رواية قسوة احفاد ال هتان الفصل السادس عشر 16 - بقلم هاجر النعيمي

الجو متوتر. اجا خالي علي ومن عرف رفض اللي سوا جدي وصار يلوم بجدو لأن يجبر هاجر على إلياس. توقعت إن خالي علي ما يسوي شي لأن جدو يبقى أبوه، بس صدمني من كال: علي: بنتي ما تتزوج إلياس. وإذا أحد يجبرها، أنا أطلع من البيت وما تشوفون وجهي لا أنا ولا عائلتي. جدو: أنت شلون تعوف أبوك لوحدك وتلحق مرتك وبنتك؟ خلي رضاهم يدخلك الجنة.

علي: أي رضاهم يدخلني لأن مرتي نص ديني. وإذا ربيت بنتي تربية صالحة أدخل الجنة. وإذا أنت غلطان، غفرانك ما ينقبل. ثامر: صوتك لا يعلى على أبوي. جان استحيت على نفسك من تصيح. علي: المفروض موقفك نفس موقفي. لو نسيت نسيبك يريد يزوج وحدة وبعده ما زوج بنتك؟ ثامر: بس شويه صوتكم، العالم إيش تحكي علينا؟ خلينا نتفاهم أحسن، ماكو حل إذا تتكاونون. علي: بس أريد أفهم شلون يزوج بنتي لواحد مزوج؟ أنتِ ما تحجين شي؟

كان يأشر على عمته أميرة اللي ساكتة ودموعها تجري لأن إخوانها يتكاونون والسبب ابنها العار. أميرة: إيش أعمل بس فهمني، أبوك ليش يتفاهم؟ وابني العار إيش أعمل له؟ علي: خابري زوجك يجي يربي، لأن بعدين أنا أربي. جدو: أكصها للإيد اللي تنمد على حفيدي. علي: محد غيرك اللي طلع عينه. اللي عندي كلته، وبعد أنتو بكيفكم. بنتي أذبحها وما أنطيها لهذا الناقص. انفجرت أسيل بيهم: أسيل: جدو ترضاها يزوج علي قبل ما يزوجني؟

جدو: الشرع محلل أربعة. أسيل: أييي بس لما أكون منقصه عليه؟ مو لما ما مخليه يحتاج شي؟ بيه شي فهموني؟ صارت تبجي وتلطم. انقهرت عليها، جت عمه جنات تهدي بيها وأسيا لازمتها تمنعها تضرب نفسها. جدي كمل كلامه وتجاهل أسيل وحالتها، كال: جدو: إلياس إذا يريد هاجر، يأخذها وما عندي غير هذا الكلام. علي: على موتي ما أزوج بنتي لشخص ما تريده. الله ياخذك إلياس، خليت الكل يبجي وينقهر. اطلع من البيت لا أشكككككك، اطلععععععع!

جدو: بيتي هذا وإلياس ما يطلع. اللي ما عاجبه هو يطلع. علي: تطردني من بيتك علمود حفيدك؟ وأنا اللي خدمتك بكل شي؟ هذول الاثنين ولا واحد منهم كان يجي يكمل شغلك. أعوف العيادة وأجي أساعدك وأنت تذمر وتحجي علي وعليهم. محد سلم منك. خليتنه نفس الحيوانات نسمع كلامك ونسكت لأن أبونه وأكبر منه. والله وصى بالوالدين نسكت واحنا نشوفك دلل إلياس مع إنه يونس بعمر إلياس، بس أنت تفضل إلياس. عمر وحتى تيم بشنو ينقصون؟ بس إيش أقول وإيش أحكي؟

ما راح يفيد. وبنتي ما تتزوج هذا الحيوان. جدو تجاهل كلام خالو علي ووجه السؤال للياس: جدو: جدو حبيبي، أنت تريد هاجر؟ إلياس: أي. جدو: هاي هيا اللي تريده يصير. أسيل: خلي يطلقني. إلياس: ما أطلق. جدو: يأخذكم اثنينكم وانتهى الموضوع. خالو علي ما سكت. أول مرة أشوفه بهل عصبية. حقها بنته شلون يزوجها واحد مثل إلياس. بقه يحجي ويتوعد، بس جدو ما اهتم. عمه أميرة وأمي وعمه جنات يحجون وياه، ما اقتنع وكال:

