رواية جرح الأيهم الفصل الثالث والأربعون 43 - بقلم أيلان

نشف شعري بالمنشفة، نزلها لشعري من جوا ينشف بي. اتقدم عليّ أكثر، رجعت لورا. انحصرت بالزاوية اللي يم الحمام. بلعت ريگي، غمضت عيوني. أيهم: شو فتحي عاينيلي بعيونك المكحلة. فتحت عيوني، دحگتله. النفس گمت گوة أجره. مُلاذ: أيهم والله انسطر وانثول. حباب عوفني، أدّوخ كلش. أيهم: بايسچ لو مخليچ تكبسلين؟ ضحكت وأنا راسي مسطور. گوة أفتح عيوني وهو ايده تتحرك على ظهري. تقرب عليّ أكثر بهدوء. غمضت عيوني حيل، كل ذرة بجسمي ترجف.

شگد أتخبل من هالشعور وبنفس الوقت حار. أريد أفتح عيوني وأدفعه لو أسوي أي شي. بسرعة همس وأنا مغمضة: "اشش مُلاذ، ظلي وياي." فتحت عيوني، دحگتله. نزل شفايفه عض حنجي بس مو حيل. وفوراً رفعهن وباسني. حاوط ركبتي بإيده مثل الخانگني. بس مرخي ايده كلش. ما أعرف إذا بادلته لو لا. حسيت بعد لا عندي ايد ولا رجل. رفعت ايدي على صدره أريد أدفعه. كمشها وأنا گبل فلتت. ثواني وابتعد وهو يضحك. فتحت عيوني أدحگله، فهيت وانثولت فرد نوبة.

أيهم: ها تريدين بعد؟ عبرت بسرعة من يمها. أحاول أتدارك الوضع وما أفهم. مُلاذ: لا تلح، شنو ما شايف عضيتني؟ أيهم: غير الصدگ. ما شايف هيج براطم حلوة ما عوّلت أبوسه. تنهد ويدحگلي بنظرات أدبسزية. أيهم: تعالي يمي. خزرته، درت وجهي. مشيت للباب مال غرفتي. لسا أحس جسمي منمل، انثولت. مدنّگة راسي، عيني بالگاع وأنا أمشي. ما حسيت غير على ضربة قوية بـ كصتي. عطّت بوجع، رفعت عيني أدحگ للبوابة. تصادر لمسامعي صوت ضحكته العالية.

دحگتله معصبة وخازرته. دخلت الغرفة مغلسة على الفشلة الصارت هسه. بدلت بسرعة قبل لا يجي. يوگف أريد أمشط شعري وهو دخل. بعده ما حاچي گلت: مُلاذ: كافي حباب. صفّك ايديه ببعضهم. ضحك بصوت. أيهم: شمسويلچ؟ مُلاذ: لا تبوسني أدّوخ. أيهم: هههههههه هاهيه مابوسچ بعد. بس لا تدوخين انتِ وتنركعين بالباب. مُلاذ: بالغلط لا تلزمها عليّ وتصير نحس. أيهم: لا يابه ما ألزمها. أهم شي ما تنركعين بالباب. دحگتله بعصبية. ضحك وأتقدم عليّ.

مُلاذ: الچذاب أم سوادي. أيهم: فوووصتي فوصتي فداچ الچذاب. أخذت المشط أمشط. أخذه من إيدي. شالني من خصري ومشا بيه لـ الجرباية. گعدني وكعد هو وراي، يمشط شعري. مُلاذ: لا تخربط شعري. أيهم: عفا عليچ والله عيب. إنه أخربط شعرچ؟ دعايني شلون رح أظفره. ظفر شعري وشده. أريد أقوم بس ظليت بمكاني لمن باس ظفيرتي. أتذكرت أبوي شلون چان يبوس ظفيرتي. ظل يبوس بيها، درت وجهي دحگتله. مُلاذ: كل شي تسوي يذكرني بـ بابا.

عاف ظفيرتي من ايده، يدحگلي بنظرات ذبلانه. گام من وراي بهدوء وطلع من الغرفة. عجزت أفهم شبي. كل ما أذكر موضوع أبوي يعوفني ويروح لو يبطل يلزمني. أخذت تلفوني لمن إجاني اتصال. فتحت التلفون دحگت للاتصال. من نور، أخذته وجاوبت. مُلاذ: الو. نور: عاش من سمع صوتچ ولج. مُلاذ: هههه تعذريني، ما ألحگ أجيك. نور: مُلاذ اسمعي، صارت أشياء. رح أموت إذا ما حچيتهن لأحد. مُلاذ: مبين من صوتچ الفرحان ويرجف. أركان شلونه؟ نور: زين زين.

مُلاذ: سولفي سريع أسمعچ. حچيتها وگمت وگفت گدام الشباك. دحگت لـ الحديقة، أيهم گاعد بيها. أكو حديقة برا محاوطة المكان اللي گاعدين بيه. مرات نگعد بيها. رفع تلفونه واتصل بشخص. ظل يحچي بالتلفون، رجع يدخن. ركزت مسامعي وي نور لمن حچت. نور: عمتي خاطبها العميد. مُلاذ: عزززة! اوگفي يمعودة، بـ هداي عليهن. نور: هههه والله ومساع چاي جسار. وهي گالتله وگالتلها أنا ما أعارض طبعاً. وحياتج هاي ومن حقچ تتزوجين. نفس كلامي اللي گلتللها.

وبعد أسبوع يعقدون. بس گالتلي باچر نجي ونسولفلكم. هسه من خابرتج ما گدرت أضم السالفة. مُلاذ: هههههه والله وطلعت نور وسه مو هينة. وگعت العميد على وجهه. نور: ههههههه لج أي. نوب ما أگدر أضحك گدامها. هي أصلاً خجلانة من تسولف. مُلاذ: خليها يمعودة تعيش حياتها. خطيّة كل شي ما شافت لا من أهل ولا تزوجت ولا عدها أطفال. گضت عمرها كله هي مداريتنا ومدارية بيبي. نور: أي والله مساع أحاچيها. گلتلها النسوان اللي بعائلتنا.

كل وحدة ضيمها شكل وما فد يوم ارتاحين. مُلاذ: صايبتنا اللعنة. نور: ههههههه أي والله. مُلاذ: عدچ بس أمچ المابيها خير مرتاحة. نور: لا هاي متنحسب من عدنا. مُلاذ: أتفق. نور: وأكو شي ثاني صار. مُلاذ: سولفي لا تشلعين گلبي. گعدت تسولفلي عن أركان والي صار وكلام جسار وياها. هي فرحانة لأن جسار گال اله هيچ. أنا عيوني صارت بـ گصتي. جسار يحبها ليش هيچ يسوي بروحه!

