رواية حكاية قمر الفصل الخامس والأربعون 45 - بقلم وردة في البستان

هدي: إيه يا حبيبتي، في حاجة؟ صافي: أنا بحبك أوي يا ماما.. انتي كلامك طلع صح، واسر كلمني أخيراً. هدي: طيب يا ستي، الحمد لله.. نخرج من الأوضة بقا ونبطل اكتئاب شوية. صافي: أنا هبقى كويسة عشان خاطر اسر قالي ابقي كويسة. هدي: يعني عشان خاطر اسر بس؟ صافي: بصراحة أه يا ماما. هدي: ماشي يا حبيبتي وأنا مش هزعل.. ربنا يفرحك دايماً. صافي: يا رب.. أنا مبسوطة أوي، أنا أنا عايزة أتنطط.. أنا بحبه أوي أوي يا ماما.

هدي: بصي يا صافي يا حبيبتي.. أنا عايزكي تكوني كويسة دايماً.. مش عايزة الحب يأثر عليكي بالشكل ده. صافي: حاضر يا ماما، هحاول.. وخلاص طالما اسر رجعلي أنا مش هضايق تاني.. أنا هروح أعمل كيكة حلوة أوي بمناسبة دي. هدي: ربنا يهديكي يا صافي. *** سامح: الحمد لله اليوم عدى على خير. نجلاء: الحمد لله. سامح: لا والبت شكلها مبسوطة كده.. الحمد لله. نجلاء: الحمد لله. سامح: مالك يا نجلاء؟ انتي شكلك مش مبسوطة ليه؟

مش كان نفسك تفرحي ببنتك؟ نجلاء: مال شكلي يا سامح، مانا كويسة أهو. كنزي: لا يا ماما مش كويسة.. وأنا عارفة ليه. نجلاء: تاني يا كنزي؟ بتتصنتي علينا تاني؟ كنزي: والله ما بتنصت، دا الكلام بينط في ودني لوحده. نجلاء: لا ونبي.. على العموم أنا مش زعلانة من حاجة. سامح: وشك بيقول غير كده. نجلاء: الله بقا يا سامح، انت هتزعلني بالعافية؟ سامح: لا مش بالعافية، بس أنا عارفك كويس. كنزي: هي مضايقة عشان أنا وافقت إني أعيش مع حماتي.

سامح: صح الكلام ده يا نجلاء؟ نجلاء: بصراحة كده أه.. إزاي توافقوا على كده؟ طب نقول البت وصغيرة وهبلة ووافقت.. إنما انت يا سامح توافق كمان؟ سامح: والله أنا عايز راحة بنتي.. وطالما هي موافقة خلاص، اعترض ليه؟ هي اللي هتعيش مش أنا. نجلاء: بس واجب علينا نوعيها يا سامح.. مانا جربت الموضوع ولا نسيت يا سامح؟ سامح: الله يرحمها بقا يا نجلاء. نجلاء: الله يرحمها يا أخويا، بس ليه بنتي تعيش اللي عاشته؟

كنزي: وليه يا ماما نتوقع الحاجة الوحشة؟ ما يمكن ماما فريال تكون غير تيتا. نجلاء: جتكوا ماو لما يقف في زورك.. لحقت تبقى ماما يا أختي.. وبعدين أنا مش مرتاحة. كنزي: انتي بتغيري يا نوجا.. ونبي ما في ماما غيرك. سامح: دا الموضوع شكله غيره بقا. نجلاء: لا غيره ولا بتاع.. اسكت.. اسكت أنا مبقوقة منك انت وبنتك.. اللي تنشك في لسانها دي اللي وافقت. كنزي: يعني عايزني أعمل إيه يا ماما؟

هي سألتني ومردتش أحرجها.. وبعدين ماهي عندها حق.. هي مالهاش غير حازم.. ومحدش يحب يعيش لوحده.. واهي تسليني لما حازم يكون في الشغل. نجلاء: آه تسليكي.. ونبي يا أختي تتوكسي على وكستك شوية. كنزي: يوة بقا.. هو أنا كل حاجة بعملها غلط؟ سامح: لا يا حبيبتي، انتي عملتي الصح مش الغلط. نجلاء: اسمعي كلام أبوكي بس مترجعيش تشتكيلي بقا. كنزي: يا ماما بقا ونبي متزعلي.. أنا عايزكي مبسوطة وفرحانة زيي. سامح: مين بيرن يا كنزي؟

