رواية خايفة بدون ذنب الفصل الأول 1 - بقلم زينب مجدي

دي آخر رسالة هبعتها لك، ولو مردتش عليا.. هتلاقي صفحة باسمك وعليها نفس الصورة اللي إنتي حطاها. هيكون عليها صور ورسايل مش كويسة.. هتتبعت لجوزك ولولدك وأخوكي. أنا قرأت الرسالة دي من هنا وقلبي وقع في رجلي. في حد بقاله فترة بيبعت لي رسايل، ومصمم إني أكلمه. وكل ما أعمل حظر يبعت لي من صفحة تانية. قعدت أعيط. أنا حاسة إني وحيدة أوي. جوزي دايماً بيسافر كتير.. وده خلى اللي يسوى واللي ما يسواش يبعت لي رسايل زي كده.

عملت سكرين شوت للرسالة وبعتها لجوزي. أنا من أول رسالة اتبعتت لي وأنا بعمل سكرين شوت وببعت الكلام ده لجوزي. جوزي قرأ الرسالة ورن عليا. سليم... إيه يا سمية؟ الواد ده بعت لك تاني؟ سمية..... أنا خايفة أوي يا سليم. ممكن بجد يعمل صفحة باسمي؟ سليم.... متخافيش، هو مش هيقدر يعمل حاجة. سمية..... طيب يا سليم اتصرف. أعمل أي حاجة. سليم.... أعمل إيه يعني يا سمية؟ سمية..... هو أنا اللي هقولك تعمل إيه؟ سليم....

طيب سلام دلوقتي وأنا هتصرف. قفلت مع جوزي وأنا قاعدة بجد خايفة. بس اللي مطمني شوية إن جوزي عارف كل حاجة من أول رسالة. شوية ولقيت رسالة اتبعتت لي تانية. "روحي قولتي لجوزك وخلتيه بعت لي طلب صداقة. ماشي، متزعليش بقى من اللي هيحصل. هو ده اللي قدرت عليه." يا سليم بعت له طلب صداقة؟ أستغفر الله العظيم يا رب. رنيت عليه. ورد عليا. سمية..... إنت رايح تبعت له طلب صداقة يا سليم؟ بدل ما تدخله تشتمه وتهزأه؟ سليم....

أنا هعمل لك إيه يعني يا سمية؟ مش إنتي اللي قولتي لي أتصرف؟ سمية..... ما تعملش يا سليم، أنا هتصرف. هقول لأحمد أخويا، ممكن يعرف يتصرف. في الوقت ده وأنا بكلم جوزي جات لي رسالة تانية بس أنا تجاهلتها وكملت المكالمة. سليم..... خلاص ماشي، قولي لأحمد ممكن يعرف يتصرف. سلام. موقف جوزي ده ضايقني أوي. بس تجاهلت شعوري ودخلت شفت الرسالة. لقيته كاتب: "بدل ما إنتي قاعدة بتكلمي جوزك كده ردي عليا. شوفي أنا عايز منك إيه."

قرأت الرسالة.. وأعصابي تعبت أكتر. قررت أبعت لأخويا. هو ممكن يتصرف. بس لقيته مش فاتح نت. أخويا السنة دي ثانوية عامة ومش بيفتح كتير. وأنا خايفة أشغله عن مذاكرته. يارب أقوله ولا لأ؟ سيبت التليفون من إيدي وقمت أجهز غدا لابني. دلوقتي هييجي من الحضانة. قمت جهزت الغدا. وأنا بجد متوترة. مكنتش متخيلة إني في يوم من الأيام هتحط في موقف زي ده. أنا عمري ما اتكلمت مع شاب. وطول عمري حاطة حدود في التعامل مع أي حد. ليه كده؟

في حد ممكن يضايق أو يأذي حد؟ ليه الناس تأذي بعضها؟ قطع تفكيري حضور ابني من الحضانة وحماتي طلعت معاه. تشوفني أنا منزلتش ليه النهاردة. حماتي.... منزلتيش يعني النهاردة يا سمية؟ سمية..... بطني بتوجعني يا ماما ومقدرتش أنزل. أنا مكدبتش. أنا فعلاً لما بتوتر بطني بتوجعني. حماتي.... طيب عندك برشام مغص ولا أبعت حد من العيال يجب لك؟ سمية..... أنا هدخل أشوف برشام عندي جوه. تعالي إنتي ادخلي اتغدي معانا. حماتي.... لأ مش جعانة.

