رواية قسوة احفاد ال هتان الفصل السادس 6 - بقلم هاجر النعيمي

هاجر : وكم واحد أكدر أدخل معاي؟ تيم : أربعة أكثر شي، خمسة ما يصير. هاجر : ويصير ندخل ثلاثة أو اثنين أو وحدي. تيم : أي يصير، تعالي نلعب كيم أعلمك كل شي. لعبنا كيم وطلعنا مركز ثالث، وكلش عجبتني. وكال تيم: تيم : إذا ماكو أحد من صديقاتك أو أحد تلعبين وياه، ادخلي هنا. وأكو بنات وأكو ولد، بس هاجر ولد لا. هاجر : أدري بدون ما تكول، بس بنات.

تيم : خوش، وانتبهي اكو ولد مو زينة، وإذا كتلتيهم يغلطون. دير بالك أنت هم لا تغلط، لأن لسانهم وصخ وما حاجة أعلمك بولد هسه، خاصة من طلع داعش من الموصل الكل تغير. هاجر : أدري، لا تخاف. انفتح الباب وفات إلياس وأسيل. أسيل : ما شاء الله كلش حلوين سوا، أحسكم تتراهمون. تيم : شكراً لأن تعترفين نحنا حلوين. أسيل : مو قصدي هيج، قصدي تلبقون لبعض.

هاجر : لا حبيبتي مانلبق، مستحيل أعيش وياك بيت واحد، لأن المكان اللي تدخلين عليه تنجس بوصاختك، وهسه بره غرفتي بلا مطرود اثنينكم. إلياس : بيت جدي وين ما يعجبني أروح. هاجر : من تكون هاي غرفتك جدك ساعتها تعال عليها. أسيل : لا تحجين ويا خطيبي هيج. هاجر : أشوف غيرتي لهجتج، هاه نسيت تخافين من جدو؟ أسيل : هذا مو موضوعنا. هاجر : شنو موضوعنا لعد؟ أسيل : إنو تلبقون لبعض. تيم : أني أحب إيلا، ف لا تظلين تلوصين بكيفك.

إلياس : تيم، أحجي ويا خطيبتي باحترام، لا أشققك. شفت تيم سكت وما حجه شي. احترام لأخو الكبير. أني ماتحملت وكلت: هاجر : خلي يلزم حدها حتى لا يحجي عليها، ويلا خذها وبرة غرفتي. صرت أدفعهم حتى يطلعون. كال إلياس بأذني: إلياس : ما أخليج تتهنين بحياتج بدوني. نصدمت، هذا شبي وشنو قصده وليش هيج كال؟ ما فهمت شي، بقيت صافنة وأحجي ويا نفسي. كال تيم: تيم : شنو كالج؟ هاجر : كال ما أخليج تتهنين بحياتج بدوني. تيم : شنو يقصد؟

هاجر : معرف، حالي حالك. تيم : خلي يولي، هو بس يريد يخرب الوناسة مالنا، لا تفكرين. بي فتح الباب واجت عمه أميرة وكالت: أميرة : يلا عيني تعالوا كُلوا، كاعدين هينة تلعبون ونحنا مخبوصين. طلعنا ناكل. كل ما أرفع راسي أشوف إلياس يدحك علي. مليت بس جنت جوعانة ف كملت أكل. رفعت راسي مرة ثانية، هم جان يدحك علي، بس هسه غمز لي. اختنكت وصرت أكح وأريد أجر نفس، ما أكدر. تموا علي، واسمع تيم يكول: تيم : تبعدوا من يمها، خلي تشم هواء.

أمي انطتني مي وشربت ورجعت أكمل أكل. كملنا الأكل، وأني والبنات صرنا نلم بالسفرة. أني وجاي أشيل صحن المرق، اجت من يمي أسيل وضربتني بكتفها، وكع صحن المرق علي وملابسي كلها صارت مرق. عصبت وزتيت الصحن وانكسر، وكتلها: هاجر : أنتي عمية ما تشوفين لو تسويها عن قصد لأن ضايجة مني. اسمعي حيوانة، خليج وحدج ولا تجين يمي، صدكني أندمج. وتلفوني يشهد.

ما حچت شي وظلت ساكتة. وجها صار أحمر، والكل صار يدحك علينا وعلامات تعجب مبينة على وجوهم. كالت: أسيل : آسفة، ما شفتج، عذريني. هاجر : ما شفتيني لو عن قصد سويتيها؟ هاي سوالفج مو علي. أسيل : كتلتج ما شفتج، ليش تريدين تسوين مشاكل؟ هاجر : أني لو أنتي. عفتها ورحت لغرفتي أب بدل. شوف حال ملابسي تلعب النفس وريحتي صارت مرق. فتت سبحت وطلعت، بدلت وجاي أمشط شعري. انفتح الباب وفات إلياس. كلت:

هاجر : خير، إن شاء الله. جيت أنت تزت التمن علي؟ إلياس : لا، بس جيت علمود غير موضوع. هاجر : شنو الموضوع؟ احجي بسرعة مو فاضية إلك. إلياس : هسه صرتي مو فاضية. المهم، بعدج تحبيني؟ هاجر : ههههه، أكيد تشاقة بسؤالك. إلياس : ترا جاي أحجي بجدية. هاجر : جوابي لا، ما أحبك وأكرهك هم. إلياس : لعد ليش من غمزتلج اختنكتي وصرتي تكحين؟

هاجر : انصدمت وما توقعتها، ولهذا السبب اختنكت. وبعد لا تعيدها لأن لعبت نفسي. وهسه بلا مطرود برة غرفتي. إلياس : راح اطلع، ميخالف. بس راح أخليج ترجعين تحبيني. هاجر : ههههه، عفواً عفواً، بس شنو المميز بيك؟ أشوف لا رجولة، لا أخلاق، لا أدب، لا شخصية. على شنو أحبك؟ إلياس : وليش من جنتي تحبيني ماشفتي هاي الشغلات؟ هاجر : ماينرادلها سؤال، جنت مخدوعة بيك، عادي. إلياس : يعني أني مو رجال وما عندي أخلاق وما عندي شخصية؟

هاجر : أي، ونسيت الأدب هم. إلياس : حلو، يصير خير. ثقي أنو راح أخرب حياتج، وراح أبدأ بأول شي تحبيه وهو المدرسة. هاجر : من تكون أنت أبويه ساعتها أحجي. ويلا برة، مو مال احترام، واكف بنص غرفتي ويهدد. النص رجال. إلياس : أشوفج النص رجال شنو يسوي. تقرب يمي ولزمني من زندي وباس خدي. دفعتة وكتله: هاجر : شنو هل وقاحة؟ اطلع برة لا أصيح وأفضحك يا نص رجال. إلياس : يصير خير. بربوك. طلع، حتى بدون ما أرد. شنو من بشر هذا؟

الله ياخذه، يريد يخرب حلمي. قفلت الباب وبديت أبجي بسكوت. ما أعرف شنو أسوي، والمشكلة جدو يسمع من إلياس، لأن جدو مربي ويستشاره بكل شي، حتى أكثر من بابا وعمامي. وهذا الشي مستغل إلياس ويسوي كل شي يريد، لأن جدو واكف بضهره. الله ياخذه ويخلصني منه. تعبت، معرف شنو يريد مني بعد؟ الله ياخذني؟ لا ليش ياخذني؟ ياخذه يارب.

بقيت أدعي عليه بكلب محروك. سمعت الباب اندك. مسحت دموعي وظليت أبتسم شوية حتى تختفي دموعي. فتحت الباب وجان تيم وإيلا. كالت إيلا: إيلا : هاجر... دقيقة؟ ليش عيونج حمر؟ اكو شي؟ ليش تبجين؟ حجيت كل شي صار، وجنت منهارة علمود المدرسة، ماريد أبطل، أريد أحقق حلمي وأروح صيدلة. وأحس هو راح يخرب هذا الحلم. تيم : شعليج بي؟ أكيد أبوك ما يقبل. وإذا صار هيج ساعتها كولي لهم انتحر، وهما يسكتون علمود الفضيحة، ومحد يكولج شي.