على الرغم من حزني على جسار بس كلش فرحت الها لأن هي تموت على أركان من صغرها. چانت هواي تسولف الي عليه. وأهلها حتى ما خلولهم فرصة. سديت الاتصال منها. دخلت على حساب جسار. دحگت ناشر صورة وگاتب: "ها أنا أعلن قلبي. ها أنا أعلن أن الجرح يمتد." نفخت بضجر وسديت تلفوني. دخل أيهم الغرفة، دحگتله. شمر باكيت الجگاير ونزع قميصه. سد الضوا، اتقدم شمر نفسه على الجرباية. نام على بطنه داير وجهه عني. عگدت حواجبي باستغراب.

دائماً يحضنني لمن ينام. عفته، درت نفسي ونمت. ثاني يوم رجعت العصر. ورحت لأهلي آخذ أبيل منهم. ما أخذته للروضة لأن ما گعد من النوم. دخلت دحگت عمتي موجودة. ونور مبتسمة وحاصرة ضحكتها. والكل مثل حالها، عرفت السالفة. دخلت سلمت وكعدت وياهم. لگيتها مسولفة الهم. وگالت بعد أسبوع يروحون يعقدون. كلنا فرحانين الها ومكيفين. فعلاً بعد أسبوع راحوا وعقدوا. دحگت لـ جسار اللي واگف يبارك لـ عمتي. تقدمت عليهم، سلمت عليه.

شوية وعافتنه عمتي راحت تحاچي نور. انداريت لـ جسار دحگتلهم: مُلاذ: ليش گلت لـ أركان يخطب نور منك؟ جسار: أبوها **** ما ينطيها. وماكو أحد يطلبها منه وأنا أكبر شخص وگلتله. مُلاذ: جسار غلط هالشي! تعذرني أنا هم أريدهم ينخطبون. بس ما أريد يخطبها منك أنت. ليش هيچ تأذي روحك؟ جسار: أنا ديرة محترگه. وهي طير بوسط هالديرة. خليها تطير بعيد عني لا تلوحها ناري. مُلاذ: زين شراح تستفاد؟ إجو وخطبوها منك شنو تستفاد؟

جسار: خطبوها مني ووافقت. عندي عذر بعد؟ لا خلص. أعيش اللي أعيشه بـ داخلي. وما ألومها على شي. مُلاذ: والله جسار يجي يوم وتجلطني. وهاي أكتبلكياها هنا. جسار: والله شايلة هم. مُلاذ: طبعاً أشيل هم. إذا أنت كل طركاعة تسويها أكبر من راسي. جر نفس من جگارته. ونزل ايده ساكت، زفر الدخان. گلت بحيرة: مُلاذ: وهتان؟ جسار: شبيها هتان؟ مُلاذ: ترا أعرف الصار بينكم. دحگلي ورجع نظره لـ گدام. جسار: تموت يمي هاي البنية.

مُلاذ: الله أكبر شطلع! مو رح أدگ على راسي. وحدة تحترگ يمك والثانية تموت. جداحة أنت وأنا ما أدري. زين على الأقل دحگ للبنية ترا هتان تخبل. جسار: بويه أنتِ شرايدة؟ مُلاذ: أريد أزوجك، كافي عزوبية. گمت ما تعرف تتصرف. جسار: گاعد على گلـبچ بت الأوادم؟ مُلاذ: گاعدة على خوانيچ مو بس گلبي. مو هذا ضيمك خنگني خنگ موتني. جسار: أنا أشرد من الهموم. تجي مُلاذ تحطهن گدامي. عمي وخري عني. لا أفرچ بـ راشدي خليني حاير بزماني.

مُلاذ: والله إلا أدورلك مرة، انتظرني. وأول مرشحة هتان. جسار: أگلچ هيدي مو تزوجتي وتسودنتيني عليّ. مُلاذ: جسار اتزوج حباب، خل نفرح بيك. جسار: عمي عوفيني، وين رجلك عنچ؟ دحگ يدور بعيونه. جسار: أيهم. انداريت دحگت، أيهم اندار النا. اجه باتجاهنا. أيهم: ها خيركم؟ جسار: ما تاخذ مرتك من يمي. أيهم: عفا عليك شبيك وي مرتي. جسار: مرتك اللي شبيها وياي. أيهم: ههههه ليش شسوتلك ولچ؟ حتى جسار ما سلم من إيدچ؟

جسار: تريد تزوجني ابنها أنام. مُلاذ: والله مو صوچك. أدورلك خوش قسمة بس أنت ما تريد. لا تظل بكيفك عزابي ع گلب أمك. جسار: من أريد أتزوج أخابرلچ وتدوريلي. مُلاذ: لا هاهيه، خلصت فرصك. ضحك وأنا هم ضحكت. رحنا شفنا عمتي تودع نور وتبجي. والعميد خالد يمها مبتسم. نور: عمه والله جبيرة أنا. وهم عزيز وياي قابل باقية وحدي. منارس: المفروض ما أعوفچ هسه. ابنج لساته صغير. خالد: لا يهمچ منارس، نروحلهم كل يوم.

أو تجيبي ابنها يمنا، شلون ما وده گلبكم. لا تشيلون هم، مستحيل أقطع تواصلكم وي عمتكم. مُلاذ: تسلم سيدي، الله يكثر من أمثالكم. مبروك ع الزواج وإن شاء الله تشوفون كل الخير. خالد: الله يسلمچ بنيتي، الله يبارك بيچ ويحفظلچ زوجچ وابنج. عباله أبيل ابني. ابتسمت وهزيت راسي. إجت عمتي حضنتني وتبوس بيه. باركت الها وبعد فترة رجعنا لـ بيتنا. أما أركان ونور. نور ما تريد أركان يخطبها بـ هالوقت. لأن عمي ميت وما مر سنة عليه.

مُلاذ: ترا الميت ما يرجع. إذا أنتِ توگفين حياتچ عليه. نور: بس عيب، إحنا أهله وحزنانين عليه! مُلاذ: ليش شدخل الحزن بالخطوبة! وإنتِ تعرفين مرة عمي محمد. إذا سمعت بـ خطوبتچ بالعكس تفرح. نور: چا عيب مُلاذ. مُلاذ: نور، آخر فرصة هاي، آخر فرصة. أنا من يمي گمت أخاف عليكم. خاف يصير شي هم ويبعدكم. نور: والله أنا هم خايفة بس عيب أحسم. مُلاذ: هي بس يخطبچ وين العيب. رفعت أكتافها بعدم معرفة. وحچينا مرة عمي محمد، فرحت لـ نور.