كنزي: دا حازم يا بابا. سامح: الله.. هو خد رقمك؟ كنزي: ااه هو خد رقمي. سامح: امتى؟ كنزي: إيه؟ سامح: خد رقمك امتى؟ نجلاء: أيوة يا سامح، هو طلبه مني وأنا عطيتهوله.. روحي يا كنزي كلمي خطيبك. كنزي: حاضر يا ماما.. متزعليش بقا يا نوجة قلبي. سامح: خلاص بقا متزعليش عشان خاطر بنتك. نجلاء: وأنا سكت وعديت اليوم عشان حد غيرها يا سامح.. يلا ربنا يجعل حظها أحسن من حظي.. أنا هتمناها إيه غير كل خير.. وأفرح بيها وتبقى في أحسن حال.

سامح: بإذن الله ربنا هيكرمها. نجلاء: يا رب يا سامح. *** قمر: أيوة يا عربي.. عامل إيه؟ عربي: أنا الحمد لله كويس.. طمنيني عليكم، انتوا كويسين؟ قمر: كلنا بخير الحمد لله. عربي: والله مش عارف أقولك إيه.. بس الموضوع اللي كنتي مكلماني عنه لسه ما فيش جديد فيه. قمر: لا، أنا كنت عايزك في حاجة تانية.. أنا عايزك تدورلي على بيت. عربي: من عنيا.. عايزة في الحارة هنا ولا في حارة تانية؟

قمر: لا حارة إيه.. أنا عايزة في مكان حلو كده.. وبيت يكون كبير.. هتعرف؟ عربي: أيوة طبعاً هعرف.. بس ده هيكلفك كتير يا قمر. قمر: متقلقش من ناحية الفلوس.. المهم المكان يكون كويس. عربي: من عنيا يا قمر.. حاجة تانية؟ قمر: تسلملي يا أخويا.. ابقي سلملي على عم سيد وقوله إني هبقى أجيله بإذن الله. عربي: يوصل يا قمر. قمر: يلا سلام. عربي: سلام. *** سهر: صباح الخير يا صافي.. شكلك بقيتي أحسن دلوقتي.

صافي: أه الحمد لله بقيت كويسة.. انتي رايحة الشغل بدري كده؟ سهر: أه يا حبيبتي.. وقولت أعدي عليكي أديكي الحاجات اللي طلبتيها مني.. خدي أهو ده العلاج اللي خلص من عندك جبتلك بداله. صافي: متشكرة أوي يا سهر.. تعبتك معايا.. بس انتي جايبة كتير ليه؟ سهر: أنا قولت أجيبلك تخليه عندك احتياطي.. عشان مش ضامنة أعرف أجيبه تاني.. زي ما قولتلك ده بيجيلي من بره. صافي: إذا كان كده ماشي يا ستي. سهر: هو اسر كلمك؟

صافي: أه كلمني.. أومال أنا بقيت كويسة كده إزاي يعني. سهر: ها.. وعمل إيه مع ليل؟ صافي: مش عارفة والله.. بس إن شاء الله يكون بعد عنها. هدي: صباح الخير يا بنات. سهر: صباح النور. صافي: صباح النور يا ماما. هدي: بما إنكم صاحيين بدري كده.. انزلوا افطروا بقا. صافي: لا أنا مش عايزة آكل. هدي: ليه كده بس.. ده فاروق عايز يفطر معاكي. صافي: بجد بابا تحت؟ ده واحشني أوي.. أنا هنزل أفطر معاه. هدي: يلا يا سهر انتي كمان.