جدو: الموضوع انتهى. إلياس يزوج هاجر وأسيل. أسيل: لو أنا لو هاجر، ما أقبل اثنينه. جدو: سدي حلقكِ بنت الكلب! آخر وقت تجي وحدة بطول النعال ترفض كلامي. جدو أخذ إلياس وطلعوا. بطلعتهم فاتوا عمر وناريمان. استغربوا حالة جدو. فاتوا وأمي شرحت الموضوع. عمر صار بارود. تيم بس أحد يحجي وياه ينفجر. يونس مانطق بحرف ويوسف كاعد يم أمه وساكت. رسل تدحك عليه والدموع بعيونها.

جدي ماسمح لأحد يحجي وطلع. خالو علي راح لبيت أهل عمه مروة. وخالو ثامر كاعد على أعصابه. وعمو تامر راح يحاول مع جدو. رجعوا وكل محاولاته باءت بالفشل. الوضع متوتر. بعدها رجعوا وراحوا لبيت جد هاجر يرجعوهم ويحلون الموضوع. « هاجر » اجه حارث من بره وكان يلهث، كوه يجر النفس. بعدها سمعنا صوت زلم وراحوا للاستقبال. شويه وفات همام وكال: همام: بيت جدك اجوا كلهم. هاجر: ليش؟ همام: بعد معرف. راح يصيح أمه تسوي ضيافة، بس ما استاهلون.

رحت يم الباب أريد أسمع. سمعت: أبو همام: البنت بنتكم، بس المفروض ما تجبروها على شخص ما تريده. جدو: أنت قلت بنتنه، يعني نحنا نعرف مصلحته. أبو همام: تعرفون مصلحتها وتريدون تزوجوها لواحد خاطب؟ وعلمود هو عينه جوعانة؟ إلياس: عيني ما جوعانة، فهمت. همام: احجي ويا أبويه باحترام، لا أشكك. علي: إلياس، أنت آخر واحد يحجي. المفروض تسد حلكك بنعال. أبو همام: علي، يعني أنت ما تريد هذا الزواج؟ علي: أي ما أريد.

أبو همام: هاي هيا، لعد انحلت. الزواج ما يصير. أبوها وهي رافضين، وحتى أمها. شلون تزوجوها بالغصب؟ جدو: أي بالغصب. أبو همام: تعرف إنه هي تكدر ترفع عليك قضية. جدو: ما تكدر، لأن أنا واصل. أبو همام: مثل ما أنت واصل، أحنا هم واصلين. وأنا أساعد بنت أختي اللي أنتم ما راح تساعدوها. وعلي، المفروض أنت ويا بنتك مو ويا ابن أختك. علي: أنا مع بنتي، بس محد يقتنع وأبوي رافض. شلون تنطيني حل؟ همام: الحل هاجر ما تتزوج هذا الحيوان.

إلياس: انجب، لا أشك حلكك. همام باستخفاف: لا رجال، الله يسلمك. أبو همام: أصيح للبنية، إذا رفضت محد يجبرها. حاجي، وإذا تبقة على قرارك، أوديها لبغداد على أخويه. جدو: بنتنه هي، ما بنتكم. انفتح الباب وصار بوجهي همام. كال: فوتي. فتت وساكتة، ما حجيت شي. رحت بست بابا وكعدت يم خالي. وكال: أبو همام: أنتِ تريدين تزوجين؟ هاجر: لا. أبو همام: أنتِ ما تريدين إلياس لو ما تريدين تزوجين؟ هاجر: اثنينهم.

أبو همام: حلو. أعتقد سمعت حفيدتك شنو كالت. وأنت لو عندك ذرة كرامة، ترفض تاخذها. إلياس: هاي هيا، ما أريدها. انتهى النقاش. بعد كلام إلياس، ما توقعت يقتنع بسرعة. رجعنا للبيت ومن شافوني البنات، بوس وحضن. رسل كالت: رسل: شصار؟ هاجر: خالي الله يديمه حل السالفة. رسل: الحمد لله. جدي أبد ما كان عاجبه الموضوع. طلع وما شفت وجهه لثاني يوم. إلياس كل ما أحد يحجي وياه، يكب بوجهه.

تيم مرتاح وعمر نفس الشي. يونس عادي، يعني ماشفت بي شي إنو ما همته السالفة، لأن هو إلياس سوى بكل شي وإلياس أكبر من يونس بكم شهر. عمر أكبر من تيم سنة وهو بطل من زمان. بس ناريمان تدرس. وصلني مسج، فتحته وابتسمت لأول مرة. لدرجة رسل وإيلا يأشرون بيدهم واجو يمي وشافوا شكو بالتلفون. كانت رسائل غزل من تميم. كلش حبيت كلامه ومن ختمها بـ "قيطان قلبي". أبد ما ضجت، عكس كل مرة. معرف شرد، أخذت جهازي إيلا وكتبت:

"حبيبي فدوه لهل كلام الحلو، ربي يديمك." جريت التلفون منها، بس دزتها قبل ما آخذه. رد تميم وكال: تميم: كلامج بنص قلبي. أريد بس أسمع كلمة "حبيبي" من حلكج العسل، بس أنتِ حارمتني منها وهي حقي. رسل غمّتني، وإيلا تعلم بيه، عبالك جاهلة. كف فوق راسنا إلياس وكال: إلياس: هيج مفرحتكم المراسلة؟ بله ويا منو؟ هاجر: وأنت شكو شعليك؟ إلياس: شلون شعليك؟ احترمي. هاجر: أنت ما خليت احترام لنفسك. إلياس: المهم ويا منو تحجين؟

هاجر: ويا حبيبي، شعليك أنت؟ هو عباله أشاقه، بس جنت أحجي الصدك. بس هو ضحك مستهزء وعافني وراح. كلت: هاجر: ترا أنا كتلته الحقيقة، بس هو غبي. أنا شكو؟ إيلا: أنتِ كتلتيها غبي. بقينا نسولف وقررت اليوم أحل موضوع تيم وإيلا، لأن ما عاد يُسكت عنه. بعدت خبر لتيم وإيلا يمي. أجه تيم، من فات شاف إيلا فهم الموضوع وكال: تيم: أروح أنا. هاجر: فوت. تيم: استغفر الله. هاجر: ما تحسون نفسكم عجايه؟ تيم: إيش بيك؟

هاجر: من تراسلك وأنت تغلس عليها؟ شنو هاي مو سوالف عجايه؟ تيم: إيش بيك؟ ترا هي السبب مو أنا. هاجر: شلون بله؟ تيم: ترزلني عبالك ابنها مو حبيبها. ما تحترمني وتغلط عليه. وكل كلمة تكلي "انجب" لو "كل خره". شنو طفل أنا؟ هاجر: تحجي صدك؟ تيم: هاي يمج، اسأليها. رسل: لا إيلا، ما يصير. شهل تصرف؟ إيلا: ينرفزني. رسل: بس ما تحجين ويا هيج. هاجر: اعتذري. رسل: مو بس اعتذار، بوسيه من خده يلا.

وكفت كباله واعتذرت وباسته. وهو هم باسها واعتذر. كلت: هاجر: أوي يربي شكد حلوين. تخلوني أشتهي أحب. إيلا: مممم مبين. بقينا سوالف وضحك وكل شوية تميم يدز مسج، وأنا أبقه أبتسم. وتيم يسأل وأنا أكله صديقتي. والبنات يفهمن. خلص اليوم بهدوء. بعدها مرت أيام عادية. إذا يجتمعون، إلياس ما يكون موجود. علاقته هو وأسيل شبه خربانة واحتمال يصير طلاق. هو ما يريد يطلق وهي تريد يطلقها. وعلى هذا الحال.

