رواية جريمة عشق الفصل الحادي والثلاثون 31 - بقلم مريم نصار

في المستشفى.. تيم واقف في آخر الطرقه وشاف فهد جاي بسرعه.. لكن رد على جيسيكا.. وتيم لما شاف الصدمه على ملامح فهد.. قرب منهم عشان يطمن.. لكن سمع آدم مراد.. وهو بيقول بصوت غضبان.. "ممكن حد يفهمني.. مين هي جيسيكا. وليه تخطف آرين وتالين.. عايز أفهم..!! ومراد.. أخد فهد و آدم في أوضة وبدأ يحكي لآدم قصة جيسيكا والمأمورية..

تيم قرب من الأوضة بحذر.. وسمع كل كلمة قالها مراد لآدم.. وكان آدم بيستجوب مراد.. بتركيز كبير كأنه بيحقق معاه.. وعرف كل حاجة عن جيسيكا.. وتيم كمان.. وبعد كده تيم سمع مراد.. وهو بيقول.. "فهد ركز معايا.. عشان نعرف نفكر هنعمل إيه؟ جيسيكا قالتلك إيه بالظبط..؟! وفهد قال.. "إن جيسيكا عايزاه هو ومراد في القصر بتاعها.. وفي خطر على البنات وهتشغلهم في طريق غير مشروع…!!!

وتيم حس إن حد خارج واستخبى بسرعة.. وشاف آدم مراد.. خارج بسرعة كبيرة.. ومراد نده عليه كتير ومردش.. تيم.. قبض على إيديه بغضب من كلام جيسيكا.. واتحرك بسرعة يجري ورا آدم.. وراح عند الجراش.. وشاف آدم راكب الريس.. وساق بجنون.. ومهما تيم ينده عليه مبيردش.. تيم نفخ بخنقة.. واتنرفز.. ومش عايز يقف متكتف.. ودخل المستشفى.. وماشي في الطرقة. سرحان بيفكر.. لكن وقف مكانه لما سمع مراد بيقول لفهد..

"اللي هينفع يسافر معانا هو آركان..!!! وتيم قرب من الباب بشويش وسمع الخطة…!!! فهد بزهول.. "آركان.؟ أنت بتقول إيه يا مراد.. لأ لأ أنا مستحيل أضحي بأبني. وبعدين آركان في الكلية.. يعني مش هينفع من جميع النواحي أنه يسافر معانا.." مراد.. "يبني اسمع وافهم بس.. أنت عارف إن جيسيكا مش غبية.. وأكيد مراقبانا كويس جداً.. بدليل أنها خطفت البنات انهارده بالذات.. فكر فيها كده…!!

الدكتور محمد ونور مسافرين،، وأنا وأنت وآدم في الشغل. وآركان في الكلية.. والعيلة عشان تيجي لآرين لو حتى مش هتخرج فيها لبعد الضهر مثلاً.. يعني وقت مدروس من جيسيكا واللي معاها… أنت شوفت في الكاميرا.. اتنين رجالة وبنت. وأنها أكيد سابت دليل عشان تخلينا ندور ونبذل مجهود على الفاضي. وفي الآخر هي تكلمك وتقولك أن البنات عندها.... ده غير بقى أكيد هي مأمنة نفسها أكتر من كده.. وهي عايزاني أنا وأنت بس..!!

لأن آدم زي ما قولتلك في شغله ومش هيسافر غير بإذن من الجهاز.. وآركان صعب يسافر.. إحنا بقى نشتغل على النقطة دي وعلى طريقتنا.. وخصوصاً إن آركان الوحيد اللي هيفيدنا في سرعة الحركة. لو لاقدر الله حصل حاجة.." فهد بإحباط..

"أنا معاك في كل ده.. بس أنا مش عايز أعرض آركان للخطر يا مراد.. مش هنكدب على بعض.. جيسيكا عندها حرس مدرب واكيد عددهم كبير.. وآركان لسه في تانية كلية يعني مش مؤهل لمهمة خطيرة زي دي.. اء.. أنا مش عايز اخسرهم يا مراد.. كفاية الرعب اللي أنا فيه على آرين.. مش هيبقى آرين وآركان..!! مراد.. ربت على إيد فهد.. وقال..

"أنا حاسس بيك يا فهد. لكن أنت ديما بتدعم آركان.. وده وقت الدعم الحقيقي.. إحنا في كارثة حقيقية يا فهد.. ومفيش قدامنا حل تاني..!!! فهد.. مسح وشه بإيديه ونفخ بحيرة.. وقال.. "يا الله.. ماشي يا مراد إيه هي خطتك..؟! مراد..

"هقولك.. إحنا دلوقتي هنروح الجهاز. ناخد إذن السفر.. ونطلب من مدير الجهاز إننا لازم ناخد آركان معانا. وعايزين إذن 48 ساعة. ولو وافق وأنا متأكد أنه هيوافق إن شاء الله.. هطلب منه تعزيزات أمنية.. زي صديري واقي وسماعات بلوتوث.." فهد هز راسه تمام.. "ومتنساش أجهزة تتبع وكمان جهاز تشويش.. وسلاح.. لازم نكون واخدين احتياطنا كويس جدا يا مراد.. لكن بالتعزيزات دي آركان هيحتاج طيارة خاصة..!!! مراد هز راسه فعلاً..

"أنا هتصرف مع مدير الجهاز متقلقش.. ويارب يوافق.." فهد بحدة.. "ليه ميوافقش..؟!! متنساش إن آرين وتالين في خطر بسبب المأمورية دي.. يعني بسبب شغلنا.. ماينفعش ميوافقش يا مراد..!!! مراد شاف نرفزة فهد.. وفكر أنه يروح الجهاز لوحده عشان ما يحصلش مشادة والأمور تتعقد أكتر من كده.. وقال.. "يابني أنا بقول يارب يوافق. وهيوافق أكيد..!!! فهد بيهز رجله بنرفزة..

"طيب يلا بينا عشان نلحق ننفذ.. واتصل تاني على آدم.. لأنه مبيردش عليا.. وفون مراد رن وكانت مكالمته مع زين.. اللي تيم سمع رد مراد عليه.." مراد.. قفل مع زين.. وقال لفهد.. "آدم سافر ولازم نلحقه..!! تيم فتح عينيه بدهشة.. "معقول آدم سافر..!!! وسمع صوت مراد خارج.. واستخبى بسرعة.. وبعد كده شاف فهد خرج وراح ع أوضة رينو وفريحة.. وقال لنفسه..

"أنا لازم ألاقي حل بسرعة.. وراح ع مكتبه وقفل الباب.. وفضل رايح جاي بنرفزة وعصبية كبيرة.. ومتغاظ من قلة حيلته.. وكمان مش قادر يفضل واقف يتفرج.. على الخطر اللي بتواجهه علينا.." وفجأة جاتله فكرة.. واتصل على أبوه. في النمسا.. محمد.. خارج من الفندق. وأبتسم. ورد على تيم.. وقال.. "الدكتور تيم أخبارك ياحبيبي.؟! تيم.. مسح على شعره ورد بثبات.. وقال.. "أنا بخير يا بابا. وحضرتك عامل إيه؟ محمد.. برضا.. "الحمد لله دائما وأبدا.."

تيم.. "الحمد لله.. احم.. هي ماما جنبك؟ ولو جنبك أكلمك في وقت تاني.." محمد بتعجب..!! "لأ يا سيدي.. نور فوق في الغرفة.. لكن خير.. واضح من نبرة صوتك.. شكلك عايز تسألني عن حاجة. ومش عايزها تعرف.. ولا أنا غلطان؟ تيم.. قعد على الكرسي بقلة حيلة وقال.. "أبدا يا بابا.. عمرك ما كنت غلطان أبدا.. بس أنا عايز أسألك على حاجة مهمة.. لكن لو تسمحلي. عايز منك إجابة.. إجابة وبس من غير دخول في تفاصيل.." محمد بِشك.. "حصل معاك إيه يا تيم؟

تيم.. بوجع.. "تايه يا بابا.. تايه. وعايز نصيحة..!! محمد بقلق.. "حصل معاك مشكلة؟ اتكلم يا ابني.." تيم.. هز راسه بالنفي.. "لأ لأ. يا بابا لأ مفيش مشكلة ولا حاجة.. لكن انا عايز نصيحة مش أكتر. بحكم خبرتك في الحياة.. لو قابلتني مشكلة كبيرة. وحسيت بالإحباط.. أعمل إيه؟ واتصرف إزاي؟ محمد بقلق مبهم.. "يبني ريح قلبي وقولي إيه اللي حصل.. يمكن أقدر أفيدك.." تيم بقلة حيلة.. "توعدني إن حضرتك متقولش لأي حد..؟ محمد..

