رواية لكنها ابنتي الفصل الثالث 3 - بقلم هاجر حسين

الأم بتطلع من الحمام بتلاقي الجزمه مكسور وريم مسكها. وبرضو ملك بتخلي ريم هي الغلطانه. بتمر السنين وبيجي يوم التخرج. فريد: أنا جاي الغداء. بتعرفي تعملي أكل بقا ولا شكلي هدبس في الجوازة؟ ريم: لا هتتدبس. فريد: مش مهم المهم إن دبلتي هتكون في إيدك النهارده. في الوقت ده ملك بتبقي بتسمع كلام ريم وفريد وبترجع على البيت وهي بتعيط. الأم: ملك ملك مالك ياحبيبتي قوليلي في إيه.

ملك: مليكيش دعوة بيا روحي حضري الغداء والشربات عشان حبيبتك ريم خطوبتها النهارده زمانها على وصول. الأم: في إيه ياملك، انتي عارفة إن حتى لو ريم معانا وأنا بعملها كويس، فـ عشان هي بنت اختي، لكن انتي بنتي الوحيدة ومهما حبيت ريم وخليتها تقولي يا ماما هتفضلي ليكي المعزة والمكانة الخاصة في قلبي وده حقك ياروحي. ملك: بس انتي مبتعمليش كده للأسف، انتي ديما مع ريم.

الأم: بحدة ملك في إيه، انتي عارفة إن طول عمري مابجيش على واحدة فيكم واللي غلط بيتحاسب. الأم: قوليلى بس مالك. ملك: لو قولتلَك هتعمليلي اللي أنا عايزه. الأم: قولي ياحبيبتي، هو أنا ليا غيرك. ملك: فريد، أنا بحب فريد ياماما. الأم: ملك انتي اتجننتي، ده هيبقي خطيب اختك النهارده. ملك: بس أنا بحبه من ساعة مادخلنا الجامعة، أنا بحبه ياماما، أنا لو متجوزتوش هموت نفسي.

الأم: انتي عارفة انتي بتطلبي مني إيه، انتي عايزاني أروح أقول لأختك تتخلى عن حبها ليكي. ملك: لو عايزة تثبتيلي حبك ليا وإني فعلاً أنا اللي بنتك كنتي هتعملي كده عشان خاطر سعادتي. الأم: انتي عارفة انتي بتطلبي إيه، أقولها اتخلي عن حبها لأختك. ملك: متقوليش حاجة واتفضلي اطلعي من أوضتي لو سمحتي. الأم بتطلع وبيبقى على ملامحها القلق والخوف على ملك لتعمل في نفسها حاجة. ريم: ماما أنا رجعت. ريم بتجري على أمل وبتروح تحضنها.

ريم: مش عارفة أقولك أنا فرحانة إزاي، مش قادرة أصدق إن فريد جاي النهارده وهلبس دبلته، ياه ياماما أنا فرحانة أوي. الأم: ريم ممكن تيجي معايا شوية. الأم بتاخد ريم وبيدخلوا الأوضة بتاعت أمها. الأم: ريم لو طلبت منك طلب تعمليه. ريم: مالك ياماما حساكي فيكي حاجة، انتي كويسة. الأم: سيبك مني دلوقتي وردي عليا. ريم: أكيد يا أمي اللي انتي عايزاه. الأم: حتى لو طلبت منك إنك تتخلي عن خطيبك.

ريم: اتخلي عن فريد، طب ليه، هو فريد وحش ياماما، سمعتي عنه حاجة وحشة. الأم: بالعكس، فريد بني آدم مثقف ومحترم وعنده شركة ويعتمد عليه. ريم: أومال بتقولي ليه إني أتخلى عنه، ماتقولي ياماما في إيه. الأم: أنا طلبت منك طلب ولحد دلوقتي انتي مجوبتنيش، تقدري تتخلي عن حبك عشان... ريم: عشان إيه ياماما. الأم: عشان ملك. ريم: انتي بتقولي إيه، بعدين أتخلى عن فريد لملك ليه.

الأم: ملك بتحب فريد من قبل انتي ماتحبيه ياريم، من ساعة مادخلتو الجامعة. ريم: بس فريد بيحبني أنا. الأم: بس الأحق بيه هي ملك، هي اللي حبيته قبلك. ريم: انتي سامعة نفسك بتقوليلي إيه، عايزاني أتخلى عن حبي لأختي. الأم: عشان خاطري يابنتي، ده رجاء أم، أنا مش هقدر أشوف ملك بتموت قصاد عيني. ريم: بتموت... الأم: ملك قالت إنها هتموت نفسها لو مبقاش فريد معاها. ريم: بانهيار...

وأنا أنا إيه المفروض أسيبه عشان ست ملك بتحبه، طب أنا معاكي هي بتحبه بس فريد مبيحبهاش. الأم: مع الوقت فريد هيحبها. ريم: شيفاكي مقررة كل حاجة. الأم: أنا طلبت منك طلب، عايزة تعمليه ماشي، مش عايزة أوعدك إني مش هقف في طريقك. فجأة الباب بيخبط وبيقطع حديث الأم وريم. الأم بتروح تفتح الباب وأهل فريد بيدخلوا وبيقعودوا مع الأم.

أم فريد: ماكنتش متوقعة في يوم من الأيام إني هدخل أخطب لأبني بنت من أمها، بس مع اللي شفته مع الوقت وتربيتك لملك والأسلوب الراقي بتاعها، حقيقي فعلاً عرفتي تربي، أنا بحييكي على التربية العظيمة دي. الأم بتبقي قاعدة مش فاهمة هي ليه بتكلم عن ملك مع إنهم جايين لريم. فريد وهو بيقرب على أمه: فريد: ماما إحنا جايين عشان ريم، أنا عارف إنك بتحبي ملك وودها ليكي وإنها بتسأل عنك، لكن إحنا جايين هنا عشان ريم.

أم فريد: متفهمنيش غلط، أنا عارفة إن ابني جاي النهارده يطلب إيد ريم، بس أنا بتكلم عن ملك من اللي شفته منها وسؤالها عني باستمرار، فبصراحة أنا متشوقة أشوف ريم، أكيد هي بنفس أدب وزوق ملك. فريد: أنا عارف إني جاي أنا وأمي بس عشان والدي مسافر الأيام دي بره. الأم: كفاية زوق والدتك يابني، بعدين انتو تشرفوا أي حد. فريد: طب حيث كده اسمحيلي أطلب إيد ريم. ريم بتطلع من الأوضة وبتقف في وشهم. ريم: أنا مش موافقة.