عمر وناريمان أحلى من العسل، عصافير الحب. تيم وإيلا كلش زينين وحلوين. جنت أتواصل ويا زهراء وكلتلي شلون رجعت. بقت شهرين هي زعلانة، لحد ما أجه يوم... ............ « زهراء » كل يوم أهلي يحجون وياي وأنا أرفض أرجع. كافي عاد، سهل كرامتي. وأنا كتلهم أرجع بس أريد وقت. وهيك سكتوا عني. اليوم كاعدين وكانت عدنا مريم بنت خالتي، وهي حبيبة أحمد أخو أمير. كاعدين متونسين، أجه أمير يشوف علي وراح علي يسلم على أبو. شويه وفاتت أمي وكالت:

أم زهراء: وين علي؟ زهراء: يم أمير. أم زهراء: أمير من نص ساعة طلع. زهراء: تشاقين؟ لعد علي وين؟ أم زهراء: يعني وين يكون الولد. زهراء: ابني وين يمه؟ وين راححححح؟ مريم: خابري أمير، بلكي أخذه يشوف أمه. زهراء: هسه أشوف جهازي ويننننن. مريم انطتني الجهاز. اتصلت على أمير، رفض. اتصلت أربع مرات، يرفض. بالمرة الخامسة رد، وأنا على أعصابي. رد ببرود: أمير: ها؟ شنو؟ اشتاقيتيلي؟ زهراء: علي وين؟ أمير: وياي، ليش؟ زهراء: ليش تاخذه؟

أمير: ابني، قابل بس ابنك؟ زهراء: أمير، جيب ابنييي. أمير: تحلمين تشوفيه إذا ما ترجعين لي. زهراء: هذا استغلال. أمير: أنا كالت اللي عندي. ترجعين، عود تصالي بيها. جي آخذج. ما ترجعين، لا تظلين تلغين براسي ودوخيني. ما فاضي، خوش؟ وابنج ما تشوفيه إلا ترجعين لي. سده بوجهي قبل ما أجاوب. متت أبجي وأحجي. زهراء: يريد يرجعني؟ يريد يكسر ظهري بابني. راح ياخذ علي مني حتى أرجع له. شسوي فهميني؟

مريم: حبيبتي، احجي وياه، فهمي. ما تريدين أنتِ. زهراء: يكلي إذا ترجعين، عود تصالي بيها. وإذا ما ترجعين، لا تتصلين ودوخيني، ما فاضي. وابنج ما تشوفيه. مريم: هو ما عنده حل ويريد يرجعج بهل طريقة. راح أحجي وياه أحمد. زهراء: تميم، هو يقنعه. ماكو غيره. اتصلت على تميم، جاوب: زهراء: تميم، أريدك بشغلة. تميم: إذا أكدر عليها، ليش لا.

زهراء: أصلاً محد غيرك اللي يكدر. أريد تحجي ويا أمير يرجع ابني. ما أكدر بدونه. يريد أرجعله غصب. شني كوه؟ تميم فدوه حاجي، بداعت هاجر، بداعت أمك. تميم: يعني سواها؟ ما توقعت يسويها. عبالي يأجلها شهر بعد. زهراء: يعني أنت تعرف؟ تميم: أي، من طلعتي من البيت وراها أسبوع وكال أسوي هيج حتى ترجع. زهراء: أنا ما أريده، مو كوه. فدوه حاجي. تميم: ما أكدر هسه. ينفتح بيه. أنتِ رجعليه أحسن. لأن مال يطلقج، هاي طلعيها من أذانج، مستحيل.

زهراء: تميم فدوه ساعدني، ما أريد أرجع، حباب. بداعت هاجر، أنت مو تحبها؟ ترضى تنذل؟ تميم: أحاول وأشوف. سديته منه. يومين هو ماكو. مريم حاجت أحمد، يحاجي أخوه. وأحمد يكولها قافل. ماكو بس تميم. مريم بقت يمي لأن جنت تعبانة، مالي خلق الشي. أريد ابني يرجع لحضني. شويه واتصل تميم: زهراء: بشر؟ تميم: والله قافل. هاي يومين أقنعه وهو ماكو. زهراء: والحل؟ ما كدر على فراك علي. راح أموت. أريده.

تميم: ارجعيله. أصلاً علي جاي مفرفح عليج. خابصهم بجي ويدك ويلطم. زهراء: أفكر وأشوف. سديته منه وأنا فاقدة الأمل خلاص. أمير ما يرجع علي، يخليه يمه. ما عندي حل غير أرجع. اتصلت. رد بسرعة كال: أمير: مال أرجع علي، تحلمين ترجعين. كولي أي، ما ترجعين، كولي لا. زهراء: تعال خذني، أرجع. أمير: مسافة الطريق وأنا يمج.