"أوعدك يا تيم بس اتكلم.. ميرو. وجنى بخير؟ قلقتني..!! تيم بحزن.. "بخير يا بابا الحمد لله.. لكن…!!! "لكن… حصل كارثة يا بابا.. ومش عارف أتصرف بالشكل الصح.. من جهة خايف على العيلة.. ومن جهة تانية قلقان ومرعوب على اخواتي.. ومن جهة مش عايز أقف متكتف.. ولازم.. لازم أتصرف..!! محمد بدهشة.. "اخواتك..؟!! تمارا وآرين..؟ وكمل بنرفزة.. "ما تتكلم ياتيم..!! تيم بنفي.. "تمارا بخير يا بابا متقلقش.. لكن…!! وعيونه لمعت..

"لكن آرين وتالين اتخطفوا انهرده الصبح..!! محمد.. سند على العربية بصدمة.. وقال.. "انت بتقول إيه يا تيم.؟! اء.. آرين وتالين..!!! مستحيل…!!! إزاي حصل ده يا تيم.؟! ومين اللي عمل كده.؟! تيم بوجع.. "حاضر هقول لحضرتك.. اللي حصل إن………………..!!!! وبدأ يتكلم ويحكي لمحمد كل اللي حصل من بداية الخطف.. لحد جيسيكا وخطرها.. وإن محدش في العيلة لحد دلوقتي يعرف حاجة..!!! وكمل وقال.. بصوت مبحوح..

"بس يا بابا.. ومن وقتها وأنا مخنوق ومتكتف.. وكنت هتصل على بابا آدم. أسأله…. لو مكاني كان أتصرف إزاي؟ وازاي أقدر أحمي عيلتي من غير مواجهة الخطر.. لكن بابا آدم كان هايفهم إني في ورطة.. ومكنش هيسكت غير لما يعرف ويوصل لكل حاجة.. مفيش قدامي غير حضرتك.. لأنك هتفهمني.. وأكيد هتوجهني للطريق الصحيح.. قولي يا بابا أعمل إيه.. لو بابا آدم كان أتصرف إزاي؟! محمد.. أخد نفس عميق واتنهد بتعب.. وقال..

"لا حول ولا قوة إلا بالله.. اللهم أجرنا في مصيبتنا وأخلف علينا خيراً.." وقال بحزن..

"اسمع ياتيم يبني. أنا عارف إنك مش هتستريح طول ما هما بعيد عنك وفي خطر عليهم.. وآرين وتالين ميستاهلوش اللي بيحصل ده.. لكن أكيد فيه منه حكمة.. وبتمنى من ربنا أنه يحفظ بناتنا.. أنا هقولك. جدك آدم زمان ياتيم.. كان عصبي جدا.. وغيور على أهل بيته.. لكن مع مرور الوقت والأزمات وخبرة الحياة.. بقى يتصرف بحكمة.. ناهيك عن إن مريم موجودة معاه وكل ده أحنا عارفينه.. لكن احنا دلوقتي بنتكلم عن التصرف.. زمان لما كان في خطر عليك انت

ونور من دكتورة اسمها ياسمين ودكتور اسمه أحمد وكانوا بيتاجروا في الأعضاء.. وقتها جدك.. اتصرف بحكمة.. وحط خطة محبوكة.. عشان يوقعهم من غير ما حد فيكوا يتأذي.. وكمان حصل مواقف كتير جدا وأزمات أخطر وأكبر.. وديما جدك يقعد لوحده شوية ويفكر بتركيز.. يفكر في جميع الجوانب.. وايه اللي ممكن يحصل لو اتصرف بعصبية..؟

وايه اللي ممكن يحصل لو اتصرف بذكاء وهدوء..؟ وديما بيستخدم سلاح الذكاء.. مابيستخدمش سلاح.. بيضرب بقوته لكن بطرق متجيش على بال حد.. حتى لو أمكن يزرع شخص بين أعدائه.. عشان يحمي عيلته.. أهم حاجة ياتيم.. التركيز والهدوء.. أما العصبية بتدمر صاحبها قبل الخصم.. فاهم يبني؟!! تيم.. هز راسه باقتناع.. "فاهم يا بابا.. بس… بس آدم سافر.. وموبايله خارج التغطية.. ولازم أكلمه لأنه غضبان لدرجة كبيرة جداً.. بس أوصله إزاي؟! محمد..

"أنت اللي بتسأل برضو هتوصله إزاي يا دكتور؟ تيم.. فتح عينيه بدهشة.. وقال.. "صح..!! الطيارة خاصة.. وموجود فيها تليفون. أيوه فعلاً.. طيب أنا بجد بشكر حضرتك جداً يا بابا.." محمد بتحذير.. "أوعى تتهور ياتيم.. وطمني على اخواتك يبني.. أنا مش هتصل على حد من العيلة عشان الدنيا تمشي بطبيعتها.. وهنتظر منك أنت مكالمة تطمني.. فاهم ياتيم..!!! تيم بحماس.. "فاهم يا بابا.. مع السلامه.."

وقفل.. واتصل على فون الطيارة.. مرة واتنين وتلاتة.. وآدم مبيردش.. تيم قال بتحدي.. "أنا هفضل وراك لحد ما ترد يا آدم.. إحنا لازم نكون كتف في كتف.. لازم نتحد.. وعيلتنا تفضل ديما بأمان.." في الطيارة.. آدم مراد.. سايق.. وغضبان.. ومن شدة غضبه مش شايف غير الانتقام وبس..!!!

لدرجة إن جسمه بيتشد من التفكير واللي ناوي يعمله فيهم.. ده غير إن المسافة كمان حوالي أربع ساعات.. وده هيجننه أكتر.. وسامع صوت الفون بره الكابينة.. ومش راضي يرد.. لكن الاتصال متكرر كتير.. ونفخ بخنقة كبيرة.. وظبط الطيارة على وضع الطيار الآلي.. وقام يرد.. آدم مراد.. رد بنرفزة.. "أيوه..!! تيم.. نفخ براحة.. وقال.. "الحمد لله.. آدم أنا عايزك تسمعني قبل ما تعمل أي حاجة. وأوعى تقفل..!!! آدم مراد بخنقة..

"عايز إيه يا تيم دلوقتي..؟! تيم بتروي.. "تسمعني.. عايزك تسمعني ونفكر مع بعض… آدم أنت مش لازم تتصرف بغضب.. لأ الوقت ده بالذات محتاج تفكير.. لازم تفكر بهدوء.." آدم مراد بصوت غضبان.. "أفكر بهدووووء؟!! آرين وتالين اتخطفوا ياتيم.. اتخطفوا..!! ومش أي حد اللي خطفهم.. أظن أنت كنت واقف وسامع كل حاجة.. وعارف إنهم في إيدين ناس مبترحمش.. وعايزني أفكر بهدوء؟!!

أقسم بالله لو آرين وتالين جرالهم حاجة لاشرب من دمها شُرب.. هخليها تشوف على إيدي كل أنواع العذاب.." تيم.. مسح على شعره ورايح جاي بيسمع آدم وبيفكر.. وقال..

"طيب اهدا. أنا هحاول أبسطهالك.. دلوقتي أنت شوفتني وأنا واقف وسمعت كل الكلام. تمام ومفيهاش حاجة.. لكن دلوقتي خالو مراد وفهد حطوا خطة.. وآركان جاي.. يعني خالى مراد فكر في حل. عشان خايف على البنات.. اسمع يا آدم أنا لو مكانك هتصرف زيك بالظبط.. وقت اللي بنحبهم بيكونوا في خطر. إحنا مبنشوفش قدامنا.. لكن دلوقتي هما في خطر حقيقي.. وأي تهور ممكن هى تأذيهم.. ووقتها عذابك ليها مش هيرجعهم.... و……!!!

آدم مراد.. قاطعه بجمود.. وقال.. "إيه الخطه….؟! تيم..

"اللي عرفته إن خالو مراد هيجيب آركان في طيارة خاصة تبع الشغل بتاعكم.. وفيه تعزيزات أمنية.. وباقي الخطة هيكملوها لما آركان يخرج.. آدم لازم وقت الخطر نكون كتف في كتف يصحبي.. أنا عارف إنك قوي.. وتقدر تحمي آرين وتالين في وسط الخطر.. لكن إحنا مش عايزين نجازف عشان مندمنش. ودول مهما كان بنات ولازم نستخدم ذكائنا عشان أي مخاطرة آرين وتالين هما اللي هيدفعوا التمن.. آدم أنت لازم تستنى شوية لحد ما خالو مراد وفهد يوصلوا عندك.. عشان أنت اللي هتحط لينا خطة التصرف وهنتحرك على أساسها.."

آدم مراد بِشك.. "لينا مين؟!! تيم بجدية.. "ليا أنا وآركان.. ومش عايز نقاش.. لأنك لو اعترضت أنا هتكلم مع بابا آدم.. لأني مش هتحمل نظرة العتاب منه.. وكمان ماما مريم.." آدم مراد بدهاء.. "متحاولش تضغط على الوتر.. لأنك عارف في قرارة نفسك إنك مستحيل تقولهم حاجة عشان ماما مريم مش هتقدر تتحمل… وبعدين خلاص شوف أنت هتعمل إيه وبلغني.." تيم..

