رواية حياة الفصل الرابع 4 - بقلم اسراء محمود

خلصوا ورق الحضانة لآدم. ريم: يلا يا آدم اصحي يا حبيب ماما، يلا عندنا حضانة. آدم: صباح الخير يا أمي. ريم: صباح الخير يا قلب ماما، يلا قوم يا بطل عشان نجهز للحضانة. آدم: أنا خايف يكون في ناس شريرة في الحضانة زي مصطفى، يا ماما هو ينفع تقعدي معايا هناك؟ ريم: يا قلب ماما مينفعش عشان ابني بطل شجاع مش بيخاف من حد، صح ولا أنت خواف يا عم آدم ومش بطل ولا حاجة. آدم بيقوم ينط على السرير: لا أنا بطل شجاع، حتى شوف العضلات، اهو.

وبينط على ضهر ريم ويلعب معاها. ريم: يلا يا شقي، طيب اغسل وشك وسنانك عشان نلبس عشان الفطار، الدادة جهزته من زمان وحاجات أنت بتحبها. آدم بفرحة: سندوتش جبنة رومي وعصير فراولة، صح؟ ريم: صح يا بطل، يلا خلص بسرعة أحسن يحيى ينزل ياكل أكلك. يحيى بيكون واقف على الباب يتفرج عليهم، بيدخل عند سماع اسمه. يحيى: الله، ويحيى عمل لكم إيه دلوقتي، انتوا يا جماعة ظالمين، أنا زعلان وهعمل إضراب عن الأكل.

وبيروح يقعد على سرير آدم ويمثل إنه زعلان. آدم بيميل على جنب ريم: قومي صالحي بابا وإلا مش رايح حضانة، وهعمل أنا كمان إضراب أكل زي ما بابا قال. ريم: أولاً اسمها إضراب عن الأكل يا لمض، مش ضرب أكل. ثانياً يا عم يحيى أنت عارف إني بهزر، ده أنت قرة عيني وحبيبي. آدم بينط على ضهرها: أنا وبس حبيبك، هااا. يحيى: طيب يلا انت وهي خلصوا عشان نفطر عشان نوصلك الحضانة يا أستاذ، وأروح أشوف شغل المستشفى وريم تروح المكتب بتاعها.

في الحضانة. آدم بيكون خايف وواخد ركن لوحده. بيلاقي بنت وولد جايين عليه. البنت: أنت قاعد لوحدك ليه؟ أنت مش عندك أصحاب. الولد: إحنا ممكن نبقى أصحاب، بس متقعدش لوحدك تاني. آدم: هو إنتوا مين وعايزين إيه؟ البنت: أنا حياة وده أخويا التوأم حمزة. آدم بابتسامة: ممكن جداً يا حمزة. بيقضوا اليوم كله لعب وضحك وهزار. بيرجع آدم البيت، يفضل يحكي عن حمزة وحياة، وبيكون ريم ويحيى مبسوطين أوي بده. بعد مرور 10 سنين.

بيكون آدم وصل ثانية ثانوي، ودايماً الأول ومتفوق وشاطر. في يوم قاعدة ريم بتلعب في موبايلها، لقت رسالة شقلبت كيانها هي ويحيى. "عايزة تعرفي سبب حبك لآدم وتعلقك بيه؟ اعملي DNA وهتعرفي إنه ابنك اللي فكرتي إنه مات في المرة الوحيدة اللي خلفتي فيها."