كرهت روحي وكرهت أهلي اللي دائماً ويا أمير، ولا يوم كانوا وياي. طول الوقت أمير صح وأنا غلط. أتحمل ضربه وإهانته علمود أحجي كلمة. وإذا أرد على علي، يجن يقلب إنسان ثاني. غير غيرته الزايدة وغير حب التملك اللي عنده. أحس العائلة كلها هيج. أول واحد عمو محمد أبو تميم. وشيل إيدك الحب عندهم. عبالك هواس. أنا ساعات أنقهر لأن هاجر راح تعيش نفس عيشتي، بس أفرح لأن تكون وياي ودائماً أشوفها. على مريم ما أخاف، لأن أعرف أحمد يختلف عن الكل. كملت غراضي وبديت أبدل. ودك تلفوني، شفت أمير.

رديت كال: أمير: ما راح أطب، طلعي لي. زهراء: بس أكمل تبديل. أمير: بسرعة. سديته وكملت تبديل، بس على كيفي. خلصت وطلعت. كال: أمير: بعد وقت؟ جان تأخرتي أكثر. ليش مستعجلة؟ غلست، ما حجيت شي. رجعت للبيت، بوجهي للغرفة. أشوف ابني. دورت عليه ماكو. انداريت على أمير وكلت: زهراء: علي وين؟ أمير: مو موجود. ماشفتي من فتي، محد اكو. زهراء: أي صح. وينهم؟ أمير: بيت عمي محمد. زهراء: وعلي هم؟ أمير: طبعاً.

عفته ورحت أبدل. كملت وهو كاعد هادئ على التلفون ويراسل. عرفت تميم، لأن لازم ينطي الأخبار. معرف شنو أسوي. كتله: زهراء: شنو أسوي عشة؟ أمير: ماله داعي، تميم يجيب من بره. سكتت، ضايجة. محد اكو وكاعدة وحدي. أمير ملتهي بشغله وأنا أصفن. كلت، خلي أراسل هاجر وأتونس وياها. راسلتها شويه وردت: هاجر: هلا قلبي، إشلونج؟ زهراء: الحمد لله، وأنتِ شلونج؟ هاجر: بعدج يم أهلج؟ زهراء: اليوم رجعت. خلي أحجيلج، لأن راح أطق إذا بقيت ساكتة.

حجيتلها على كل شي، وهيا تسمعني. ما حجيت شي. اكتفت بالسمع وكالت: هاجر: ما أعرف أنصح بصراحة، بس سمعي كلامه، لأن مبين أنتِ ما تخلصين منه. والله صرت أخاف من تميم. زهراء: اثنينهم نفس الخرة. هاجر: يعني أعوفه أحسن؟ زهراء: بكيفج، بس أحسن من ما تعانين نفسي.

بقينا نسولف شويه وراحت. هيا أصلاً مترددة من ناحية تميم. ف كلت، أخليها تخلص منه ترتاح، مو تصير نفس حالتي، لأن هيا ما تستاهل. كافي اللي صار بيها. أجه تميم جاب أكل وراح. كعدنا أكلنا، كملت ولميت السفرة. وبعدها أمير صار يتحرش بيه وبدت سوالفه السرسرية. .............. « هاجر » كلام زهراء ما طلع من بالي. يومين أنا أفكر فيه.

قررت أصالح تميم وأكول له: ما حبيتك. راسلته وكتله موضوع ضروري ومصيري. ورا شويه رد. كتله نصعد اتصال يكون أحسن. وبالفعل صعدنا اتصال. كلت: هاجر: بدون مقدمات، أريد نترك. تميم: هههه، شنو؟ هاجر: ما أعتقد حجيت شي يضحك. تميم: من كل عقلك؟ هاجر: ما حبيتك. حاولت أحبك بس فشلت. أنا وياك ما نرهم. أنت تختلف من ناحية التفكير وغيرها. تميم: هسه فكرتي تحجين إنو ما تحبيني؟ وين جنتي؟ هاجر: من البداية كتلج وأنت تغلس.