سمية..... لأ والله لازم تدخلي تتغدي معايا. دخلت حماتي وحطيت الغدا وقعدنا نتكلم شوية في أمور عامة. التوتر اللي عندي خف شوية لما بطلت تفكير في الموضوع. اتغدت حماتي ونزلت تحت. وأنا فكرت مع نفسي وقولت همسح الماسنجر خالص عشان أريح دماغي من وجع الدماغ ده. وبصيت لقيت جالي رسالة تانية. "وأنا ليه كل ما أكلمك من صفحة تعملي لي حظر؟ ما تكلميني وشوفي أنا عايز إيه. لو رديتي عليا بالليل هقولك أنا مين. ويا ريت متعمليش حظر."

أخدت اسكرين شوت وبعتها لجوزي طبعاً وعملت حظر. سليم.... طيب ردي عليه وشوفي هو مين. سمية بصدمة..... طبعاً لأ مش هرد عليه. سليم.... ماهو إنتي هتعرفي هو مين ومش هتكلميه تاني. سمية..... طبعاً مش هكلمه. أفرض إنهم شباب فاضية وعاملين رهان عشان يشوفوا أنا هرد ولا لأ. سليم.... خلاص اعملي اللي إنتي عايزاه. سمية..... قولي هو الماسنجر بيتقفل إزاي وأنا هقفله وأريح دماغي. سليم.... مش عارف والله. قولي لأحمد أخوكي هتلاقيه عارف.

سمية.... خلاص ماشي، أنا هكلمه. قفلت مع جوزي وفتحت واتس لقيت أحمد فاتح. بعت له. وبعد السلامات قولت له: لو عايزة أقفل الماسنجر يا أحمد، أقفله إزاي؟ أحمد..... هتقفليه ليه؟ في حاجة ولا إيه؟ فكرت شوية أقوله ولا لأ. وبعدين قررت أقوله. في حد كل شوية بيبعت لي رسائل ومضايقني. أحمد..... رسايل إيه؟ سمية..... استنى أنا عملت لها اسكرين شوت هبعتهالك. بدأت أبعت له الرسايل. أول واحدة: "إيه يا أم سفيان؟

جوزك هنا ولا مسافر. لو سافر ردي عليا نتكلم مع بعض." وتاني رسالة: "عملتي حظر ليه يا أم سفيان؟ أنا عايز نتعرف وإنتي كده كده جوزك مسافر، وصدقيني مش هيعرف حاجة." تالت رسالة.. كان بعت لي رقم تليفوني وبيقول: "مش رقمك ده علشان تعرفي لو عايز أوصلك هوصلك. ردي عليا ومتعمليش حظر تاني." ورسايل تانية كتير. أحمد.... ابعتي لي اللينك بتاع الصفحة اللي بعت لك منها. سمية..... أنا مش عارفة أجيب اللينك ده إزاي. وبعدين أنا عملت حظر.

أحمد..... فكي الحظر.. وادخلي على الصفحة هتلاقي تلات نقط كده على جنب فوق.. دوسي عليهم هتلاقي في كلام تحت دوسي عليه وانسخيه وابعته لي. سمية..... ماشي.. بس إنت هتعمل إيه؟ أحمد..... هشوف واحد بيهكر تليفونات وهروح له وأعرف هو مين ده. وأنا هتصرف. سمية..... ماشي. عملت زي ما قالي وقعدت. لقيت جالي رسالة خلتني هموت من الرعب. "أنا ساعة بالظبط وهتلاقيني واقف قدام البيت."