رواية حكاية قمر الفصل الحادي والثلاثون 31 - بقلم هاجر محمود

نرجع لفارس، يوم ورا يوم وفارس بيتابع مع الدكتور النفسي وبيتابع مع الدكتور العضوي. وفي يوم في آخر أسبوع في شهر الإجازة، كان في العيادة عند الدكتور بيتابع آخر تحليل أنيميا. وبعد ما قرأه الدكتور، بص لفارس وقال بابتسامة: كده تمام، حمدلله على سلامتك. فارس: الله يسلمك يا دكتور. الدكتور: خلي بالك من نفسك وبلاش إهمال. فارس: حاضر، عن إذنك. الدكتور: اتفضل. وناوله نتيجة التحليل الأخير، وأخده فارس منه ومشي. راح للدكتور النفسي

بتاعه ودخل عليه وسأله: أنا حالتي إيه؟ الدكتور: انت في تحسن كبير، والدليل على كده حبك لنادين، وإنك تقبلت إن قمر مش عاوزاك واعترفت بغلطاتك. فارس: يعني أنا خفيت خلاص؟ الدكتور: مجرد ما ترجع شغلك وتبدأ تتعامل مع الناس من تاني هتخف خالص. فارس: شكراً يا دكتور. وخرج من عنده ورجع شقته. ودخلها لقى أبوه مستنيه، وأول ما شافه سأله: عملت إيه يا فارس؟ ناوله فارس نتيجة التحليل وقال: الحمدلله. الحج سالم: الحمدلله، هترجع شغلك إمتى؟

فارس: كمان 3 أيام. الحج سالم: على خير. فارس: في حاجة عاوز أتكلم معاك فيها. الحج سالم: خير. فارس: عاوز أخطب نادين. الحج سالم بابتسامة: ياريت، دي بنت حلال وتستاهلك، بس انت متأكد؟ فارس: طبعاً، هي الوحيدة اللي وقفت جنبي معاك وأنا عيان واستحملت كل حاجة عشان خاطري، كفاية حنيتها واهتمامها وخوفها وسهرها على راحتي قبل ما تسافر. الحج سالم: خلاص نروح بكرة نخطبها من أمها. فارس: ماشي.

في الوقت ده، وصلت رسالة لفارس على تليفونه من سيف. فتحتها وقرأها واستغرب بفرحة. فسأله أبوه: في إيه؟ فارس: أنا اترقيت، بقيت رائد. أخده سالم في حضنه وقال: مبروك يا بني. فارس: الله يبارك فيك يا بابا، انت ونادين اللي هتلبسوني الرتبة الجديدة. الحج سالم: إن شاء الله. فارس: طيب يلا ناكل، ولا تحب نخرج ناكل بره. الحج سالم: لا، نادين طبخت قبل ما تسافر. فارس: ماشي. وراح فارس جاب الأكل وقعد هو وأبوه يتغدوا سوا.

وبعد الغدا، خرجوا يتمشوا شوية مع بعض يختاروا الهدايا اللي هيروحوا يخطبوا بيها نادين. وبعد ما خلصوا، رجعوا لشقة فارس ودخلوا ناموا. وتاني يوم الصبح، اتصل فارس بنادين فقال: أنا وعمي جايين عندكوا. نادين بفرحة: تنوروا، أهلاً بيكم... نروح لنادين. قبل يومين من سفرها، كانت نادين قاعدة في الصالة بتكلم أمها. فسألتها: مش كفاية قعاد بقا عندك ولا إيه؟ نادين: ليه يا ماما كده؟ ناهد: ارجعي من غير كلام. نادين: وفرضاً سألوني عن السبب؟

ناهد: قولي إني تعبانة شوية. نادين: حاضر. وقفت التليفون وقامت وقفت في البلكونة تستنى فارس يرجع من بره. وبتفكر هتقوله إزاي إنها هتمشي. فقعدت على كرسي وفضلت تفتكر كل حاجة حلوة حصلت بينها وبين فارس الفترة الأخيرة. لحد ما رجع فارس ودخل أوضته. فدخلت وراه وقالتله: أنا همشي. فارس باستغراب: ليه؟ نادين: أمي تعبانة شوية. فارس: خلاص سافري، ولو إني اتعودت على وجودك معايا. نادين: هاجي تاني. مسك فارس إيديها وبص لعيونها وقال:

أنا بحبك أوي يا نادين. نادين بمفاجأة: أخيراً يا شيخ طلعت روحك. ضحك فارس وحضنوا بعض. وبعد شوية، حاولت نادين تفك إيدين فارس من حوالين وسطها وقالت: إيه خلاص، عشان أحضر الشنطة. سابها فارس وقال: ماشي، كام شهر ومش هتعرفي تقولي "خلاص" دي تاني. وبعد عنها وسابته وراحت تحضر شنطتها. تاني يوم، سافرت لأمها. وأول ما وصلت، دخلت أوضتها ونامت. وبعد كام ساعة، صحيت على صوت أمها وهي بتنادي عليها عشان يتغدوا سوا. فقامت نادين وسألتها:

هي الساعة كام؟ ناهد: سبعة، يلا. فراحت نادين غسلت وشها وقعدت مع أمها ياكلوا. فسألتها: عاملة إيه مع فارس؟ نادين بابتسامة: اعترف أخيراً بحبه لي. ناهد: كويس أوي. نادين: لا مش كويس، انتي ناسيه اللي حصل بيني وبين تيام، وفارس ميستاهلش كده. ناهد: فارس ابن عمك، ويوم ما يتجوزك مش هيفضحك. نادين: تفتكري أصلاً هو في دماغه جواز بعد قمر؟ ناهد: وليه لا، هي مش آخر واحدة في الدنيا، وإنتي أولى بيه منها. سكتت نادين وكملت أكل.

وبعد ما خلصت، رجعت أوضتها وفضلت تعيط لحد ما نامت. وقامت تاني يوم على صوت رنة تليفونها برقم فارس. وبعد ما ردت عليه وخلصت مكالمة، ندهت على أمها وقالت بفرحة كبيرة: جاي يخطبني، فارس جااااي. ناهد بفرحة: مبروك يا حبيبتي. نادين: يلا يا ماما اعملي غدا محترم وأنا هروح أشوف هلبس إيه عشان نقابلهم. ناهد: من عينيا. وبعد 3 ساعات، وصل فارس وأبوه لبيت نادين. ورحبت بيهم ناهد ودخلوا قعدوا في الصالون وبدأوا يتكلموا سوا.

وبعد شوية، دخلت نادين وقرأوا الفاتحة واتفقوا إن الفرح بعد 6 شهور. وبعد ما أخدوا ضيافتهم، طلع فارس علبة شبكة كبيرة وفتحها وبدأ يلبسها لنادين. وزغرطت أمها وكان يوم جميل. لحد ما فارس وأبوه رجعوا بيت الحج سالم. وبات فارس هناك وتاني يوم رجع شقته وأبوه فضل في إسكندرية. نروح لقمر. عدى أسبوعين وقمر قعدت في البيت بتستعد للامتحانات. وكل يوم وردة مبعوته ليها ومعاها كارت. وعدى أسبوع كمان.

وفي يوم، كانت قمر في أوضتها بتذاكر عشان الامتحانات خلاص. وفجأة سرحت وسألت نفسها: هو بطل يبعت ورد ليه؟ طيب هو مين؟ وقامت راحت لوالدتها وسألتها: هو مجاش ورد النهارده برضه؟ نبيلة: لا مجاش. قمر: طيب، هروح أكمل مذاكرة. نبيلة: ماشي. ورجعت قمر أوضتها وقعدت قدام الكتب وهي ساكتة. لحد ما تليفونها رن برقم أمل. فردت عليها وبعد ما سلموا على بعض، قالتلها أمل:

حبيت تكوني أول واحدة أعزمها على كتب كتابي بعد بكرة والفرح بعد الامتحانات بأسبوع. قمر: ألف مبروك، وأكيد هاجي. وبعد ما خلصت مكالمة، رجعت قمر تكمل مذاكرتها. وتاني يوم، قامت قمر تحضر نفسها وتجهز لبسها. وبعد ما خلصت، استأذنت أبوها تروح وأخوها يوصلها. وتاني يوم، قمر راحت المكان اللي وصفته أمل ليها عشان كتب الكتاب. وهناك، وقفت جنب أمل وهي بتمضي على عقد الجواز. وبعد ما خلصت، باركتلها قمر وحضنتها بفرحة كبيرة أوي وباركت لزياد.

وبعد ما خلص كتب الكتاب، طلعت قمر وقفت بره تستنى أخوها. وهي واقفة، سمعت حد بينادي عليها. فلفت للصوت، لقت دكتور أنس بيقرب منها وهو بيسألها: واقفة كده ليه؟ قمر: مستنية أخويا. أنس: عقبالك. قمر بكسوف: شكراً يا دكتور. أنس بغيرة: معايا أنا مش مع حد تاني. سكتت قمر بابتسامة. أما أنس فسألها: مالك؟ قمر: مفيش، مستغربة شوية. أنس: من إيه؟ قمر: معاملتك معايا في الجامعة حاجة وبره الجامعة حاجة تانية. أنس:

طبيعي، عشان محدش يتكلم علينا. قمر: عندك حق. وفضلوا يتكلموا شوية لحد ما وصل أياد، واتعرف على أنس وأخد قمر ومشي. وعدى أسبوع كمان وبدأت الامتحانات. وكل مرة قمر تخلص امتحان وتخرج تلاقي أنس واقف مستنيها بيطمن عليها وعلى مجموعة طلبة تانيين معاها. لحد ما آخر يوم امتحان، خرجت قمر من لجنتها بس ملقتش دكتور أنس. فاستغربت وفضلت واقفة تدور عليه بعينيها في المكان. لحد ما لقت أمل بتسألها: بتدوري على مين؟ قمر: ها؟ لا ولا حاجة. أمل:

طيب يلا بينا. قمر: يلا. نروح لطارق. كان طارق في شركته ساعة ما تليفونه رن برقم غريب. فرد طارق عليه وسأله: مين معايا؟ -:……………… طارق: وحضرتك عاوز إيه؟ -:………………. طارق: وإيه اللي يخليك متأكد إنها هتوافق؟ -:………………. طارق: أنا موافق، انت إنسان هايل. -:………………. طارق: ماشي، إحنا هنكون هناك كلنا. -:……………….. طارق: مع السلامة. وعدت الأيام. وجه يوم فرح أمل. وجهزت قمر ولبست فستان أوف وايت بسيط وحطت ميك أب خفيف.

وأهلها جهزوا وراحوا كلهم فرح أمل ووصلوا هناك وبدأوا كلهم يحتفلوا سوا. وشافت قمر زمايلها البنات وسلمت عليهم وراحت قعدت جنب أهلها. وفي آخر الفرح، سمعت قمر الـ DJ بيقول: ياريت كل الأنسات يتفضلوا معانا عالبيست ورا العروسة عشان البوكيه. قامت قمر وقفت مع زمايلها البنات ورا أمل. ورفعت أمل البوكيه عشان تحدفه وكلهم وراها بيقولوا: ١…٢…٣ وبدل ما أمل ترمي البوكيه، لفت لقمر وسلمته ليها بابتسامة. وفجأة لقت كشاف متسلط عليها.

وأمل خلت قمر تلف وراها، فاتفاجأت قمر بأنس راكع على ركبته ونص قدام قمر وفاتح علبة فيها خاتم وبيقول في المايك: تتجوزيني؟ بصت قمر لأبوها بكسوف. أما طارق فهز دماغه ليها بالموافقة. فقالت قمر: أيوه. وجت واحدة من وراهم ولبست قمر طرحة فستان. ووقف أنس ولبس قمر الخاتم في إيدها وقال: بحبك. قمر بابتسامة: وأنا كمان بحبك أوي. قرب طارق منهم وبارك لهم وحضن قمر. فسأله أنس: إيه رأي حضرتك نخليها خطوبة رسمية؟ طارق باستغراب:

ماهو رسمي أه. أنس: لا، اكتب على قمر دلوقتي. بص طارق لقمر وسألها: إيه رأيك؟ قمر: موافقة. فنادى أنس: هاتوا المأذون. ودخل مأذون بعمة. وقعد أنس قدام طارق وكتبوا الكتاب. وبعد ما خلصوا، قال أنس: مبروك. كسفت قمر وقالت: الله يبارك فيك. أنس: تعالي، عاوزك في حاجة مهمة. قمر: ماشي. وخرجوا بره القاعة. وقفت قمر قدامه وقالتله: قبل ما تقول أي حاجة، انت اللي بعت الورد؟ أنس: أيوه أنا. قمر:

وعرفت إزاي إني بحب الورد الأحمر وكمان نوع الشيكولاتة؟ أنس: من أصحابك ومن بروفايلك عالفيس بوك. استغربت قمر وسكتت شوية. وبعدين سألته: وليه مقولتش لما سألتك في الكلية؟ أنس: عشان محدش من الطلبة يجرحك بكلمة، لكن من بكرة خلاص محدش له حاجة عندنا. أنس: لو قلت سبب يبقى بحبك عشانه، لكن مفيش، هو ربنا أمر قلبي بحبك واني أشوف فيكي العوض منه عن كل حاجة وحشة. قمر: بس أنا… مسك أنس إيديها وباسهم ورفع راسه ليها وقال بابتسامة صافية:

مش عاوز أعرف، بس أنا هعوضك عن كل حاجة وحشة وهنفتح صفحة جديدة ونكتبها سوا بطريقة ترضي ربنا. قمر: عندك حق. قرب منها أنس وأخدها في حضنه وهمسلها: عارفة بقالي قد إيه مستني الحضن ده؟ قالت قمر بفرحة وهي حاسة بالأمان: قد إيه؟ أنس بفرحة: ٤ سنين يا مفترية. ضحكت قمر. أما أنس فقال: الخطوبة دي ٦ شهور بس. قمر: إن شاء الله...