رواية جرح الأيهم الفصل الخامس والأربعون 45 - بقلم أيلان

مُلاذ: بيش الساعة؟ أيهم: ما أعرف. صادف يوم جمعة وعندي عطلة. دحك أيهم بعيوني وهو يلعب برموشي. مُلاذ: تعبانة. أيهم: اسم الله عليچ من التعب. ابتسمت وهو حضنني لـ صدره. مُلاذ: أيهم. أيهم: جَرحهم. مُلاذ: البارحة ليش هيچ سويت وي أبوك؟ أيهم: إنه أكرهه وهو يكرهني. مُلاذ: لعد ليش كل ما تحجي تگول وداعته إذا تكرهه؟ أيهم: أتشاقى وياچ بس انتِ تصدقين.

مُلاذ: لا ما أصدك بس أعبر للي تسويه. هواي أشياء ضام عليه انت، وهواي اكو أسئلة بـ بالي، بس أعرف أجوبتك رح تحيرني أكثر. أيهم: عوفي كل شي يمشي حسب مجراه. رفعت عيوني دحگتله وحجيت. مُلاذ: أيهم. أيهم: امم؟ مُلاذ: ما مرتاحة. أيهم: ليش؟ مُلاذ: ما أعرف، اكو شي ما مرتاح بـ داخلي. سكت، رفعت عيوني أدحگله. نزلت نظري ع الفراغ وأنا هم سكتت. مُلاذ: أيهم. أيهم: هام. مُلاذ: ليش عندك سلاح؟ أيهم: گلتلچ مال صاحبي. مُلاذ: بلا چذب؟

أيهم: ما مچذب. مُلاذ: يعني بـ ذاك اليوم الرصاصة الواگعة يم الباب لأن سويت السلاح وردت تودي لـ صاحبك؟ أيهم: أي مو گلتلچ. مُلاذ: ما أثق بكلامك. أيهم: أخابرلچيا؟ مُلاذ: لا، خابرته مرتين وسألته نفس السؤال، بس أنا أوهوس من ورا چذبك گمت ما أصدكك. أيهم: انتِ الحقيقة الوحيدة بـ حياتي. مُلاذ: بس هم ما أريد تچذب عليه! أيهم: ما مچذب عليچ، اتطمني. عوفي الچذب تعالي خل أراويني. مُلاذ: شتراويني؟ أخذ تلفونه، طلع لي صورة طفل.

مُلاذ: منو هذا؟ أيهم: علي. مُلاذ: علي؟ أيهم: ابن نارا. رفعت حواجبي وابتسمت. مُلاذ: فدوة شگد حلو. أيهم: أبيل يموت عليهم. مُلاذ: يعرفه؟ أيهم: أي. مُلاذ: لعد شعجب ما فاضحك؟ أيهم: ما يفضح بالسوالف الي بيها مصلحته. ضحكت وأيهم گال: شوفي صورة خل أروح أكعد أبيل. هزيت راسي بـ قبول وهو كام من يمي. كعدت أدحك لـ صورة وأيهم ماخذ ويا صور. مصور له فيديو يلعب بالألعاب وأمه طالعة بالفيديو. كلش حلوة، شكلها يجذب وملامحها لطيفة.

وأنا أدحك للفيديو، رفعت نظري للشاشة من فوك لمن جا إشعار لأيهم، مرسول له فيديو. وراها جا إشعار ثاني مكتوب: "فدوة لا تحظرني خل أحاجيك". دخلت على الإشعار بسرعة. دحگت صورة بنية ومكتوب اسم مزخرف. دخلت على الفيديو وسعت عيوني بـ صدمة عليه. عگدت حواجبي، طلعت من الفيديو بسرعة. همست بعصبية متنرفزة: لينا. ردت أرزلها بس اجت بـ بالي فكرة أفضل. سويتها وبسرعة حذفت المحادثة. سديت التلفون خليته يمي. گمت أشوف أيهم وين.

رحت للغرفة لگيته يجر بـ أبيل من الفراش وأبيل بعده نايم. شاله وگام عبرني وداه للحمام. غسل له يلا صحى. حجا أيهم وهو شايل أبيل ويمشي للصالة وأنا أمشي وراهم. أيهم: شفتي صورة؟ مُلاذ: أي، كلش حلو. كعد على الكنفة ونزل أبيل يعدل بـ ملابسة. وأنا واگفة أدحگلهم، اجاني اتصال. أخذت تلفوني من الكنفة. أيهم: منو؟ مُلاذ: نور. رديت على الاتصال. مُلاذ: الون. نور: مُلاذ عفيه مادري شسوي. مُلاذ: شكو شصار؟

نور: أمي جاية لـ البيت، وعمتي موجودة بـ بيتنا لأن البارحة من رجعنا باتت يمنا. وطالعة الها عمتي تگول لها أريد أشوف نور. مُلاذ، ما أريدهم يعرفون بـ راكان، وأنا هسه ماخذته للصيدلية لأن كعد مريض. مُلاذ: تمام، لمن أخابرج ارجعي. لا ترجعين هسه، أنا رايحة الهم. نور: من الصباحيات أجيب لج مشاكل. مُلاذ: والله عيب تخليني أغلط وأنتِ أكبر مني. سكتت وأنا سديت الاتصال. انداريت لأيهم لمن گال. أيهم: ها، رايحة تتعاركين؟ ضحكت وگلت.

مُلاذ: أيهم لازم أطلع. أيهم: شكو؟ مُلاذ: إيديه تحكني أريد أكتل واحد. فـ رايحة أكتل علياء وأجي. أيهم: علياء منو؟ مُلاذ: أم نور، رايحة لـ بيتهم. وعووود تريد تشوف نور بس هي جذب. ذاك اليوم بـ فاتحة عمي محمد شافت راكان، نور شايلته وكامت تحوص تريد تسوي مشكلة. أيهم: مُلاذ، كعدي راحة وعوفيهامُلاذ: لا لا ما يصير، خل أروح وأجي بسرعة. أيهم: ما تتاخرين! مُلاذ: ما أتأخر. أيهم: ترا رح أنتظرج ع الأكل. هزيت راسي بـ قبول.

رحت غسلت وبدلت ملابسي. ضلوعي توجعني من نومة الكنفة. طلعت من الغرفة، شلت أبيل بسته حيل. أيهم: وإنه؟ مُلاذ: ماكو. أيهم: مُلاذ يگولون لمن تحطين حمرة يموت رجلج، ترضين تصيرين أرملة؟ مُلاذ: أي، رجلي هسه خطية بالانعاش لأن حطيت حمرة طگته جلطة. ضحك وتقدم عليّ بـ إيده كلينس. خففتها وطلعت من يمه. ملگيت أمي لابسة عبايتها وتمشي جاية ناحية البيت. وصلت يمي تدحگ لي. مُلاذ: فيروز، خيرچ؟ فيروز: رحت أجيب منا ريوك، ما عدنا.

