز گالت آخر كلمة بحدة. وكملت. مُلاذ : مشكورة. ضربتيني بأيديج الي بستهم بيوم من الأيام. عافت أمي، راحت غسلت. وأنا واكفة مكاني. خلصت تغسيل و عبرت من يمي. مُلاذ : امشي بدلي ملابسج. خل أوديج لدوامج.

گلت بارتباك: أنا... قبل لا أكمل عاطت بيهم. مُلاذ : اتحررررركي. ما حجيت، ركضت غسلت. رحت بدلت ملابسي. أمي حاولت تحاجي مُلاذ. بس مُلاذ أبداً ما حاجتها. دخلت وقفت الباب على روحها. خلصت تبديل. ورتبت شعري. أمي سوت ريوك. تريگت. أعرف مُلاذ ما تتريك حتى لو انتظرتها. كعدت أنتظرها بالصالة تخلص. طلعت من غرفتها مثل كل يوم. متأنقة على آخر شي. لابسة سترة سودة. تحتها قميص أسود وبنطرون أسود. فاتحة شعرها. لابسة مناظرها.

خاطة الحمرة الحمرة على شفايفها. وي كعبها الأحمر. فيروز : مُلاذ.. استوقفتها مُلاذ برفع إيدها گدامها. طلعت بسرعة. وي عطرها يلي يفوح. تعقبتها بخطواتي. قبل لا أطلع انطتني أمي مصروف. إلي ولمُلاذ. رغم تعرف مُلاذ مراح تاخذه. صعدت بالسيارة. دحگت لـ مُلاذ يلي تشغل السيارة. رافعة مناظرها فوق شعرها. انطيتها الفلوس. دحگتلي. خزرتني. گبل فريتهم وحطيتهم بجنطتي. ساكتة. وصلتني لمدرستي وراحت. دخلت المدرسة. انتهى دوامي.

وكفت بالباب أنتظر مُلاذ. أفرك بإيدية تأخرت كلش. رفعت عيني وسعتها. لمن شفت سلطاناجا ناحية المدرسة. وصل يمي، ابتسم. سلطان : يابه سلامون عليكم. ملاك : هـ... هلأ. عكد حواجبه ودنك الي. قلد عليه. سلطان : شـ... شـ... شلونج. حكيت راسي، ابتسمت : زينة. سلطان : ها خوش رجعتي تحجين طبيعي. رفع نفسه، حط إيديه بجيبة. سلطان : أي زقوچ ليش واكفة بالباب؟ ملاك : أنتظر مُلاذ. سلطان : وينها أختج طامسة شو؟

ملاك : ما أعرف تاخرت. أنت شتسوي هنا؟ حك شعره. دحك للمدرسة نزل إيده حطها بجيبة. نظره للكاع وگال. سلطان : جنت مار من هانه وشفتج. ملاك : ها تمام. سلطان : تمامات عيني. سكتت مبتسمة. سلطان : أي شلونه مستواج؟ ملاك : زين. سلطان : يعني درجاتج شكد توصل؟ ملاك : ما تنزل عن الـ ٩٤. رفع حواجبه وصوفر بتعجب. نزل شفته لجوا، هز راسه. سلطان : حلو. ملاك : إي. حك راسه من ورا. دحك للشارع. سلطان : أي، شنو اسم مدرستكم؟

دحگتله شلون يحاول يفتح موضوع. ضحكت، رفعت إيدي أشرت على الاسم. ملاك : مكتوب. سلطان : ه... ها إي شفته بس نسيته. هزيت راسي. دحگت لـ سيارة مُلاذ يلي إجت ناحيتنا. گلت بفرح : إجت مُلاذ. دحگلها وگال بهمس : لا يا ناقصة. سمعته بس غلست. وكفت مُلاذ يمنا، نزلت الجامة. دحگتلنا أنا وسلطان. رفعت المناظر خلتهم على شعرها. صوفر سلطان بإعجاب. مُلاذ : ها سلطان. شنو رجعت تدرس؟ دنك سلطان خلا إيديه على الحافة يلي بيها الجامة. ويدحك لمُلاذ.