وگلتلها: "إنتِ مو غريبة وأعرفچ حزنانة عليه. لا توقفين حياتچ ومر الأربعين. اخطبوا وگملوا حياتكم سويه." بيت عمه منارس. بقت بي بس نور وعزيز. إجت أم أركان وحاجت عمه منارس. وطبعاً ردت عليهم بالموافقة. گالوا بعد كم يوم المشاية مال زلم. چانت الفرحة ما سايعة نور. ولازمة بـ إيدي مخليتها على گلـبها. كل شوية تروح تبوس راكان من فرحته. رجعنا للبيت ميتين تعب. أبيل من أخذناه من الروضة. چان كلش تعبان. وبسرعة نام بالسيارة.

دخلت غسلت وبدلت وأكلنا أنا وأيهم. من بعدها شمرت روحي بسبات عميق. فزيت على صوت أيهم. أيهم: لَـذه نامي عدل، حلمانه نامي عدل. تمتمت بأشياء ما أتذكره. بس چنت حلمانه بـ حروگ جسمي. ما أعرف حجيت شي عنها لو غير شي. فزيت من حسيت إيد تتلمس بطني. فتحت عيوني بنعاس، دحگت لـ أيهم. اللي مشخص عيونه على چويات بطني. أنامله تتحرك عليهم وتتحسسهم. همست: مُلاذ: عوفهم. رفع عينه، دحگلي ورجع عينه عليهن. لزمت ايده أريد أوخرها.

مُلاذ: ملمسهم مقرف، وخر إيدك عنهن. لزم ايديه بتك ايد و وخرهم. دنّك راسه بهدوء، طبع بوسات عليهن. ورجع باس أثر العملية مال گليتي. غمضت عيوني حيل. نفسه الحار صار عليّ. جسمي يقشعر لمن تنطبع بوساته فوگهم. حرّگت نفسي وأنا محبوسة جواهم. مُلاذ: أيهم لا ملمسهم... سكتت، فلتت إيدي خليتها على عيونه. يبقى هيچ بين الثانية والثانية يبوسهن. وأنا جسمي يجمد من الشعور. رفع راسه من بطني، دحگلي. أيهم: شصاير بيچ؟ شسوو بيچ؟

مُلاذ: أيهم خليني أنام. أنا بدون شي الگوابيس ملاحگتني. أيهم: حاجيني مُلاذ، شسوولچ؟ مُلاذ: ما رح يتحمل عقلك، اسكت. أيهم: اللي يتحمله جسمچ. وروحچ اللي تشبه روح طفلة. ما رح يتحمله عقلي؟ بلع ريگه وعيونه بينت بيها شرايين حمر. شوفه من التيبل لامب اللي مفتوح يم راسي. أيهم: احچي! مُلاذ: أيهم خاطفيني، يعني شنو يسوون الي؟ أيهم: احچي كل شي من البداية. وكيف كل شي صار. عاييني بعيوني واحچي. نزلت عيني وحچيت.

مُلاذ: چنا أنا وملاك بس بالبيت. انطفت الكهرباء، دخلت البيت لأن ملاك وحدها. وسمعت صرختها بصوت عالي. نزلت عيوني أريد أحچي. رفع وجهي بإيده. أيهم: لا تزيحين عيونچ. حسيت نفسي يرجف. ما أريد أتذكر المريت بي. ما أعرف عليش چاي يجبرني. مُلاذ: خطفونا، خلونا بـ مكان. كله نسوان گبار وأطفال وبنات مراهقات. ريحته قذرة وضواه طافي. عذبونا هواي وكان اكو أصوات ثانية. كل يوم يصير صوت رمي وصياح... حچيت اله كل شي. نظراته كل مرة تذبل.

لحد ما وصلت لـ الجزء اللي صعقوا بي جسمي. مُلاذ: أخذوني گعدوني على كرسي. چابو سطل بي مي، خلو بي أسلاك. بلعت ريگه، كملت بصوت يرجف. عيوني تحجرت بيها دموعي بس ما بجيت. بسرعة مسحت وجهي ورجعت گملت أدحگلهم. مُلاذ: صعقوا جسمي. رمش بثگـل، عيونه مملية دموع. نزلت دمعته على خدي. بقيت أدور عيوني وهو ساكت. ويرجع يخليني أدحگ بـ عيونه وأحچي. عيونه صارن حمر. ونظراته تذبل أكثر بـ كل مرة أحچي بيها. حسيته رح ينفجر إذا كملت أكثـر.

بس كل ما أسكت يكز على أسنانه. يجبرني أكمل. حچيت اله عن لمن حبسوني. وحچيت اله عن شعري اللي زينوه. عن الجثة اللي خلوها يمي لأشهر. ظل مشخص عيونه بوجهي. ودموعه نار تنزل على خدي ووجهي. حچيت اله عن لمن أخذوا گليتي. ومن بعدها المن بعوني ووين. وشنو صار بيه. كل هذا وهو فوگاي. إيد لازم بيها إيديه والإيد الثانية على بطني. رجعني لنقطة الصفر. ورجعت أتذكرت كل شي بوضوح. وحسيت كل شي يتكسر داخل روحي. حسيت داخلي متهشم وصدري اختنگ.

من بعد ما حجيت اله كل شي. بقى يدور عيونه بين عيوني. يريدين يطلعن من محجرهن. گام من فوگاي بسرعة. مُلاذ: وين رايح؟ أيهم: عندي شغل، نامي. اتأخرت. گعدت على حيلي بصعوبة. مُلاذ: شغل شنو؟ أيهم: بـ المستشفى. مُلاذ: بـ هذا الوقت! أيهم: امم. مُلاذ: تچذب عليّ؟ أيهم: لا. مُلاذ: وين رايح؟ أيهم: لـ المستشفى. مُلاذ: والله أنت أكبر جذاب. فتح تلفونه خلاه ع الميز. فتح حاچية سمعت صوت. جاوب واحد وهو يگول: -ها رماد؟ أيهم: مازن أنت وين؟

-ها... بـ المستشفى." أيهم: أعرف اللي وضع المريض شنو. ودزلي بـ رسالة، بعده تحت المراقبة مو؟ -أي." أيهم: استعجل وخلّيله مغذي. حچاها وسد الاتصال منه. اندار دحگلي. دار وجهه، بدل ملابسه. لبس كل شي أسود وخلا شڤقة على راسه. لبس جفوف سود. دحگتله مستغرب. مُلاذ: أيهم؟ اتقدم عليّ، باس شفتي بسرعة. اتقدم راح يم الباب. دار وجهه الي، دحگلي بنظرات ما عرفت أفسرها. وطلع. ما ارتاحيت أبد لـ حالته. گمت أريد ألحگه. دحگتله وهو يم الباب.

