رواية حكاية قمر الفصل السابع والثلاثون 37 - بقلم وردة في البستان

اسر فهم قصدها : لا انا مش جاي لحد غيرك قمر باستغراب: عاوزني انا! خير اسر : خير متقلقيش.. بس تعالي معايا قمر : اجي معاك ع فين اسر : تعالي هنركب العربية وهنمشي بعيد عن الفيلا قمر: بعيد عن الفيلا ليه.. هو في إيه يا أستاذ أسر.. ماتنطق اسر : ياستي قولتلك متقلقيش.. كل الحكاية مش عاوز ليل تشوفنا مع بعض قمر بتبص حواليها : ليل.. هي فين ليل اسر : متقلقيش أنا اطمنت عليها إنها ركبت وزمانها ع وصول.. ف ياريت تيجي معايا

قبل ما توصل وتشوفنا قمر : طيب اتفضل وأنا جاية وراك اسر : ماشي متتأخرش *** أحمد : مساء الخير يا عايدة عايدة: مساء النور يا بيه.. تأمرني بحاجة أحمد : هما الولاد هنا عايدة : كريم بس اللي ف أوضته يا بيه أحمد : ونور فين! عايدة : خرجت من حوالي ساعة كدا وزين بيه خرج وراها وأسر من الصبح مجاش اظاهر كدا ف الكلية أحمد : طيب روحي شوفي شغلك عايدة : تحب أحضرلك العشا أحمد : لا لما يجوا عايدة : تحت أمرك يا بيه عن إذنك *** قمر

ركبت العربية مع أسر قمر : خير يا أستاذ أسر اسر : مبدئيا إحنا نشيل كلمة أستاذ دي مالهاش لازمة قمر: ياخويا ودا وقته ماتنطق اسر : إيه التحول دا قمر : ماهو أنت مجرجني كدا وأنا مش فاهمة حاجة.. وأيشي موضوع مهم وأيشي مش عاوز ليل تشوفنا.. هو في إيه اسر : ايشي! طيب أنا هدخل ف الموضوع علطول ماشي قمر : ها اخلص اسر : بصي ياستي أنا خدت بالي من نظراتك ليا ول ليل.. وحاسس بخوفك عليها قمر : طب الحمد لله إنك طلعت عندك دم وبتحس كدا

اسر : احم احم.. ممكن أكمل طب قمر : اتفضل كمل اسر : أنا جيت علشان أقولك إنك تطمني.. أنا مش عاوز آذيها قمر : اومال عاوز إيه اسر : بصراحة أنا أول لما شوفتها أعجبت بيها.. وبعدها ف موقف حصل بينا كدا خلاني مبقاش طايقها قمر : معلش بس أنا مش فاهمة حاجة.. ممكن تحكي من الأول اسر : هحكيلك.. *** نور سلمت ع سائر ببرود وقعدت سائر : تحبي تشربي إيه نور : شكرا مش عاوزة سائر للجرسون : طيب اتفضل أنت دلوقتي

نور : ممكن أعرف إيه الكلام اللي عاوز تقوله سائر مسك إيدها: عاوز أقولك إنك وحشتيني يا نور نور شدت إيدها : لو سمحت يا سائر.. اللي بتعمله دا مالهوش لازمة سائر : أنا مش بعمل حاجة.. انتي وحشتيني بجد نور : وأنا قولت مالهوش لازمة! سائر : حرام عليكي يا نور.. أنا راجع مخصوص علشانك أنتِ نور : حرام عليا أنا! وراجع علشاني؟ ولما أنت راجع علشاني مشيت وسبتني ليه من الأول سائر : أنا مسبتكيش.. انتي عارفة أنا مشيت ليه

نور : لا سبتني يا سائر.. سائر : مسبتكيش.. بس مكنتش هقدر أعيش هنا وأبقى مرتاح.. وإنتي عارفة ليه كويس أوي.. نور : عارفة ليه.. بس أنا كان ذنبي إيه ف كل دا.. أنت مفكرتش فيا.. أنت فكرت ف نفسك وف راحتك.. سألت نفسك هل أنا هكون مرتاحة ولالا.. طبعًا لا المهم راحتك سائر : صدقيني مكنش عندي حل تاني.. أنا فقدت أمي وفجأة لقيت بابا جايبلي واحدة تانية وبيفرضها عليا.. وعاوزها تاخد مكان أمي.. مكنش قدامي حل غير إني أبعد عنهم