سلطان : إي رجعت أدرس متوسط. مُلاذ : غلطان بالعنوان، مدرسة نسوان. سلطان : بوياااااي شلون قافية. مُلاذ : اتحرك أصعد. شنو تظلون واكفين هنا؟ سلطان : لا خل أروح أنام. مُلاذ : وين تروح؟ وكف بحيرة يفكر. گلت أنا : يگول جان مار من هانه. رفعت حواجبها مُلاذ. هزت راسها بعدم اقتناع. مُلاذ : إي، سلطان هواي يمر من هانه. دحگت لـ سلطان يلي يدحگلها. ورفعت حاجبه. مُلاذ : مو صح سلطان؟ سكت سلطان ما جاوبه. ما فهمت شكو وليش هيج نظراتهم.

دارت وجهها، رجعت ظهرها على الكشن. شغلت السيارة. مُلاذ : اتحركوا، اصعدوا. صعدت أنا بالورا. سلطان رفض يصعد بالبداية. بعدين مُلاذ أصرت وصعد. حركت مُلاذ السيارة ووصلتني لـ بيت. ملاك : لو موصلين سلطان أول. مُلاذ : جؤ. دارت وجهها دحگت لـ سلطان. كملت كلامها : أنا وعمچ سلطان، لازم نحجي. أكدت على كلمة "عمج سلطان". وگالتها بحدة. سكتت ونزلت. قبل لا أروح گالت. مُلاذ : گلي لأمج أتأخر. حركت السيارة وراحت. دخلت للبيت.

مُلاذ: رفعت المناظر من بين خصلات شعري. حطيتهم يمي. عدلت كعدتي. رجعت نفسي على الكشن أكثر. مُلاذ : إي سلطان. سلطان : إي مُلاذ؟ مُلاذ : شتسوي يم مدرسة ملاك وش تسوي يم ملاك بنفسها؟ سلطان : تحاسبيني؟ مُلاذ : ما أحاسبك، مجرد أريد أعرف السبب. سلطان : جنت مار من هانه. دحگتله بطرف عيني. مُلاذ : سلطان أنا مُلاذ مو ملاك. فرك وجهه ونزل إيديه حطهن على ركبه. سلطان : اكو داعي أحجي؟ دحگت للجامة يلي يمي. وبعدين نزلت نظري للمراية.

جاوبتهم. مُلاذ : اكو داعي أحذر؟ سلطان : تظنين ممكن أضر ملاك؟ دحگتله رفعت حاجبي. مُلاذ : تظن أسمح الك تضر ملاك؟ زفر نَفس بهدوء. سلطان : مُلاذ.. وكفت السيارة والتفتت اله. مقاطعتهم. مُلاذ : سلطان. شبكت أصابعي ببعضهم وكملت. مُلاذ : أولاً الفرق بينكم بالعمر من السما للكاع. ثانياً ملاك بعدها صغيرة. ثالثاً أنت ما تعرفها عدل. شوكت لحگت تحبها؟ سلطان : مُلاذ، ما طالب شي منكم هسه أنا. مجرد ملاك تولد الها شعور بداخلي.

مُلاذ : وتشـوف هذا الشي صحيح؟ سلطان : وين الغلط؟ مُلاذ : تحب طفلة بعدها ثاني متوسط، وأنت رجال متخرج وعابرها بسنين. سلطان : أنتظرها تكبر. مُلاذ : أختي العمر كدامهالا هي الجبيرة وحبتك وانطتك كلمة. ولا هي الي تدري بيك تحبها. خل نگول كبرت وحبت شخص غيرك. شلون ذيج الساعة؟ راد يحجي قاطعتهم.

