رواية حكاية قمر الفصل التاسع والستون 69 - بقلم وردة في البستان

قمر وصلت ع المكان. لقيت أنه بيت شبه قديم. فضولها خلاها تدخل. أول لما دخلت شافت سليم ع الأرض متكتف. قمر بصدمة: سلييييم!!! اتضربت ع دماغها من ورا. وقعت ع الأرض. *** ليل بتتمطع: صباح الخير. هدي مش مركزة معاها ومردتش. ليل راحتلها: بقول صباح الخير. هدي: صباح النور ياحبيبتي. ليل: إيه اللي واخد عقلك يادودو؟ هدي: مافيش حاجة ياليل. الفطار هتلاقي عندك ف التلاجة جاهز، هتحطيه بس ع السفرة وصحي تونة تفطر معاكي. ليل: مالك يادودو؟

وفين قمر؟ صح تفطر معانا. هدي: أختك نزلت بقالها أربع ساعات ومقالتش رايحة فين، لا حس ولا خبر. وبتصل عليها مش بترد. ليل: طيب اهدي. يمكن راحت تشوف البيت، إنتي عارفة خلاص فاضل أيام ع افتتاح المشغل وتلاقيها بتشوف لو في حاجة ناقصة تعملها. هدي: كلمت عربي وراح ملقهاش هناك. أنا مش مرتاحة، حاسة إن في حاجة. ليل: إن شاء الله مافيش حاجة ياماما. الجرس رن. ليل: أهي زمانها جت أهي.

هدي نطت بسرعة تروح تفتح. لقيت زين ومعاه بوكيه ورد. حسيت بخيبة أمل. ليل: زين، اتفضل. هدي: مطلعتش قمر أهي ياليل. قولتلك أنا قلبي مش مرتاح ياليل، مسمعتيش كلامي. ليل: ماما اهدي شوية. ممكن الغايب حجته معاه. اصبري وهتلاقيها داخلة علينا دلوقتي. زين بقلق: ليه هي قمر فين؟ ليل: متقلقش يازين، هي راحت مشوار وجاية. إنت كنت جاي عشانها؟ زين: آه بصراحة. كنت جاي أرجعها الشغل. المهم هي فين؟

هدي: نزلت بدري أوي. قالت عندي مشوار مهم ومفطرتش حتى. ومجتش لحد دلوقتي. وبتصل مبتردش عليا. زين: أنا كمان اتصلت مبتردش عليا. بس أنا فكرت إنها نايمة. طيب مقالتلكيش إيه هو المشوار؟ هدي: لا. زين: طيب عربي وصلها؟ هدي: لا بردك راحت لوحدها. أنا قلقانة أوي عليها. زين: طيب اهدي وأنا هتصرف. خرج موبايله. زين: الو ياحازم. إنت فين؟ حازم بنوم: أنا ف البيت. زين: طيب قوم يلا، عاوزك ضروري. حازم: خير يازين، في حاجة؟

زين: قمر مختفية بقالها أربع ساعات ومش عارفين فينها. حازم: يعني إنت مصحيني من النوم ف إجازتي عشان تقولي قمر مختفية بقالها أربع ساعات؟ متلاقيها ف مشوار يا زين. روح ياحبيبي شوف شغلك وأنا هكمل نوم وهي زمانها جاية. زين بعصبية: في مشوار ومبتردش ع مكالماتنا ليه؟ أنا لجأتلك أنت ياحازم بس عشان صاحبي. بس لو مش هتساعدني، أنا هتصرف بمعرفتي. حازم: طيب اهدا بس. أكيد هساعدك. إنت فين طيب وأنا هلبس وهجيلك. تمام. تمام، أنا جايلك.

كنزي: في إيه ياحازم؟ إنت رايح فين؟ إنت مش قولت واخد إجازة النهاردة؟ حازم: معلش ياحبيبتي. زين اتصل وقلقان ع قمر. بيقول مختفية من الصبح ومش بترد. هروح أشوفه وأجي تاني. كنزي بخضة: قمر؟ ليه؟ راحت فين؟ حازم: متقلقيش، إن شاء الله خير. كنزي: طيب أنا كمان هلبس وجاية معاك. حازم: تيجي فين ياكنزي؟ أنا هروح وهبقى أطمنك. كنزي: لا ياحازم لازم أروح وأبقى مع ليل وطنط هدي. خدني ياحازم ونبي.

حازم: كنزي علشان خاطري افهمي. إنتي لسه ف الأول وغلط عليكي الحركة كتير. أنا والله هبقى أطمنك وهكلم مامتك تجيلك ماشية. كنزي: ماشي. ربنا يستر. *** سليم متكتف وقمر متكتفة جنبه وبيحاول يوصلها مش عارف. سليم: قمر. قمر إنتي كويسة؟ قمر بتفتح عينها وبتتوجع: آآآه. أنا فين؟ سليم: مش عارف. المهم إنتي إيه اللي جابك هنا؟ قمر: مش فاكرة. هو إيه اللي حصل؟ آآآه أنا راسي وجعاني أوييي. ومين ربطني كده؟ سليم: إحنا مخطوفين يا قمر. قمر: إيه؟

مين خطفنا؟ سهر دخلت: أنا ياحبيبتي. كويس إنك فوقتي. قمر فاقت: سهر!!! *** زين: إنت متأكد إنهم هيعرفوا مكانها؟ حازم: آه. طالما الخط مفتوح هنوصلها. متقلقش. زين: إن شاء الله خير. عادل دخل: دا المكان اللي موجود فيه الرقم اللي أدتهوني ياحازم. حازم: متشكر أوي ياعادل. أهو يازين، دا المكان اللي قمر فيه. إنت تعرف المكان ده؟ زين: المكان ده بعيد أوي عن هنا. إيه اللي يوديها هناك؟ حازم: طيب اتصل بوالدتها يمكن ليهم قرايب هنا؟

زين بعصبية: أنا لسه هتصل. يلا بينا بسرعة. أنا متأكد إن مالهاش قرايب. عادل: اهدي يا أستاذ زين وكلمهم الأول نتأكد. ولو طلع محدش يعرفه، هنطلع كلنا مع بعض. زين: ماشي. *** عزيز: في مفاجأة ليكي النهاردة. صافي: مفاجأة إيه؟ عزيز: اخرجي هتلاقيها. صافي طلعت تجري ع برا. شافت سائر وفاروق قاعد ع كرسي ومبتسم ليها. اتصدمت من حالة أبوها وطلعت تجري عليه. حضنته. صافي: بابا إيه اللي حصلك؟ (بتبص لسائر ورجعت بصيت لابوها و عيطت)

أنا السبب صح. فاروق هز رأسه بالرفض ودمع هو كمان ونفسه يحضن بنته بس مش عارف للأسف. صافي: أنا آسفة يابابا. أنا اللي خليتك كده. حقك عليا. إيه اللي حصله ياسائر؟ سائر: متقلقيش ياصافي. بابا هيتحسن وإن شاء الله يرجع زي الأول. صافي: مقولتليش ليه؟ كنت بتكدب عليا وتقولي ف الشغل. وهو… ياحبيبي يابابا.

عزيز: أنا اللي كنت مانعه إنه يقولك أي حاجة ف الفترة اللي فاتت. مكنتيش هتستحملي وكل اللي عملناه كان هيروح ع الفاضي. ولما لقيت إنك الحمد لله وصلتي لمرحلة كويسة، كلمته يجيبوا تشوفيه عشان المقابلة دي هتحسن من حالته وحالتك. صافي: أنا عاوزة أخرج ياسائر. أنا مش عاوزة أفضل هنا خلاص. أنا خفيت. عاوزة أرجع مع بابا. عزيز: مينفعش دلوقتي ياصافي. إنتي لسه جلسات علاجك مخلصتش.