هاجر : خرب يومك، مو عقل. ضيم، من وين تجيب هاي الأفكار؟ تيم : قبل ما أنام. هاجر : بربك شنو تفكر قبل ما تنام؟ تيم : أفكر شنو راح نسوي بعرسنا أني وإيلا، وشلون راح يطلع. دحكت على إيلا، وجانت خجلانة، وجها أحمر. كلش حلوة وهي بيضة، أبيض وحدة بينه، حتى عيونها خضر. كلش حلوة تشبه أبوها. هاجر : راعوا مشاعري وأنجبوا، عيب عليكم. تيم : عذرينه عيني. هاجر : والله بس أنت الي تضحكني وتنسيني همومي. تيم : أختي الغالية.

هاجر : بعد روحي أختي الغالية. تيم : ولج شنو أختي وشواربي ماشفتيها؟ هاجر : دوختنه بشواربه، شوارب أسيا أطول من شواربك. تيم : ولج تحجين على شواربي؟ لو جانت شعرة وحدة ما يصير تحجين عليها. هاجر : شوارب تيم، أني آسفة، اعذروني خوش هيجي. تيم : أي عفية، هسه رضو عليج. هاجر : صحيح، ليش جيتوا عليه؟ تيم : والله نسيت ليش جينا. إيلا : حتى أني نسيت ليش جينا. فاتت عمه مريم وكالت:

مريم : تيم، أنت هوني، وأخوك يدوخ عليك، روح جيب الدي جي بسرعة. تيم : هسه أطلع، أجر واحد وأجي. طلع هو وعمه مريم. وكلت لإيلا: هاجر : شكو؟ ليش دي جي عدنا عرس ومعرف؟ إيلا : لا، بس جنات أفندي كالت جيبوا دي جي علمود نحتفل بخطوبة بنتها العار. هاجر : امم، لعد خلي أحل شعري وأحط مكياج شوية. تعالي أنتِ هم. بدينة نحط مكياج، واجت رسل كالت: رسل : ليش تحطون مكياج؟ هاجر : علمود الحفلة. رسل : غداً يجي شهم يخطبني. هاجر : منو شهم؟

رسل : صديق يونس. هاجر : يعني تحبون بعض لو شنو؟ رسل : أي. هاجر : تحجون مع بعض مو؟ رسل : مرة شافني وكال أحبج وراح آجي أخطبج. هاجر : أشون عرفتي غداً يخطبج؟ رسل : أخته صديقتي، هيا جت عدنا وكالتلي البارحة. هاجر : خوش، الله يكتبلج اللي بي الخير، وإن شاء الله يوافقون. رسل : خايفة جدو يرفض. هاجر : والله معرف، إن شاء الله يقبل. اجت جنات وكالت: جنات : جدكم يصيحكم. إيلا : أي عمة، هسه نجي. طلعنا وراها، وجدو كال:

جدو : هاجر ورسل، جو خطابة عليكم البارحة، وكالوا انريد البنتين، بنت تامر وبنت علي. وأنا أقول الولاد حبابين ومابيهم شي. هاجر : كتلك جدو، من رفضتو محمود ما زوجت، هسه اله بكيفي. جدو : ما بكيفك، بكيفي، وأنا أعرف مصلحتكم. هاجر : والله اللي يجبرني على شي ما أريده، أنتحر وأخلص منكم ومن هاي العيشة الزفت. كمت وردت اطلع. وصلت يم الباب وجدو صاح بصوت هز البيت هز: جدو : ما عندي بنات ترفض كلامي، والكل يسمع الكلام. إلياس

كال كلام خلاني أنصدم: إلياس : جدو، ماله داعي، اللي ماتريبه براحتها، لا تجبرها. وبعدين منو خطبها؟ جدو : ولاد أبو أحمد. إلياس : ماله داعي، الولد سمعتهم مو حلوة، يكولون يسكرون. جدو : أنت تشوف إنو نرفض؟ إلياس : أي، لأن هاجر ورسل مثل خواتي، وما أريد شي ينغص عليهم. جدو : خلص، اللي تشوفه صح نسوي.