مُلاذ : لا تگلي تخلي عدها علم بحبك الها. لأن مستحيل أسمح الك تشوش تفكيرها. وهي بهذا العمر. وتخليها تنتظرك وممكن تخلف بوعدك. أو يتلاشى حبك الها بمرور الزمن. سلطان : ما تحبر. رفعت حواجبي. مُلاذ : حلوووو، شنو خطتك؟ تصير مثل اسكندر؟ سلطان : مُلاذ. مُلاذ : انتهى النقاش. سلطان : ما انتهى، أنا رايد ملاك. مُلاذ : ملاك خل تكبر والله كريم. سلطان : ماكو والله كريم. هسه تنطيني كلمة. مُلاذ : مستحييل سلطان. تعرف شنو مستحيل!

سلطان : ما جاييي تخلين إلي حل. مُلاذ : أنت تصرفات ملاك ما تعرفهم حتى. مجرد شفت شكلها. سلطان : من يوم الشفتها وصارت عيني بعيونها الخضر. الي رجعتني للحياة. وشفت عفويتها وابتسامتها وهدوئها. هي ما طالعة من بالي. خل اگولها الج من الأخير. مُلاذ : توصل للجامعة. وتتخرج وعود الله كريم. عدا هيج ما عندي أي كلام وياك. نقطة راس سطر. سكت راد ينزل من السيارة. قفلت البيبان. مُلاذ : أنا أوصلك.

وصلته لـ بيتهم رغم صار جو متشاحن بيناتنا. بس بقينا ساكتين. طلع جسار. حجينا أنا ويا عن الكاسيت. گال ما لكاه، وبعد جاي يدوره. ما سولفت اله عن يلي صار قبل كم يوم. والسيارة يلي اتبعتني. جسار : مُلاذ انتبهي على نفسج كلش زين. مُلاذ : منتبهة. جسار : متأكدة مصاير شي؟ هزيت راسي بمعنى "إي". مُلاذ : يلا أنا أروح. جسار : ما دخلتي جوا؟ مُلاذ : لا والله عندي شغل. بعدين أزوركم. جسار : تمام، اخذي راحتج. ودعته، صعدت بالسيارة.

إتصل عليه ضرغام. عكدت حواجبي وفتحت الإتصال. مُلاذ : الو. ضرغام : أهلاً مُلاذ أنا ضرغام إذا تتذكريني. مُلاذ : أعرف رقمك مسجل يمي. خير خو ما صاير شي؟ ضرغام : لا ما صاير، بس لازم نحجي. مُلاذ : عن شنو؟ ضرغام : أريد أسألج بموضوع. مُلاذ : إي، گول؟ ضرغام : ما ينحجي على التلفون. وأريد أستفسر عنه. أنا حالياً قريب من بيتكم. أمر عليج موجودة؟ مُلاذ : لا، لا أنا مو بالبيت. ضرغام : زين انطيني عنوانج، حتى أجي.

مُلاذ : تمام، خل نلتقي بحديقة ####. ضرغام : تمام. سديت الإتصال منه. تجهت للحديقة. وصلت قبله. كعدت على المسطبات، أنتظره. رفعت تلفوني إتصلت على غادة. مُلاذ : ست غادة الحيوانة. غادة : نعم. مُلاذ : شوكت الج نية تداومين؟ غادة : تعرفين ما أكدر أترك أمي. مُلاذ : أعرف بس شكم مرة أگولج. تجي أمي يمها وأنتِ تعالي داومي. غادة : والله مالي طاقة أبداً. مُلاذ : يوم الأحد أشوفج مزروعة گدامي بالدوام. غادة : إن شاء الله.

شفت ضرغام دخل الحديقة. مُلاذ : يلا أنا رح أروح بعدين نحجي. غادة : تمام. سديت الإتصال منها. غادة ما تعرف عن موافقتي على خطوبة اسكندر ولا تعرف عن الأشياء الثانية يلي صارت وياي. تقدمت أشرت لـ ضرغام. شافني، أجا ناحيتي بسرعة. سلمت عليه وكعدنا. مُلاذ : حسب يلي أعرفه. أنت حالياً المفروض ملتحق. ضرغام : إي نزلت اليوم. رفعت حواجبي وهزيت راسي. مُلاذ : شنو الموضوع الي ردت تحاجيني بي؟ وخلاك بنفس اليوم الي نزلت بي تجيني؟