صافي بترجي: عشان خاطري ياعزيز اعمل حاجة. أنا عاوزاه أرجع مع بابا. سائر قوله حاجة. سائر: طيب ياعزيز. الجلسات دي مينفعش تتعمل ف البيت. صافي: قول آه ياعزيز. وافق. عزيز: ينفع. بس مش أنا اللي المفروض أوافق ع خروجها من هنا. بس هحاول حاضر. بس مش النهاردة أكيد. صافي: طيب امتى؟ عزيز: قريب إن شاء الله. سائر: معلش ياصافي استحملي شوية كمان. صافي: حاضر. موبايل سائر رن. سائر: دي نور. صافي: سلملي عليها وبوسهالي ها. (غمزتله)

سائر ضحك: حاضر. سائر: الو ياحبيبتي. عاملة إيه؟ نور: إنت فين ياسائر؟ سائر: أنا عند صافي زي ماقولتلك. إنتي في حاجة؟ مال صوتك؟ نور: قمر مختفية من الصبح. وزين وصل للمكان والمكان طلع بعيد ورايحينه دلوقتي. سائر: دا حصل امتى الكلام ده؟ وإنتي فين؟ نور: أنا عند ليل أهو مستنين أي خبر. عزيز: في إيه ياسائر؟ مالك؟ سائر: طب هما فين دلوقتي؟ ولقوا قمر موجودة فين؟ نور: في مكان اسمه… سائر وشه قلب: إيه؟؟ إنتي متأكدة إنها موجودة هنا؟

نور: آه. زين لسه مكلمنا وقال كدا. إنت تعرفه؟ سائر: آه. دا المكان اللي كانت عايشة فيه والدة سهر. نور: نعم؟ إزاي؟ طب إيه اللي هيودي قمر هنا؟ سائر: مش عارف. اقفلي وأنا هكلم زين أعرفوا. متقوليش حاجة للي عندك لحد ماأتأكد. نور: حاضر. حاضر. عزيز: مالك ياسائر؟ خير في حاجة حصلت؟ سائر: سهر شكلها ناوية ع مصيبة تاني. عزيز: إيه اللي بتقوله ده؟ عملت إيه تاني؟

سائر: مش وقته دلوقتي. أنا لازم أمشي. خليك مع صافي وبابا ومتحسسهمش بحاجة لحد ما أشوف الكارثة الجديدة. سائر كلم زين وحكاله. زين: إيه؟ إنت متأكد ياسائر إن سهر اللي عملت كل ده؟ سائر: أيوه يازين متأكد. أنا مكنتش حابب أتكلم وأقول اللي عملتوه ف أبويا وأختي. بس طالما وصلت للخطف والانتقام هيطول الكل، يبقى لازم أتكلم. البيت اللي إنتوا لقيتوا قمر فيه ده بيت أم سهر الله يرحمها. هي كانت عايشة هناك.

حازم: أنا مش مصدق كل ده يطلع من سهر. عادل: مش وقته دلوقتي الكلام ده. إحنا هنتحرك دلوقتي. زين: طيب اقفل دلوقتي ياسائر وهبقى أكلمك. زين بيرن ع موبايل قمر لقي مقفول. اتعصب. زين: الموبايل اتقفل. لحازم: متقلقش. إن شاء الله متكونش غيرت مكانها. يلا بينا بسرعة. زين: يلااا. *** قمر: إنتي اللي جبتيني هنا. سهر: أنا مجبتكيش. إنتي اللي جيتي بنفسك. قمر: بعتي الرسالة من موبايل سليم عشان أجي. إنتي عاوزة إيه مني؟

سهر: عاوزة حقي منك. ومنه. سليم: قمر معملتلكيش حاجة. اللي كان بيني وبينك قمر مالهاش علاقة بيه. سهر: مالهاش علاقة؟ اومال مين اللي لفت عليك وبعدتك عني؟ سليم: أنا بعدت عنك من زمان أوي. بس إنتي اللي مش واخدة بالك. بعدت عنك من عمايلك، من شرك وآذيتك لغيرك. وياريتك بتأذي حد غريب، دانتي بتأذي أخوكي اللي من لحمك ودمك. عاوزني أنا أطمن ع نفسي معاكي إزاي؟ قمر بتسمع ومش فاهمة حاجة.

سهر: آه آذيت أخويا. آه أنا السبب ف اللي وصله. وأنا السبب ف دخول صافي المستشفى وجنانها. أنا اللي عملت كل ده. سليم: لييييه؟ ذنبها إيه؟ دي كانت بتثق فيكي. قمر اتصدمت من كلامها.

سهر: ذنبها إنها بنت فاروق. فاروق اللي زرع القسوة فيا من وقت ماخدني من حضن أمي ومرحمنيش. أنا اللي اتحرمت من أهلي. اتيتمت وأنا أمي عايشة. أنا اللي اتحرمت من كل حاجة كان نفسي فيها. أقل حقوقي مكنتش باخدها، كنت بتعامل زي الخادمة. أنا استحملت اللي محدش استحمله. ده حتى مسبنيش أختار اللي هتجوزوا ورفضك. وخد بنتي مني. حتى دي مسبهاليش!!!

كان لازم أدوقه كل اللي دوقوهوني. أنا كل لما بفكر وبحاول أندم ع اللي عملته فيه، بلاقيني عاوزة أنتقم منه أكتر وأكتر. وبالرغم كل الكره اللي جوايا ده، بس حبيتك. مختارتش غيرك. وإنت بعدت عني. مش عشان انتقامي. عشان إنت محبتنيش زي ما أنا حبيتك. إنت حبيتها هي. سليم: أنا حبيتك وكان عندي أمل أغيرك. بس إنتي اللي مكنتيش بتبطلي تفكير ف الانتقام. وأنا مكنتش قادر أستحمل كده.

سهر: تفتكر بعد كل اللي قولته واللي حصل فيا كنت بسهولة هعرف أتغير؟ (بصت لقمر) فضلتها هي عني عشان هي الكويسة الجدعة. إنما أنا الشريرة اللي مينفعش تعيش معاها. هي مشافتش اللي أنا شوفته ولا عاشت اللي عاشته أنا. قمر: مين قالك إني مشوفتش اللي شوفتيه؟

أنا كمان اتحرمت من أهلي وهما عايشين. من صغري كنت بشقي. حرمت نفسي من كل حاجة عشان خاطر أربي أخواتي. بس كنت بحمد ربنا كل يوم وراضية بحياتي. لما جت الفرصة أسامح أهلي، سامحتهم عشان هما أهلي ومقدرتش أكرههم. أخوكي اللي إنتي انتقمتي منه ده كان سبب ف حرماني من أمي زيك بالظبط. بس أنا اللي لا من لحمه ولا من دمه سيبت حقي عند ربنا. مفكرتش آذي زيك. مش عارفة إنتي إزاي عملتي كده ف أخوكي. سهر بتسمعها و بصلها بغيظ.

قمر: كل اللي حصلك كانت اختبارات من ربنا ليكي. بس إنتي اللي شوفتيها بطريقة غلط ف متجيش تقولي إن مشوفتش اللي شوفتيه. متبرريش اللي عملتي باللي حصلك. إنتي اللي عملتي في نفسك كده. محدش غيرك. سهر بتسقف و ضحكت استهزاء بكلام قمر. سهر: أحيكي بجد. قد إيه إنتي إنسانة مثالية مافيش زيك. بس للأسف كلامك مأثرش فيا. مش هيخليني أتراجع عن اللي ف دماغي. وبما إني انتقمت من أخويا اللي من لحمي ودمي، ف إنتو مش هتصعبوا عليا.