فتح الباب وطلع من البيت. درت وجهي ورجعت لـ الغرفة. ظليت گاعدة لـ الصبح أنتظره. خابرته ما جاوبني. رجعت خابرت مرة ثانية هم ما جاوب. بالمرة الثالثة صار الخط مغلق. انقلقت كلش. گلت يمكن اكو حالة طارئة بالمستشفى. وبقيت ألوب وحدي. دخلت غرفة أبيل. گعدت يم راسه، بوست خدوده. مُلاذ: أبيل يا حلو اكعد. بقى نايم، شلته بحضني. سويت مثل ما يسوي أيهم. أخذته للحمام، غسلت وجهه. فتح عيونه بنعاس ورجع غمض. رجعت غسلت اله مرة ثانية.

مُلاذ: أبيلو يلا كافي نوم اكعد. رفع راسه من متني. فتح عيونه بنعاس. ابتسمت ابتسامة ظاهرة أسناني. وبست خده حيل. مُلاذ: أحبك ولك. ضحك وگال: أبيل: إني هم. گعدنا تريكنا، وغسلنا. بدلت ملابسه ورحت أنا بدلت. لبست قميص أبيض، فوگاه سترة وردية. وبنطرون أبيض، وشال أبيض. لبست مناظري، أخذت جنطتي. صحت لـ أبيل. إجاني يركض وجنطته بـ ظهره. گعدت ع ميز صغير يم الباب مخلينه. لبست أبيل حذاءه (تكرمون) مُلاذ: انتظرني بالباب.

ألبس حذائي وأجيك. جهز راسه بقبول وطلع وكف بالباب. أخذت گعبي الوردي لبسته. وأنا ألبسه صار نظري ع الگاع. عگدت حواجبي مستغربة ومصدومة. مديت إيدي شلت الرصاصة اللي بالكاع. قريبة ع الباب. رفعتها من الگاع أدحگلها. رفعت راسي لمن صاحني أبيل. خليتها بـ جنطتي وطلعت من البيت. أخذت أبيل لـ الروضة وأنا رايحة لـ شغلي. سحبت الجنطة وأخذت الرصاصة. دحگتلها، أخذت سلاحي من الجنطة. الرصاص اللي بالمخزن المسدس كامل. ما عندي غيره.

أخذت وحدة من اللي بـ سلاحي. قارنتها وي اللي شفتها يم الباب. اللي يم الباب أكبر من اللي بـ سلاحي. وگفت السيارة ع الطريق. دارت عيوني باستغراب وحيرة. حچيت: مُلاذ: منين إجت هاي الرصاصة! نزلت عيني الها. تذكرت أيهم وهو واگف يم الباب البارحة. ازدادت العقدة ياي بين حواجبي أكثر. مُلاذ: أيهم! رفعت تلفوني بسرعة اتصل عليه. ما يجاوبني وتلفونه مغلق. الشي مو غريب على أيهم. خصوصاً نظراته الأخيرة اللي قبل لا يطلع!

عرف بـ كل شي صار الي. ما معقولة رح يدور على جماعة الچتال. والچتال اللي أنا بنفسي ما لگيته. ويريد ينتقم منهم ع اللي سووه بيه! مُلاذ: مستحيل منين يلقى الچتال؟ منين يريد يلقى!! درت وجهي جريت تلفوني. خابرت على أيمن. أكثر من مرة اتصلت ماكو أي جواب. بالمرة الأخيرة جاوبني أيمن. أيمن: يعني لو أنتِ لو رجلچ. تگعدوني من عز نومي! مُلاذ: أيمن لا تچذب عليّ واحچي بسرعة. أيهم البارحة خابرك راد عنوان شخص؟ أيمن: لا.

مُلاذ: لا تجذذذذذب. أيمن: يا يمه أذاني والله العباس لا. مُلاذ: أيمن شنو أسماء المستشفيات. اللي يداوم بيهن أيهم؟ أيمن: شمدري إنه. مُلاذ: غيرر اخووو؟ أيمن: أخو لو أمّه بويه شني السالفة. مُلاذ: كوم اسأل أمك. أيمن: وين الگى أمي هسه؟ مُلاذ: أيمن استعجل! أيمن: أوگفي شصاير؟ مُلاذ: عرف كل شي سوى بيه الچتال. بس ما معقولة رح يدور ع الچتال! أيمن: شنووو؟ اوگفي. الچتال شبي شسوى لـ أيهم؟ مُلاذ: ما سوى اله.

جريت نفس بتعب وفهمته الصار. مُلاذ: أنا ما جاي أكدر أتأكد. حتى من هالاحتمال. الچتال لا أنا ولا الشرطة لگيناه. أيهم طبعاً ما رح يلقاه! يا ربي. وين راح، أيمن... جاي أحچي وانسد الاتصال بوجهي. عگدت حواجبي مستغربة. درت سيارتي ورجعت من الطريق اللي جيت منها. أكيد أيمن رح يعرف مكانه. فترة ووصلت للباب. دحگت أيمن طلع من بيته. ردت أنزل أحاچي. بس هو بسرعة صعد بالسيارة. وشخطها ومشى. لحگته أسوق وراه. ظليت أتبعه.

فجأة سرّع سيارته وصار يدخل بين السيارات وأنا وراه. لحد ما ضاع من گدامي. خابرت عليه ما يجاوبني. لزمت راسي اللي صار يوجعني. رحت لـ شغلي ما بإيدي شي أسوي. أيمن غلق تلفونه وأيهم غالق تلفونه. ما يطلع الي لا موقعهم ولا شي. ومرت الساعات وأنا عقلي مو يم الشغل. كل شوية أتصل بـ أيهم يطلع الي مغلق. عقلي كلش تعب وأنا أنتظر. لحد ما فزيت على صوت اتصال. جريت تلفوني بسرعة. دحگت رقم أيمن. جاوبت بسرعة وهو حچى: أيمن: مُلاذ.

مُلاذ: شصار؟ أيمن: لا تخافين أيهم زين. مُلاذ: وين چان؟ أيمن: چان بالمستشفى والمريض اللي عنده وضعه خطر ما چان يگدر يجاوبچ.... المريض مات. وأيهم تعبان هسه جايبه للبيت وجاي. مُلاذ: أيمن حباب لا تچذب عليّ! أيمن: أي صحيح أنا أجذب عليچ. أيهم راح لـ الچتال ولحگت بـ آخر لحظة. ظليت ساكنة بمكاني ما گدرت أتوقع. ما گدرت حتى أخلي احتمال. لأن كلام أيمن چان حقيقة مو شقة. مُلاذ: يووو أيمن شمدري. تمام يلا رح أرجع للبيت. أيمن: تمام.