ضرغام : سمعت... اتلبك وهو يحجي. رفع إيده الي بيها كلنس. مسح العرك الي تصبب من گصته. وهو منزل راسه وكمل. ضرغام : جنا نحجي أنا واسكندر وسمعت خطبتج. رجعت ظهري على الخشبة مال مسطبة. وتنهدت. بعد ما مخطوبين وبدا يشهر بالسالفة. مُلاذ : احم، لا بعد ما مخطوبين. يعني مو بشكل رسمي. ضرغام : اها. يعني أنتِ موافقة؟ مُلاذ : إي. ضرغام : مُلاذ ما أريد أتدخل أنا. بس اسكندر ما يرهملج. عكدت حواجبي أدحگله.

ضرغام : هو صديقي. وأنا أعرف عنه هواي أشياء. اسكندر مؤذي صدقيني. مُلاذ : شكراً على تحذيرك ونصيحتك. أعرف هذا الشي أنا أكثر من أي شخص ثاني. ضرغام : لا تعتبره تدخل مني. مجرد حبيت أحذرج منه. مُلاذ : تسلم ما تقصر. ضرغام : رقمي يمج. شوكت ما تريدين مساعدة مني اتصلي. رد لي رقمه حتى ينحفظ بعقلي. هزيت راسي ساكتة. ودعته وگمت رجعت للبيت. بعد كم يوم اسكندر أجا النا هو وأهله. وتقدم إلي وخطبني من أمي. قبل لا ترفضهم أمي.

وهمَ گاعدين بالصالة. طلعت من غرفتي، رديت عليهم بموافقتي. علت ثغر اسكندر الابتسامة. والكل تعابيرهم تدل على الصدمة. من بعد ما راحوا وياهم موافقتي. أمي دخلت عليه للغرفة. وأول ما دخلت صاحت بعصبية. فيروز : شجاااااااي تسوين انتِ!!! سكتت ما مجاوبتها. من يوم ضربتني صرت ما أحجي وياها وأتجنبها. وإذا أريد شي أگول لملاك تگول الها. فيروز : شجااااي تخربين بحياتج؟ شنو توافقين وعلى منو توافقيين؟ على اسكندر؟ اسكندر الي من صغرج يضربج؟

لا تگليلي تريدينه ولا تگليلي تحبيني. أنا أمج أنا أعرفج أكثر من الكل. ما يمر اسكندر بطرف عقلج أصلاً. ليش وافقتتتي؟ شسوالج حاچيني. دكت، لطمت، صيحت. وأنا ساكتة منطقت بحرف. أخير شي كنبصت بالكاع گدامي. وأنا گاعدة على الجرباية. لزمت إيديه بين إيديها وعيونها دمعت. فيروز : ليش هيج تسوين يمه؟ بجت يهتز جسمها. ضغطت على جفوف إيديها. ساكتة. نزلت راسها حطته على رجلي تبجي. مُلاذ : ما مسوية شي غلط. الي أشوفه صح جاي أسوي.

رفعت راسها بسرعة دحگتلي. لان حجيت و جاوبتها وردت. فيروز : مو صح. مو صح. أنا ما لگيتج بالشارع. أنا ما أنطيج ضحية لأي أحد. أنتِ مُلاذ، مُلاذ لذة إلياس طفلته الصغيرة. شلون تريدين أفرط بيج؟ وأنجيج لشخص ما يستاهلج. شخص يأذيج أكثر ما يحبج. مُلاذ : لا تخلين بالج. ما يصير لي شي. عفتها وطلعت من الغرفة. بالي ما يهدأ من التفكير. بمرور الأيام. اسكندر صار يتدخل حتى بطريقة لبسي. تحت حجة "أنتِ خطيبتي". وبطبيعة الحال ما أسمع لكلامه.