خرجت. قمر وسليم بصوا لبعض. دخلت تاني ومعاها جركن بنزين كبير. سليم: إنتي هتعملي إيه؟ سهر ضحكت: هتشوف دلوقتي. راحت عند قمر وقلبت حواليها. وقمر عينها اتملت دموع وخايفة وبتحاول تبعد وتفك نفسها. سليم بعصبية: إنتي بتعمليييي إيه؟ إنتي اتجننتي؟ سهر: هولع فيها قدام عينيك. هحرق قلبك زي ما حرقت قلبي. سليم: قمر مالهاش ذنب. سبيها. عاوزة تنتقمي انتقمي مني أنا. هي مالهاش ذنب. سهر: خوفك عليها ده مش هيخليني أرحمها.

قمر دموعها غلبتها وعيطت. سهر ضحكت: إيه يا قمر مالك خايفة كده؟ اومال فين قمر الشجاعة اللي مبتخافش من أي حاجة؟ قمر بصتله ومش بتتكلم. سليم: سهر، طيب اهدي. لو عاوزني أرجعلك، هرجع. بس قمر مالهاش ذنب. خليها تمشي. سهر: ومين قالك إننا مش هنرجع ياحبيبي؟ ده أنا حتى حجزت ليا أنا وانت تذاكر سفر برا مصر. بس لازم أخلص منها الأول. وأوعدك هنسافر ونكمل بقيت حياتنا ف سعادة وحب. قمر: إنتي مجنونةةة. مجنونة.

سليم مش مستوعب كلامها ومش عارف يوقفها إزاي. وعينه عليها. وهي مسكت الولاعة وراحة عند قمر خلاص وقمر مرعوبة. سليم: بنتك مامتتش ياسهر. سهر بصتله: إنت قولت إيه؟ سليم: بنتك مامتتش. بنتك عايشة. أنا عارف مكانها. سهر: بنتي عايشة! إزاي؟ سليم: سيبي قمر تمشي وهقولك. سهر: إنت كداب. أنا بنتي ماتت من زمان. فاروق موتها. إنت بتقول كده عشان تخليني أسيبها. بس ده مش هيحصل.

سليم: استني. والله بنتك عايشة. خلي قمر تمشي. بلاش تعملي كده. لو بتحبيني هي مالهاش ذنب. فاروق مالوش علاقة ببنتك وميعرفش عنها حاجة. أنا اللي خدتها من المستشفى وقولت للممرضة تقول لفاروق عشان متحاوليش تدوري ع بنتك. سهر: عملت كده ليييه؟ خدتها وبعدتها عني لييه؟ سليم: مكنتش عايز بنتي تتربي ف وسط الشر اللي حواليكي. مكنتش عايزها تكون شبهك. سلمتها للي يستحقها. للي هيعرف يحافظ ع بنتي ويربيها كويس. سهر: بنتي؟ بنتي فين؟

وتبقا مين؟ انطققق. سليم: بنتك تبقا… الباب اتهبد وعادل مسك سهر وزين طلع يجري ع قمر وحازم راح يفك سليم. زين بيفكها: إنتي كويسة؟ حصلك حاجة؟ قمر بتعيط وبتترعش: زين. زين متسبنيش. كانت عايزة تموتني. زين: اهدي. اهدي. محدش هيعملك حاجة خلاص. سليم: أنا آسف ياقمر. زين بعصبية: إنت تخرس خالص. إنت فاهم؟ حازم: اهدي يازين. زين: أهدي إيه؟ اللي حصلها كله كان بسببه. سليم: أنا عارف إني السبب. أنا أسف ليكم كلكم.

حازم: مش وقته دلوقتي. هات قمر وتعالي ورايا. *** اسر بفرحة: بتتكلم جد يازين؟ طب هي عاملة إيه؟ ليل ماسكه ف دراعه: قالك إيه قولل. لقوا قمر ولا إيه؟ انطق. هدي: طمنا يابني بنتي كويسة. اسر: آه لقوها الحمد لله وهي كويسة وهيجيبها وجايين ع هنا. تونة: هيييييييه. قمر جاية. هدي: الحمد لله يارب الحمد لله. أنا عاوزة أروح أشوفها. اسر: لا تروحي فين؟ هو جاي بيها متقلقيش. ***

قمر واقفة مش مستوعبة اللي حصلها وزين بيكلم ف الموبايل وواقف بعيد شوية. وسليم واقف عينه ع قمر وزعلان من اللي حصلها بسببه. سهر واقفة بعيد شايفهم وعادل ماسكها. بس كان مركز ف الموبايل بيكلم والدته يطمنها. استغلت الفرصة. بصت ع السلاح اللي ف جيبه ورجعت بصيت تاني ع قمر اللي واقفة لوحدها. *في حركة سرعة*

شدت السلاح وزقت عادل. وراحت ناحية قمر. وزين شافها جري ناحية قمر وبيصرخ بينادي ع قمر. اللي واقفة بتبص لسهر ومبتتحركش. سهر وقفت ووجهت المسدس ع قمر. سهر: مش هسيبك تتهني لحظة ياقمررر. ضغطت ع الزناد. سليم شد قمر زقها بعيد. والرصاص جه فيه هو. سهر بصدمة: سليم لااااا. عادل وحازم مسكوها وخدوا السلاح وركبوها العربية غصب وهي بتحاول تبعد وتروح لسليم. سليم ع الأرض غرقان ف دمه. قمر وزين جروا ع سليم. قمر بتعيط: سليم. سليم رد عليا.

زين: سليم إنت كويس؟ رد. سليم بيحاول يتكلم بصعوبة: ف.. فتون. قمر: فتون؟ مالها ياسليم؟ سليم: ب.. بنتي. فتون. زين بعدم فهم: إيه؟ قمر حاولت تستوعب كلامه اللي قالوا ل سهر وكلامه دلوقتي والجميل اللي قالها عليه. فهمت. قمر: فتون تبقا بنتك إنت وسهر!!! سليم هز رأسه: خا... ليي. . ب. الك .. م ..نها. قمر بتعيط: حاضر والله حاضر. سليم (غمض عينه) قمر بخوف: سليم. سليم رد عليا. زين هو مبيردش ليه؟ سليم قول حاجة. سلييييم. ***

عدت فترة ع اللي حصل. ووصلنا ليوم افتتاح المشغل. وقمر وليل وهدي وتونة واقفين ف وسط الحارة والناس والطبل الصعيدي والأغاني شغالة. وتونة واقفة بترقص مع عربي. والكل فرحان. أم سهير: الف مبروك يا ست قمر وربنا يزيدك كمان وكمان. قمر: الله يبارك فيكي يا أم سهير. ومتنسيش من بكرا القيكي هنا. إنتي أول واحدة هتشتغل. أم سهير: بجد يا ست قمر؟ ربنا يجبر بخاطرك ويفرحك يارب ويسعدك مع ابن الحلال اللي يستاهلك. هدي بصت لقمر: يارب بقا.

3 عربيات ورا بعض وقفت قصادهم. الأولى نزل منها زين ومعاه بوكيه ورد. ومعاه كريم وأحمد واسر. والتانية نزل منها سائر ونور. والتالتة نزل منها حازم و كنزي ونوجة وفريال. نجلاء: مبروك ياقمر. كنزي طالعة تجري تحضن قمر: ألف مبروك ياحبيبتي. نجلاء: … براحة يابت بقا وأنا هفضل ماشية وراكي آخد بالي منك. ماتشوف مراتك. حازم: تعبت من الكلام معاها والله. مكنتش هجيبها هي صممت. كنزي: شايفة ياقمر؟ مكنوش عاوزين أجيلك وأكون معاكي ف اليوم ده.

قمر: هما خايفين عليكي. ياحبيبتي. كنزي: وأنا عملت حاجة؟ هو أنا بخرج أصلا؟ دول حبسنين. نجلاء: ماهو عشان اللي ف بطنك ياحبيبتي. قوليلها حاجة يافريال عشان أنا تعبت مع البت دي. فريال: ياختي سبيها ع ربنا وخليها تفرح شوية. هي مبتنزلش خالص. كنزي حضنت فريال: ياحبيبتي ياماما يانصفانين. نجلاء: بقا كده. ماشي ماشيين. نور حضنت قمر: مبروك ياروحي. سائر: مبروك ياقمر وعقبال كدا مايكبر ويبقا مصنع.

قمر: يارب. وعقبالك إنت ونور ماتفرحونا بيكم بقا. سائر: قريب إن شاء الله. كريم: مبروك ياقمر. قمر: الله يبارك فيك ياكيمو. تونة شدت كريم: تعالي نرقص يلا. كريم: نرقص ف الشارع! تونة: آه يلا يلا. أحمد: مبروك يابنتي. متتصوريش فرحتي بيكي عاملة إزاي. قمر: الله يبارك فيك يا أستاذ أحمد. إنت عارف لولا وقفتك جنبي مكنتش وصلت للي أنا فيه ده.

أحمد: أنا معملتش حاجة جنب اللي عملتي مع نور وكريم. وإذا كان ع الفلوس ف ده حقك وأمانة أبوكي كان شايلها معايا. زمان والدك دلوقتي مرتاح وهو شايفك فرحانة ومتجمعة إنتي وعيلتك كده. قمر: الله يرحمه ويسامحه. أحمد: وإنتي سامحتيه؟ قمر ابتسمت: سامحته يا أستاذ أحمد. زين عطاها البوكيه: مبروك ياقمر. قمر: الله يبارك فيك يازين. حلو الورد. زين: عجبك؟ قمر ابتسمت: آه. ذكية قطعت كلامهم: ياست شي قمر ياست شي قمرررر. ألف مبروك ياست شي قمر.

قمر: الله يبارك فيكي ياذكية. ذكية: أوعي لتكوني زعلانة مني من آخر مرة. لما البت تشونة فتشحتش دماغ الولد ابني. زين باستغراب: تشونة!! ليل: دي اللي لفتت نظرك بس الباقي عادي. اسر: ده في كمية تش تش ف الموضوع رهيبة. قمر ضحكت: لا ياحبيبتي مش زعلانة. ذكية: حبيبت شي. حبيبت شي. والنعمة. الاه هو مين البهاواتش دول؟ ليل: وإنتي إيه مالك ياست شي إنتي؟

ذكية: خلاص ياست شي ليل مش عاوزة نعرف. المهم ياست شي قمر هتيخلينا نشتغل ف البتشاعة ده إمتى؟ قمر: إنتي هتشتغلي ف المشغل وهتسيبي العجل؟ ذكية: لا طشبعا. أنا لا ممكن أسيب شغلنت شي العجل تي أأبدا. بس أنا لقيت الكل هيشتغل قولت مجتشي عليكي يابت ياذكية. و عشان أكون مع ستات شي الحارة كلنا مع بعض يتنا كدهو. ولا إنتي بقا هتشكسفيني ومش هتشغليني معاكي؟ قمر: لا مش هكسفك. أنا هكلم عربي وأخليه يشغلك معاهم.

ذكية: ياحبيبت شي ياست شي قمر. لولولولوليييي. ألف ألف مبروكككك. ليل بتضحك: الست شي دي مسخرة. إيه ده؟ أنا لساني حصاله إيه؟ يخربيتشها عدتني. زين: خلصتشي ولا لسه؟ قمر ضحكت: إنت كمان اتعديت. زين: تقريبا. المهم أنا كنت عاوز أعرف إنتي هترجعي الشغل امتى؟ قمر باستعباط: شغل إيه؟ زين: لا والله. لحقتي تنسي؟ قمر: آآآه قصدك الشركة. لا مانا خلاص قدمت ف شركة تانية وأكيد هتقبل.

زين: أكيد هتتقبلي. ده على أساس إنك متعرفيش إنك متقبلتيش أصلا. الكل واقف يتفرج عليهم. قمر رفعت حاجبها: وإنت عرفت منين بقا؟ آه تلقيك إنت السبب. أنا كنت حاسة إن فيه أن ف الموضوع. زين: آه أنا اللي كلمت صاحب الشركة وخليته ميقبلش. وكل لما هتقدمي ف شركة هخليهم يرفضوكي. وهتلفي تلفي وترجعي تشتغلي معايا بردك. حازم واسر مسكوا وكنزي وليل مسكت قمر ووقفوا قصاد بعض.

قمر بعصبية: طب إيه رايك بقا إني مش هشتغل معاك. ومش هشتغل أصلا. ولا أقولك أنا هفتح شركة لنفسي ووريني بقا هتعمل إيه؟ زين بعصبية: هكسرها فوق دماغك ومش هتشتغلي غير ف شركتنا ياقمر ها بقا. حازم: استهدوا بالله ياجماعة. زين: إنت مش شايف مبتسمعش الكلام إزاي؟ قمر بتشد نفسها: وأنا أسمع كلامك ليه أصلا؟ لا إله إلا الله. وإنت مالك؟ كنزي: براحة ياقمر هتقعي منك. أحمد: عجبك إنت وهي الناس كلها بتتفرج عليكم كده.

قمر وزين بصوا حواليهم لقوا الحارة كلها واقفة اتكسفوا. زين: … أنا آسف. قمر: وأنا كمان آسفة. زين: بس إنتي بردك اللي عصبتيني. قمر: تاني تاني! زين ابتسم: لا خلاص أنا مش زعلان. قمر: وأنا كمان مش زعلانة. زين: طب أنا بحبك. قمر بتلقائية: وأنا كمان بح… (بصتله) إيه؟ قولت إيه؟ زين: أنا بحبك ياقمر. تتجوزيني! قمر واقفة متنحة. نور: أخيراا بقا. كنزي نطت وسقفت جامد. حازم: يخربيتك اثبتي. ليل: ماتردي ع الراجل يابنتي. وخلينا نفرح بقا.

اسر: ماتخلينا نفرح إحنا كمان. ليل: لا ده لسه بدررررررررييييييي أوي. اسر: يلهوووي. زين: ها قولتي إيه؟ قمر بصت لهدي اللي عينها اتملت دموع من الفرح. ورجعت بصت لزين وابتسمت: أنا موافقة. تونة: هيييييييه. نجلاء: لولولولولولولييي. وستات الحارة زرغطوا وراها. والكل واقف فرحان. هدي حضنت قمر: مبروك ياحبيبتي مبروك. أحمد: أخيرا يابني هتنزح من ع قلبي بقا. (حضنه جامد) مبروك ياحبيبي. والكل بيحضن ويبارك لقمر.

زين شد قمر: مش خلصتي مباركات؟ يلا بينا بقا. قمر باستغراب: يلا بينا ع فين؟ زين: إنتي مش وافقتي؟ يبقى يلا بينا نطلع ع المأذون. قمر: دلوقتي!!! اسر: إحنا ف عصر السرعة. زين شدها: آه دلوقتي يلا بينا. ركبوا ع العربية والكل وراهم. والزغاريط والطبل مالي المكان. والكل فرحان. والحمد لله واخيرا اتجوزوا. *** بعد مرور ست سنين ❤️

ليل واسر اتخرجوا واشتغلوا ف شركة الألفي مع بعض. ولحد دلوقتي ليل مطلعة عين اسر وملففة وراها ولسه مش عاوزة تفرحه هو كمان ياعيني عليك يااسر. وسائر ونور اتجوزوا من تلت سنين. بس لسه ربنا مكرمهمش. ادعولهم بقا. وهما الاتنين ماسكين شركات فاروق ومعاهم صافي. آه صحيح، صافي كمان اتعالجت وبقت أحسن بكتير من الأول. وبقت كويسة مع ليل واسر وبقوا قريبين من بعض وبتاخد رأيهم ف كل حاجة. واتجوزت الدكتور عزيز بعد ماوقعته ف حبها من أول يوم