ارتحت نوعاً ما، بس ضجت لأن يسمع كلام إلياس. رحت للغرفة وضربت الباب بقوة، وكعدت على السرير ضايجة. يعني معقولة واحد عمره 23 يضحك على واحد عمره 66؟ مو معقولة. انفتح الباب وفات إلياس مبتسم وكال: إلياس : شفتي شلون قنعت جدو ما يزوجكم. هاجر : تريد أشكرك مثلاً؟ إلياس : إذا تبوسيني بمكان الشكر. هاجر : الله ياخذك، شكد ما تستحي؟ اطلع برة. إلياس : صدك، إذا يزوجوج تنتحرين؟ كولي أريد إلياس وفضيها.

هاجر : لو تبقى آخر ذكر على وجه الكرة الأرضية فلا أقبل بيك، أنتحر وما آخذك. إلياس : هيج تكرهيني؟ هاجر : أكثر ما تتصور. وهسه برة. صرت أدفع بيه حتى يطلع. طلع وبعدها بقيت بغرفتي وما طلعت. صار العشى وبقيت بغرفتي وكتلهم ما أشتهي. راسلت البنات وكتلهم على بوبجي ونزلوها وبديت أعلمهم. سارة : كتلني، الحكوني يمه، الله ياخذه موتني. أصبر، خلي تعالجني. ولجن عالجوني. هاجر : صوتج فضحتينه.

رزان : حباب لا تفنش، هسه تجي صديقتي تعالجني ونتحالف وياكم. شنو رأيك؟ هاجر : ويا منو تحجين؟ رزان : هذا اللي كتلني. حباب مراح يموتني، تعالي عالجيني. راحت ريماس تعالجها، وأني عالجت سارة. وكان يقتل ريماس ورزان. كالت: رزان : ابن القندرة، ليش تفنش؟ مو كتلك تحالف. أنعل أبوك. هاجر : على كيفج عيني، محد كالج شي. (أهجمي) عليهم. سارة : ورا الكرفان واحد. رزان : أي، هذا اللي كتلني. اللي تكتله الها بوسة مني.

هاجر : اقتلو، بس ماريد البوسة. رزان : طبج مرض، أنتي الخسرانة. كتلتو، واسمع رزان تصيح: كفو، كفو، بعد روحي. انطرشت من صياحها. شلون أهلها؟ محد كعد على صوتها. معرف. جان ريماس تكول: ريماس : ها حيوان؟ بنية تكتلك؟ روح طم نفسك بالطين. أمداك من بين الزلم. بعدها اجانه ناس وكتلونا. وسارة كالت: أروح أنام. ريماس كالت: أروح أشحن تلفوني.

ورزان كالت: أروح أراسل علاوي. وبقيت وحدي، معرف شنو أسوي. كلت أفوت ويا بنات ونحجي. شفت بنت دازة بالعام. دخلت. وكال واحد: ... عود اسمها شيخة زربة احسن. هاجر : أنجب. أصلاً أني دخلت ويا بنات، أنت شلون طلعت لي؟ ... زهراء، يعني هاي من يمك مو؟ زهراء : أي، نجب، خلي أحجي وياها. شلونج كلبي؟ شنو اسمج؟ من وين؟ هاجر : تمام الحمد لله. هاجر، موصل 17. زهراء : تشرفت بيج. أني أكبر منج سنتين، واسمي زهراء. أموري حبيبي ليش ساكت؟

أمير : موجود كلبي، بس أنتظرجن تكملن. هاجر : هذا حبيبج؟ زهراء : أي، وزوجي، وصار النه ثلاث سنوات متزوجين، وعدنا علاوي. .... شنو رأيكم نفوت كيم وتتعرفون بالكيم؟ دخلنا كيم وبدينا نلعب. ما جنت أحجي شي لأن معرف شحجي، وبس جنت أحجي ويا زهراء، لأن ما جنت أريد أحاجي ولد. كالت زهراء: زهراء : هجورة، عندج انستغرام؟ هاجر : أي عندي. زهراء : خوش، من نخلص الكيم دزيلي يا على الخاص. صرت أحجي وياها، لأن هيا تضل تحجي.

بعدها واحد منهم كال: ... شكد تحجون لخاطر الله. زهراء : وأنت شعليك؟ ... أريد أركز بالكيم. زهراء : أمير، عاجبك حجي تميم؟ أمير : تميم، سد حلكك، خلي يحجون، معليك بيهن. بلكي زهراء تلكة صديقة، لأن تعرف ما عدها. هاجر : يعني هذا اسمه تميم؟ أول مرة أسمع هيجي اسم. تميم : ليش عيني، ما عجبج؟ هاجر : بالعكس، حلو. يعني غريب، ما سامعته من قبل. تميم : هو أني كلني حلو، مو بس اسمي. هاجر : الله، الثقة. شكد مغرور. على شنو شايف نفسك؟

الله يعلم شلون شكلك؟ غير يخوف، لأن كل واحد مغرور يطلع يلعب النفس وما حلو. تميم : غير إذا تشوفين جمالي، أنتِ تضلين تزخفين علي وتكليلي أحبك. هاجر : أني ما أحب أحد على شكله، أحبه على أخلاقه وشخصيته. تميم : أمير، بدون زيج. بعدين وين اكو واحد هسه بقى على أخلاقه؟ كلها صارت كو***. هاجر : هسه إذا أنت هيج، مو معناها الكل. تميم : خاب نجبي وسدي حلكج، لا أشكه. هاجر : كل خرة ولا تغلط. قبل ما أحجي، أمير كال:

أمير : تميم، بلا أكلان نعل، خلينة متونسين. زهراء : تميم، بلا مشاكل. شكد تحب المشاكل؟ كافي حباب، يوم واحد بدون مشاكل، رحمة لأهلك. من يوم اللي تزوجت لهسه أنت كل يوم مشاكل، حتى الكل ضاج منك. تميم : خلي كل واحد يضوج يضوج، المهم أني متونس. هاجر : يعني هسه أنتو أقارب؟ زهراء : شوفي حبيبتي، أمير ابن خالتي وزوجي، وتميم ابن عم أمير. هاجر : ها، فهمت. عبالي أصدقاء. تميم : يا ابن الجلب، أمير الحيوان، تعال هيلني (عالجني)

ولك، تعال، راح يفنش خوات الك*** بيكم خير، تعال وجه بوجه، مو غدر. **** خواتكم، أمير ابن الخرة، تعال هيلني. أمير : ابن الخرة، كافي تفشر. نحنا مو وحدنا، لا تضل حيوان ويانا بنات، مو وحدنا. تميم : اكل خرة، أنت عالجني وما عليك، واللي ما عجبه يطلع. صار نقاش بينهم، واحد يغلط على الثاني، وحجي وصخ. آخر شي ضوجوني، وكلت: هاجر : أنتو ماتستحون؟

ترا نحنا بنات وياكم، ما بحدكم، ف احترمونه شوية. وعود من تشوفون بعض اغلطوا واذبحوا بعض، محد يحجي، بس هينة لا. تميم : إذا ما عاجبج، الباب يفوت مطي. هاجر : مو ضالة على سواد عيونك، بس يخلص الكيم أطلع. تميم : طبج مرض، وإذا تطلعين من هسه بعد أحسن. هاجر : الكيم مو مال أبوك حتى أطلع، واكرمنا بسكوتك. زهراء : تميم، كافي عاد. وهاجر، ماكو طلعة. حبيتج وأريد أصير صديقتج، وإذا تميم ما عاجبه هو يطلع. تميم : تبيعيني علمودها؟

وسفة والله. بقينة نلعب، وكيم يجر كيم. بعدها شفت الوقت تأخر، وصار موعد أذان الصبح. هسه ماما تكعد، وإذا شافتني كاعدة تموتني. ف كتلهم: هاجر : أني راح أروح، وتشرفت بيكم، ما عدا تميم. تميم : ماريد تتشرفين بيه. أمير : وين خيتي بعد وقت. تميم : عوفها يمعود، صدكت أني، بس خلي تفكنه. هاجر : الي يسمعك يكول قاتلة نفسي عليك. تميم : غير إذا تشوفيني تضلين تلحكين وراي. هاجر : ولا يكعد، توني كروس. أمير : أنتِ مشجعة ريال؟

هاجر : أي، شلون عرفت؟ أمير : من توني كروس لاعب ريال مدريد. هاجر : أي صح، نسيت. وأنت منو تشجع؟ أمير : طبعاً ريال. هاجر : حلو، نفسي يعني. وزهراء؟ زهراء : برشلونه. هاجر : لا يمعودة، طلعنا مو نفس تفكير بعض. بس لا تكليلي تحبين المنغولي. زهراء : منو هذا المنغولي؟ هاجر : ميسي. زهراء : لا دير بالج تحجين علي، أحبه أكثر من أمير. أمير : لج. زهراء : أقصد أكثر من تميم. شبيك صاير سمعك ثقيل؟ تميم : هاجر، أنتِ منغولية؟