ولا أخلي يفرض سيطرته عليّ. كل ما نتشاوف لازم نتعارك. وصار يوقف الي بباب الكلية. وهذا الشي ينرفزني مثل الي يراقب شخص. گلت لغادة عن موافقتي على اسكندر. الكل جان ما قابل على هذا الشي. حتى ملاك وبيبي وعمتي. أنا أساساً بنفسي ما قابله بس مجبورة. بدء اسكندر يلح بسالفة الزواج والعرس. وأنا طبعاً رفضت. گلتله يقدم الأدلة أول. ما قبل بهالشي. غلط وسب وفشر. رجعت اله المسبة الوحدة بعشرة. وشبعته غلط، وسديت الإتصال منه.

نور: جنت واكفة أغسل بالطرمة. وأدندن بأغنية. نور : يا طير يا مسافر له، وصله هذا الكلام. گله حبيبيك ميت گله، واللّيلة أبد ماينام. عشرتنا ما ناسيها .. كل يوم أفكر بيها. والعشرة ما تهون إلا على ابن الحرام. طول علي بغيابه وأنا موتني الحنين. يا طير من يرضاها ناسيني كل هالسنين. ذبلت ألوان ورودي .. والدمع فوق خدودي. حتى النهار بعيني بغيابه صاير ظلام. فزيت على صوت عزيز. عزيز : بوياي شهالصوت الملائكي. ابتسمت بخجل.

نور : عزوز أريد أروح لمُلاذ اليوم. عزيز : اليوم ما نكدر نروح. نور : ليش؟ عزيز : عندي شغل حياتو. نور : زين شوكت تكدر توديني؟ عزيز : بس أفرغ آخذج. نور : أكيد؟ عزيز : ودّاعة عيونج. ابتسمت وهزيت راسي بمعنى تمام. كعد عزيز يمّي. عزيز : أگلج نويرة. نور : هاع. عزيز : هاي أخت مُلاذ. نور : ملاك؟ عزيز : إي بنت الأوادم گد ما انطوائية. حتى ما نعرف اسمها. نور : هههه إي ملاك هادئة. عزيز : عكس أختها ملكة الجنان.

نور : هههههههههه كون تسمعك. عزيز : والله على گوله سلطان. حاطينها على الأسود والأبيض. نور : بس حلو اختلاف أشكالهم. هز راسه وكمل. عزيز : إي المهم هي هاي ملاك يا صف؟ نور : ثاني متوسط. عزيز : يعني شگد عمرها؟ نور : ١٣ أو ١٤ ما أعرف. عزيز : ها زين. نور : ليش سألت؟ عزيز : هي. جهزت راسي ساكتة. رغم ما صدگته، لمن سأل عنها. حسيت عيونه تطلع گلوب. بس تغاضيت وكملت تنظيف. لبست جيبتي وشالي. طلعت أمسح اللي گدام الباب.

دحگت لـ أركان الي جاي من بعيد. وبإيده مسواك وبالإيد الثانية لازم العكازه. وولد يمشي وراه شايل جزء من المسواك. دنكت راسي بسرعة. من يوم صارت المشكلة. ما استرجيت أحط عيني بعينه. رفعت عيني لمن حسّيته واگف يدحگلي. وأنا منزلة راسي أمسح بسرعة. فزيت على صوت جسار. وهو صاح لأركان ويسلم عليه. رفعت عيني دحگتلهم متحاضنين ويتسالمون. ودحگت لأركان الي يدحگلي. وهو حاضن جسار. اتلبكت درت وجهي ودخلت جوا. گلبي يدك ألف دگة بالدقيقة.

مُلاذ: هستوني أريد أنزل من سيارتي. إجاني إتصال. دحگت رقم ضرغام رديت عليه. سلم عليّ بالبداية وسأل عن حالي. وأنا أترقب سبب مكالمته المفاجئة هذي. ضرغام : مُلاذ. مُلاذ : ها. ضرغام : شوفي صراحة ما أريدج تتضررين. أنتِ عزيزة عليّ ومن يوم دخلتي المركز. عرفت أنتِ بنية ما عايشة حياة سهلة. مُلاذ : ضرغام شصاير؟ ضرغام : ما أكدر أسكت عن أفعال اسكندر. وأخليج تحت وضع سيء. وأنا جان عندي فرصة أخبرج بهذا الوضع.