شافها ف المستشفى. ودلوقتي حامل. ادعولها. وفاروق حالته اتحسنت وبقى شخص كويس وندم ع اللي عمله ف أخته. بس فات أوان الندم خلاص. سهر مستحملتش موت سليم وكل اللي حصل فيها واللي وصلتله وانتحرت ف السجن قبل ما يتحكم عليها. وكنزي وحازم جابوا فارس زي ما كانوا متفقين. وبقى معاها لي لي كمان لسه بيبي. وبنسبة لتونة فهي كبرت وبقت ف المدرسة مع كريم. هي ف إعدادي وهو ف ثانوي ومبتفارقوش لحظة لا ف المدرسة ولا ف البيت. واحنا كلنا بقينا

عايشين ف الفيلا مع بعض. أما بقا بالنسبالي أنا وزين اتجوزنا. وجبنا بنتين توأم { تالا ❤️ تالين}. وربنا كرمني وفتحت مصنع كمان جنب المشغل. بس المشغل هو الأساس. وكمان…

زين: قمر… قمر إنتي بتعملي إيه؟ قمر: في إيه يازين؟ بحكي للناس حكايتي. زين: ناس مين بس؟ ركزي معايا شوية. عاوزك ف موضوع. قمر: طيب هكملكم الحكاية بعدين ها. (بصيت لزين) يلا احكي. سمعا. زين: بصي ياستي أنا قررت أفتح شركة تانية. إيه رأيك؟ قمر: وماله ياحبيبي. حاجة كويسة وأنا أكيد مش هعترض. زين: بس الشركة دي هتكون بعيدة عن شركات بابا. بفلوسي أنا يعني. قمر: وطبعا إنت هتمسكها وتسيب شركات الألفي؟ زين: آه.

قمر: لا أنا مش موافقة طبعًا. ليه متكونش من ضمنهم؟ وكمان بابا كده ممكن يزعل. إنت عارف يازين إنه بيعتمد عليك ف كل حاجة ف الشغل دلوقتي بعد ما تعب ومبقاش يشتغل كتير. عاوز تسيبه وتروح تشتغل لوحدك؟ زين: ياقمر افهمي. أنا مش هسيب شركات بابا بشكل كلي. أنا هقسم وقتي بين الاتنين. منها هكبر الشركة بتاعتي ومنها هكون موجود ف شركتنا. وبعدين اسر وليل هما موجودين كمان. يعني مش سايب الشركة فاضية.

قمر: لا بردك يازين. أنا مش عاوزة بابا يزعل منك. زين: طيب لو جبتلك موافقة بابا هتوافقي إنتي كمان؟ قمر: لو وافق وكان راضي ومبسوط أنا هوافق. زين: يبقى اتفقنا. إنتي مش راحة المصنع النهاردة؟ قمر: لا أنا واخدة إجازة وكلمت عربي وطمنت إن كله تمام هنا. زين: حلو. وأنا كمان النهاردة إجازة. إيه رأيك لو نخرج؟ قمر: لا ماهو أنا واخدة إجازة عشان أرتاح ف البيت شوية مش عشان أنزل. زين: تصدقي أنا غلطان. خليكي. *** *في المدرسة*

كريم ف الفصل وتونة جت حطت إيدها ع عينه. تونة: أنا مين؟ كريم: تونة. مافيش غيرك. تونة: ماهو مينفعش يكون في غيري أصلا. كريم: طبعًا. المهم إنتي عملتي إيه ف الماث؟ تونة: ولا أي حاجة ومش فاهمة أي حاجة. كريم: إزاي يعني؟ هو أنا مش لسه مذاكراهولك امبارح؟ تونة: طار كله. كريم: يخربيتك. هو لحق؟ ده الميدتيرم الأسبوع الجاي. تونة: أعمل إيه؟ أنا قولتلكم مبحبش المذاكرة ووجع الدماغ وماث ومش عارفة إيه. كريم: لا ياتونة لازم تتعلمي.

تونة: حاضر. كريم: ويلا ع فصلك بقا عشان البريك خلص خلاص. تونة: حاااااااضر. مشيت سرحانة وخبطت ف شلة بنات. البنت: مش تحاسبي. تونة: لامؤاخذة ياختي مخدتش بالي. البنت بصتلها باستحقار ومشيت. تونة بتكلم نفسها: مالها دي؟ ياخبرر. أنا نسيت أقول لكريم إني هتأخر النهاردة. الحق أروح أقوله قبل المستر مايدخل. فصل. كريم قاعد وشلة البنات راحتله وفيهم واحدة مبتسماله وماسكة اسكتش. داليا: اتفضل ياكريم. ميرسي أوي.

كريم: العفو. نقلتي الحاجة؟ داليا: آه. أنا مش عارفة أشكرك إزاي والله. مش عارفة من غيرك كنت هعمل إيه. تونة دخلت شافتها قريبة منه: ينهاركو أسود. مين دي ياكريم؟ داليا بصتلها من فوق لتحت: إنتي اللي مين؟ تونة: وإنتي مالك أنا مين؟ إنتي اللي تطلعي إيه يا بتاعة انتي؟ وإيه موقفك مع كريم؟ داليا: إنتي إزاي تكلميني بالأسلوب ده؟ تونة: إنتي لسه شوفتي أسلوب؟ ده أنا كل ده محترمة معاكي.

كريم: اهدي ياتونة دي زميلتي وكانت واخدة الاسكتش بتنقل منه حاجة ورجعتهولي. محصلش حاجة يعني. تونة: ياحنييين. وهو مافيش غيرك تنقل منه؟ (شدت الاسكتش من إيد داليا) وريني كدا ياحبيبتي الاسكتش ده. فتحت لقيت مكتوب من جوا: (بحبك ياكيمو) تونة: ينهارررر ابوكي أسوود (بصيت لكريم) هو دااا. اللي محصلش حاجة؟ كريم بخوف: والله ما أعرف. والله معملتش حاجة. تونة بعصبية: إنت تخرص خااالص. ده انت حسابك معايا بعدين.

داليا مسكت إيد كريم: إنت إزاي سكت كده للمتخلفة دي ياكوكو؟ تونة: كوكو!! إنتي لسه واقفة؟ عندك؟ مجرتيش يعني؟ دانتي ليلتك سودة. صاحبة داليا: إنتي مجنونة؟ إنتي متعرفيش دي مين؟ دي بنت المديرة. تونة: ده أنا هفتح دماغها هي والمديرة دلوقتي. (مسكت داليا من شعرها) تعاليلي بقااااا ياحبيبتي أعرفك أنا مين. الفصل كله اتقلب وصحاب داليا بيحاولوا يخلصوا داليا من إيد تونة. وتونة بتزق أي حد يقرب منها.

كريم: فوقي ياتونة إيه اللي بتعمليه ده. تونة: ابعد عن وشاااي. المدرس دخل: إيه اللي بيحصل هنا؟ كلكم قدامي ع المديرة يلااا. *** تالا جاية بتجري: بابي! بابي الحقني! زين وقمر: مالك ياحبيبتي؟ تالين جاية وراها بطوبة. زين لمحها مسكها بسرعة. تالا: شايف يابابي؟ شايفة؟ عاوزة تحدف عليا إيه؟ قمر: إيه اللي إنتي ماسكة ده ياتالين؟ وبتجري ورا اختك ليه؟ زين: هي جابت الطوبة دي منين أصلا؟ تالين: هفتح دماغها عشان مش عاوزة تلعب معايا.