تميم: راح أسوي نفسي ماسمعت ولا شي. هاجر: لا سمعت. وأنا ما أريد هاي العلاقة. تميم: لأن هو بكيفج. هاجر: لعد بكيف منو؟ تميم: كافي مسلته، يلا، عندي شغل. هاجر: جاي أحجي بـ جدية. ليش ماخذ الأمر عادي؟ تميم: لا تجننيني. هاجر: ما أجننك، أريد أترك وبس. تميم: ماكو. أنتِ صرتي إلي، شي يخصني. مستحيل ترحين بسهولة. هاجر: أني مو شي تافه علمود تصيرين إلي وتخصيني. أنا إنسانة.

تميم: إنسانة أو غيرها. كلامج ما يهمني. وراح أنسى السالفة بمزاجي. ولا عاد تعيديها. بعدها حجيت كلام حتى أخلص منه، ويا ريت ما حجيته. هاجر: أفهم، ما أكدر أحبك. قلبي مو يمك، قلبي يم واحد غيرك. تميم بعصبية: بنت الكلب! شنو يم غيرك؟ أشكك. وعلي؟ هاجر: هيو، شبيك؟ شهل تصرفات؟ شهل غلط؟

تميم: سمعي زين. هالكو**** تنسي. أنا اللي بقلبج. وإذا أسمع كلام منج عن القندرة، أنهيج. أنتِ اللي مو لغيري. كالج ملكي. قسماً بالله إذا فتحتي الموضوع، أخطفج وأسود عيشتج وأرجعج لأهلج. وياج طفل، دير بالج. انصدمت. ما عرفت شحجي. شنو وياي طفل؟ كلت بغباء: هاجر: يعني تجيب وياي طفل؟ من ما عرفوا يخلوني أرجع لأهلي؟ يعني ينقذني منك؟ شهل لعبان نفس. لعد طفل ينقذني منك، عجيب. تميم: أنتِ ثولة لو تسوين نفسج ثولة؟

طفل يعني تحبلين أنتِ. ابنك. هاجر: شلون أحبل وأنا مو مزوجة؟ تميم: من أخطفج، ألعب وياج وتصيرين حامل. انصدمت. شهل لعبان نفس؟ شلون يحجي وياي هيج؟ هاجر: احترم نفسك. أنا متربية مو مثلك. احجي وياي بأدب، أحسن لك. تميم: إذا ما حجيت بأدب، دزيلي كوا*** يربيني. هاجر: هسه إلياس شكو؟ تحجي عليه. تميم: ضجتيييي؟ علىىىىى حبيبببب كلبججج؟ هاجر: كافي تصيح. شسالفة؟ أنا ما أريدك، مو غصب. تميم: غصب؟ محد كالج وافقي من البداية.

هاجر: أنت هددتني. تميم: وهسه هم جاي أهددج. ترا أنا مو بس أهدد، أنفذ. هم. وأنتِ بنت أبوج وسباعية ومن ظهر زلمة. عوفيني وشوفي. سديته بوجهه. ياربي، وين وديت نفسي؟ وين رحت؟ ليش دخلت نفسي بهل شي؟ مالي غيرك ربي، تساعدني وتنقدني من الناس المو زينة. بقيت يومين ما أحجي ويا. بعدها أجه وكال: تميم: ما حاجيتيني وماتحجين وياي؟ شنو سالفتج؟ شفتها وغلست، ما رديت.

أمي كالت: نروح لبيت أهلها. وبالفعل رحنا وشفت البنات وارتحت. حجيتلهم كل شي، كل شي حرفياً بدون أي نقص. جنت كاتمة بقلبي لحد ما شفتهن. نور: يمكن يحبج ويكلج هيجي حتى تخافين وما تعوفيه. ندى: أي أتفق معاج. ما معقولة يسوي هيجي. بعدين أحنا وين عايشين؟ شهل فلم الهندي؟ ريم: ليش تاخذون الموضوع بمزح؟ يمكن يكون صادق بتنفيذ وعده. ولاتنسين لما صديقتج كالت له ماتريدك، إيش سوا؟ هاجر: هو يعرف بيتي، بس أنا ما علمته المنطقة حتى.