"طيب بما إنك ظابط مخابرات وكدا.. متقولي أجلك إزاي.. وخصوصاً أن خالو مراد وفهد صمموا إني أفضل هنا.. لكن مش هقدر.." آدم مراد.. مسح على شعره وقال.. "لو فرضنا إن آركان هيسافر في طيارة خاصة تبع الشغل.. ف أنت مش هينفع تسافر معاه.. بابا وخالو فهد.. هيسافروا في طيارة عادية درجة أولى.. رجال أعمال.. أنت بقى هتسافر في نفس الطيارة لكن درجة تانية.. فهمت..؟! تيم بتفهم..

"تمام.. ماشي يا آدم. ويا ريت لما أتصل على فونك ويجيب شبكة ترد عليا.." آدم مراد بتنهيدة.. "تمام مع السلامه…" وقفل.. تيم.. قفل.. وبيفكر يسافر إمتى.. وجواز السفر في البيت.. أممم فكر ياتيم.. فكر.. طيب مين هيفضل مع رينو وماما فريحة؟!! أممم. لو قولت لميرو.. مش هتتحمل.. أيوه الدكتورة رودي.. هي أكتر واحدة هتقدر تسيطر على رينو..!!

هما أصدقاء مقربين جداً.. وكمان تمارا.. أيوه تمارا وتجيب معاها آيان كمان.. أكيد هيهون على رينو كتير.. وأنا وآريان نسافر… أنا هتصل الأول على ميرو أقولها محتاج جواز السفر في أي حاجة وهقنعها بطريقتي.. وبعدها أتصل على الدكتورة رودي. وآريان..!! في الجهاز.. المدير بجدية.. "إذن إيه يا مراد بعد اللي عمله ابنك ده؟ النقيب آدم قدم استقالته.. يعني فيها محاكمة ومجلس تأديب.. وأنا هحوله حالا..!!!

ابنك رفض المأمورية ومضى الاستقالة.. وخالف القوانين.. وخرج بدون إذن مسبق مني..!! مراد بجدية وثبات..

"مع احترامي لمعاليك.. لكن النقيب آدم بيحب شغله وده رقم واحد في حياته.. ومعاليك عندك كل الخلفيات عن النقيب آدم مراد العدوي.. وأنه مثال مشرف لكل الشباب.. وعندو كفاءة عالية في مجاله.. ده غير أنه بيحب شغله جداً.. وروحه مش ملكه. وبيفدي بيها بلده.. وأكيد النقيب آدم اتصرف بالطريقة دي في عدم استيعاب منه يا فندم.. لأن الظروف كانت أقوى من أي تحمل.." المدير بصوت جهوري..

"ظروف إيه دي يا سيادة العقيد مراد.. اللي تخليه يتنحى عن وظيفته وأداء مهامه..؟! مراد.. عيونه لمعت وبيكابر.. وقال بوجع… "آدم مراته وأخته اتخطفوا..!! بنتي وبنت العقيد فهد السيوفي اتخطفوا يا فندم..!! المدير بزهول.. "انت بتقول إيه يا مراد؟ وازاي حصل الكلام ده؟ مراد.. بص للمدير وقال بعتاب..

"بنتي عمرها ١٦ سنة وهي الصغيرة.. أصغر بنت في العيلة.. وبنت فهد في تانية علوم.. بنات بريئة ميعرفوش حاجة عن قسوة العالم الخارجي.. اتحكم عليهم بالموت بسببي أنا وفهد.. بسبب مهنتي وسبب مأمورية من اكتر من ١٨ سنة فاتت؟

عرضت حياة بناتي للخطر.. ودلوقتي ابني هيدفع التمن.. أنا خسرت بناتي وابني في يوم وليلة.. أنا مراد آدم العدوي وفهد طارق السيوفي.. فَنينا عمرنا هنا.. واجهنا الموت.. بنفتح دراعاتنا للرصاص وبنقول أهلا بالشهادة.. بعدنا عن أهلنا وناسنا واتحرمنا من العيلة أكبر وقت.. عشان نرجع حق المظلوم.. مالناش مطامع ولا لينا هدف غير إننا نشرف البلد ونرفع راسنا بيها.. قدمنا كل طاقتنا. قدمنا روحنا. سعادتنا في أمان البلد دي.. فرحتنا لما نلاقي أم في الطريق بترفع أيديها وتدعيلنا من قلبها بالنصر.. ابني آدم مراد العدوي اللي كل الجهاز بيفتخر بيه.. وأنا قبل منهم. اللي من قوة إيمانه بالله إنه مش هيخذل أي حد وبيواجه الموت بضحكة.. وقوته في أنه لازم يقضي على العدو؟

لقبتوه بديزل المخابرات. وملفه كله مشرف.. مفيش أي إدانة يتواجه بيها.. هل كل الرصيد ده يا فندم مالوش أي التماس معاليك بالعذر لتصرف أخ وزوج عيلته بتواجه الموت؟ وبتواجه خطر حقيقي.. بناتي في وسط مافيا في وسط شياطين مايعرفوش يعني إيه رحمة..!!! المدير.. هز راسه بتفهم.. "اقعد يا مراد… اقعد واحكيلي كل حاجة..!!! مراد.. مسح وشه بإيديه وبيداري دموعه.. وقعد قدامه.. المدير.. حط الميا قدام مراد وقال..

"انت قولت مأمورية من أكتر من ١٨ سنة.. مين يا مراد؟ مين فيهم اللي عايز ينتقم منك أنت وفهد..؟! مراد بغضب واضح..

"جيسيكا كيڤين. مأمورية الفلاشة قصاد التاج الملكي الصيني.. وقتها فهد اتصاب ودخل في غيبوبة.. وأنا اتصبت برصاصتين.. واجهنا موت حقيقي.. وأنا قتلت كيفين واتقبض على جيسيكا.. لكن واضح أنها هربت أو خرجت لكن هي منسيتش.. وانهرده خطفت بناتنا واتصلت ع فهد وعايزاني أنا وهو عشان تحقق انتقامها.. يا إما هتستخدم بناتنا في طرق غير مشروعة.. يعني الخطر اللي ولادي التلاتة فيه يا فندم بسببنا إحنا..!!!

المدير.. حاول يفتكر.. وافتكر القضية.. وهز راسه بزعل.. وقال.. "احكيلي اللي حصل بالتفصيل يا مراد.." مراد بقلة حيلة ومخنوق وحكى كل حاجة بالتفصيل عشان مستقبل أولاده..!!! "وكمل وقال.. أتمنى بجد حضرتك تأذن ليا أنا وفهد نسافر لازم نحجز ونتحرك..!!! المدير.. قال.. "هتسافر يا مراد.. هتسافر ومعاك قوة وتعزيزات.. عشان تنقذ بناتك..!! مراد بتفهم..

"متشكر جدا يا فندم لتفهمك.. لكن أنا بطلب من حضرتك إني مش عايز أي قوة.. لأنها أكيد مراقبانا. وأي مجازفة فيها حياة بناتي.. كل اللي عايزه من سيادتك طلبين اتنين وبس.. وبتمنى معاليك توافق..!!! المدير.. إيه هي طلباتك يا سيادة العقيد..!!! "تعزيزات أمنية وسلاح خفيف.. والإذن لآركان السيوفي أنه يسافر معانا..!!! المدير.. مط شفايفه بتفكير.. "وياترى وجهة نظرك في آركان ابن العقيد فهد في محلها..؟ مراد بفخر..

"آركان ديما متحمس جدا.. ونجح في كل الاختبارات في الكلية.. ومن سرعته وأدائه اتلقب بالفهد الأسود..!! المدير بإعجاب.. "طبعاً أبوه يبقى الحوت وخاله الصقر.." مراد.. بص للمدير وقال.. "وأخوه الكبير يبقى الديزل معاليك…!!! في المستشفى : تيم في الفون.. "ها يا آريان عملت إيه؟ آريان بقلق.. "تمارا جابت ليك جواز السفر من مريم.. وهتجيب آيان ولسه هتلبس. يعني قدامنا ساعة كده إن شاء الله ونكون عندك.. بس ممكن تفهمني إحنا هنروح فين؟

تيم.. "لما تيجي هفهمك كل حاجة.. لكن دلوقتي أنت لازم تطلع على المطار.. وتحجز أول طيارة رايحة على إيطاليا.. هنسافر أنا وأنت.. بس أهم حاجة متنساش.. تحجز درجة تانية.." آريان تنح.. "أسافر؟ وإيطاليا؟ ودرجة تانية؟ في إيه يا تيم بجد قلقتني؟ انت هربان من حد؟ تيم.. نفخ بخنقة.. "قولتلك هقولك كل حاجة لما تيجي.." آريان.. "تمام.. بس تمارا أختك.. دانا مصدقت إني اترزع في البيت شوية.. ومش عايز مشاكل.." تيم بجدية..