مُلاذ: وليش ما تگليلي؟ فيروز: ردت أتمشى شوية، ضجت من الگعدة. انتِ وين رايحة؟ ابتسمت بـ وسع وحجيت. مُلاذ: رايحة أتعارك. وسعت أمي عيونها عليّ، وأنا رحت لجهة السايق، صعدت. أمي بدون نقاش صعدت وياي. فيروز: ويامن تتعاركين؟ يمه، مُلاذ تردين تخبلين. مُلاذ: هسه عرفتي ويامن رح أتعارك؟ فيروز: ويامن؟ مُلاذ: وي علياء. فيروز: شنو شبيها علياء؟ سولفت لها مختصر. فيروز: وأنتِ خابرتج نور حتى ترحين تتعاركين لو حتى تلگين الها حل؟

مُلاذ: مشتاقة أتعارك يمه، صار لي هواي ما متعاركة. طلعت الحمرة من الجنطة خليت على شفتي. أخذت مناظري لبستهم، ابتسمت. اتوجهت لـ بيت نور وأمي تدردم عليّ. خابرت على ملاك حاجيتها حتى ما تخاف وحدها. وصلت طفيت السيارة ونزلت، وأمي نزلت وياي. تقدمت دگيت الباب. شوية وفتحت الباب عمتي. مُلاذ: بعدها جوا؟ منار: أي. عبرتها ودخلت. فتحت باب الصالة. دحگت لـ علياء، هي وشعرها المعطب كاعدة على الكنفة، عبالك البيت بيتها.

تشبهه كل شي إلا البشر. مُلاذ: ها علياااااء، شخبارج شلونج؟ شكو ماكو؟ علياء: اجت أم المصايب. ابتسمت ورفعت مناظري. ركصت لها حواجبي وحجيت. مُلاذ: أم مصايب ولا أم زلم. لطمت أمي خدها مصدومة. علياء عيونها صارت بـ كصتها. علياء: ادبسز، مااا متربييييه! مُلاذ: ديلا خليت الترباية الج. شفنا تربايتج لـ اسكندر شلونها. يسكر ويتزوج متعة وينسجن وينكتل، ومتحرش ومجلوب. علياء بس عدها شوارب. اجت أمي يمي تسكتني.

علياء: أنتِ شتسوين جاية لـ هنا؟ يعني أنا ما أخلص منج! مُلاذ: دكومي لج، أنتِ الشتسوين هنا؟ اجيت أطردج، شعندي غير أطرد بـ الجلاب. فيروز: مُلاذذذ. مُلاذ: فيروز، هسه هاي هم خلقة بشر. علياء: جايه لـ بيت بتي وابني. يا ما متربية، ما عليج عتب لا أب ولا أم ربوج. مُلاذ: ترحين فدوة لـ تربايتي ولـ إلياس. ضحكت بـ استهزاء. علياء: ليش أروح له فدوة؟ شو خلص عمره يتعارك وما عرف يربيج. نو يركض ورا الـمـ...

هي تحجي وأنا نزعت الشال وصرفنت رداناتي. أمي ما قبلت على حجيها هي وعمتي. بعدها تحجي وجريتها من شعرها. مُلاذ: دتعالي خل أراويج ترباية إلياس شلونها. كامت تصيح، لزمت شعري تريد تملخني وأنا أطول منها. حطيتها وكتلتها. من زمان گلبي محمل عليها. وأمي وعمتي يصيحن يريدن يلزمني. لزمت حلكها ولويته بـ أصابعي. مُلاذ: والله إذا جبتي اسمه على لسانج القذر، أكصه لـ لسانج وأخليه بـ إيدج، أم الزلم الوصخة.

لزمتني أمي توخرني عنها وهي شعرها كفش وخدودها حمر. وخرني عنها وهي تصيح وتتوعر. دت أرجع عليها بس أمي وعمتي ثنينهن لازمتني. راحت لباب تصيح ورافعة إصبعها. علياء: ادبسززز، ما متربية. محد مربيج، أنا أعلممممج. إذا ما أخلي ابني يربيج. مُلاذ: طييييط، دمي لج لا أجيك. وصلت لباب تريد تطلع، نست عبايتها، طالعة بـ طرك الدشداشة. تيهت مشرادها حصرتني الضحكة. هاجت وكفت كدامنا. عمتي وأمي بعدهن لازمتني وتسكتن بيه. حجت بعصبية.

علياء: أريد عباااتي. دحگت عباتها على الكنفة يلي يمي. حصرت ضحكتي وگلت. مُلاذ: بس توصلين يمي أكتلچ. علياء: وخاااايفة منج أنام. مُلاذ: يلا بَطله، انتِ تعالي. اتدنت على كيف جرت العباية من طرفها. حركت روحي عود أروح لها. أخذت العباية وطكتها ركضة. حجيت بصوت عالي. مُلاذ: إذا شفتج هناااا بعد، والله أكتلچ. اختفى صوتها. عافني عمتي وأمي. راحت عمتي ورجعت ميته من الضحك. منار: عايفه الباب مفتوح وطالعة.

دحگلها تركض بالشارع جنها بطريق. انهاريت من الضحك. وعمتي إيدها على حلگها وتضحك. حتى أمي المعصبة مني گامت تضحك. علياء قصيرة وشعرها برتقالي وقصير واصل لحد أذاناتها ودشاديشها كبار عليها. ضحكني شكلها وهي تركض تريد تطلع. كعدت ع الكنفة زفرت نفس. حجيت وأنا أضحك. مُلاذ: ارتاحيت. دحگت لي أمي معصبة وعمتي ما تكدر تسكت. كل شوية تگول جنها بطريق تركض وتضحك. گلت لـ عمتي تجي ويانا لأن البيت فارغ بس هي كاعدة.

ما قبلت گالت عزيز مخابرها ورح يجي. خابرت نور گلت لها ترجع. ودعنا عمتي وطلعنا. أمي خلصت الطريق كله ترزل بيه. اتعاركنا أنا وياها ورجعت ترزلني لحد ما وصلت للبيت. اتلگانا أيهم يدحگلنا بـ استغراب. أيهم: خيرج خاله؟ فيروز: تگول زعطوطة شكدها وشطولها، ما تكدر تلزم لسانها، طفلة أنتِ وتتعاركين! مُلاذ: يمه شبيج، والله تستاهل. فيروز: اسكتي مُلاذ اسكتي، الحجي وياج ضياع وقت، أروح أحسن لي. ندارت لأيهم.

فيروز: ما أكول غير الله يساعدك. عافتني وراحت. أيهم عقد حواجبه يدحگ لي بـ استغراب. أيهم: شكو؟ مُلاذ: علياء گلت لي أم المصايب. أيهم: أي؟ مُلاذ: وأنا گلت لها أم مصايب ولا أم زلم. رفع حواجبه وأنا كملت. مُلاذ: وكتلتهارفع حواجبه أكثر ووسع عيونه أكثر. ضحكت بـ هدوء على نظراته. أيهم: عبالي تتشاقين من گلتِ أتعارك! مُلاذ: لا، أنا ناويه أكتلها وأتعارك. فد ارتاحيت، أيهم ماي بارد نزل على گلبي. ضحك وحضنني لـ صدره.