هند: نسأل بارق، هسه أصيح له. راحت شويه واجت وياها بارق. كتلوا: هاجر: شوف، إذا مثلاً أنت تريد تجي علي، بس ما تعرف بيتي وين، إيشلون تجيبه؟ بارق: سهلة، من الموقع. هاجر: بس مثلاً ما حاطة موقعي بالتواصل، شلون؟ بارق: باعي، اكو برنامج يحدد موقعج، وهذا بفلوس. نزلي ويبحث عن أي عنوان تردي. هاجر: شكراً، تعبتك. بارق: ولا يهمك. راح وأنا أصفن. هو جاب موقعي من هذا البرنامج اللي كال علي بارق؟

أكيد تناقشنا بالموضوع. ما حبيتها تاخذ قرار بسرعة وتندم عليه. كلت، أشوف زهراء تنصحني. نكت على بيت جدي. جانوا مغيرين الرمز، بس حطيت الرمز. اجت كمية رسائل من كدها. تلفوني صار يصفن. فتحتها وكلها من تميم. كمية سب وغلط قذر علي وعلى إلياس. كمية لعبان نفس. ساعة يتعزل بيه، وساعة يغلط ويسب. حسيت بي عنده انفصام بالشخصية. كتبت: هاجر: خليني أفكر. رد بسرعة، عبالك جان منتظرني. تميم: بس أخلص الزبون، أتصل عليج. ما أريد أي اعتراض.

نص ساعة واتصل بيه. ترددت، فتحت. استغفرت وفتحت. تميم: أي أسمعج. هاجر: إذا أنهيت اللي بينه، شنو تسوي؟ تميم: أعتقد كتلج. هاجر: شنو؟ سايبة الدنيا حتى تخطفني ومحد يعرف؟ شكلك تابع هندي كثير. تميم: ارفضي وشوفي. هاجر: عناد بيك، راح أرفض. تميم: أي، يلا يا بنت أبوج، يا سباعية، ارفضي. كلامه كان تحدي، وأنا أحب اللي يتحدا. كلت: هاجر: خوش، أنا ما أريد وراح أنهي كل شي. بعد هاي المحادثة، مشت يومين وماكو شي. تميم ما يراسل ومختفي.

راسلت زهراء وكالت: زهراء: أنتو مو عفتوا؟ ليش تميم طبيعي وعبالكم ما بي شي؟ يضحك ويحشش نفسه. هاجر: جذاب، والله عرفت. زهراء: هما صح مجانين، بس ماتوصل بيهم للخطف. لأن عمو محمد من سابع المستحيلات يقبل أو يخلي ابنه يروح لهيج طريق، لأن يعرف عواقبها. هاجر: أي صح، حسب مكانته. هو يعرف عقوبة اللي يخطف. وبعدين إيشلون يخطفني؟ شنو ما حد راح يعرف؟ شهل خرط؟ يربي، هذا يتابع هندي زايد.

سديته منها. ومشى أسبوعين. هيج نسيت السالفة، أصلًا ماتصدق إنو يخطفني. شنو مسلسل هندي؟ كاعدين على الغداء واتصلت عمه مريم. كال: مريم: اليوم نروح للسوق نجهز لعمر، وراح تجي معانا ناريمان. مروة: منو يجي بعد؟ مريم: أنا وأنتي وهاجر وإيلا وإيليف وعمر وناريمان. مروة: أكول لعلي وأرد لج خبر.

طبعاً بابا كان بالعيادة وكال تغدوا، ما أجي. كملنا أكل. وأمي اتصلت بـ بابا وكال روحوا. بدلنا العصر. جنت متحمسة. يريدون يكملون جهاز حتى يزوجون قبل المدارس. أجه عمر أخذنا ورحنا. جانت حشكة المكان، بس رغم ذلك متونسين. نزلنا على كوزمتك، يشترون عطورات ومكياج وملابس نوم وهيج أشياء. ناريمان وجها أحمر. عمر قرر يبقى بره، لأن هو هم خجول. كالت إيلا: إيلا: خذوا الأحمر، حلو. مريم: أنتِ انجبي، أدبسزز. إيلا: اهو، إيش بيكم؟

والله كبرت. عمه رزلتها بنص المحل، وبقينا نضحك عليها. وهيا كلبت خلقتها، ما عاجبها. اشتريت شوية شغلات وياهم على الواهس، لأن ما أعرف أطلع لمكان وما أشتري. إيلا: هي دودا، لازم تشترين. هاجر: أي طبعاً.