"آريان الموضوع كبير جداً على فكرة.. وتمارا أنا هتعامل معاها لما تيجي.." آريان بجدية.. "والله..!! وأنا هعرف الموضوع كبير جداً إزاي.. وأنت مش راضي تتكلم..؟ تيم من بين أسنانه بغيظ.. "حاضر يا آريان.. آرين وتالين اتخطفوا يا آريان..!!! آريان.. كشر عينيه بعدم استيعاب.. "اء.. أنت بتقول إيه يا تيم.. متهزرش..!!! تيم بحزن حقيقي.. "ياريتني بهزر يا آريان.. ياريتني..!! آريان.. فتح عينيه بصدمة أكبر.. وقال..

"مستحيل.. لأ.. تيم.. إزاي يا تيم.. اء.. آرين..!! وتوتا.. توتا يا تيم..!!! طيب.. مين وعايزين إيه؟ لو عايزين فدية. أنا هجيب الفلوس وأجيلك حالا.. بس قولي هما……!!!! تيم.. قاطعه بتعب.. وقال.. "لأ ولا فدية ولا حاجة.. لما تيجي هفهمك كل حاجة.. أرجوك بقى اعمل اللي قولتلك عليه.. واتأكد أنها نفس الطيارة اللي طالع عليها خالو مراد وفهد.. فاهم يا آريان.. ومش هنبه عليك.. محدش يعرف من كبار العيلة..!!!

آريان.. مردش.. ونزل الفون.. ومسح على شعره.. ومش مصدق اللي سمعه..!!! ومن غير تفكير.. ركب العربية وطلع بسرعة.. ع المطار يحجز…!!! وحجز درجة تانية.. وأول طيارة هتطلع بعد ساعتين.. ورجع على الفيلا ياخد تمارا وآيان ويطلع على المستشفى.. فيلا السيوفي.. رودي لبست بسرعة ونزلت… طارق.. كشر عينيه وقال.. "رايحة فين البت دي؟ رنا.. "أنا عارفة؟ ممكن تكون رايحة لچود.." رودي بتوتر.. "مساء الخير يا جماعة.." طارق ورنا..

"مساء الخير يا رودي.." طارق.. "خير يا بنتي انتي رايحة فين دلوقتي؟ رودي بتفكير.. "احم اء.. أنا.. اه رايحة المستشفى عند آرين..!! تخيل يابابا.. تخيل. بتصل على رينو أطمن عليها.. أكتشف إن رينو وفريحة وآرين وتالين.. قاعدين في المستشفى.. كأنهم قاعدين في غرزة.. هههههههه. وقاعدين إيه بقى يغيظوني.. ويقولوا يا عيني يا رودي بنتك اتجوزت وجوزك مسافر.. وابنك مشغول بالأكاديمية.. وأنا بقى قلبت وشي عليهم. قوم إيه بقى؟ طارق..

"اممم.. ايه بقى؟ رايحة تاكليهم ولا إيه؟ رودي هههههه.. "ياريت يا طاروق.. لكن للأسف الشديد أنا اتعشيت.. بس رينو فضلت تتحايل عليا.. تتحايل عليا.. إني أروح أسهر معاهم ونقعد مع بعض لحد الصبح.. سهره صباحي يعني.. خمر ونساء هههههه.." طارق.. ضحك.. "لأ إذا كان كدا.. خدوني معاكم. هههههه." رنا.. شهقت بزهول.. وقالت.. "أما راجل مفيش دم خالص.. إيه اللي بتقوله أنت والمجنونة دي.." رودي..

"بص يا عم طارق.. اقعد انت بقى مع ست الكل اشرحلها فوائد الجنان والهيبرة.. أكون أنا روحت فرفشت شوية من فريحة خانوم أشطا؟ طارق.. هز راسه تمام.. "السواق يوصلك لحد باب المستشفى.. واتصلي عليا أول ما توصلي أشطا؟ رودي.. حضنت طارق بمرح.. "حبيبااااااي. هو أنا بعشقك من شوية.. أنا لو هشحت كدا.. محبش إلا أنت..!! طارق بضحكة.. "وأنا لو هشحت محبش إلا أنتي يابت يارودي..!! رنا.. ضحكت.. وقالت.. "سبحان الله. ما جمع إلا ما وفق والله.."

رودي.. ودعتهم وخرجت بسرعة.. ونفخت بتوتر كبير.. وركبت العربية.. واتصلت على تيم.. وقالتله اللي حصل..!! وقلقانة جداً على البنات.. وصعبان عليها رينو واللي بيحصل معاها..!!! لكن قالت لنفسها.. أنها هتعمل المستحيل عشان تهون على صديقة عمرها.. بعد شوية.. في المستشفى..

مراد رجع من الجهاز.. وتيم واقف وسمع كل حاجة قالها مراد.. وإنهم هيقابلوا آركان كمان ساعة ونص في المطار.. عشان ياخدوا منه أجهزة التتبع وسماعات بلوتوث للتواصل مع بعض.. فهد.. فونه رن من رقم مجهول.. ورد عليه وكان آركان.. و آركان كان قلقان ومش فاهم حاجة.. وفهد مقدرش يتكلم ويشرحله حاجة.. تيم.. شافها فرصة. وقال.. "أنا هتكلم معاه يا فهد.. " واخد الفون وخرج بره.. وشرح لآركان كل حاجة.. آركان.. دموعه نزلت.. وقال.. "آرين..!!!

وتالين..!! على كلامك ده يا تيم.. دول ناس خطر جداً.. طيب محاولتوش تسمعوا صوت آرين وتالين؟ محدش كلمهم يا تيم..؟! تيم بتنهيدة ألم.. "للأسف هي اتصلت مرة واحدة بس. ومدتش فرصة لفهد يسأل عليهم.." آركان.. صك على أسنانه بغيظ واضح وقال.. "أقسم بالله ما هسيبها.. ولو حصل حاجة لأخواتي.. لايشوفوا أيام سودا.. وبعدين آدم فين..؟! تيم.. "آدم سافر ومنتظرنا هناك..!! آركان.. "منتظرنا.؟! ده اللي هو مين؟ تيم بتحذير..

"اللي هو أنا وآريان.. واسمعني كويس.. لو حد عرف إني جاي مع آريان.. أقسم بالله يا آركان لا تشوف وش تاني.. واسمعني بقى وركز معايا.." آركان.. "تمام سامعك.." تيم.. "أنت هتسافر في طيارة خاصة.. وأحنا هنسافر في طيارة عادية.. وهنفضل على تواصل لحد ما نوصل مطار إيطاليا.. وبعد ما خالو مراد وفهد يروحوا القصر.. أنا وأنت وآدم وآريان.. هنتقابل عند المطار.. وهنروح أي مكان.. عشان آدم يحط لينا خطة ونشوف هنعمل إيه.. اتفقنا؟!

آركان بتوعد.. "اتفقنا.. ده نهايتهم هتبقى سودا إن شاء الله.." بعد شوية.. مراد وفهد خرجوا من المستشفى.. آريان وصل المستشفى.. ونزل مع تمارا اللي شايلة محمد ومش فاهمة حاجة وشايفة جوزها خايف وقلقان ومش راضي يتكلم.. وآريان شال آيان.. ودخلوا المستشفى.. تيم.. في المكتب.. وقعد جمب تمارا.. وقال.. "تيما أنا محتاج مساعدتك.." تمارا بعدم فهم.. "مساعدتي أنا؟ خير يا تيم.. أنا تحت أمرك يا حبيبي.." تيم.. مسك إيدها وقال..

"الموضوع مهم جداً.. وكمان حساس.. ولازم حد عاقل يقدر يتحمل المسؤولية دي.." تمارا بقلق.. "مالك يا تيم؟ قول يا حبيبي إيه الموضوع؟ تيم.. اتنهد بتعب.. وقال.. "آرين وتالين اتخطفوا..!!! آريان.. واقف مخنوق جداً.. وقلبه مشغول عليهم. تمارا.. كشرت عينيها.. وقالت.. "ياريت متهزرش أوكي.. أنت وآريان جايبني هنا عشان أشوف آرين ونتيجة العملية مش كدا؟ تيم.. هز راسه بحزن.. وقال.. "لأ.. أنا بقول اللي حصل.."

تمارا.. قلبها دق.. وقالت بصدمة.. "آرين وتالين..!!! وهزت راسها بصدمة.. وقالت.. "مستحيل.. مستحيل اللي أنت بتقوله ده.. وعيطت وكملت.. اتخطفوا إزاي يا تيم..؟ وامتى..؟ تيم.. مسح دموعها.. وقال.. "تمارا إحنا في وقت محتاجين فيه نقوي بعض.. وأنتي دورك كبير في المهمة دي.. أنتي لازم تساعدينا عشان نرجع بيهم من غير شوشرة.. أنتي عارفة إن جدو ونانا لو عرفوا مش هيقدروا يتحملوا وخصوصاً إنهم بره مصر.." تمارا.. شهقت بصدمة.. "بره مصر..؟!