عگدت حواجبي ما فاهمة كلامهم. مُلاذ : ش... شلون يعني؟ ضرغام : مُلاذ اسمعيني كلش زين. مُلاذ : احجي ضرغام، شصاير؟ ضرغام : تذكرين لمن گلتلج اسكندر مؤذي؟ مُلاذ : إي؟ ضرغام : ما جنت أقصد فقط تصرفاته. مُلاذ : إي؟ ضرغام : مُلاذ اسكندر متزوج. انصدمت. رغم كلشي أتوقع من اسكندر. بس تلقائياً انصدمت وصحت بصدمة. مُلاذ : شنوووو؟؟؟

ضرغام : أعرف ممكن يكون هذا شي صعب بالنسبة الج. بس اسكندر متزوج. محد يعرف بهذا الشي غيري. لياليه يقضيها بالملاهي غير عن هذا. إجت مرة الي متزوجها الي. وطلعت حامل تبجي وتتوسل بيها. حاچي اسكندر لأن يريد يطلقها. ويخليها تسقط الطفل وهو متزوجها متعة. صدمة ورا صدمة أجن ليا. إيدي على حلگي ومبحلقة عيوني بالفراغ. الكل يخدعني!!! سديت الإتصال من ضرغام بسرعة. إتصلت على اسكندر أعيط بعلو صوتي.

وگلتله يجي لـ بيتنا هسه حتى أنطي المحبس. أجا بسرعة لـ بيتنا. هزأته ورزلته لأن مستغبيني. والقرف اتجاهه يتدفق من داخلي أكثر من كل مرة. ما جان يعرف عن شنو الموضوع. وأمي مفهمة يلي صاير. شمرت الحلقة بإيده وطردته من بيتنا. دخلت جوا الدخان يطلع من راسي. مستغبيني وفوقها قذر وغاط بنص الحرام. ورغم أعرف بهالشي وكارهته. عمى عيوني الحقد وقبلت بي علمود أبوي. بعد ما أمي انطتني مي. وهدأت دقايق. سولفت الها يلي گاله ضرغام.

وكانت ردة فعلها مثل ردة فعلي. ثاني يوم فسخت الخطوبة رسمياً. هددني اسكندر يحجي لأمي عن الچتال. ما اهتميت وگلتله يحجي الها. توالت الأيام واسكندر ساكت. تعجبت لأن ما گال لأمي عن الچتال. حسب معرفتي هو نذل ويسويها. غلست عنه المهم تخلصت منه. قبل لا أخطو خطوة وأندم ندم العمر. غادة: مرت كم يوم مُلاذ ما مداومة. وأنا أصلاً ما أحاجيها. من عرفت قابلة بإسكندر، وما گائلة إلي. وفوقها كلنا ما راضين على موافقتها. وهي معاندة.

ما أعرف على شنو. أصلاً شوكت لحگت تحب اسكندر؟ جنا كاعدين أنا ومجموعة بنات. أكو رجال همين يمنا. بس مو من الكلية. أجا وي باهر. أدحگلهم هوَ وباهر وحايرة بجمالهم. كل واحد يگول الزين عندي. قاطع صفنتي عليهم صوت نورس. نورس : عفية غادة من زمان أريد أسألج. على مُلاذ وينها؟ غادة : ما أحاجيها. ما أعرف وينها. نورس : يا داده ليش؟ شحصل؟ غادة : لج موافقة على خطوبة اسكندر. رح تموتني. نورس : ياااا عزه، هذا ابن عمها؟

هزيت راسي بمعنى إي. غادة : ورح يحددون موعد الزواج يمكن. لأن مثل ما أعرف اسكندر ما يفوت هيج فرصة. ويضيع الوقت وينتظر. فزيت على دفعة الكرسي. رفعت عيني دحگت لـ ظهر باهر. والرجال الي ويا يمشي گدامه. باهر يركض وراه. غادة : شصار؟ نورس : ما أعرف. المهم عوفج منهم. مُلاذ شلون قبلت غير ما تحبه؟ غادة : أنا أدري. موتتني مُلاذ والله. نورس : أمها شنو گالت؟ غادة : أمها، المرة متخبلة. تگول مستحيل تقبل بي هيج. نورس : يمكن حبته.

