رواية هديه من مجهول الفصل السادس 6 - بقلم محمد السبكي

استنى لغاية لما مشيت عشان يبعتلك. ده عفريت ناصح أوي. قلت لها بخوف: شكله كدا عفريت بجد يا بت يا لميا. أنا خاېفة يكون الچن العاشق ده اللي بيقولوا عليه. قالت لي: وتخافي ليه؟ هما البني أدمين يعني اللي عدلين أوي؟ بالعكس ده أنا شايفة إنك محظوظة وجدا كمان. قلت لها بعدم فهم: قصدك إيه؟ قالت لي: قصدي إنك لازم تستغلي الموضوع ده على قد ما تقدري. مش هو قالك ف الجواب أنت بس اتمني؟

خلاص اتمني يا ستي وخليه يحقق. عيشي لك يومين واستمتعي بالحياة بقى. قلت لها بصوت واطي: بس ده بيجيب لي حاجات مسروقة. قالت لي بتحدي: لا أنت اللي اتمنيتي العقد عشان كدا جابهولك. جربي كدا تتمني حاجة تانية ونشوف هيحصل إيه. وهنروح بعيد ليه؟ خليه يعالج أبوك التعبان ده. قلت لها: تصدقي صح أنا هخليه يحجز لي عند الدكتور. ضحكت وقالت: هتفضلي طول عمرك فقرية؟

يا بنتي مش أبوك أصلا محتاج عملية كبيرة. خليه يدفع لك فلوسها وتعملي له إياه وتخلصي بقى من الأدوية والمسكنات ووجع القلب ده كله. فعلا لميا عندها حق. مش أنا وافقت أدخل اللعبة دي من البداية يبقى لازم استفاد منها على أكمل وجه. ومفيش أهم من عملية بابا دلوقتي. والعملية غالية جدا علي. استحالة أقدر أجمع تكاليفها ولو بعد 100 سنة. والعقد كمان استحالة أبيعه دلوقتي. الشرطة مش هتعدي الموضوع بالبساطة دي.

روحت الليلة دي وأنا مقررة إني هرد على الرسايل بالكلام ده. مش هو قالي اتمني وأنا أنفذ. أنا بقى هتمنى وأشوف. وأول لما وصلت دخلت الأوضة وقفلت الباب علي. مسكت الفون واستنيت الرسالة اللي بتيجي لي من رقم خاص. ياترى ليه بتتبعت من رقم خاص؟ ليه خاېف يعرفني رقمه؟ هما العفارېت بيخافوا؟ إيه اللي أنا بقوله ده كمان؟ هما العفارېت أصلا معاهم تليفونات. وف ثواني وصلت الرسالة المتوقعة. رسالة مكتوب فيها: وحشتيني.

مش عارفة ليه فرحت. أنا عارفة إنه هبل مني بس ده كان احساسي وقتها. أول مرة أصلا حد يهتم بي ويشيل همي. أنا دمي اللي بشيل الهم والمصايب كلها. كتبت له: شكرا. رد وكتب لي: حلوة شكرا برضه مش وحشة. قولي لي بقى يا ستي عايزة تعملي عملية باباك امتى. اتصدمت للحظات. بس بيني وبين نفسي قلت: عادي يا بت ماتخافيش. ده عفريت. يعني يقدر يعرف كل حاجة. كتبت له: ف أسرع وقت وبجد هكون ممتنة لك جدا.

كتب لي: بس ف حاجة مهمة لازم تعرفيها. أنا مش عفريت يا شهدا. ترعبت أوي من كلمته. هو لو مش عفريت هيكون إيه؟ شيطان؟ كتبت له: اومال أنت إيه؟ وازاي بتقدر تعرف بسهولة كل اللي بفكر فيه.