"قولي يا تيم أنت عايزني أعمل إيه وأنا هعمل اللي أنت عايزه.." تيم.. مسح وشه بإيديه وقال.. "دورك تخلي بالك من رينو وماما فريحة.. مش عايز عينيكي تغيب عنهم دقيقة أنتي والدكتورة رودي.. وأنا كلفت أمن هيقفوا ع أوضتهم.. وكمان كريم وياسين هيكونوا موجودين بره الأوضة.. فهمتي يا تمارا؟! تمارا.. عيطت بوجع وقالت.. "حاضر يا تيم.. حاضر..!!! تيم.. باس ع راسها.. وقال..

"إن شاء الله هنرجع بيهم.. أنتي بس خليكي قوية.. أنا هروح دلوقتي أتكلم مع رينو وماما فريحة.. " وقام وخرج.. تمارا.. ضمت محمد لقلبها وعيطت بصوت كله وجع وخوف.. آريان.. قعد جمبها وضمها لقلبه بحنان وقال.. "إن شاء الله هنرجع بيهم يا تمارا.." تمارا.. بترجي.. "أرجوك يا آريان خلي بالك من نفسك.. وارجعوا بخير.." آريان.. مسد ع ضهرها وقال.. "إن شاء الله يا حبيبتي.."

رودي وصلت واتصلت على طارق وطمنته.. وقفلت بحجة الشبكة.. وراحت مكتب تيم قعدت مع تمارا لحد ما تيم يخرج من عند رينو.. في أوضة رينو وفريحة.. رينو.. قاعدة على السرير.. وباصة قدامها وساكتة من الصدمة.. وأنها أكبر من تحملها لفقدان بنتها.. فريحة.. نايمة على جنبها.. ودموعها نازلة بصمت.. تيم.. دخل.. وشاف وضعهم.. وقرب من فريحة.. وساعدها تتعدل.. وقال.. "ممكن تبطلي عياط.." فريحة بوجع وحرقة قلب..

"بنتي ياتيم.. هاتولي بنتي.. أنا مش هقدر أعيش يوم واحد من غيرها.." تيم.. عيونه لمعت.. وقال.. "هترجع.. إن شاء الله هترجع.. إحنا خلاص عرفنا هما فين..!! فريحة.. فتحت عينيها بأمل.. وقالت بلهفة أم.. "فين..؟! "تالين وآرين فين يا تيم..؟! تيم.. حاول يبتسم بتمثيل.. وقال.. "في مكان بعيد شوية. واللي اخدوهم محتاجين فلوس مش أكتر.." فريحة برجفة.. "فين مراد.. قوله ياخد كل حاجة ويدهالهم.. مش مهم الفلوس.. بس يرجعوا.."

تيم.. ربت ع إيدها وقال.. "وده اللي إحنا هنعمله.. لكن مطلوب من حضرتك أنتي ورينو تعملوا حاجة صغيرة أوي.." فريحة.. هزت راسها.. "أنا هعمل أي حاجة.. بس يرجعوا.." تيم.. هز راسه ليها.. وقام قعد جمب رينو.. ومسك إيديها.. وقال بترجي.. "عشان خاطري. قولي أي حاجة.." رينو..؟ ..!!! تيم بوجع.. مسك وشها وقال.. "رينو ردي عليا.. أنا تيم. وبوعدك إن آرين هترجع بخير.." رينو..؟ ..!!! تيم بجدية.. "رينو.. أنتي عايزة آرين ترجع ولا لأ؟

رينو.. عيونها لمعت.. ودموعها نازلة بصمت.. تيم بأمل.. "طيب أقولك على حاجة.. بس الأول قولي أنتي بتثقي فيا ولا لأ.. بتثقي في تيم مش كدا؟ رينو.. هزت راسها بتعب.. تيم.. مسح دموعها وقال.. "طيب يا حبيبتي وأنا قد الثقة دي.. وبقولك إن آرين بخير.." رينو.. رفعت عينيها ليه وقالت بوجع كبير.. "اوعدني. إنك ترجعلي بنتي..!! تيم بإستسلام..

"أوعدك.. أوعدك إني هعمل المستحيل عشان آرين وتالين.. وعشان محدش من العيلة يشك في حاجة.. لازم انتي وماما فريحة.. تتصلوا على بابا آدم. عشان هو الوحيد اللي لازم ميحسش بحاجة.. خالو مراد خايف على ماما مريم وماما رنا..!!!

لو عايزين البنات ترجع بجد بخير.. ومن غير ما حد من العيلة يحصله حاجة.. لازم تكلموهم وانتوا طبيعين جدا.. وكأن مفيش أي حاجة حصلت.. أنا لازم أمشي دلوقتي.. وأنا مأمنكم كويس.. الدكتورة رودي وتمارا وكريم وياسين هيفضلوا معاكم. لحد ما نرجع إن شاء الله.." وجه يقوم.. رينو.. مسكت إيده وقالت.. "هما فين يا تيم.. وفهد ومراد وآدم فين؟ قولي الحقيقة أرجوك.." تيم بحيرة..

"احم.. هما لسه خارجين دلوقتي.. وأنا لازم أحصلهم.. أنا كل شوية هتصل عليكم أطمنكم وأطمن عليكم.. تمام.. بس عايزين دعواتكم.." رينو وفريحة غضموا عينيهم.. ودعوا بذل كبير.. تيم.. ودعهم وخارج.. فريحة بدموع تعب.. "أنا هقوم أصلي ركعتين وأدعيلهم.. قومي يا رينو انتي كمان.. قومي وإن شاء الله ربنا هيسترها مع بناتنا.." رينو.. مسحت دموعها وقالت.. "حاضر يا فريحة.. لازم نصلي.. وبعدها نتصل على بابا…!!!

تيم في الطرقة.. بيشرح ل كريم وياسين.. وأنهم مهمتهم حماية رينو وفريحة.. وراح عند تمارا ورودي.. وقال.. "امسكي يا تمارا.. ده برشام منوم.. بعد الفجر تديه لرينو وماما فريحة.. وخلي بالك من نفسك.." وبص لرودي وقال… "وأي حاجة تحتاجولها عندكم كريم وياسين تمام..؟! تمارا بحزن.. "حاضر يا تيم.. وربنا معاكم.." رودي شايلة آيان.. وقالت بحزن.. "خلي بالكم من نفسكم يا ولاد.. وربنا معاكم وطمنونا.." تيم.. بص في الساعة وقال..

"إن شاء الله.. ويدوبك نتحرك يا آريان.. يلا بينا.." آريان.. ودع تمارا وابنه.. وخرج مع تيم…!! كريم.. راح وراهم. وقال.. "يلا تعالوا هوصلكم المطار بسرعة وهرجع.." تيم وآريان ركبوا مع كريم.. وطلعوا على المطار.. وشافوا مراد وفهد طلعوا الطيارة.. وبعدها هما ركبوا.. واستودعوا نفسهم عند الله.. بعد كده لما سافروا إيطاليا.. عند المطار.. بعد الفجر.

آدم مراد.. واقف بعيد وشاف مراد وفهد بيركبوا مع اوليفر. وصك على أسنانه.. وضرب قبضة إيده بغضب.. وبعد كده.. شاف تيم وآريان وآركان خارجين من المطار…!!! آركان.. معاه شنط كبيرة وخارجة بأمر من مدير الجهاز المصري بمساعدة وموافقة الشرطة الإيطالية.. من المطار.. آريان.. شاف آدم مراد واقف.. وملامحه جد جدا.. وقال.. "آدم هناك أهو يا شباب.." تيم.. "تمام.. يلا بينا نقابله.."

آدم مراد.. شاور ليهم يمشوا وراه.. وراحوا على فندق. آدم حاجز فيه غرفة.. وطلعوا.. آركان.. قاعد ساكت.. ومخنوق جداً.. آدم مراد بجدية.. "الخطه إيه يا آركان..؟! آركان.. قفل السماعة اللي في ودنه لدقايق عشان مراد وفهد مايعرفوش ب تيم وآريان.. وكمل بجدية.. "أنا والحوت والصقر بنتواصل عبر سمعات صغيرة.. وكلمة السر هي .M

-D أول حرف من ماكس وهاسكي وساهيل ودارلي اربيان. وكل واحد فينا حاطط جهاز تتبع في الكوتشي عشان لو فتشوهم. مايكتشفوش الجهاز.. ودلوقتي.. اللي أخد الحوت والصقر اسمه اوليفر.. ورايح بيهم على قصر جيسيكا.. ولازم نتحرك بعد عشر دقايق.. لأني سمعت الحوت قال للصقر إن مسافة الطريق من المطار لقصر جيسيكا. حوالي ٨٠ كيلو.. يعني حوالي ساعة ونص تقريبا عشان يوصلوا القصر.. والخطه إني أكون قريب من القصر وقت الخطر أنا والديزل..!