قمر حطت إيدها ع صدرها: يلاهوووي. زين: ده يلاهوووين مش يلاهوووي واحدة. تالا: شايف يابابي؟ شايفة يامامي؟ دي لا يمكن تكون ماي سيستر أبدا. تالين: والله ماهسيبك يابت انتي. تالا استخبت ورا زين: الحقني يابابا. قمر مسكت تالين: تعالي هنا. إيه الطريقة اللي بتكلمي بيها اختك دي؟ ومين علمك الكلام ده؟ تالين بعصبية: ماهي بتك مش عاوزة تلعب معايا. قمر: ماهي! زين: وبتك؟ وإنتي يابتها مش عاوزة تلعبي مع اختك ليه؟

تالا: يابابي دي عاوزانا ننزل الجاردن ونلعب ف الأرض ونمسك التراب بإيدينا. وأنا نيڤر إني ألعب ف الحاجات دي وأوسخ هدومي. أنا بحب ألعب بباربي وألعابي الجميلة ف أوضتي. مش زيها. تالين: ومالي أنا بقا يابت يامسهوكة؟ ده أنا هقطع شعرك ف إيديكي. زين بجدية: إيه الكلام والطريقة دي ياتالين!! إزاي تكلمي اختك كده؟ ومين علمك الكلام ده؟ اومال مدارس إيه اللي بتروحيها؟ تالين عيطت: أنا عاوزها تلعب معايا.

قمر: براحة عليها يازين. متعيطيش ياحبيبتي. قوليلي جبتي منين الكلام ده؟ تالين: من خالتي تونة. زين: اللللله. وأنا اللي مستغرب. مافيش غير مصيبتنا الكبيرة. عوجت لسان البنت. قمر ضحكت. زين: إنتي بتضحكي؟ فرحانة؟ أهي بنتك هتفتح دماغ اختها. هو ده اللي أستاذة فتون علمتهولك ياحبيبتي؟ تالين: لا يابابا. خالتي تونة قالتلي اللي يزعلك يابت ياتالين افتحي دماغه بطوبة بس كده. مقالتليش اختي.

زين: لا ياشيخةة. قمرر من النهاردة تالين متتخطلتش ب تونة أبدا لحد ما نظبط لها لسانها ده. وتنسى كلام تونة. تالين: لا بقا أنا بحب خالتي تونة. زين: وأنا قولت مفيش تونة. وروحي ع أوضتك يلا. تالين مشيت وهي بتدبدب ع الأرض برجله: يووووه. زين: تاليين. تعالي هنا. تالين: عاوز إيه ياجدع إنت؟ تالا: أووهه. ماي جاد. زين بذهول: جدع إنت؟ وعاوز إيه؟ قمر مقضياها ضحك. زين بعصبية: إنتي بتضحكي؟

قمر بتحاول متضحكش: عيب كده ياتالين. ده بابي بردك. و ضحكت تاني. زين: أنا هنفخك إنتي وبنتك. قمر: وأنا مالي أنا. زين: اصبري عليا. وإنتي متخرجيش من أوضتك طول ما فتون موجودة ولا تروحلها. وإياكي أشوفك ماسكة طوبة ف إيدك أو بتلعبي ف التراب. فاهمة؟ تالين مشيت بعصبية: ماشي. ماشي. والله لافتح دماغكم كلكم. اصبروا عليا. زين: شايفة بتقول إيه؟ قمر ركزي مع البنات شوية. ولما تيجي كمان الزفتة تونة دي، هتدمرلي البنت.

قمر بتضحك: إنتي بتضحكي لسه؟ عجبك اللي تونة عملته؟ قمر: مالها تونة دي عسل. وبعدين إنت زعقت لواحدة وسايب التانية. تالا: أنا معملتش حاجة يابابي. قمر: إنتي.. دانتي سوسة. هو مش هيزعقلك أنا هزعقلك. تاني مرة متعامليش اختك كده. ومتزعلهاش. واللعي معاها. تالا: مش بحب ألعب ف التراب أنا. قمر: خلاص ياحبيبتي ابقي لعبيها معاكي باللي بتحبيه. مفهوم؟ تالا: أوكي. زين: قمر ركزي مع البنات لو سمحتي. قمر: حاضر.

عايدة جاية تجري: ياست قمر. ياست قمر. الحقيني. قمر: في إيه ياعايدة؟ عايدة: المدرسة كلمتني وقالتلي إنهم عاوزينك ضروري. قمر: عاوزيني ضروري؟ خير؟ إيه حصل؟ تونة جرالها حاجة؟ عايدة: بيقولوا إنها اتعاركت وهي عند المدير وعاوزين ولي أمرها. زين: اللللله أكبررر. قمر: اتعاركت لييه؟ عايدة: والله معرف ياست قمر. روحي بنفسك وشوفي. قمر: طيب أنا هلبس بسرعة ورايحة. زين: استني هنا. هتروحي فين؟ قمر: هروح أشوف فتون يازين.

زين: أنا مش لسه قايلك خلي بالك من بناتك؟ هتمشي وتسبيهم كده؟ قمر: وفتون بردك بنتي زيها زيهم وإنت عارف كده كويس يازين. زين: طيب اهدي. أنا هروح أشوفها وخليكي إنتي مع البنات. قمر: ماشي. بس طمني. ليكون حصلها حاجة. زين: حاضر. *** المديرة: ممكن أفهم إيه اللي حصل؟ المدرس: حضرتك أنا دخلت الفصل لقيتهم بيضربوا بعض. ومعرفش إيه السبب. المديرة: إنتي مين؟ تونة: أنا فتون. المديرة: ف سنة كام إنتي؟ تونة: ف 2 إعدادي.

المديرة: وإيه اللي خلاكي تروحي عند ثانوي؟ وكمان تمدي إيدك عليها؟ تونة: البت دي متربتش وأنا كنت بربيها. المديرة: اخرسي بنت قليلة الأدب. إزاي تقولي ع بنتي كده؟ تونة: ماهي كلمة الحق بتزعل. المديرة: إيه اللي حصل ياداليا؟ اتكلمي. داليا بتتصنع العياط: أنا معملتش حاجة ياماما. أنا كنت واخدة اسكتش كريم أنقل منه وبرجعهولوا. لقيتها هي اتهجمت عليا ضربتني من غير سبب. تونة: لا ياشيخة. اتهجمت عليكي من غير سبب؟

انطقي يابت بدل ما أجيبك من شعرك تاني وأمك اللي هناك دي مش هتعرف تخلصك من إيدي. داليا: شايفة ياماما بتقول إيه. المديرة ضربت ع المكتب بإيديها: بس إنتي وهي. وإنتي إيه الاسلوب والطريقة البلدي اللي بتتكلمي بيها دي؟ إزاي طالبة ف مدرستي بالأسلوب ده؟ تونة: هنسيب بقا الموضوع الأساسي ونمسك ف أسلوبي؟ المديرة: وهو فين الموضوع أصلا؟ البنت خدت من زميلها الكشكول بتاعه. إنتي بتدخلي ليه؟

تونة: ماتشوفي يا أبلة بنتك كاتبة إيه لكريم ف الاسكتش. وبعدين اتكلمي. المديرة فتحت الاسكتش وبصيت لبنتها: ماله؟ مافيهوش حاجة. تونة بعصبية: إزاي يعني؟ أنا متأكدة إن فيه وكانت كاتبة بحبك ياكيمو. هاتي وأنا أوريكي. المديرة: وأنا قولت مافيش حاجة مكتوبة. خدي الكشكول ده يا مس رحاب. كريم: بس فتون مبتكذبش. وكان مكتوب فعلا. المديرة: كريم ياحبيبي إنت إيه موقفك هنا؟ اطلع ع فصلك. كريم: أنا مش هسيب فتون.

المديرة: مالهاش لازمة وقفتك هنا. أنا هخليها لحد ما ييجي ولي أمرها. داليا ياحبيبتي خدي صحابك وكريم وروحي ع فصلك. تونة بعصبية: آآآه. دانتو مطبخينها بقا… طب والله لافتحلك دماغ بنتك. ولسه بتهجم ع داليا. كريم مسك تونة والمديرة وقفت قصاد بنتها. المديرة: إنتي اتجننتي؟ إيه اللي بتعمليه ده؟ فين ولي أمرها؟ أنا هرفضك ومش هخليكي تدخليها تاني. تونة: يعني هترفضيني من البيت الأبيض؟ اوعا يابن عمي والله ماهسيبهم.