غادة : لج نورس مُلاذ تكرهه اسكندر. أكثر من كرهه دم سنونها. رفعت أكتافها بعدم معرفة وحيرة. رجعت ظهرها على الكرسي متنهدة. مُلاذ: أمي راحت يم خالتي نيروز. لأن طلعت خالتي جاية لبغداد. ما ندري بيها ولا هي تندل مكاننا. بعدين لاگية رقم واتصلت عليها. وطلعت بنتها جايبة بنية. راحت الها أمي. بقينا احنا بالبيت. لان ملاك عدها امتحان ثاني يوم. ودتدرس للامتحان ما تكدر تطلع. طبعاً غادة زعلانة مني. ولا گدرت أحجي الها أي أخبار تصير.

لأن ما تجاوب عليّ. طلعت گعدت بالحديقة شوي. الدنيا باردة. على أكتافي لفاف حاكته أمي. غمضت عيوني وتنفس بعمق. انطفت الكهرباء فجأة. اختفى كل ضو من بيتي. رغم جنت أشوف أضوية البيوت گدامنا مشتغلة. دخلت جوا. أنادي باسم ملاك. گمت أمشي بهدوء إيدي گدامي. وأتلمس بالغراض خاف أنضرب بشي. ركزت زين شفتني دخلت المطبخ. وأنا بالمطبخ فزيت على صرخة ملاك. مُلاذ : ملاااااك. قبل لا أكمل حسيت إيد شخص على حلگي. غطى خشمي. فتحت عيوني بوسع.

گلبي بالدقيقة يدك ألف دگة. لزمت إيده أحاول أوخرها وأصارعه. حسيت حاط منديل على خشمي. خلال ثواني خارت كل قوتي. انغلقت عيوني بهدوء. ما حسيت على شي بعد. ومضات خفيفة من الضو تمر وأرجع ادخل بالظلام مرة ثانية. ما أعرف شگد مر وقت. صحيت بس گدامي بعد ظلام. حسيت نفسي ممدديني بالكاع. ردت أحجي ما أگدر مثل شي لازگ حلگي. عيوني گدامه ظلام رغم أحاول أفتحه. إيدية مقيدة ومشدودة ورجلية نفس الحالة. تذكرت تدريجياً آخر شي صار.

فز جسمي وصرت أحرك روحي بهستيرية. وأگول بصوت مو مفهوم اسم "ملاك". سمعت أصوات خطوات يمي. رفعت راسي أدور على مصدر الصوت. انسحبت وانرفعت عن الكاع. صرت بوضعية الجلوس. رفعوا القماش الي فوگ عيوني. حركت راسي بسرعة. گدام عيوني غواش. وتوضح نظري بعد لحظات. اتجمّدت بمكاني مصدومة بالمنظر گدامي! جدران مصخمة، ضو خافت. أشخاص ملثمين واگفين يم باب حديدي. رجف جسمي لمن شفت دم على الحيط. و بالكاع وبقع واضحة.

ريحة المكان عبارة عن دم وريحة مشمئزة. نزلت عيني على الناس. نسوان متسطرات على طول المكان. كل وحدة گاعدة بزاوية. أشكالهم بحالة يرثى لها. كأنو صارلهم سنين هنا محبوسين. وكل شخص منهم ينادي يا روحي. كم وحدة منهم حاملة بأيديها أطفال رُضع. عجايز، أولاد صغار، بنات صغار. بحَلقت بصدمة واتجمدت كل ذرة بجسمي. لمن استقرت عيني على ملاك. يلي بالكاع. شَادين عيونها. لازگين حلگها بتيب. إيديها ورجليها مربوطات.

ممدديها بالكاع وبوسط المكان.