آدم مراد.. هز راسه تمام.. وفتح الشنط بخنقة.. ومسك الصديري الواقي.. وقال.. "تيم وآريان وأنت كل واحد يلبس صديري. وبسرعة عشان نتحرك.. وكل واحد يحط معاه جهاز تتبع.. وسلاح.." بعد كده كل واحد عمل اللي آدم قال عليه.. تيم.. ركب السماعة.. وقال.. "طيب يا آدم.. الخطه إيه؟ آدم مراد.. مسك ال آر بي جي. وبيحطه في الشنطة السلاح. وحط السكينة في جيب جانبي.. وقال بتوعد.. "مفيش خطة..!!

إحنا هنتحرك على حركة جيسيكا.. لأني معرفش هي ناوية على إيه.. لكن أنا هتواصل معاكم تعملوا إيه.." وحط سلاحين في جيبه الخلفي.. وقال.. "يلا بينا.." والكل نزل.. آركان.. باصص في خريطة الفون.. وقال.. "احنا هناخد تاكسي بسرعة لأنهم بعدوا كتير.." آدم مراد.. فتح باب عربية وقال.. "أنا عامل حسابي يلا اركبوا.." تيم ركب جنبه. وآريان وآركان ركبوا في الخلف.. آدم مراد.. حط فونه قدامه وساق بسرعة. ورا جهاز التتبع..!!! آركان..

"بقولكم إيه يا شباب.. أنا هشغل السماعة.. ياريت بقى محدش يتكلم غير لما يديني إشارة عشان الحوت والصقر محدش يسمعكم.. عشان مش عايز حد فيهم يتشتت..!!! تيم.. هز راسه بتفهم.. وقال.. "تمام متقلقش يا آركان.." آركان.. شغل السماعة.. وسمع صوت العربية. وأوليفر.. وقال بهمس.. -D" ولما سمع صوت الإشارة.. آركان.. قال.. "أنا مع الديزل ورايحين وراكم في طريقنا للمزرعة..!! مراد.. عطاله إشارة أنه سامعه..

بعد فترة وصلوا عند القصر. لكن الشباب بعيد بمسافة مناسبة عشان محدش يحس بيهم.. آدم مراد.. في العربية.. وعايز ينزل.. لكن ماسك نفسه بالعافية.. ولما سمع صوت جيسيكا وطريقتها في الكلام مع مراد وفهد.. أقسم أنه هيقتلها بإيديه.. والكل قلبه وقع في رجليه.. لما سمعوا صريخ أخته تالين.. وآدم مقدرش يتحمل.. وقال بخوف.. "تاليين..!! ونزل من العربية.. لكن تيم وآريان وآركان نزلوا بسرعة.. ومنعوا آدم بالعافية..

آدم مراد.. خبط إيده في الشجرة من الغيظ وقلة الحيلة.. لكن انتبه ع شرط جيسيكا.. إن مراد يدخل القصر وفهد يركب العربية.. آدم شاور ليهم يسمعوا بتركيز.. وسمعوا تهديد أوليفر لمراد.. أنه هيفجر القصر.. تيم.. فتح عينيه بصدمة.. وقال.. "طيب والعمل..؟! آدم مراد.. من بين أسنانه.. "محدش هيتحرك من هنا غير بعد مايخرجوا من القصر.." آركان بدقة قلب.. "آرين..!!! "آرين هناك أهي هي وتالين.."

آدم مراد.. رفع عينيه بسرعة.. وقلبه دق بخفقان.. لأنهم متحاصرين بأسلحة وحرس كتير.. وفعلاً أي خطوة غلط.. هيندموا.. وآدم عينيه مفتوحة زي الصقر وبيحفر نهايتهم وبيقسم بنظرة عينيه اللي كلها غيظ أنه هيقتلهم بأبشع الطرق.. وعينيه على آرين وتالين لحد ما اختفوا..!!! آركان.. عينيه على جهاز التتبع بتاع فهد.. وبعد ١٠ دقايق.. قال.. "الجهاز وقف هنا.. أكيد ده القصر اللي قال عليه.." تيم.. "لازم حد يروح ورا فهد.." آريان..

"ماهو آدم قال ياتيم.. لو مشيتوا وراهم هيشكوا فينا.. ولازم عربية تانية.. هنعمل إيه؟ آدم مراد.. بص في الساعة.. وقال بجدية.. "اسمعوا وركزوا كويس.. الكل ها معاك اتكلم.." آدم مراد..

"في خمسة حراسة قدام باب القصر الداخلي. وأربعة واقفين قدام القصر.. أنا هروح عند بوابة القصر الخلفية.. وهدخل بطريقتي.. وهحط قنبلة تحت أي عربية.. وأكيد كل الحرس هيجروا ع العربية.. في الوقت ده.. أنت ياتيم تدخل تاخد أقرب عربية تقابلها.. وتطلع ورا فهد.. وأنت يا آريان. خليك جمب العربية دي عشان السلاح.. وأنت يا آركان. مش هتتحرك غير لما أقولك.." آركان بقلق.. "طيب وخالو مراد؟ هيفضل جوه كتير؟ المكان ملغم يا آدم.."

آدم مراد بجدية.. "أنت اللي هتدخل تفك بابا وتخرجه.. لكن متتحركش غير لما أشوش على الكاميرات وأسيبها عند وقت محدد.. اتفقتنا؟ آركان بحماس.. "اتفقنا.."

آدم مراد.. فتح شنطة العربية.. واخد حبل. وجهاز التشويش. والقنبلة.. ومشي بسرعة وخفة ووصل لخلف القصر.. وشاف شجرة جمب بوابة القصر.. وطلع ع البوابة. ووصل السور ومشي عليه كام خطوة.. وربط الحبل في الشجرة عشان لو حصل أي حاجة يتحرك بسرعة.. ونط من على السور.. ومشي بحذر بين الشجر.. وشاف حارس رايح جاي قدام الباب والشجر.. واستخبى بسرعة.. ولما الحارس مشي.. آدم اتحرك بخلسة.. وقرب من عربية.. وحدف القنبلة اليدوية تحتها.. وانفجرت.. وجري بسرعة من الاتجاه المعاكس.. كل الحرس من غير تفكير جريوا عند البوابة الخلفية يشوفوا إيه الانفجار ده.

آركان.. بتفكير.. "استنى ياتيم.. أنا بسرعة هجيبلك العربية.." ودخل بسرعة كبيرة وخفة.. وفتح باب العربية بطريقته.. وساقها.. وخرج لتيم.. تيم.. جاب سلاحين وزخيرة عشان فهد.. وركب بسرعة.. وقال ل آركان… "لو حصل حاجة طمني لحد ما أشغل السماعة.." آركان.. هز راسه تمام.. "اتحرك أنت.." تيم.. ساق بسرعة.. آدم مراد.. جري بسرعة.. ودخل القصر من المطبخ.. وقال في السماعة.. "بابا..!! مراد.. بيحاول يفك نفسه.. وسمع صوت آدم.. وقال.. "آدم..؟

أنت فين؟ آدم مراد.. "متقلقش يا بابا أنا جمبك.." مراد بخوف.. "اخرج يا آدم القصر ملغم بالمتفجرات يابني.. اخرج بسرعة ورجع أختك ومراتك.." آدم مراد.. بخنقة.. "أرجوك حاول تهدا وكل حاجة هتكون تمام.. المهم دلوقتي.. عايزك بما إنك عارف قصر جيسيكا.. عايزك تقولي غرفة المراقبة فين بالظبط؟ عشان مفيش وقت..!! مراد.. غمض عينيه بتركيز.. وبيحاول يفتكر.. وقال..

"فهد كان بيقول في اسانسير في القصر.. وتاني غرفة على يمين الاسانسير أو أول غرفة مش فاكر بس هي هناك أنا متأكد..!!! آدم مراد.. هز راسه تمام.. وخرج بحذر.. ودخل أول غرفة.. ملقاش فيها حاجة.. وراح عند الأوضة التانية.. وشاف فيها كل الأجهزة.. آدم مراد.. شاف أبوه متكتف.. والمنظر ده كفيل يخليه يولع في إيطاليا كلها.. وقال بغيظ حقيقي.. "بابا حاول تعمل إنك بتفك نفسك عشان أوقف الكاميرات.." مراد بصمت.. حاول يفك نفسه بجد..