سديت الخط أخذت جنطتي. گلت لـ صافي تلغي كل الاجتماعات. وكل الشغل اللي عندي اليوم. وترجع لـ بيتها. رحت أنا للبيت. دخلت لـ الصالة. ثگلت خطواتي. دحگت الصالة عبارة عن گزاز ومتكسرة كلها. وحدة من القنفات مگلوبة وتحفية مكسورة. دحگت لـ أيهم بالكاع. متمدد بنص الصالة على ظهره. صدره يرتفع وينخفض. درت عيني. أيمن گاعد بالكاع مساند ظهره ع الحايط. لام رجليه لـ صدره، صافن ع الگاع. رفع عينه لـ أيهم يدحگله. نزلت دمعته.

ما فهمت شبيهم وشصاير. رفع راسه أيمن دحگلي. مسح وجهه. گام وكف بصعوبة. شفته مجروحة وحاچبه ينزف. اتقدم عليه. حچى بصوت ناصي: أيمن: أيهم اتأذى لأن مات المريض. وبالشارع تعاركنا وي واحد وتضاربنا. ولذلك وجهي هيچ. أيهم مقهور ع المريض. مُلاذ: تريدني أصدك الحچيته؟ أيمن: ليش ما تصدگين؟ مثلاً إحنا رحنا لـ الچتال؟ على حسب ما تگولين. الچتال الشرطة وإنتِ ما لگيتو. إني وأيهم رح نلقاه؟ مُلاذ: ما جاي أقصد هيچ طبعاً ما رح تلقونه.

بس عبالك صاير شي أقوى! أيمن: أيهم ينسحن گلبه من يموت المريض. ويطلع عن سيطرته. سكتت أدحگ بـ وجهه. تذكرت لمن أيهم گال إذا يومين ما نمت. أسوي أشياء خارج سيطرتي. هزيت راسي بقبول وأيمن راح. طلع وسد الباب. حچى أيهم بتعب. أيهم: أيمن لا تبجي لا تخاف. ما مات أنا أعالجه. إنسى اللي شفته أيمن. گلبي كام يدگ حيل من كلامه. حسيته طفل ويحچي، يوصي بـ أيمن. اتقدمت لـ يمه صرت يم راسه. دحگتله مغمض عيونه ويدمع.

خليت إيدي على خده مسحت دمعته. فتح عيونه دحگلي. عيونه حمر. واضح بيها شرايين عينه. مُلاذ: أنا يمك. خلا إيده على صدره. يأشر على نفسه ويبچي. أيهم: ما چان شي غلطي والله ما چان ذنبي. كله ذنبه هو هو السوى كل شي بس أنا تعاقبت. مُلاذ: أيهم أيهم دحگلي أنا يمك. أيهم: مُلاذ والله مو ذنبي. إني ما سويت شي. مُلاذ: أعرف مو ذنبك. إنت مالك ذنب بشي. أيهم: إني ردت أحميهم. ما ردت يصيرله شي. عابس شفتي يناشغ. وتنزل دموعه على جانب وجهه.

صدره ينزل ويصعد. أمسح دموعه وينزلن. أيهم: گلبي مات أنا. عبست شفتي ما بإيدي شي أسوي. وهو يدمع. حچيت بهمس. مُلاذ: منو أنت أيهم؟ شصاير بيك؟ فتح عيونه يدحگ لـ السگف. عيونه ذبلانة. حچى بتعب صوته مبحوح ويجر بالكلمة. أيهم: انــه... انه تَعب السِــنين. انه الما لَمه حضن دافي وحَـنين. رفع راسه من رجله. گعد على حيله، تجى ظهره ع القنفة. اتقدمت صرت بين رجليه. گام يشهگ ويحچي، يأشر على صدره. أيهم: اختنـ... ما گدر يكمل ظل يشهگ.

اتخبلت بعد ما أعرف شسوي. وهو گوه يجر النفس. ركضت اخذت اله بطل مي. لزمت راسه بإيديه وأحچي مرعوبة. مُلاذ: أيهم أيهم حبيبي الله يخليك. اشرب مي اهدء كوم خل نروح لـ المستشفى. هز راسه برفض يشهگ. لزمت البطل شربته مي. مُلاذ: أيهم حباب جاي أخاف. أيهم كوم خل آخذك لـ المستشفى. هز راسه برفض، يشهگ. گعدت أسوي مساج لـ صدره بإيدي. لحد ما رجع يجر النفس وخفت شهگته. درت مي بإيدي ومسحت وجهه. دقايق بقينا على حالنا.

مركز عيونه عليّ ويدحگلي. همس: أيهم: خل نتطلك. وسعت عيوني أدحگ بوجهه. مُلاذ: أيهم! لزم ايدي وسحبني اله من زندي بهدوء. أيهم: أريد أنام تعبت. مُلاذ: نام. هز راسه برفض ولزم گصته. أيهم: ما جاي أگدر. عقلي عقلي يأذيني. رح ينفطر يأذيني عقلي كل شي. تمتم ويحچي. وخرت ايديه من راسه. گمت وكفت وحچيت. مُلاذ: تعال. فتح عيونه ورفعهن يدحگلي. حچى بنبرة حسيته طفل. أيهم: رح تعوفيني؟ مديت إيدي اله. لزم بيها وگام بصعوبة.

مُلاذ: ما أعوفك أنا. دحگ بـ وجهي. نزل راسه خلاه ع چتفي. مُلاذ: تعال نام. حچيت ولزمته من أكتافه. گعدته ع القنفة. نزعت شالي والسترة. مشيت بصعوبة من بين الگزاز. رحت لـ الغرفة أخذت غطى ورجعت. لگيت أيهم يدخن وعلى گعدته. نظره ع الگاع. اتقدمت عليه، جرني من بطني. سندت نفسي ولزمت بـ تجوة القنفة. قبل لا أوگع فوگاه. نزلت بهدوء على رگبي بين رجليه. ووجهي گدام وجهه. مديت إيدي أريد أوخر الجگارة. لزمها ومنعني. لزم الجگارة هو ودارها.

قربها لـ شفتي. مُلاذ: ما أحب ريحتها. سكت يدحگ بوجهي. والجگارة بعدها گدام شفتي. راد يوخرها لزمت ايده وأخذتها. سحبت نفس منها لعبت نفسي. حسيتها حرگت بلاعيمي. راد ياخذها لزمت ايده ونزلتها. مُلاذ: لا كافي عوف التدخين. راسك يوجعك. تچى راسه ع القنفة ساكت. وأنا طفيت الجگارة وشمرتها بالنفاضة اللي يمه. رفعت النفاضة خليتها بالكاع. أيهم: وين رح تعوفيني؟ مُلاذ: ما أعيفك. تعال ننام. خليته يتمدد وأنا اتمددت يمه.