صعدنا لـ شقتنا دخلت. دحگت أبيل يدحك لـ التلفزيون. أيهم فاتح له كارتون. رحت بدلت ملابسي وطلعت. أيهم يسوي ريوك، اتقدمت كعدت ع الكرسي. أيهم: شسويتي لـ علياء بعد؟ ضحكت وسولفت له وهو يضحك وياي. أيهم: گامت تخاف منچ. مُلاذ: والله أيهم حصرتني الضحكة عليها. طلعت لـ الباب بدون شال وعباية ورجعت وكفت بنص خازرة عمتي عود تسوي روحها ما خايفة تگول لها أريد عبايتي. خليت إيدي على حلگي وضحكت بـ صوت.

مُلاذ: النوب أيهم شايف ذني البطات الصفر من يركضن يشبهن والله. اندار يدحگ لي يضحك. أيهم: لو مصورتهامُلاذ: والله لو بـ أيدي تلفون إلا أصوره. تحجي على أبوي أم الزلمات. تقدم أيهم عليّ. أنا كاعدة ع الكرسي وهو واگف گدامي. وخر شعري عن متوني، يحجي. أيهم: ختولي معليچ بيها. مُلاذ: اليضحك عائلة أحمد كلهم كاتلتهم. أحمد طفيت عينه وأسكندر وعلياء وعزيز من جان صغير كتلته. بس نور كافية خيرها شرها. شوكت ما تشوفها تلكاها تبجي.

أيهم: يستاهلون منچلبين على مرتي. ابتسمت وهو دنك باس خدي ورجع باس طرف أذاني. حجيت وهو بعده مدنك يبوسني. مُلاذ: بس عزيز حباب. جان صغير وضوجني ورحت لويت إيده وهو نايم. ضحك أيهم، وجهه بـ رگبتي. سند إيده ع الميز يلي يمي. رفع راسه من رگبتي، مال راسه من الجهة الثانية. مشى أصابيعي من خدي لـ شفتي. أيهم: فوصة كلش انتِ. ابتسمت وهو تقرب باسني حيل. لزمت بـ زندة، لمن ابتعد حجيت. مُلاذ: لا تبوسني أدخ. أيهم حباب، انثول.

ضحك ورجع باسني وأنا أضربه. تنرفز أظل مسطورة وصافنة. أول ما عافني دفعته وگمت. مُلاذ: أكعد يم أبيل أحسن. انت ما ينكعد يمك. دت اطلع من يمه. لزم خصري وقيدني. رفعت عيوني دحگت له. مُلاذ: لا لا ماكو. سديت حلگي وهو يضحك عليّ. رفع إيديه حاوط ضلوعي. رفع إيده الثانية وخر إيدي من شفتي وباسني. ظليت هادئة لحد ما وخر عني. أيهم: انسطرت الفوصة. لو البوس هيج يسطرج جان سويتها من زمان. دفعته وطلعت من المطبخ.

رحت كعدت يم أبيل لحد ما صاح لنا أيهم حتى نتريك. شلت أبيل ورحت له. كعدت ع الكرسي رفعت إيدي أريد أشد شعري. أيهم: انطيني. أخذ الگيتر من إيدي لم شعري وشده. دنك باس شعري. أبيل عينه ع الميز ما منتبه. راح له وباس شعره. رفع راسه مبتسم. أيهم: شو هادئ اليوم، مالك حس. أبيل: نعسان. أيهم: ما يصير تنام هواي. هز راسه بـ قبول. كعد أيهم وتريگنا. خابرت نور حاجيتها گالت رجعت لـ البيت هي وراكان وبعد محد جا. نزلت دگيت الباب على أهلي.

فتحت لي الباب شمس. مُلاذ: وين فيروز؟ ملاك: بـ المطبخ تسوي غدا. مُلاذ: أشم ريحة دولمة. ملاك: من هاي التعجب. ابتسمت رحت لـ المطبخ. مديت راسي. مُلاذ: شوف رفعة الحاجب عرفت بيه اجيت. فيروزة العصبية كلش كلش. سوت روحها ما تشوفني. رحت وكفت يم الجدر فتحتهم. مُلاذ: دزولنا ماعون. ملاك: سوت جدر ثاني، يا ماعون؟ انداريت دحگت صدك مسوية جدر ثاني. مُلاذ: ههههههه تعرف سوالف. لسّا ما سويت غدا. ملاك: والله زين عمو أيهم من ما يشك.

مُلاذ: عمو أيهم شنو؟ كون يسمعج. ملاك: لأن چبير فـ أگله عمو. مُلاذ: لا عادي گولي أيهم. ما يهتم بهالسوالف. ملاك: نفس الشي. مُلاذ: هسه فيروز ترضين لو أروح أتعارك؟ اندارت عليّ خازرتني. فيروز: شگد وصل عمرج؟ لـ شوكت تظلين تتعاركين؟ مُلاذ: يمه يضوجوني، ما يفيد وياهم. فيروز: مرة بگد أمچ تحطيها تكتليها؟ مهما كانت تبقى مرة جبيرة. مُلاذ: كتلتها بدون سبب؟ مو حجت على أبوي گدامچ. فيروز: وأنتِ كل اليحجي على أبوچ تكتلي؟

مُلاذ: أي، لا تدحگيلي هيج. يعرفون بيه أتخبل من واحد يحجي عليّ ويرجعون ويحجون عليّ، يستاهلون. فيروز: يعني من يحجون علينا أنا وملاك تسكتين؟ مُلاذ: لا، هم أكتلهم بس ما يجيبون طاريكم. مخل يجيبون طاريكم والله أطيح حظهم. فيروز: مُلاذ، معليج بيهم. أنا الأعرفة المحامي ما يتعارك، هو اليحل العركة. بس وين الحجي وياج ضياع وگتم. مُلاذ: أمي أنا محامية بس مو معناها أمنع نفسي عن الكتل. هوايتي أكتل اليستاهلون الكتلة.

فيروز: طاححظج وحظ هيج هواية. ملاك: أمي طلعت عن صمتهامُلاذ: هههههه عسل فيروز، مقبولة منچ. اندارت دحگت لي وأنا گلت. مُلاذ: ضحكت، ضحكت، ضحكت لحد ما صدك خليتها تضحك. هزت إيدها ساكتة. مُلاذ: يلا تصاحبنا فيروز، خل أرجع يم رجلي. وين جدر الدولمة؟ انداريت أخذته من الطباخ. فيروز: ديربالج لا تنجوين. مُلاذ: ما أنجوي. فيروز: بالعافية. حجيت وأنا أمشي لباب. مُلاذ: الله يعافيج. شكراً فيروز، يوم الأفرح بـ عرسچ.

عاطت أمي بيه وأنا ضحكت وطلعت. صعدت خليت الجدر ع النار ورحت يم أيهم. مُلاذ: أمي مسويتلنا دولمة. أيهم: عاشت إيدها. وكفت گدامه دحگت له. مشيت أصابيعي على زندة وهو يدحگ لي بـ استغراب. مُلاذ: شنو رأيك تودي أبيل بليل يم أهلچ. عقد حواجبه مستغرب. أيهم: خاف الدولمة بيها شي؟ ضحكت وهزيت راسي بـ رفض. أريد أنفذ الخطة يلي بـ بالي وما أريد أبيل يكون موجود. مُلاذ: ها، شتگول؟ أيهم: ليش أودي يم أهلي؟ مُلاذ: هيچ نتعشى سويه نسولف.