آدم مراد.. وقف كل الكاميرات.. عند آخر حاجة.. آدم مراد.. سمع صوت الحرس بره بيدوروا ع اللي عمل كدا.. وقال في السماعة.. "آركان ٥٩ ثانية وتدخل تاخد بابا وتخرج.." آركان.. بص في الساعة وقال.. "تمام.." آدم مراد.. خرج من الباب الخلفي.. وبدأ يضرب الحرس.. في أماكن معينة يخليهم يغيبوا عن الوعي..!!

واحد ضرب نار على آدم ومجتش فيه.. وآدم حدفه بالرشاش في وشه.. واتألم ووقع على الأرض.. وآدم قرب منه.. وضربه وربطه في الشجرة بالحبل.. وأي حد يضربه يحطه جمب الحارس ده ويربطه.. آركان.. في الوقت المناسب.. جري بسرعة.. ودخل القصر.. وقال.. "خالو مراد.. أنت فين؟ في أنهي دور..؟ مراد.. "في الدور الأرضي.. في عمود فرعوني.. وقدامه مراية كبيرة.. دي الأوضة.. دي مش مراية.."

آركان.. اتحرك بسرعة.. وشاف المرايا.. وقرب منها.. ومفيهاش أوكرة.. وقال.. "طيب أنت ورا الباب؟ مراد.. "أوعى تضرب نار.. في قنبلة جمبي.." آركان.. بتفكير.. حسس بإيديه على الباب كويس جدا.. وشاف خط صغير.. ومشي ورا الخط وشاف براوز.. وشاله.. وشاف زرار.. وضغط عليه.. والباب اتفتح.. ودخل جري ع خاله.. وقال بلهفة.. "حضرتك كويس..؟ مراد.. هز راسه.. "أنا تمام.. بسرعة فكني.. لازم ألحق فهد.. الاتصال انقطع بيني وبينه.."

آركان.. قلق جداً ع أبوه.. وفك مراد وخرجوا بسرعة وشافوا الحرس متربطين.. مراد.. شاف آدم واقف قدام الفيلا وراكب ريس من بتوع الحرس.. وكأنه اطمن ع أبوه.. واتحرك بسرعة على القصر التاني.. آركان.. قرب من الحرس.. وفتشهم.. واخد اللاسلكي.. والريموت كنترول للتحكم في المتفجرات.. وقال للحارس.. "هل ستصلك رسالة بالتفجير؟! الحارس بألم.. "أجل.. من سيد كارلوس..!!! آركان.. ضغط ع جرحه وقال بغيظ..

"حسنا.. وبما تجيب عليهم عندما يطلبوا منك شيئاً.. وفتح تسجيل الفون. وقربه منه.." الحارس.. قال بألم.. "أجيب. أمرك سيد كارلوس..!!! آركان.. هز راسه.. "لا ليس هكذا.. أنا أريد أن أسمعها بطريقة إيمائك للعمل وبدون ألقاب أحد هنا.. هيا تكلم الآن وإلا وضعتك في القصر وفجرته الآن.." الحارس.. هز راسه بالرفض.. "لا لا أرجوك.. لا تفعل.. حسنا ساتكلم.." آركان.. قرب الفون منه.. وقال.. "تحدث.." الحارس.. حاول يتكلم وقال..

"حسنا. أمرك سيدي..!!! آركان.. "سجل التسجيل.. وقام وقف وقال للحرس بشماتة.. حاولوا أن تفكوا تلك القيود قبل انفجار القصر.. إلى اللقاء.." مراد.. مهتمش للحرس.. وقال.. "أتحرك يا آركان… لازم نلحق فهد.. ورايح ع عربية من بتوع القصر.." آريان.. شاور لمراد وهو في العربية.. وقال.. "عمي تعالوا يلا.." مراد.. أتصدم.. "آريان..!!! وبص ل آركان..!! آركان.. هز راسه.. "هفهم حضرتك في الطريق يلا بينا.."

مراد.. ركب جمب آريان.. وآركان في الخلف.. واتحركوا.. وحكوا لمراد كل حاجة.. آركان.. أتصل على تيم وقالوا.. "شغل البلوتوث خالو عرف كل حاجة.." مراد بجدية.. "أنت فين يا تيم..؟! تيم.. "أنا واقف عند القصر التاني.. وع فكرة في حرس كتير جدا.. وهنحتاج سلاح تاني أكيد.." آريان.. "متقلقوش يا جماعة.. آدم قالي نفس الكلام.. وأنا أخدت كل الأسلحة اللي مع الحرس هناك.. كله تمام.." آركان.. "تمام جداً.. وكمل بدهشة.. اسمعوا كدا..؟!

في إشارة من اللاسلكي..!!! "كارلوس : ميشيل فجر القصر الآن..!!! آركان.. صك على أسنانه بتوعد.. وشغل التسجيل.. "حسنا سيدي.." وضغط على الريموت كنترول.. واتفجر القصر.. تيم.. في العربية.. وشاف شاب واقف قدام البحر ومعاه كلب حراسة وواضح أنه حزين.. كأنه بيكلم الكلب وبيهون عليه.. وده سفيان.. وفجأة.. شاف حركة غريبة.. في القصر.. وازاز من الدور التاني بيتكسر.. وقال في السماعة.. "في حركة غريبة وتكسير إزاز في الدور التاني.."

مراد.. غمض عينيه بغيظ.. وقال.. "فهد..؟! أكيد فهد..!! أكيد جيسيكا عملت حاجة خلته يفقد السيطرة على نفسه.." وزعق بصوت عالي وقال بأمر.. "أتصرف وادخل لفهد ياتيم.. لازم يكون معاه سلاح..!! وأحنا جايين حالا.." تيم.. هز راسه حاضر.. واخد السلاح. ونزل بسرعة.. واتحرك.. وكان فيه عربية خارجة من القصر.. وتيم بيجري ودخل القصر لفهد..

في نفس الوقت ده.. كان سفيان واقف قدام البحر مع كاسبر اللي هو الكلب بتاع جدو رؤوف زيدان السلماني.. والد هيلينا.. وكاسبر كان حزين جدا على فراق رفيقه.. وسفيان خرج وخد كاسبر في العربية لحد ما وصلوا عند البحر ونزلوا.. سفيان.. شاف الحارس وهو شايل تالين.. ومن وقتها شك أنها تكون مخطوفة أو مغصوبة على أمر ما..!! ولما شاف بعدها على طول.. آرين على اليخت بنفس الطريقة.. شكه اتحول ليقين أنهم مخطوفين.. وقال..

"أنا لازم أتصرف.. أيوه انا هاتصل ع الشرطة.." لكن اتفاجأ بوصول الديزل.. آدم مراد.. سمع اللي حصل.. وداس بنزين أكتر ووصل القصر ونزل.. ولما سمع من سفيان.. مفيش قدامه حل.. ومش هينفع يقول لتيم ارجع من عند فهد.. لكن أخد جهاز التتبع بتاعه.. وحطه في عربية سفيان.. ولما آدم ركب اللانش.. قال في السماعة لمراد..

"بابا.. آرين وتالين اتفرقوا واحدة في البحر وواحدة على الطريق.. أنا في البحر. اطلع أنت ورا جهاز التتبع بتاعي بسرعة.. في عربية ماركة (….) رقم (…..) وكمان معرفش مين فيهم اللي في العربية اللي طلع وراها.. آرين أو تالين.. بسرعة يا بابا أنا مش ضامن الشخص ده..!! مراد.. قلبه بيدق بقلق.. "ماشي يا آدم.. اطلع يا آريان بسرعة..! آركان.. بص حواليه وبيفكر.. وقال لنفسه.. "في البحر؟ وأكيد جيسيكا مش لوحدها.. وآدم هيبقى لوحده.."

وشاف الجسر.. وقال.. "طيب نزلني هنا يا آريان.. لازم أكون مع آدم.." آريان.. وقف.. وقال بسرعة.. "يا آركان.. وخلي بالك.." آركان.. نزل.. وجري بسرعة عدى الطريق. وفضل يجري بأقصى سرعة عشان يوصل الجسر.. مراد.. فاتح التاب على جهاز تتبع آدم وقال.. "أهو يا آريان.. امشِ قدامك على طول.." آريان.. داس بنزين وساق بسرعة.. وعدا من قدام القصر.. وسامعين ضرب نار.. مراد.. بص ع القصر وصك ع أسنانه بغيظ.. وقال.. "أكيد فهد محتاجلي.. أكيد..!!!

"بس الصبر." بعد دقايق.. آريان.. قال.. "عمي.. الإشارة بتقرب مننا.. أكيد الشخص راجع من نفس الطريق.." مراد.. بيهز رجله بنرفزة وقلة صبر.. وقال.. "أيوه.. أيوه خليك مكمل ونقابله في الطريق.." سفيان.. سايق.. وبص ع تالين. ولسه مغمى عليها. وشاف الدم اللي على وشها.. وقال أكيد لو فاقت وشافت الدم ده.. هتخاف. وجاب منديل.. ورفعه ع وشها.. لكن قال لنفسه.. "إيه ياسفيان..؟!