المديرة: اخررررسي قلت. إنتي شكلك مالكيش أهل ومشفتيش تربية ف حياتك كلها. تونة الكلام وجعها ودمعت. هي فعلا مالهاش أهل. المديرة: وأنا هوريكي إزاي تعملي كده ف بنتي. السكرتيرة: زين بيه. ولسه بتكمل كان زين دخل ع صوت المديرة. المديرة عدلت من نفسها: زين بيه اتفضل. أهلا وسهلا. ليه كلفت نفسك وجيت. كريم معملش حاجة. دي هي البنت دي. ومتقلقش أنا خليتهم يبلغوا ولي أمرها وزمانه جاي دلوقتي. زين: أنا ولي أمرها.

المديرة بصدمة: حضرتك ولي أمرها؟ زين: آه أنا ولي أمرها. فتون عملت إيه؟ المديرة: لا معملتش. ده سوء تفاهم بس. زين: وسوء التفاهم ده يستدعي إن حضرتك تقوليها مالكيش أهل ومشفتيش تربية!! المديرة: أستاذ زين. البنت أسلوبها وحش و… زين: ده ميديكيش الحق إنك تعاملي طالبة بشكل دا. وحضرتك كلمتينا يبقى تستني لحد مانيجي ونعرفينا واحنا نعاقبها العقاب اللي تستحقه. مش تهينيها إنتي.

المديرة: طيب يا أستاذ زين مش تفهم الأول اللي حصل. البنت ضربت زميلتها قدام الفصل كله. زين: ضربتها ليه بقا؟ المديرة: من غير سبب. تونة: دي بتكدب يازين والله وبتداري ع بنتها. المديرة: شايف الاسلوب يا أستاذ زين. زين بص لفتون: ممكن متتكلميش طول ما أنا واقف؟ تونة: حاضر. زين: كريم احكي اللي حصل. كريم حكى كل اللي حصل. المديرة: بس أنا شوفت بنفسي يا أستاذ زين ومكنش فيه حاجة مكتوبة.

زين: طيب أنا عاوز أشوف أنا كمان إيه اللي ف الاسكتش. المديرة اتوترت: مش موجود. أنا عطيته للمس. زين: بسيطة. خلي المس تيجي وتجيب الاسكتش ونشوف مين غلطان. ولو فتون لوحدها غلطت أنا هسيبك تعاقبيها وأنا كمان هعاقبها. بس لو الاتنين غلطانين بنت حضرتك كمان هتتعاقب. المديرة: المس مشيت خلاص. زين: جميل. أنا بقا عاوز أسحب ورق كريم وفتون دلوقتي. *** صافي: إنتي يابنتي هنا وأنا قالبة عليكي الدنيا. ليل: إنتي إيه اللي نزلك؟

مش الدكتور قالك بلاش حركة كتير. صافي: اسر كلمني وع اخره منك. إنتي إيه يابنتي جبلة؟ ماترحمي الولد بقا. عاوز يفرح. ليل: هو اشتكالك مني؟ طيب مفيش حاجة بقا قبل سنتين بس كدا. صافي: يلااااهوي. لا حرام عليكي والله هولد بسببك. ليل بتضحك: أنا مش فاهمة إنتوا مستعجلين ع إيه بس. صافي: مستعجلين ع إيه؟ فوقي يا ليل. إنتي داخلين ف 6 سنين مخطوبين. ليل: وإيه يعني؟ مانكملهم 10. اسر دخل: نعععم.

(صافي اتخضت ومسكت بطنها كأنها هتولد وليل استخبت وراها) عشر إيه؟ أنا سمعت صح؟ قالت 10 سنين. صافي: لا لا إنت سمعت غلط. دي بتقول 10 شهور. اسر بعصبية: ولا 10 أيام حتي. ليل: يعني إيه؟ يعني هتتجوزني غصب؟ اسر: بقولك إيه؟ متجننينيش عليكي. 6 سنين يامفترية وف الآخر تقوليلي غصب. صافي: هولد هولد. ليل: صلي ع النبي. دانا بهزر معاك. إنت بقيت قفوش ليه كده؟ اسر: ده أنا كان زمان معايا علي و ملك دلوقتي. ليل: مش للدرجادي.

اسر بعصبية: أنا رايح دلوقتي أبلغهم إن الفرح بكرة. ويويلك لو سمعت منك أي اعتراض. إنتي فاهمة؟ ليل بخوف: فاهمة. فاهمة. (اسر مشي) ليل استوعبت: إيه ده؟ هو قال بكرة؟ صافي: آه. ليل: بكرة؟ بكرة يعني؟ استنا ياااسرررررر نتفاهم طببب. *** قمر: تونة ياحبيبتي. إيه حصل؟ حد عملك حاجة؟ زين: ودي حد يعمل معاها حاجة دي؟ دي ضاربة بنت المديرة وأصحابها. شوية كانت هتضرب المديرة نفسها. تونة: كان نفسي والله. قمر: ليه كل ده؟

زين شاور ع كريم: عشان خاطر البيه. بس متقلقيش. هي المديرة لما عرفت إن فتون تبعي اتعدلت. وحلينا الموضوع ف الآخر. لو كنتي إنتي روحتي كان زمانها طردت تونة. قمر: ف ستين داهية. وأدخلها مدرسة أحسن منها. كريم: لا بس أنا مكنتش أعرف إن تونة بتغير عليا أوي كده. تونة قامت زي المجنونة: آآآه فكرتني. تعاليالي بقا إنت كمان. كريم استخبي ورا زين: إيه ف إيه؟ والله ما عملت حاجة. تونة: بتديها الاسكتش ليه؟

أنا مش فهمالك إنك متقربش لواحدة عشان مولعش فيك وفيها. كريم: حصل. تونة: اومال مبتسمعش الكلام ليه؟ قمر: صلي ع النبي ياتونة ياحبيبتي. معلش سامحيه. تونة: هههاييي. أسامحه؟ ده يومه أزرق. بقا البت تقولك ياكوكي وبحبك ياكيمو. زين بص لكريم: هي البت قالتلك كده بجد؟ كريم: آه. زين: ياواد ياكريم إنت يمدوب قلوب البنات. كريم ضحك: اومال إنت فاكر إيه؟ ده أنا أعجبك أوي. زين: حبيب أخوك.

تونة مسكت طبق كان قدامه: طب تعالالي بقا إنت كمان ياحبيب أخوك إنت وأخوكك. كريم: والله بهزار بهزار. زين: دي هتفتح دماغنا إحنا الاتنين دي ولا إيه؟ لا أنا عندي بنات عاوز أربيها. قمر مسكتها: آهدي خلاص ياتونة علشان خاطري أنا. إنتي هتاخدي ع كلامهم. اطلعي ياحبيبتي غيري هدومك. زين: آه ونبي. وانزلي لما اللي عليكي ده ينصرف. تونة: ماشي. ماشي. (حدفت الطبق ع الأرض ناحية رجل كريم وكريم نط عشان ميجيش فيه) زين: أخويا حبيبي حصلك حاجة؟

كريم: لا الحمد لله. سليمة سليمة. قمر: وإنت وهو ممكن تخفوا ع البت شوية بقا؟ كريم: والله ما عملتلها حاجة. أنا ف حالي. قمر: لا ياولا. وإيه حكاية كوكي دي؟ كريم: أنا متفاجئ زيكم والله. عن إذنكم بقا أما ألحق أصالحها. زين: يخربيتك. إنت رايح فين؟ ده أنا صدقت أنقذتك منها. هتروح للموت برجليك؟ كريم: أنا لو مروحتش وراها خلال خمس دقايق. احتمال تولع فيا وفيكم وف البيت كله.