أيهم: نتعشى ويا ونَسولف ويا؟ مُلاذ: اليوم وحدنا وبـاچر ويا. تدنى عليّ خلا إيده ورا ظهري وقربني عليه أكثر. حرك أرنبة خشمُه على خشمي. أيهم: مُلاذ، على شنو ناوية؟ مُلاذ: ما ناوية على شي. من زمان ما باقيين لـ وحدنا. أيهم: صدك. مُلاذ: أنا صوجي أريد أتقدم خطوة وياك. عوفني، وخر إيديك عني. لزمني أقوى وثبتني. خلا إيده على خدي، باس خدي وحجا. أيهم: هالخطوة ما أريدها، لا تسويها. عقدت حواجبي بـ استغراب دحگت بـ وجهه.

أيهم: تأذيج هالخطوة هواي بعدين، وأنه أخاف عليچ حتى من اسم الأذية. دحگت بـ وجهه ما فاهمة. مُلاذ: بس أنت جنت قابل. أيهم: ما قابل أسوي روحي قابل لأن أدري بيچ ما تقبلين أنتِ، وأحب أشوفچ تصديني. هسه لا تخليني أضعف يمج، وأنه رايدچ أكثر من كل شي. مُلاذ: بكيفك، وخر عني. أيهم: نودي أبيل يم أهلنا ونكعد نتعشى ولا يهمچ. مُلاذ: تمام. فتح شعري نثره على متوني. أخذه بـ إيده وباسه حيل. أيهم: تعالي أضفرلچ.

جهزت راسي بـ قبول وهو وكف وراي يضفر شعري. خلص وباس الظفيرة. دحگت له مبتسمة، عفته وطلعت من الغرفة. شوية وصبّيت غدا وتغدينا. لـ المغرب أخذت تلفوني ورديت ع الرسالة. رحت أدور أيهم لگيته واگف يصلي. ابتسمت. عابت لج مُلاذ، تعلمي. تقدمت كعدت ع الجرباية أدحگ له. كعد يسبح اندار دحگ لي. أيهم: روحي اتوضي وتعالي. مُلاذ: ما أعرف أصلي عدل، خاف أغلط. أيهم: إنه أعلمچ. توضي وتعالي. كمت من يمه توضيت.

هواي بـ خاطري أصلي بس ما متعلمة عدل، بس أعرف أتوضى، وأخاف أغلط بـ الصلاة. توضيت ورحت له. وكف يعلمني شلون أصلي. مُلاذ: والله كرهت روحي. شنو ما أعرف أصلي بهالعمر؟ أيهم: عادي حبيبتي، أمچ علمتچ؟ مُلاذ: علمتني وبابا هم جان يصلي، وهسه ملاك همين تصلي بس أنا. أيهم: عادي، هسه ابدي صلي. مُلاذ: كل يوم أتندم لأن ما جنت أصلي. أيهم: تقضيهن حبيبتي، ابدي من هسه، قابل شنو وراج؟ هزيت راسي بـ قبول. وهو وكف يعلمني ع الصلاة.

بعدين طلع وعافني بالغرفة. صليت وحدي. كملت وكعدت ع السجادة بـ داخلي شعور مرتاح. سبحت مثل ما سوا أيهم ولميت السجادة وگمت. رحت أطفر حضنت أيهم حيل. أيهم: ههههه، شبيج؟ مُلاذ: معليك، لا تسألني. عجبني أحضنك وحضنتك. أيهم: الملائكة هسه دايرين وجوههم، مستحين من عدنا. ضربت زنده وضحكت. رفعت تلفوني لمن اجتني رسالة دحگت لها. نزلت التلفون بسرعة دحگت لـ أيهم. مُلاذ: شوكت تودي أبيل؟ أيهم: والله فلا مرتاح لـ سالفتچ، مو من عوايدچ.

مُلاذ: شبيك أيهم، أريد أكون على طبيعتي وياك وما أخاف من بعدين شنو الراح يصير. دحگ بـ وجهي ساكت، هز راسه بـ قبول. مُلاذ: خل أجي وياك. أيهم: تعالي. رحنا لـ أبيل لبسناه ووديناه يم أهل أيهم. نزل أيهم يشوفهم وأنا نزلت وياه. أم أيهم: كل الهلا بيكم. أيهم: عدنا شغل ساعة تقريبو نجي ع أبيل. أم أيهم: خلو يبات يمنا اليوم. مُلاذ: لا، نشتاق لها. جا أبيل حضن رجليه، شلته وبوست خدوده. مُلاذ: ما نتأخر عليك. أبيل: أخذوني.

هزيت راسي بـ قبول. مُلاذ: طبعاً ناخذك، ما نتأخر عليك. طلع أيمن لباب سلم عليّ وسلم ع أيهم، بس أيهم ما رد له السلام. أيهم: يلا يمه، أنا أروح. أم أيهم: الله وياك حبيبي. دخلوا أبيل وأم أيهم جوا. وأيهم اندار يريد يصعد السيارة. استوقفه أيمن. أيمن: شنو زعلان مني؟ عافــه أيهم وفتح باب السيارة. سدها أيمن ووكف بالباب وأيهم يدحگه بـ برود. مُلاذ: أنا راح أصعد. أيهم: اصعدي. صعدت بالسيارة أدحگلهم. أيهم خزره: وخر عن الباب.

أيمن: شبيك أيهم، لا تصيـر نحس. تدري بيه ما جان قصدي. أيهم: وخر گلتلك. أيمن: اعتذر، صالحني. بقى أيهم يدحگ بـ وجهه وأيمن حضنه. أيهم منزل إيديه ما رجع حضنه. وخر أيمن و صفن ع أيهم. أيمن: ترا أعتبرك أبوي والله، لا تسوي هيج أيهم، انه ما جان قصدي. جنت معصب لأن أمي ما گالتلي. أيهم: تقصد أمي لأن هي مو أمك؟ أيمن: لا، أمي هم. يلا إشبكني خل نتصالح. چا بس مُلاذ تشبكها وتصالحها. رجع حضن أيهم مرة ثانية وأيهم ما حضنه.

وخر أيمن و گال بـ صوت واضح بي انقهر. أيمن: براحتك. عافــه ودخل جوا. صعد أيهم بالسيارة ضرب بابها حيل متنرفز، خلا إيده ع كصته. مُلاذ: ليش هيج سويت؟ مبين متندم؟ أيهم: أكثر من مرة عاد هالكلام، وهسه يتمسكن عليّ ابن الكلب. يدري بيه شلون أتخبل من هذا الكلام وكل ما ينجلب يعيده. صفن ودحگ بـ وجهي. أيهم: أنتِ شمدريج؟ مُلاذ: سمعتكم البارحة. أيهم: تنصتي علينا؟ مُلاذ: لا، بس سمعتكم بالغلط. اجيت أصيحك وسمعتك تتعارك ويا.

