رواية حب بالصدفة الفصل الثامن 8 - بقلم ملك ناصر ناصر

وفجأة انفجرت دارين بالعياط. دارين ببكاء: وحشتوني… وحشتوني أوي. أنا سمعت كلامكم وبقيت كويسة وبقيت بضحك كمان وبتكلم بس… بس مش قادرة أكمل أكتر من كده. مش قادرة أكمل حياتي من بعدكم. بس بس أوعدكم هحاول… وهدخل كلية الطب اللي كان نفسك إني أدخلها يا بابا. وكملت بدموع: هحقق حلمك حتى لو كنت مش موجود. عيون لميس دمعت وكنان كان واقف وحاسس إنه عايز ياخدها في حضنه بقوة ويقولها أنا معاكي وميسيبهاش أبداً.

دارين حطت الورد اللي اشترته على قبر مامتها. دارين بابتسامة وسط دموعها: بصي يا ماما جبتلك الورد الأحمر اللي إنتِ بتحبيه. مش إنتِ بتحبي الورد الأحمر صح. وإنت يا بابا مجبتلكش ورد عشان عارفة إنك عندك حساسية منه ومش بتحبه. لميس قربت منها بدموع وحزن على حالتها: يلا يا حبيبتي عشان نروح. دارين قامت وقفت تاني ومسحت دموعها وقالت بابتسامة: أنا هروح دلوقتي بس… بس هرجعلكوا تاني مش هتأخر عليكم تمام.

لفت وشها وبصت لكنان في عينه وعدت لحظة صمت ونظرات طويلة بينهم. نظرات حزن، نظرات حب، نظرات ومشاعر متلخبطة. لميس: يلا يا كنان. فاق كنان على نفسه واتحرك للعربية. *** عدت أيام مفيش جديد. وجه أول يوم مدرسة لدارين ولميس. لميس: دارييييين! دارين قامت بفزع من على السرير: عاااه! في إيه مين بيموت؟ لميس ضحكت بقوة. دارين: في إيه يا لميس حرام عليكي خضتيني. حد يصحي حد كده. لميس: يلا يا أختي عشان منتأخرش على المدرسة. دارين

ضربت إيدها على راسها بخفة: اوف… صح أنا نسيت أظبط المنبه. الساعة كام؟ لميس: سبعة. دارين: طيب لسه بدري يعني هقوم آخد شاور وأصلي وألبس وأنزل لك. لميس: أشطا مستنياكي. قامت دارين خدت شاور وصّلت ولبست اليونيفورم المدرسي وسابت شعرها على ضهرها ولبست الشنطة بتاعتها ونزلت. لميس أول ما شافتها صفرت: أوبااااا الأحمر على الأسد يمنع الحسد. دارين بضحك: ههههه أنا مش لابسة أحمر أصلاً يا لميس.

لميس: مانا عارفة بس ملقتش مثل تاني أقوله غير ده ههههه. دارين: والله إنتِ مسخرة يا لميس. لميس بثقة وغرور: عارفة عارفة. فهد: أبو غرورك يا شيخة. كان كنان بيبصلها بصه حب… أو عشق، أيهما أقرب؟ لا ثواني كده؟! هو حبها بجد؟ أيوه يا أعزائي هو أحبها بل اتيم بها. دارين اتكسفت جداً من نظراته ليها. الشغالة: الفطار جاهز يا كنان بيه. كنان فاق من شروده على صوت الشغالة. بعد وقت… كانوا في العربية وصلوا قدام المدرسة.

كنان: لو ولد جه وكلمكم متردوش عليه ومتصاحبوش على بنات جديدة غير لما أنا أشوفهم الأول ومتضحكوش كتير وركزوا مع شرح الدرس وبس. وبرجع وبقولكم لو شفت واحدة فيكم مع ولد مش هيحصلكم كويس. لميس بسخرية: ونقعد جنب اللانش بوكس عشان متتسرقش؟ إيه يا كنان ده إحنا عيال صغيرة. فهد بضحك: معلش يابنتي أصل كنان لو مرزعناش حبة نصايح على الصبح ميبقاش كنان. لميس: على رأيك. الكل ضحك. كنان بغيظ: يلا يلا انزلوا. دارين

كانت نازلة بس كنان وقفها: خدي يا دارين. بصت لإيده لقت مطلعلها فلوس. دارين: شكراً مش عايزة. كنان اداها الفلوس في إيدها وادا للميس هي كمان ونزلوا الاتنين. دخلوا البنات على أول حصة وأول ما دخلوا الفصل…