زين: لا إذا كان كده. فاتوكل ع الله إنت. هتوحشني والله يا أخويا. اسر: فين باب؟ زين: بابا ف أوضته. خير في حاجة؟ اسر: آه. أنا هتجوز بكرة. قمر وزين: نعععععم!!!!! *** كريم: تونة استني. تونة: إيه اللي جابك ورايا؟ مش أنا مجنونة ووحشة وبتستخبي ورا زين مني؟ عاوز إيه؟ كريم: أنا بهزر ياتونة. هو إنتي ف زيك؟ أي نعم مجنونة فعلا. بس ع قلبي زي العسل. وبعدين مانا دافعت عنك قدام المديرة. وده أكبر دليل إن ماليش علاقة بداليا.

تونة: إنت بتذكر اسمها قدامي تاني؟ كريم: لا خلاص بقا متزعليش ياستي ها. يلا دورك إنتي بقا صالحيني ع الإهانة اللي أهنتيهالي قدام زميلي اللي ف المدرسة وقدام زين وقمر. تونة: والله أنا أصالحه. طيب غمض عينك كدا ياحبيبي. كريم: دي شكلها هتبقى مصالحة حلوة أوي. تونة: أوي أوي ياحبيبي. كريم غمض عينه: ها. يلا. تونة زقته ف البسين: إيه رأيك بقا؟ كريم: يخربيت جنانك. تونة: إيه رأيك ف المصالحة دي؟ ابقا خلي داليا تيجي تطلعك. ياكوكييي.

*** كنزي: إيه ده حازم؟ إيه رجعك بدري كده؟ حازم: حضري نفسك عشان نازلين نشتري حاجات الفرح. كنزي: فرح مين؟ حازم: اسر وليل. فرحهم بكرة. كنزي: بتهزرر؟ فارس: هيييييه. يعني هشوف تالين بكرة. كنزي: روح يافارس كمل الهوم ورك بتاعك وسبني أتكلم مع بابا. حازم: هوم ورك إيه؟ مافيش وقت. يلا البسي إنتي وهو عشان نلحق. كنزي: نلحق إيه؟ أنا مش فاهمة حاجة. حازم: يلا بس وأنا هفهمك ف الطريق. بسرعةةة. كنزي: حاضر. ***

نور داخلة الفيلا: إيه اللي سمعتوه ده؟ اسر هيتجوز بكرة؟ قمر: آه. نور: ده بيهزروا. طب مقالوش من بدري ليه؟ قمر: لسه القرار طالع النهاردة. نور: لا دول مجانين. قمر: أخوكي مجنون لوحده هو اللي قرار. أنا إختي معملتش حاجة. نور: طب بابا قال إيه؟ وهنلحق نعزم الناس امتى؟ ولا نحضر نفسنا إحنا؟ والقاعة وكل ده هيترتب امتى؟ قمر: هو قال كل واحد يركز ع نفسه وبس. وهو عامل حساب كل حاجة.

نور: ده شكله مخطط من زمان. وهيزنقنا إحنا بقا. بس والله فرحت. أخيرا المجانين دول هيتجوزوا. قمر: الحمد لله عشان نخلص من زن اسر بقا. نور: المهم دلوقتي. أنا جاية أخدك إنتي وتالا وتالين وطنط هدي وتونة عشان ننزل نشتري الفساتين مع بعض. يلا اطلعي البسي وقوليلهم. قمر: حاضر. *** اسر: إنتي قاعدة بتعملي إيه؟ ليل: أفندم؟ عاوز إيه تاني؟ مش عملت اللي إنت عاوزه وأنا معترضتش. اسر: قدامي عشان نجيب فستانك. ليل: مش عاوزة. أنا هحضر كده.

اسر: بالبيجاما؟ ليل: آه بالبيجاما. اسر: ليل متعصبنيش ويلا البسي. ليل: فستان إيه ده اللي هختاره ف يوم؟ مش فاهمة. ده استحالة ألاقي الفستان اللي بحلم بيه ف الساعات دول. إنت عاوز تكروتني بقا. اسر: تعالي بس وأنا هجبلك اللي إنتي عاوزاه وبتحلمي بيه. حتى لو ف آخر الدنيا. وعمري ما أفكر أكروتك. وبكرة هيكون أحلى من مليون فرح إتمنيتيه. ليل ابتسمت: ماشي. اخرج عشان أغير هدومي. اسر: استني طيب. اقعدي لما نكلم وليد.

ليل: آآه صح. وليد. ده مش هيلحق ييجي. أنا بقول ناجلها أحسن. اسر: ده ف المشمش هتتأجل. اترزعي هنا نكلمه. متتحججيش. ليل: حااااضر. فتحوا الكاميرا. وليد: واحشنييي أوي والله العظيم. عامل إيه؟ اسر: وإنت والله واحشني ياصاحبي. ليل بتشاور بإيديها: هاااي. وليد عامل إيه؟ وليد: وإنتي كمان موجودة. اسر: آه ما إحنا مكلمينك عشان نبلغك إن فرحنا بكرة. وليد بفرحة: بتتكلموا بجد؟ أخيرا بقا قررتوا. ليل: والله هو اللي قرار لوحده.

اسر: عقبالك إنت كمان ماتقرر. وليد: لا أنا خلاص كده تمام. مرضي الحمد لله. ليل واسر بصوا لبعض بزعل: الله يرحمها. وليد: يارب. (حاول يغير الموضوع) المهم. طبعًا إنتوا هتعذروني إني مش هقدر أحضر. بس أوعدكم هنزل قريب وهجيلكم. اسر: أنا فاهم ياصاحبي. متقلقش. تيجي بالسلامة. إن شاء الله. وليد: الله يسلمك. طب أسيبكم أنا بقا عشان أكيد وراكم حاجات كتير. يلا سلام. اسر وليل شاورله بإيديهم: بااااي. ***

قمر بتخبط ع باب أوضة تونة: ممكن أدخل؟ تونة: لو كريم بعتك ف إنسي. أنا مش عاوزة أكلمه خالص. قمر: من غير ما تتعصبي. كريم مش بعتني. أنا جيالك ف حاجة تانية خالص. تونة: خلاص طالما مش كريم يبقى ادخلي. قمر: كنت عاوزة أطلب منك طلب صغير خالص. تونة: إيه هو؟ قمر: بصي بصراحة كده. سائر كلمني و… تونة: من غير ما تكملي. مش موافقة. قمر: مش لما تعرفي الأول.

تونة: عارفة ياقمر. الموضوع اللي بتتكلميني عليه بقالك سنين. وبردك مش بوافق عليه. مش فاهمة بتفتحي تاني ليه؟ قمر: عشان ده حقك ياحبيبتي. تونة: لا دا مش حقي ياقمر. قمر: لا حقك ياتونة. افهمي خالك عاوز يكفر عن اللي عمله ف أخته ويديكي كل نصيبها ويعوضك اللي معملهوش مع أخته. تونة: يكفر عن ذنبه بعيد عني. أنا ماليش علاقة لا بيه ولا بأخته. قمر: إزاي مالكيش علاقة ياتونة؟ إنتي بنتها ياحبيبتي.

تونة بعصبية: أنا مش بنت الست دي ياقمر. ومتقوليش كده تاني. لا يمكن أقبل الست دي تكون أمي. (دمعت) أنا من وقت مافتحت عيني مشوفتش غيرك إنتي وليل ومعرفش غيركم ومش عاوزة أعرف حد غيركم. أنا مش بنت الناس دي. أنا شهادة ميلادي مكتوب فيها فتون عبدالحميد صالح وأمي اسمها غادة. يعني أنا أختكم وبنتكم إنتو مش هما. قمر حضنتها: طيب اهدي. متعيطيش. والله ياتونة أنا بعمل كل ده عشان…