زفر أنفاسه بـ عصبية، فرك وجهه وشغل السيارة. رجعنا للبيت، دخلت وهو شمر روحه ع الكنفة. رحت سويت نفسي أحضر العشا. فتحت تلفوني دحگت لـ الرسالة رديت عليها. كم دقيقة واندك الباب. مُلاذ: أيهم افتح الباب. أيهم: تمام. سمعت الباب انفتح وانگطع صوت أيهم. طلعت من المطبخ فززن عيوني على لينا أدحگلها تبوس أيهم. ما جنت متوقعتها هيج تسوي، صرفنت رداناتي. نار اشتعلت بـ دماغي. مُلاذ: حي الله من جانا. وخرت مصدومة تدحگ لي.

أيهم دفعها ويدحگ لي وياها مصدومات. تقدمت عليها بـ هدوء. مُلاذ: إذا ما أخليج اليوم فرجة لأمة محمد، ما أسمى مُلاذ. جريتها من شالها وهي گامت تصيح وأيهم يريد يلزمني. مُلاذ: حيواااانه تدزين بـ صورچ وفيديوهاتچ لـ رجال متزوج، والله أربيج. أعلمچ شلون تدزين له هيج وفوقاها تبوسين. حطيتها وكتلتها كتلة وأيهم لازم خصري يريد يشيلني منها. وأنا عقلي محترك ع الفيديوات الدازتها ومنظرها وهي تبوس أيهم. هي تصيح وتخرمش بيه.

اندگ الباب وصوت أمي تصيح مخترعة. فتح أيهم الباب، لزمت لينا من شعرها. لينا: حقييييره، أنتِ الأخذتي مني وتزوجتي. أنا مرته الأولى، واگة الزلم. مُلاذ: أراويچ واگة الزلم شتسوي. واگة زلم ولا **** تدز صوري وصور جسمي. والله إذا لگيتج بعد دازة له ما أخليج تجين بـ رجليچ. أجيج أنا وأطيح حظ حظج حيوانه وفيديوهاتج إلا أنشرها وجهج طالع بيها، وإلا أكتب رقمج. أراويچ شلون تدزين له.

شالني أيهم من خصري عنها وأنا أصيح وجهي يحترك من العصبية. گمت أرافس وهو لازمني. صاح بـ لينا. أيهم: كووووومي اطلعي بررررا. مُلاذ: جلببببه، ادبسززز، نوب لابسة الهفستان صلوخ. سد أيهم حلگي وشايلني بـ تك إيد وأنا أرافس بـ رجليه. أمي لزمت لينا هي وملاك طلعنها من البيت. رافست بـ رجليه أصيح متنرفزة.

مُلاذ: عوووووفني والله أكتلها. تدزلك صور جسمها وصورها وفوكاها تتوسل ما تحضرها. ادبسززز. والله إذا ألزمچ أنتِ بيج خير ارجعي دزي له. والله أطيح حظج. سد حلگي بـ إيده ويمشي بيه لـ الكنفة. كعدني ع الكنفة ساد حلگي ومقيد إيديه. أيهم: اسكتتتي كاااافي. دخلت أمي تركض، شالت عباية لينا وشالها وطلعت. وخر إيده من حلگي وحاط ركبة رجله فوك رجليهم. مُلاذ: ما تدزلك صورها، ما تدزلك فيديواتها. أيهم: ما حاچيها والله ما حاچيها.

مُلاذ: أنا الحاجيتها ودليتها على البيت. سويت روحي أنت وگلت لها مُلاذ طالعة حتى أكتلها وأتوبها. دحگ بـ وجهي عاگد حواجبه. مُلاذ: لا تدحگلي هيج. الادبسز عينها الصلفة أفسها وأتبوسك فوكاها. سمعت صوتها تصيح من بيت أهلهم. ردت أكوم أيهم دفعني على تجوة الكنفة يثبتني. خزرني وگال بـ حدة: كافي. مُلاذ: ما أخاف منك. تدزلك صورها، عادياً. أصلاً تكيف أنت. أيهم: انجبي واحجي عدل. بـ وجهها ما أعاين، أعاين لـ جسمها؟ لأن **** أنا.

خزرته وسكتت. گام بـ هدوء كعد يمي. مُلاذ: گول لـ أمي تطلعها من البيت، والله أنزل أكتلها. أيهم: عايني لي. ما جان اكو داعي تتصرفين هيچ. تجيبيها لـ هنا وتكتلينها، جنت بكل بساطة تكدرين ترزليها على التلفون. مُلاذ: تستاهل والله، أرجع وأكتلها. ردت أكوم لزمني وكعدني ع الكنفة. اتقرب باسني، رفع رجليه من الگاع. كعدني بـ حضنه، لزمت بـ رگبته. بعد وجهه من وجهي يمسح ع شعري. أيهم: شلون بـ سوادي اليغار وما يشوف الگُدامه بعد.

مُلاذ: ما غرت. أيهم: ابد، أنا الغرت. مُلاذ: لا تسوي هيچ، اسكت. ضحك وباس شعري. دخل أصابعه بين خصلات شعري. حك فروة راسي وحجا. أيهم: وليدي الوگح، شو ارفع راسك أبوسكم. مُلاذ: ما أريد، ولي عني. أظل دايخة. أيهم: نامي يلا، خل اطلع أجيب أبيل. سكتت فتحت عيوني ذبلانات ورجعت غمضت. أيهم يمسح ع زندي بـ هدوء. والنومة دافية، بحيث گبل غفيت. كعدت ثاني يوم. أخذت ملاك لـ دوامها ورحت أنا لـ شغلي. خلصت ورجعت للبيت.

أيهم گلي نروح لـ بيت نارا. خلينا أبيل يم أهلي ورحنا أنا وأيهم. طلعت لنا بنية تجنن سلمت عليها ودخلنا. راحت جابت لنا مي قدمته النا. كعدت گدامنا، على وجهها ابتسامة. نارا: والله طلعت لذتك بكد ما گلت. دحگت لـ أيهم وأيهم ابتسم. أيهم: مو گلتلچ تخبل. نارا: ما شاء الله، تجنن. الله يحفظكم لـ بعض. مُلاذ: حياتي تسلمين. نارا: ليش ما جبتو أبيل وياكم؟ أيهم: باردة، عفته بالبيت. نارا: علي جان كيف عليه لو جايبه.

أيهم: أجيبه إن شاء الله. وين علي؟ نارا: خل أصيحه. گامت من يمنا انداريت لـ أيهم. مُلاذ: شگد حلوة. أيهم: مو أحلى منچ. ابتسمت وهو يدحگ لي مبتسم. اندارينا لمن جا ويا نارا طفل. نفسه يلي بالصور، ركض على أيهم فرحان. علي: بابااااااا. شاله أيهم يبوس بي. أيهم: روح أبوك. كعده بـ حضنه يبوسه حيل ويشمه. علي: وين أبيل؟ أيهم: ما جبته وياي. علي: ليش؟ أيهم: باردة يتمرض، بعدين أجيبه وأجي. شوف منو جبت وياي.

أشر عليه دحگلي علي، وأنا سويت له هلو. هو ابتسم سوالي نفس الحركة مستحي. ضحك أيهم وگله. أيهم: هاي الحلوة الخابصك بيها أبيل. مُلاذ: اوووو، طلعت معروفة. أيهم: ابني مستهتر، يسولف عنچ بكل مكان. مُلاذ: هههههه. گامت نارا فرشت سفرة. ما قبلنا لأن اتأخر الوقت بس أصرت وبقينا. تعرفت عليها بنية حبابة ونقية واضح من وجهها والابتسامة مرسومة على ثغرها. وابنها متعلق بيها كلش، كل شوية يبوسها. ظليت مبتسمة على منظرهم.