نور : كان ممكن تواجه كل دا بس أنت معملتش كدا.. أنت بتهرب من غلطك.. واخد باباك وجوزاه شماعة تعلق غلطك عليه.. وأنا مكنش ليا ذنب وخلتني مذنبة زيهم.. فاكر آخر مقابلة بينا لما اعترضت ع سفرك علشان مش عاوزك تبعد عني قولتلي إيه؟ سائر سكت

نور : قولتلي أنتِ أنانية.. مش بتفكري غير ف نفسك.. عاوزة راحتك وسعادتك ع حسابي.. مشيت وسبتني من غير ما تسمعني ٨ سنين معرفتش عنك حاجة فيهم.. قررت تبعد عن الكل حتى أنا.. جاي دلوقتي تقول راجع علشاني؟ بعد إيه

سائر : انتي عندك حق ف كل كلمة.. أنا خدتك بذنبهم.. أنا كنت كاره حياتي حاولت أبعد قولت أنسى الكل.. مكنتش عاوز حاجة تفكرني بمصر.. وحاولت أنساكي.. بس معرفتش أنساكي.. كنت هكمل دراستي وارجع أتزوجك ونسافر.. بس مقدرتش استحمل لحد ما أخلص دراستي.. نزلت مخصوص قبل عيد ميلادك علشان أكون معاكي.. اديني فرصة تانية يا نور وأوعدك مش هزعلك تاني نور : وأنا مش موافقة سائر : ليه مش موافقة يا نور.. أنا متأكد إنك بتحبيني

نور: آه لسه بحبك ومحدش دخل حياتي بعدك ولا كان حد هيدخل.. بس أنا معنديش استعداد لصدمات تانية.. خلي شوية الحب اللي فاضلين لك ف قلبي ومتضيعهمش سائر : صدقيني مش هضيعهم.. والله أنا مش عاوز غيرك اديني فرصة تانية.. نور : أنا لازم أمشي سائر : بس انتي مردتيش عليا نور : بعدين يا سائر بعدين.. عن إذنك *** قمر باستغراب : ليل كدبت عليك.. طب ليه اسر : أنا مش عارف وهي مردتش تقول السبب.. بس دا مش موضوعي هو حاجة وعدت وأنا نسيتها و..

قمر سرحت : معقولة يا ليل مش عاجبك حياتنا.. انتي تكدبي.. مش مصدقة.. طب ليه كدا.. آه صح احنا فقره.. بس مكنتش بحرمك من حاجة.. اللي معايا كله كان ليكي.. ليه كدا يا ليل ليه اسر : قمر.. قمر.. انتي سمعاني قمر : هاا اسر : سرحتي في إيه قمر : ولا حاجة كمل اسر : بصي بقا نهاية الموضوع واللي أنا عاوزه وجايبك هنا علشان.. أنا عاوز آخد الإذن منك إني أتقرب من ليل.. قمر : وبعد ما تتقرب من ليل اسر : هتجوزها إن شاء الله

قمر : طب لما أنت عاوز تتقربلها ماتتقدملها علطول.. إيه لازمة المشي البطال من الأول اسر: مشي بطال إيه بس يا قمر افهمي.. مش هينفع أتقدم دلوقتي قمر: ليه بقا إن شاء الله.. ما معكش تمن الشبكة.. بسيطة أسلفك.. مش لازم نوسعها أوي.. هو دبلتين حلوين اسر : لا ويت كدا شبكة إيه اللي ممعيش حقها.. أنا بتكلم ع نقطة تانية قمر : نقطة إيه بقا

اسر : أنا علشان أتقدم لازم أنجح السنادي ع الأقل علشان بابا يوافق.. وكمان ليل لو اتقدمت دلوقتي مش هتوافق أصلاً دي مش طايقاني قمر : ولما هي مش طايقاك.. حاطتها ف دماغك ليه اسر : مش طايقاني دا موضوع طويل.. بس أنا متأكد إن هي كمان معجبة بيا.. بس بتكابر.. قمر : عندك حق والله دي عنيدة ورأسها جزمة زيي