تخيل أنها فاقت دلوقتي وشافتك وأنت بتمسح ليها وشها. هتفكر إزاي وقتها.. وبعدين أفرض الشخص ده كان جوزها. او خطيبها…!!! أنت شوفت كان غضبان إزاي.. لأ لأ انا أحسن حاجة.. أوصلها للشخص ده زي ما هي كده.. وسايق… وخلاص قرب من القصر.. لكن جت عربية جيب سودا. ووقفت قدامه..!!! مراد.. بدقة قلب.. "أيوه هي دي العربية يا آريان..! ونزلوا بسرعة.. سفيان.. شاف اتنين نازلين بسرعة.. ومراد أتحرك بسرعة وفتح الباب اللي ناحية تالين..!!!

سفيان.. قال بحذر شديد.. "لا تقترب منها ياهذا..!! مراد.. مردش.. وشاف وشها كله دم.. وفتح عينيه بصدمة.. وهمس برعب.. "تا…تالين..!!! آريان.. رغم رعبه عليها لكن شاف سفيان هيتحرك.. وقال.. "أهدأ انه والدها.." سفيان.. شاف خوف مراد وإيده بترجف على وش تالين.. وقال بسرعة.. "مهلاً مهلاً.. إنه دماء من شخص آخر.. إنها بخير اطمن.." مراد.. بينهج بخوف ومردش.. وشال تالين بسرعة.. وراح عند العربية بتاعتهم..

آريان.. نفخ براحة كبيرة.. وقال.. "أنا أشكرك على مساعدتك لنا في هذا الوقت.. نحن مدينون لك بالكثير.. أشكرك كثيراً.." سفيان.. أبتسم.. وقال.. "أنا لم أفعل شيئاً.. وحمداً لله على سلامتها.. أتمنى أن تكون الأمور بخير.." آريان.. هز راسه أجل كل شيء سيكون على ما يرام.. "معذرة يجب أن أذهب الآن.. ولنا لقاء معك بالتأكيد.. لا تذهب حسنا..؟! سفيان.. هز راسه بهدوء.. "حسنا.. ولكن لحظة رجاءا.." وجاب علبة مناديل كبيرة.. وقال..

"تفضل هذا ستحتاج إليه لكي تزيل الدماء الملطخ على وجه الفتاة.. وإن كنت تريد شيئاً فأنا معك بالتأكيد..!! آريان.. هز راسه ليه.. وقال.. "أشكرك كثيراً.. فأنت حقاً رجل رائع.." وخد المناديل.. وودع سفيان.. وراح بسرعة عند مراد وتالين… سفيان.. ركب العربية.. وشاف خوف أب حقيقي على بنته.. وأبتسم وقال.. "نفس خوف بابا علينا بالظبط.." واتنهد. وبص لكاسبر وأبتسم.. وشغل العربية واتحرك..!!!

مراد.. نيم تالين في الكرسي الخلفي.. وقلبه هيقف من الخوف عليها.. ومسك إيدها. والنبض شغال.. ونفخ براحة كبيرة.. وبدأ يفوقها.. "تالين.. تالين يابنتي ردي عليا..!!! تالين..؟ ..!!! مراد.. إيديه بتترعش لأول مرة.. ومحتار.. لكن جاب بسرعة إزازة ميا.. وعلبة المناديل.. وبيمسح الدم.. وعيونه لمعت.. وقال برعب..

"تالين انتي بخير يا بنتي.. أنا جنبك.. أبوكي جنبك ومعاكي يا قلب أبوكي.. متخافيش أنا معاكي وانتي بخير.. بس ردي عليا.. ردي على أبوكي ياتالين.." تالين..؟ ..!!! مراد.. بيحط ميا على المناديل وينضف وشها.. والمناديل خلصت.. آريان.. جه بسرعة.. وقال.. "اتفضل يا عمي مناديل كمان.." مراد بلهفة.. "أخد المناديل.. وقال اقفل إزاز العربية وخليك بره يا آريان..! آريان.. حاضر.. وخرج وقفل الباب وكل الإزاز..

مراد.. فك حجاب تالين عشان عليه دم.. وقلع التيشرت بتاعه.. ومسح وشها بيه.. وفستانها.. وحاول على قد ما يقدر يخفي آثار الدم من عليها. وجاب المناديل.. ونضف وشها خالص.. واتعدل بيدور في العربية على أي برفان.. ودور في درج العربية.. وشاف إزازة برفان.. ورش ع إيديه الأول.. وبدأ يفوقها.. تالين.. بدأت تأن وتفوق.. مراد.. ضحك بدموع.. ومسك وشها بإيديه وقال بدقة قلب أب.. "تالين بنتي..!!! تالين.. فتحت عينيها.. وغمضت تاني بتعب..

مراد.. شدها لحضنه بقوة.. وغمض عينيه وبيضحك.. وقال.. "ألف حمد وشكر ليك يارب.." تالين.. رجعت لوعيها.. وهمست.. "بابا..!! مراد.. ضمها لقلبه أكتر وقال.. "أيوه بابا ياحبيبتي.. أنا هنا جنبك ومعاكي متخافيش من حاجة.. طول ما أنا عايش وبتنفس على وش الدنيا دي..؟ عايزك تعرفي إنك في أمان.. أوعي تخافي ابدا ياتالين.." تالين.. بقلب دق بأمل جديد وفرحة كبيرة.. لكن عيطت بوجع كبير.. وكلبت في أبوها.. وقالت بشهقات..

"بابا.. بابا أنا مش مصدقة.. الحمد لله إنك معايا.. بابا أنا كنت خايفة أوي.. خوفت اوي يا بابا.." مراد.. مسح دموعه.. وطلعها من حضنه.. ومسك كتفها.. وقال.. "أنتي بنتي وعمرك ما تخافي من حاجة.. طول ما أنا عايش وبتنفس على وش الدنيا دي..؟ عايزك تعرفي إنك في أمان.. أوعي تخافي ابدا ياتالين.." تالين.. بشهقات.. "غصب عني صدقني يا بابا.. أنا خوفت اوي إن حد يأذيني في نفسي.. خوفت اوي إن حد يكشف شعري أو……!!!

وفتحت عينيها بصدمة.. لأنها شافت شعرها.. مراد.. مسد ع شعرها بحنان وقال.. "متخافيش أنا اللي فكيت حجابك.. محدش يقدر يقرب منك.. أنتي ديما عندك ثقة في ربنا أنه هيحفظك مش كدا؟ تالين.. هزت راسها بدموع.. "ثقتي في الله كبيرة جدا يا بابا.. لكن خوفي ده طبيعي مش قلة إيمان صح يا بابا؟ مراد.. باس جبينها وضمها لقلبه وقال.. "الخوف وقت الخطر طبيعي جدا يا حبيبتي.. لكن ثقتك بالله أنه هيحفظك.. هو اللي وصلنا ليكي في الوقت المناسب.."

تالين.. غمضت عينيها وخرجت منها شهقة وتنهيدة تعب.. وقالت.. "الحمد لله.." مراد.. باس راسها.. وقال.. "حمد الله على سلامتك يا قلب أبوكي.." تالين.. "الله يسلم حضرتك من كل سوء.." مراد.. "يلا خدي اشربي شوية ميا.. والبسى حجابك بسرعة عشان لازم نتحرك.. ومتخافيش من نقط الدم اللي عليه.. تمام؟ تالين.. هزت راسها حاضر يا بابا.. وشربت ولبست الحجاب برعشة في إيديها وجسمها من الرهبة. وبعدها شهقت وحطت إيدها ع بوقها وقالت.. "آرين..؟!

"آرين فين يا بابا..؟! مراد.. حب يطمنها.. وقال.. "آدم راح يجيبها.. وآرين بخير اطمني.." وفتح باب العربية وقال.. "يلا بينا يا آريان..!!! تالين.. فتحت عينيها بدهشة.. "أبيه آريان..؟! آريان.. ركب وأبتسم.. "حبيبتي ياتوتا.. حمد الله على سلامتك.. عاملة إيه دلوقتي؟ تالين.. بدهشة.. "الحمد لله يا أبيه.. حضرتك موجود هنا؟ أنا مش مصدقة.. طيب إزاي؟ آريان.. شغل العربية وساق.. وقال.. "لأ.. دي قصة طويلة.. نبقى نقولها بعدين..!!

تالين.. هزت راسها بتفهم.. وبصت ل مراد.. وقالت بوجع.. "بابا.. أنا عايزة أطمن على ماما..!! مراد بتنهيدة تعب.. "حاضر يا حبيبتي.. أول ما نتجمع كلنا.. وقبل ما نرجع مصر.. هخليكي تطمنيها بنفسك.." وبص ل آريان.. وقال.. "ع القصر بسرعة البرق..!!! آريان.. هز راسه وقال.. "دقيقة واحدة بالظبط ونكون هناك.."