كملنا عشا وودعناهم وطلعنا من يمهم. صعدنا أنا وأيهم بالسيارة. دار وجهه الي دحگلي، رفع إيديه باسهن. أيهم: بردتي؟ مُلاذ: بس أطرافي. عصر أصابيعي بـ إيده وباسهم. رجع باس كف إيدي. مال راسه وخلا إيدي تحت خده، دحگ لي. ابتسمت ابتسامة ظاهرة أسناني. مُلاذ: أحب من تسوي هيج. أيهم: شسوي؟ مُلاذ: مادري، بس هسه من حطيت إيدي جوا خدك حركاتك، نظراتك بيها حنية. لزم إيدي وظل لازمها. شغل السيارة، فتح أغنية شمس.

ندحگت له عاصر إيدي بـ إيده ويسوق بـ الإيد الثانية. أيهم: عيون الناس تحسد كل حبيبين. يردوني أبتعد عنك وأعوفك. وإذا أنت جرح ما أريدك تطيب. أروف بصفك ولا ما أعوفك. رفع إيدي باسها. أيهم: من أحضنك أحضن الدنيا بـ إيديه. حبيبي وغالية عيونك عليّ. بسرعة الوقت صاير يخلص وياك. الهوا أنت و إذا رحت اختنگ. نزلت قطرات الندى على السيارة. مُلاذ: اهو، رح تمطر. وصلنا للبيت رحت لـ الحديقة. أخذت الغطا وطلعت ركض غطيت سيارتي.

أيهم هم غطى سيارته. لزم إيدي وركضنا. نريد ندخل رعدت الدنيا وزخت فوگنا. رحت وكفت بالباب يلي يودي لـ الشقة. مُلاذ: أكرهه المطر، أكرهه. أيهم: ليش تكرهينه؟ العالم تحب المطر. مُلاذ: ما أحبه من صغري. أيهم: ليش؟ مُلاذ: من جنت صغيرة جنت أتمرض بسببه وأظل أيام ما طالعة لـ الشغل. جان ضرره أكثر من نفعه. الناس يشوفونه حلو بس أنا أحسه يوم أسود إذا مطرت. أيهم: ذكرياتج كلها سيئة بيه؟ هزيت راسي بـ قبول. أيهم: تعالي.

لزم إيدي وطلعنا جوا المطر. مُلاذ: أيهم رح نتمرض. أيهم: نتمرض، بس رح يبقى موقف بـ عقلك للأبد. مُلاذ: يمه أيهم بارد. دهشني من بطني يفرني. مُلاذ: يمه أيهم وعلي نوگع. ضحك بـ صوت عالي وأنا لزمت بـ أكتافه وگمت أضحك. صرنا جنا زعاطيط نلعب بالمطر. وأنا فحطانه من الضحك. مو لأن الموقف مضحك بس بـ داخلي شعور حلو يخليني أضحك لا إرادياً. ملاك: ركضنا ع الشباك لمن سمعنا صوت مُلاذ وأيهم.

دحگنالهم من الشباك أيهم يشمر المي ع مُلاذ بـ رجله ومُلاذ ترجع تدفر المي عليه. فلت شالها همزين اكو سياج. فيروز: يا راح يتمرضووو. ودحگنا لـ مُلاذ أنا وأمي مصدومين. تضحك بـ صوت ولازمة بـ أيهم. ضحكاتها ضحكت طفلة. أول مرة أشوفها هيج تضحك. أيهم لزم إيديها يثبتها. رفع إيدها وظل يفرها وهي الابتسامة ظاهرة أسناني. دحگنا أنا وأمي لـ بعض مصدومين. أول مرة مُلاذ هيج تضحك وهيج تكون فرحانة. وكفت مُلاذ عكس أيهم ودخلت إيدها بـ ايده.

گاموا يكمزون ويفترون. أيهم: لعبيني وألعبچ، لا أكسر إصبعچ. مُلاذ: هههههههههه. رفعت عيونها مُلاذ لـ أيهم حضنت رگبته. أبيل واگف يمنا ويكمز يريد يطلع يمهم. رفعت ملاذ إيديها خربطت شعر أيهم. مُلاذ: ضحكت من كل گلبي. رغم شگد جنت أكرهه المطر، بس سوالف أيهم تفرحني. ثبتني وگال. أيهم: يلا كافي، خل نصير حبابين. مُلاذ: أيهم صرت جنك عصفور مهلس. أيهم: وأنتِ شعرچ انلطش على وجهچ والشال فلتم. مُلاذ: والله بردت يمه.

أيهم: يلجذابة تگولين ما أحب المطر، وهي رح تموت من الضحك. مُلاذ: أضحك على سوالفك. أيهم: عفا عليچ، مسويتني مضحكة؟ مُلاذ: ههههههه لا لا. ابتسم على ضحكتي وأنا لازمة بـ أكتافه بردانه وأرجف بس أحاول أوگف ولازمة بـ أكتافه. خلا إيديه على خصري. أيهم: ندخل؟ جسمچ كام يرجف. مُلاذ: خل نظل شوي بعد، أحاول أحب المطر. أيهم: يلا حاولي تحبي، بس دير بالج لا توگعين عَليّ وأنتِ تحاولين. حضن ظهري بـ إيديه وسند كصته ع كصتي.

مُلاذ: أحلى شي باجر نتمرض والله نشوف محبة المطر شلونها. ضحك أيهم وهو ساند كصته ع كصتي. أيهم: ديلا حَبي عاد مو جمدنا. مُلاذ: أعلمك شلون تجذب عليّ. عقابچ نبقى جوا المطر. أيهم: جوا المطر وياچ أحلى عقاب. مُلاذ: هههههه، ما يغزر وياك والله. أيهم: ابد، أحلى عقاب اتعاقبته. سكتت هادئة، گلبي أحسه كام يرفرف. وكل يلي بـ عقلي أيهم يحاول يغير الذكريات السيئة لـ ذكريات حلوة. اتذكرت مرة قريت نصوص كاتبهم أبوي بـ دفتر، دحگت بـ عيونه.

صرت گُتلة من المشاعر گدام أيهم. لزمت بـ كف إيده غمضت همست صوتي رايح. مُلاذ: ها، أنا أعلن هزيمة قلبي. فتحت عيوني دحگت له. كملت بـ نفس النبرة. مُلاذ: أحد نصوص ألياس. اتقربنا بـ نفس اللحظة وبسنا بعضنا. نسينا المكان يلي احنا بي. بـ وسط هذا البرد، دفو يحتل گلبي الثلج. ملاك: غطيت عيون أبيل بـ إيدي. گمت حلگي وضحكت وأمي تدحك بـ صدمة. فيروز: دوري وجهچ ولج، دوري وجهچ. ذولة فلتوا كلش، اتخزينا گدام الجيران.