اسر: شوفتي بقا.. علشان كدا محتاج وقت علشان نتقرب من بعض يكون المشاكل اللي حوالينا هدت.. وأنا بستأذنك ف الوقت دا.. واعتبري إن أنا كدا بتقدملها ياستي.. بس المهم هي متعرفش بالحوار اللي دار بينا دا خالص قمر: طب افرض هي أساساً مش عاوزاك اسر : لا متقلقيش هي هتموت عليا قمر: لا يا شيخ تامر حسني بسلامتك اسر: لا اسر الألفي.. مافيش بنت مش بتحبني أصلاً.. قمر : ونبي تتوكس.. وترجعني الفيلا.. قبل ما البت تيجي اسر بيضحك : حاضر

قمر : قال مافيش بنت محبتنيش قال.. مانا جنبك بقالي ساعة أهو مش نازلي من الزور.. سوق سوق *** سامح : عملتي إيه مع البت يا نجلاء نجلاء : قالتلي هفكر سامح : يعني ميالة للموضوع نجلاء : ومتميلش ليه يا سامح.. الواد كويس ومحترم سامح : طيب ع البركة.. نادي عليها يلا تأكل معانا نجلاء : ماشي هجهز الأكل وأدخلها *** ليل : تونة.. اصحي تونة : عاوزة إيه سبيني أنا عاوزة أنام شوية ليل : فين قمر طيب تونة قامت نطت تجري دخلت المطبخ وطلعت :

مش جوا راحت الحمام : مش ف الحمام كمان.. أوعي كدا رجلك يا ليل.. مش تحت السرير كمان.. اومال راحت فين ليل : إنتي بتعملي إيه يا هبلة تونة : بدور عليها ليل : وهي إيه يدخلها تحت السرير تونة : أنا أش عرفني يمكن عاوزة تفجعنا ليل : الحركات المتخلفة دي انتي اللي تعمليها تونة: يابنتي لمي لسانك ليل : بنتك إيه يا مفعوصة دانا لو اتجوزت هجيب قدك تونة : تتجوزي إيه يا بايرة هو أنتِ حد معبرك ليل : لسانك دا هقطعهولك ف مرة

تونة : وريني كدا علشان أخزقلك عينك دي قمر : فيييه إيه صوتكم عالي ليه تونة : تعالي شوفي اختك.. الحق عليا إني دفعت عنها ومسبتهمش يقطعوها قمر: بس يا تونة عيب كدا.. محدش يقدر يعمل لأختك حاجة ليل : انتي كنتي فين يا قمر قمر : كنت بشتري حاجة ليل : هي فين الحاجة دي قمر بتوتر : مانا ملقتهاش بقا ليل : غريبة يعني طلعتي وسبتي تونة لوحدها قمر : عادي وهي أول مرة ليل : جايز قمر : أنا هدخل أسخنلكم الأكل ***

حازم قاعد سرحان وبيفكر ف كنزي وافتكر أن رقمها معاه من وقت ما كانت ف القسم وقرر يكلمها كنزي رديت : الو مين معايا حازم : انتي مش مسجلة الرقم ولا إيه كنزي : لا والله انت مين حازم : أنا حازم كنزي : انت حازم الظابط حازم : انتي تعرفي كذا حازم غيري ولا إيه كنزي : لا والله أنا معرفش حد أصلاً بس أصل ماما حازم : مالها ماما كنزي : أنا لازم أقفل يا حازم حازم : استني بس متقفليش كنزي : يا حازم والله مش هينفع

نجلاء دخلت فجأة : هو إيه اللي مش هينفع يا بت كنزي حدفت الموبايل واتنطرت : ماما.. استني هفهمك نجلاء : تفهمني إيه دانتي خلاص مبقاش حد قادر عليكي.. أنا هناديلك أبوكي كنزي مسكتها: استني يا ماما ونبي والله انتي فاهمة غلط نجلاء : ولا كلمة زيادة.. والعريس هتوافقي عليه يا كنزي غصب عنك ومافيش قعاد ليكي هنا.. هتتجوزي وترجعي المنصورة.. كنزي : بس أنا مبحبهوش يا ماما.. حرام عليكي