طلعنا من المحل ودخلنا أكثر من محل. كل ما أطلع ألك شخص واقف يدحك عليّ ويضحك. ونفس الشخص وين ما أروح موجود. ما اهتميت للوضع، لأن دائماً أشوف زاحفين. وخصوصاً هل فترة، لو لابسة كونيه مال حب شمس هم يدحكون. مانطيت أهمية للموضوع. بقينا نفتر ونشتري. خلصنا وكال عمر: عمر: خلي نروح مطعم نتعشى.

محد اعترض، لأن الكل جان ميت جوع. رحنا للمطعم، وشفت نفس الشخص كاعد ويمه عصير. خفت من الموضوع، لأن ماينسكت عنه. المشكلة ولا مرة شايفته. منو هذا؟ ومعرف وليش يلحقنا؟ ومن أدحك عليه، يضحك، عبالك يعرفني. مو سالفة زحف أو شي. بسبب هذا الشي، ما عرفت أكل عدل. كل ما أشيل راسي، أشوفه يدحك عليّ ويبتسم. تنرفزت حيل. كملنا وطلعنا، وعمر يحاسب. رحنا للسيارة، باعتبار قريبة. عمه كالت:

مريم: هاجر، ودي هاي الفلوس لعمر، لأن صرف كثير. أخاف ما عنده. رحت، بعدني ما واصلة المطعم، وشفت أجه الولد عليّ وكال: هاجر، شلونج؟ بلعت ريكي وخفت كلش. وين يعرف اسمي؟ ومنو هذا؟ رجع كال: ليش مبين عليج خايفة؟ هاجر: مو خايفة، منو أنت؟ ..: ما تعرفيني، بس أنا أعرفج. هاجر: أروح، أحسن لي.

ردت أمشي ولزم إيدي وحط إيده على حلكي. متت خوف. وبعدها ما حسيت على شي. المشكلة المكان اللي كنت بيه جان فارغ وقريب من الساحة مال انتظار، وماكو بي أحد. والمطعم جديد فاتح وماكو يمه محلات كثير. كعدت، شفت نفسي بغرفة، بس إيدي مشدودة وحلكي هم. أريد أصيح، أسوي شي، ما أقدر. حتى رجلي مشدودة. بقيت أنتظر فترة أحد يجي. بعدها فات واحد ملثم. بقيت فاتحة عيوني وخايفة. فتح حلكي، بس ما حجه شي. كلت: هاجر: أنا ليش هينة؟

أريد أفهم. منو أنت وشعليك بيه؟ ضحك وعافني وطلع. تنرفزت. بقيت أصيح أريد أحد يجي أو هو يرجع. ماكو. مرة فتره ورجع وجايب أكل. لعبة نفسي. كال: ..: أكلي. هاجر: ماريد. أحجي، منو أنت؟ وين أنا؟ وليش هنا أصلاً؟ ..: مستعجلة؟ تعرفين. هاجر: يعني هسه أنا مخطوفة؟ شهل دراما هاي؟ ..: ههههه. دراما؟ ليش دراما؟ ممكن غير شي. هاجر: شلون يعني؟ ..: مو هسه تعرفين. هاجر: أهلي وين؟ وشعجب سكتوا؟ بعدين شنو مخطوفة؟ من كل عقلك؟

ما تعرف بنت منو أنا؟ ..: بنت منو يعني الوزير؟ وكافي عاد، أنتِ مخطوفة. لا تظلين تعيدين السالفة. هاجر: ليش أحس جاي نصور مسلسل؟ ..: عاط بيه؟ متت خوف. ..: كافي، أنتِ مخطوفة. شنو مسلسل؟ شنو خره؟ سدي حلكج، ترا طلقة براسج وأخلص منج. تحملتج هواي. هاجر بمتمتة: تـ تـ تمام، بس مـ مـ منو أنت؟ ..: معقولة حتى صوتي ما حافظته؟ هاجر: يعني أنا أعرفك؟ هز راسه. أجه بالي إلياس، بس ليش حتى يخطفني؟ كلتها: هاجر: أنت إلياس؟ مو؟ احجي.

..: هم كالت قندرة. أنا مو النعال مالتج. هاجر: منو أنت؟ عدو جدي لو شنو؟ ..: أنا..... ................ انتهى البارت. منو تتوقعون خطفها وليش؟ كالت عدو جدي، هيج جدها عنده أعداء؟