ضحكت وأمي تدور وجهها وتستغفر. جرتني وياها تدور بـ وجهي. طردتني لـ الغرفة. أخذت إبيل ودخلت الغرفة أضحك على صدمة أمي وعلى منظرهم. اندامجوا كلش. مُلاذ: ابتعد أيهم يدحك بـ عيوني وأنا وخرت أحك بـ حاجبي. دحگ لي وضحك ضحكة ظاهرة أسنانه. اندارينا من انفتحت الباب عفت متون أيهم وعاف ظهري. انداريت دحگت أمي طلعت لنا بـ إيدها مناشف ومغطية روحها. ركضت علينا تنطينا مناشف وتگول لنا ندخل جو. دخلنا نركض وننشف رواحنا.

مُلاذ: يمه، رح أصعد لـ بيتنا. فيروز: اتدفوا اتدفوا. مُلاذ: تمام. أيهم: خاله، هسه أجي آخذ أبيل بس أنشف روحي. فيروز: على راحتكم، لا تصعدون ركض، لا تزلگون. هزينا راسنا بـ قبول وصعدنا. دخلت سبحت وطلعت نشفت شعري. رحت اتلفلفت بـ اللحاف بردانه. أيهم سبح ولبس، نزل يجيب أبيل. صعد أبيل يبجي وهو يسكت بي لأن شايفه من الشباك. دحگت لـ أيهم وهو هم دحگ لي بـ نفس النظرة. أيهم: وحدك شفتنا لو بيبي فيروز وملاك وياك؟ مسح دموعه وگال.

أبيل: وياي وأنت بس الحلوة. لطم أيهم كصته وأنا درت وجهي أسوي روحي ما أدري. أيهم: باجر من تمطر اطلعك وياي. أبيل: جذاب. همست: حتى ابنك عرفك جذاب. أيهم: انجبي. خزرته ردت له الخزرة. أيهم: أبيل اكعد بالصالة، هسه أشغل لك كارتون حتى بعدين تنام، اتفقنا؟ هز راسه بـ قبول. راح وهو يمسح دموعه. رفع عينه أيهم الي. مُلاذ: لا تدحگلي أنت بستني. أيهم: أنتِ هم بستيني، لا تجذبين. مُلاذ: أيهم معليه، أنت مستهتر.

أيهم: انجبي، فوصة. والله فواصتج هاي رح تموتيني. مُلاذ: والله مستهتر، بستني وذبيتها بـ راسي. أيهم: شگد أخلاقج سز. منو يگل لـ رجلها مستهتر؟ مُلاذ: ومنو يگل لـ مرته فوصة؟ انفتح الباب دحگت لـ أبيل گ. أيهم شال أبيل وطلع. مُلاذ: مستهتر. جريت غطاي ونمت. وهكذا مرت الأيام. ظلت سيارتي تتعطل بـ نص الطريق توگف بعد ما تشتغل. صلحتها أكثر من مرة، آخر شي كلش ضجت منها. كل يومية عاطلة بس ما أكدر أبيعها لأن هدية من بيبي.

حجيت لـ أيهم گلي بيعيها أحسن، صح هدية بس بعد ما تفيد. ما قبلت گلت أظل أصلحها حتى لو بس. أيهم كان له رأي آخر واشترالي سيارة. فرحت بيها، لونها أسود وحديثة. والسيارة الي اشتراها بيبي خليتها بـ كراج المكتب وغطيتها. أيمن وأيهم تصالحوا بس أيهم مثقل وجهه عليه. يگلي حتى يتعلم ما يحجي هيچ بعد. كل ما أسأله عن شي يخصه يطلع لي جواب يخليني محتارة أكثر. مرات ما يجاوبني.

أحياناً يظل أيام ما يرجع البيت بسبب شغلة وأبيل يظل يبجي يقطع روحه من البجي، متعلق بـ أبو كلش. أما نور وأركان فتمت خطوبتهم أخيراً. راح أركان خطبها من جسار بعد ما تحسن، لأن جسار منعه يروح بـ غير واحد. وگله اخطبها مني بس تصير زين. بس حارت نور بـ عزيز شلون تعوفه وحدة. لذلك قررت تأجل الزواج ويبقون مخطوبين. أما هتان وجسار فـ هذول الاثنين علاقتهم ما معروفة. جسار العصبي البارد وهتان اللطيفة الحساسة.

وعلاقتهم شبه قنبلة حاطيها اثنين بالوسط. هي تحبه وهو ما يحبها بس يكره يشوفها تبجي ومقهورة، ولا يتقبل شخص يحاول يأذيها. حسب ما عرفت من جسار هتان مراسلته ومعتذرة عن كلامها ويا يلي ما أعرف شنو كانو بـ نفس اللحظة حاضرته قبل لا يجاوبه. ملاك حسيتها بدت تتعلق بـ سلطان. دائماً تسولف لي عنه وعن الصار بينهم. وأنا أحاول أكون هادية وما أعصب عليها وأگول لها تبقي علاقتها بـ سلطان سطحية وأحاول أقلل التواصل يلي بينهم.

حسيت روحي كلش غلطت من خليت سلطان يوصلها لـ المدرسة ويرجعها. أما صافيناز وأيمن فـ أنقى حب شفته عيني. أيمن أكثر من مرة أشوفه يجون هو وصافي. صافيناز فرحانة بـ وجود أيمن. تدخل المكتب الضحكة تارسة وجهها. مرة شفتهم يتمشون بالشارع لـ المكتب وأيمن حاظنها ويبوس شعرها. اجت بـ يوم مريضة اجا أيمن وظل كاعد يمنا. كل شوية يوصيني عليها ويجيب أكل وعلاجات. منظرهم يخليني لا إرادياً أبتسم. غاده وباهر ملتهين بـ ابنهم أدهم.

طبعاً ألتقي بيها بس مو هواي مثل قبل. تجيني أيام أذكر طفولتنا أنا وياها وأضحك. شگد كنا وبعدنا متراهمين. جريت ورقة وقلم وبديت أرسمه. هوايتي يلي محد يعرف بيها ورسمي حلو بس ما أحب أراوي. المجر يلي بالميز مالتي بـ المكتب كله رسومات. اتذكرت أنا وأيهم شلون كنا جوا المطر. رسمت ابتسامة على شفتي ورسمت لساعات أنا كاعدة بالمكتب وأرسم. رفعت راسي لمن حسيت أحد يدحك وياي. دحگت لـ صافيناز گالت منبهرة. هتان: واوووو.

ضميت الورقة بالمجر ورجعت القلم بمكانه. مُلاذ: شنو واو؟ صافيناز: رسمك يجنن ليه ما تقولي؟ مُلاذ: شخبطة. صافيناز: ولك أي شبخطا بتجنن. ذول عم يرقصو جوا المطر ما؟ مُلاذ: صحيح. ضربت كتفي وگالت. صافيناز: وليه ما تقولي عندي رفيقة رسامة. رحت قبل أسبوع عند وحدة ع الانستا گلتلها بدي ترسم أيمن قامت گلت لي الرسمة بـ 35 ألف. عاد شدعوا گلت لها تمام لانو بدي رسمة لـ أيمن حبيب روحي. مُلاذ: والله تضحكيني من تحجين عراقي.

