تميم اتنفض من مكانه وقال بغضب: نعم يا أختي بتقولي إيه؟
ليلي بخوف: تميم بلاش تتعصب.
تميم بغضب: التعصب إيه ده؟ أنا هاجي أطق الدنيا فوق دماغك، إيه اللي انتي بتقوليه ده؟
ليلي: تميم لو فضلت تتكلم كده هقفل.
تميم بعصبية: أما أتكلم إزاي إن شاء الله؟ انتي فين؟
ليلي: في البيت.
تميم: البسي وانزلي.
ليلي برفض: تميم...
تميم بغضب: أقسم بالله يا ليلي لو ما نزلتِ لهطلع أجيبك، ويبقى جدع اللي يقف في طريقي.
وقفل السكة وهو كل غضب، وركب عربيته علشان يروح لها.
ليلي قفلت مع تميم وهي خايفة منه، شكله متعصب أوي، ماهو ليه حق إنه يتعصب، يعني هي مستنية لما تقوله كده هيفرح مثلاً؟
ليلي بخوف: ربنا يستر.
لبست وفضلت مستنياه، وأول ما جه استأذنت من مامتها إنها هتخرج، ونزلت على طول وركبت العربية.
وهو طلع بسرعة بالعربية، وطول الطريق ساكت، وليلي قاعدة خايفة مش عارفة تعمل إيه.
نادر وصل ورد لحد باب بيتها.
ورد: شكراً على التوصيلة.
نادر وهو مش بيبص لها: العفو.
ورد: فوني رن.
نادر نظر لها بحدة.
ورد بخوف: ماما والله.
نادر ببرود: أنا ما اتكلمتش.
ورد بغيظ وردت: أيوه يا ماما... أنا تحت البيت أهو... حاضر هطلع... معاذ؟ لأ نادر اللي وصلني. تمام أنا طالعة، سلام.
نادر: هتفضلي قاعدة كتير؟ ورايا شغل.
ورد بغيظ: إيه ده؟ مش عايزة أقعد أساساً، معتش توصلني في أي حتة. ثم قالت بخبث: ده معاذ فضلت قاعدة في عربيته ساعة ومتكلمش.
نادر بغضب: نعم يا رو... امك، وإنتي قاعدة في عربيته ساعة بتهببي إيه؟
ورد بغيظ: أهبب؟!! كنا بنتكلم عادي.
نادر: أيوه كنتوا بتتنيلوا تقولوا إيه برضه؟
ورد: أووف يابني انت مش هتبطل ألفاظك دي؟ إيه اتنيلوا وتهببوا؟
نادر بحدة وتحذير: ورد... كنتوا بتتكلموا تقولوا إيه إن شاء الله؟
ورد بخبث: عادي زي ما بتكلم معاك، ما هو ابن عمتي برضه.
نادر: ياسلام... اطلعي يا ورد، اطلعي، متعصبنيش عليكي علشان مخبطش دماغك في الإزاز. اطلعي.
ورد: طيب يا عم، متتزوقش.
نزلت من العربية وشاورت له باستفزاز وطلعت.
نادر: أنا مالي، في أي، شكلك مش هتجيبيها البر يا ورد.
تميم خد ليلي للمكان اللي اعترف فيه بحبه لها ووقف.
تميم: ممكن أعرف إيه اللي انتي قلتيه ده؟
ليلي: أعتقد إن انت فهمت وسمعت لوحدك.
تميم بحدة: ليلي في إيه؟ مالك؟ من ساعة ما اعترفت لك بحبي وإنتي متغيرتي... ليلي، متخلنيش أندم إني اعترفت لك.
ليلي: تميم انت مش فاهم حاجة.
تميم: لا أنا فاهم يا ليلي.
ليلي باستغراب: فاهم إيه؟
تميم بغضب: فاهم إنك ما بتحبنيش وبتتهربي مني، لأنك انتي اتغيرتي ألا لما اعترفت لك بحبي.
ليلي بلهفة: لا والله يا تميم مش دي الحكاية.
تميم بغضب وصوت عالي: أما إيه اللي حصل؟ تفسيري بإيه؟ امبارح اعترفت لك بحبي وإنتي النهاردة تقوليلي إنك هتتخطبي لواحد تاني؟
ليلي بغضب: وانت تفسر بإيه إنك امبارح تعترف إنك بتحبني وفي نفس الوقت مامتك راحت تطلب إيدك حبيبة صحبتي اللي هي أصلاً بتحبك؟
تميم بصدمة: انتي بتقولي إيه؟
ليلي بتنهيدة: اللي سمعته. حبيبة بتحبك يا تميم، وأنا حاولت أبعد عشان ما أجرحهاش.
تميم بصدمة: حاولت تبعدي؟!! يعني أنا بالنسبة لك ولا حاجة يا ليلي عشان حبيبة جت وقالت إنها بتحبني، فإنتي على طول تبعدي عشان ما تجرحيش صحبتك، لكن أنا أولى عادي صح؟
ثم قال بهدوء: تمام.
وطلع بالعربية.
ليلي بحزن: تميم أنا...
تميم: لو سمحتي يا ليلي، متتكلميش، مش عايز أسمع حاجة تانية.
تميم ساق بهدوء ظاهري، ولكن كان في نار جواه.
نادر روح بيته لقى أمه مستنياه.
نادر: إيه يا أمي قاعدة كده ليه؟
أم نادر: كنت عايزك في كلمتين.
نادر: خير يا حبيبتي.
أم نادر: مش انت طول عمرك عينك على حبيبة بنت خالتك؟
فا إيه رأيك أكلم مامتها ونروح نخطبها ليك.
نادر: ...
سعاد بغضب: هو انت كل يوم هتخرج انت والبت بنت عبير؟
تميم: معلش يا ماما أنا تعبان، سيبيني أنام.
سعاد: لا مش هسيبك، وبعدين إيه اللي قلته لحبيبة ده؟ تروح تقول للبت إنها مش بتحبها.
تميم بهدوء: أنا مقلتش إنها مش بحبها، ثانياً ده عشان انتي رحتي من روايا واتقدمتي بدون حتى ما أنا أعرف، ثالثاً بقا سيبني أدخل أنام عشان أنا على أخري.
سعاد: وانت على آخرك إيه؟ البت ليلي دي عملت لك إيه؟
تميم: كل خير يا أمي. تصبحي على خير بقا.
سعاد: استني، طب خلاص أنا باخد رأيك أهو، إيه رأيك في البت حبيبة بنت حلال ومؤدبة، ده غير إن باين عليها إنها بتحبك.
تميم افتكر لما ليلي قالت له إن حبيبة بتحبه وكلام ليلي على أنها حاولت تبعد عنه، وقال بهدوء: ...