حضن بطني وحچى بصوت رايح. أيهم: لا تعوفيني. شدد لزمته عليه أكثر. خلا وجهه بـ صدري ونفسه حار. مسحت على شعره. خليت إيدي جوا راسه. وبالايد الثانية امسح شعره. نزلت إيدي خليتها على لحيته. دحگتله بحزن. أحسه عايش أشياء أبد مو سهلة. وطول اليوم يتحمل أنواع الحالات بالمستشفى. لمن يوصل يمي يطلع كل تعبه ويصير مثل الطفل. لزم زندي يتحسسه وهو مغمض عيونه. رجع ايده يمشيها على رگبتي. شالها من رگبتي خلاها على خصري.

وحضنني أكثر، يقربني اله. شال ايده من بطني. فتح عيونه دحگلي. لزم ايديه باسهم. حيل. رجع لزم تشيرتي. رفعه من يم بطني. قشعر جسمي لمن خلا ايده ع الچويات. وخياط العملية. تمنيت لو موخرتهم بـ عملية تجميل. ولا مخليته يشوفهم. ظل يتحسسهن وعينه عليهن ويدمع. مسحت دموعه وهو حچى: أيهم: شلون تحملتي؟ مُلاذ: إنساهن أيهم، نام يلا. تعبت لأن صارلك هواي گاعد. أيهم: ريتهم بيّ ولا بيچ. مُلاذ: اسم الله شگافي نام. أيهم: احرگي الاخضر واليابس.

احرگي العالم كله حتى وإن كنت أنا بي. مُلاذ: أحرق العالم كله. بس قبلها أطلعك من بين هالعالم. ونشوفه شلون يحترگ سويه. رفع عيونه دحگلي ورجع غمضهم. رجع فتحهم ويغفي. مُلاذ: نام جاي تغفي ليش ترجع تفتح عيونك. أيهم: أريد أحفظ عيونچ. مُلاذ: ميخالف نام ومن تكعد دحگهن. أيهم: تروحين؟ مُلاذ: ما أروح والله يمك أنا. غمض عيونه، غطيته أكثر. لحد ما نام وغفى كلش. بقيت يمه. نزلت راسي بست خده. گمت بهدوء. لميت الگاز المتطشر وكنست الصالة.

تذكرت أبيل. خابرت على أيمن يجيبه ويجيني. نظفت البيت كله وأيهم غافي. كل شوية تروح عيني عليه وأصفن. تطن جملته براسي لمن گال: "انه... انه تَعب السِــنين. انه الما لَمه حضن دافي وحَـنين." كملت تنظيف، بدلت ملابسي. رحت گعدت يمه بالكاع. سندت راسي ع ايديه. ظليت أدحگله وهو نايم. ملامحه مبين بيها التعب حتى وهو نايم. شگد يتشاقى ويضحك ويخنگني بسوالفه. بس بعدين ألقاه تعبان حتى لو ما يحچي. من ملامحه واضح. ومن نظراته.

كل ما أفز بالليل. ألقاه گاعد گدامي ع الكرسي يدحگلي ويدخن. لمن أسأله: ليش گاعد هيچ وتدحگلي؟ يجاوبني: ما گدرت أنام. و ما عندي شي أفضل من إني أتأملچ وأنتِ نايمة. ابتسمت أدحگله لمن أتذكر كلامه. الشخص الوحيد اللي حبني هيچ أبوي. وهسه بس أيهم أحس بحبه صدق. درت وجهي لمن اندگ الباب. گمت بسرعة لبست شالي. وفتحتها ما أريد أيهم يفز. دخل أبيل يريد يصيح، سديت حلگه. مُلاذ: بابا نايم. هز راسه بقبول. شلته بوست وجهه وخدوده.

دحگت لـ أيمن، داير وجهه منّي. مُلاذ: ادخل. أيمن: لا خل أروح يلا مع السلامة. حتى ما خلاني أحچي. حچى بسرعة ونزل راح يمّنا. عگدت حواجبي باستغراب أدحگ وراه. درت وجهي، دخلت جوا. نزلت أبيل بالكاع. مُلاذ: أنا ما مسوية أكل تنتظرني مو؟ أبيل: أسوي وياك؟ مُلاذ: تعال يلا بس أول شي بدل وغسل. هز راسه بقبول. أخذته للحمام غسل وراح لـ الغرفة بدل. خذته وطلعنا من الغرفة. گعد ع الميز. صفنت شنو أسوي غدا. خابرتني امي، جاوبتها.

مُلاذ: ها أمي. فيروز: مُلاذ خو ما صاير شي؟ مُلاذ: لا، ليش شكو؟ فيروز: أنا چنت طالعة رحت لـ السوك أجيب قماشات أريد أخيط. إجا جسار أخذني. وملاك تگول سامعة صوت تكسير من بيتكم. مُلاذ: لا ماكو شي. فيروز: اكيد؟ مُلاذ: أي. فيروز: لعد شنو هالصوت؟ مُلاذ: أبيل يلعب بألعابه ويطلع أصوات عالية. فيروز: ها خوش عبالي صاير شي. مُلاذ: لا ما صاير، بالليل أنزل أشوفكم. وهم ردت أسوّگ الكم، تحتاجون شي؟

فيروز: ننتظرچ، لا يمه سلامتچ ما نحتاج. مُلاذ: تمام إذا ردتوا شي خابروني. فيروز: تمام. سديت الاتصال. ورا ثواني رجعت امي اتصلت مرة ثانية. مُلاذ: ها فوفو. فيروز: أگلچ مُلاذ تغديتو؟ مُلاذ: لا ليش؟ فيروز: بقى دجاج وتمن أحمر هواي. ردت أصعد الكم بس نسيت. إذا ما ماكلين تعاي خذيه. مُلاذ: يعني والله العظيم. إنتِ أكبر شخص منقذ شفته بحياتي. هسه صفنت شنو أسوي غده وخابرتيني. فيروز: هههههه تعالي يلا. مُلاذ: أجيت. جسّدت الاتصال.

انداريت لـ أبيل دحگتلهم: مُلاذ: فنك وين نروح؟ أبيل: وين؟ مُلاذ: لـ أمي تعال ناخذ منها الغده. أبيل: بيبي فرنوزه. فحطت من الضحك، يعرف اسم امي فيروز. ويسمعني مرات أصيح الها فيروزة. ما يعرف يلفظ عدل فـ يگول بيبي فرنوزة. شلته نزلت من الميز. لبست عبايتي. نزلنا أنا وأبيل، دگينا الباب ع بيت أهلي. طلعت الي امي بإيدها الجدر. وبالايد الثانية صينية مال دجاج. دحگتلها بطني تقرقر من الجوع. مُلاذ: بويه معت باع الريييحة.

فيروز: ههههههه دوم أحسب حسابكم إنتِ وأيهم. مُلاذ: تدرين بأكلي يسوي تسمم. أقوى شي أعرف أسوي حميسة دجاج. فيروز: ما خليتيني أعلمچ ع الأكل. مُلاذ: اللي خلك يا فوفو. بس لا تخافين من انخطفت علموني كل شي. حتى غسل الزوالي. سكتت امي، مختفية الابتسامه من وجهها. مُلاذ: اضحكي يمعودة. لا تندميني لأن ذكرتج. ابتسمت ساگته. فيروز: بالعافية. مُلاذ: الله يعافيج فيروزه. أبيل: بيبي فرنوزه. ضحكت امي ودنكت گصت خدود أبيل.

تبوس بي منا ومنا وتگله ينزل يمهم من يضوج. صعدنا أنا وأبيل، دخلت خليت الاكل. دحگت لـ أيهم ما ردت أكعده. وگلت أبيل وأنا ما أكلت بقيت منتظرة أيهم. خلص أبيل، غسلت اله وراح يتمدد بغرفته. دحگت لـ أيهم، رفعت الغطى ونمت يمه. تحرك وخلا وجهه بـ صدري وكمل نومته. ظليت على هالوضع لحد ما غفيت نعسانة. گعدت لمن حسيت بشي ع شفتي. فتحت عيوني بنعاس، دحگتله أيهم. الصالة ظلمه وأنا بردانه. شديت الغطى الي أكثر وهو ما ابتعد.

يحرك بشفته ع شفتي بهدوء. ظليت ساكنة بمكاني مثولة ومسطورة. عابت الج مُلاذ. كل عمرچ تگولين عن روحچ ثگيلة. وأنا بس يلزمني أيهم أنسطر سطر. ما يبقى بيه ذرة ثگل. وأخاف أبادله وياخذ الواهس. أيهم دوم لو وجهه حار لو رگبته لو صدره. دمه حار وأنا على طول جسمي عبارة عن ثلجة. وأطرافي كلش باردات. هو عكسي تماماً. من يحضني أحس روحي حاضنة صوب. مُلاذ: أيهم اختنگت. بس حجيت باسني. عباله أنا نايمة ومن سمع حسي انطلق.

لزمت بـ زندة حيل عصرته بإيدي. لمن زاد ضغط أيهم عليّ. أول ما بعد وجهه من وجهي حجيت بسرعة. مُلاذ: لا تأذيني. أيهم: نار تچوي گلبي أذيتچ. مُلاذ: شلون صرت؟ أيهم: ليش؟ مُلاذ: الصبح چنت تعبان كلش غير؟ أيهم: شوكت؟ مُلاذ: الصبح. أيهم: ما أتذكر شي؟ مُلاذ: ترا چنت تعبان وكسرت كل شي. وظليت تحچي وتمتمت بعدين اختنگت. ما أعرف شصار بيك! حچى بفزع: أيهم: شحچيييت؟ مُلاذ: ما حچيت شي. بس تگول أيمن لا تخاف وتگلي لا تعوفيني.

گام گعد على حيله لزم راسه بتعب. گمت گعدت أنا هم دحگتلهم. مُلاذ: شكو؟ أيهم: ما أعرف ما أتذگر. مُلاذ: أنت دوم هيچ؟ أيهم: أي. مُلاذ: ليش؟ أيهم: من ما أنام أكثر من يوم. مرات توصل بيه أكثر من 3 أيام. غمض وفرك وجهه وگمل. أيهم: وهذا الشي صعب كلش على عقل الإنسان. اللي ما ينامون أكثر من يومين ممكن يتخبلون. وتصير أفعالهم مو متوازنة ويتعبون. خليت إيدي على خده وحچيت. مُلاذ: وانت؟ فتح عيونه دحگلي بنظرة تعبانة. أيهم: إني...

إني عقلي يرجع لـ ذكريات قديمة. حك رگبته وحچى. أيهم: يربط بينهم وبين الواقع. وأحس نفسي بالموقف اللي أتذكره. مُلاذ: دوم تنسى تصرفاتك؟ أيهم: لا مرات أنساها. مرات من أنام وأكعد أتذكر. هزيت راسي بقبول ساگتة. گمنا أكلنا أنا وياه. وأبيل گعد. ردت أروح أجيب مسواك لـ أهلي. أيهم ما خلاني لأن دنيا ليل. طلع هو يجيب. راح أتسوك النا ولهم ورجع. بعدين نمنا بس أيهم بقى گاعد. ثاني يوم رجعت من شغلي. أيهم ما موجود، سويت غدا.

وكعدنا أكلنا أنا وأبيل. لـ الليل خابرت أهلي يصعدون يمي. حسيت نفسي رح أموت من الملل. وأيهم ماكو بالمستشفيات يفتر. گعدوا امي وملاك بالمطبخ. وأبيل گاعد ع الميز بيناتهم. رحت گعدت يمهم. فيروز: أسوي الكم حلاوة؟ مُلاذ: لا لاتتعبين روحچ. گوليلي شلون تسويها وأنا أسويها. فيروز: لا هسه أنا أسويها. عدكم مواد؟ مُلاذ: أي أيهم كل شي يجيب. نحتاجه والما نحتاجه. البارحة مو طلع يتسوك. فيروز: أي؟ مُلاذ: من رجع لگيته جايب أكل مال بزازين.

أگله شنسوي بيه إحنا ما عدنا بزونه. يگلي شفته رخيص جبته. خلاني ألطم. فيروز: هههههههه يحسب حسابك. گامت امي تسوي الحلاوة. وشوية وسمعت صوت الباب انفتح. وقبل وراها صوت أيهم العالي. أيهم: لَـذه الفووووصه وينچ؟ دحگت لـ امي وملاك. انحمست وجوههن من الضحك. ونوب هو مستمر يصيح. أيهم: مرتي مرة بزون عدها سبع عيون. ملاك حطت ايدها على حلگها. وأبيل خلا امي تنزله وراح ركض لأبو. طلعت ركض ورا أبيل. قبل لا يحچي أيهم شي ثاني سديت حلگه.

مُلاذ: الله يخزيك. أهلي عدنا. رفع حواجبه وأنا سادة حلگه. ضحك، باس كف ايدي. أيهم: خل أسلم عليهم. مُلاذ: امشي يالبزون. أيهم: ما عيب عليچ تسميني بزون؟ مُلاذ: مو أنت تگول. مرتي مرة بزون عدها سبع عيون. بس الكدامي مو بزون عتوي. اهتز جسمه يضحك. دخل يسلم ع أهلي. لـ الليل كلش إحنا گاعدين سويه ونسولف. بعدين نزلوا لـ بيتهم. عدت الأيام وإحنا نركض بـ خطوبة نور. باچر يجي أركان وي ناس مشايه عليها. ويخطبها من جسار.