صافيناز: والله خيه شدعواكِ ترسمي بـ 35 ألف. شو أيمن بيتحرك بالرسمة وأنا ما بعرفو ولا بيخرج منها ويقلي بحبك. مُلاذ: هو أيمن زين من ما يطلع من الرسمة ويگولچ أحبچ يسويه يتلبس الرسمة. صافيناز: ما تحكي ع حبيبو لـ قلبي. نيالها الرسمة لو اتلبسها وصار بداخلهامُلاذ: أي حبيبو لـ قلبچ طالعة عينچ والله. صافيناز: عنجد مُلاذ شو في بينو وبين أيهم. كثير أيمن مزعوج وع طول حزنان، ليه هيك يساوي معو؟ هو شو ذنبو إذا أبو مش منيح.

مُلاذ: تعرفين بـ مشكلتهم؟ صافيناز: أي حكالي. يقلي أم أيهم مش أمي بس هي ربتني وأمي وحدة ثانية بس ماتت وأبو إنسان كثير سيء وكان بيأذي أمو وأمو بعدين مرضت وهو صغير كثير ومات. تقلت له رح آخذك جنبي، ما تخاف. من بعدها ماتت. تعبت شفتي مقهورة عليه. ما جنت أعرف ولا أيهم سولفلي. شگد يضحك ويشاقي بس مبين شايل حزن الدنيا كلها. مُلاذ: أيهم ضايج منه لأن يحجي هيچ. گول أكثر من مرة عادها عليّ وأنا أسكت له.

صافيناز: بس نجي للحقيقة، مكانة للأم ما بيتعوض لو مهما كان. مُلاذ: صحيح، بس أيهم ينقهر من يحجي هيچ. ترا هو يموت ع أيمن يگلي أنا معتبره ابني. مو أخوي وهو غير عن هتان وباهر. بس أيمن يقهره من يگله أمك مو أمي. صافيناز: هو بيعصب ويحكي هيك، هو يحكي لي كثير بيحب أمو لأيهم. ما بيكذب أيمن عليّ، يحكي لي كل شي. ضميت شفتي لداخل حلگي بـ عدم معرفة. عدت الأشهر. بـ يوم اجت أمي الي الصبح گلت لي نروح لـ المقبرة.

صار لها هواي ما زائرة أبوي مقهورة تگول. فيروز: تحلمت بي يگلي ليش ما تجيني. گلت لها العصر أخلص شغلي وأحاجي أيهم ونطلع أنا وياه. ما أخذتها من قبل وكل مرة نروح أنا أظل واقفة برا وأمي تدخل المقبرة. تدوس رجلي ع الگاع في سبيل ما أروح وأشوف گبره. مالي روحه اله قبل لا ألكى الچتال. مالي روحه اله ولا كعده يم گبره إذا ما خليت الچتال بـ المكان يلي يستحقه. نزلت أمي من السيارة ودخلت المقبرة. لزمت بـ السيارة.

أتمنى أروح وأشوف گبره وأكعد يمه وأشكي له بس إذا رحت أنهار. ومستحيل أرجع مثل قبل. خليت إيدي ع گلبي اليوجعني. أنا أعرف جوا ذاك التراب عزيزي بس ما أكدر أروح. كنبصت بـ الگاع سندت ظهري للـ سيارة وأيديا ع وجهي. يا روحها لـ مُلاذ يا گلبها. اشتقت إليك والله اشتقت، بس وعدتكم. مالي جيه إليك قبل لا ألكى الأخذك مني. وأنا بنت إلياس، عيب عليّ ما أوڤي بـ وعدي. گمت گعدت بالسيارة ونار مشعولة بـ صدري. اختنكت خنكة بس الله اليعلم بيها.

كتمت روحي وسكتت لحد ما اجت أمي وعيونها مورمة واضح باجية. أساساً كل ما تجي تشبع بجي. بـ مرور الأيام بديت ألاحظ أشياء غريبة تصير بيها. هواي أتقيأ وغثيان وصداع وعندي صعوبة بـ التنفس. جسمي دائماً نحلان بس اتغاضيت. بـ يوم طلعت من المكتب ورحت لـ المحلات أتسوق. نزلت من السيارة، هستوني نزلت. دوخت كلش، صرت گوه أجر النفس. اختنكت، حطيت إيدي على صدري. لزمت بـ بنيد السيارة أغمض حيل وأفتح عيوني. أحاول أوضح نظري.

رفعت نظري دحگت لـ الضويات المتغاوشة بعيني. فقدت سيطرتي وأغمى عليّ. فتحت عيوني دحگت أنا بالمستشفى وفوق راسي دكتور. -الحمد لله ع السلامة بنتي. لزمت راسي بـ وجع وحجيت. مُلاذ: شسوي هنا؟ -مغمي عليج بالشارع وجابوج لهنا. أتذكرت هزيت راسي بـ قبول. گمت أريد أكعد وهو بدأ يسألني أسئلة غريبة. ما افتهمت دحگت بـ وجهه وأنا أجابه. -بنتي، أنا أگول من الأفضل نسوي الج تحاليل. مُلاذ: ليش؟

-أفضل وإن شاء الله ماكو شي. بس من واجبنا المحافظة على صحتكم. مُلاذ: لا دكتور، ماكو داعي لأن تعبانة طحت. -مع ذالك خل نسوي تحاليل. مُلاذ: تحاليل شنو؟ -تحليل دم. بدأ يحجي لي عن التحاليل الأسويها. وفعلاً سويت التحليل. گلي انتظر على ما يخلصون. اتقدمت كعدت يم غرفة التحليل. صاح ممرض للدكتور وگلي من يطلع التحليل أدز له ممرضة تصيحه. هزيت راسي بـ قبول وبقيت كاعدة أنتظر. اتصل بي أيهم ما رديت أخوفه.

گلت له شغلي طول وهسه جاي أتسوق. سديت الاتصال، ظليت أنتظر. رفعت عيني لمن طلعت ممرضة صاحت اسمي. دحگتلها ورحت لها. أنطتني ورقة التحليل. ردت أگللها تصيح الدكتور بس بسرعة راحت. دحگت لـ التحليل، فتحته أقرا كل شي ما فهمت. رفعت عيني دحگت لمن اجت دكتورة بـ اتجاهي. استوقفتها. مُلاذ: دكتورة، أنا مسوية تحليل وما أعرف أقرأ. تكدرين تقرينه لي وتفهميني؟ أنا أعرف مابيه شي بس أغمى عليه والدكتور أصر أسوي تحليل.

الدكتورة: طبعاً، الاحتياط واجب. مادام طلب تحليل فـ معناها شك بـ شي. ابتسمت بـ هدوء وبقيت ساكتة. وهي اخذت ورقة التحليل تقرأ. ظلت عيونها تتمشى ع الكلمات وتهمس بيهم. رفعت راسها دحگت لي. -اعتذر ع يلي رح تسمعيه بس... هزيت راسي بـ معنى "شكو؟ الدكتورة: التحاليل تظهر أنتِ مصابة بـ الكانسر. عقدت حواجبي همست: كانسر؟ الدكتورة: يعني، أنتِ مصابة بـ السرطان... وسعت عيوني مصدومة. أحس عقلي جمد. نزلت نظري لـ ورقة التحليل.

رجعت نظري بـ صدمة ع الدكتورة...