لا تحجين على تاج راسج. هاجر : قصدك ميسي منغولي؟ يلا تتراهمون، منغولي يشجع منغولي. ههههه. أمير + زهراء : ههههه. أمير : عجبتيني هنا. هههه، والله وجان تجي وحدة أطول من لسانك. تميم : لو أحطها براسي، أخليها تلحك وراي، بس تعرف، ما أحب هاي السوالف. أمير : أبداً فقير، ما تحب هاي السوالف. هاجر : المهم، أني حروح هسه، بيباي. زهراء : أوكفي، عود راسليني خوش.

هاجر : باجر إن شاء الله، لأن هسه أريد ألحك أسوي نفسي نايمة قبل لا تجي ماما. طلعت وبسرعة زتيت التلفون وسويت نفسي نايمة. فد ربع ساعة وجان ينفتح الباب. دائما ماما تجي حتى تشوفني نايمة لو لا، وأني حافظة وقتها، ف قبل ما تجي أسوي نفسي نايمة. ومرات تجي قبل الموعد، بس بسرعة أطفي التلفون وما تحس. نمت وكعدت الصبح، ميتة نعس. لازم الكل يكعد بالـ 10، والي ما يجي للريوك الساعة 10:05 ياكل رزالة من جدي. أصلاً هو ليش عايش ويانا؟

مادري، بس لأن بابا أصغر واحد، بقى ويا. راسلت رسل علمود أعرف إيمتا يجون، وكالت العصر. وأكيد إذا طلبوها عمي راح يكول لجدو، وجدو يجمع الكل وياخذ رأيهم. بس إذا هو جان موافق والكل رافض، خلص تصير. وإذا هو رافض والكل موافق، ما تصير. لو معرف منو يجي. ساعدت ماما بالغدة، وسمعت صوت تلفون ماما. وجانت عمه أميرة وكالت: أميرة : أشونكم؟ أخباركم؟ مروة : الحمد لله. أنتم أشونكم؟

أميرة : الحمد لله. الجمعة الجاية النيشان والحنة مال إلياس. عود تعالوا من الخميس. مروة : والله أني ما أكدر، لأن عمي وعلي بالبيت، ما أكدر. وهاجر تعرفين أنو ما تجي؟ هاجر : لا، أروح عادي. أي عمة، أجیکم الخميس، بس خلي تيم يجي ياخذني، لأن بابا ما بيده مجال. أميرة : عفية حبيبتي، لا تخلين أحد يشمت بيج. وهذا ابني العار، أشون بدلها عليج، ما أعرف.

هاجر : هو أصلاً ما اختارني حتى يبدلني. المهم، عود أنتِ خبري جدو وكليل له، لأن هسه أكيد يرفض، بس منج يسمع. أميرة : هاي سهلة، خليها علي.

صرت كل يوم بليل أدخل بوبجي، وألعب ويا زهراء وأمير وتميم. وكل يوم لازم نتعارك. ما أعرف ليش. صادف اليوم ثلاثاء، وماما كعدتني الصبح وكالت نروح بيت جدي. وتبدلت ورحنا. وصلنا، وفتت سلمت عليهن. وجان اكو ولد أول مرة أشوفهم. اللي عرفته إنهم ولد خالي. هندرين أخوها بارق ومحمد. ريم أخوانها حيدر وعبدالله. وعدها خوات ثنين كبار مزوجات وعدهن أطفال. أما نور، عدها أخ واحد واسمه أسامة. واخت هندرين إيمان تحبه. وفاطمة أخت هندرين الثانية

ماتحب أحد، كل همها دراستها. وكلش عاجبتني، أحسها غير، تختلف. يعني مرات نروح بيت جدي، هيا تكون مو موجودة بسبب الدرس. وهيا أكبر مني، بس خطية، جانت بالثالث ثلاث سنوات تطلع لها نفس النتيجة. ولهذا السبب، هسه أني وياها نجحنا سادس علمي. وهمام وحارث ولد خالي الكبير، ما عدهم خوات. أما ولد خالي الثاني والأخير، إيلين وإيليا وجود. وجود عمره سنة ونص. إيلين وإيليا توم، عمرهن 11 سنة. بس جنت أعرف همام، لأن شفته بعرس كرايب أمي.