بعدها يمشون بسالفة العقد والزواج. رحت الصبح الهم، نظفنا البيت وبخرنا ورتبنا المكان. انداريت لـ راكان اللي يبجي بإيد نور. وهي حايرة بي. مُلاذ: شبي؟ نور: مادري والله رح أبجي. هسه شبي يبجي غير أعرف. مُلاذ: صابه اكتئاب من عرف امه رح تتزوج. نور: يمه ابني حبيبي خيوولي الزواج. ما أريده إذا راكان يظل يبجي ما أتزوج والله. ركوني حبيبي والله ما أتزوج. هاي أكعد يمكم. مُلاذ: عمي و العباس أنت أكبر فطيرة.

من كل عقلچ الطفل يبجي ع الزواج. نور: شمدري غير أنتِ تگولين. أخذت راكان من ايدها وحچيت. مُلاذ: مصيبتكم تصدگون بكل شي أگوله. ضحكت نور وأنا أخذت راكان وطلعت. نور: وين؟؟ مُلاذ: جوعان لذالك يبجي. نور: ياااا صدگ نسيت أشربه حليييب. مُلاذ: حايرة بـ حبيب الروح وين تذكرين الطفل. عگدت حواجبها وگالت: مُلاذ: مُلاذ. ضحكت وعفتها، رحت لـ المطبخ. أحضر حليب راكان. جاوبت لمن إجاني اتصال من أيهم. أيهم: لَـذه. مُلاذ: ها.

أيهم: وينج شجاي تسوين؟ مُلاذ: بعدنا نحضر أنا ونور. بعد شوي رح تجي المشاية. أيهم: چان سوو عقد فد مرة؟ مُلاذ: نور ما تقبل تگلي عمي هستوه ميت. أيهم: نور اگعدي راحة. واعقدي. مُلاذ: مو يمي ما تسمعك. أيهم: منو يمج؟ مُلاذ: بس أنا وركوني. أيهم: ركوني ياهو؟ مُلاذ: راكان ابن نور. أيهم: شنو خنكتي الطفل شو ما إله صوت؟ مُلاذ: لااا جاي أسوي إله مميه. أيهم: دربالچ لا يتسمم. مُلاذ: الچذاب اسمه ولا أجذب عليه ابو الگذب.

أيهم: الفوصة ام المصايب. مُلاذ: والله أنت أبو المصايب. أيهم: اشش يلا افتحيلي كاميرا خل أشوفكم. مُلاذ: تحلم. أيهم: ليش أحلم هذا ويا بيت نور. أجيچ وأشوفچ. مُلاذ: اهو يلا رح أفتح كاميرا. أيهم: سباعية. فتحت اله كاميرا، دحگتله. مثبت التلفون بالسيارة يسوق. وأنا شايلة راكان بإيد. وأسوي حليب بالايد الثانية. أيهم: يوم التشيلين ابننا هيچ. دحگتله ورجعت عيني ع المميه خضيته. مُلاذ: لا تتأمل ما رح يصير عندك طفل مني. أيهم: ليش؟

مُلاذ: ما أريد. أيهم: افا لَـذه ما عرفتج تخافين من الحلم. مُلاذ: ترا جاي أحچي صدگ. أنا ما أريد طفل ولا رح أولد طفل. أيهم: يعني ما تريدين طفل يربطنا ببعض أكثر؟ مُلاذ: لا ما أريد. أيهم: تمام، عندي شغل رح أروح. مُلاذ: روح. حسيته ضاج بس قابل أجذب عليها. خذت تلفوني سديت الاتصال. نومت راكان بمكانه وانطيته المميه وغطيته. لـ العصر إجوا أهل راكان. وإحنا خابرنا لـ جسار گالنا: جسار: جايكم بالطريق. سدينا الاتصال ننتظر.

راح عزيز يتعذر منهم. لأن رح ينتظرون جسار شوية. ونور ميتة من التوتر روحها تريد تطلع. خابرني أيهم. مُلاذ: ها ايهومه. أيهم: ما عيب عليچ. رجال شگدني شگبرني تگليلي ايهومه؟ مُلاذ: عبالي زعلت مساع. أيهم: عليمن؟ مُلاذ: ع سالفة الطفل. أيهم: إني هم ما أريد. على يا ضيم نجيب طفل. مُلاذ: أنا هم هيچ أفكر. أيهم: لَـذه إني بـ بيت نور. مُلاذ: شتسووي؟ أيهم: مشايه وي أركان. مُلاذ: يوول ليش ما گلتلي؟ أيهم: أسويلچ مفاجعة.

مُلاذ: هههههه صدگ مفاجعة. ضحك وگال: أيهم: تعالي أشوفچ. مُلاذ: أجيت. سديت الاتصال وطلعت. دحگتله مبتسمة. مُلاذ: زوجي الچذاب. أيهم: مرتي الفوصة. مُلاذ: مو تفشل أركان مثل ما سويت من اجيت تحاچي امي وتگله أركان يحب بتكم. أيهم: هههههههه متفقين. ابتسمت ظليت شوية يمه. بعدين دخلت جوا سألتني امي وين رحت. گلتلها أيهم جاي وي أركان. خلتني أخابره وطلعت سلمت عليه. دخليت لگيت نور صايرة حمرة وايديها يرجفن. مُلاذ: يا ولج اهدي شجاج.

نور: خاف هم تخرب. مُلاذ: لا ما تخرب إن شاء الله. نور: جسار لسا ما إجه. مُلاذ: هسه يجي انتظري. سكتت وهي تعض شفتها ولازمة ايد بإيد. فعلاً تأخر جسار. رفعت تلفوني خابرته. مُلاذ: وين صرت عسى ما شر؟ جاوبني وصوته تعبان حيل. جسار: جاي. أريد أحچي ما سمعت غير صيحة. وصوت ضربات قوية، مثل شي يتكسر وينگلب. من بعدها صار هدوء تام وأنا موسعة عيوني. گلبي ينبض بخوف، روحي راحت. خفت أنطق وما يجاوبني. حچيت بنبرة خوف. مُلاذ: جسار؟

رجف كل جسمي من ما جاوبني. رجليه ماتن وكفت بصعوبة. النفس ضاگ بـ صدري. مسّت مرة ثانية متمنية يجاوبني. مُلاذ: جسار تسمعني؟ ما جاوب روحي راحت. جمدت بمكاني. ايدي ترجف طيّحت التلفون منها. الكل يركضون الي ويسألون شصار. لزمتني امي تخضني بإيديها وتسألهم. مست صوتي رايح كل جسمي يرجف. مُلاذ: جسار... جسار سوا حادث...