سهر: مش هينفع عشان متأخرش على الشغل. هدي: شغل إيه بس اللي تتأخري عليه.. أومال لو مكنتش شركتنا.. يلا من غير حجج قدامي. سهر: حاضر. صافي: بابا وحشني أوي. فاروق: وانتي كمان يا روح بابا.. تعالي اقعدي جنبي. سهر وهدي نزلوا قعدوا.. وسهر مركزة معاهم. فاروق: سمعت إنك كنتي مكتئبة.. خير؟ صافي: ماما مش بيتبل في بوقها فولة علطول كده. فاروق: هدي متقدرش تخبي عليا حاجة.. ها بقا مالك؟

صافي: كنت زعلانة شوية واسر مكنش بيكلمني.. بس كلمني وبقيت كويسة. فاروق: يعني خلاص مبقيتيش مكتئبة؟ صافي: أه خلاص. فاروق: طيب.. أنا ألغي بقا خروجة النهارده. صافي: إيه دا؟ خروجة إيه؟ فاروق: أصل لما سمعت إن بنتي حبيبتي زعلانة.. قولت لازم يا فاروف تاخد إجازة وتخرجها. صافي: بجد يا بابا؟ هييه! فاروق: الكلام ده كان قبل ما أعرف إن سي اسر كلمك وبقيتي كويسة.. خلاص ماليش لازمة أنا.

صافي: لا طبعاً مفيش الكلام ده.. انت هتخرجني زي ما قولت. فاروق: هو عافية يا بت انتي؟ صافي: أيوه طبعاً.. وهتوديني السينما كمان. فاروق: حاضر يا حبيبتي عيوني ليكي.. هو أنا ليا غيرك. هدي: حلو أوي.. وخدوا معاكم سهر تغيير جو شوية. صافي: أيوة يا سهر.. تعالي معانا. فاروق: سهر عندها شغل مش فاضية.. مش هآجز أنا وهي ونسيب شغلنا كده.. ولا انتي إيه رأيك يا سهر؟ سهر: فاروق عنده حق.. أنا عندي شغل لازم أخلصه.. عن إذنكم عشان متأخرش.

هدي: ليه كده يا فاروق؟ ضايقتها وخلتها تقوم من ع الأكل كده؟ فاروق: أنا مش شايف إن كلامي يضايق.. أنا بقول الصح.. ولو سمحتي يا هدي متدخليش بيني وبين اختي. هدي: ماهو انت لازم تغير معاملتك معاها دي.. ارحمها شوية. فاروق: جرا إيه يا هدي؟ انتي هتعلميني أتعامل إزاي مع أختي.. وبعدين هي اتعودت خلاص. هدي: لا مش هعلمك حاجة يا فاروق.. انت حر.. بس كل واحد عنده طاقة.. ومتلومش غير نفسك في الآخر.. عن إذنك.

فاروق: يوووه.. سديتوا نفسي.. مش واكل. *** اسر: تونة.. ازيك؟ تونة: كويسة.. خير.. عايز إيه؟ اسر: ليه المعاملة دي بس؟ تونة: مزاجي مش رايق والله يا اسر. اسر: ليه يا أم العيال؟ الراجل منكد عليكي قبل ما ينزل؟ تونة: أه ونبي يا أخويا.. ومصمم أعمله محشي على الغدا إنهاردة.. وأقوله تعبانة يقولي محشي محشي. اسر: لا.. ازاي ده يحصل؟ دانتي لازم تطلقي منه.. إزاي يعاملك كده؟ انتي ماوركيش رجالة ولا إيه؟ تونة: فين الرجالة اللي ورايا؟

انت بتشتغلني يابتاعة أنت؟ اسر: لا والله.. أنا أقدر.. دانتي تونة بونبونية البيت.. بسكوتة يا ناس.. بسكوتة. تونة: أنا عارفة إن عينك عليا من أول ما شفتني.. بس ميصحش كده.. اطلبني من قمر وأنا هوافق. اسر: أطلبك إزاي؟ تونة: اخطبني يعني. اسر: مش كبيرة عليا شوية انتي ياتونة؟ تونة: الحب مش بالسن يا حسسين. اسر: يخربيتك.. انتي مسخرة. تونة: أنا عارفة إني شربات أصلاً. اسر: وسكر كمان. تونة: لا كدا هتغر.

اسر: انتي تتغري براحتك.. بس أنا كنت عايزك في حاجة. تونة: ها.. ارغي. اسر: والله نسيت أنا كنت جاي أكلمك ع إيه. تونة: كنت عايز تسأل على ليل.. ها.. إيه تاني؟ اسر: يابنت اللعيبة.. عرفتي منين؟ تونة: عيب عليك.. دانا تونة. اسر: طيب قوليلي.. هي فين دلوقتي؟ تونة: تلقيها متلقحة جوا.. ولا مخمودة. اسر: مخمودة! .. طب ماتدخلي تناديها كده.