اجت هنوش وكالت: هندرين : تعالي لغرفة جدة، نكعد بيها ونسولف. رحنا لغرفة جدة. وكلت: هاجر : اكو واحد كلش حلو، لابس أسود. منو هذا؟ هندرين : وشعره لحد هينة؟ خلت إيدها يم أذانها، معناها بهذا الطول. كتلها: هاجر : أي. هندرين : أخويه بارق. هاجر : شنو هذا الاسم غريب؟ شنو قصة الأسماء الغريبة؟ تميم وبارق. نور : منو تميم؟

حجيت لهن على تميم وعلى زهراء وعلى أمير، وشلون قصتهم حلوة. وطول هاي الأيام أحجي وياها، حتى ويا أمير صرت أحجي، بس تميم لا، لأن ما نتصافى. نور : عندج صورة لتميم؟ هاجر : لا، ليش؟ نور : اسمه غريب وحلو، توقعت هو هم يكون حلو. هاجر : ليش هيج واثقة؟ بلكي طلع يلعب النفس. نور : إحساسي أبداً ما يطلع غلط. هاجر : قبانو لحساسج. بقينة شوية نحجي، واجاني مسجات على تلفوني. شفتوها، جانت من زهراء وكاتبة: زهراء : هجورة شلونج؟ شخبارج؟

شو اليوم ماكو. هاجر : الحمد لله زينة، وأنتي. زهراء : الحمد لله دومج. شكو ماكو. هاجر : والله ماكو شي، جيت على بيت جدي. زهراء : جا، أخذي راحتج وياهن، بيباي. راحت. وفتت للحساب، شفت جايني متابعة. فتت على حساب اللي تابعني، شفت متابع زهراء وأمير. استغربت، معقول واحد من كرايبهم؟ وجان ناشر صور هواي، وحسابه لا بأس به، يعني جان بي 4K متابع. شفت الصور، وجان أشوفه واكف يم سيارتي المفضلة. كمت أصيح وأكول: هاجر : من وين جابها؟

هاي بس بأوربا موجودة. يمه يمه كلبي راح يكف. صرت أكح، ونور تضرب ظهري. كالت هنوش: هندرين : ريم، ماء لهاجر بسرعة. جابت لي ريم ماء وشربت، وأحس راح أختنك، بلكوة أجر نفس. أني أشوفها بالتلفون، أجن. هلمرة اللي تابعني عنده هيا، غير أموت. كالت هنوش: هندرين : بس فهميني شكو. هاجر : اكو واحد تابعني وعنده شبح موستنك، وهاي بعدها ما جت على العراق، بس عند الأجانب. يربي، هذا من وين جابها. هندرين : شنو هيا الشبح؟

هاجر : سيارة، من جنت أشوف مسلسل إسباني، جان البطل عنده شبح موستنك ويتسابق. وتجنن السيارة. جان تلفوني بأيد نور وكالت: نور : شوفي، عنده كثير صور مع السيارات. هندرين : حتى حلو، والله. هاجر : خلي يسمع حمودي. هندرين : لا عيني، حمودي أحلى. ريم : لا، هذا أحلى، والله. نور : أي والله صح. حمودي حلو، بس هذا أحلى. حتى عيونه رصاصي، غريبة، ما كأن شفت منها. هاجر : أمير وزهراء يتابعوه. ريم : اسألي زهراء أو أمير.

هاجر : هسه أراسل زهراء. راسلت زهراء، ودزيت الحساب لها، وكتلها منو هذا؟ متابعج أنتِ وأمير. ردت: زهراء : عزة، هذا شعرفة؟ أنتِ من كرايبهم مو؟ هاجر : منو هذا؟ من كرايبكم مو؟ زهراء : ..................... ..................... انتهى البارت. منو تتوقعون يكون اللي راسل هاجر؟ وشنو يصير بعدين؟