رواية حكايه لم تنتهي بعد الفصل الثالث 3 - بقلم رودي عبد الحميد

أخد نوح نفس عميق وقال: عمومًا أنا هتجوز كمان كام يوم كدا. رفعت راسها وبصتله بصدمة وقالت: إنت بتقول إيه؟ نوح بهدوء: نادين حاولي تفهميني دا شرع ربنا و... قطّعته نادين وهي بتعيط بحرقة وقالت: إنت بتقول إيه شرع ربنا إيه؟

الكلام دا لو حاجة فيا مش كاملة، لكن خلفة وحامل في الشهور الأولى، حنية ومفيش أحن مني عليك، دلال ودلّعاك على الآخر، كاملة من كلّه ومفيش حاجة ناقصاني ولا مش بخلف، لا بالعكس ربنا كرّمنا ورزقنا، فوق كل دا عايز تتجوز عليا؟ دا أنا مسلمالك قلبي بين إيديك وأنا متطمنة تقوم تكسّره بالمنظر دا؟ قولي أنا عملت فيك إيه؟ عملت إيه أنا لكل دا؟ قصرت معاك في إيه لأجل إنك تبص بره؟ ولّا كمان تتجوز؟ شكلي، شكلي وحش طيب؟

مع إنك كنت بتقول خواطر على وشي وشكلي وإن أجمل ست شافتها عينيك، ليه كل دا؟ نوح بعصبية: زهقت أنا زهقت. شفتها واتشدّيت ناحيتها، معرفش إيه شدني ليها بس أنا اتشدّيت وحبيتها، وقولت بدل ما أخونك معاها وتعرفي من بره ما أنا أتجوزها أحسن على سُنّة الله ورسوله ومأغضبش ربنا في حاجة، إنتي مقصرتيش ولا عمرك قصرتي ولا حتى وحشة بس أنا كنوح زهقت، خلاص عايز أشوفلي واحدة تانية، أنا مأجرمتش. _بته نادين في صدره وقالت:

منك لله بجد منك لله، إطلع برا. فضل نوح باصصلها وساكت. صرخت نادين فيه وقالت: بقولكك إطلعععع برااااا! نادين أغمي عليها. قام نوح مفزوع بيحاول يفوقها لقي دم تحتيها. اتفزع أكتر وخاف على البيبي اللي في بطنها. شالها ونزل بيها جري على المستشفى اللي موجودة على أول الشارع اللي ساكنين فيه. دخل بيها بيجري زي المجنون وبيقول: حد يلحقني هنا بسرعة مراتي بتموت مني. جابوا ترولي وقربوا عليه، أخدوها منه ودخلوها طوارئ.

وهو واقف على الباب بيدعي ربنا يطلعها بالسلامة هي واللي في بطنها، وبرضه مكانش مقتنع أبداً بغلطه. بعد ساعة. طلع الدكتور من جواه. قرب عليه نوح وقال: طمني يا دكتور مراتي والبيبي بخير؟ الدكتور وهو بياخد نفسه:

لو كنت اتأخرت أكتر من كده كنا هنخسر البيبي بس الحمدلله قدرنا نوقف النزيف وهي مش مهتمة بصحتها خالص ودا مينفعش. ولازم نفسيتها طول فترة الحمل وخصوصاً في الشهور الأولى تكون كويسة. مش يبقى عندها انهيار عصبي كده يا أستاذ... نوح بحزن رد وقال: نوح.. كمل الدكتور وقال:

أستاذ نوح المرة دي ربنا سترها والحمدلله الاتنين كويسين المدام والبيبي. المرة الجاية الله أعلم إيه ممكن يحصل. ياريت يكون فيه شوية أهمية بصحتها وبنفسيتها وابعدوا أي حاجة تزعلها عنها تماماً. وأسف حتى لو كنت حضرتك بتزعلها بطل تزعلها. هز راسه وسكت تمامًا. كمل الدكتور وقال: تخلص المحلول اللي مركبينه ليها وتقدر تاخدها وتروح وتتابع مع دكتور نسا كويس. نوح بتعب: تمام يا دكتور شكراً.

دخل نوح لنادين اللي كانت باصة قدامها وساكتة تماماً. قرب منها وقال: حمدلله على سلامتك إنتي والبيبي. نادين مازالت باصة قدامها وساكتة برضو. نوح أخد نفس وقال: مينفعش تضغطي على نفسك اليومين دول وبلاش تزعلي نفسك وتحطي في نفسيتك وارضي باللي مكتوب ودا حاجة متدبرة إنها تح... قطّعته نادين وقالت ببرود: هنروح إمتى؟ نوح بإستغراب: لما المحلول يخلص. فضلت باصة قدامها وساكتة تماماً ومفيش أي رياكشن على وشها. بعد ساعة.

دخل نوح وهو ساند نادين الأوضة ونيمها على السرير وقال: نبقى نشوف الدكتورة اللي إنتي متابعة معاها وأحجزلك عندها ونروح. غطت نفسها وغضمت عينيها ومردتش عليه. قام وقف وطلع وقفل الباب وراه وراح قعد على الكنبة ورجع راسه لورا وغمض عينيه. بعد ساعتين. جرس الباب رن. فتح نوح عينيه وهو بيفرك فيها وبيقول: حاضر. فتح الباب وهو فاتح عينيه بالعافية بس اللي شافه خلاه فتح عينيه بصدمة وقال: